ᓴᒧᐃᓕ ᓯᕗᓪᓖᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦᑍᕕᑎᐅᑉ ᐱᐅᓕᒃᓯᓂᖓ ᑮᓚᒥᐅᓂᒃ 1 ᑕᕝᕙ ᑍᕕᑎ ᐅᖃᐅᑦᔭᐅᕗᖅ ᐅᖃᕐᓗᑎᒃ, “ᑕᑯᒋᑦ, ᐱᓕᔅᑍᓂᒥᐅᑦ ᐅᓇᑕᕆᐊᕐᐳᑦ ᑮᓚᒥᐅᓂᒃ, ᑎᒡᓕᒐᓱᐊᕐᓗᑎᒡᓗ ᓂᐊᖂᔭᒃᓴᓂᒃ ᐃᕖᔧᕕᖕᒥᑦ.” 2 ᑍᒤᒻᒪᑦ ᑍᕕᑎ ᐊᑕᓂᕐᒧᑦ ᐊᐱᕆᕗᖅ, “ᐅᓇᑕᕆᐊᕐᑐᒃᓴᐅᕗᖔ ᐱᓕᔅᑍᓂᒥᐅᓂᒃ?” ᐊᑕᓂᐅᑉ ᑭᐅᕚ, “ᐊᑏ, ᐅᓇᑕᕆᐊᓕᕆᑦ ᐱᓕᔅᑍᓂᒥᐅᓂᒃ, ᑮᓚᒥᐅᓪᓗ ᐱᐅᓕᓗᒋᑦ.” 3 ᑍᕕᑎᐅᓪᓕ ᐃᓄᖁᑎᖏᑕ ᐅᖃᐅᑎᕚᑦ, “ᑕᑯᒋᑦ, ᑲᑉᐱᐊᓱᒃᐳᒍᑦ ᐅᕙᓂ ᔫᑕᒥ; ᐱᐅᖏᓐᓂᕐᓴᐅᓐᖏᓛᖅ ᑮᓚᒧᐊᕐᓗᑕ ᐅᓇᑕᕆᐊᕆᐊᓕᕈᑦᑕ ᐱᓕᔅᑍᓂᒥᐅᓂᒃ?” 4 ᑕᕝᕙ ᑍᕕᑎᐅᑉ ᐊᑕᓂᖅ ᐊᐱᕆᒃᑲᓐᓂᕐᐹ. ᐊᑕᓂᐅᓪᓗ ᐅᖃᐅᑎᕙ, “ᒪᑭᓪᓗᑎᑦ ᑮᓚᒧᐊᓕᕆᑦ; ᐱᓕᔅᑍᓂᒥᐅᑦ ᐃᓕᖕᓄᑦ ᑐᓂᓂᐊᕐᐸᒃᑲ.” 5 ᑕᕝᕙ ᑍᕕᑎᓗ ᐃᓄᖁᑎᖏᓪᓗ ᑮᓚᒧᐊᕐᐳᑦ, ᐅᓇᑕᕐᓗᑎᒡᓗ ᐱᓕᔅᑍᓂᒥᐅᓂᒃ; ᐅᓄᕐᑐᓂᒡᓗ ᑐᖁᕅᕗᑦ ᐆᒪᔪᖁᑎᖏᓪᓗ ᑎᒍᕔᑦ. ᑕᕝᕙ ᑍᕕᑎᐅᑉ ᑮᓚᒥ ᓄᓇᓖᑦ ᐱᐅᓕᓚᐅᕐᐰᑦ. 6 ᐊᐰᐊᑕᓕ ᐊᕼᐃᒥᓕᐅᑉ ᐃᕐᓂᖓ ᑍᑦᓱᒪᓂ ᕿᒫᒐᒥ ᑍᕕᑎᒧᑦ ᑮᓚᒦᑎᓪᓗᒍ, ᑐᓂᕐᕈᓯᕐᑎᑦᓯᔩᑦ ᓴᒡᕕᖕᒥᐅᑕᖓᓂᒃ ᑎᒍᒥᐊᓚᐅᕐᐳᖅ. 7 ᑕᕝᕙ ᓴᐅᓕ ᐅᖃᐅᑦᔭᐅᕗᖅ ᑍᕕᑎᐅᑉ ᑮᓚᒦᓐᓂᖓᓂᒃ. ᓴᐅᓕᓗ ᐅᖃᕐᐳᖅ, “ᒎᑎᐅᑉ ᐅᕙᓐᓄᑦ ᑐᓂᕚ; ᑍᕕᑎ ᐃᒻᒥᓂᒃ ᐊᓂᕕᒃᓮᕈᑎᑎᑉᐳᖅ ᓄᓇᓕᖕᒧᑦ ᐊᕙᓗᓕᖕᒧᐊᕐᓂᕐᒥᓄᑦ ᐃᑎᕐᑕᕕᓕᖕᒧᑦ ᓴᐴᓗᑕᓕᖕᒧᓪᓗ.” 8 ᓴᐅᓕᐅᓪᓗ ᐃᓄᐃᑦ ᕾᖁᕔᑦ ᐅᓇᑕᕆᐊᖁᓪᓗᒋᑦ ᑮᓚᒧᑦ, ᑍᕕᑎ ᐃᓄᖁᑎᖏᓪᓗ ᑎᒍᔭᐅᖁᓪᓗᒋᑦ. 9 ᑍᕕᑎ ᖃᐅᔨᒐᒥ ᓴᐅᓕᐅᑉ ᐱᐅᖏᑦᑐᒥᒃ ᐱᓇᓱᐊᕈᒪᓂᖓᓂᒃ ᐃᒻᒥᓄᑦ; ᑐᓂᕐᕈᓯᕐᑎᑦᓯᔨᒧᑦ ᐊᐰᐊᑕᒧᑦ ᐅᖃᕐᐳᖅ, “ᓴᒡᕕᖕᒥᐅᑕᖅ ᕾᓚᐅᕈᒃ.” 10 ᑕᕝᕙ ᑍᕕᑎ ᐅᖃᕐᐳᖅ, “ᐊᑕᓃᖅ, ᐃᓴᕆᐊᓕᒥᐅᑦ ᒎᑎᖓ, ᑐᓴᓚᐅᕋᒪ ᓴᐅᓕᐅᑉ ᑮᓚᒧᐊᕈᒪᓂᖓᓂᒃ ᐊᓯᕈᐃᔪᒪᓂᖓᓂᒡᓗ ᑖᑦᓱᒥᖓ ᐃᒡᓗᒐᓴᖕᓂᒃ ᐅᕙᓐᓂᒃ ᐱᑦᔪᑎᖃᕐᓗᓂ. 11 ᑮᓚᒥᐅᑦ ᐃᓄᖏᑦ ᐅᕙᓐᓄᑦ ᑐᓂᒐᔭᕐᐹᑦ ᑖᑦᓱᒧᖓ ᓵᓚᐅᑎᓪᓗᑎᒃ? ᓴᐅᓕ ᐊᒻᒧᐊᒡᓗᓂ ᑕᒪᐅᖓ ᑎᑭᑦᓱᒫᕐᐹ ᑍᒫᒃ ᑐᓴᓚᐅᕋᒃᑯ? ᐊᑕᓃᖅ, ᐃᓴᕆᐊᓕᒥᐅᑦ ᒎᑎᖓ, ᐃᓕᖕᓄᑦ ᑐᒃᓯᐊᕐᐳᖓ, ᐱᔩᑦ ᑭᐅᓚᐅᕈᒃ.” ᐊᑕᓂᕐᓗ ᑭᐅᕗᖅ, “ᓴᐅᓕ ᑕᒪᐅᖓ ᐊᒻᒧᐊᒡᓗᓂ ᑎᑭᑦᓱᒫᕐᐳᖅ.” 12 ᑕᕝᕙ ᑍᕕᑎ ᐅᖃᕐᐳᖅ, “ᑮᓚᒥᐅᑦ ᐃᒻᒥᖕᓂᒃ ᒪᓂᒐᔭᕐᐹᑦ ᐅᕙᓐᓂᒡᓗ ᑐᓂᓯᓗᑎᒃ ᓴᐅᓕᐅᑉ ᐱᔪᓐᓇᕐᓂᖓᓅᑦ?” ᐊᑕᓂᖅ ᑭᐅᕗᖅ, “ᑖᒃᑯᐊ ᑐᓂᒐᔭᕐᐹᑎᑦ.” 13 ᑕᕝᕙ ᑍᕕᑎ ᐃᓄᖁᑎᖏᓪᓗ 600ᖏᓐᓃᑦᑐᑦ ᐸᕐᓇᒃᓗᑎᒃ ᑮᓚᒥᑦ ᐊᐅᓪᓚᕐᐳᑦ, ᓇᒧᑐᐃᓐᓇᕐᓗ ᐅᐸᒍᓐᓇᕐᑕᒥᓄᑦ ᐂᓚᐅᕐᐳᑦ. ᓴᐅᓕᓕ ᑐᓴᕋᒥ ᑍᕕᑎᐅᑉ ᕿᒤᓂᖓᓂᒃ ᑮᓚᒥᒃ, ᐅᓇᑕᕋᓱᐊᕐᓂᕐᒥᓂᒃ ᓄᖅᑲᕐᐳᖅ. ᑍᕕᑎᐅᑉ ᖃᖅᑲᓃᓐᓂᖓ 14 ᑍᕕᑎᓗ ᐃᓄᖃᔪᐃᑦᑐᒥ ᖃᖅᑲᓂ ᕾᕈᓱᖕᓃᓚᐅᕐᐳᖅ, ᔨᐸᐅᑉ ᖃᓂᒋᔮᓂ ᖃᖅᑲᓂ ᐃᓄᖃᔪᐃᑦᑐᒥ. ᓴᐅᓕᐅᓪᓗ ᕿᓂᖃᑦᑕᓚᐅᕐᐹ ᖃᐅᑕᒫᑦ, ᒎᑎᐅᓪᓕ ᑍᕕᑎ ᑐᓂᓚᐅᓐᖏᓛ ᓴᐅᓕᒧᑦ. 15 ᑍᕕᑎᓗ ᑲᑉᐱᐊᓱᓚᐅᕐᐳᖅ ᓴᐅᓕᐅᑉ ᑐᖁᑦᓯᔪᒪᓪᓗᓂ ᕿᓂᕐᓂᖓᓂᒃ ᖃᐅᔨᒐᒥ. ᑍᕕᑎᓕ ᐃᓄᖃᔪᐃᑦᑐᒥ ᔨᐸᐅᑉ ᖃᓂᒋᔮᓃᓚᐅᕐᐳᖅ ᕼᐅᕆᔅᒥ. 16 ᔫᓇᑕᓂᓗ ᓴᐅᓕᐅᑉ ᐃᕐᓂᖓ, ᒪᑭᑉᐳᖅ ᑍᕕᑎᒧᓪᓗ ᐂᕗᖅ ᕼᐅᕆᔅᒧᑦ, ᓲᖑᓯᑎᒋᐊᓪᓚᒃᐹᓗ ᒎᑎᒥ. 17 ᐅᖃᐅᑎᓪᓗᒍᓗ, “ᑲᑉᐱᐊᓱᒃᑍᓕᒋᑦ; ᓴᐅᓕᐅᑉ ᐊᑖᑕᒪ ᐱᔪᓐᓇᕐᓂᒥᒍᑦ ᓇᓂᓂᐊᓐᖏᓛᑎᑦ; ᐊᖓᔪᖅᑳᕐᔪᐊᓐᖑᕐᑐᒃᓴᐅᕗᑎᑦ ᐃᓴᕆᐊᓕᒥᐅᓄᑦ, ᐃᓕᖕᓄᓪᓗ ᑐᖓᓕᐅᔪᒃᓴᐅᕗᖓ; ᑕᒪᓐᓇᓗ ᐊᑖᑕᒪ ᖃᐅᔨᒪᒋᕚ.” 18 ᑖᒃᑯᐊᒡᓗ ᐊᖏᖃᑎᒌᒃᐴᒃ ᐊᑕᓂᐅᑉ ᓵᖓᓂ; ᑍᕕᑎᓗ ᕼᐅᕆᔅᒦᖏᓐᓇᓚᐅᕐᐳᖅ, ᔫᓇᑕᓂ ᐊᖏᕐᕋᕐᑎᓪᓗᒍ. 19 ᑕᕝᕙ ᔨᑉᕼᐂᑎᒥᐅᑦ ᐃᓄᖏᑕ ᐃᓚᖏᑦ ᓴᐅᓕᒧᑦ ᐂᕗᑦ ᒋᐱᐊᒧᑦ ᐅᖃᕐᓗᑎᒃ, “ᑍᕕᑎ ᐃᔨᕐᓯᒪᓐᖏᓛᖅ ᐊᑯᓐᓇᑦᑎᓐᓂ ᕾᕈᓱᖕᒥ ᕼᐅᕆᔅᒥ, ᕼᐊᑭᓚᐅᑉ ᖃᖅᑲᖓᓂ, ᔨᓯᒪᐅᑉ ᓯᕿᓂᖓᓂ? 20 ᒫᓐᓇ ᐊᖓᔪᖅᑳᒃ, ᐊᒻᒧᐊᓵᓕᕆᑦ, ᐆᒻᒪᑎᕕᑦ ᐱᔪᒪᔭᖏᑦ ᒪᓕᒡᓗᒋᑦ; ᐅᕙᒍᓪᓕ ᐱᓂᐊᕐᓂᖃᕈᒪᕗᒍᑦ ᑐᓂᓗᒍ ᐊᖓᔪᖅᑳᕐᔪᐊᑉ ᐱᔪᓐᓇᕐᓂᖓᓄᑦ.” 21 ᓴᐅᓕᓗ ᐅᖃᕐᐳᖅ, “ᐊᑕᓂᐅᑉ ᓮᒻᒪᕐᑎᓪᓕᓯ; ᐅᕙᓐᓂᒃ ᐃᓚᑦᓱᒍᓱᖕᓂᖃᕋᑦᓯ. 22 ᐊᑏ ᖃᐅᔨᓴᑦᓯᐊᕆᑦᓯ ᑕᕝᕙᓃᓪᓚᕆᖕᒪᖔᑦ; ᐃᔨᕐᓯᒪᕕᖓᓗ ᖃᐅᔨᓗᒍ ᑕᑯᓗᒍᓗ, ᓇᓪᓕᐊᓐᓄᓪᓗ ᑕᑯᔭᐅᓚᐅᕐᒪᖔᑦ ᑍᑲᓃᑎᓪᓗᒍ; ᐅᖃᐅᑦᔭᐅᓯᒪᒐᒪ ᓯᓔᕐᕆᔭᒃᓴᐅᖏᓐᓂᖓᓂᒃ. 23 ᑍᒤᒻᒪᑦ ᖃᐅᔨᓴᑦᓯᐊᕆᑦᓯ, ᐃᔨᕐᓯᒪᕕᒋᖃᑦᑕᕐᑕᖏᓪᓗ ᖃᐅᔨᑦᓯᐊᕐᓗᒋᑦ, ᐅᕙᓐᓄᓪᓗ ᐅᑎᓛᕐᐳᓯ ᖃᐅᔨᓯᒪᓕᕐᑕᑦᓯᓐᓂᒃ ᐅᖃᐅᓯᖃᕆᐊᕐᑐᕐᓗᓯ. ᑕᕝᕙ ᐃᓚᒋᓗᓯ ᐅᐸᒍᑎᒐᔭᕐᐳᒍᑦ; ᓄᓇᖁᑎᑦᓯᓐᓃᖏᓐᓇᕐᐸᑦ ᕿᓂᕆᐊᓛᕐᐸᕋ ᔫᑕᐅᑉ ᑭᖑᕙᖏᓐᓂ ᐃᓄᒋᐊᒃᑐᕐᔪᐊᓂ.” 24 ᑍᒤᒻᒪᑦ ᐊᐅᓪᓚᕐᐳᑦ ᔨᐸᒧᑦ ᓴᐅᓕᒥᑦ ᓯᕗᓪᓕᐅᓪᓗᑎᒃ. ᑍᕕᑎᓕ ᐃᓄᖁᑎᖏᓪᓗ ᒪᐅᓇᒦᓚᐅᕐᐳᑦ ᐃᓄᖃᔪᐃᑦᑐᒥ, ᔨᓯᒪᐅᑉ ᓇᕐᓴᖓᓂ ᓯᕿᓂᐅᑉ ᓇᓛᓃᑦᑐᒥ. 25 ᓴᐅᓕᓕ ᐃᓄᖁᑎᖏᓪᓗ ᐊᐅᓪᓚᓚᐅᕐᐳᑦ ᕿᓂᕆᐊᕐᓗᑎᒃ ᑍᕕᑎᒥᒃ. ᑍᕕᑎᓗ ᑐᓴᕐᑎᑕᐅᕗᖅ; ᑍᒤᒻᒪᑦ ᐂᓚᐅᕐᐳᖅ ᖃᖅᑲᓄᑦ ᕾᕈᓱᓕᖕᒧᑦ ᒪᐅᓇᐅᑉ ᐃᓄᖃᔪᐃᑦᑐᖓᓄᑦ ᑍᑲᓃᓕᕐᓗᓂᓗ. ᓴᐅᓕᓕ ᑐᓴᕋᒥ ᑕᒪᑐᒥᖓ, ᒪᓕᒃᓴᕐᐳᖅ ᑍᕕᑎᒥᒃ ᒤᐊᓂᐅᑉ ᐃᓄᖃᔪᐃᑦᑐᖓᓄᑦ. 26 ᓴᐅᓕᓕ ᐃᓄᖁᑎᖏᓪᓗ ᖃᖅᑲᐅᑉ ᐃᑎᕕᐊᓃᓚᐅᕐᐳᑦ, ᑍᕕᑎᒃᑯᑦ ᐃᓄᖁᑎᖏᓪᓗ ᖃᖅᑲᐅᑉ ᐃᑎᕕᐊᓃᖔᕐᒥᑎᓪᓗᒋᑦ; ᑍᕕᑎᓕ ᑐᐊᕕᕐᓗᓂ ᕿᒫᓚᐅᕐᐳᖅ ᓴᐅᓕᒥᒃ, ᓴᐅᓕᒃᑯᓪᓕ ᐊᓐᖑᑎᕙᓪᓕᐊᓕᓚᐅᕐᐳᑦ ᑎᒍᓯᑐᐃᓐᓇᕆᐊᖃᓕᕐᓗᑎᒃ, 27 ᐅᖃᕆᐊᕐᑐᕐᑐᒥᒡᓕ ᑎᑭᑦᑐᖃᕐᐳᖅ ᓴᐅᓕᒧᑦ ᐅᖃᕐᓗᓂ, “ᑐᐊᕕᕐᓗᑎᑦ ᕾᓚᐅᕆᑦ; ᐱᓕᔅᑍᓂᒥᐅᑦ ᓄᓇᖁᑎᑦᑎᓐᓄᐊᕐᒪᑕ ᓵᓚᖃᓕᕐᓗᑎᒃ.” 28 ᑍᒤᒻᒪᑦ ᓴᐅᓕ ᐅᑎᓕᓚᐅᕐᐳᖅ ᒪᓕᒍᓐᓃᕐᓗᓂ ᑍᕕᑎᒥ, ᐱᓕᔅᑍᓂᒥᐅᓂᒡᓗ ᐅᓇᑕᕆᐊᓕᕐᓗᓂ; ᑍᒤᒻᒪᑦ ᑍᓐᓇ ᕾᕐᑐᖅ ᐊᑎᖃᕐᑎᑕᐅᓕᓚᐅᕐᐳᖅ ᓰᓚ ᕼᐊᒪᓕᑳᑦᒥᒃ ᑐᑭᖃᕐᑐᖅ ᐊᓐᓇᒃᑎᑕᐅᕕᖕᒥᒃ. 29 ᑍᕕᑎᓗ ᑕᕝᕙᓐᖓᑦ ᐊᐅᓪᓚᓚᐅᕐᐳᖅ, ᐃᓐ-ᒋᑎᒧᑦ ᓄᓇᒧᑦ ᑕᕝᕙᓂᓗ ᓄᓇᖃᓕᕐᓗᓂ ᐃᔨᕐᓯᒪᑦᓱᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society