ᓴᒧᐃᓕ ᓯᕗᓪᓖᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᕿᒫᓂᖓ ᓴᐅᓕᒥᑦ

¹ ᑕᕝᕙ ᑍᕕᑎ ᑎᑭᑉᐳᖅ ᓅᐱᒧᑦ ᑐᓂᕐᕈᓯᕐᑎᑦᓯᔨᒧᐊᕐᓗᓂᓗ ᐊᕼᐃᒥᓕᒃᒧᑦ; ᐊᕼᐃᒥᓕᒡᓗ ᑍᕕᑎᒥᒃ ᐸᕐᕆᐊᕐᐳᖅ ᑲᑉᐱᐊᓱᒧᑦ ᓴᔪᒃᓗᓂ, ᐅᖃᐅᑎᓪᓗᒍᓗ, “ᓱᖕᒪᑦ ᐃᓄᑑᓪᓗᑎ ᕾᕕᑦ, ᐃᓚᖃᕐᓇᑎᑦ?”

² ᑍᕕᑎᐅᓪᓗ ᑐᓂᕐᕈᓯᕐᑎᑦᓯᔨ ᐊᕼᐃᒥᓕᒃ ᐅᖃᐅᑎᕚ, “ᐊᖓᔪᖅᑳᕐᔪᐊᒥᒃ ᐱᔨᑦᓯᕐᓗᖓ ᑕᒪᐅᓐᖓᕐᐳᖓ, ᐅᖃᐅᑎᓚᐅᕐᒪᒐ, ‘ᖃᐅᔨᑎᑦᓯᑦᑍᓕᒋᑦ ᑭᓇᒥᒡᓘᓐᓃᑦ ᑎᓕᓯᑦᔪᑎᒋᔭᓐᓂᒃ.’ ᐅᕙᖓᓕ ᐃᓅᓱᒃᑐᓂᒃ ᑎᓕᓯᓯᒪᕗᖓ ᓄᓇᓂ ᑲᑎᓯᔪᒪᓪᓗᖓ ᐅᐸᒃᑕᐅᓯᒪᖁᔭᓐᓂ.

³ ᒫᓐᓇᓕ, ᓱᓇᒥᒃ ᓇᔪᕐᑎᖃᕐᐲᑦ? ᓂᐊᖂᔭᓂᒃ ᕾᑦᓯᓕᕆᑦ ᑕᓪᓕᒪᓂᒃ, ᓱᓇᒥᒡᓘᓐᓃᑦ ᐊᓯᖏᓐᓂᒃ ᐱᓯᒪᔭᕐᓂᒃ.”

⁴ ᑐᓂᕐᕈᓯᕐᑎᑦᓯᔨᐅᑉ ᑍᕕᑎ ᑭᐅᕚ, “ᓂᐊᖂᔭᑐᐃᓐᓇᒥᒃ ᒫᓐᓇ ᐱᓯᒪᓐᖏᓚᖓ, ᐃᑦᔪᕐᓁᑎᑕᐅᓯᒪᔪᓂᑦ ᑭᓯᐊᓂ ᓂᐊᖂᔭᓂᒃ ᓇᔪᕐᑎᖃᕐᐳᖓ; ᐱᔪᓐᓇᕐᑕᑎᑦ ᐊᖑᑏᑦ ᐃᓅᓱᒃᑐᑦ ᐊᕐᓇᒥᒃ ᐱᖃᑎᖃᓚᐅᓐᖏᑐᐊᕐᐸᑕ.”

⁵ ᑍᕕᑎᐅᑉ ᑐᓂᕐᕈᓯᕐᑎᑦᓯᔨ ᑭᐅᕚ, “ᓱᓕᑦᓯᐊᕐᐳᖓ ᐊᕐᓇᓃᓚᐅᓐᖏᓚᒍᑦ ᐱᓇᓱᐊᕆᐊᕐᑐᑐᐃᓐᓇᕐᑎᓪᓗᑕ ᑕᒪᓐᓇ ᐱᐅᓯᕆᒐᑦᑎᒍ; ᑭᓯᐊᓂᓕ ᐱᓇᓱᐊᒻᒪᕆᒋᐊᕐᑐᕋᑦᑕ ᑲᒪᓂᐅᔭᖏᓐᓂᕐᓴᐅᕗᒍᑦ; ᐊᖑᑏᓪᓗ ᐱᖁᑎᖏᑦ ᐃᑦᔪᕐᓁᒃᑭᕗᑦ, ᐅᓪᓗᒥᓕ ᐃᑦᔪᕐᓁᒃᑲᓐᓂᕐᐳᑦ ᐊᑐᐃᓐᓇᓐᖏᑕᑦᑎᓐᓂᒃ ᐱᓇᓱᐊᕆᐊᕐᑐᕐᓯᒪᖓᑦᑕ.”

⁶ ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᑍᕕᑎ ᓂᐊᖂᔭᓂᒃ ᐃᑦᔪᕐᓁᑦᑐᓂᒃ ᑐᓂᕚ; ᑖᒃᑯᐊ ᓂᐊᖂᔧᑦ ᐱᓯᒪᔭᑐᐊᕆᒐᒥᒋᑦ ᒎᑎᒧᑦ ᑐᓂᕐᕈᑕᐅᓯᒪᔪᑦ, ᐅᐃᑦᔪᕐᓁᑦᑑᓪᓗ ᓵᖓᓂᑦ ᐊᒡᕔᕐᑎᑕᐅᓯᒪᕗᑦ ᓂᐊᖂᔭᓂᒃ ᓄᑖᓂᒃ ᐆᓇᕐᑐᓂᒃ ᑐᓂᕐᕈᑕᐅᔪᓂᒃ ᑭᖑᕝᕕᕐᑕᐅᔭᕆᐊᖃᕐᒪᑕ.

⁷ ᑕᕝᕙᓂᓕ ᐊᖑᑎᑕᖃᓚᐅᕐᐳᖅ ᓴᐅᓕᐅᑉ ᐱᔨᖓᓂᒃ ᑍᑦᓱᒪᓂ ᐅᓪᓗᒥ, ᑍᑲᓃᑎᑕᐅᔪᒥᒃ ᐊᑕᓂᖅ ᐱᓪᓗᒍ; ᑐᐃᒋᒥᒃ ᐊᑎᓕᖕᒥᒃ ᐄᑐᒥᒥᐅᑕᕐᒥᒃ, ᓴᐅᓕᐅᑉ ᐆᒪᔪᓕᕆᔨᓄᑦ ᐊᖓᔪᖅᑳᖁᑎᖓᓂᒃ.

⁸ ᑍᕕᑎᓗ ᐅᖃᕐᐳᖅ ᐊᕼᐃᒥᓕᒃᒧᑦ, “ᖃᓗᒋᐊᖃᕐᐲᑦ ᓴᕕᒡᔪᐊᒥᒡᓘᓐᓃᑦ ᕾᒍᓐᓇᕐᑕᕐᓂᒃ? ᐊᖓᔪᖅᑳᕐᔪᐊᑉ ᑎᓕᓯᓂᖓᓄᑦ ᐅᐃᒪᓪᓗᑕ ᐊᐅᓪᓚᓚᐅᕋᑦᑕ ᓴᕕᒡᔪᐊᕋᓘᓐᓃᑦ ᐊᓯᖏᓪᓘᓐᓃᑦ ᐅᓇᑕᐅᑎᒃᑲ ᐱᔪᓐᓇᕐᓯᓚᐅᖏᓐᓇᒃᑭᑦ.”

⁹ ᑐᓂᕐᕈᓯᕐᑎᑦᓯᔨᓗ ᐅᖃᕐᐳᖅ, “ᐱᓕᔅᑍᓂᒥᐅᑉ ᒍᓔᐊᑉ ᑐᖁᓚᐅᕐᑕᕕᑦ ᓇᕐᓴᒥ ᐃᓛᒥ ᓴᕕᒡᔪᐊᖓᓂᒃ ᐱᓯᒪᒐᓗᐊᕐᑐᖓ; ᓴᒡᕕᖕᒥᐅᑕᐅᑉ ᑐᓄᐊᓃᑦᑐᖅ, ᐃᒻᒧᓯᕐᓯᒪᓪᓗᓂ ᖃᓪᓗᓈᕐᑕᒧᑦ; ᐱᔪᒪᒍᕕᐅᒃ ᑖᓐᓇ ᐱᔪᓐᓇᕐᑍᑦ ᐊᓯᐊᓂᒃ ᐱᑕᖃᖏᒻᒪᑦ.” ᑍᕕᑎᓗ ᐅᖃᕐᐳᖅ, “ᕾᑦᔪᒃ ᓴᕕᒡᔪᐊᒥᒃ ᐱᐅᓂᕐᓴᒥᒃ ᐱᑕᖃᓐᖏᓚᖅ!”

¹⁰ ᑍᕕᑎᓗ ᐅᓪᓗᒥ ᑕᕝᕙᓂ ᐊᐅᓪᓚᕐᐳᖅ ᕿᒫᓪᓗᓂ ᓴᐅᓕᒥᑦ, ᐊᖓᔪᖅᑳᕐᔪᐊᕐᒧᐊᕐᓗᓂᓗ ᐊᑭᔅᒧᑦ ᒑᑎᒥᐅᑕᕐᒧᑦ.

¹¹ ᐊᖓᔪᖅᑳᕐᔪᐊᓪᓗ ᐱᔨᖏᑦ ᐊᐱᕆᕗᑦ ᐊᑭᔅᒧᑦ, “ᑍᕕᑎᐅᓈ, ᓄᓇᒥᓂ ᐊᖓᔪᖅᑳᕐᔪᐊᖑᔪᖅ? ᑖᓐᓇᐅᓈ ᐊᖑᑦ ᐃᓐᖏᕈᑕᐅᓯᒪᔪᖅ ᐊᕐᓇᓄᑦ ᑖᓂᓯᕐᓗᑎᒃ, ‘ᓴᐅᓕ ᑐᖁᑦᓯᓯᒪᕗᖅ 1,000ᓂᒃ, ᑍᕕᑎᓕ 10,000ᓂᒃ’?”

¹² ᐅᖃᐅᓯᕐᓄᑦ ᑕᒪᒃᑯᓄᖓ ᑍᕕᑎ ᐆᒻᒪᑎᕈᕐᑕᐅᕗᖅ, ᑲᑉᐱᐊᓱᓕᕐᓗᓂᓗ ᐊᖓᔪᖅᑳᕐᔪᐊᒥᒃ ᐊᑭᔅᒥᒃ ᒑᑎᒥᐅᑕᕐᒥᒃ.

¹³ ᐱᓂᐊᕐᓂᓂᓗ ᐊᓯᑦᔨᕐᐹ ᑖᒃᑯᓄᖓ, ᐃᓱᒪᖃᑦᓯᐊᖏᑦᑐᑐᑦ ᐱᐅᓯᖃᓐᖑᐊᖃᑦᑕᓕᕐᓗᓂ, ᐃᓯᕐᑕᕐᕕᐅᓪᓗ ᐅᒃᑯᐊᖏᑦ ᕿᑦᑐᖃᑦᑕᕐᐰᑦ; ᓄᕚᕿᓂᖓᓗ ᐅᒥᖏᓐᓄᑦ ᑎᑭᐅᒪᓕᕐᓗᓂ.

¹⁴ ᑕᕝᕙ ᐊᖓᔪᖅᑳᕐᔪᐊᖅ ᐊᑭᔅ ᐅᖃᓕᕐᐳᖅ ᐱᔨᒥᓄᑦ, “ᑕᑯᒋᑦ, ᑖᓐᓇ ᐊᖑᑦ ᐃᓱᒪᖃᑦᓯᐊᓐᖏᓚᖅ; ᓱᖕᒪᓄᓇ ᐅᕙᓐᓅᕐᑎᓯᒪᕕᓯᐅᒃ?

¹⁵ ᐃᓱᒪᖃᑦᓯᐊᖏᑦᑐᒥᒃ ᐅᕙᓐᓄᐊᕐᑐᖃᕆᐊᖃᕐᐹ, ᑖᓐᓇ ᕾᑉᐱᓯᐅᖅ ᐃᓱᒪᖃᑦᓯᐊᖏᑦᑐᒥᒃ ᑕᑯᕋᓐᓈᒐᒃᓴᖃᖁᓪᓗᖓ? ᐃᒡᓗᓐᓃᑦᑐᒃᓴᐅᕚ?”