ᓴᒧᐃᓕ ᓯᕗᓪᓖᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐱᐅᓕᒃᓯᒋᐊᓪᓚᖕᓂᖓ ᓴᐅᓕᒥᒃ

¹ ᐊᖑᑏᑦ ᐃᓚᖏᑦ ᔨᑉᕼᐂᑎᒥᐅᑦ ᓴᐅᓕᒧᐊᕐᐳᑦ ᒋᐱᐊᒧᑦ, ᐅᖃᐅᑎᓪᓗᒍᓗ, “ᑍᕕᑎ ᐃᔨᕐᓯᒪᓐᖏᓚᖅ ᖃᖅᑲᒥ ᕼᐊᑭᓚᒥ, ᔫᑕᐅᑉ ᐃᓄᖃᔪᐃᑦᑐᖓᑕ ᑭᒡᓕᖓᓂ?”

² ᓴᐅᓕ ᐊᐅᓪᓚᑦᓴᐅᑎᒋᕗᖅ ᐅᓇᑕᕐᑐᒃᓴᓂᒃ 3,000ᓂ ᐃᓚᖃᕐᓗᓂ, ᐱᓯᑎᐅᓂᕐᐹᓂᒃ ᐃᓴᕆᐊᓕᒥᐅᓂᑦ, ᕿᓂᕆᐊᕐᓗᑎᒃ ᑍᕕᑎᒥᒃ ᐃᓄᖃᔪᐃᑦᑐᒧᑦ ᔨᐸᒧᑦ.

³ ᑕᖕᒫᓚᐅᕐᐳᓪᓗ ᐊᖅᑯᑎᐅᑉ ᓴᓂᐊᓄᑦ ᖃᖅᑲᒧᑦ ᕼᐊᑭᓚᒧᑦ. ᑍᕕᑎᓕ ᐃᓄᖃᔪᐃᑦᑐᒦᖏᓐᓇᓚᐅᕐᐳᖅ; ᖃᐅᔨᒐᒥᓗ ᓴᐅᓕᒧᑦ ᕿᓂᕆᐊᕐᑕᐅᓂᕐᒥᓂᒃ ᐃᓄᖃᖏᑦᑐᒧᑦ,

⁴ ᑕᕝᕙ ᑍᕕᑎ ᐃᔨᕋᕐᑐᕐᑐᓂᒃ ᑎᓕᓯᕗᖅ, ᖃᐅᔨᓇᓱᐊᕆᐊᕐᑐᖁᓪᓗᒋᑦ ᓴᐅᓕᐅᑉ ᓇᓃᓪᓚᕆᓐᖓᓂᒃ ᖃᐅᔨᔪᒪᓪᓗᓂ.

⁵ ᑍᕕᑎᓗ ᒪᑭᓐᓇᒥ ᓴᐅᓕᐅᑉ ᓇᔪᕐᑕᖓᓄᐊᕐᐳᖅ ᑕᖕᒫᕐᓯᒪᕕᒋᔭᖓᓄᑦ; ᓴᐅᓕᐅᓪᓗ ᓯᓂᒡᕕᒋᔭᖓ ᖃᐅᔨᓚᐅᕐᐹ, ᐋᑉᓄᓪᓗ ᓂᕆᐅᑉ ᐃᕐᓂᖓᑕ, ᓴᐅᓕᐅᑉ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᑕ ᓇᔪᕐᑕᖏᑦ, ᓴᐅᓕᓕ ᓯᓂᓚᐅᕐᐳᖅ ᑕᖕᒫᕐᓯᒪᕕᖓᑦᑕ ᐊᑯᕐᖓᓐᓂ, ᐅᓇᑕᕐᑐᒃᓴᖁᑎᖏᓪᓗ ᓴᐅᓕᐅᑉ ᐊᕙᑖᓃᓚᐅᕐᐳᑦ.

⁶ ᑕᕝᕙ ᑍᕕᑎᐅᑉ ᐊᕼᐃᒥᓕᒃ ᕼᐃᑍᑎᒥᐅᑕᖅ ᐅᖃᐅᑎᕚ, ᐊᐱᓮᓗ ᔪᐊᐱᐅᑉ ᓄᑲᖓ, ᔨᕈᐃᐊᐅᑉ ᐃᕐᓂᖓ, ᐅᖃᕐᓗᓂ, “ᓇᓕᕐᓯᒃ ᒪᓕᖕᓂᐊᕐᐹ ᐅᕙᓐᓂᒃ ᓴᐅᓕᐅᑉ ᑕᖕᒫᕐᓯᒪᕕᖓᓄᑦ?” ᐊᐱᓮᓗ ᑭᐅᕗᖅ, “ᐅᕙᖓ ᒪᓕᖕᓂᐊᕐᐳᖓ.”

⁷ ᐅᓐᓄᒃᑎᓪᓗᒍ ᑍᕕᑎᒃᑯᒃ ᐊᐱᓮᑯᒃ ᐂᕘᒃ ᓴᐅᓕᐅᑉ ᑕᖕᒫᕐᓯᒪᕕᖓᓄᑦ; ᑕᑯᕘᒡᓗ ᓴᐅᓕᒥᒃ ᓯᓂᒃᑐᒥᒃ ᕿᑎᐊᓂ, ᖃᓗᒋᐊᖓᓗ ᓂᐊᖁᐊᑕ ᓴᓂᐊᓃᓚᐅᕐᐳᖅ ᓇᐸᓪᓗᓂ; ᐋᑉᓄ ᐅᓇᑕᕐᑐᒃᓮᓪᓗ ᐊᕙᑖᓂ ᓯᓂᒃᑎᓪᓗᒋᑦ.

⁸ ᐊᐱᓮ ᐅᖃᕐᐳᖅ ᑍᕕᑎᒧᑦ, “ᒎᑎᐅᑉ ᐊᑭᕅᑦ ᐅᓪᓗᒥ ᑐᓂᕚ ᐃᓕᖕᓄᑦ; ᑍᒤᒻᒪᑦ ᒫᓐᓇ ᑲᐱᓚᐅᕐᓚᒍ ᓇᖕᒥᓂᖅ ᖃᓗᒋᐊᖓᓄᑦ ᐸᐅᒍᐊᕐᓗᒍᓗ ᓄᓇᒧᑦ ᐊᑕᐅᓯᐊᕐᓗᖓ ᐱᒋᐊᒃᑲᓐᓂᕆᐊᖃᑦᔮᖏᓐᓇᒪ.”

⁹ ᑍᕕᑎᓕ ᐊᐱᓮᒧᑦ ᑭᐅᕗᖅ, “ᑐᖁᑦᑍᓕᒍᒃ; ᐊᑕᓂᐅᑉ ᓂᕈᐊᕐᓯᒪᔭᖓᓂᒃ ᑐᖁᑦᓯᔪᖃᕈᓐᓇᕐᐹ, ᐸᓯᔭᒃᓴᐅᓕᖏᓪᓗᓂ?”

¹⁰ ᑍᕕᑎᓗ ᐅᖃᕆᐊᓪᓚᒃᐳᖅ, “ᐊᑕᓂᖅ ᐆᒪᖕᒪᑦ, ᑲᐅᔨᒪᕗᖓ ᐊᑕᓂᐅᑉ ᓇᖕᒥᓂᖅ ᑐᖁᓛᕐᒪᒍ; ᐅᕝᕙᓗ ᑐᖁᕕᒃᓴᖓ ᓇᓪᓕᐅᑎᒃᐸᑦ; ᐅᕝᕙᓗ ᐅᓇᑕᕐᓂᒃᑯᑦ ᑐᖁᔪᒫᕐᐳᖅ.

¹¹ ᐊᑕᓂᐅᑉ ᑍᒤᑎᑦᑍᓕᓛᖓ ᐊᓯᕈᐃᓂᕐᒥᒃ ᓂᕈᐊᕐᓯᒪᔭᖓᓂᒃ ᐊᖓᔪᖅᑳᕐᔪᐊᖑᖁᓪᓗᒍ; ᖃᓗᒋᐊᖓ ᐃᒥᐅᑎᖓᓗ ᑎᒍᓚᐅᕐᓚᕗᒃ ᓂᐊᖁᐊᑕ ᓴᓂᐊᓃᑦᑐᑦ, ᑕᒫᓃᑦᓱᓐᓃᕐᓗᒃ.”

¹² ᑍᒤᒻᒪᑦ ᓴᐅᓕᐅᑉ ᖃᓗᒋᐊᖓ ᐃᒥᐅᑎᖓᓗ ᓂᐊᖁᐊᑕ ᓴᓂᐊᓃᑦᑑᒃ ᑍᕕᑎᐅᑉ ᑎᒍᓚᐅᕐᐰᑦ; ᐊᐅᓪᓚᕐᓗᑎᒡᓗ. ᖃᐅᔨᔪᖃᓚᐅᓐᖏᓚᖅ ᑕᑯᔪᖃᓚᐅᕋᓂᓗ, ᑐᐸᒃᑐᖃᓚᐅᓐᖏᓚᕐᓘᓐᓃᑦ; ᓯᓂᒃᑐᐃᓐᓇᐅᓚᐅᕐᒪᑕ, ᐊᑕᓂᐅᑉ ᓯᓂᕕᒃᔪᐊᕐᑎᓚᐅᕐᒪᒋᑦ.

¹³ ᑍᕕᑎᓗ ᓇᕐᓴᐅᑉ ᐊᑭᐊᓄᐊᕐᐳᖅ, ᖃᖅᑲᐅᑉ ᖄᖓᓄᑦ ᖃᕝᕕᕐᓗᓂ ᐅᖓᓯᒋᔮᓄᑦ, ᐊᑯᓐᓂᖓ ᓯᕕᑐᔫᓪᓗᓂ.

¹⁴ ᑍᕕᑎᓗ ᕾᒐᓛᓕᕐᐳᖅ ᓴᐅᓕᐅᑉ ᐅᓇᑕᕐᑐᒃᓴᖁᑎᖏᓐᓄᑦ ᐋᑉᓄᒧᓪᓗ ᓂᕆᐅᑉ ᐃᕐᓂᖓᓄᑦ, ᐅᖃᕐᓗᓂ, “ᐋᑉᓅ ᑐᓵᕕᖔ?” ᐋᑉᓄ ᑭᐅᕗᖅ, “ᑭᓈᓗᖏᓐᓈ ᕾᒐᓛᕐᑐᐊᓗᒃ ᐊᖓᔪᖅᑳᕐᔪᐊᕐᒥᒡᓗ ᕿᑦᓯᓵᕆᔪᐊᓗᒃ?”

¹⁵ ᑍᕕᑎᓗ ᐅᖃᕐᐳᖅ, “ᐋᑉᓄ, ᐱᒃᑲᐅᓂᕐᐸᐅᓐᖏᓚᑏᑦ ᐃᓴᕆᐊᓕᒥᐅᓂᑦ? ᓱᖕᒪᓪᓕ ᓴᐳᓐᓂᐊᓐᖏᓚᑎᑦ ᐊᑕᓂᕐᓂᒃ ᐊᖓᔪᖅᑳᕐᔪᐊᒦᒃ? ᒫᓐᓇᕋᑖᖅ ᑕᖕᒫᕐᓯᒪᕕᒋᔭᓯ ᐃᑎᕐᑕᐅᑬᓐᓇᕐᒪᑦ ᑐᖁᑦᓯᒋᐊᕐᑐᕐᑐᒥᒃ ᐊᖓᔪᖅᑳᕐᔪᐊᕐᓂᒃ.

¹⁶ ᐱᔭᒃᓴᕐᓂᒃ ᐱᓇᓱᐊᖏᓐᓇᕕᑦ ᐋᑉᓅ. ᓱᓕᑦᓯᐊᕐᐳᖓ ᐃᓘᓐᓇᓯ ᑐᖁᔪᒃᓴᐅᕗᓯ, ᓴᐳᓐᓂᐊᓚᐅᖏᓐᓇᑦᓯ ᐊᖓᔪᖅᑳᑦᓯᓐᓂᒃ, ᐊᑕᓂᐅᑉ ᐊᖓᔪᖅᑳᕐᔪᐊᕈᕐᑎᓯᒪᔭᖓᓂᒃ. ᑕᑯᒋᑦ ᓇᐅᒡᓕ ᐊᖓᔪᖅᑳᕐᔪᐊᑉ ᖃᓗᒋᐊᖓ? ᐃᒪᖃᐅᑎᖓᓕ ᓇᐅᒃ ᓂᐊᖁᐊᑕ ᓴᓂᐊᓃᓚᐅᕐᑐᖅ?”

¹⁷ ᓴᐅᓕ ᐃᓕᑕᕐᓯᕗᖅ ᑍᕕᑎᐅᑉ ᓂᐱᖓᓂᒃ ᐊᐱᕆᓪᓗᓂᓗ, “ᑍᕕᑏ ᐃᕝᕕᐅᕖᑦ, ᐃᕐᓃᒃ?” ᑍᕕᑎ ᑭᐅᕗᖅ, “ᓂᐱᒊᓐᓇ, ᐊᖓᔪᖅᑳᒃ, ᐊᖓᔪᖅᑳᕐᔪᐊᕋ.”

¹⁸ ᐅᖃᕆᐊᓪᓚᒡᓗᓂᓗ, “ᓱᖕᒪᑦ ᐊᖓᔪᖅᑳᒃ, ᐅᕙᓐᓂᒃ ᓱᓕ ᕿᓂᕐᐲᑦ ᐱᔨᖕᓂᒃ? ᖃᓄᐃᓕᐅᕐᓯᒪᒐᒫ? ᓱᓇᒦᒃ ᐸᓯᔭᒃᓴᐅᑦᔪᑎᖃᕋᒫ?

¹⁹ ᒫᓐᓇ ᑍᒤᒻᒪᑦ ᐊᖓᔪᖅᑳᒃ ᐊᖓᔪᖅᑳᕐᔪᐊᕋ ᓈᓚᓚᐅᕆᑦ ᐅᖃᐅᓯᓐᓂᒃ. ᐊᑕᓂᐅᑉ ᓵᑎᑉᐹᑎᑦ ᐅᕙᓐᓄᑦ, ᑐᓂᕐᕈᓯᕈᕕᑦ ᐃᓱᒪᖓ ᐊᓯᑦᔨᕐᓂᐊᕐᐳᖅ; ᐃᓄᖕᓂᓪᓕ ᑍᒤᑎᑕᐅᒍᕕᑦ, ᐊᑕᓂᐅᑉ ᑍᒃᑯᐊ ᓇᕐᕈᓇᕐᓯᑎᓪᓕᒋᑦ, ᓯᖏᑕᐅᓯᒪᒐᒪ ᐊᑕᓂᐅᑉ ᓄᓇᖁᑖᓂᑦ ᓄᓇᒦᓕᕐᐳᖓ ᒎᑎᓐᖑᐊᓄᑦ ᑭᓯᐊᓂ ᑐᒃᓯᐊᕐᕕᖃᕐᓇᕐᑐᒥ.

²⁰ ᑍᒤᒻᒪᑦ, ᑐᖁᑕᐅᑎᑦᑍᓕᓐᖓ ᓄᓇᒃᓴᔭᕆᓐᖏᑕᑦᑎᓐᓂ ᐊᑕᓂᐅᑉ ᓇᔪᕐᑕᖓᑕ ᐅᖓᓯᒋᔭᖓᓂ; ᓱᖕᒪᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᑐᖁᑦᓯᓇᓱᐊᕐᐹ ᐅᕙᓐᓂᒃ, ᑎᖕᒥᐊᕋᓱᒃᑐᑎᑐᑦ ᐊᕿᒡᒋᐊᑦᓯᐊᓂᒃ ᖃᖅᑲᓃᑦᑐᓂᒃ?”

²¹ ᑕᕝᕙ ᓴᐅᓕ ᐅᖃᕐᐳᖅ, “ᐊᔪᕐᑐᓕᓚᐅᕐᐳᖓ; ᐅᑎᓕᕆᑦ, ᐃᕐᓃᒃ ᑍᕕᑏ, ᐋᓐᓂᕋᓱᐊᕐᓂᐊᕈᓐᓃᕐᐸᒋᑦ, ᐃᓅᓯᕋ ᐱᐅᓕᓚᐅᕋᕕᐅᒃ ᐅᓪᓗᒥ; ᑕᑯᒋᑦ, ᓯᓔᑦᑐᐊᓗᖕᒥᒃ ᐱᓇᓱᐊᕐᓯᒪᕗᖓ, ᐱᐅᖏᑦᑐᐊᓗᖕᒥᒡᓗ ᐱᓇᓱᐊᕐᓯᒪᓪᓗᖓ.”

²² ᑍᕕᑎᓗ ᑭᐅᕗᖅ ᐅᖃᕐᓗᓂ, “ᐅᕝᕙ ᖃᓗᒋᐊᑦ, ᐊᖓᔪᖅᑳᕐᔪᐊᖅ! ᐃᓄᖁᑎᕕᑦ ᐃᓚᖓᓐᓄᑦ ᐂᔭᐅᓕᕐᓕ.

²³ ᐊᑕᓂᐅᑉ ᐊᑭᓕᑦᓯᐊᖃᑦᑕᕐᐰᑦ ᓇᓛᒍᑦ ᐱᓇᓱᐊᕐᑐᑦ ᐃᓱᐊᕐᑐᓪᓗ; ᐅᓪᓗᒥ ᐊᑕᓂᐅᑉ ᐅᕙᓐᓄᑦ ᑐᓂᓚᐅᕐᐹᑎᑦ, ᑭᓯᐊᓂᓕ ᐱᒋᐊᓚᐅᓐᖏᓚᒋᑦ ᐊᑕᓂᐅᑉ ᐊᖓᔪᖅᑳᕐᔪᐊᕈᕐᑎᓚᐅᕐᒪᑎᑦ.

²⁴ ᑕᑯᒋᑦ, ᑍᒫᒃ ᐅᓪᓗᒥ ᐱᐅᓕᖅᑲᐅᒐᒃᑭᑦ, ᑍᒫᒃᑕᐅᖅ ᐊᑕᓂᐅᑉ ᐱᓂᐊᕐᕕᒋᓕᖓ ᐃᓱᐃᓪᓕᐅᕈᑎᒃᑲᓗ ᐲᕐᑎᓪᓗᓂᒋᑦ.”

²⁵ ᑕᕝᕙ ᓴᐅᓕ ᐅᖃᕐᐳᖅ ᑍᕕᑎᒧᑦ, “ᒎᑎᐅᑉ ᓮᒻᒪᕐᑎᓪᓕᑎᑦ, ᐃᕐᓃᒃ ᑍᕕᑏ! ᐱᓇᓱᐊᕐᑕᓕᒫᕐᓂ ᐱᔪᓐᓇᑦᓯᐊᕐᓂᐊᕐᐳᑎᑦ.” ᑍᒤᒻᒪᑦ ᑍᕕᑎ ᐅᐸᒍᒪᔭᒥᓄᐊᓕᓚᐅᕐᐳᖅ, ᓴᐅᓕᓗ ᐅᑎᓕᕐᓗᓂ ᐊᖏᕐᕋᒥᓄᑦ.