ᓴᒧᐃᓕ ᓯᕗᓪᓖᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐱᓕᔅᑏᓂᒦᓐᓂᖓ

¹ ᑍᕕᑎᓗ ᐆᒻᒪᑎᒥᒍᑦ ᐃᓱᒪᓕᕐᐳᖅ, “ᐅᓪᓗᐃᑦ ᐃᓚᖓᓐᓂ ᓴᐅᓕᐅᑉ ᑐᖁᓛᓕᕋᖓ; ᐱᐅᓂᕐᐸᐅᓕᕐᐳᖅ ᐱᓕᔅᑍᓂᒥᐅᓄᑦ ᕿᒪᒃᓯᓗᖓ; ᓴᐅᓕ ᓴᐱᓕᕋᔭᕐᐳᖅ ᕿᓂᕈᓐᓃᕐᓗᓂ ᐃᓴᕆᐊᓕᒥ, ᓯᕘᕋᓇᕐᑐᒦᑦᓱᓐᓃᕋᔭᕐᐳᖓᓗ.”

² ᑍᒤᒻᒪᑦ ᑍᕕᑎᒃᑯᑦ ᐃᓄᖁᑎᖏᓪᓗ 600ᐃᑦ ᐂᓚᐅᕐᐳᑦ ᐊᑭᔅᒧᑦ ᒪᐅᑭᐅᑉ ᐃᕐᓂᖓᓄᑦ, ᐊᖓᔪᖅᑳᕐᔪᐊᖑᔪᒧᑦ ᒑᑎᒥ.

³ ᑍᕕᑎᒃᑯᑦ ᐃᓚᖏᓪᓗ ᓄᓇᑖᓚᐅᕐᐳᑦ ᐊᑭᔅᑯᑦ ᓄᓇᖓᓂ ᒑᑎᒥ, ᐃᓚᓕᒫᑎᒡᓗ ᐃᓚᒋᓪᓗᒋᑦ, ᑍᕕᑎᐅᓪᓗ ᓄᓕᐊᖕᓂ ᒪᕐᕉᒃ ᐱᖃᑎᒋᓚᐅᕐᐹᒃ, ᐊᕼᐃᓄᐊᒻ ᔨᔭᕆᐅᓪᒥᐅᑕᖅ, ᐊᐱᒊᓕᓗ ᓁᐳᓪ ᓄᓕᐊᕕᓂᖓ ᑳᕐᒥᐅᓪᒥᐅᑕᖅ.

⁴ ᓴᐅᓕᓗ ᐅᖃᐅᑦᔭᐅᒐᒥ ᑍᕕᑎᐅᑉ ᕿᒪᓂᖓᓂ ᒑᑎᒧᑦ, ᕿᓂᕈᓐᓃᓚᐅᕐᐳᖅ ᑖᑦᓱᒥᖓ.

⁵ ᑕᕝᕙ ᑍᕕᑎ ᐅᖃᕐᐳᖅ ᐊᑭᔅᒧᑦ, “ᖁᕕᐊᒋᒍᕕᖓ, ᓄᓇᓕᖕᒥᒃ ᒥᑭᔪᒥᒃ ᑐᓂᓯᕕᒋᓚᐅᓐᖓ ᐊᖏᕐᕋᕆᓂᐊᕐᑕᓐᓂᒃ, ᐊᑲᐅᒐᔭᕐᐳᖅ ᐃᒡᓗᒐᓴᖕᓂ ᑕᕝᕙᓂᑦᓮᓇᖅ ᓄᓇᖃᕐᑐᐃᓐᓇᐅᔪᓐᓃᕈᓐᓄᒃ.”

⁶ ᑕᕝᕙᓂ ᐅᓪᓗᒥ ᐊᑭᔅᓯᐅᑉ ᓄᓇᓕᖕᒥᒃ ᑐᓂᓚᐅᕐᐹ ᔨᒃᓛᒡᒥᒃ; ᑍᒤᒻᒪᑦ ᔨᒡᓛᒡ ᑕᕝᕙᓐᖓᑦ ᐱᒋᐊᕐᓗᒍ ᐱᒋᔭᐅᓕᓚᐅᕐᐳᖅ ᔫᑕᐅᑉ ᐊᖓᔪᖅᑳᕐᔪᐊᖏᓐᓄᑦ.

⁷ ᑍᕕᑎᓗ ᓄᓇᖃᓚᐅᕐᐳᖅ ᐱᓕᔅᑍᓂᒥ ᐊᕐᕌᒍᓕᒫᒥᒃ ᑕᖅᑭᓂᒡᓗ ᓯᑕᒪᓂᒃ.

⁸ ᑍᑦᓱᒪᓂᐅᑎᓪᓗᒍ ᑍᕕᑎᒃᑯᑦ ᐃᓚᖏᓪᓗ ᐅᓇᑕᕆᐊᖃᑦᑕᓚᐅᕐᐳᑦ ᒋᓱᕅᒥᐅᓂᒃ, ᒋᕆᔧᒥᐅᓂᒃ, ᐊᒪᓕᑬᑎᒥᐅᓂᒡᓗ; ᐊᑯᓂᐊᓗᒃ ᑕᒫᓂ ᓄᓇᖃᓚᐅᕐᑐᓂᒃ, ᓄᓇᖏᓐᓂᒡᓗ ᐊᕐᓵᓚᐅᕐᐰᑦ, ᓲᕆᒥᐅᑦ ᐱᒋᐊᕐᓗᒋᑦ, ᓄᓇᓖᑦ ᑕᐅᓄᖓ ᐄᑦᔨᑉᑎᒥᐅᓄᑦ ᑎᑭᓪᓗᒋᑦ.

⁹ ᑍᕕᑎᓗ ᑐᖁᕅᖃᑦᑕᓚᐅᕐᐳᖅ ᐊᖑᑎᓂᒃ ᐊᕐᓇᓂᒡᓗ, ᓰᐱᖁᑎᖏᑦ, ᐆᒪᔪᖁᑎᖏᓪᓗ, ᓯᐅᑎᖅᑯᕐᑐᔪᖁᑎᖏᓪᓗ, ᑳᒥᓕᖁᑎᖏᓪᓗ ᑎᒍᖃᑦᑕᓚᐅᕐᐰᑦ, ᐊᓐᓄᕌᖏᓪᓗ, ᐅᑎᖃᑦᑕᕐᓗᓂᓗ ᐊᑭᔅᒧᑦ.

¹⁰ ᐊᑭᔅᒥᐅᓂᓪᓗ ᐊᐱᕆᔭᐅᒐᒥ, “ᐅᓪᓗᒥ ᓇᑭᑦ ᐊᕐᓵᑎᕆᓚᐅᕐᐲᑦ?” ᑍᕕᑎ ᐅᖃᕐᐸᓚᐅᕐᐳᖅ, “ᔫᑕᐅᑉ ᓯᕿᓂᖓᓂᑦ ᓂᒋᑉᒥᑦ,” ᐅᕝᕙᓗ, “ᔨᕋᒥᐅᓕᒃᑯᑦ ᓄᓇᖓᓂᑦ,” ᐅᕝᕙᓗ, “ᑭᓁᑎᒥᐅᑦ ᓄᓇᖓᓐᓂᑦ.”

¹¹ ᑍᕕᑎᐅᓪᓗ ᓄᖑᑦᓯᐊᕐᓗᒋᑦ ᑐᖁᕋᕐᐸᓚᐅᕐᐰᑦ, ᐊᖑᑏᑦ ᐊᕐᓁᓪᓗ, ᐅᑎᕐᑐᖃᖁᓇᒋᑦ ᒑᑎᒧᑦ ᐅᖃᕆᐊᕐᑐᕐᓗᑎᒃ ᑖᒃᑯᐊ ᐱᓂᐊᕐᓂᖏᓐᓂᒃ. ᑍᕕᑎ ᑍᒫᒃ ᐱᓂᐊᕐᓂᕾᓐᓇᓚᐅᕐᐳᖅ ᐱᓕᔅᑍᓂᒦᓐᓂᓕᒫᒥᓂ.

¹² ᐊᑭᔅᓯᒥᐅᑦ ᑍᕕᑎ ᐅᒃᐱᕆᑦᓯᐊᓚᐅᕐᐹᑦ, ᐃᓱᒪᖃᕐᓗᑎᒃ, “ᐆᒥᒋᔭᐅᓗᐊᕐᒪᑦ ᐃᓄᖁᑎᒥᓄᑦ ᐃᓴᕆᐊᓕᒥᐅᓄᑦ; ᑍᒤᒻᒪᑦ ᐃᓅᓯᓕᒫᒥᓂᒃ ᐅᕙᓐᓂᒃ ᐱᔨᑦᓯᕆᐊᖃᕐᓂᐊᕐᓕᕐᐳᖅ.”