ᓴᒧᐃᓕ ᓯᕗᓪᓖᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓇᑖᕐᓃᑦ ᐊᒫᓚᑬᒥᐅᓂᒃ

¹ ᓴᒧᐃᓕᓗ ᐅᖃᕐᐳᖅ ᓴᐅᓕᒧᑦ, “ᐊᑕᓂᐅᑉ ᑎᓕᕚᖓ ᐅᕐᓱᕐᑎᕐᑕᐅᖁᓪᓗᑎᑦ ᐊᖓᔪᖅᑳᕐᔪᐊᖑᓂᐊᕐᓗᑎᑦ ᐃᓄᖁᑎᖏᓐᓄᑦ ᐃᓴᕆᐊᓕᒥᐅᓄᑦ; ᒫᓐᓇ ᑍᒤᒻᒪᑦ ᐊᑕᓂᐅᑉ ᐅᖃᐅᓯᖏᑦ ᓈᓚᓕᒃᑭᑦ.

² ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐃᒫᒃ ᐅᖃᕐᐳᖅ, ‘ᐊᒪᓕᑬᒥᐅᑦ ᓱᒋᐊᕈᒪᕙᒃᑲ ᐱᓂᐊᕐᓂᕆᓚᐅᕐᑕᖏᑦ ᐃᓴᕆᐊᓕᒥᐅᓄᑦ, ᐊᑭᕋᕐᑐᓚᐅᕐᒪᑕ ᐄᑦᔨᑉᑎᒥᑦ ᐊᐅᓪᓚᕐᑎᓪᓗᒋᑦ.

³ ᒫᓐᓇ ᐅᓇᑕᕆᐊᓕᕆᑦ ᐊᒪᓕᒃᒧᑦ, ᐱᖁᑎᓕᒫᖏᓪᓗ ᐊᓯᕈᕐᓗᒋᑦ; ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᑦᑍᓕᒃᑭᑦ, ᑐᖁᒃᑭᑦ ᐊᖑᑎᑦ ᐊᕐᓁᓪᓗ, ᓱᕈᓰᑦ ᐊᒫᒪᒃᑐᓪᓗ, ᑐᒃᑐᕙᖁᑎᖏᑦ ᓰᐱᖁᑎᖏᓪᓗ, ᑳᒥᓕᖁᑎᖏᑦ ᓯᐅᑎᖅᑯᕐᑐᔪᖁᑎᖏᓪᓗ.’”

⁴ ᑕᕝᕙ ᓴᐅᓕᐅᑉ ᐃᓄᐃᑦ ᑲᑎᑎᑉᐰᑦ ᓈᓴᕐᓗᒋᓪᓗ ᑎᓔᒻᒥ, 200,000ᓴᐅᕗᑦ ᐅᓇᑕᕐᑏᑦ ᐱᓱᒃᑏᑦ ᐃᓴᕆᐊᓕᒥᐅᑦ, 10,000ᓴᐅᕗᓪᓗ ᐊᖑᑏᑦ ᔫᑕᒥᐅᑦ.

⁵ ᓴᐅᓕᓗ ᑎᑭᑉᐳᖅ ᐊᒪᓕᒃᒥᐅᑦ ᐃᒡᓗᒐᓴᖏᓐᓄᑦ, ᐅᑕᖅᑭᓕᕐᓗᓂᓗ ᓇᕐᓴᒥ.

⁶ ᓴᐅᓕᐅᓪᓗ ᑭᓁᑎᒥᐅᑦ ᐅᖃᐅᑎᕔᑦ, “ᐊᐅᓪᓚᕆᑦᓯ ᐊᒪᓕᑬᒥᐅᓂᑦ ᑐᖁᑕᐅᖁᓇᓯ, ᐃᓴᕆᐊᓕᒥᐅᑦ ᐃᓄᖏᓐᓄᑦ ᑐᓐᖓᓇᓚᐅᕋᑦᓯ ᐄᑦᔨᑉᑎᒥᑦ ᐊᐅᓪᓚᕐᑎᓪᓗᒋᑦ.” ᑍᒤᒻᒪᑦ ᑭᓁᒥᐅᑦ ᐊᐅᓪᓚᓚᐅᕐᐳᑦ ᕿᒤᓪᓗᑎᒃ ᐊᒪᓕᑬᑎᓂᒃ.

⁷ ᓴᐅᓕᐅᓪᓗ ᐅᓇᑕᕐᐰᑦ ᐊᒪᓕᑬᑎᑦ ᓵᓚᒋᓪᓗᒋᑦ, ᐱᒋᐊᕐᓗᓂ ᕼᐊᕕᓚᒥᑦ ᓲᕆ ᑎᑭᓪᓗᒍ, ᐄᑦᔨᑉᑎᒥᑦ ᓯᕿᓂᐅᑉ ᓄᐃᕕᐊᓃᑦᑐᒧᑦ.

⁸ ᐋᒑᒡ ᑎᒍᕚ ᐊᒪᓕᑬᑎᒃᑯᑦ ᐊᖓᔪᖅᑳᕐᔪᐊᖓ ᑐᖁᓐᓇᓂᐅᒃ, ᐃᓄᓕᒫᖏᓪᓗ ᓄᖑᑦᓯᐊᕐᐰᑉ ᓴᕕᒡᔪᐊᒧᑦ.

⁹ ᓴᐅᓕᐅᓪᓕ ᐃᓚᖏᑕᓗ ᐋᒑᒡ ᑐᖁᓐᖏᓛ, ᓰᐱᓪᓗ ᐱᐅᓂᕐᐹᖏᑦ, ᐃᒻᒧᒃᓯᐅᒊᓪᓗ, ᖁᐃᒃᓯᓴᕐᓯᒪᔪᓪᓗ ᓰᐱᐅᑉ ᓄᕐᕋᖏᑦ, ᐊᓯᖏᓪᓗ ᐱᐅᔫᑏᑦ, ᐊᓯᕈᕈᒪᓚᐅᓐᖏᓔᑦ; ᐊᓯᖏᓪᓕ ᐱᐅᖏᑦᑐᑦ ᐊᑑᑎᒃᓴᖃᖏᑦᑐᓪᓗ ᐊᓯᕈᕐᐰᑦ.

¹⁰ ᑕᕝᕙ ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᓴᒧᐃᓕᒧᑦ, ᐅᖃᕐᓗᓂ,

¹¹ “ᐅᒡᒍᐊᕐᐳᖓ ᓴᐅᓕ ᐊᖓᔪᖅᑳᕐᔪᐊᕈᕐᑎᓚᐅᕋᒃᑯ; ᐅᕙᓐᓂᒃ ᕿᒤᖕᒪᑦ ᒪᓕᒍᓐᓃᕐᓗᓂ, ᐱᖁᔨᑦᔪᑎᒋᔭᒃᑲᓗ ᑲᔪᓯᑎᓚᐅᖏᒻᒪᒋᑦ.” ᑕᒪᓐᓇ ᓴᒧᐃᓕᐅᑉ ᓂᓐᖓᒍᑎᒋᕚ; ᐊᑕᓂᕐᒧᓪᓗ ᕿᓄᓪᓗᓂ ᕿᐊᕗᖅ ᐅᓐᓄᐊᓕᒫᖅ.

¹² ᐅᓪᓛᒻᒪᕆᒃᑯᓪᓗ ᓴᒧᐃᓕ ᒪᑭᑉᐳᖅ ᓴᐅᓕ ᑲᑎᔭᕐᑐᓕᕐᓗᒍ; ᓴᒧᐃᓕᓗ ᐅᖃᐅᑦᔭᐅᕗᖅ, “ᓴᐅᓕ ᐂᕗᖅ ᑳᕐᒥᐅᓪᒧᑦ, ᓴᓇᓪᓗᓂᓗ ᐃᓄᓐᖑᐊᒥᒃ ᐃᒻᒥᓂᓐᖑᐊᒥᒃ; ᑕᕝᕙᓐᖓᓪᓗ ᑲᔪᓯᓪᓗᓂ ᐊᒻᒧᐊᒃᐳᖅ ᒋᐅᓪᒐᐅᓪᒧᑦ.”

¹³ ᓴᒧᐃᓕᓗ ᓴᐅᓕᒧᐊᕐᐳᖅ, ᓴᐅᓕᐅᓪᓗ ᐅᖃᐅᑎᕚ, “ᓮᒻᒪᕐᑎᑕᐅᒋᑦ ᐊᑕᓂᕐᒥᑦ ᐱᔪᑎᑦ; ᐊᑕᓂᐅᑉ ᐱᖁᔨᑦᔪᑎᒋᓚᐅᕐᑕᖏᑦ ᑲᔪᓯᑎᓚᐅᕐᐸᒃᑲ.”

¹⁴ ᓴᒧᐃᓕᓕ ᐅᖃᕐᐳᖅ, “ᓱᓁᓪᓖᒃᑯᐊ ᓯᐅᑎᓐᓄᑦ ᑐᓴᕐᓴᐅᕙᑦ ᓰᐱᑦ ᓂᑦᔮᕙᓗᖏᑦ, ᐃᒻᒧᒃᓯᐅᒊᓪᓗ ᓂᓪᓕᐊᓂᖏᑦ ᑐᓵᔭᒃᑲ?”

¹⁵ ᓴᐅᓕ ᐅᖃᕐᐳᖅ, “ᑖᒃᑯᐊ ᐊᒪᓕᑬᑎᓂᑦ ᐱᔭᐅᓯᒪᔪᑦ; ᐃᓄᐃᑦ ᑐᖁᑦᓯᓚᐅᓐᖏᓚᑦ ᐱᐅᓂᕐᐹᓂᒃ ᓰᐱᓂᒃ ᐃᒻᒧᒃᓯᐅᒐᓂᒡᓗ, ᑐᓂᕐᕈᑎᒃᓴᐅᖁᓪᓗᒋᑦ ᐊᑕᓂᕐᒧᑦ ᒎᑎᖕᓄᑦ; ᐊᓯᓕᒫᖏᓪᓕ ᓄᖑᑦᓯᐊᕐᓗᒋᑦ ᐊᓯᕈᓚᐅᕐᐸᕗᑦ.”

¹⁶ ᑕᕝᕙ ᓴᒧᐃᓕ ᓴᐅᓕᒧᑦ ᐅᖃᕐᐳᖅ, “ᓂᐱᖃᓐᖏᓚᐅᕆᑦ! ᐅᖃᐅᑎᓂᐊᕐᐸᒋᑦ ᐊᑕᓂᐅᑉ ᐅᓐᓄᒃ ᐅᖃᐅᓯᕆᓚᐅᕐᑕᖓᓂᒃ ᐅᕙᓐᓄᑦ.” ᐅᖃᐅᑎᕚᓗ, “ᐊᑏ ᐅᖃᓕᕆᑦ.”

¹⁷ ᓴᒧᐃᓕᓗ ᐅᖃᕐᐳᖅ, “ᒥᑭᔫᑎᓪᓗᑎᑦ ᐃᔨᕕᑦ ᓵᖓᓂ, ᐊᖓᔪᖅᑳᖑᓐᖏᓚᑏᑦ ᐃᓴᕆᐊᓕᒥᐅᑦ ᑭᖑᕚᖏᓐᓅᑦ? ᐊᑕᓂᐅᑉ ᐅᕐᓱᕐᑎᓚᐅᕐᐹᑎᑦ ᐊᖓᔪᖅᑳᕐᔪᐊᖑᖁᓪᓗᑎᑦ ᐃᓴᕆᐊᓕᒥᐅᓄᑦ.

¹⁸ ᐊᑕᓂᐅᓪᓗ ᑎᓕᓚᐅᕐᐹᑎᑦ ᐱᔭᒃᓴᖃᖁᓪᓗᑎᑦ ᐅᖃᕐᓗᓂ, ‘ᐊᐅᓪᓚᕆᑦ, ᐊᔪᕐᑐᓕᔪᑦ ᐊᓯᕈᕆᐊᕐᑐᒃᑭᑦ ᓄᖑᑦᓯᐊᕐᓗᒋᑦ, ᐊᒪᓕᑬᒥᐅᑦ ᐅᓇᑕᕐᓂᐊᕐᐸᑎᑦ ᓄᖑᓚᐅᖅᑳᕐᑎᓐᓇᒋᑦ.’

¹⁹ ᓱᖕᒪᓪᓕ ᓈᓚᓚᐅᓐᖏᓚᑎᑦ ᐊᑕᓂᐅᑉ ᓂᐱᖓᓂᒃ? ᓱᖕᒪᓪᓗ ᐊᓯᕈᕐᑐᒃᓮᑦ ᑎᒍᓚᐅᕐᐱᒋᑦ, ᐊᔪᕐᑐᓕᓪᓗᑎᓪᓗ ᐊᑕᓂᐅᑉ ᓵᖓᓂ?”

²⁰ ᓴᐅᓕᓗ ᐅᖃᕐᐳᖅ ᓴᒧᐃᓕᒧᑦ, “ᓈᓚᓚᐅᕐᐳᖓᓕ ᐊᑕᓂᐅᑉ ᓂᐱᖓᓂᒃ, ᐊᑕᓂᐅᑉ ᑎᓕᓯᓂᖓ ᒪᓕᒡᓗᒍ ᐱᓇᓱᐊᕆᐊᕐᑐᓚᐅᕐᐳᖓ, ᐅᑎᐅᑎᓚᐅᕐᐸᕋᓗ ᐋᒑᒡ ᐊᒪᓕᑬᒃᑯᑦ ᐊᖓᔪᖅᑳᕐᔪᐊᖓᑦ, ᐊᒪᓕᑬᒥᐅᓪᓗ ᐊᓯᕈᕐᓗᒋᑦ ᓄᖑᑦᓯᐊᓚᐅᕐᐸᒃᑲ.

²¹ ᐃᓄᐃᓪᓕ ᑎᒍᓯᓚᐅᕐᐳᑦ ᐱᐅᓂᕐᐹᓂᒃ ᓰᐱᓂᒃ ᐃᒻᒧᒃᓯᐅᒐᓂᒡᓗ ᐊᓯᕈᕐᑐᒃᓴᓂᑦ, ᑐᓂᕐᕈᑎᒃᓴᐅᖁᓪᓗᒋᑦ ᐊᑕᓂᕐᒧᑦ ᒎᑎᖕᓄᑦ ᒋᐅᓪᒐᐅᓪᒥ.”

²² ᓴᒧᐃᓕᓗ ᐅᖃᕐᐳᖅ, “ᐊᑕᓂᖅ ᖁᕕᐊᒋᔭᖃᕐᓂᕐᓴᐅᕚ ᑐᓂᕐᕈᑎᒃᓴᓂᒃ ᐆᑕᒃᓴᓂᒃ, ᓈᓚᖕᓂᕐᒥᒃ ᐊᑕᓂᐅᑉ ᓂᐱᖓᓂᑦ? ᑕᑯᒋᑦ, ᓈᓚᖕᓂᖅ ᐱᓪᓚᕆᐅᓂᕐᓴᐅᕗᖅ ᑐᓂᕐᕈᑎᓂᑦ, ᓰᐲᑦ ᐊᖑᓴᓪᓗᖏᑕ ᖁᐃᓂᔪᑦ ᑐᓂᕐᕈᑕᐅᓂᖏᓐᓂᑦ.

²³ ᐊᑭᕋᕐᑐᕐᓂᖅ ᐊᔪᕐᓂᐅᕗᖅ ᐊᖓᒃᑰᓇᓱᐊᕐᑐᑎᑐᑦ, ᓯᑎᔫᓂᕐᓗ ᐱᐅᖏᑦᑐᓕᓂᐅᕗᖅ ᒎᑎᓐᖑᐊᖃᕐᑐᑎᑐᑦ. ᓇᕐᕈᓚᐅᕋᕕᑦ ᐊᑕᓂᐅᑉ ᐅᖃᐅᓯᖓᓂᒃ, ᑍᒫᒃᑕᐅᖅ ᓇᕐᕈᒋᓕᕐᐹᑎᑦ ᐊᖓᔪᖅᑳᕐᔪᐊᖑᓂᕐᓂᑦ.”

²⁴ ᓴᐅᓕᓗ ᐅᖃᓕᕐᐳᖅ ᓴᒧᐃᓕᒧᑦ, “ᐊᔪᕐᑐᓕᓚᐅᕐᐳᖓ; ᐊᑕᓂᐅᑉ ᐅᖃᐅᓯᖏᑦ ᓱᕋᓚᐅᕐᐸᒃᑲ ᐅᖃᐅᓯᕐᑎᓪᓗ, ᐃᓄᖕᓂᒃ ᓯᕘᕋᓚᐅᕋᒪ ᓂᐱᖏᓪᓗ ᓈᓚᖔᓕᓚᐅᕋᒃᑭᑦ.

²⁵ ᒫᓐᓇᓕ ᑍᒤᒻᒪᑦ, ᑐᒃᓯᐊᕐᐳᖓ ᐊᔪᕐᓂᓐᓂᑦ ᐃᓱᒪᒋᔪᓐᓁᕐᕕᒋᓐᖓ, ᐅᑎᖃᑎᒋᓗᖓᓗ, ᐊᑕᓂᕐᒧᑦ ᑐᒃᓯᐊᕈᓐᓇᖁᓪᓗᖓ.”

²⁶ ᓴᒧᐃᓕᓗ ᐅᖃᕐᐳᖅ ᓴᐅᓕᒧᑦ, “ᐅᑎᖃᑎᒋᓂᐊᓐᖏᓚᒋᑦ; ᐊᑕᓂᐅᑉ ᐅᖃᐅᓯᖓᓂᒃ ᓇᕐᕈᓚᐅᕋᕕᑦ, ᐊᑕᓂᐅᓪᓗ ᓇᕐᕈᒋᓕᕐᐹᑎᑦ ᐊᖓᔪᖅᑳᕐᔪᐊᖑᓂᕐᓂᒃ ᐃᓴᕆᐊᓕᒥᐅᓄᑦ.”

²⁷ ᓴᒧᐃᓕ ᑐᓄᓪᓗᓂ ᕿᒪᕉᑎᓕᕐᑎᓪᓗᒍ, ᓴᐅᓕᐅᑉ ᓴᒧᐃᓕᐅᑉ ᐅᓕᒡᔪᐊᖓ ᓯᓈᒍᑦ ᑎᒍᕚ, ᐊᓕᒃᐳᕐᓗ.

²⁸ ᓴᒧᐃᓕᐅᓪᓗ ᐅᖃᐅᑎᕚ, “ᐊᑕᓂᐅᑉ ᐃᓴᕆᐊᓕᒥᐅᓄᑦ ᐊᖓᔪᖅᑲᐅᕖᑦ ᐊᓕᒃᐹ ᐅᓪᓗᒥ, ᑐᓂᓪᓗᒍᓗ ᓯᓚᖅᑲᑎᖕᓄᑦ, ᐃᓕᖕᓂᑦ ᐱᐅᓂᕐᓴᐅᔪᒧᑦ.

²⁹ ᐃᓴᕆᐊᓕᒥᐅᓪᓗ ᓲᖑᑦᔪᑎᖓ ᓴᒡᓗᓂᐊᓐᖏᓚᖅ ᖃᕿᐊᓕᕐᓂᐊᕋᓂᓗ; ᑖᓐᓇ ᐃᓄᒃᑎᑑᓐᖏᒻᒪᑦ ᖃᕿᐊᓕᖃᑦᑕᕆᐊᓕᒃᑎᑐᑦ.”

³⁰ ᑕᕝᕙ ᐅᖃᓕᕐᐳᖅ, “ᐊᔪᕐᑐᓕᓚᐅᕐᐳᖓ; ᐅᐱᒋᓚᐅᓐᖓᓕ, ᐃᓄᐃᑦ ᐊᖓᔪᖅᑳᖏᑕ ᓵᖓᓂ ᐃᓴᕆᐊᓕᒥᐅᓪᓗ ᓵᖏᓐᓂ, ᐅᑎᖃᑎᒋᓚᐅᓐᖓ, ᑐᒃᓯᐊᕈᓐᓇᖁᓪᓗᖓ ᐊᑕᓂᕐᒧᑦ ᒎᑎᖕᓄᑦ.”

³¹ ᑕᕝᕙ ᓴᒧᐃᓕᐅᑉ ᓴᐅᓕ ᐅᑎᖃᑎᒋᓕᕐᐹ, ᓴᐅᓕᓗ ᑐᒃᓯᐊᕐᐳᖅ ᐊᑕᓂᕐᒧᑦ.

³² ᑕᕝᕙ ᓴᒧᐃᓕ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᐋᒑᒡ ᐊᒪᓕᑬᒥᐅᑕᖅ ᕾᑎᑕᐅᓕ ᐅᕙᓐᓄᑦ.” ᐂᒑᒡ ᑕᕝᕙ ᐂᕗᖅ ᑖᑦᓱᒧᖓ ᖁᕕᐊᓱᒡᓗᓂ. ᐅᖃᕐᓗᓂᓗ, “ᑐᖂᑉ ᖃᓯᓕᓇᕐᓂᖓ ᐊᓂᒍᕐᐳᖅ.”

³³ ᓴᒧᐃᓕᓗ ᐅᖃᕐᐳᖅ, “ᓴᕕᒡᔪᐊᕕᑦ ᐊᕐᓁᑦ ᕿᑐᕐᖏᓱᐃᑦᑑᑎᓚᐅᕐᒪᒋᑦ, ᐊᓈᓁᑦᑕᐅᖅ ᕿᑐᕐᖓᖃᕐᓂᐊᕈᓐᓃᕐᐳᖅ ᐊᕐᓁᑦ ᐊᑯᕐᖓᓐᓂ.” ᓴᒧᐃᓕᐅᓪᓗ ᐋᒑᒡ ᐊᕕᒃᑐᕐᐹ ᐅᓄᕐᑑᓕᓗᒍ ᐊᑕᓂᐅᑉ ᓵᖓᓂ ᒋᐅᓪᒐᐅᓪᒥ.

³⁴ ᓴᒧᐃᓕᓗ ᑕᕝᕙ ᕌᒪᒧᐊᕐᐳᖅ; ᓴᐅᓕ ᑕᑉᐸᐅᖓ ᐊᖏᕐᕋᒥᓄᐊᕐᑎᓪᓗᒍ ᒋᐱᐊᒧᑦ.

³⁵ ᓴᒧᐃᓕᐅᓪᓗ ᓴᐅᓕ ᑕᑯᒃᑲᓐᓂᓚᐅᕈᓐᓃᕐᐹ ᑐᖁᓚᐅᖅᑳᕐᑎᓐᓇᒍ, ᓴᒧᐃᓕᐅᓪᓕ ᓴᐅᓕ ᕿᒃᓵᒍᑎᒋᓚᐅᕐᐹ. ᐊᑕᓂᕐᓗ ᐅᒡᒍᐊᓕᓚᐅᕐᐳᖅ ᓴᐅᓕᒥᒃ ᐊᖓᔪᖅᑳᕐᔪᐊᕈᕐᑎᑦᓯᓚᐅᕐᓂᕐᒥᓂᒃ ᐃᓴᕆᐊᓕᒥᐅᓄᑦ.