ᓴᒧᐃᓕ ᓯᕗᓪᓖᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᓴᐅᓕ ᐅᖃᖃᑎᒋᔭᕇᕋᒥᐅᒃ, ᑭᖑᓂᖓᒍᑦ, ᔫᓇᑕᓂᐅᑉ ᑕᕐᓂᖓ ᐃᓚᓕᐅᑎᕗᖅ ᑍᕕᑎᐅᑉ ᑕᕐᓂᖓᓄᑦ, ᔫᓇᑕᓂᐅᓪᓗ ᓇᒡᓕᒋᓕᕐᐹ ᓇᖕᒥᓂᖅ ᑕᕐᓂᕐᒥᑐᑦ.

² ᓴᐅᓕᐅᓪᓗ ᐅᓪᓗᒥ ᑍᑦᓱᒪᓂ ᑍᕕᑎ ᑎᒍᕚ, ᐊᖏᕐᕋᕐᑎᑦᓱᓐᓃᕐᐹᓗ ᐊᑖᑕᖓᑕ ᐃᒡᓗᖓᓄᑦ.

³ ᑕᕝᕙ ᔫᓇᑕᓂᒃᑯᒃ ᑍᕕᑎᒃᑯᒃ ᐊᖏᖃᑎᒌᒍᑎᓕᐅᕐᐴᒃ, ᓇᒡᓕᒋᓚᐅᕋᒥᐅᒃ ᓇᖕᒥᓂᖅ ᑕᕐᓂᕐᒥᑐᑦ.

⁴ ᔫᓇᑕᓂᐅᑉ ᐅᓕᒡᔪᐊᓂ ᐊᑐᕐᑕᓂ ᐲᕐᐹ ᑐᓂᓪᓗᒍᓗ ᑍᕕᑎᒧᑦ, ᓴᐴᓗᑕᓂᓗ ᓴᒡᕕᖕᒥᐅᑕᓂ, ᓴᕕᒡᔪᐊᓂᓗ, ᐱᑎᒃᓯᓂᓗ, ᕿᑎᕉᑎᓂᓗ.

⁵ ᑍᕕᑎᓗ ᐂᖃᑦᑕᓚᐅᕐᐳᖅ ᓴᐅᓕᐅᑉ ᑎᓕᓯᑦᔪᑎᒋᔭᖏᓐᓄᑦ ᓇᒧᑐᐃᓐᓇᖅ ᐱᔪᓐᓇᑦᓯᐊᕐᐸᒡᓗᓂ, ᓯᓚᑐᓂᖃᑦᓯᐊᕐᓗᓂᓗ; ᑍᒤᒻᒪᑦ ᓴᐅᓕᐅᑉ ᐊᖓᔪᖅᑳᕈᕐᑎᑉᐹ ᐅᓇᑕᕐᑐᒃᓴᖁᑎᒥᓄᑦ. ᓴᐅᓕᐅᓪᓗ ᐃᓄᖁᑎᖏᑕ ᐊᖓᔪᖅᑳᖁᑎᖏᑕᓗ ᑕᒪᓐᓇ ᖁᕕᐊᒋᑦᓯᐊᓚᐅᕐᐹᑦ.

ᓴᐅᓕᐅᑉ ᐱᔨᓗᒃᓴᕐᓂᖓ–ᓯᒡᒐᑦᔨᓂᖓ ᑍᕕᑎᒥᒃ

⁶ ᑍᕕᑎ ᐅᑎᓕᕐᑎᓪᓗᒍ ᑐᖁᑦᓯᓚᐅᕐᓗᓂ ᐱᓕᔅᑍᓂᒥᐅᒥᒃ ᐅᓇᑕᕐᑐᒃᓮᓪᓗ ᐃᓚᒋᓪᓗᒋᑦ, ᐊᕐᓁᑦ ᐃᓴᕆᐊᓕᒥᐅᑦ ᓄᓇᖓᓃᑦᑐᑦ ᐸᕐᕆᐊᕐᐳᑦ ᐊᖓᔪᖅᑳᕐᔪᐊᒥᒃ ᓴᐅᓕᒥ, ᖁᕕᐊᓇᕐᑐᓂᒃ ᐃᓐᖏᕐᓗᑎᒃ, ᑖᓂᓯᕐᓗᑎᒡᓗ, ᓂᓪᓕᐊᑎᑦᓯᓪᓗᑎᒡᓗ ᓯᕙᓂᕈᑎᓂᒃ ᑯᑭᑦᑕᐸᐅᑎᓂᒡᓗ.

⁷ ᖁᕕᐊᓲᑎᖃᓪᓗᑎᒃ ᐊᕐᓁᑦ ᐃᓐᖏᕐᐳᑦ, “ᓴᐅᓕ ᑐᖁᑦᓯᓚᐅᕐᐳᖅ 1,000ᓂᒃ, ᑍᕕᑎᓕ ᑐᖁᑦᓯᓚᐅᕐᐳᖅ 10,000ᓂᒃ.”

⁸ ᓴᐅᓕᐅᑉ ᑕᒪᓐᓇ ᖁᕕᐊᒋᓐᖏᓛ, ᓂᓐᖓᒃᓗᓂᓗ ᐅᖃᕐᐳᖅ, “ᑍᕕᑎᒥᒃ ᑐᖁᑦᓯᓂᕅᕗᑦ 10,000ᓂᒃ, ᐅᕙᓐᓂᓪᓕ 1,000ᓂᒃ; ᓱᓇᒦᒃ ᐱᒃᑲᓐᓂᕐᑐᒃᓴᐅᕚ ᐊᖓᔪᖅᑲᐅᕕᖕᒥᒃ ᑭᓯᐊᓂ?”

⁹ ᓴᐅᓕᐅᓪᓗ ᑍᕕᑎ ᐃᒃᐱᒌᓐᓇᓕᕐᐹ ᓯᒡᒐᑎᓪᓗᒍ ᐅᓪᓗᒥᑦ ᑕᕝᕙᓐᖓᑦ ᐱᒋᐊᕐᓗᓂ.

¹⁰ ᖃᐅᑎᓪᓗᒍ ᐊᓂᕐᓂᕐᓗᖕᒧᑦ ᒎᑎᒥᑦ ᐱᔪᒥᑦ ᓴᐅᓕ ᐊᐅᓚᑕᐅᓕᕐᐳᖅ, ᐃᒡᓗᒥᓂᓗ ᐱᓇᓱᐊᓕᕐᐳᖅ ᑐᑭᖃᑦᓯᐊᖏᑦᑐᑎᑐᑦ, ᑍᕕᑎ ᑯᑭᑦᑕᐹᓚᐅᕐᐳᖅ ᕼᐊᕐᐱᒧᑦ ᑍᒤᑉᐸᒃᑲᒥ ᖃᐅᑕᒫᑦ. ᓴᐅᓕᓕ ᑎᒍᒥᐊᓚᐅᕐᐳᖅ ᖃᓗᒋᐊᒥᓂᒃ;

¹¹ ᓴᐅᓕ ᐃᓱᒪᖃᕐᓗᓂ, “ᐊᑭᓐᓇᒧᑦ ᐳᑐᒻᒥᑖᕐᓗᒍ ᐸᐅᒍᐊᕐᓂᐊᕐᐸᕋ,” ᑲᐱᒋᐊᕐᐹᓗ ᖃᓗᒋᐊᕐᒧᑦ ᒪᕐᕉᐊᕐᑎᕐᓗᓂ; ᑍᕕᑎᓕ ᐊᒡᕖᖃᑦᑕᓚᐅᕐᐳᖅ ᑕᒪᖏᖕᓄᑦ.

¹² ᓴᐅᓕᐅᑉ ᑍᕕᑎ ᑲᑉᐱᐊᒋᓕᕐᐹ, ᐊᑕᓂᕐᒧᑦ ᓇᔪᕐᑕᐅᓂᖓᓄᑦ ᐃᒻᒥᓂᒡᓗ ᕿᒪᒃᑕᐅᓯᒪᓕᕐᓂᕐᒥᓄᑦ ᐊᑕᓂᕐᒧᑦ.

¹³ ᑕᕝᕙ ᓴᐅᓕᐅᑉ ᓇᔪᕐᑕᒥᓃᑦᓱᓐᓃᕐᑎᑉᐹ, ᐊᖓᔪᖅᑳᓐᖑᕐᑎᓪᓗᒍᓗ ᐅᓇᑕᕐᑎᓄᑦ 1,000ᓄᑦ; ᐊᐅᓪᓚᖃᑦᑕᓚᐅᕐᐳᖅ ᑎᑭᑉᐸᒡᓗᓂᓗ ᐃᓄᐃᑦ ᓯᕗᓕᕐᓗᒋᑦ.

¹⁴ ᑍᕕᑎᓗ ᐱᔪᓐᓇᑦᓯᐊᖃᑦᑕᓚᐅᕐᐳᖅ ᐱᓇᓱᐊᕐᑕᓕᒫᒥᓂᒃ; ᐊᑕᓂᐅᑉ ᐃᓚᒋᓚᐅᕐᒪᒍ.

¹⁵ ᓴᐅᓕᓗ ᖃᐅᔨᒐᒥ ᑍᕕᑎᐅᑉ ᐱᔪᓐᓇᑦᓯᐊᖃᑦᑕᕐᓂᖓᓂᒃ ᐱᓇᓱᐊᕐᑕᓕᒫᒥᓂᒃ, ᑕᐰᑦᓯᐊᓚᐅᕐᐳᖅ ᑲᑉᐱᐊᒋᒋᐊᓪᓚᓕᕐᓗᒍᓗ.

¹⁶ ᐃᓴᕆᐊᓕᒥᐅᓕᒫᓪᓕ ᔫᑕᒥᐅᓪᓗ ᐱᓐᓇᕈᓱᓕᓚᐅᕐᐳᑦ ᑍᕕᑎᒥᒃ; ᑕᓯᐅᕐᑎᑦᓯᐊᕙᐅᓂᖓᓄᑦ ᐊᐅᓪᓚᕐᑎᓪᓗᒋᑦ ᐅᑎᕐᑎᓪᓗᒋᓪᓗ.

ᑍᕕᑎᐅᑉ ᓄᓕᐊᕐᑖᕐᓂᖓ ᓴᐅᓕᐅᑉ ᐸᓂᖓᓂᒃ ᒦᑲᓪᒥᒃ

¹⁷ ᑕᕝᕙ ᓴᐅᓕ ᐅᖃᕐᐳᖅ ᑍᕕᑎᒧᑦ, “ᐅᓇ ᐸᓂᒐ ᐊᖓᔪᒃᓯᖅ ᒥᕋᑉ; ᐃᓕᖕᓄᑦ ᑐᓂᔭᕋ ᓄᓕᐊᕐᑖᖑᖁᓪᓗᒍ, ᓯᕘᕋᖏᓪᓗᑎᑦ ᐅᓇᑕᕐᓂᐊᕈᕕᑦ, ᐊᑕᓂᐅᑉ ᐅᓇᑕᕐᓂᖓᓂᒃ.” ᓴᐅᓕ ᐃᓱᒪᖃᓚᐅᕋᒥ, “ᐱᔪᓐᓇᕐᓂᓐᓄᑦ ᑖᑦᓱᒥᖓ ᐱᓇᓱᐊᖏᓪᓗᖓ, ᐱᓕᔅᑍᓂᒥᐅᓪᓕ ᐱᔪᓐᓇᕐᓂᖏᑦ ᐱᓇᓱᐊᖔᓕᕐᓕᑦ ᑖᑦᓱᒥᖓ.”

¹⁸ ᑍᕕᑎᓗ ᐅᖃᕐᐳᖅ ᓴᐅᓕᒧᑦ, “ᐱᓪᓚᕆᐅᖏᑦᑐᖓᓕ, ᐊᑖᑕᒪᓗ ᐃᓚᖏᑦ ᐱᓪᓚᕆᐅᖏᓐᓂᕗᑦ ᐃᓴᕆᐊᓕᒥ, ᓂᖓᐅᑖᕆᔭᒃᓴᐅᓐᖏᓚᖓ ᐊᖓᔪᖅᑳᕐᔪᐊᕐᒧᑦ.”

¹⁹ ᒥᕋᑉᓕ ᓴᐅᓕᐅᑉ ᐸᓂᖓᑕ ᑐᓂᔭᐅᕕᒃᓴᖓ ᓇᓪᓕᐅᑎᓯᒪᓕᕐᑎᓪᓗᒍ ᑍᕕᑎᒧᑦ, ᑐᓂᔭᐅᖔᕐᐳᖅ ᐊᖑᒻᒧᑦ ᐊᑦᕆᐅᓪᒧᑦ ᒥᕼᐅᓚᑍᑎᒥᐅᑕᕐᒧᑦ.

²⁰ ᓴᐅᓕᐅᑉ ᐸᓂᖓ ᒤᑲᓪ ᐱᐅᒃᓴᓚᐅᕐᐳᖅ ᐅᖓᒋᓕᕐᓗᒍᓗ ᑍᕕᑎ; ᓴᐅᓕᓗ ᐅᖃᐅᑦᔭᐅᕗᖅ ᑕᒪᑐᒥᖓ, ᓴᐅᓕᓗ ᑐᓴᕋᒥ ᖁᕕᐊᓲᑎᖃᓚᐅᕐᐳᖅ.

²¹ ᐃᓱᒪᖃᕐᓗᓂ, “ᒤᑲᓪ ᑍᕕᑎᒧᑦ ᑐᓂᓂᐊᕐᐸᕋ; ᑖᓐᓇ ᐊᑐᕐᓗᒍ ᐱᕖᕈᑎᑎᓐᓂᐊᕋᒃᑯ, ᐱᓕᔅᑍᓂᒥᐅᓪᓗ ᐊᖅᑯᑎᒋᓗᒋᑦ ᑐᖁᑕᐅᑎᓐᓂᐊᕋᒃᑯ.” ᑍᒤᒻᒪᑦ ᓴᐅᓕᐅᑉ ᑍᕕᑎ ᐅᖃᐅᑎᓕᕆᕚ, “ᒫᓐᓇ ᓂᖓᐅᑖᕆᔭᒃᓴᕆᓕᕐᐸᒋᑦ.”

²² ᓴᐅᓕᐅᓪᓗ ᐱᔨᓂ ᐊᖓᔪᖅᑲᐅᔪᑦ ᐱᖁᕔᑦ, “ᑍᕕᑎ ᐅᖃᐅᑎᓯᐅᒃ ᐃᓄᑑᖃᑎᒋᓗᒍ ᐅᖃᐅᑎᓗᒍ, ‘ᑕᑯᒋᑦ, ᐊᖓᔪᖅᑳᕐᔪᐊᑉ ᖁᕕᐊᒋᕚᑎᑦ, ᐊᖓᔪᖅᑲᐅᔪᖁᑎᖏᑕᓗ ᓇᒡᓕᒋᕚᑎᑦ; ᑍᒤᒻᒪᑦ ᒫᓐᓇ ᐊᖓᔪᖅᑳᕐᔪᐊᕐᒧᑦ ᓂᖓᐅᑖᕆᔭᐅᓕᕆᑦ.’”

²³ ᓴᐅᓕᐅᓪᓗ ᐱᔨᖏᑦ ᑍᒫᒃ ᑍᕕᑎᒧᑦ ᐅᖃᓚᐅᕐᐳᑦ. ᑍᕕᑎᐅᓪᓗ ᑭᐅᕔᑦ, “ᐅᖅᑭᑦᑑᓇᓱᒋᕕᓯᐅᒃ ᐊᖓᔪᖅᑳᕐᔪᐊᕐᒧᑦ ᓂᖓᐅᑖᕆᔭᐅᓗᓂ, ᑕᑯᒋᑦ ᐊᔪᕐᓴᕐᑑᔪᖓ ᐅᐱᓐᓇᕐᑑᓇᖓᓗ.”

²⁴ ᓴᐅᓕᐅᓪᓗ ᐱᔨᖏᑦ ᓴᐅᓕᒧᑦ ᐅᑎᕋᒥᒃ ᐅᖃᕐᐳᑦ, “ᑍᕕᑎ ᑍᒫᒃ ᐅᖃᓚᐅᕐᐳᖅ.”

²⁵ ᑕᕝᕙ ᓴᐅᓕᐅᑉ ᐅᖃᐅᑎᕔᑦ, “ᐃᒫᒃ ᑍᕕᑎ ᐅᖃᐅᑎᓯᐅᒃ, ‘ᐊᖓᔪᖅᑳᕐᔪᐊᖅ ᑐᓂᓯᕕᐅᔪᒪᓐᖏᓚᖅ ᐊᑭᓕᐅᑎᒃᓴᓂᒃ ᓄᓕᐊᒃᓴᒧᑦ ᐃᒫᖔᕐᓕ ᐱᓇᓱᐊᖁᔨᕗᖅ ᐱᓕᔅᑍᓂᒥᐅᑦ 100ᐃᑦ ᐅᓕᕝᕙᖏᓐᓂᒃ ᐱᔪᒪᕗᖅ, ᐊᑭᕋᖏᓐᓄᑦ ᐊᑭᓂᐊᕈᑎᒃᓴᐅᖁᓪᓗᒋᑦ.’” ᑍᒫᒃ ᓴᐅᓕ ᐃᓱᒪᖃᓚᐅᕐᐳᖅ ᑍᕕᑎ ᑐᖁᑕᐅᔪᓐᓇᖁᓪᓗᒍ ᐱᓕᔅᑍᓂᒥᐅᓄᑦ.

²⁶ ᓴᐅᓕᐅᑉ ᐊᖓᔪᖅᑳᖁᑎᖏᑦ ᑍᒫᒃ ᑍᕕᑎᒧᑦ ᐅᖃᕐᐳᑦ ᓴᐅᓕᐅᑉ ᐅᖃᐅᓯᕆᖁᔭᖓᓂᒃ, ᑍᕕᑎᐅᓪᓗ ᑕᒪᓐᓇ ᖁᕕᐊᓲᑎᒋᕚ ᐃᓱᒪᓪᓗᓂ ᐊᖓᔪᖅᑳᕐᔪᐊᕐᒧᑦ ᑍᒫᒃ ᓂᖓᐅᒋᔭᐅᓕᕈᓐᓇᕐᓂᕐᒥᓂᒃ. ᐅᓪᓗᕐᓕ ᓱᓕ ᖄᖏᓚᐅᕐᑎᓐᓇᒍ,

²⁷ ᑍᕕᑎ ᒪᑭᑉᐳᖅ ᐊᐅᓪᓚᕐᓗᓂᓗ, ᐃᓄᖁᑎᖏᓪᓗ ᑐᖁᑦᓯᕗᑦ ᐱᓕᔅᑍᓂᒥᐅᓂᒃ 200ᓂᒃ; ᑍᕕᑎᐅᓪᓗ ᑐᖁᑕᖏᑕ ᐅᓕᕝᕙᖏᑦ ᐊᖓᔪᖅᑳᕐᔪᐊᒧᐊᕈᑎᕔᑦ ᐊᑭᓕᐅᑎᒋᓪᓗᓂᒋᑦ, ᓂᖓᐅᒃᓴᕐᑖᕆᔭᐅᔪᓐᓇᖁᓪᓗᒍ. ᓴᐅᓕᐅᓪᓗ ᐸᓂᓂ ᒤᑲᓪ ᑐᓂᕚ ᑲᑎᑎᑕᐅᖁᓪᓗᒍ ᑍᕕᑎᒧᑦ.

²⁸ ᓴᐅᓕᓗ ᑕᑯᒐᒥ ᖃᐅᔨᓪᓗᓂᓗ ᐊᑕᓂᐅᑉ ᑍᕕᑎ ᐃᓚᒋᖕᒪᒍ, ᐸᓂᖓᑕᓗ ᒤᑲᓕᐅᑉ ᐅᖓᓕᕐᓗᒍ ᓇᒡᓕᒋᓕᕐᒪᒍ,

²⁹ ᓴᐅᓕᐅᓪᓕ ᑍᕕᑎ ᑲᑉᐱᐊᒋᒋᐊᓪᓚᓕᓚᐅᕐᐹ. ᐊᑭᕋᕐᑐᕆᐊᓪᓚᓕᕐᓗᓂᐅᒡᓗ ᑲᔪᓯᔪᒥᒃ.

³⁰ ᐱᓕᔅᑍᓂᒥᐅᓪᓕ ᐊᖓᔪᖅᑳᖏᑕ ᐅᓇᑕᕐᑎᖏᑦ ᐅᓇᑕᕆᐊᕐᐳᑦ, ᐅᓇᑕᕆᐊᑐᐊᕐᒪᑕᓕ ᑍᕕᑎ ᓵᓚᖃᕐᓂᕐᓴᐅᖃᑦᑕᓚᐅᕐᐳᖅ ᓴᐅᓕᐅᑉ ᐱᔨᓕᒫᖏᓐᓂᑦ; ᑍᕕᑎᓗ ᐅᐱᒋᔭᐅᓂᕐᒧᑦ ᐱᓪᓚᕆᕈᕐᑎᑕᐅᒻᒪᕆᓚᐅᕐᐳᖅ.