ᓴᒧᐃᓕ ᓯᕗᓪᓖᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓇᑕᓂᐅᑉ ᐃᑲᔪᕐᓂᖓ ᑍᕕᑎᒥᒃ

¹ ᑕᕝᕙ ᑍᕕᑎ ᕿᒫᕗᖅ ᓁᐅᑎᒥᑦ ᕌᒪᒦᑦᑐᒥᑦ, ᔫᓇᑕᓂᒧᓪᓗ ᐂᓪᓗᓂ ᐅᖃᐅᑎᕚ, “ᓱᓚᐅᕐᐳᖔ? ᐱᐅᖏᑦᑐᒥᒃ ᐸᓯᔭᒃᓴᐅᑦᔪᑎᖃᕐᐳᖔ? ᓱᓇᒥᒃ ᐊᔪᕐᑐᓕᓚᐅᕐᐳᖓ ᐊᑖᑕᖕᓄᑦ, ᐃᓅᓯᓐᓂᒃ ᑐᖁᑕᐅᓇᓱᐊᕈᑎᒃᓴᒥᒃ?”

² ᔫᓇᑕᓂ ᑭᐅᕗᖅ, “ᑕᒪᓐᓇ ᐃᓱᒪᒋᔭᕆᐊᖃᓐᖏᑍᑦ! ᑐᖁᓂᐊᓐᖏᓚᑎᑦ. ᑕᑯᒋᑦ, ᐊᑖᑕᒪ ᐅᖃᐅᑎᖃᑦᑕᕐᐹᖓ ᓱᓇᓕᒫᓂᒃ, ᐱᒻᒪᕆᐅᒃᐸᑦ ᐱᒻᒪᕆᐅᖏᑉᐸᓪᓘᓐᓃᑦ, ᖃᓄᐃᒻᒪᓪᓕ ᐊᑖᑕᒪ ᑕᒪᓐᓇ ᐃᔨᕐᓯᒪᒐᔭᕐᐹ ᐅᕙᓐᓂᑦ? ᑍᒤᑦᔮᓐᖏᓚᖅ.”

³ ᑍᕕᑎᓕ ᑭᐅᕗᖅ, “ᐊᑖᑍᑦ ᖃᐅᔨᒪᑦᓯᐊᕐᐳᖅ ᖃᓄᖅ ᐱᑦᓯᐊᕐᑎᒋᖕᒪᖔᕐᐱᑦ ᐅᕙᓐᓂᒃ, ᐃᓱᒪᖃᕐᐳᕐᓕ, ‘ᔫᓇᑕᓂ ᑕᒪᑐᒥᖓ ᖃᐅᔨᑎᑕᐅᑦᑍᓕᓕ, ᕿᒃᓵᓕᖁᓇᒍ.’ ᓱᓕᑦᓯᐊᕐᐳᖓ, ᐊᑕᓂᐅᑉ ᐆᒪᓂᖓᒍᑦ ᐃᕝᕕᓪᓗ, ᑐᖂᑉ ᐊᓪᓗᕆᐊᕐᓂᖓᓃᓕᕋᒪ.”

⁴ ᑕᕝᕙ ᔫᓇᑕᓂ ᐅᖃᓕᕐᐳᖅ ᑍᕕᑎᒧᑦ, “ᓱᓇᒥᒃ ᐱᓇᓱᐊᖁᔨᑐᐊᕈᕕᑦ, ᐱᓇᓱᐊᕈᓐᓇᕐᐳᖓ.”

⁵ ᑍᕕᑎ ᐅᖃᕐᐳᖅ ᔫᓇᑕᓂᒧᑦ, “ᑕᑯᒋᑦ, ᖃᐅᒃᐸᒃ ᑕᖅᑭᓂᕋᑖᖅ ᓇᓪᓕᐅᓐᓂᕐᓯᐅᕐᑕᐅᔪᒫᕐᐳᖅ, ᐊᖓᔪᖅᑳᕐᔪᐊᕐᓗ ᓂᕆᖃᑎᒋᔭᕆᖃᓪᓚᕆᒃᐸᕋ; ᑍᑲᓃᖏᑦᓱᓐᓇᕐᑎᓚᐅᓐᖓ, ᐃᔨᕐᓯᒪᓂᐊᕐᐳᖓ ᐱᕈᕐᓰᕕᖕᒥ ᐅᓪᓘᑉ ᐱᖓᔪᐊᑕ ᐅᓐᓄᖓᓄᑦ ᑎᑭᓪᓗᒍ.

⁶ ᐊᑖᑍᑦ ᑭᓐᖑᐃᒃᐸᑦ ᐅᕙᓐᓂᒃ, ᐅᖃᐅᑎᔪᒫᕐᐸᑦ, ‘ᑍᕕᑎ ᐊᔪᐃᓐᓇᓚᐅᕐᒪᑦ ᐊᖏᕐᕋᕈᓐᓇᕐᑎᑕᐅᔪᒪᓪᓗᓂ ᐱᑦᓕᐊᒻᒧᑦ ᐃᒡᓗᒐᓴᖁᑎᒥᓄᑦ; ᐃᓚᒌᓕᒫᑦ ᑐᓂᕐᕈᓯᕆᐊᖃᕐᓂᖏᑕ ᐊᕐᕌᒍᑕᒫᑦ ᓇᓪᓕᐅᑎᓂᖓᓄᑦ.’

⁷ ᐅᖃᕐᐸᑦ, ‘ᖃᓄᐃᖏᑦᑐᖅ!’ ᑕᕝᕙ ᐱᔩᑦ ᑲᑉᐱᐊᓇᖏᑦᑐᒦᓐᓂᐊᕐᐳᖅ; ᑭᓯᐊᓂᓕ ᓂᓐᖓᒃᐸᑦ, ᖃᐅᔨᒪᒐᔭᕐᐳᑎᑦ ᐱᐅᖏᑦᑐᒥᒃ ᐱᓇᓱᐊᕈᒪᓂᖓᓂᒃ.

⁸ ᑍᒤᒻᒪᑦ ᑕᒪᓐᓇ ᐱᑦᓯᐊᕐᓗᑎᑦ ᐱᓇᓱᐊᕈᒃ ᐱᑦᔪᑎᒋᓗᖓ, ᐱᔩᑦ ᐊᖏᕈᑎᒋᓯᒪᒐᕕᐅᒃ ᐊᑕᓂᕐᒧᑦ. ᐸᓯᔭᒃᓴᐅᒍᒪᓕ, ᐃᕝᕕᑦ ᓇᖕᒥᓂᖅ ᑐᖁᑕᒃᓴᕆᕙᕐᒪ; ᓱᖕᒪᑦ ᐊᑖᑕᖕᓄᐊᕈᑎᔭᒃᓴᕆᕕᖓ ᑐᖁᑕᐅᔭᕐᑐᕐᑎᓪᓗᖓ?”

⁹ ᔫᓇᑕᓂᓗ ᐅᖃᕐᐳᖅ, “ᑍᒫᒃ ᐃᓱᒪᑦᑍᓕᒋᑦ! ᖃᐅᔨᒪᑦᓯᐊᕆᑦ ᐊᑖᑕᒪ ᐱᐅᖏᑦᑐᒥᒃ ᐱᓇᓱᐊᕐᕕᒋᔪᒪᒃᐸᑎᑦ, ᐅᖃᐅᑎᑦᑍᓕᒐᔭᓚᐅᕐᐱᒌᑦ?”

¹⁰ ᑕᕝᕙ ᑍᕕᑎ ᔫᓇᑕᓂᒧᑦ ᐅᖃᕐᐳᖅ, “ᑭᓇᒧᓪᓕ ᑍᒪ ᐅᖃᐅᑦᔭᐅᓂᐊᕐᐳᖓ ᐊᑖᑍᑦ ᓂᓐᖓᐅᒪᓗᓂ ᑭᐅᒃᐸᑎᑦ?”

¹¹ ᔫᓇᑕᓂᓗ ᐅᖃᕐᐳᖅ ᑍᕕᑎᒧᑦ, “ᕾᒋᑦ ᐱᕈᕐᓰᕕᖕᒧᐊᓚᐅᕐᓗᒃ.” ᑕᕝᕙ ᐱᕈᕐᓰᕕᖕᒧᐊᓚᐅᕐᐴᒃ,

¹² ᔫᓇᑕᓂᓗ ᐅᖃᓕᕐᐳᖅ ᑍᕕᑎᒧᑦ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ, ᖃᐅᔨᒪᔨᑕᕆᓚᕗᒃ! ᑍᒤᓪᓗᐊᓕᕐᐸᑦ ᖃᐅᒃᐸᑦ ᐅᖓᓕᐊᒍᓘᓐᓃᑦ, ᑕᑯᒋᑦ, ᐱᓂᐊᕐᓂᖓ ᐃᓕᖕᓄᑦ ᐱᐅᔫᒃᐸᑦ, ᐅᖃᐅᑦᔭᐅᔭᕐᑐᕐᑎᑦᓱᒫᕐᐸᒋᑦ.

¹³ ᐊᑕᓂᐅᓪᓕ ᔫᓇᑕᓂ ᐊᖏᓂᕐᓴᒥᒃ ᓱᒋᐊᕐᑕᒃᓴᕆᕚ, ᐊᑖᑕᒪ ᐱᐅᖏᑦᑐᒥᒃ ᐱᓂᐊᕐᕕᒋᔪᒪᑐᐊᕐᐸᑎᑦ, ᑕᕝᕙ ᐅᖃᐅᑎᔪᒫᕐᐸᒋᑦ ᐊᐅᓪᓚᕐᑎᓪᓗᒋᓪᓗ, ᐊᑦᑕᕐᓇᕐᑐᒦᖁᓇᑎᑦ. ᐊᑕᓂᐅᑉ ᐃᓚᒋᓕᑎᑦ, ᑍᒫᑦᓮᓐᓇᖅ ᐊᑖᑕᓐᓃᓚᐅᕐᒪᑦ.

¹⁴ ᐃᓅᖏᓐᓇᕈᒪᓕ, ᑲᔪᓯᑎᑦᓯᔪᒫᕐᐳᑎᑦ ᐊᑕᓂᐅᑉ ᓇᒡᓕᖕᓂᖓᓂᒃ ᐊᖏᕈᑎᒋᓯᒪᔭᕐᓂᒃ, ᑐᖁᓐᓂᕈᒪᓕ;

¹⁵ ᐱᑦᓯᐊᕐᓃᑦ ᑲᔪᓯᑎᑦᓱᒫᕐᐸᑦ ᐃᒡᓗᒥᐅᖃᑎᓐᓄᑦ ᓯᖁᒥᑦᑍᓕᓗᒍ ᐃᓱᖃᖏᑦᑐᒧᑦ. ᐊᑕᓂᐅᑉ ᐊᑭᕋᕐᑐᕐᑎᓕᒫᑎᑦ ᑐᖁᑉᐸᒋᑦ ᓄᓇᕐᔪᐊᒥᑦ.

¹⁶ ᐊᖏᕈᑎᒋᓯᒪᔭᕗᑦ ᔫᓇᑕᓂᐅᑉ ᐊᑎᖓ ᐊᓯᐅᑎᑦᑍᓕᒍᒃ ᑍᕕᑎᐅᑉ ᐃᓚᖏᓐᓂᑦ, ᑕᒪᓐᓇ ᑲᔪᓯᑎᑕᐅᓐᓂᖏᑉᐸᑦ ᐊᑕᓂᐅᑉ ᐊᑭᓂᐊᕈᒫᕐᐹᑎᑦ ᐃᓚᑎᓪᓗ.”

¹⁷ ᔫᓇᑕᓂᐅᓪᓗ ᑍᕕᑎ ᐊᖏᕐᑎᒃᑲᓐᓂᕐᐹ ᓇᒡᓕᒋᒐᒥᐅᒃ; ᔫᓇᑕᓂᐅᑉ ᓇᒡᓕᒋᓚᐅᕐᐹ ᑕᕐᓂᕐᒥᓂᒃ ᓇᒡᓕᒋᓂᕐᒥᑐᑦ.

¹⁸ ᑕᕝᕙ ᔫᓇᑕᓂ ᐅᖃᕐᐳᖅ ᑍᕕᑎᒧᑦ, “ᖃᐅᒃᐸᑦ ᑕᖅᑭᓂᕋᑖᕐᓂᒥᒃ ᓇᓪᓕᐅᓐᓂᕐᓯᐅᕐᓂᐅᓛᕐᐳᖅ; ᑭᓐᖒᒪᔭᐅᔪᒫᕐᐳᑎᑦ, ᐃᒃᓯᕙᐅᑍᑦ ᐃᓄᖃᕈᒫᖏᒻᒪᑦ.

¹⁹ ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᑭᓐᖒᒪᔭᐅᓕᕆᐊᓪᓚᒍᒫᕐᐳᑎᑦ; ᑕᕝᕙ ᑐᐊᕕᕐᓗᑎᑦ ᐂᔪᒫᕐᐳᑎᑦ ᐃᔨᕐᓯᒪᕕᒋᓚᐅᕐᑕᕐᓄᑦ, ᑕᕝᕙᓂ ᐃᔨᕐᓯᒪᓛᕐᐳᑎᑦ ᐅᔭᕋᓱᒡᔪᐃᑦ ᖃᓕᕇᒃᑐᑦ ᐅᖓᑖᓂ.

²⁰ ᐱᖓᓱᓂᒃ ᖃᕐᔪᓐᓂᒃ ᐱᓯᒋᐊᕈᒫᕐᐳᖓ ᓴᓂᐊᓄᑦ, ᐱᓯᒃᑖᕐᕕᖕᒧᑦ ᐆᒃᑐᕋᕐᓗᓂ ᐱᓯᒋᐊᖃᕐᑕᕐᑐᑎᑐᑦ;

²¹ ᑕᑯᒋᑦ, ᑍᑲᓂ ᑎᓕᓯᔪᒫᕐᐳᖓ ᓄᑲᑉᐱᐊᒥᒃ ᐅᖃᐅᑎᓗᒍ, ‘ᐂᓗᑎᑦ ᖃᕐᔪᐃᑦ ᕿᓂᕆᐊᒃᑭᑦ.’ ᓄᑲᑉᐱᐊᕐᓗ ᐅᖃᐅᑎᒍᒃᑯ, ‘ᑕᑯᒋᑦ ᖃᕐᔪᐃᑦ ᓴᓂᖕᓃᑉᐳᑦ; ᐂᓕᒃᑭᑦ ᕾᓗᑎᓪᓗ,’ ᑍᒤᓕᒍᒪ ᑕᕝᕙ ᕾᔪᓐᓇᓛᕐᐳᑎᑦ, ᐊᑕᓂᖅ ᐃᓅᖕᒪᑦ, ᑕᕝᕙ ᑲᑉᐱᐊᓇᕐᑐᖃᕋᔭᓐᖏᓚᖅ ᐃᓕᖕᓄᑦ.

²² ᓄᑲᑉᐱᐊᕐᓕ ᐅᖃᐅᑎᒍᒃᑯ, ‘ᑕᑯᒋᑦ, ᖃᕐᔪᐃᑦ ᐅᖓᑎᖕᓃᑉᐳᑦ,’ ᑕᕝᕙ ᐊᐅᓪᓚᕆᐊᖃᕋᔭᕐᐳᑎᑦ; ᐊᑕᓂᐅᑉ ᑎᓕᒐᔭᕐᐹᑎᑦ ᐊᐅᓪᓚᖁᓗᑎᑦ.

²³ ᐅᖃᐅᓯᕆᓚᐅᕐᑕᕗᒡᓕ ᐱᑦᔪᑎᒋᓗᒋᑦ, ᑕᑯᒋᑦ, ᐊᑕᓂᖅ ᐊᑯᓐᓇᑦᑎᓐᓃᓐᓂᐊᕐᐳᖅ ᐃᓱᖃᖏᑦᑐᒧᑦ.”

²⁴ ᑕᕝᕙ ᑍᕕᑎ ᐃᔨᕐᓯᒪᓚᐅᕐᐳᖅ ᐱᕈᕐᓰᕕᖕᒥ; ᑕᖅᑭᓂᕋᑖᖅ ᓇᓪᓕᐅᓐᓂᕐᓯᐅᕐᑕᐅᓕᕐᑎᓪᓗᒍ, ᑕᕝᕙ ᐊᖓᔪᖅᑳᕐᔪᐊᖅ ᐃᖏᑉᐳᖅ ᓂᕆᔭᕐᑐᕐᓱᓂ.

²⁵ ᑕᕝᕙ ᐊᖓᔪᖅᑳᕐᔪᐊᖅ ᐃᖏᑉᐳᖅ ᐃᓂᒥᓄᑦ, ᐊᑭᓐᓇᐅᑉ ᓴᓂᐊᓂ. ᔫᓇᑕᓂᓗ ᐃᖏᑉᐳᖅ ᐊᑭᐊᓄᑦ, ᐋᑉᓄᓗ ᓴᐅᓕᐅᑉ ᓴᓂᐊᓂ ᐃᒃᓯᕙᑎᓪᓗᒍ, ᑍᕕᑎᐅᓪᓕ ᐃᒃᓯᕙᐅᑕᖓ ᐃᓄᖃᓚᐅᓐᖏᓚᖅ.

²⁶ ᓴᐅᓕᓕ ᖃᓄᑐᐃᓐᓇᖅ ᓂᓪᓕᓚᐅᓐᖏᓚᖅ ᐅᓪᓗᒥ ᑕᕝᕙᓂ; ᐃᓱᒪᓚᐅᕋᒥ, “ᓱᓇᒥᑭᐊᖅ ᐱᑦᔪᑎᖃᕋᒥ, ᓴᓗᒤᑦᑑᔪᒃᓴᐅᒐᒥ, ᐃᓛᒃ ᓴᓗᒤᑦᑑᒐᒥ ᑭᓯᐊᓂ.”

²⁷ ᖃᐅᑎᓪᓗᒍᓕ, ᐅᓪᓘᑉ ᐂᑉᐸᖓᓂ ᑕᖅᑭᓂᕋᑖᑉ ᓇᓪᓕᐅᓐᓂᕐᓯᐅᕐᑕᐅᓂᖓᓂ, ᑍᕕᑎᐅᑉ ᐃᓂᖓ ᓱᓕ ᐃᓄᖃᖏᒻᒪᑦ, ᓴᐅᓕ ᐊᐱᕆᓕᕐᐳᖅ ᔫᓇᑕᓂᒧᑦ, “ᓱᖕᒪᓂᓐᓇ ᔨᓯᐅᑉ ᐃᕐᓂᖓ ᓂᕆᔭᕐᑐᓚᐅᓐᖏᓚᖅ ᐃᑉᐸᒃᓴᖅ ᐅᓪᓗᒥᓗ?”

²⁸ ᔫᓇᑕᓂᐅᑉ ᓴᐅᓕ ᑭᐅᕚ, “ᑍᕕᑎ ᐊᔪᐃᓐᓇᓚᐅᕐᒪᑦ ᐱᑦᓕᐊᒧᑦ ᐂᔪᓐᓇᕐᑎᑕᐅᔪᒪᓪᓗᓂ;

²⁹ ᐅᖃᓚᐅᕐᒪᑦ, ‘ᐊᐅᓪᓚᕈᓐᓇᕐᑎᓚᐅᓐᖓ; ᐃᓚᒃᑲ ᓇᓪᓕᐅᓐᓂᕐᓯᐅᕐᓂᐊᕐᒪᑕ ᑐᓂᕐᕈᓯᕐᓗᑎᒃ ᓂᕆᖃᑎᒌᓪᓗᑎᒡᓗ ᑍᑲᓂ, ᐊᖓᔪᒪᓗ ᕾᖁᓚᐅᕐᒪᖓ ᑍᑲᓃᖁᓪᓗᖓ. ᖁᕕᐊᒋᒍᕕᖓ, ᐱᔪᓐᓇᕐᑎᓚᐅᓐᖓ ᐃᓚᓐᓂᒃ ᑕᑯᔪᓐᓇᖁᓪᓗᖓ.’ ᑍᒤᒻᒪᑦ ᑕᕝᕙ ᐃᓂᒥᓃᓐᖏᓚᖅ ᐊᖓᔪᖅᑳᕐᔪᐊᑉ ᓵᖓᓂ.”

³⁰ ᑕᕝᕙ ᓴᐅᓕ ᓂᓐᖓᒻᒪᕆᒃᐳᖅ ᔫᓇᑕᓂᒧᑦ, ᐅᖃᐅᑎᓪᓗᒍᓗ, “ᐱᐅᖏᑦᑐᐊᓗᖕᒧᑦ ᐊᑭᕋᕐᑐᕐᑎᐊᓗᖕᒧᓪᓗ ᐊᕐᓇᒧᑦ ᐃᕐᓂᕆᔭᐅᕗᑎᑦ! ᒫᓐᓇ ᖃᐅᔨᕗᖓ ᔨᓯᐅᑉ ᐃᕐᓂᖓ ᐃᓚᓕᐅᕇᕋᕕᐅᒃ ᐃᓕᖕᓂᒃ ᐊᓈᓇᖕᓂᒡᓗ ᓇᕐᕈᓇᕐᑎᓕᕐᐳᑎᑦ!

³¹ ᖃᐅᔨᒪᓐᖏᓚᑏᑦ ᔨᓯᐅᑉ ᐃᕐᓂᖓ ᐃᓅᑎᓪᓗᒍ ᓄᓇᕐᔪᐊᕐᒥ, ᐊᖓᔪᖅᑳᕐᔪᐊᓐᖑᕈᓐᓇᑦᔮᖏᓐᓇᕕᑦ, ᐊᖓᔪᖅᑲᐅᕕᖃᑦᔮᓇᒡᓘᓐᓃᑦ? ᑍᒤᒻᒪᑦ ᒫᓐᓇ ᕾᑎᓚᐅᕈᒃ ᐅᕙᓐᓄᑦ, ᑖᓐᓇ ᑐᖁᔪᒃᓴᐅᖕᒪᑦ.”

³² ᑕᕝᕙ ᔫᓇᑕᓂ ᑭᐅᕗᖅ ᐊᑖᑕᒥᓄᑦ ᓴᐅᓕᒧᑦ ᐅᖃᕐᓗᓂ, “ᖃᓄᐃᒻᒪᑦ ᑐᖁᔪᒃᓴᐅᕚ? ᓱᓇᒥᒃ ᐱᓇᓱᐊᕐᓯᒪᖕᒪᑦ?”

³³ ᑍᒤᓕᖕᒪᑦ, ᓴᐅᓕᐅᑉ ᔫᓇᑕᓂ ᑲᐱᒋᐊᕐᐹ ᖃᓗᒋᐊᒥᓄᑦ ᑐᖁᒋᐊᕐᓗᒍ; ᔫᓇᑕᓂ ᑕᕝᕙ ᖃᐅᔨᓚᐅᕐᐳᖅ ᐊᑖᑕᖓ ᑐᖁᑦᓯᔪᒪᓪᓚᕆᖕᓂᖓᓂᒃ ᑍᕕᑎᒥᒃ.

³⁴ ᔫᓇᑕᓂᓗ ᓂᑯᕕᑉᐳᖅ ᐃᓂᒥᓂᑦ ᓂᓐᖓᒻᒪᕆᒃᓗᓂ ᓂᕆᓚᐅᓐᖏᓚᕐᓗ ᐅᓪᓗᓕᒫᖅ ᑕᖅᑭᓂᕋᑖᑉ ᓇᓪᓕᐅᓐᓂᕐᓯᐅᕐᑕᐅᓂᖓᑕ ᐂᑉᐸᖓᓂ, ᐃᓱᒫᓗᑎᖃᒻᒪᕆᓕᕐᓗᓂ ᑍᕕᑎᒥᒃ, ᐊᑖᑕᖓᑕ ᐅᖃᕐᓂᕐᓘᑎᒋᓚᐅᕐᒪᒍ ᓇᕐᕈᓇᕐᓯᑎᓪᓗᓂᐅᒃ.

³⁵ ᐅᓪᓛᒃᑯᑦ ᔫᓇᑕᓂ ᐱᕈᕐᓰᕕᖕᒧᐊᕐᐳᖅ ᑍᕕᑎᒃᑯᒃ ᑕᒪᑐᒥᖓ ᐊᖏᖃᑎᒌᓚᐅᕋᒥᒃ, ᓄᑲᑉᐱᐊᒥᒃ ᐱᖃᑎᖃᕐᓗᓂ.

³⁶ ᓄᑲᑉᐱᐊᒧᓪᓗ ᐅᖃᕐᐳᖅ, “ᐅᓪᓚᒡᓗᑎᑦ ᕿᓂᕆᐊᒃᑭᑦ ᖃᕐᔪᐃᑦ ᐱᓯᒋᐊᕈᑎᒋᔭᒃᑲ.” ᓄᑲᑉᐱᐊᖅ ᐅᓪᓚᒃᓯᖕᒪᑦ, ᔫᓇᑕᓂ ᐱᓯᒋᐊᕐᐳᖅ ᐅᖓᑖᓄᑦ.

³⁷ ᓄᑲᑉᐱᐊᕐᓗ ᑎᑭᒻᒪᑦ ᖃᕐᔪᐃᑦ ᑐᕝᕕᒋᓚᐅᕐᑕᖏᓐᓄᑦ, ᔫᓇᑕᓂᐅᑉ ᕾᒐᓛᕐᕕᒋᕚ, “ᖃᕐᔪᐃᑦ ᐅᖓᑎᖕᓃᓐᖏᓛᑦ?”

³⁸ ᔫᓇᑕᓂᐅᓪᓗ ᓄᑲᑉᐱᐊᖅ ᕾᒐᓛᕐᕕᒋᕚ, “ᑐᐊᕕᕆᑦ ᓄᖅᑲᕐᑍᓕᓗᑎᑦ.” ᓄᑲᑉᐱᐊᓪᓗ ᖃᕐᔪᐃᑦ ᓄᐊᓐᓇᒥᒋᑦ, ᐅᑎᕐᐳᖅ ᐊᖓᔪᖅᑳᒥᓄᑦ.

³⁹ ᓄᑲᑉᐱᐊᕐᓗ ᖃᐅᔨᓚᐅᓐᖏᓚᖅ ᖃᓄᖅ ᑕᒪᓐᓇ ᑐᑭᖃᕐᒪᖔᑦ; ᔫᓇᑕᓂᒃᑯᒡᓕ ᑍᕕᑎᒃᑯᒃ ᑕᒪᑐᒥᖓ ᖃᐅᔨᒪᔪᑑᓚᐅᕐᐴᒃ.

⁴⁰ ᔫᓇᑕᓂᐅᓪᓗ ᓄᑲᑉᐱᐊᖅ ᑐᓂᕚ ᖃᕐᔪᓂᒃ ᐅᖃᐅᑎᓪᓗᒍᓗ, “ᐊᒡᔭᕐᓗᒋᑦ ᐃᒡᓗᒐᓴᖕᓄᐊᕈᑎᓕᒃᑭᑦ.”

⁴¹ ᓄᑲᑉᐱᐊᕐᓗ ᕿᒪᕉᑎᑐᐊᕐᒪᑦ, ᑍᕕᑎ ᓂᑯᕕᑉᐳᖅ ᐃᔨᕐᓯᒪᕕᒋᔭᒥᓂᑦ ᐅᔭᕋᓱᒡᔪᐃᑦ ᖃᓕᕇᑦ ᐊᑯᓐᓂᖓᓂᑦ, ᒪᓂᖅᑲᒧᓪᓗ ᐅᑯᕗᖅ, ᐱᖓᓱᐃᕐᑐᕐᓗᓂᓗ ᐅᑯᖃᑦᑕᓚᐅᕐᐳᖅ; ᐃᕿᓪᓗᑎᒡᓗ ᑯᓂᖃᑦᑕᐅᑎᕘᒃ; ᕿᐊᖃᑎᒌᒃᓗᑎᒡᓗ, ᑍᕕᑎ ᐱᓂᕐᓴᐅᓪᓗᓂ ᔫᓇᑕᓂᒥᑦ.

⁴² ᑕᕝᕙ ᔫᓇᑕᓂ ᐅᖃᕐᐳᖅ ᑍᕕᑎᒧᑦ, “ᐃᓱᒫᓗᖏᓪᓗᑎᑦ ᐊᐅᓪᓚᓕᕆᑦ, ᐊᖏᖃᑎᒌᓚᐅᕋᓐᓄᒃ ᐊᑕᓂᐅᑉ ᐊᑎᖓ ᑍᓪᓗᒍ, ᐅᖃᕐᓗᓄᒃ, ‘ᐊᑕᓂᖅ ᐊᑯᓐᓇᑦᑎᓐᓃᓪᓕ ᑭᖑᕚᓐᓂ ᑭᖑᕚᕐᓂᓗ ᐃᓱᖃᖏᑦᑐᒧᑦ.’” ᑍᕕᑎᓗ ᒪᑭᓐᓇᒥ ᕿᒪᕉᑎᓕᕐᐳᖅ; ᔫᓇᑕᓂᓗ ᐃᒡᓗᒐᓴᖕᓄᐊᕐᑎᓪᓗᒍ.