ᓴᒧᐃᓕ ᓯᕗᓪᓖᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᕼᐋᓇᐅᑉ ᑐᒃᓯᐊᕐᓂᖓ

¹ ᕼᐋᓇ ᑐᒃᓯᐊᓚᐅᕐᐳᖅ ᐅᖃᕐᓗᓂ: “ᐊᑕᓂᐅᑉ ᐆᒻᒪᑎᒐ ᑕᑕᑎᑉᐹ ᖁᕕᐊᓱᖕᓂᕐᒥᒃ; ᐱᔪᓐᓇᕐᓂᕋ ᐊᑕᓂᐅᑉ ᖁᕝᕙᕐᑎᑉᐹ. ᐊᑭᕋᕐᑐᕐᑎᒃᑲ ᖁᖓᑦᔪᑎᒋᔪᓐᓇᓕᕐᐸᒃᑲ; ᖁᕕᐊᓱᒻᒪᕆᓕᕐᐳᖓ ᒎᑎᐅᑉ ᐱᐅᓕᓚᐅᕐᒪᖓ!

² ᐃᑦᔪᕐᓁᑦᑐᖃᓐᖏᓚᒃ ᐊᑕᓂᕐᑐᑦ ᐃᑦᔪᕐᓁᑦᑐᒥᒃ; ᓇᓪᓕᐊᓐᓂᒡᓘᓐᓃᑦ ᐊᑦᔨᖃᓐᖏᓚᑎᑦ; ᕾᕐᑐᕐᑕᖃᓐᖏᓚᕐᓗ ᒎᑎᑦᑎᑐᑦ ᓴᐳᑦᔨᔪᓐᓇᕐᑎᒋᔪᒥᒃ.

³ ᐱᐅᔪᕆᓗᓯ ᐅᖃᓪᓚᒍᓐᓃᕆᑦᓯ, ᐱᐅᔪᕆᓂᕐᒥᒃ ᖃᓂᑦᓯᓐᓂᑦ ᐊᓂᔪᖃᕈᓐᓃᕐᓕᑦ; ᐊᑕᓂᖅ ᒎᑎᐅᖕᒪᑦ ᑖᓐᓇ ᖃᐅᔨᒪᔪᖅ, ᑖᑦᓱᒪᓪᓗ ᐱᓂᐊᕐᓃᑦ ᖃᐅᔨᓴᕐᐸᒃᐰᑦ.

⁴ ᐱᔪᓐᓇᕐᑐᕐᔪᐊᑦ ᐅᓇᑕᕐᑏᑦ ᖃᕐᔪᖏᑦ ᓯᖁᒥᑉᐳᑦ, ᓴᓐᖐᑦᑐᓪᓕ ᓴᓐᖏᒃᑎᑉᐳᑦ.

⁵ ᐃᓄᐃᑦ ᓂᕆᑦᓯᐊᕐᐸᓚᐅᕐᑐᑦ ᐃᖅᑲᓁᔭᓕᕐᐳᑦ ᓂᕿᑖᕈᒪᒧᑦ, ᑳᒃᐸᓚᐅᕐᑐᑦ ᑳᒍᓐᓃᕐᐳᑦ. ᕿᑐᕐᖏᓱᐃᑦᑐᖅ ᕿᑐᕐᖓᕐᑖᕐᐳᖅ 7ᓂᒃ, ᕿᑐᕐᖓᖃᕐᑐᓪᓕ ᐅᓄᕐᑐᓂᒃ ᓄᖑᕈᑎᕗᖅ.

⁶ ᐊᑕᓂᖅ ᑐᖁᑦᓯᕗᖅ ᐃᓅᓯᑕᕐᑎᑦᓯᓪᓗᓂᓗ; ᐃᓄᖕᓂᒃ ᑐᖁᖓᔪᑦ ᐃᓂᖓᓄᐊᕐᑎᑦᓯᕗᖅ ᒪᑭᑎᑦᓯᓪᓗᓂᓗ.

⁷ ᐊᑕᓂᐅᑉ ᐊᒃᓗᔪᑦ ᐊᒃᓗᐃᑦᑐᕈᕐᑎᑉᐰᑦ; ᐃᓚᖏᑦ ᒥᑭᒡᓕᑎᑉᐰᑦ, ᐊᓯᖏᓪᓗ ᐊᖏᔪᕈᕐᑎᓪᓗᒋᑦ.

⁸ ᐊᒃᓗᔪᑦ ᒪᑭᑎᑉᐰᑦ ᓄᓇᐅᑉ ᐳᔪᕋᖓᓂᑦ; ᐃᑲᔪᕐᑕᐅᔭᕆᐊᓖᓪᓗ ᖁᕝᕙᕐᑎᑉᐰ ᐊᕐᔭᓕᓂᕐᓂᑦ, ᐊᖓᔪᖅᑳᕐᔪᐊᓪᓗ ᐃᕐᓂᖏᓐᓂ ᐃᒃᓯᕙᐅᑕᕐᑖᕐᑎᑉᐰᑦ ᑭᖑᕐᖑᑦᔨᑎᑉᐰᓪᓗ ᐃᒃᓯᕙᐅᑕᕐᔪᐊᕐᒥᒃ ᐱᓐᓇᕐᓇᕐᑐᒥᒃ. ᓄᓇᕐᔪᐊᑉ ᑐᓐᖓᕕᖏᑦ ᐊᑕᓂᐅᑉ ᐱᒋᕔᑦ; ᖄᖓᓄᓪᓗ ᓯᓚᕐᔪᐊᖅ ᐃᓕᓯᒪᕚ.

⁹ ᓴᐳᑎᓯᒪᓂᐊᕐᐰᑦ ᓱᖁᓯᔪᐃᑦᑐᖁᑎᖏᑕ ᐃᓅᓯᖏᑦ, ᐱᐅᖏᑦᑐᓪᓕ ᐊᓯᐅᕗᑦ ᑖᕐᑐᕐᔪᐊᕐᒥ; ᐃᓄᒃ ᐱᔪᓐᓇᕐᓂᕐᒥᓄᑦ ᓵᓚᖃᕐᓂᐊᓐᖏᓚᖅ.

¹⁰ ᐊᑕᓂᐅᑉ ᐊᑭᕋᕐᑐᕐᑎᖏᑦ ᐊᓯᕈᕐᑕᐅᒻᒪᕆᒍᒫᕐᐳᑦ; ᐱᒋᐊᕈᒫᕐᐰᑦ ᑲᓪᓕᕐᕕᐅᑎᓪᓗᒋᑦ ᕿᓚᖕᒥᑦ. ᐊᑕᓂᐅᑉ ᓄᓇᕐᔪᐊᕐᒥᐅᓕᒫᑦ ᐃᖅᑲᕐᑐᕈᒫᕐᐰᑦ; ᐊᖓᔪᖅᑳᕐᔪᐊᖁᑎᓂᓗ ᐱᔪᓐᓇᕐᓂᕐᒥᒃ ᑐᓂᓯᕕᒋᕚ, ᐱᔪᓐᓇᕐᓂᕐᒥᒡᓗ ᓂᕈᐊᕐᓯᒪᔭᓂ ᐱᑖᕐᑎᑉᐹ.”

¹¹ ᐃᐅᓪᑳᓇᓗ ᐅᑎᕐᐳᖅ ᐊᖏᕐᕋᒥᓄᑦ ᕌᒪᒧᑦ, ᓱᕈᓯᕐᓕ ᓴᒧᐃᓕ ᐅᓂᒃᐳᖅ, ᐊᑕᓂᕐᓗ ᐱᔨᑦᓯᕐᐹ ᐃᓔᒧᑦ ᑐᓂᕐᕈᓯᕐᑎᑦᓯᔨᒧᑦ ᑲᒪᒋᔭᐅᓪᓗᓂ.

ᐃᓔᑉ ᐃᕐᓂᖏᑦ

¹² ᐃᓔᓪᓕ ᐃᕐᓂᖏᑦ ᐱᐅᖏᑦᑐᓕᒻᒪᕆᓚᐅᕐᐳᑦ; ᐊᑕᓂᕐᒥᒡᓗ ᐃᒃᐱᒍᓱᒐᑎᒃ.

¹³ ᐊᖑᑦ ᑐᓂᕐᕈᓯᕆᐊᕐᑐᕐᒪᑦ ᑐᓂᕐᕈᑎᒥᓂᒃ, ᑐᓂᕐᕈᓯᕐᑎᑦᓯᔨᐅᑉ ᐱᔨᖓ ᐅᐸᒍᑎᕙᓚᐅᕐᐳᖅ ᐱᐅᓯᕆᔭᐅᓪᓗᓂ ᑲᑭᐊᒃᔪᐊᓕᔭᕐᓗᓂ ᐱᖓᓱᓂᒃ ᑲᐴᑎᓕᖕᓂᒃ, ᓂᕿ ᓱᓕ ᐆᓐᓇᓱᐊᕐᑎᓪᓗᒍ.

¹⁴ ᑲᑭᐊᒃᔪᐊᓂ ᐅᒃᑯᓯᐅᑉ ᐃᓗᐊᓄᐊᕐᐸᓚᐅᐹ ᑭᓱᑐᐃᓐᓇᒥᒡᓗ ᑲᑭᐊᒃᓯᑐᐊᕈᓂ ᑖᓐᓇ ᑲᑭᐊᒃᑕᖓ ᑐᓂᕐᕈᓯᕐᑎᑦᓯᔨᒧᐊᕐᑕᐅᔭᕆᐊᖃᕐᐸᓚᐅᕐᐳᑦ, ᐃᓴᕆᐊᓕᒥᐅᓕᒫᑦ ᑐᓂᕐᕈᓯᕆᐊᕐᑐᕐᑐᑦ ᓮᓗᐊᒧᑦ ᑍᒫᒃ ᐱᐅᓯᖃᕐᕕᐅᕙᓚᐅᕐᐳᑦ.

¹⁵ ᓱᓕᓗ, ᑐᓐᓄᖓ ᐲᕐᑕᐅᓚᐅᕐᑎᓐᓇᒍ ᐃᑯᐊᓪᓚᒃᑕᐅᓚᐅᕐᑎᓐᓇᒍᓗ, ᑐᓂᕐᕈᓯᕐᑎᑦᓯᔩᑦ ᐱᔨᖏᑦ ᑐᓂᕐᕈᓯᕆᐊᕐᑐᕐᑐᒧᑦ ᐅᖃᕐᐸᓚᐅᕐᐳᑦ, “ᓂᕿᒥᒃ ᑐᓂᓯᕕᒋᓚᐅᓐᖓ ᑐᓂᕐᕈᓯᕐᑎᑦᓯᔨᐅᑉ ᓂᕿᓕᐅᕐᓂᐊᕐᑕᖓᓂᒃ; ᓂᕿᒥᒃ ᐆᓯᒪᔪᒥᒃ ᐃᓕᖕᓂᑦ ᐱᔪᒪᖏᒻᒪᑦ, ᐆᓯᒪᖏᑦᑐᒥᒡᓕ.”

¹⁶ ᐊᖑᑎᐅᓪᓕ ᑭᐅᒃᐸᒍ, “ᓈᒻᒪᒃᑐᒥᒃ ᐱᔭᕆᐊᓕᑦᑎᓐᓂᒃ ᐱᑬᓐᓇᕐᑕ ᑐᓐᓄᐊ ᐃᑯᐊᓪᓚᖅᑳᕐᓗᒍ; ᐱᔪᒪᔭᕐᓂᒃ ᑭᖑᓂᐊᒍᑦ ᐱᓂᐊᕐᐳᑎᑦ,” ᑐᓂᕐᕈᓯᕐᑎᑦᓯᔩᑦ ᐱᔨᖏᑦ ᐅᖃᕐᐸᓚᐅᕐᐳᑦ, “ᐋᒃᑲ, ᒫᓐᓇ ᕾᑦᓯᓚᐅᕆᑦ; ᕾᓐᓂᐊᖏᑐᐊᕈᕕᐅᒃ ᐊᕐᓵᕐᓂᐊᕐᐸᒋᑦ, ᐱᖁᔨᖏᒃᑲᓗᐅᕈᕕᑦ.”

¹⁷ ᐃᓔᑉ ᐃᕐᓂᖏᑕ ᐊᔪᕐᑐᓕᓂᖏᑦ ᐱᐅᖏᑦᑐᒻᒪᕆᐅᓚᐅᕐᐳᑦ ᐊᑕᓂᐅᑉ ᓵᖓᓂ; ᑐᓂᕐᕈᑎᒋᔭᐅᔪᓂᒃ ᐊᑕᓂᕐᒧᑦ ᐃᒃᐱᒍᓱᑦᓯᐊᖏᓂᖏᑦ ᐱᑦᔪᑎᒋᓪᓗᒋᑦ.

ᓴᒧᐃᓕᐅᑉ ᓮᓗᐊᒧᐊᕐᓂᖓ

¹⁸ ᑍᒤᒃᑲᓗᐊᕐᑎᓪᓗᒋᓪᓕ ᓱᕈᓯᖅ ᓴᒧᐃᓕ ᑲᔪᓯᓚᐅᕐᐳᖅ ᐱᔨᑦᓯᕐᓗᓂ ᐊᑕᓂᕐᒥᒃ, ᓵᓕᑕᕐᒥᒃ ᖃᓪᓗᓈᕐᑕᒥᒃ ᐃᑦᔪᕐᓁᑦᑐᒥᒃ ᐊᑐᕐᓗᓂ.

¹⁹ ᐊᕐᕌᒍᑕᒫᑦ ᐊᓈᓇᖓᑕ ᓴᓐᓇᑎᕙᓚᐅᕐᐹ ᐊᓐᓄᕌᒥᒃ ᐊᑕᔪᕐᒥᒃ, ᑐᓂᕙᓚᐅᕐᐹ ᐅᐃᓂ ᐱᖃᑎᒋᓪᓗᓂᐅᒃ ᑐᓂᕐᕈᓯᕆᐊᕐᑐᕐᑎᓪᓗᒍ ᑐᓂᕐᕈᑎᒥᓂᒃ ᐊᕐᕌᒍᑕᒫᕐᓯᐅᑎᒥᓂᒃ.

²⁰ ᐃᓔᓪᓗ ᓮᒻᒪᕐᑎᑉᐸᓚᐅᕐᐹ ᐃᐅᓪᑳᓇ ᓄᓕᐊᖓᓗ, ᐅᖃᕐᐸᒡᓗᓂᓗ ᐃᐅᓪᑳᓇᒧᑦ, “ᐊᑕᓂᐅᑉ ᕿᑐᕐᖓᕐᑖᕐᑎᒃᑲᓐᓂᕐᓕᓯᒃ ᐊᕐᓇᒃᑯᑦ ᑖᑦᓱᒨᓇ ᑭᖑᕝᕕᕐᑕᐅᖁᓪᓗᒍ ᑐᓂᓚᐅᕐᑕᖓᓂᒃ ᐊᑕᓂᕐᒧᑦ.” ᐱᔭᕇᕋᖓᒥ ᐊᖏᕐᕋᕐᐸᓚᐅᕐᐴᒃ.

²¹ ᐊᑕᓂᐅᑉ ᓮᒻᒪᕐᑎᓚᐅᕐᐹ ᕼᐋᓇ, ᐃᕐᓂᕐᑖᕐᐳᕐᓗ ᐱᖓᓱᓂᒃ ᐸᓂᒃᑖᕐᓗᓂᓗ ᒪᕐᕉᖕᓂᒃ. ᓱᕈᓯᕐᓕ ᓴᒧᐃᓕ ᐱᕈᕐᐸᓪᓕᐊᓚᐅᕐᐳᖅ ᐱᔨᑦᓯᕐᓗᓂ ᐊᑕᓂᕐᒥᒃ.

ᐃᓔᓗ ᐃᕐᓂᖏᓪᓗ

²² ᐃᓔᓕ ᐃᓄᑐᖃᒻᒪᕆᐅᓕᓚᐅᕐᐳᖅ, ᑐᓴᖃᑦᑕᕐᓗᓂᓗ ᐃᕐᓂᖏᑕ ᐱᓂᐊᕐᓂᕆᖃᑦᑕᕐᑕᖏᓐᓂᒃ ᐃᓴᕆᐊᓕᒥᐅᓕᒫᓄᑦ, ᐊᕐᓇᓂᒡᓗ ᐱᖃᑎᖃᖃᑦᑕᕐᓂᖏᓐᓂᒃ ᐊᑕᓂᐅᑉ ᓇᔪᒐᖓᑕ ᑐᐱᐅᑉ ᐃᑎᕆᐊᕐᕕᖓᓂ ᐱᓇᓱᐊᕐᑎᐅᔪᓂᒃ.

²³ ᐅᖃᐅᑎᕔᒡᓗ, “ᖃᓄᐃᒻᒪᑦ ᑍᒤᓕᐅᖃᑦᑕᕐᐱᓰ? ᐅᖃᐅᑦᔭᐅᓯᒪᒐᒪ ᐊᔪᕐᑐᓕᓂᕆᖃᑦᑕᕐᑕᓕᒫᑦᓯᓐᓂᒃ ᐃᓄᖕᓄᑦ.

²⁴ ᑍᒤᓕᐅᕈᓐᓃᕆᑦᑎᒃ ᐃᕐᓂᒃᑳᒃ; ᑕᒪᓐᓇ ᐱᐅᖏᑦᑐᒻᒪᕆᐊᓗᒃ ᐊᑕᓂᐅᑉ ᐃᓄᖁᑎᖏᑕ ᐅᖃᐅᓯᕆᖃᑦᑕᓕᕐᒪᑦᔪᒃ.

²⁵ ᐃᓄᒃ ᐊᔪᕐᑐᓕᒃᐸᑦ ᐃᓅᖃᑎᒥᓄᑦ, ᒎᑎᐅᑉ ᓴᐳᑎᔪᓐᓇᕐᐹ; ᐊᑕᓂᕐᒧᓪᓕ ᐊᔪᕐᑐᓕᒃᐸᑦ, ᑭᓇᒧᑦ ᓴᐳᓐᓂᐊᕐᑕᐅᔪᓐᓇᕐᐹ?” ᓈᓚᓚᐅᓐᖏᓚᓪᓕ ᐊᑖᑕᖓᑕ ᐅᖃᐅᓯᖏᓐᓂᒃ; ᑕᕝᕙ ᐊᑕᓂᐅᑉ ᑐᖁᑦᓱᒪᓕᓚᐅᕐᐰᑦ.

²⁶ ᓱᕈᓯᕐᓕ ᓴᒧᐃᓕ ᑲᔪᓯᓪᓗᓂ ᐱᕈᕐᐸᓪᓕᐊᓚᐅᕐᐳᖅ ᐱᐅᒋᔭᐅᓕᕐᐸᓪᓕᐊᓪᓗᓂᓗ ᐊᑕᓂᕐᒧᑦ ᐃᓄᖕᓄᓪᓗ.

ᐅᖃᐅᓰᑦ ᓇᓚᐅᑦᑍᓃᑦ ᐃᓔᑉ ᐃᓚᖏᑦ ᐱᓪᓗᒋᑦ

²⁷ ᒎᑎᐅᓪᓗ ᐅᖃᕐᑎᖓ ᐃᓔᒧᐊᕐᐳᖅ ᐅᖃᕐᓗᓂᓗ: “ᐊᑕᓂᖅ ᐃᒫᒃ ᐅᖃᕐᐳᖅ, ‘ᐅᕙᓐᓂᒃ ᖃᐅᔨᔭᑎᓚᐅᕐᐳᖓ ᓯᕗᓕᑦᓯᓐᓄᑦ ᐂᕉᓂᒧᑦ ᐄᑦᔨᑉᑎᒦᑎᓪᓗᒋᑦ ᐰᕉᒧᑦ ᐊᐅᓚᑕᐅᑎᓪᓗᒋᑦ.

²⁸ ᑖᓐᓇ ᓂᕈᐊᓚᐅᕐᐸᕋ ᐃᓴᕆᐊᓕᒥᐅᓕᒫᓂᑦ ᑐᓂᕐᕈᓯᕐᑎᑦᓯᔨᐅᖁᓪᓗᒍ, ᑐᓂᕐᕈᓯᕐᕕᖁᑎᓐᓂ, ᐳᔪᕐᒥᒃ ᐃᑯᐊᓪᓔᔨᐅᖁᓪᓗᒍ ᑎᐱᑦᓯᐊᕆᒃᑐᒥᒃ, ᓴᒡᕕᖕᒥᐅᑕᒥᒡᓗ ᐊᑐᖃᑦᑕᖁᓪᓗᒍ ᓵᓐᓂ; ᓯᕗᓕᓯᓗ ᐱᔪᓐᓇᕐᑎᓚᐅᕐᐸᕋ ᑐᓂᕐᕈᑏᑦ ᐃᑯᐊᓪᓚᒃᑕᐅᔪᑦ ᐃᓚᖏᓐᓂᒃ ᐃᓴᕆᐊᓕᒥᐅᓂᑦ ᑐᓂᕐᕈᓯᕐᕕᖕᒥᑦ ᐱᖃᑦᑕᖁᓪᓗᒍ.

²⁹ ᓱᖕᒪᓪᓕ, ᐱᔪᒪᑐᓗᐊᖃᑦᑕᓕᕐᐱᓯ ᑐᓂᕐᕈᑎᒋᔭᐅᔪᓂᒃ ᐱᓇᓱᐊᕐᑕᐅᖁᓯᒪᔭᓐᓂᒃ ᐃᓄᖁᑎᓐᓄᑦ? ᖃᓄᐃᒻᒪ ᐃᕐᓂᑎᑦ ᐅᕙᓐᓂᑦ ᐅᐱᒋᓂᕐᓴᕆᕕᒋᑦ ᐃᒻᒥᖕᓂᒃ ᖁᐃᒃᓯᑎᑐᐃᓐᓇᓕᕐᒪᑕ ᑐᓂᕐᕈᑎᒋᔭᐅᔪᑦ ᐱᐅᓂᕐᐹᖏᓐᓂᒃ ᐱᕙᒃᓗᑎᒃ ᑐᓂᕐᕈᑎᒋᔭᐅᔪᓂᒃ ᐅᕙᓐᓄᑦ?’

³⁰ ᑍᒤᒻᒪᑦ ᐊᑕᓂᖅ ᐃᓴᕆᐊᓕᒥᐅᑉ ᒎᑎᖓ ᐃᒫᒃ ᓇᓗᓁᕐᓯᕗᖅ: ‘ᐅᕙᖓ, ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ, ᐊᖏᓚᐅᕐᐳᖓ ᑍᑦᓱᒪᓂ ᐃᓚᑎᑦ ᓯᕗᓕᑎᓪᓗ ᐱᔨᑦᓯᕐᑎᐅᖁᓪᓗᒋᑦ ᑐᓂᕐᕈᓯᕐᑎᑦᓯᔨᐅᓗᑎᒃ ᐃᓱᖃᖏᑦᑐᒧᑦ’; ᒫᓐᓇᓕ ᐊᑕᓂᖅ ᓇᓗᓁᕐᓯᓕᕐᐳᖅ: ‘ᑕᒪᓐᓇ ᑍᒤᓕᖓᓂᐊᕈᓐᓃᕐᐳᖅ; ᐃᒤᓕᖓᓂᐊᓕᕐᐳᕐᓕ, ᐅᕙᓐᓂᒃ ᐅᐱᒍᓱᒃᑐᑦ ᐅᐱᒋᓂᐊᕐᐸᒃᑲ, ᐅᕙᓐᓂᒡᓕ ᓇᕐᕈᔪᑦ ᓱᓇᐅᔪᓐᓃᕐᑎᓐᓂᐊᕐᐸᒃᑲ.

³¹ ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᕐᐳᑦ, ᐱᔪᓐᓇᕐᓃᑦ ᓇᑲᑦᓱᒫᕐᐸᕋ ᓯᕗᓕᕕᓪᓗ ᐃᒡᓗᖓᑕ ᐱᔪᓐᓇᕐᓂᖏᑦ, ᐃᓚᖕᓂ ᐃᓄᑐᖃᕐᑕᖃᓛᕈᓐᓃᕐᐳᖅ.

³² ᐅᖁᒤᑦᑐᒦᓪᓗᑎᑦ ᑕᑯᔪᒫᕐᐳᑎᑦ ᑐᓱᓗᑎᑦ ᒎᑎ ᐱᐅᔪᓂᒃ ᐱᓂᐊᕐᓂᖃᕐᑎᓪᓗᒍ ᐃᓴᕆᐊᓕᒥᐅᓂ; ᐃᓄᑐᖃᕈᕐᑐᖃᕈᒫᕈᓐᓃᕐᐳᖅ ᐃᓚᖕᓂ ᐃᓱᖃᖏᑦᑐᒧᑦ.

³³ ᐃᓄᖁᑎᕕᓪᓕ ᐃᓚᖏᑦ ᑐᖁᓐᖏᑕᒃᑲ ᑐᓂᕐᕈᓯᕐᕕᖁᑎᓐᓂ ᐃᔨᕕᑦ ᑕᑯᔪᒫᕐᐰᑦ ᐆᒻᒪᑎᕕᓪᓗ ᕿᒃᓴᐅᑎᒋᔪᒫᕐᐰᑦ; ᐃᓚᓕᒫᕕᓪᓗ ᑭᖑᕚᖏᑦ ᐃᓐᓇᕈᕐᑐᖃᖏᓪᓗᑎᒃ ᑐᖁᔪᒫᕐᐳᑦ.

³⁴ ᐅᓇ ᓇᓗᓁᒃᑯᑕᐅᔪᒫᕐᐳᖅ ᐃᕐᓃᒃᑭᒃ, ᕼᐅᐱᓂ ᐱᓂᕼᐋᔅᓗ, ᐃᓕᖕᓄᑦ ᓇᓗᓁᒃᑯᑕᐅᔪᒫᕐᐴᒃ; ᐅᓪᓗᕐᒥ ᐊᑕᐅᓯᕐᒥ ᑐᖁᔪᒫᕐᐴᒃ, ᐊᑕᐅᑦᓯᒃᑯᑦ.

³⁵ ᒪᑭᑎᑦᓯᔪᒫᕐᐳᖓ ᑐᓂᕐᕈᓯᕐᑎᑦᓯᔨᒥᒃ ᐅᒃᐱᕐᓇᑦᓯᐊᕐᑐᒥᒃ ᐆᒻᒪᑎᒪ ᐊᑐᖁᔭᖏᓐᓂᒃ ᐃᓱᒪᒋᔭᓐᓂᒡᓗ ᐊᑐᕈᓐᓇᑦᓯᐊᕐᑐᒥᒃ; ᑖᓐᓇᓗ ᑭᖑᕚᖃᕐᑎᑦᓱᒫᕐᐸᕋ ᐱᐅᔪᓂᒃ, ᐃᓅᔪᒫᕐᐳᕐᓗ ᐃᑎᖃᑦᑕᕐᓗᓂ ᐊᓂᖃᑦᑕᕐᓗᓂᓗ ᓂᕈᐊᕐᓯᒪᔭᒪ ᓵᖓᓂ ᐃᓱᖃᖏᑦᑐᒧᑦ.

³⁶ ᓇᓪᓕᐊᑦ ᐃᒡᓗᖕᓂ ᐊᒥᐊᒃᑰᔪᖅ ᑖᑦᓱᒪ ᓵᖓᓄᑦ ᐹᒻᒪᒃᑎᕈᒫᕐᐳᖅ ᓯᐅᓪᕕᕆᒧᑦ ᐅᕝᕙᓗ ᓂᐊᖂᔭᒧᑦ ᐊᑕᐅᓯᕐᒧᑦ, ᐅᖃᕐᓗᓂᓗ, “ᕿᓄᕗᖓ ᑐᓂᕐᕈᓯᕐᑎᑦᓯᔨᓄᑦ ᐃᓚᓕᐅᑎᓚᐅᓐᖓ, ᓂᐊᖂᔭᒥᒃ ᑐᓂᕐᕈᑕᐅᓯᒪᔪᓂᒃ ᓂᕆᔪᓐᓇᖁᓪᓗᖓ.”’”