ᓴᒧᐃᓕ ᓯᕗᓪᓖᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖏᕈᑎᐅᑉ ᐃᒃᓯᕐᕕᖁᑎᖓᑕ ᑎᒍᔭᐅᓂᖓ

¹ ᓴᒧᐃᓕᓗ ᐅᖃᓕᕐᐳᖅ ᐃᓴᕆᐊᓕᒥᐅᓕᒫᓄᑦ. ᐃᓴᕆᐊᓕᒥᐅᑉ ᐅᓇᑕᕆᐊᓕᓚᐅᕐᒪᑕ ᐱᓕᔅᑍᓂᒥᐅᓂᒃ; ᑕᖕᒫᕐᓯᒪᓚᐅᕐᐳᓪᓗ ᐃᐱᓂᓯᕆᒥ, ᐱᓕᔅᑏᓂᒥᐅᑦ ᑕᖕᒫᕐᓯᒪᑎᓪᓗᒋᑦ ᐊᐱᒃᒥ.

² ᑕᕝᕙ ᐱᓕᔅᑍᓂᒥᐅᑦ ᑲᑎᑉᐳᑦ ᐅᓇᑕᕆᐊᕐᓗᑎᒃ ᐃᓴᕆᐊᓕᒥᐅᓂᒃ, ᐅᓇᑕᕕᒃᔪᐊᓕᕋᒥᒡᓗ ᓵᓚᖃᕐᐳᑦ ᐃᓴᕆᐊᓕᒥᐅᓂᒃ, ᑐᖁᑦᓯᓚᐅᕐᐳᓪᓗ ᐊᖑᑎᓂᒃ 4,000ᓂᒃ ᐅᓇᑕᕐᕕᒋᔭᒥᖕᓂ.

³ ᐅᓇᑕᕐᑏᓪᓗ ᐅᑎᕐᒪᑕ ᑕᖕᒫᕐᕕᒋᓯᒪᔭᒥᖕᓄᑦ, ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐅᖃᕐᐳᑦ, “ᓱᖕᒪᑦ ᐊᑕᓂᐅᑉ ᐅᓪᓗᒥ ᐱᓕᔅᑍᓂᒥᐅᑦ ᓵᓚᖃᕐᑎᑉᐰᑦ ᐅᕙᑦᑎᓐᓂᒃ? ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᐂᓚᐅᕐᓚᕗᑦ ᓮᓗᐊᒥᑦ, ᐃᓚᒋᓂᐊᕐᒪᑎᒍᑦ ᐱᐅᓕᓗᑕᓗ ᐊᑭᕋᑦᑕ ᐱᔪᓐᓇᕐᓂᖏᓐᓂᑦ.”

⁴ ᑕᕝᕙ ᑎᓕᓯᕗᑦ ᐅᖃᕆᐊᕐᑐᕐᑐᓂᒃ ᓮᓗᐊᒧᑦ, ᐊᑕᓂᐅᓪᓗ ᐊᔪᒐᖃᖏᑦᑑᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᓇᒃᓴᕐᐹᑦ, ᐃᒃᓯᕙᐅᑕᕐᔪᐊᖃᕐᑑᑉ ᓯᕌᐲᑦ ᐃᓴᕈᓖᒃ ᖁᓛᓂ; ᐃᓔᓪᓗ ᐃᕐᓂᖏᒃ ᕼᐅᐱᓂᓗ ᐱᓂᕼᐋᔅᓗ, ᐃᓚᐅᕗᒃ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᑕᕝᕗᓐᖓᕐᑕᐅᑎᓪᓗᒍ.

⁵ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᑎᑭᐅᑦᔭᐅᖕᒪᑦ ᑕᖕᒫᕐᓯᒪᕕᖓᓐᓄᑦ, ᐃᓴᕆᐊᓕᒥᐅᓕᒫᑦ ᖁᕕᐊᓱᖕᓂᕐᒧᑦ ᕾᒐᓛᕐᒪᑕ, ᓄᓇ ᓴᔪᒃᐳᖅ.

⁶ ᐱᓕᔅᑍᓂᒥᐅᑦ ᑐᓴᕋᒥᒃ ᕾᒐᓛᕐᑐᓂᒃ ᐅᖃᕐᐳᑦ, “ᕾᒐᓛᕐᑐᓂᒃᑯᐊ ᐄᑉᕈᐃᑦ ᑕᖕᒫᕐᓯᒪᕕᖓᓐᓂᑦ! ᖃᓄᐃᓕᐅᓕᕐᑐᑦ?” ᑐᓴᕋᒥᒡᓗ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᑕ ᑎᑭᐅᑦᔭᐅᓂᖓᓂᒃ ᐄᑉᕈᐃᑦ ᑕᖕᒫᕐᓯᒪᕕᒋᔭᖓᓄᑦ,

⁷ ᐱᓕᔅᑍᓂᒥᐅᑦ ᑲᑉᐱᐊᓱᓕᕐᐳᑦ; ᐅᖃᕐᓗᑎᒡᓗ, “ᒎᑎ ᑕᖕᒫᕐᓯᒪᕕᖓᓐᓄᐊᕐᑕᐅᕗᖅ! ᓵᓚᐅᓂᐊᓕᕐᐳᒍᑦ! ᑍᒫᒃ ᑕᒪᑐᒪ ᓯᕗᓂᖓᒍᑦ ᐱᓂᐊᕐᕕᐅᓚᐅᕐᓯᒪᓐᖏᓚᒍᑦ!

⁸ ᓵᓚᐅᓂᐊᓕᕐᐳᒍᑦ! ᑭᓇᒨᓪᓕ ᐱᐅᓕᔭᐅᔪᓐᓇᕐᐱᑕ ᒎᑎᓂᑦ ᐱᔪᓐᓇᕐᑐᕐᔪᐊᓃᑦ? ᑍᒃᑯᐊᖑᖕᒪᑕ ᒎᑏᑦ ᐊᓯᕈᐃᓚᐅᕐᑐᑦ ᐄᑦᔨᑉᑎᒥᐅᓂᒃ ᖃᓄᐃᑦᑐᑐᐃᓐᓇᓄᑦ ᐃᓄᖃᖏᑦᑐᒥ!

⁹ ᓯᕘᕋᑦᑍᓕᒋᑦᓯ ᐱᓕᔅᑍᓂᒥᐅᑦ! ᐅᓇᑕᕆᑦᓯ ᐊᖑᑎᑎᑐᑦ, ᑍᒤᓐᖏᑐᐊᕈᑦᑕ ᓯᐊᓛᖑᓕᕐᓂᐊᕐᐳᒍᑦ ᐄᑉᕈᐃᓄᑦ, ᓲᕐᓗ ᑍᒫᒃ ᓯᐊᓛᕆᓚᐅᕋᑦᑎᒍᑦ; ᑍᒤᒻᒪᑦ ᐅᓇᑕᕆᑦᓯ ᐊᖑᑎᑎᑐᑦ!”

¹⁰ ᑕᕝᕙ ᐱᓕᔅᑍᓂᒥᐅᑦ ᐅᓇᑕᓚᐅᕐᐳᑦ ᐊᒃᓱᕈᕐᓗᑎᒃ, ᐃᓴᕆᐊᓕᒥᐅᓪᓗ ᓵᓚᒋᓚᐅᕐᐰᑦ, ᑖᒃᑯᐊᓗ ᕿᒫᕗᑦ, ᐅᓪᓚᒡᓗᑎᒃ ᐊᖏᕐᕋᒥᖕᓄᑦ; ᑐᖁᕋᕐᑕᐅᓂᕐᔪᐊᕐᑕᖃᓚᐅᕐᐳᕐᓗ: ᐃᓴᕆᐊᓕᒥᐅᑦ 30,000 ᐅᓇᑕᕐᑏᑦ ᑕᕝᕙᓂ ᑐᖁᑕᐅᓚᐅᕐᐳᑦ.

¹¹ ᒎᑎᐅᓪᓗ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ ᑎᒍᔭᐅᓚᐅᕐᐳᖅ; ᐃᓔᓪᓗ ᐃᕐᓂᖏᒃ, ᕼᐅᐱᓂᓗ ᐱᓂᕼᐋᔅᓗ ᑕᕝᕙᓂ ᑐᖁᑕᐅᓚᐅᕐᐴᒃ.

ᐃᓔᑉ ᑐᖁᓂᖓ

¹² ᐊᖑᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᔪᖅ ᐅᓪᓔᓐᓇᕐᓗᓂᖅ ᐅᓇᑕᕐᕕᐅᔪᒥᑦ ᓮᓗᐊᒧᑦ ᑎᑭᑉᐳᖅ, ᐊᓐᓄᕌᖏᑦ ᐊᓕᒃᑐᕐᓯᒪᓪᓗᑎᒃ ᓂᐊᖁᖓᓗ ᐳᔪᕋᒥᑎᕐᓯᒪᓪᓗᓂ.

¹³ ᑕᕝᕗᖓᓗ ᑎᑭᒻᒪᑦ, ᐃᓔ ᐃᒃᓯᕙᓚᐅᕐᐳᖅ ᐊᖅᑯᑎᐅᑉ ᓴᓂᐊᓂ ᖃᐅᔨᓴᕐᓗᓂ, ᐆᒻᒪᑎᒥᒍᑦ ᐃᓱᒪᔮᕈᑎᖃᕐᓗᓂ ᒎᑎᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓᓂᒃ. ᐊᖑᑦ ᑖᓐᓇ ᑕᕝᕗᖓ ᑎᑭᓐᓇᒥ ᑐᓴᕐᑎᑦᓯᓚᐅᕐᐳᖅ ᐃᒡᓗᒐᓴᖕᓃᑦᑐᓂᒃ, ᐃᒡᓗᒐᓴᖕᓃᑦᑐᓕᒫᓪᓗ ᕿᐊᓕᕐᐳᑦ.

¹⁴ ᐃᓔᓕ ᑐᓴᕋᒥ ᓂᐱᓂᒃ ᕿᐊᕙᓗᖕᓂᒃ ᐊᐱᕆᕗᖅ, “ᓱᖕᒪᑦ ᓂᐹᔪᐊᓘᕕᓯ?” ᑍᓐᓇ ᐊᖑᑦ ᑐᐊᕕᕐᓗᓂ ᐃᓔᒧᐊᕐᐳᖅ ᐅᖃᐅᑎᓪᓗᒍᓗ ᐱᓂᐊᕐᓂᐅᓯᒪᔪᓂᒃ.

¹⁵ ᐃᓔᓕ ᐊᕐᕌᒍᖃᓕᓚᐅᕐᐳᖅ 98ᓂᒃ ᑕᐅᑐᒍᓐᓃᓕᕐᓗᓂᓗ.

¹⁶ ᐊᖑᑎᐅᓪᓗ ᐃᓔ ᐅᖃᐅᑎᕚ, “ᕿᒪᒃᓯᓚᐅᕐᐳᖓ ᐅᓇᑕᕐᕕᐅᔪᒥᑦ; ᐅᓪᓔᓐᓇᕐᓗᖓᓗ ᑕᒪᐅᖓ.” ᐃᓔ ᐊᐱᕆᕗᖅ, “ᖃᓄᐃᑦᑐᖃᕐᒪᑦ ᐃᕐᓃᒃ?”

¹⁷ ᐅᖃᕆᐊᕐᑐᕐᓯᒪᔪᖅ ᑭᐅᕗᖅ ᐅᖃᕐᓗᓂ, “ᐃᓴᕆᐊᓕᒥᐅᑦ ᕿᒫᓚᐅᕐᐳᑦ ᐱᓕᔅᑍᓂᒥᐅᓂᑦ; ᐅᓄᕐᑐᕐᔪᐊᓪᓗ ᑐᖁᑕᐅᓪᓗᑎᒃ; ᐃᕐᓃᒃᑭᒡᓗ ᕼᐅᐱᓂᓗ ᐱᓂᕼᐋᔅᓗ ᑐᖁᑕᐅᕘᒃ, ᒎᑎᐅᓪᓗ ᐊᖏᕈᑎᖓᑕ ᐃᒃᓯᕐᕕᖓ ᑎᒍᔭᐅᓪᓗᓂ.”

¹⁸ ᐊᖑᓪᓗ ᐅᖃᓚᐅᕐᒪᑦ ᐊᖏᕈᑎᐅᑉ ᐃᒃᓯᕐᕕᖓᓂᑦ, ᐃᓔ ᓂᕕᕐᐳᖅ ᐃᒃᓯᕙᕕᖕᒥᓂᑦ ᐃᑎᕐᑕᕐᕕᐅᑉ ᓴᓂᐊᓂ; ᐅᕐᕈᒐᒥ ᖁᖓᓯᐊ ᓇᐱᕗᖅ ᑐᖁᓪᓗᓂᓗ, ᐃᓄᑐᖃᐅᓕᓚᐅᕐᒪᑦ, ᐅᖁᒤᑦᑑᓪᓗᓂᓗ. ᐃᓴᕆᐊᓕᒥᐅᓄᑦ ᐃᖅᑲᕐᑐᐃᔨᐅᓚᐅᕐᐳᖅ ᐊᕐᕌᒍᓂᒃ 40ᓂᒃ.

ᕕᓂᕼᐊᔅ ᓄᓕᐊᕕᓂᖓᑕ ᐃᕐᓂᕐᑖᕐᓂᖓ

¹⁹ ᐃᓔᓪᓕ ᐅᑯᐊᖓ, ᐱᓂᕼᐋᓯᐅᑉ ᓄᓕᐊᖓ, ᓯᖎᓚᐅᕐᐳᖅ ᐃᕐᓂᕕᒃᓴᖓᓗ ᓇᓪᓕᐅᑎᓯᒪᓕᕐᓗᓂ. ᑐᓴᕋᒥᓗ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖓᑕ ᑎᒍᔭᐅᓂᖓᓂᒃ, ᓴᑭᖓᓗ ᐅᐃᖓᓗ ᑐᖁᓂᖏᓐᓂᒃ, ᐃᕐᓂᓱᐊᓚᕿᓚᐅᕐᐳᖅ; ᐃᕐᓂᒐᒥᓗ ᐋᓐᓂᐊᒻᒪᕆᓚᐅᕐᐳᖅ.

²⁰ ᑐᖁᓕᕐᑎᓪᓗᒍᓗ ᐊᕐᓁᑦ ᐃᑲᔪᓚᐅᕐᑐᑦ ᐅᖃᕐᐳᑦ ᑖᑦᓱᒧᖓ, “ᓯᕘᕋᑦᑍᓕᒋᑦ, ᐃᕐᓂᕐᑖᕐᐳᑎᑦ!” ᑭᓯᐊᓂᓕ ᑭᐅᓚᐅᓐᖏᓚᖅ ᐃᒃᐱᒍᓱᒐᓂᓘᓐᓃᑦ.

²¹ ᑕᕝᕙ ᐃᕐᓂᕐᑖᓂ ᐊᑦᓯᕐᐹ ᐃᑲᐸᑦᒥᒃ, ᐅᖃᕐᓗᓂᓗ, “ᐊᑕᓂᐅᑉ ᐱᓐᓇᕐᓇᕐᓂᖓᑕ ᐃᓴᕆᐊᓕᒥᐅᑦ ᕿᒪᖕᒪᒋᑦ!” ᐱᑦᔪᑎᖃᕐᓗᓂ ᐊᖏᕈᑎᐅᑉ ᐃᒃᓯᕐᕕᖓᑕ ᑎᒍᔭᐅᓂᖓᓂᒃ ᓴᑭᖓᑕᓗ ᐅᐃᖓᑕᓗ ᑐᖁᓂᖏᓐᓂᒃ.

²² ᐅᖃᕐᐳᕐᓗ, “ᐊᑕᓂᐅᑉ ᐱᓐᓇᕐᓇᕐᓂᖓᑕ ᐃᓴᕆᐊᓕᒥᐅᑦ ᕿᒪᒃᐰᑦ, ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖓ ᑎᒍᔭᐅᖕᒪᑦ.”