ᓴᒧᐃᓕ ᓯᕗᓪᓖᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓇᑕᕐᓃᑦ ᐊᒪᓕᑬᑎᒥᐅᓂᒃ

¹ ᐅᓪᓗᐃᑦ ᐱᖓᓱᑦ ᐊᓂᒍᕐᑎᓪᓗᒋᑦ ᑍᕕᑎᒃᑯᑦ ᐃᓚᖏᓪᓗ ᑎᑭᑉᐳᑦ ᔨᒡᓛᒡᒧᑦ, ᑕᑯᓪᓗᑎᒡᓗ ᐊᒪᓕᑬᑎᒥᐅᑦ ᐅᓇᑕᕆᐊᕐᓯᒪᓂᕕᓂᖏᓐᓂᒃ ᔫᑕᐅᑉ ᓯᕿᓂᖓᓃᑦᑐᒧᑦ ᓂᒋᑉᒧᑦ ᔨᒡᓛᒡᒧᓪᓗ. ᓵᓚᒋᒐᒥᐅᒡᓗ ᓄᓇᓕᖓᑦ ᐃᑯᐊᓪᓚᒃᑕᐅᓐᓂᕐᓱᓂ,

² ᐊᕐᓇᓕᒫᓪᓗ ᑎᒍᔭᐅᓪᓗᑎᒃ; ᐃᓚᓕᒫᖏᓪᓗ ᑍᑲᓃᑦᑐᑦ ᑎᒍᔭᐅᓪᓗᑎᒃ, ᐊᖏᔪᑦ ᒥᑭᔪᓪᓗ; ᓇᓪᓕᐊᓐᓂᒃ ᑐᖁᑦᓯᓐᓂᖏᑦᑑᒐᓗᐊᑦ, ᑭᓯᐊᓂ ᐊᐅᓪᓚᐅᑦᔨᔪᕕᓂᐅᓪᓗᑎᒃ ᐊᐅᓪᓚᓕᕋᒥᒃ.

³ ᑍᕕᑎᒃᑯᑦ ᐃᓚᖏᓪᓗ ᐃᒡᓗᒐᓴᖕᓄᑦ ᑎᑭᓐᓇᒥᒃ, ᑕᑯᕗᑦ ᓄᓇᓕᖓ ᐃᑯᐊᓪᓚᒃᑕᐅᔪᕕᓂᖅ ᓄᓕᐊᖏᓪᓗ ᐃᕐᓂᖏᓪᓗ ᐸᓂᖏᓪᓗ ᐊᐅᓪᓚᐅᑦᔭᕕᓂᐅᓪᓗᑎᒃ.

⁴ ᑕᕝᕙ ᑍᕕᑎᒃᑯᑦ ᐃᓚᖏᓪᓗ ᓂᐱᖃᕐᓗᑎᒃ ᕿᐊᓕᕐᐳᑦ, ᑭᐊᖏᓐᓇᓚᐅᕐᐳᓪᓗ ᑕᖃᓂᕐᒧᑦ ᕿᐊᔪᓐᓁᓪᓕᒐᒥᒃ ᑭᓯᐊᓂ ᓄᖅᑲᕐᓗᑎᒃ.

⁵ ᑍᕕᑎᐅᓪᓗ ᓄᓕᐊᖏᒃ ᒪᕐᕉᒃ ᐊᐅᓪᓚᕈᑦᔭᐅᓐᓂᕐᓱᑎᒃ, ᐊᕼᐃᓄᐊᒻᓗ ᔨᔭᕆᐅᓪᒥᐅᑕᖅ, ᐊᐱᒊᓕᓗ ᓁᐳᓕᐅᑉ ᓄᓕᐊᕕᓂᖓ ᑳᕐᒥᐅᓪᒥᐅᑕᖅ.

⁶ ᑍᕕᑎ ᐅᖁᒤᒃᓴᒻᒪᕆᓕᓚᐅᕐᐳᖅ; ᐃᓚᖏᑦ ᐊᒡᓛᑦ ᐅᖃᓕᓚᐅᕐᐳᑦ ᒥᓪᓗᐊᕆᔪᒪᓪᓗᒍ, ᐃᓄᓕᐊᒪᑦ ᓂᓐᖓᐅᒪᓂᖃᒻᒪᕆᓕᓚᐅᕐᒪᑕ ᐊᓯᐅᔨᓂᑎᒃ ᕿᑐᕐᖓᒥᖕᓂᒃ ᐱᑦᔪᑎᖃᕐᓗᑎᒃ. ᑍᕕᑎᓕ ᒎᑎᖓᑕ ᐊᑕᓂᐅᑉ ᓴᐱᖏᓐᓂᕐᒥᒃ ᑐᓂᓚᐅᕐᐹ.

⁷ ᑍᕕᑎᐅᓪᓗ ᐊᐰᐊᑕ ᐊᕼᐃᒥᓕᐅᑉ ᐃᕐᓂᖓ, ᑐᓂᕐᕈᓯᕐᑎᑦᓯᔨ ᐅᖃᐅᑎᕚ, “ᓴᒡᕕᖕᒥᐅᑕᖅ ᕾᓚᐅᕈᒃ,” ᐊᐰᐊᑕᐅᓪᓗ ᑐᓂᕚ ᑍᕕᑎᒧᑦ.

⁸ ᑍᕕᑎᐅᓪᓗ ᐊᑕᓂᖅ ᐊᐱᕆᕚ, “ᒪᓕᒃᓴᕈᓐᓇᕐᐸᒃᑳ ᐅᓇᑕᕆᐊᓚᐅᕐᑐᑦ? ᐊᓐᖑᑎᔪᓐᓇᕐᐳᖔ?” ᐊᑕᓂᐅᑉ ᑭᐅᕚ, “ᒪᓕᒃᓴᓕᕆᑦ; ᐊᓐᖑᑎᓂᐊᕐᐳᑎᑦ ᑎᒍᔭᐅᓚᐅᕐᑐᓪᓗ ᐅᑎᕐᑎᓐᓂᐊᕐᐸᑎᑦ.”

⁹ ᑕᕝᕙ ᑍᕕᑎᒃᑯᑦ ᐊᐅᓪᓚᕐᐳᑦ, ᐃᓚᖃᕐᓗᓂ ᐊᖑᑎᓂᒃ 600ᓂᒃ, ᐱᓱᐊᕆᐅᓪᓗ ᑰᖓᓄᑦ ᑎᑭᐅᑎᒐᒥᒃ, ᐃᓚᖏᑦ ᑕᕝᕗᖓ ᕿᒪᒃᑕᐅᕗᑦ.

¹⁰ ᑍᕕᑎᓕ ᑲᔪᓯᕗᖅ 400ᓂᒃ ᐃᓚᖃᕐᓗᓂ; ᑍᒃᑯᐊ ᐃᓚᖏᑦ 200 ᕿᒪᒃᑕᐅᓚᐅᕐᐳᑦ, ᑰᖕᒥᒃ ᐱᓱᐊᕆᒥᒃ ᐃᑳᕆᐊᒃᓴᖅ ᐊᔪᓕᓚᐅᕐᒪᑕ ᑕᖃᒪᓗᐊᒧᑦ.

¹¹ ᐊᖑᑏᑦ ᑍᕕᑎᒦᑦᑐᑦ ᑕᑯᕗᑦ ᓄᑲᑉᐱᐊᒥᒃ ᐄᑦᔨᑉᑎᒥᐅᑕᕐᒥᒃ ᓄᓇᑐᐃᓐᓇᒦᑎᓪᓗᒍ ᑍᕕᑎᒧᐊᕈᑎᕚᓪᓗ; ᓂᕆᑎᑉᐹᑦ ᐃᒥᕐᑎᓪᓗᒍᓗ,

¹² ᐸᐅᕐᖓᕕᓂᕐᓂᒡᓗ ᐸᓂᕐᑐᓂᒃ, ᒪᕐᕉᖕᓂᒡᓗ ᐸᐅᕐᖓᐅᔮᖕᓂᒃ. ᓂᕆᔭᕇᕋᒥᓗ, ᓄᑭᒃᑖᕐᐳᖅ; ᓂᕆᓚᐅᕐᓂᖏᑦᑐᖅ ᐃᒥᓚᐅᕐᓂᕋᓂᓗ ᐅᓪᓗᓂᒃ ᐱᖓᓱᓂᒃ.

¹³ ᑕᕝᕙ ᑍᕕᑎᐅᑉ ᐊᐱᕆᕚ, “ᑭᓇᒦᒃ ᐊᖓᔪᖅᑳᖃᕐᐲᑦ, ᓇᓂᒥᐅᑕᐅᕕᓪᓘ?” ᑭᐅᕗᖅ, “ᐄᑦᔨᑉᑎᒥᐅᑕᐅᕗᖓ, ᐊᒪᓕᑬᑎᒥᐅᓄᑦ ᐱᔨᑲᑖᕆᔭᔪᑦ ᐃᓚᖓᑦ; ᐊᖓᔪᖅᑳᒪ ᕿᒪᓚᐅᕐᐹᖓ ᐅᓪᓗᐃᑦ ᐱᖓᔪᐊᓐᓂ ᖃᓂᒻᒪᓚᐅᕋᒪ.

¹⁴ ᐅᓇᑕᕆᐊᓚᐅᕐᐳᒍᑦ ᓯᕆᑍᑎᓄᑦ ᔫᑕᐅᑉ ᓯᕿᓂᖓᓃᑦᑐᒧᑦ ᓂᒋᑉᒧᑦ ᑬᓚᐱᐅᓪᓗ ᓄᓇᖁᑎᖓᓄᑦ, ᔨᒡᓛᒡᒥᐅᓪᓗ ᐃᑯᐊᓪᓚᓚᐅᕐᐸᕗᑦ.”

¹⁵ ᑍᕕᑎᐅᑉ ᐊᐱᕆᕚ, “ᑍᒃᑯᓄᓐᖓᐅᑎᔪᓐᓇᕐᐱᖔ ᐅᓇᑕᕆᐊᓚᐅᕐᑐᓄᑦ?” ᑖᓐᓇ ᑭᐅᕗᖅ, “ᐱᔪᓐᓇᕐᐳᖓ ᐊᖏᕐᕕᒋᓂᐊᑐᐊᕈᕕᖓ ᒎᑎᐅᑉ ᐊᑎᖓᓂ, ᑐᖁᓐᓂᐊᓐᖏᓐᓂᕋᕐᓗᖓ ᐅᕝᕙᓗ ᐊᖓᔪᖅᑳᓐᓄᑦ ᐂᑦᑑᑎᒋᓂᐊᓐᖏᑐᐊᕈᕕᖓ.”

¹⁶ ᑕᕝᕙ ᑕᓯᐅᓚᐅᕐᐰᑦ ᑍᕕᑎᒃᑯᑦ ᑍᒃᑯᓄᖓ. ᐅᓇᑕᕆᐊᕐᓯᒪᓚᐅᕐᑐᑦ ᓯᐊᒻᒪᖓᓚᐅᕐᐳᑦ ᓇᒧᑐᐃᓐᓇᖅ, ᓂᕆᓪᓗᑎᒃ ᐃᒥᕐᓗᑎᒡᓗ, ᖁᕕᐊᓱᒍᑎᖃᑦᓱᑎᒃ ᑎᒍᔭᕕᓂᕐᒥᖕᓂᒃ ᐱᓕᔅᑍᓂᐅᒥᐅᓂᑦ ᔫᑕᒥᐅᓂᓪᓗ.

¹⁷ ᖃᐅᑎᓪᓗᒍ ᖃᐅᒻᒪᓕᕐᑎᓪᓗᒍ ᑍᕕᑎᐅᑉ ᐅᓇᑕᕆᐊᓚᐅᕐᐰᑦ ᐅᓇᑕᓚᐅᕐᐰᓪᓗ ᐅᓐᓄᒧᑦ ᑎᑭᓪᓗᒍ; ᐅᕕᒃᑬᓪᓕ 400 ᕿᒪᒃᓯᓚᐅᕐᐳᑦ ᑳᒥᓕᒃᑎᒍᑦ, ᐊᓯᓕᒫᖏᓪᓕ ᐊᖑᑎᑦ ᑐᖁᑕᐅᓚᐅᕐᐳᑦ.

¹⁸ ᑍᕕᑎᐅᓪᓗ ᐅᑎᕐᑎᓚᐅᕐᐰᑦ ᐊᒪᓕᑬᑎᑦ ᑎᒍᔭᕕᓂᓕᒫᖏᑦ; ᓄᓕᐊᖕᓂᓗ ᒪᕐᕉᒃ ᓴᐳᑎᓚᐅᕆᕔᒃ.

¹⁹ ᓱᓇᒥᒡᓘᓐᓃᑦ ᐊᓯᐅᔨᓚᐅᓐᖏᓚᑦ, ᐊᖏᔪᓂᒃ ᒥᑭᔪᓂᒡᓗ, ᑍᕕᑎᐅᑉ ᐅᑎᕐᑎᓚᐅᕐᐰᑦ ᐃᓄᖁᑎᖏᑕ ᐃᕐᓂᖏᑦ ᐸᓂᖏᓪᓗ, ᐊᓯᓕᒫᖏᓪᓗ ᐱᖁᑏᑦ ᐊᒫᓕᑬᒥᐅᑦ ᑎᒍᔭᕕᓂᓕᒫᖏᑦ.

²⁰ ᑍᕕᑎᐅᑦᑕᐅᖅ ᐅᑎᕐᑎᓚᐅᕆᕔᑦ ᐆᒪᔪᓕᒫᑦ; ᐃᓄᖁᑎᖏᑕᓗ ᐃᒻᒧᒃᓯᐅᒊᑦ ᓯᕗᓕᕆᓪᓗᒋᑦ ᐱᓱᒃᑎᓚᐅᕐᐰᑦ ᐅᖃᓪᓗᑎᒡᓗ, “ᐅᑯᐊ ᑍᕕᑎᐅᑉ ᓵᓚᖃᐅᓯᐊᖏᑦ.”

²¹ ᑕᕝᕙ ᑍᕕᑎ ᐅᑎᕐᐳᖅ ᑍᒃᑯᓄᖓ ᐊᖑᑎᓄᑦ 200ᓄᑦ, ᓴᓐᖐᓗᐊᓕᕐᓂᕐᒧᑦ ᐃᓚᐅᔪᓐᓁᓪᓕᓚᐅᕐᑐᓄᑦ ᑰᒃᑯᑦ ᐱᓱᐊᕆᒥᒃ ᐃᑳᕆᐊᒃᓴᖅ; ᑖᒃᑯᐊ ᐸᕐᕆᐊᓚᐅᕐᐳᑦ ᑍᕕᑎᒥᒃ ᐃᓚᖏᓐᓂᒡᓗ; ᑍᕕᑎᐅᓪᓗ ᐅᐸᒃᑲᒥᒋᑦ ᑐᓐᖓᓱᒃᑎᑉᐰᑦ.

²² ᐃᓱᒪᑦᓯᐊᖏᑦᑐᓪᓕ ᑐᑭᖃᑦᓯᐊᖏᑦᑐᓪᓗ ᐊᖑᑏᑦ ᐃᓚᖏᑦ ᑍᕕᑎᒧᑦ ᐃᓚᐅᓚᐅᕐᑐᒃ ᐅᖃᕐᐳᑦ, “ᐅᕙᑦᑎᓐᓂᖑᑯᐊ ᐃᓚᐅᓚᐅᖏᑦᑐᑦ, ᐱᑖᑦᑎᓐᓂᒃ ᐱᑖᕐᑐᒃᓴᐅᖏᑦᑐᑦ, ᓄᓕᐊᑎᒃ ᕿᑐᕐᖓᑎᒡᓗ ᐱᑐᐃᓐᓇᕐᓗᒋᑦ, ᐊᐅᓪᓚᕐᑐᒃᓴᐅᕗᑦ.”

²³ ᑍᕕᑎᓕ ᑭᐅᕗᖅ, “ᖃᑕᓐᖑᑎᒃᑳ ᑍᒤᓕᐅᕈᑎᖃᕐᑐᒃᓴᐅᓐᖏᓚᓯ ᐊᑕᓂᐅᑉ ᑐᓂᕐᕈᑎᒋᔭᖏᓐᓂᒃ ᐅᕙᑦᑎᓐᓄᑦ; ᐊᑕᓂᐅᑉ ᓴᐳᑎᓚᐅᕐᐹᑎᒍᑦ ᓵᓚᖃᕐᑎᓪᓗᑕᓗ ᐋᑎᕆᔨᓂᒃ.

²⁴ ᐊᖏᖃᑎᒋᔭᐅᔪᓐᓇᓐᖏᓚᓰ ᑭᓇᒧᓪᓘᓐᓃᑦ? ᐃᓘᓐᓇᑎᒃ ᐊᕕᖃᑎᒌᒃᑐᒃᓴᐅᕗᑦ, ᓇᓪᓕᐊᑦ ᕿᒪᒃᑕᐅᓯᒪᓚᐅᕐᑐᖅ ᑍᒫᓪᓗᐊᖅ ᐱᖃᑕᐅᔪᒃᓴᐅᕗᖅ ᐅᓇᑕᕆᐊᓚᐅᕐᑐᑎᑐᑦ.”

²⁵ ᑍᕕᑎᐅᑉ ᑕᒪᓐᓇ ᑕᕝᕙᓐᖓᑦ ᐱᒋᐊᕐᓗᒍ ᐱᖁᔭᓕᐊᕆᓚᐅᕐᐹ, ᐃᓴᕆᐊᓕᒥᐅᓂᓪᓗ ᑍᒪᓐᖓ ᑕᒪᓐᓇ ᒪᓕᒃᑕᐅᓕᓚᐅᕐᐳᖅ.

²⁶ ᑍᕕᑎᓗ ᐅᑎᕋᒥ ᔨᒡᓛᒡᒧᑦ, ᐱᑖᕆᓚᐅᕐᑕᒥ ᐃᓚᖏᓐᓂᒃ ᑐᓂᓯᓚᐅᕐᐳᖅ ᐱᖃᓐᓇᕆᔭᒥᓄᑦ, ᔫᑕᐅᓪᓗ ᐊᖓᔪᖅᑳᖏᓐᓄᑦ, ᐃᒫᒃ ᐅᖃᐅᓯᕐᑕᖃᕐᑐᒥᒃ, “ᐅᓇ ᐃᓕᖕᓄᑦ ᐂᑦᑑᑎᕗᑦ ᐊᑕᓂᕐᒧᑦ ᐊᑭᕋᕐᑐᕐᑐᓂᑦ ᐱᓚᐅᕐᑕᑦᑎᓐᓂᑦ.”

²⁷ ᐅᑯᓄᖓ ᑐᓂᓯᓚᐅᕐᐳᖅ ᐱᑎᓕᒥᐅᓄᑦ, ᕌᒪᑦᒧᑦ ᓂᒡᒋᒦᑦᑐᒧᑦ, ᓄᓇᓕᖕᓄᓪᓗ ᔮᑎᐊᕐᒥᐅᓄᑦ,

²⁸ ᐂᕈᕆᒥᐅᓄᑦ, ᓯᑉᒫᑎᒥᐅᓄᑦ, ᐃᔅᑎᒧᐊᒥᐅᓄᑦ,

²⁹ ᕋᑲᐅᓕᒥᐅᓄᑦ, ᑭᖑᕚᕇᓄᓪᓗ ᔨᕋᒥᐅᓕᒃᑯᓐᓄᑦ, ᑭᓁᑎᒥᐅᓄᓪᓗ,

³⁰ ᕼᐅᕐᒪᒥᐅᓄᑦ, ᐳᐅᐊᕐᐊᓵᓐᒥᐅᓄᑦ, ᐊᑕᒃᒥᐅᓄᓪᓗ,

³¹ ᕼᐃᐸᕋᓐᒥᐅᓄᑦ, ᓄᓇᓕᓕᒫᓄᑦ ᑐᓂᓯᓚᐅᕐᐳᑦ ᑍᕕᑎᐅᑉ ᐃᓚᖏᑕᓗ ᐅᐸᖃᑦᑕᓚᐅᕐᑕᓕᒫᖏᓐᓄᑦ.