ᓴᒧᐃᓕ ᓯᕗᓪᓖᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᑎᑦᓯᔩᑦ ᑐᖁᕋᕐᑕᐅᓂᖏᑦ

¹ ᑍᕕᑎᓕ ᐊᐅᓪᓚᕋᒥ ᑕᕝᕙᓐᖓᑦ ᕿᒪᒃᓯᕗᖅ ᕾᕈᓱᖕᒧᑦ ᐊᑑᓚᒻᒧᑦ; ᖃᑕᓐᖑᑎᖏᓪᓗ ᐊᑖᑕᖓᑕᓗ ᐃᒡᓗᒥᐅᖃᑎᖏᑦ ᑕᒪᑐᒥᖓ ᑐᓴᕋᒥᒃ, ᑍᑯᖓ ᐂᕗᑦ ᐅᐸᒍᑎᓪᓗᑎᒃ.

² ᐃᓄᐃᓪᓗ ᕿᒃᓵᒃᑐᑦ ᐃᓱᒫᓘᑎᓖᓪᓗ, ᐊᑭᓕᒃᓴᓖᓪᓘᓐᓃᑦ, ᖁᕕᐊᓱᖏᑦᑐᓪᓗ ᐊᒃᓱᕈᕐᑐᓪᓗ ᑕᕝᕗᖓ ᐃᓚᓕᐅᑎᕗᑦ, ᐊᖓᔪᖅᑲᐅᓕᕐᓗᓂᓗ ᑖᒃᑯᓄᖓ. ᐊᖑᑏᓪᓗ 400ᖏᓐᓃᑦᑐᑦ ᐃᓚᓕᐅᑎᓚᐅᕐᐳᑦ ᑖᑦᓱᒧᖓ.

³ ᑍᕕᑎᓗ ᑕᕝᕙᓐᖓᑦ ᐊᐅᓪᓚᕋᒥ ᒥᔅᐱᒧᐊᕐᐳᖅ ᒧᐊᐱᒦᑦᑐᒧᑦ; ᒧᐊᐱᐅᓪᓗ ᐊᖓᔪᖅᑳᔪᐊᖓᓄᑦ ᐅᖃᕐᐳᖅ, “ᐊᑖᑕᒐ ᐊᓈᓇᒐᓗ ᐃᓕᖕᓃᑬᓐᓇᓚᐅᕐᓕᑦ, ᖃᐅᔨᓚᐅᖏᓐᓂᓐᓂ ᒎᑎᐅᑉ ᐅᕙᓐᓄᑦ ᐱᖁᔭᖓᓂᒃ.”

⁴ ᑍᕕᑎᐅᓪᓗ ᐊᖓᔪᖅᑳᓂ ᕿᒪᒃᐰᑦ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᓄᑦ, ᑍᑲᓃᖏᓐᓇᓚᐅᕐᐳᓪᓗ ᑍᕕᑎ ᐃᔨᕐᓯᒪᖃᑦᑕᕐᑎᓪᓗᒍ ᕾᕈᓱᖕᒥ.

⁵ ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᒑᑦ ᑍᕕᑎᒧᑦ ᐅᖃᕐᐳᖅ, “ᑕᒫᓂ ᕾᕈᓱᖕᒥ ᐃᓂᖃᕈᓐᓃᕆᑦ; ᐊᐅᓪᓚᓕᕆᑦ ᔫᑕᐅᑉ ᓄᓇᖓᓄᑦ.” ᑕᕝᕙ ᑍᕕᑎ ᑕᕝᕙᖓᑦ ᐊᐅᓪᓚᕐᐳᖅ, ᐂᓪᓗᓂᓗ ᓇᐹᕐᑐᓕᖕᒧᑦ ᕼᐃᕆᑎᒧᑦ.

⁶ ᓴᐅᓕᓕ ᑐᓴᕋᒥ ᑍᕕᑎᒃᑯᑦ ᓇᓂᔭᐅᓂᕋᕐᑕᐅᑎᓪᓗᒋᑦ, ᓴᐅᓕ ᒋᐱᐊᒦᓚᐅᕐᐳᖅ, ᐃᒃᓯᕙᓪᓗᓂ ᓇᐹᕐᑑᑉ ᑕᒪᕆᔅᑭᒥᒃ ᐊᑎᓕᐅᑉ ᐊᑖᓂ, ᖃᓗᒋᐊᓂ ᑎᒍᒥᐊᕐᓗᒍ, ᐱᔨᖏᓪᓗ ᐊᕙᑖᓂ ᓇᖏᕐᑎᓪᓗᒋᑦ.

⁷ ᓴᐅᓕᐅᓪᓗ ᐱᔨᓂ ᐊᕙᑎᒥᓂ ᓇᖏᕐᑐᑦ ᐅᖃᐅᑎᕔᑦ, “ᓈᓚᒋᑦᓯ ᐱᓐᔭᒥᓂᐅᑉ ᑭᖑᕚᖏᑦ; ᔨᓯᐅᑉ ᐃᕐᓂᖓ ᐃᓘᓐᓇᑦᓯᓐᓂᒃ ᑐᓂᓯᓂᐊᕐᑐᒋᕕᓯᐅᒃ ᐱᕈᕐᓰᕕᖕᓂᒃ ᕔᓂᓕᐅᕐᕕᒃᓴᓂᒡᓘᓐᓃᑦ, ᐅᓇᑕᕐᑐᒃᓴᖁᑎᒥᓄᓪᓗ 1,000ᓄᑦ 100ᓄᓪᓗ ᐊᖓᔪᖅᑳᓐᖑᕐᑎᓪᓗᓂᓰ?

⁸ ᐃᓘᓐᓇᓯ ᐅᕙᓐᓂᒃ ᐊᑭᕋᕐᑐᓕᕐᐱᓰ, ᓇᓗᓁᕐᓯᔪᖃᓚᐅᓐᖏᓚᕐᓗ ᐅᕙᓐᓄᑦ ᐃᕐᓂᕋ ᐊᖏᕈᑎᓕᐅᕐᓯᒪᑎᓪᓗᒍ ᔨᓯᐅᑉ ᐃᕐᓂᖓᓄᑦ; ᓇᓕᕐᓯᓘᓐᓃᑦ ᐅᒡᒍᐊᓚᐅᓐᖏᓚᓯ ᓇᓗᓁᕐᓯᓚᐅᓐᖏᓚᓯᓘᓐᓃᑦ ᐃᕐᓂᕋ ᐅᕙᓐᓂᒃ ᐊᑭᕋᕐᑐᓕᕐᑎᑦᓯᑎᓪᓗᒍ, ᑖᓐᓇᓗ ᐅᑕᖅᑭᕗᖅ ᐅᕙᓐᓂᒃ ᑐᖁᑦᓯᔪᒪᓪᓗᓂ, ᐅᓪᓗᒥᒧᑦ.”

⁹ ᑕᕝᕙ ᑐᐃᒋ ᑭᐅᕗᖅ ᐄᑐᒥᒥᐅᑕᖅ, ᓴᐅᓕᐅᑉ ᐱᔨᖏᓐᓄᑦ ᓂᑯᕕᖓᖃᑕᐅᔪᖅ, ᐅᖃᕐᓗᓂ, “ᔨᓯᐅᑉ ᐃᕐᓂᖓ ᑕᑯᓚᐅᕐᐸᕋ ᐂᑎᓪᓗᒍ ᓅᐱᒧᑦ, ᐊᕼᐃᒥᓕᒃᒧᑦ ᐊᕼᐃᑑᑉ ᐃᕐᓂᖓᓄᑦ,

¹⁰ ᐊᐱᕆᓚᐅᕐᐳᕐᓗ ᐊᑕᓂᕐᒧᑦ ᑖᓐᓇ ᐱᑦᔪᑎᒋᓪᓗᒍ, ᑖᑦᓱᒪᓗ ᑐᓂᓚᐅᕐᐹ ᓂᕿᒃᓴᖏᓐᓂᒃ, ᒍᓔᐊᓪᓗ ᐱᓕᔅᑍᓂᒥᐅᑕᐅᑉ ᓴᕕᒡᔪᐊᖓᓂᒃ ᑐᓂᓪᓗᓂᐅᒃ.”

¹¹ ᑕᕝᕙ ᐊᖓᔪᖅᑳᕐᔪᐊᑉ ᓴᐅᓕᐅᑉ ᕾᖁᔭᐅᖁᕚ ᐊᕼᐃᒥᓕᒃ ᐊᕼᐃᑑᑉ ᐃᕐᓂᖓ ᐃᒡᓗᒥᐅᖃᑎᖏᓪᓗ, ᑐᓂᕐᕈᓯᕐᑎᑦᓯᔩᐅᔪᑦ ᓅᐱᒥ; ᑖᒃᑯᐊᓗ ᐊᖓᔪᖅᑳᕐᔪᐊᒧᑦ ᑎᑭᑉᐳᑦ.

¹² ᓴᐅᓕᓗ ᐅᖃᕐᐳᖅ, “ᓈᓚᓚᐅᕆᑦ ᐊᕼᐃᑑᑉ ᐃᕐᓂᖓ.” ᑖᓐᓇᓗ ᑭᐅᕗᖅ, “ᒫᓃᑉᐳᖓ ᐊᑕᓃᖅ.”

¹³ ᓴᐅᓕᐅᓪᓗ ᐅᖃᐅᑎᕚ, “ᓱᖕᒪᑦ ᐅᕙᓐᓂᒃ ᐊᑭᕋᕐᑐᓕᕐᐲᑦ, ᐃᓕᑦᓯᒃ ᔨᓯᐅᓪᓗ ᐃᕐᓂᖓ, ᑖᓐᓇ ᑐᓂᓚᐅᕋᕕᐅᒃ ᓂᕿᒃᓴᒥᒃ ᓴᕕᒡᔪᐊᒥᒡᓗ, ᒎᑎᓗ ᓱᖕᒪᑦ ᐊᐱᕆᓚᐅᕐᐱᐅᒃ ᑖᓐᓇ ᐱᓪᓗᒍ, ᑖᓐᓇ ᒪᑭᖁᓪᓗᒍ ᐅᕙᓐᓂᒃ ᐊᑭᕋᕐᑐᓕᕐᓗᓂ, ᐅᑕᖅᑭᓕᕐᓗᓂᓗ ᑐᖁᑦᓯᖁᓪᓗᒍ ᐅᕙᓐᓂᒃ, ᐅᓪᓗᒥᒧᑦ ᑎᑭᓪᓗᒍ?”

¹⁴ ᑕᕝᕙ ᐊᕼᐃᒥᓕᒃ ᑭᐅᕗᖅ ᐊᖓᔪᖅᑳᕐᔪᐊᒧᑦ, “ᑍᕕᑎ ᐅᐱᓐᓇᕐᑑᓪᓗᓂ ᐱᔨᒋᕙᑦ, ᐊᖓᔪᖅᑳᕐᔪᐊᕐᒧᓪᓗ ᓂᖓᐅᒋᔭᐅᓪᓗᓂ, ᐊᖓᔪᖅᑳᖑᓪᓗᓂᓗ ᓴᐳᓐᓂᐊᕐᑎᖁᑎᖏᓐᓄᑦ, ᑖᓐᓇ ᐃᓕᖕᓂᒃ ᓈᓚᒃᐳᖅ ᐅᐱᓐᓇᑦᓯᐊᕐᓗᓂᓗ ᐃᒡᓗᖁᑎᖕᓂ.

¹⁵ ᐅᓪᓗᒥ ᐊᑕᓂᖅ ᐊᐱᕆᓕᑍᓐᓇᓐᖏᓚᕋ ᑖᓐᓇ ᐱᓪᓗᒍ, ᐊᖓᔪᖅᑳᕐᔪᐊᖅ ᓱᓇᑐᐃᓐᓇᒥᒃ ᐱᔨᒥᓄᑦ ᐊᑭᕋᕐᑐᓕᕐᑍᓕᓕ ᐊᑖᑕᒪᓘᓐᓃᑦ ᐃᒡᓗᒥᐅᖃᑎᖏᓐᓄᑦ; ᐱᔩᑦ ᖃᐅᔨᒪᓚᐅᖏᒻᒪ ᑕᒪᑐᒥᖓ, ᒥᑭᔪᒥᒃ ᐊᖏᔪᒥᒡᓘᓐᓃᑦ.”

¹⁶ ᐊᖓᔪᖅᑳᕐᔪᐊᕐᓗ ᐅᖃᕐᐳᖅ, “ᑐᖁᔪᒃᓴᐅᕗᑎᑦ, ᐊᕼᐃᒥᓕᒃ, ᐊᑖᑕᕕᓪᓗ ᐃᒡᓗᒥᐅᖃᑎᓕᒫᖏᑦ.”

¹⁷ ᐊᖓᔪᖅᑳᕐᔪᐊᕐᓗ ᓴᐳᓐᓂᐊᕐᑎᖁᑎᒥᓄᑦ ᖃᓂᒋᔭᒥᓂ ᓇᖏᕐᑐᓄᑦ ᐅᖃᕐᐳᖅ, “ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖏᑦ ᑐᖁᓚᐅᕐᓯᐅᒃ, ᐊᒡᒐᖏᑦ ᑍᕕᑎᒥᒃ ᐃᓚᓕᐅᕆᓯᒪᖕᒪᑕ, ᖃᐅᔨᒪᓪᓗᑎᒃ ᕿᒫᓂᖓᓂᒃ ᐅᖃᓚᐅᖏᒻᒪᑕ ᐅᕙᓐᓄᑦ.” ᐊᖓᔪᖅᑲᕐᔪᐊᓪᓕ ᓴᐳᓐᓂᐊᕐᑎᖏᑦ ᑐᖁᑦᓯᔪᒪᓚᐅᓐᖏᓚᑦ ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖏᓐᓂᒃ.

¹⁸ ᑕᕝᕙ ᓴᐅᓕ ᐅᖃᓕᕐᐳᖅ ᑐᐃᒋᒧᑦ, “ᐃᕝᕕᑦ ᑐᖁᓚᐅᒃᑭᑦ ᑐᓂᕐᕈᓯᕐᑎᑦᓯᔩᑦ.” ᑕᕝᕙ ᑐᐃᒋᐅᑉ ᐄᑐᒥᒥᐅᑕᐅᑉ ᑐᓂᕐᕈᓯᕐᑎᑦᓯᔨᓕᒫᑦ ᑐᖁᑉᐰᑦ, ᑍᑦᓱᒪᓂ ᐅᓪᓗᒥ ᑐᓂᕐᕈᓯᕐᑎᑦᓯᔩᑦ 85 ᑐᖁᑕᐅᕗᑦ ᖃᓪᓗᓈᕐᑕᒥᒃ ᓴᒡᕕᖕᒥᐅᑕᒥᒃ ᐊᑐᕐᑐᓕᒫᑦ.

¹⁹ ᓅᐱᒥᓗ, ᐃᒡᓗᒐᓮᑦ ᑐᓂᕐᕈᓯᕐᑎᑦᓯᔨᖏᑦ, ᓴᕕᒡᔪᐊᒧᑦ ᑐᖁᑉᐰᑦ; ᐊᖑᑏᑦ, ᐊᕐᓁᓪᓗ, ᓄᑕᖅᑲᑦ, ᐃᒻᒧᒃᓯᐅᒊᑦ, ᓯᐅᑎᖅᑯᕐᑐᔪᑦ, ᓰᐲᓪᓗ ᑕᒪᕐᒥᒃ ᑐᖁᑕᐅᑎᑉᐰᑦ ᓴᕕᒡᔪᐊᒧᑦ.

²⁰ ᐊᕼᐃᒥᓕᐅᓪᓕ ᐃᕐᓂᖏᑕ ᐃᓚᖓᑦ ᐊᕼᐃᑑᑉ ᐃᕐᓂᖓᑕ, ᐊᐰᐊᑕᒥᒃ ᐊᑎᓕᒃ ᕿᒪᒃᓯᕗᖅ, ᑍᕕᑎᒧᐊᕐᓗᓂᓗ ᐃᓚᓕᐅᑎᕗᖅ.

²¹ ᐊᐰᐊᑕᐅᓪᓗ ᑍᕕᑎ ᐅᓂᒃᑲᐅᑎᕚ ᓴᐅᓕᐅᑉ ᑐᖁᕅᓂᖓᓂᒃ ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖁᑎᖏᓐᓂᒃ.

²² ᑍᕕᑎᓗ ᐅᖃᕐᐳᖅ ᐊᐰᐊᑕᒧᑦ, “ᑍᓐᓇ ᑐᐃᒋ ᐄᑐᒥᒥᐅᑕᖅ ᑕᑯᒐᒃᑯ, ᑍᑦᓱᒪᓂ ᖃᐅᔨᒪᓚᐅᕐᐳᖓ ᓴᐅᓕᒥᒃ ᐅᖃᐅᑦᔨᓛᕐᓂᖓᓂᒃ, ᑍᒤᒻᒪᑦ ᐅᕙᖓ ᐸᓯᔭᒃᓴᐅᕗᖓ ᐊᑖᑕᕕᑦ ᐃᒡᓗᒥᐅᖃᑎᖏᑕ ᑐᖁᕋᕐᑕᐅᓂᖏᓐᓄᑦ.

²³ ᐅᕙᓐᓃᓕᕆᑦ, ᑲᑉᐱᐊᓱᖏᓪᓗᑎᑦ; ᐅᕙᓐᓂᒃ ᑐᖁᑦᓯᓇᓱᒃᑐᑦ ᐃᓕᖕᓂᒃᑕᐅᖅ ᑐᖁᑦᓯᓇᓱᒃᑭᕗᑦ; ᐅᕙᓐᓃᒃᑯᕕᑦ ᑐᖁᑕᐅᓂᐊᓐᖏᓚᑎᑦ.”