ᓴᒧᐃᓕ ᓯᕗᓪᓖᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦᓴᒧᐃᓕᐅᑉ ᑐᖁᓂᖓ 1 ᓴᒧᐃᓕᓕ ᑐᖁᖕᒪᑦ; ᐃᓴᕆᐊᓕᒥᐅᓕᒫᑦ ᑲᑎᕗᑦ ᕿᒃᓴᐅᑎᒋᓪᓗᒍ. ᑭᖑᓂᖓᒍᓪᓗ ᐃᓗᕕᕐᐹᑦ ᐊᖏᕐᕋᖓᓂ ᕌᒪᒥ. ᑍᕕᑎᓗ ᓇᔪᕐᑕᒥᓂᑦ ᐊᐅᓪᓚᕐᐳᖅ ᐊᒻᒧᐊᒡᓗᓂᓗ ᐃᓄᖃᔪᐃᑦᑐᒧᑦ ᐸᕌᓂᒧᑦ. ᑍᕕᑎᓗ ᐊᐱᒊᓕᓗ 2 ᐊᖑᑎᑕᖃᓚᐅᕐᐳᖅ ᒪᐅᓇᒥ ᐱᓇᓱᐊᒐᖃᕐᑐᒥᒃ ᑳᕐᒥᐅᓪᒥ. ᑖᓐᓇᓗ ᐊᒃᓱᐃᑦᑐᕐᔪᐊᖑᕗᖅ, ᓰᐱᖁᑎᖃᕐᐳᖅ 3,000ᓂᒃ ᒎᑦᓯᖁᑎᖃᕐᓗᓂᓗ 1,000ᓂᒃ. ᓰᐱᖁᑎᓂᓗ ᕿᐅᕐᑕᓚᐅᕐᐰᑦ ᑳᕐᒥᐅᓪᒥ. 3 ᑖᓐᓇ ᐊᖑᑦ ᐊᑎᖃᕐᐳᖅ ᓁᐳᓪᒥᒃ, ᓄᓕᐊᖓᓗ ᐊᐱᒊᓕᒥᒃ ᐊᑎᖃᕐᓗᓂ. ᑖᓐᓇ ᐊᕐᓇᖅ ᑲᒪᑦᓯᐊᕐᑑᕗᖅ ᐃᓂᖁᓇᕐᑑᓪᓗᓂᓗ, ᐊᖑᓪᓕ ᐃᓕᕋᓇᕐᑑᓚᐅᕐᐳᖅ ᐱᐅᖏᑦᑐᓂᒡᓗ ᐱᓂᐊᕐᓂᖃᕐᓗᓂ; ᑖᓐᓇᓗ ᑬᓚᐱᐅᑉ ᑭᖑᕚᕆᕚ. 4 ᑍᕕᑎᓗ ᐃᓄᖃᔪᐃᑦᑐᒦᓪᓗᓂ ᑐᓴᕋᒥ ᓁᐳᓪ ᓰᐱᖁᑎᒥᓂᒃ ᕿᐅᕐᑍᓂᖓᓂ. 5 ᑕᕝᕙ ᑍᕕᑎ ᑎᓕᓯᕗᖅ ᐃᓅᓱᒃᑐᓂᒃ ᖁᓕᓂᒃ; ᐅᖃᐅᑎᓪᓗᒋᓪᓗ ᐃᓅᓱᒃᑐᑦ, “ᑳᕐᒥᐅᓪᒧᑦ ᐂᓚᐅᕆᑦᓯ, ᓁᐳᓪᒧᑦ, ᑐᓐᖓᓴᕐᓗᒍᓗ ᐱᑦᔪᑎᒋᓗᖓ. 6 ᐃᒫᒃ ᓂᓪᓕᐅᑎᔭᒃᓴᕆᕙᓯ: ‘ᓮᒻᒪᕐᑎᑕᐅᒋᑦ, ᐃᒡᓗᒥᐅᖃᑎᑎᓪᓗ ᓮᒻᒪᕐᑎᑕᐅᓕᑦ, ᐱᖁᑎᓕᒫᑎᓪᓗ ᓮᒻᒪᕐᑕᐅᖕᒥᓗᑎᒃ. 7 ᑐᓴᓚᐅᕋᒪ ᓰᐱᖁᑎᖕᓂᒃ ᕿᐅᕐᑍᑎᓪᓗᑎᑦ; ᓰᐱᓂᒃ ᐰᕐᓯᔨᖁᑎᑎᑦ ᐃᓚᒋᖃᑦᑕᕋᑦᑎᒍ, ᖃᓄᐃᓕᓚᐅᕐᓇᒋᓪᓗ ᑲᒪᒋᑦᓯᐊᕐᓯᒪᕙᕗᑦ, ᓱᓇᒥᒡᓘᓐᓃᑦ ᐊᓯᐅᔨᓚᐅᓐᖏᓚᑦ, ᑕᒫᓃᑎᓪᓗᒋᑦ ᑳᕐᒥᐅᓪᒥ. 8 ᐊᐱᕆᒍᕕᒋᑦ ᐃᓄᖁᑎᑎᑦ ᑖᒃᑯᐊ ᐅᖃᕈᓐᓇᕐᐳᑦ. ᑍᒤᒻᒪᑦ ᐃᓅᓱᒃᑐᖁᑎᒃᑲ ᖁᕕᐊᒋᔭᐅᓚᐅᕐᓕᑦ ᐃᓕᖕᓄᑦ; ᑎᑭᓛᕋᑦᑕ ᓇᓪᓕᐅᓐᓂᕐᓯᐅᕐᕕᐅᑉ ᐅᓪᓗᖓᓂ. ᑐᓂᓯᓚᐅᕆᑦ ᐱᔪᓐᓇᕐᑕᕐᓂᒃ ᐱᔨᖕᓄᑦ ᐃᕐᓂᕐᓄᓪᓗ ᑍᕕᑎᒧᑦ.’” 9 ᑍᕕᑎᐅᑉ ᐃᓅᓱᒃᑐᖁᑎᖏᑦ ᑎᑭᓐᓇᒥᒃ, ᓁᐳᓪ ᐅᖃᖃᑎᒋᕚᑦ ᑍᕕᑎᐅᑉ ᐅᖃᐅᓯᖏᓐᓂᒃ ᐊᑎᖓᓗ ᐊᑐᕐᓗᒍ; ᐅᑕᕿᓕᕐᓗᑎᒡᓗ. 10 ᓁᐳᓕ ᑭᐅᕗᖅ ᑍᕕᑎᐅᑉ ᐱᔨᖏᓐᓄᑦ ᐅᖃᕐᓗᓂ, “ᑍᕕᑏᓐᓇ ᑭᓇ? ᔨᓯᐅᑉ ᐃᕐᓂᖓ ᖃᓄᐃᑦᑑᕙ? ᐅᓄᕐᑐᐊᓗᐃ ᐅᓪᓗᒥ ᕿᒤᕙᓕᕐᒪᑕ ᐊᖓᔪᖅᑳᒥᖕᓂᒃ. 11 ᓂᐊᖂᔭᓂᒃ ᐃᒥᕐᒥᒡᓗ ᓂᕿᓂᒡᓗ ᑐᖁᓚᐅᕐᑕᓐᓂᒃ ᕿᐅᕐᑍᔨᖁᑎᓐᓄᑦ ᓂᕿᒃᓴᐅᖁᓪᓗᒋᑦ, ᑐᓂᓯᔪᒃᓴᐅᕗᖓ ᐃᓄᖕᓄᑦ ᓇᑭᑦ ᐱᖕᒪᖔᑕ ᖃᐅᔨᒪᓐᖏᑕᓐᓄᑦ?” 12 ᑕᕝᕙ ᑍᕕᑎᐅᑉ ᐃᓅᓱᒃᑐᖁᑎᖏᑦ ᑕᕝᕙᓐᖓᑦ ᐊᐅᓪᓚᕐᐳᑦ; ᐅᑎᕋᒥᒡᓗ ᑍᕕᑎ ᐅᖃᐅᑎᕚᑦ ᓁᐴᑉ ᐅᖃᐅᓯᖏᓐᓂᒃ. 13 ᑍᕕᑎᐅᓪᓗ ᐃᓄᖁᑎᓂ ᐅᖃᐅᑎᕔᑦ, “ᐊᑕᖏᕐᓗᓯ ᓴᕕᒡᔪᐊᓯ ᑕᑦᓯᕈᑎᓯᓗ ᐊᑎᓕᕐᓯᐅᒃ!” ᑕᕝᕙ ᐃᓄᖁᑎᓕᒫᖏᑦ ᓴᕕᒡᔪᐊᒥᖕᓂᒃ ᑕᑦᓯᕈᑎᒥᓂᒡᓗ ᐊᑎᓯᕗᑦ; ᑍᕕᑎᑦᑕᐅᖅ ᓴᕕᒡᔪᐊᒥᓂᒃ ᑕᑦᓯᕈᑎᒥᓂᒡᓗ ᐊᑎᒋᕗᖅ; ᐊᖑᑎᓪᓗ 400 ᖃᓂᒋᔮᓃᓚᐅᕐᐳᑦ ᑍᕕᑎᐅᑉ ᐃᓚᒋᔭᖏᑦ, 200 ᕿᒪᒃᑕᐅᓪᓗᑎᒃ ᐱᖁᑎᓂᒃ ᑲᒪᖁᓪᓗᒋᑦ. 14 ᐃᓅᓱᒃᑐᓪᓕ ᐃᓚᖓ ᐅᖃᕐᐳᖅ ᓁᐴᑉ ᓄᓕᐊᖓᓄᑦ ᐊᐱᒊᓕᒧᑦ ᐅᖃᕐᓗᓂ, “ᑕᑯᒋᑦ, ᑍᕕᑎ ᐃᓄᖁᑎᒥᓂᒃ ᐃᓄᖃᔪᐃᑦᑐᒥᑦ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᑐᓐᖓᓮᓪᓗᓂᓗ ᐊᖓᔪᖅᑳᑦᑎᓐᓂᒃ; ᑖᑦᓱᒪᓕ ᓱᐊᒃᓗᒋᑦ ᒥᑕᐅᑎᒋᓚᐅᕐᐰᑦ. 15 ᑖᒃᑯᐊ ᐊᖑᑏᑦ ᐱᑦᓯᐊᕐᑎᒻᒪᕆᐊᓗᒋᖃᑦᑕᓚᐅᕐᐸᕗᑦ, ᐅᕙᑦᑎᓐᓂᒡᓗ ᐸᒃᕕᓴᓚᐅᕋᑎᒃ, ᑍᒪᓐᖓᓪᓗ ᐱᖃᑎᒋᖃᑦᑕᕋᓗᐊᕋᑦᑎᒍᑦ ᐱᕈᕐᓰᕕᖕᒥ, ᐱᒋᔭᑦᑎᓐᓂᒃ ᐊᓯᐅᔨᓚᐅᓐᖏᓚᒍᑦ. 16 ᐊᕙᓗᕐᔪᐊᕆᔮᖃᑦᑕᓚᐅᕐᐸᕗᑦ ᐅᓪᓗᒃᑯᑦ ᐅᓐᓄᒃᑯᓪᓗ, ᐆᒪᔪᖁᑎᑦᑎᓐᓂᒃ ᑲᒪᑎᓪᓗᑕ ᐃᓚᒋᓕᕌᖓᑦᑎᒍᑦ. 17 ᑍᒤᒻᒪᑦ ᑕᒪᓐᓇ ᖃᐅᔨᒪᓕᕈᒃ ᐃᓱᒪᒃᓴᕐᓯᐅᕐᓗᑎᓪᓗ ᖃᓄᐃᓕᐅᕐᓂᐊᕐᒪᖔᕐᐱᑦ; ᑕᒪᓐᓇ ᐊᖓᔪᖅᑳᑦᑎᓐᓄᑦ ᐱᐅᖏᑦᑐᒧᑦ ᑐᕌᖓᓕᕐᒪᑦ ᐃᒡᓗᒥᐅᖃᑎᖏᓐᓄᓪᓗ, ᐃᓱᒪᓗᒃᑐᐊᓘᖕᒪᑦ ᓇᓪᓕᐊᓐᓂᒡᓘᓐᓃᑦ ᓈᓚᒍᓐᓇᕋᓂ.” 18 ᑕᕝᕙ ᐊᐱᒊᓕ ᑐᐊᕕᕐᓗᓂ ᑲᑎᕐᓱᐃᕗᖅ 200ᓂᒃ ᓂᐊᖂᔭᓂᒃ, ᕿᓰᖕᓂᒡᓗ ᒪᕐᕉᖕᓂᒃ ᕔᓂᖃᐅᑏᖕᓂᒃ, ᑕᓪᓕᒪᓂᒡᓗ ᓰᐱᓂᒃ ᐆᓯᒪᔪᓂᒃ, ᐃᕕᐅᔮᖕᓂᒡᓗ ᒪᕐᕉᖕᓂᒃ ᐆᓯᒪᔪᓂᒃ ᓂᐊᖂᔭᒃᓴᓂᒃ, 100ᓂᒡᓗ ᐊᕕᒃᑐᕇᕐᓯᒪᔪᓂᒃ ᐸᐅᕐᖓᐅᔭᓂᒃ, 200ᓂᒡᓗ ᑬᓕᐊᕆᓯᒪᔪᓂᒃ ᐱᒋᓕᖕᓂᒃ, ᑕᒪᒃᑯᐊᓗ ᓯᐅᑎᖅᑯᕐᑐᔪᓄᑦ ᐅᓯᓕᕐᓲᑎᕔᑦ. 19 ᐱᔨᒥᓄᓪᓗ ᐃᓅᓱᒃᑐᓄᑦ ᐅᖃᕐᐳᖅ, “ᓯᕗᓪᓕᐅᓗᓯ ᐃᖏᕐᕋᓕᕆᑦᓯ; ᐅᕙᖓᓕ, ᑭᖑᓂᑦᓯᓐᓂ ᒪᓕᖕᓂᐊᕐᐳᖓ.” ᐅᐃᓂᓕ ᓁᐳᓪ ᐅᖃᐅᑎᓚᐅᓐᖏᓛ ᑕᒪᑐᒥᖓ. 20 ᐃᑭᒪᓪᓗᓂ ᓯᐅᑎᖅᑯᕐᑐᔪᒥ ᐃᖏᕐᕋᑎᓪᓗᒍ, ᐱᖑᐊᕐᔫᑉ ᓴᓂᐊᒎᓕᕐᑎᓪᓗᒍ, ᑕᑯᒋᑦ, ᑍᕕᑎ ᐃᓄᖁᑎᖏᓪᓗ ᖃᖅᑲᒥᑦ ᐊᒻᒧᐊᓚᐅᕐᐳᑦ ᐊᕐᓇᐅᑉ ᓇᔪᕐᑕᖓᑕ ᓇᓛᓄᑦ; ᑖᑦᓱᒪᓗ ᑲᑎᕔᑦ. 21 ᑍᕕᑎᓗ ᐅᖃᕐᓯᒪᓚᐅᕐᐳᖅ, “ᖁᓚᕐᓇᓐᖏᓚᖅ ᑕᒪᐅᖎᓐᓇᖅ ᓴᐳᑎᖃᑦᑕᓚᐅᕐᐸᒃᑲ ᑖᑦᓱᒪ ᐱᖁᑎᖏᑦ ᐃᓄᖃᔪᐃᑦᑐᒥ, ᓱᓇᒥᒡᓘᓐᓃᑦ ᑭᓐᖑᐃᓚᐅᓐᖏᓚᑦ ᐱᖁᑎᒥᖕᓂᒃ; ᑖᑦᓱᒪᓕ ᐱᓂᐊᕐᓂᕆᓚᐅᕐᑕᒃᑲ ᐱᐅᔪᑦ ᐱᐅᖏᑦᑐᒥᒃ ᐊᑭᓕᕐᐰᑦ. 22 ᒎᑎᐅᑉ ᑍᕕᑎ ᓱᒋᐊᕐᓂᐊᕐᐹ ᑐᖁᓪᓗᓂᐅᒡᓗ, ᐅᓪᓛᓐᖑᓕᕐᑎᓪᓗᒍ ᐊᑕᐅᓯᕐᒥᒡᓘᓐᓃᑦ ᐊᖑᒻᒥᒃ ᐃᓅᔪᖃᑐᐊᕐᐸᑦ ᑖᑦᓱᒪ ᐃᓄᖁᑎᖓᓂᒃ.” 23 ᐊᐱᒊᓕᐅᓪᓕ ᑍᕕᑎ ᑕᑯᒐᒥᐅᒃ, ᑐᐊᕕᕐᓗᓂ ᓂᐅᕗᖅ ᓯᐅᑎᖅᑯᕐᑐᔪᒥᑦ, ᐹᒻᒪᒃᑎᕐᓗᓂᓗ ᑍᕕᑎᐅᑉ ᓵᖓᓄᑦ, ᐅᑯᓪᓗᓂᓗ ᓄᓇᒧᑦ. 24 ᐃᑎᒐᖏᓐᓄᑦ ᐹᒻᒪᒃᓗᓂ ᐅᖃᕐᐳᖅ, “ᐅᕙᓐᓄᑐᐊᖅ ᐊᖓᔪᖅᑳᖅ, ᐅᕙᓐᓄᑦ ᑕᒪᓐᓇ ᐸᓯᔭᒃᓴᐅᓂᖅ ᐃᓕᖓᓕ; ᑐᒃᓯᐊᕐᐳᖓ ᐱᔩᑦ ᐃᓕᖕᓄᑦ ᐅᖃᕈᓐᓇᕐᑎᓚᐅᕈᒃ, ᐅᖃᐅᓯᖏᓪᓗ ᑐᓴᕐᓗᒋᑦ. 25 ᐊᖓᔪᖅᑳᕋ ᐃᓱᒪᒋᑦᑍᓕᒍᒃ ᓁᐴᓪ ᐃᓱᒪᓗᒃᑐᖅ; ᐊᑎᖓ ᒪᓕᒃᐳᖅ ᐃᓄᖕᒥᓄᑦ; ᓁᐳᓪᒥᒃ ᐊᑎᖃᕋᒥ, ᓯᒃᑲᖓᓂᖅ ᐱᒋᕚ; ᐅᕙᖓᓕ ᐱᔩᑦ ᐊᖓᔪᖅᑳᒪ ᑎᓕᓚᐅᕐᑕᖏᓐᓂᒃ ᐃᓅᓱᒃᑐᓂᒃ ᖃᐅᔨᓚᐅᓐᖏᓚᖓ. 26 ᒫᓐᓇᓕ ᐊᖓᔪᖅᑳᒃ, ᐊᑕᓂᖅ ᐆᒪᖕᒪ, ᑕᕐᓃᓪᓗ ᐆᒪᑎᓪᓗᒍ, ᐊᑕᓂᐅᑉ ᐃᓂᕐᑎᓚᐅᕐᐹᑎᑦ ᑐᖁᑦᓯᖁᓇᒃ ᐊᑭᒋᐊᖁᓇᒡᓗ ᐊᒡᒐᖕᓄᑦ, ᒫᓐᓇᓕ, ᐊᑭᕋᑎᑦ ᐃᓕᖕᓂᒃ ᓱᕅᓇᓱᐊᕐᑐᑦ ᓁᐳᓪᑎᑐᑦ ᑍᒤᓕᕐᓕᑦ. 27 ᑖᒃᑯᐊᓗ ᐱᔨᕕᑦ ᑐᓂᔭᖏᑦ ᓈᒻᒪᒋᑭᑦ, ᑐᓂᔭᐅᓗᑎᒡᓗ ᐃᓅᓱᒃᑐᖁᑎᖕᓄᑦ ᐊᖓᔪᖅᑳᓐᓂᒃ ᓈᓚᒃᑐᓄᑦ. 28 ᐃᓱᒪᒋᔪᓐᓁᕐᕕᒋᓐᖓ ᐊᖓᔪᖅᑳᒃ ᐊᔪᕐᑐᓕᓂᓐᓂᒃ; ᐊᑕᓂᐅᑉ ᐊᖓᔪᖅᑳᕋ ᕿᓄᐃᓵᕐᑎᑉᐹ ᐃᒡᓗᒥᐅᖃᑎᖏᓪᓗ, ᐊᖓᔪᖅᑳᕋ ᐅᓇᑕᖃᑦᑕᕐᒪᑦ ᐊᑕᓂᐅᑉ ᐅᓇᑕᕐᓂᖏᓐᓂᒃ; ᐱᐅᖏᑦᑐᒥᒡᓗ ᓇᓂᓯᔪᖃᕐᓂᐊᓐᖏᓚᑦ ᐃᓕᖕᓂ ᐃᓅᓂᓕᒫᕐᓂ. 29 ᐅᓇᑕᕆᐊᕐᑕᐅᒍᕕᑦ ᑐᖁᑕᐅᓇᓱᐊᕐᓗᑎᑦ, ᐊᑕᓂᐅᑉ ᒎᑎᕕᑦ ᓴᐳᑎᔪᒫᕐᐹᑎᑦ, ᐊᖑᑎᑐᑦ ᐱᓐᓇᕆᔭᒥᓂᒃ ᓴᐳᓐᓂᐊᕐᑐᑎᑐᑦ, ᐊᑭᕋᑎᓪᓕ ᐃᒋᑕᐅᔪᒫᕐᐳᑦ, ᐊᖑᑎᑐᑦ ᐃᓪᓘᒥᓄᑦ ᐃᓪᓘᕆᐊᕐᑐᑎᑐᑦ. 30 ᐊᑕᓂᐅᑉ ᐱᓇᓱᐊᕐᕕᒋᔭᕇᕐᐸᑎᑦ ᐱᐅᔪᓂᒃ ᐅᖃᐅᓯᕆᓚᐅᕐᑕᒥᓂᒃ ᐱᑦᔪᑎᒋᓗᑎᑦ, ᑎᓕᓚᐅᕐᐹᑎᓪᓗ ᐊᖓᔪᖅᑳᕐᔪᐊᓐᖑᖁᓪᓗᑎᑦ ᐃᓴᕆᐊᓕᒥᐅᓄᑦ. 31 ᐅᒡᒍᐊᕈᑎᖃᕐᓂᐊᓐᖏᓚᑎᑦ, ᐃᓱᒪᒃᑯᓪᓗ ᕿᒃᓵᒍᑎᖃᕐᓂᐊᕐᓇᒃ, ᐊᖓᔪᖅᑳᒃ, ᑐᖁᑦᓯᒐᔭᓚᐅᕈᕕᑦ ᐱᑦᔪᑎᖃᖏᓪᓗᑎᑦ ᐅᕝᕙᓘᓐᓃᑦ ᓇᖕᒥᓂᖅ ᐱᑦᔪᑎᒋᓗᑎᑦ ᐊᑭᒋᐊᕋᔭᓚᐅᕈᕕᑦ. ᐊᑕᓂᐅᓪᓗ ᐱᓂᐊᑦᓯᐊᕐᕕᒋᓕᕐᐸᑎᑦ, ᐊᖓᔪᖅᑳᒃ, ᐱᔩᑦ ᐳᐃᒍᕐᑍᓕᓛᕐᐸᑦ.” 32 ᑍᕕᑎᐅᑉ ᐊᐱᒊᓕ ᐅᖃᐅᑎᕚ, “ᐊᑕᓂᖅ ᓂᕐᑐᕐᑕᐅᓕ, ᐃᓴᕆᐊᓕᒥᐅᑦ ᒎᑎᖓ, ᑎᓕᓚᐅᕐᒪᑎᑦ ᐅᓪᓗᒥ ᑲᑎᓯᖁᓪᓗᑎᑦ ᐅᕙᓐᓂᒃ! 33 ᒎᑎ ᖁᔭᒋᔭᐅᓕ ᐱᑦᓯᐊᕐᓂᕐᓄᑦ ᐱᓂᐊᕐᓂᕐᓄᓪᓗ, ᐊᑭᓂᐊᕐᑎᖏᓐᓇᕕᓐᖓ, ᑐᖁᑦᓯᑎᓐᓇᖓᓗ ᐅᕙᓐᓂᒃ ᐊᑭᓂᐊᕈᒪᓕᕐᑎᓪᓗᖓ ᐱᔪᓐᓇᕐᓂᓐᓄᑦ. 34 ᐊᑕᓂᐅᑉ ᓄᖅᑲᕐᑎᓚᐅᕐᐹᖓ ᐃᓕᖕᓂᒃ ᐋᓐᓂᕐᓯᖁᓇᖓ, ᓱᓕᑦᓯᐊᕐᐳᖓ ᐃᓴᕆᐊᓕᒥᐅᑦ ᒎᑎᖓᓄᑦ ᐆᒪᔪᒧᑦ, ᑐᐊᕕᕐᓗᑎ ᑲᑎᒋᐊᕐᑐᖅᑲᐅᖏᒃᑯᕕᓐᖓ, ᓁᐳᓕᐅᑉ ᐃᓄᖁᑎᓕᒫᖏᑦ ᐊᖑᑎᑦ ᑐᖁᖓᓕᕋᔭᕐᐳᒃ ᐅᓪᓛᓐᖑᓚᐅᕐᑎᓐᓇᒍ.” 35 ᑕᕝᕙ ᑍᕕᑎᐅᑉ ᐃᓚᓕᐅᓚᐅᕐᐰᑦ ᑖᑦᓱᒪ ᐂᑦᑑᑎᖏᑦ; ᐅᖃᐅᑎᓪᓗᒍᓗ, “ᐊᖏᕐᕋᓕᕆᑦ ᐃᓱᒫᓗᒃᑍᓕᓗᑎᑦ; ᑕᑯᒋᑦ ᐅᖃᐅᓯᕆᔭᕐᓂᒃ ᓈᓚᖕᓂᐊᕐᐳᖓ, ᐱᔪᒪᔭᕐᓂᒡᓗ ᐱᓇᓱᐊᕐᓂᐊᕐᐳᖓ.” 36 ᐊᐱᒊᓕᓗ ᐅᑎᓚᐅᕐᐳᖅ ᓁᐳᓪᒧᑦ; ᓁᐳᓕ ᐊᖏᕐᕋᕐᓯᒪᓚᐅᕐᐳᖅ ᓂᕆᕕᒃᔪᐊᕐᓗᓂ ᐊᖓᔪᖅᑳᕐᔪᐊᒧᑦ ᓈᒻᒪᑦᑐᓂᒃ. ᐋᖓᔮᒻᒪᕆᓕᓚᐅᕐᐳᖅ ᖁᕕᐊᓱᓕᕐᓗᓂᓗ; ᑍᒤᒻᒪᑦ ᐅᖃᐅᑎᓚᐅᓐᖏᓛ, ᖃᐅᓚᐅᕐᑎᓐᓇᒍ. 37 ᐅᓪᓛᓐᖑᕐᑎᓪᓗᒍ ᓁᐳᓕ ᐋᖓᔮᕈᓐᓃᕐᒪᑦ, ᓄᓕᐊᖓᑕ ᑕᒪᒃᑯᓂᖓ ᐱᓂᐊᕐᓂᐅᓚᐅᕐᑐᓂᒃ ᐅᖃᐅᑎᖕᒪᒍ, ᐆᒻᒪᓯᕗᖅ ᓄᑭᖃᕈᓐᓃᕐᓗᓂ ᐅᔭᕋᒃᑎᑐᑦ. 38 ᐅᓪᓗᐃᑦ ᖁᓖᑦ ᐊᓂᒍᕐᒪᑕ ᐊᑕᓂᐅᑉ ᓁᐳᓪ ᐊᓇᐅᕚ, ᑐᖁᓪᓗᓂᓗ. 39 ᑍᕕᑎᓕ ᑐᓴᕋᒥ ᓁᐳᓕᐅᑉ ᑐᖁᓂᖓᓂᒃ, ᐅᖃᕐᐳᖅ, “ᐊᑕᓂᖅ ᓂᕐᑐᕐᑕᐅᓕ ᐊᑭᒋᐊᓚᐅᕐᒪᑦ ᓁᐳᓪᒥᒃ, ᐅᕙᓐᓂᒃ ᒥᑕᐅᑎᖃᕐᓂᖓ ᐱᓪᓗᒍ, ᑕᒻᒪᕐᓂᕐᒥᓪᓗ ᓴᐳᑎᓚᐅᕐᒪᖓ; ᐊᑕᓂᐅᑉ ᓱᒋᐊᓚᐅᕐᐹ ᓁᐳᓪ ᐱᐅᖏᑦᑐᒥᒃ ᐱᓂᐊᓚᐅᕐᓂᖓ ᐱᓪᓗᒍ.” ᑍᕕᑎᓗ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᓂᒃ ᓄᓕᐊᕐᑖᕈᒪᓪᓗᓂ ᐊᐱᒊᓕᒥᒃ. 40 ᑍᕕᑎᐅᓪᓗ ᐱᔨᖏᑦ ᐊᐱᒊᓕᒧᑦ ᐂᕗᑦ ᑳᕐᒥᐅᓪᒧᑦ, ᐅᖃᐅᑎᓪᓗᒍᓗ, “ᑍᕕᑎᐅᑉ ᑎᓕᕚᑎᒍᑦ ᐃᓕᖕᓂᒃ ᐂᒃᓯᖁᓪᓗᑕ ᓄᓕᐊᕐᑖᕆᔪᒪᖕᒪᑎᑦ.” 41 ᐊᐱᒊᓕᓕ ᐹᒻᒪᒃᑎᕐᐳᖅ ᒪᓂᖅᑲᒧᑦ ᐅᖃᕐᓗᓂᓗ, “ᑕᑯᒋᑦ, ᑖᑦᓱᒧᖓ ᐱᔨᒋᔭᐅᕗᖓ ᐊᑐᐃᓐᓇᐅᕗᖓ ᐊᖓᔪᖅᑳᒪ ᐱᔨᖏᑕ ᐃᑎᒐᖏᓐᓂᒃ ᐅᐊᓴᖃᑦᑕᕈᓐᓇᖁᓪᓗᖓ.” 42 ᐊᐱᒊᓕᓗ ᒪᑭᑦᓴᐅᑎᒋᓚᐅᕐᐳᖅ ᓯᐅᑎᖅᑯᕐᑐᔪᒧᓪᓗ ᐃᑭᓪᓗᓂ, ᐃᓚᖃᕐᓗᓂ ᐊᕐᓇᓂᒃ ᑕᓪᓕᒪᓂᒃ ᐱᔨᒥᓂᒃ; ᑍᕕᑎᐅᓪᓗ ᐱᔨᖏᑦ ᐱᖃᑎᒋᓪᓗᓂᒋᑦ ᐂᕗᖅ, ᑍᕕᑎᐅᓪᓗ ᓄᓕᐊᕐᑖᕆᓚᐅᕐᐹ. 43 ᑍᕕᑎᑦᑕᐅᖅ ᓄᓕᐊᓂᒃᑲᓐᓂᓚᐅᕐᐳᖅ ᐊᕼᐃᓄᐊᒥᒃ ᔨᔭᕆᐊᓪᒥᐅᑕᒥᒃ; ᑖᒃᑯᐊᒡᓗ ᒪᕐᕉᒃ ᓄᓕᐊᕐᑖᕆᓚᐅᕐᐹᒃ. 44 ᓴᐅᓕᐅᓪᓕ ᐸᓂᓂ ᒤᑲᓪ, ᑍᕕᑎᐅᑉ ᓄᓕᐊᕆᓚᐅᕐᑕᖓ, ᐂᑦᑑᑎᒋᓚᐅᕐᐹ ᐱᐅᓪᑍᒧᑦ ᓔᓯᐅᑉ ᐃᕐᓂᖓᓄᑦ, ᒐᓕᒻᒥᐅᑕᕐᒧᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society