ᓴᒧᐃᓕ ᓯᕗᓪᓖᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᓴᖅᑭᓐᓂᖓ ᓴᒧᐃᓕᒧᑦ

¹ ᓱᕈᓯᖅ ᓴᒧᐃᓕ ᐱᔨᑦᓯᓚᐅᕐᐳᖅ ᐊᑕᓂᕐᒥᒃ ᐃᓔᒧᑦ ᑲᒪᒋᔭᐅᓪᓗᓂ. ᐊᑕᓂᐅᑉ ᐅᖃᐅᓯᖏᑦ ᑐᓴᕐᑕᐅᔪᓐᓇᓚᐅᓐᖏᓚᑦ ᐅᓪᓗᓂ ᑖᒃᑯᓇᓂ, ᑕᑯᑎᑕᐅᔪᖃᓚᐅᕐᓯᒪᓇᓂᓗ ᖃᒻᒥᒃᑯᑦ.

² ᑍᑦᓱᒪᓂᐅᑎᓪᓗᒍ, ᐃᓔ ᑕᐅᑐᑦᓯᐊᕈᓐᓃᓚᐅᕐᐳᖅ, ᓇᓪᓚᖓᑎᓪᓗᒍ ᐃᒡᓗᕈᓯᕐᒥᓂ;

³ ᒎᑎᐅᑉ ᓇᓂᕈᐊᖁᑎᖓ ᐃᑯᒪᑎᓪᓗᒍ ᓱᓕ, ᓴᒧᐃᓕ ᓇᓪᓚᖓᓪᓗᓂ ᓯᓂᒐᓱᓕᕐᑎᓪᓗᒍ ᐊᑕᓂᐅᑉ ᑐᐱᖓᓂ, ᑕᕝᕙᓂ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓇᔪᕐᑕᖓᓂ.

⁴ ᐊᑕᓂᐅᑉ ᕾᖁᕚ, “ᓴᒧᐃᓖ! ᓴᒧᐃᓖ!” ᑭᐅᕗᕐᓗ, “ᒫᓃᑉᐳᖓ!”

⁵ ᐅᓪᓚᒡᓗᓂᓗ ᐃᓔᒧᐊᕐᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᑉ ᑭᐅᕚ, “ᕾᖁᓚᐅᓐᖏᓚᒋᑦ; ᓯᓂᒋᐊᕐᑐᒃᑲᓐᓂᓕᕆᑦ.” ᓴᒧᐃᓕᓗ ᐅᑎᕋᒥ ᓯᓂᒐᓱᓕᕆᕗᖅ.

⁶ ᐊᑕᓂᐅᑉ ᕾᖁᒃᑲᓐᓂᕐᐹ, “ᓴᒧᐃᓖ!” ᓴᒧᐃᓕᓗ ᒪᑭᓐᓇᒥ ᐃᓔᒧᐊᕐᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᑉ ᑭᐅᕚ, “ᐃᕐᓃᒃ ᕾᖁᓚᐅᓐᖏᓚᒋᑦ; ᓯᓂᒋᐊᕐᑐᒃᑲᓐᓂᓕᕆᑦ.”

⁷ ᓴᒧᐃᓕᓕ ᓱᓕ ᖃᐅᔨᒪᓚᐅᓐᖏᓚᖅ ᐊᑕᓂᐅᖕᒪᖔᑦ, ᐊᑕᓂᖅ ᐅᖃᓪᓚᓚᐅᕐᓯᒪᖏᒻᒪᑦ ᓱᓕ ᑖᑦᓱᒧᖓ.

⁸ ᐊᑕᓂᐅᑉ ᕾᖁᒋᕚ ᓴᒧᐃᓕ ᐱᖓᔪᐊᓐᓂ; ᒪᑭᓐᓇᒥᓗ, ᐃᓔᒧᐊᕐᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᓕ ᒪᓗᒍᓱᓕᕐᐳᖅ ᐊᑕᓂᐅᑉ ᕾᖁᖕᒪᒍ ᓱᕈᓯᖅ.

⁹ ᑍᒤᒻᒪᑦ ᐃᓔᑉ ᐅᖃᐅᑎᓕᕐᐹ ᓴᒧᐃᓕ, “ᐅᑎᓕᕆᑦ, ᓯᓂᒡᕕᖕᓄᑦ; ᕾᖁᔭᐅᓕᕐᒥᒍᕕᑦ ᐃᒤᓕᓂᐊᓕᕐᐳᑎᑦ, ‘ᐊᑕᓃᖅ ᐅᖃᓕᕆᑦ, ᐱᔩᑦ ᓈᓚᖕᒪᑦ.’” ᓴᒧᐃᓕ ᐅᑎᕋᒥ ᓇᓪᓚᖓᓕᕆᕗᖅ.

¹⁰ ᐊᑕᓂᕐᓗ ᐅᑎᕐᐳᖅ ᓇᖏᓕᕐᓗᓂᓗ, ᓂᓪᓕᕆᕗᓪᓗ ᓲᕐᓗ ᑍᒤᓚᐅᕋᒥ, “ᓴᒧᐃᓖ! ᓴᒧᐃᓖ!” ᓴᒧᐃᓕ ᐅᖃᕐᐳᖅ, “ᐅᖃᓕᕆᑦ; ᐱᔩᑦ ᓈᓚᖕᒪᑦ.”

¹¹ ᑕᕝᕙ ᐊᑕᓂᐅᑉ ᓴᒧᐃᓕ ᐅᖃᐅᑎᕚ, “ᑕᑯᒋᑦ, ᐱᓇᓱᐊᕈᒪᓕᕐᐳᖓ ᐃᓴᕆᐊᓕᒥᐅᓄᑦ, ᓯᐅᑎᓖᓪᓗ ᓇᓪᓕᐊᑦ ᑐᓴᕐᑐᑦ ᖁᐊᕐᓵᕈᒫᕐᐳᑦ.

¹² ᐅᓪᓗᖅ ᓇᓪᓕᐅᑎᒃᐸᑦ ᐅᖃᐅᓯᕆᓚᐅᕐᑕᒃᑲ ᓇᓚᐅᑦᓯᑎᑦᓱᒫᕐᐸᒃᑲ ᐃᓔᑉ ᐃᓚᖏᓐᓄᑦ, ᐱᒋᐊᕐᓂᖓᓂᑦ ᐃᓱᐊᓄᑦ.

¹³ ᐅᖃᐅᑎᓚᐅᕐᐸᕋ ᐃᓚᖏᑦ ᓱᒋᐊᕐᓂᐊᕐᓂᕋᓕᕐᓗᒋᑦ ᐃᓱᖃᖏᑦᑐᒧᑦ, ᐃᓔᑉ ᖃᐅᔨᒪᓚᐅᕐᐰᖅ ᐱᐅᖏᑦᑐᓕᓂᖏᑦ, ᐃᕐᓂᖏᑦ ᐅᖃᕐᓂᕐᓘᑦᔨᓚᐅᕐᒪᑕ ᒎᑎᒥᒃ, ᐃᓂᕐᑎᓚᐅᓐᖏᓔᓪᓕ.

¹⁴ ᑍᒤᒻᒪᑦ ᐊᖏᒻᒪᕆᒃᐳᖓ ᓇᓗᓁᕐᓯᓪᓗᖓ ᐃᓔᑉ ᐃᓚᖏᓐᓄᑦ; ᐃᓔᑉ ᐃᓚᖏᑕ ᐱᐅᖏᑦᑐᓕᓂᖏᑦ ᐲᕐᑕᐅᓂᐊᓐᖏᓚᑦ ᑐᖁᑦᓯᓗᓂ ᑐᓂᕐᕈᓯᕐᓂᒃᑯᑦ ᑐᓂᕐᕈᓯᕐᓃᑦ ᐊᓯᖏᑎᒍᓪᓘᓐᓃᑦ ᐃᓱᖃᖏᑦᑐᒧᑦ.”

¹⁵ ᓴᒧᐃᓕᓕ ᐃᓐᓇᖎᓐᓇᕐᐳᖅ ᐅᓪᓛᒧᑦ ᑎᑭᓪᓗᒍ; ᒪᑭᓐᓇᒥᓗ ᐊᑕᓂᐅᑉ ᐃᒡᓗᖓᑕ ᐅᒃᑯᐊᖏᑦ ᒪᑐᐃᕐᐰᑦ. ᓴᒧᐃᓕᓕ ᓯᕘᕋᓚᐅᕐᐳᖅ ᐅᖃᐅᑦᔨᒋᐊᒃᓴᖅ ᐃᓔᒥᒃ ᑕᑯᑎᑕᐅᑦᔪᑎᒥᓂᒃ.

¹⁶ ᐃᓔᓪᓕ ᕾᖁᕚ ᐅᖃᐅᑎᓪᓗᒍᓗ, “ᓴᒧᐃᓖ, ᐃᕐᓃᒃ!” ᓴᒧᐃᓕ ᑭᐅᕗᖅ, “ᑕᒫᓃᑉᐳᖓ.”

¹⁷ ᐃᓔᓪᓗ ᐊᐱᕆᕚ, “ᖃᓄᖅ ᐊᑕᓂᐅᑉ ᐅᖃᐅᑎᓚᐅᕐᐹᑎᑦ? ᐃᔨᕐᓯᒪᕕᒋᑦᑍᓕᓐᖓ. ᒎᑎᐅᑉ ᓱᒋᐊᕈᒫᕐᐹᑎᑦ ᐅᕙᓐᓄᑦ ᐅᖃᖏᒃᑯᕕᑦ ᐅᖃᐅᓯᕆᓚᐅᕐᑕᓕᒫᖏᓐᓂᒃ.”

¹⁸ ᑍᒤᒻᒪᑦ ᓴᒧᐃᓕᐅᑉ ᐅᖃᐅᑎᓚᐅᕐᐹ ᐅᖃᐅᑎᔭᐅᑦᔪᑎᓕᒫᒥᓂᒃ ᓇᓪᓕᐊᓐᓂᒡᓘᓐᓃᑦ ᐅᖃᕐᑍᓕᒪᓇᓂ. ᐃᓔᓗ ᐅᖃᕐᐳᖅ, “ᐊᑕᓂᐅᕗᖅ; ᑖᑦᓱᒪ ᐱᐅᓂᕐᐹᖑᔪᕆᔭᓂ ᐊᑐᕐᓂᐊᕐᐹ.”

¹⁹ ᓴᒧᐃᓕᓕ ᐱᕈᕐᐸᓪᓕᐊᓚᐅᕐᐳᖅ, ᐊᑕᓂᐅᓪᓗ ᐃᓚᒋᓚᐅᕐᐹ ᓱᓕᑎᖃᑦᑕᓚᐅᕐᐰᓪᓗ ᓴᒧᐃᓕᐅᑉ ᐅᖃᐅᓯᕆᔭᓕᒫᖏᑦ.

²⁰ ᐃᓴᕆᐊᓕᒥᐅᑦ ᐃᓄᓕᒫᖏᑦ ᑖᓐᒥᑦ ᐱᐊᕐᓯᐸᒧᑦ ᖃᐅᔨᒪᓕᓚᐅᕐᐳᑦ ᓴᒧᐃᓕ ᐊᑕᓂᐅᑉ ᐅᖃᕐᑎᒋᓕᕐᒪᒍ.

²¹ ᐊᑕᓂᕐᓗ ᓴᖅᑭᒃᑲᓐᓂᓚᐅᕐᐳᖅ ᓮᓗᐊᒥ, ᑍᑲᓂ ᐊᑕᓂᖅ ᐃᒻᒥᓂᒃ ᓴᖅᑭᑎᓚᐅᕐᐳᖅ ᓴᒧᐃᓕᒧᑦ ᐅᖃᐅᓯᕐᒥᒍᑦ.