ᓴᒧᐃᓕ ᓯᕗᓪᓖᑦ 31 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᐅᓕᐅᑉ ᐃᕐᓂᖏᑕᓗ ᑐᖁᓂᖏᑦ

¹ ᐱᓕᔅᑍᓂᒥᐅᑦ ᐅᓇᑕᓚᐅᕐᐳᑦ ᐃᓴᕆᐊᓕᒥᐅᓂᒃ ᖃᖅᑲᒥ ᒋᐅᓪᐳᐊᒥ, ᐃᓴᕆᐊᓕᒥᐅᑦ ᑐᖁᑕᐅᓚᐅᕐᐳᑦ ᐅᓄᕐᑐᐊᓗᐃᑦ, ᐊᖓᔪᖅᑳᕐᔪᐊᕐᓕ ᓴᐅᓕ, ᐃᕐᓂᖏᓪᓗ ᐊᓯᖏᓪᓗ ᕿᒫᓚᐅᕐᐳᑦ.

² ᐱᓕᔅᑍᓂᒥᐅᓪᓕ ᐊᖑᓯᕗᑦ ᓴᐅᓕᒥᒃ ᐃᕐᓂᖏᓐᓂᒡᓗ ᐱᖓᓱᓂᒃ ᔫᓇᑕᓂ, ᐊᐱᓇᑕᑉ ᒪᓪᑭᓱᐊᓗ ᑖᒃᑯᐊᓗ ᑐᖁᑕᐅᕗᑦ.

³ ᐅᓇᑕᕐᓂᕐᓕ ᐊᒃᓱᕈᕐᓇᒻᒪᕆᓕᓚᐅᕐᐳᖅ ᓴᐅᓕᒧᑦ, ᐱᓯᒃᑖᕐᑎᒧᓪᓗ ᐱᓯᒃᑕᐅᓚᐅᕐᐳᖅ ᐊᑦᑕᕐᓇᕐᑐᒃᑯᑦ.

⁴ ᐅᕕᒃᑲᒧᑦ ᐅᖃᕐᐳᖅ ᓱᒋᐅᑎᖏᓐᓂᒃ ᐊᒃᔭᕐᓯᔨᒧᑦ, “ᓴᕕᒡᔪᐊᑦ ᑎᒍᓗᒍ ᑐᖁᓚᐅᓐᖓ, ᒎᑎᖃᖏᑦᑐᑦ ᐱᓕᔅᑍᓂᒥᐅᑦ ᑐᖁᑦᓯᖁᓇᒋᑦ ᐅᕙᓐᓂᒃ ᐱᔪᕆᑦᔪᑕᐅᖁᓇᖓᓗ.” ᐅᕕᒃᑲᕐᓕ ᑍᒤᓕᐅᕈᒪᓚᐅᓐᖏᓚᖅ ᑲᑉᐱᐊᓱᓗᐊᓚᐅᕋᒥ. ᑍᒤᒻᒪᑦ ᓴᐅᓕᐅᑉ ᓴᕕᒡᔪᐊᓂ ᓇᑉᐸᕐᓗᓂᐅᒃ ᒪᓂᖅᑲᒧᑦ ᐃᒻᒥᓂᒃ ᐅᕐᕈᕕᒋᕚ ᑲᐱᓪᓗᓂ.

⁵ ᐅᕕᒃᑲᐅᓪᓕ ᓴᐅᓕ ᑕᑯᒐᒥᐅᒃ ᑐᖁᔪᖅ, ᐃᒻᒥᓂᒃᑕᐅᖅ ᓴᕕᒡᔪᐊᒥᓂᒃ ᖃᓚᓯᓪᓗᓂ ᑐᖁᓚᐅᕆᕗᖅ, ᓴᐅᓕ ᑐᖁᖃᑎᒋᓪᓗᒍ.

⁶ ᑍᒫᒃ ᑕᕝᕙ ᓴᐅᓕᒃᑯᑦ ᐃᕐᓂᖏᓪᓗ ᐱᖓᓱᑦ ᑐᖁᓚᐅᕐᐳᑦ; ᓴᐅᓕᐅᓪᓗ ᐱᖃᑎᒋᔭᓕᒫᖏᑦ ᑐᖁᓚᐅᕐᐳᑦ ᐅᓪᓗᒥ ᑕᕝᕙᓂᑦᓮᓐᓇᖅ.

⁷ ᐃᓴᕆᐊᓕᒥᐅᓪᓕ ᔨᓴᕆᐊᑉ ᓇᕐᓴᖓᑕ ᐊᑭᐊᓃᑦᑐᑦ ᔪᐊᕐᑕᓂᐅᑉ ᑰᖓᑕ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ ᑐᓴᕋᒥᒃ ᐃᓴᕆᐊᓕᒥᐅᑦ ᕿᒫᓂᖏᓐᓂᒃ ᓴᐅᓕᒃᑯᓪᓗ ᐃᕐᓂᕇᑦ ᑐᖁᑕᐅᓂᖏᓐᓂᒃ, ᓄᓇᓕᖕᒥᖕᓂᒃ ᕿᒤᓐᓁᓚᐅᕐᐳᑦ ᕿᒪᒃᓯᓪᓗᑎᒃ; ᐱᓕᔅᑍᓂᒥᐅᓪᓕ ᑕᕝᕗᓐᖓᕋᒥᒃ ᑕᕝᕙᓂ ᓄᓇᑖᓚᐅᕐᐳᑦ.

⁸ ᖃᐅᑎᓪᓗᒍ ᐅᓇᑕᕇᕐᓯᒪᓕᕋᒥᒃ ᐱᓕᔅᑍᓂᒥᐅᑦ ᐱᑖᕆᐊᕐᑐᓚᐅᕐᐳᑦ ᑐᖁᖓᔪᓂᑦ ᓴᐅᓕᐅᓪᓗ ᐃᕐᓂᖏᑕᓗ ᑎᒥᖏᑦ ᑕᑯᒐᒥᑦᔪᒃ ᓇᓚᔪᑦ ᒪᓂᖅᑲᒥ ᖃᖅᑲᒥ ᒋᐅᓪᐳᐊᒥ.

⁹ ᓴᐅᓕ ᓂᐊᖁᐃᓚᐅᕐᐹᑦ ᓴᐴᓗᑕᖏᓪᓗ ᐲᔭᕐᓗᒋᑦ, ᐅᖃᕆᐊᕐᑐᕐᑎᑦᓯᓚᐅᕐᐳᓪᓗ ᐱᓕᔅᑍᓂᒥᐅᓕᒫᓄᑦ ᐃᓄᖁᑎᒥᖕᓄᑦ ᒎᑎᓐᖑᐊᒥᖕᓄᓪᓗ.

¹⁰ ᐅᓇᑕᐅᑎᖏᓪᓗ ᐃᓕᓚᐅᕐᐰᑦ ᑐᒃᓯᐊᕐᕕᖁᑎᒥᖕᓄᑦ ᒎᑎᓐᖑᐊᒧᑦ ᐋᔅᑕᕉᑎᒧᑦ, ᑎᒥᖓᓗ ᐊᑭᓐᓇᒧᑦ ᑭᑭᐊᒃᑕᐅᓚᐅᕐᐳᖅ ᐃᒡᓗᒐᓴᒧᑦ ᐱᑦ-ᓵᓂᒧᑦ.

¹¹ ᐃᓄᐃᓪᓕ ᔭᐲᓯ-ᒋᓖᑎᒥᐅᑦ ᑐᓴᕋᒥᒃ ᐱᓕᔅᑍᓂᒥᐅᑦ ᐱᓂᐊᕐᓂᖏᓐᓂᒃ ᓴᐅᓕᒧᑦ,

¹² ᓯᕘᕋᖏᓐᓂᕐᐹᑦ ᐊᖑᑏᑦ ᐅᓐᓄᐊᓕᒫᖅ ᐱᓱᓚᐅᕐᐳᑦ ᐱᑦ-ᓵᓂᒧᑦ, ᓴᐅᓕᐅᓪᓗ ᐃᕐᓂᖏᑕᓗ ᑎᒥᖏᑦ ᑎᒍᓚᐅᕐᐰᑦ, ᐅᑎᕐᑎᓪᓗᒋᓪᓗ ᔭᐲᓯᒧᑦ, ᑕᕝᕙᓂᓗ ᑎᒥᖏᑦ ᐃᑯᐊᓪᓚᓚᐅᕐᐰᑦ.

¹³ ᓴᐅᓂᖏᓪᓗ ᐃᓗᕕᓚᐅᕐᐰᑦ ᑕᒪᕆᔅᑭ ᓇᐹᕐᑑᑉ ᐊᑖᓄᑦ ᓄᓇᓕᖕᓂ ᔭᐲᓯᒥ, ᓂᕆᑦᑍᓕᓕᓚᐅᕐᐳᓪᓗ ᐅᓪᓗᓂᒃ 7ᓂᒃ.