ᓴᒧᐃᓕ ᓯᕗᓪᓖᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᓴᐅᓕᒧᑦ ᑐᖁᑕᐅᓇᓱᖕᓂᖓ

¹ ᓴᐅᓕᐅᑉ ᐃᕐᓂᓂ ᔫᓇᑕᓂ ᐊᖓᔪᖅᑲᐅᔪᖁᑎᓂᓗ ᐅᖃᐅᑎᕔᑦ ᑍᕕᑎᒥᒃ ᑐᖁᑦᓯᖁᓪᓗᒋᑦ. ᔫᓇᑕᓂᓕ ᑍᕕᑎᒥᒃ ᖁᕕᐊᒋᔭᖃᒻᒪᕆᓚᐅᕐᐳᖅ,

² ᔫᓇᑕᓂᓗ ᑍᕕᑎᒧᑦ ᐅᖃᕐᐳᖅ, “ᓴᐅᓕᐅᑉ ᐊᑖᑕᒪ ᑐᑯᓐᓇᓱᐊᕐᐹᑎᑦ; ᑍᒤᒻᒪᑦ ᐃᓕᖕᓂᒃ ᖃᐅᔨᓴᑦᓯᐊᕆᑦ ᐅᓪᓛᓐᖑᓚᐅᕐᑎᓐᓇᒍ, ᐃᔨᕐᓯᒪᓂᐊᕐᐳᑎ ᖃᐅᔨᒪᔭᐅᖏᑦᑐᒥ ᑍᑲᓃᖏᓐᓇᕐᓗᑎᓪᓗ;

³ ᐊᑖᑕᒪ ᓴᓂᐊᓂ ᓇᖏᓛᕐᐳᖓ ᐱᕈᕐᓰᕕᖕᒥ ᐃᔨᕐᓯᒪᕕᒋᔭᕐᓂ, ᐅᖃᖃᑎᒋᓛᕐᐸᕋᓗ ᐃᓕᖕᓂᒃ; ᖃᐅᔨᒍᒪᓗ ᓱᓇᑐᐃᓐᓇᒥᒃ ᖃᐅᔨᑎᓚᕐᐸᒋᑦ.”

⁴ ᔫᓇᑕᓂᐅᑉ ᑍᕕᑎ ᐅᐱᒋᑦᓯᐊᕐᓗᒍ ᐊᑖᑕᒥᓄᑦ ᓴᐅᓕᒧᑦ ᐅᖃᐅᑎᒋᕚ, ᐅᖃᐅᑎᓪᓗᒍᓗ, “ᐊᖓᔪᖅᑳᕐᔪᐊᖅ ᐊᔪᕐᑐᓕᑦᑍᓕᓕ ᑍᕕᑎ ᐱᔨᓂ ᐱᓪᓗᒍ; ᐃᓕᖕᓄᑦ ᐊᔪᕐᑐᓕᓚᐅᖏᒻᒪᑦ, ᐱᓇᓱᐊᕐᓯᒪᔭᓕᒫᖏᓪᓗ ᐃᑲᔪᕐᓯᒪᓪᓗᑎᒃ ᐃᓕᖕᓂᒃ;

⁵ ᐃᒻᒥᓂᒃ ᐃᓅᓯᕐᒥᓂᒃ ᐊᓐᓂᕈᓱᓚᐅᓐᖏᓚᖅ ᑐᖁᑦᓯᔭᕐᑐᕐᑎᓪᓗᒍ ᐱᓕᔅᑍᓂᒥᐅᑕᕐᒥᒃ, ᐊᑕᓂᕐᓗ ᐊᖏᔪᕐᔪᐊᒥᒃ ᐱᐅᓕᒃᓯᓚᐅᕐᐳᖅ ᐃᓴᕆᐊᓕᒥᐅᓂᒃ. ᑕᑯᒐᕕᑦ, ᖁᕕᐊᓱᓚᐅᕐᐳᑎᑦ; ᓱᖕᒪᓪᓕ ᒫᓐᓇ ᐊᔪᕐᑐᓕᔪᒪᕖᑦ ᐊᐅᖕᒥᒃ ᐸᓯᔭᒃᓴᐅᖏᑦᑐᒥᒃ ᑐᖁᑦᓯᔪᒪᓪᓗᑎᑦ ᑍᕕᑎᒥᒃ ᐱᑦᔪᑎᒃᓴᖃᖏᑦᓯᐊᕐᓗᑎᑦ?”

⁶ ᓴᐅᓕᐅᓪᓗ ᔫᓇᑕᓂᐅᑉ ᐅᖃᐅᓯᖏᑦ ᓈᓚᓚᐅᕐᐰᑦ, ᐊᖏᒻᒪᕆᒃᐳᕐᓗ ᐅᖃᕐᓗᓂ, “ᐊᑕᓂᖅ ᐃᓅᖕᒪᑦ, ᑍᕕᑎ ᑐᖁᑕᐅᔪᒃᓴᐅᓐᖏᓚᖅ.”

⁷ ᔫᓇᑕᓂᐅᓪᓗ ᑍᕕᑎ ᕾᖁᕚ, ᐅᖃᐅᑎᓪᓗᒍᓗ ᑕᒪᒃᑯᓂᖓᓕᒫᖅ ᐱᓂᐊᕐᓂᐅᓯᒪᔪᓂᒃ. ᔫᓇᑕᓂᐅᓪᓗ ᑍᕕᑎ ᓴᐅᓕᒧᐊᕈᑎᕚ, ᑍᕕᑎᓗ ᐱᔨᑦᓯᓕᕐᐳᖅ ᐊᖓᔪᖅᑳᕐᔪᐊᕐᒥᒃ ᑍᒤᓚᐅᕋᒥᑐᑦ ᓯᕗᓂᐊᖓᒍᑦ.

⁸ ᐅᓇᑕᕐᓂᕐᓗ ᐱᒋᐊᒃᑲᓐᓂᕐᐳᖅ; ᑍᕕᑎᓗ ᐅᓇᑕᕆᐊᕐᐳᖅ ᐱᓕᔅᑍᓂᒥᐅᓂᒃ, ᐅᓄᕐᑐᕐᔪᐊᓂᒡᓗ ᑐᖁᕅᕗᑦ, ᑖᒃᑯᐊᓗ ᕿᒫᕗᑦ ᑖᑦᓱᒥᖓᑦ.

⁹ ᑕᕝᕙ ᐊᓂᕐᓂᕐᓗᒃ ᐊᑕᓂᕐᒥᑦ ᐱᔪᖅ ᓴᐅᓕᒥᒃ ᐊᐅᓚᑦᓯᓕᕆᕗᖅ, ᐃᒡᓗᒥᓂ ᐃᒃᓯᕙᓪᓗᓂ ᖃᓗᒋᐊᕐᒥᒃ ᑎᒍᒥᐊᓚᐅᕐᐳᖅ; ᑍᕕᑎᓗ ᑕᕝᕙᓂ ᕼᐊᕐᐱᒥᓄᑦ ᑯᑭᑦᑕᐹᓚᐅᕐᐳᖅ.

¹⁰ ᓴᐅᓕᐅᓪᓗ ᑲᐱᒋᐊᕐᐹ ᖃᓗᒋᐊᕐᒥᓄᑦ ᐊᑭᓐᓇᒧᑦ ᑲᐳᒻᒥᑖᕈᒪᓪᓗᒍ; ᑍᕕᑎᓕ ᐊᒡᕖᕐᐳᖅ, ᖃᓗᒋᐊᕐᓗ ᑲᑉᐳᑎᕗᖅ ᐊᑭᓐᓇᒧᑦ. ᑍᕕᑎᓗ ᕿᒪᒃᓯᕗᖅ, ᐊᓐᓇᒃᓗᓂᓗ ᑖᑦᓱᒪᓐᖓᑦ.

¹¹ ᓴᐅᓕᓗ ᐅᖃᕆᐊᕐᑐᕐᑎᑦᓯᕗᖅ ᖃᐅᔨᓴᕐᑕᐅᖁᓪᓗᒍ ᑍᕕᑎᐅᑉ ᐃᒡᓗᖓ, ᑐᖁᑦᓯᖁᓪᓗᒋᑦ ᖃᐅᓕᕐᐸᑦ ᐅᓪᓛᒃᑯᑦ. ᒤᑲᓕᐅᓪᓕ ᑍᕕᑎᐅᑉ ᓄᓕᐊᖓᑕ, ᑍᕕᑎ ᐅᖃᐅᑎᕚ, “ᐅᓐᓄᒃ ᕿᒪᒃᓯᓂᐊᖏᒃᑯᕕᑦ, ᖃᐅᒃᐸᑦ ᑐᖁᑕᐅᓛᓕᕐᐳᑎᑦ.”

¹² ᑕᕝᕙ ᒤᑲᓕᐅᑉ ᑍᕕᑎ ᐊᖅᑲᕐᑎᑉᐹ ᐃᒐᓛᒃᑯᑦ; ᕿᒪᒃᓯᕗᕐᓗ ᐊᓐᓇᒃᓗᓂ ᑐᖁᑦᓯᓇᓱᒃᑐᓂᑦ.

¹³ ᒤᑲᓪᓗ ᐃᓄᓐᖑᐊᒥᒃ ᑎᒍᓯᓪᓗᓂ, ᐃᓕᕚ ᐃᒡᓕᖓᓄᑦ ᒎᑦᓯᐅᓪᓗ ᒥᖁᐊᓂᒃ ᐊᑭᓯᐊᓄᐊᕐᓯᓪᓗᓂ, ᐅᓕᒃᓱᕐᓗᒍᓗ ᐊᓐᓄᕌᓄᑦ.

¹⁴ ᓴᐅᓕᐅᑉ ᐅᖃᕆᐊᕐᑐᕐᑎᑕᖏᑦ ᕾᖕᒪᑕ ᑍᕕᑎᒥᒃ ᐂᒃᓯᕋᓱᒃᑐᑦ, ᒦᑲᐅᑉ ᐅᖃᐅᑎᕔᑦ, “ᑍᕕᑎ ᖃᓂᒪᕗᖅ.”

¹⁵ ᓴᐅᓕᐅᓪᓗ ᐱᔨᓂ ᑎᓕᒃᑲᓐᓂᕐᐰᑦ ᑕᑯᔭᕐᑐᖁᓪᓗᒋᑦ ᑍᕕᑎᒥᒃ, ᐅᖃᕐᓗᓂ, “ᐃᒡᓕᖓᓃᑎᓪᓗᒍ ᑕᒪᐅᓐᖓᐅᑎᓂᐊᕐᐸᓯ ᑐᖁᓐᓂᐊᕋᒃᑯ.”

¹⁶ ᑎᓕᔭᐅᓯᒪᔪᑦ ᐂᒐᒥᒃ ᑕᑯᕗᑦ ᐃᓄᓐᖑᐊᒥᒃ ᐃᒡᓕᕐᒦᑦᑐᒥᒃ, ᒎᑦᓯᐅᓪᓗ ᒥᖅᑯᐊᓂᒃ ᓂᐊᖁᓐᖑᐊᓕᕐᓯᒪᔪᒥᒃ.

¹⁷ ᓴᐅᓕ ᒤᑲᓪᒧ ᐅᖃᕐᐳᖅ, “ᓱᖕᒪᑦ ᑍᒫᒃ ᓯᓔᕐᕆᓚᐅᕐᐱᖔ, ᑍᒫᒃ ᐊᑭᕋᕋ ᕿᒪᒃᓯᑎᓪᓗᒍ?” ᒤᑲᓕᐅᑉ ᓴᐅᓕ ᑭᐅᕚ, “ᐅᖃᐅᑎᓚᐅᕐᐹᖓ, ‘ᐊᓂᑎᓚᐅᓐᖓ; ᑐᖁᓐᓂᐊᖏᓐᓇᒃᑭᑦ.’”

¹⁸ ᑍᕕᑎᓕ ᕿᒪᒃᓯᕗᖅ ᐊᓐᓇᒃᓗᓂᓗ ᑖᒃᑯᓇᓐᖓᑦ, ᓴᒧᐃᓕᒧᐊᕐᐳᕐᓗ ᕌᒪᒦᑦᑐᒧᑦ ᐅᖃᐅᑎᓪᓗᒍᓗ ᓴᐅᓕᐅᑉ ᐱᓂᐊᕐᓂᕆᓚᐅᕐᑕᓕᒫᖏᓐᓂᒃ. ᑕᕝᕙ ᓴᒧᐃᓕᒃᑯᒃ ᐂᕘᒃ ᓁᐅᑎᒧᑦ ᑕᕝᕙᓃᓕᕐᓗᑎᒡᓗ.

¹⁹ ᓴᐅᓕᓗ ᐅᖃᐅᑦᔭᐅᕗᖅ, “ᑕᑯᒋᑦ, ᑍᕕᑎ ᓁᐅᑎᒦᑉᐳᖅ ᕌᒪᒦᑦᑐᒥ.”

²⁰ ᑕᕝᕙ ᓴᐅᓕ ᑎᓕᓯᕗᖅ ᑎᒍᔭᐅᔭᕐᑐᖁᓪᓗᒍ ᑍᕕᑎ; ᒎᑎᐅᓪᓕ ᐅᖃᕐᑎᖏᓐᓂᒃ ᑕᑯᒐᒥᒃ ᓇᓚᐅᑦᑍᓪᓗᑎᒃ ᕾᒐᓛᕐᑐᓂᒃ, ᓴᒧᐃᓕᓗ ᓇᖏᖃᑕᐅᓪᓗᓂ ᑕᓯᐅᕐᑎᐅᑎᓪᓗᒍ, ᑕᕝᕙ ᒎᑎᐅᑉ ᐊᓂᕐᓂᖓᑕ ᑎᑭᕝᕕᒋᕔᑦ ᓴᐅᓕᐅᑉ ᑎᓕᓯᒪᔭᖏᑦ, ᑖᒃᑯᐊᑦᑕᐅᖅ ᓇᓚᐅᑦᑍᖃᑕᐅᓕᕐᐳᑦ.

²¹ ᓴᐅᓕ ᐅᖃᐅᑦᔭᐅᒐᒥ ᑕᒪᑐᒥᖓ, ᑎᓕᓯᒋᐊᓪᓚᒃᐳᖅ ᑍᑯᖓ, ᑖᒃᑯᐊᑦᑕᐅᖅ ᓇᓚᐅᑦᑍᖃᑕᐅᓕᕆᕗᑦ. ᐱᖓᔪᐊᓐᓂᒡᓗ ᓴᐅᓕ ᑎᓕᓯᒋᕗᖅ, ᑖᒃᑯᐊᑦᑕᐅᖅ ᓇᓚᐅᑦᑍᖃᑕᐅᓕᕆᕗᑦ.

²² ᑕᕝᕙ ᐃᒻᒥᓂᒃ ᕌᒪᒧᐊᕆᕗᖅ, ᐃᒥᕐᑕᕐᕕᖕᒧᓪᓗ ᓰᑯᒦᑦᑐᒧᑦ ᐊᖏᔪᒧᑦ ᑎᑭᑉᐳᖅ; ᐊᐱᕆᓪᓗᓂᓗ, “ᓴᒧᐃᓕᒃᑯᒃ ᑍᕕᑎᒃᑯᒃ ᓇᓃᑉᐹᒃ?” ᐅᖃᐅᑦᔭᐅᕗᖅ, “ᑕᑯᒋᑦ, ᓁᐅᑎᒦᑉᐴᒃ ᕌᒪᒥ.”

²³ ᑍᑯᓐᖓᓗ ᐂᕗᖅ ᓁᐅᑎᒧᑦ ᕌᒪᒦᑦᑐᒧᑦ; ᒎᑎᐅᓪᓗ ᐊᓂᕐᓂᖓᑕ ᑎᑭᕝᕕᒋᓚᐅᕆᕚ, ᑖᓐᓇᓗ ᓇᓚᐅᑦᑍᖃᑕᐅᓕᕆᕗᖅ ᕌᒪᒧᑦ ᑎᑭᓚᐅᖏᓐᓂᕐᒥᓂ.

²⁴ ᐊᓐᓄᕅᔭᕐᓗᓂᓗ ᓇᓚᐅᑦᑍᖃᑕᐅᓕᕆᕗᖅ ᓴᒧᐃᓕᐅᑉ ᓵᖓᓂ, ᐅᓪᓗᓕᒫᕐᓗ ᐅᓐᓄᐊᓕᒫᕐᓗ ᓇᓚᓚᐅᕐᐳᖅ ᑕᕝᕙᓂ ᐊᓐᓄᕌᖃᕋᓂ. ᑍᒤᒻᒪᑦ ᐅᖃᕐᑐᖃᓕᕐᐳᖅ, “ᓴᐅᓕ ᐊᒡᓛᑦ ᒎᑎᒧᑦ ᐅᖃᕐᑎᐅᖃᑕᐅᓕᕆᕚ?”