ᓴᒧᐃᓕ ᓯᕗᓪᓖᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᒧᐃᓕᐅᑉ ᐅᖃᐅᓯᖏᑦ ᐃᓄᖕᓄᑦ

¹ ᓴᒧᐃᓕᐅᓪᓗ ᐃᓴᕆᐊᓕᒥᐅᑦ ᐃᓄᖏᑦ ᐅᖃᐅᑎᓚᐅᕐᐰᑦ, “ᐱᔪᒪᔭᑦᓯᓐᓂᒃ ᐱᓇᓱᐊᓚᐅᕐᐳᖓ ᐊᖓᔪᖅᑳᕐᔪᐊᒥᒃ ᑐᓂᓯᕕᒋᓚᐅᕐᐸᑦᓯ ᐊᐅᓚᑦᓯᔨᐅᖁᓪᓗᒍ ᐃᓕᑦᓯᓐᓄᑦ.

² ᒫᓐᓇᓕ ᑕᑯᒋᑦ, ᑕᕝᕙ ᐊᖓᔪᖅᑳᕐᔪᐊᓯ ᐱᓱᓕᕐᐳᖅ ᓵᑦᓯᓐᓂ; ᐅᕙᖓᓕ ᐃᑦᑑᓕᕋᒪ ᖀᖑᓕᕐᓗᖓᓗ, ᑕᑯᒋᑦ ᐃᕐᓂᒃᑲ ᐃᓕᑦᓯᓐᓃᑉᐳᑦ; ᐃᓕᑦᓯᓐᓂᒃ ᑕᓯᐅᕐᓯᓚᐅᕐᐳᖓ ᐃᓅᓱᒃᑑᓂᓐᓂᑦ ᐅᓪᓗᒥᒧᑦ ᑎᑭᓪᓗᒍ.

³ ᒫᓐᓇ ᑕᒫᓃᑉᐳᖓ; ᑕᒻᒪᓚᐅᕈᒪ ᐸᓯᔭᐅᓕᕐᓚᖓ ᐊᑕᓂᐅᑉ ᓵᖓᓂ ᐅᕐᓱᕐᑎᓚᐅᕐᑕᖓᑕᓗ ᓵᖓᓂ. ᑎᒍᓯᓚᐅᐳᖔ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ? ᓯᐅᑎᖅᑯᕐᑐᔪᒥᒡᓘᓐᓃᑦ ᐱᒋᔭᐅᔪᒥᒃ? ᑭᓇᑐᐃᓐᓇᒥᑦ ᐊᑭᓕᕐᑕᐅᓗᖓ ᓴᒡᓗᓂᒃᑯᑦ ᐱᓇᓱᐊᓚᐅᕐᐳᖔ? ᓇᓪᓕᐊᓐᓂᒃ ᐅᑯᒤᒃᓴᕐᑎᑦᓯᓚᐅᕐᐳᖔ? ᑕᒪᒃᑯᓂᖓ ᐱᓇᓱᐊᓚᐅᕈᒪ ᑎᒍᓯᓚᐅᕈᒪᓘᓐᓃᑦ ᐃᓕᑦᓯᓐᓄᑦ ᐅᑎᕐᑎᑦᓱᒪᕙᒃᑲ.”

⁴ ᐃᓄᐃᑦ ᑭᐅᕗᑦ, “ᐱᓂᕐᓗᒃᕕᒋᓚᐅᓐᖏᓚᑦᑎᒍᑦ ᕿᒃᓵᒃᑎᓚᐅᓐᖏᓚᑦᑎᒍᓪᓗ; ᑎᒍᓯᓚᐅᓐᖏᓚᑎᓪᓗ ᑭᓇᑐᐃᓐᓇᕐᒥᑦ.”

⁵ ᓴᒧᐃᓕᐅᓪᓗ ᐅᖃᐅᑎᕔᑦ, “ᐊᑕᓂᕐᓗ ᐊᖓᔪᖅᑳᕐᔪᐊᕐᓗ ᐅᕐᓱᕐᑎᕐᓯᒪᔭᖓ ᖃᐅᔨᒪᓂᐊᕐᐴᒃ ᐅᓪᓗᒥ ᐸᑦᓯᑎᒃᓴᕐᓯᐊᖏᓐᓇᑦᓯ ᐅᕙᓐᓄᑦ.” ᑭᐅᕗᑦ, “ᐃᓛᒃ, ᐊᑕᓂᖅ ᖃᐅᔨᒪᔨᑕᕆᓂᐊᕐᐸᕗᑦ.”

⁶ ᓴᒧᐃᓕᐅᓪᓗ ᐃᓄᐃᑦ ᐅᖃᐅᑎᕔᑦ, “ᐊᑕᓂᖅ ᖃᐅᔨᒪᔨᑕᐅᓂᐊᕐᐳᖅ ᑖᓐᓇ ᒨᓯᓯᒥᒃ ᐂᕉᓂᒥᒡᓗ ᑎᓕᓯᓚᐅᕐᑐᖅ ᓯᕗᓕᑦᓯᓐᓂᒃ ᑕᓯᐅᕐᓯᓗᑎᒃ ᐊᐅᓪᓚᕈᑦᔨᖁᓪᓗᒋᒃ ᐄᑦᔨᑉᑎᒥᑦ.

⁷ ᒫᓐᓇ ᑍᒤᒻᒪᑦ ᓂᑯᕕᒋᑦᓯ, ᐊᑕᓂᖅ ᑐᒃᓯᐊᕐᕕᒋᓂᐊᕋᒃᑯ ᐱᐅᓕᒃᓯᓂᕆᓚᐅᕐᑕᖏᑦ ᐃᓕᑦᓯᓐᓂᒃ ᓯᕗᓕᑦᓯᓐᓂᒡᓗ ᐱᑦᔪᑎᒋᓗᒋᑦ.

⁸ ᔧᑯᒃᑯᑦ ᐃᓚᒌᑦ ᐄᑦᔨᑉᑎᒧᐊᕐᒪᑕ ᐄᑦᔨᑉᑎᒥᐅᓂᑦ ᐊᒃᓱᕈᕐᑎᑕᐅᓚᐅᕐᐳᑦ, ᐊᑕᓂᕐᒧᓪᓗ ᐃᓗᖏᕐᓱᕐᓗᑎ ᑐᒃᓯᐊᕐᒪᑕ ᐃᑲᔪᕐᑕᐅᔪᒪᓪᓗᑎᒃ, ᐊᑕᓂᐅᑉ ᑎᓕᓯᕕᒋᓚᐅᕐᐰᑦ ᒨᓯᓯᒥᒃ ᐂᕉᓂᒥᒡᓗ, ᑖᒃᑯᐊᒃ ᓯᕗᓕᑦᓯᓐᓂᒃ ᐊᐅᓪᓚᕐᑎᑦᓯᓚᐅᕐᐴᒃ ᐄᑦᔨᑉᑎᒥᑦ, ᓄᓇᑖᕐᑎᓪᓗᒋᓪᓗ ᑕᒫᓂ ᓄᓇᒥ.

⁹ ᑭᓯᐊᓂᓕ ᐃᓄᐃᑦ ᐳᐃᒍᓚᐅᕐᐳᑦ ᐊᑕᓂᕐᒥᖕᓂᒃ ᒎᑎᒥᒃ; ᑍᒤᒻᒪᑦ ᐱᓕᔅᑍᓂᒥᐅᑦ ᐱᔪᓐᓇᕐᑎᓚᐅᕐᐰᑦ ᐊᖓᔪᖅᑳᕐᔪᐊᕐᓗ ᒧᐊᐱᒥᐅᑕᖅ ᓯᓰᕋᒥᐅᑕᒧᓪᓗ, ᕼᐂᔭᒧᓪᓗ ᐅᓇᑕᕐᑏᑦ ᐊᖓᔪᖅᑳᖓᓐᓄᑦ ᐅᓇᑕᕆᐊᕐᑕᐅᑎᓚᐅᕐᐰᑦ; ᓯᕗᓕᓯᓗ ᓵᓚᐅᓚᐅᕐᐳᑦ ᑖᒃᑯᓄᖓ.

¹⁰ ᕿᐊᓪᓗᑎᒡᓗ ᑐᒃᓯᐊᓚᐅᕐᐳᑦ ᐊᑕᓂᕐᒧᑦ ᐅᖃᕐᓗᑎᒃ, ‘ᐊᔪᕐᑐᓕᓚᐅᕐᐳᒍᑦ, ᐃᓕᖕᓂᑦ ᕿᒪᕉᑎᓚᐅᕐᐳᒍᑦ ᐊᑕᓃᖅ, ᒎᑎᓐᖑᐊᓄᓪᓗ ᑐᒃᓯᐊᓚᐅᕐᐳᒍᑦ ᐰᓕᒧᑦ ᐋᔅᑕᕉᑎᒧᓪᓗ; ᒫᓐᓇᓕ ᐱᐅᓕᓚᐅᕐᑎᒍᑦ ᐊᑭᕋᑦᑎᓐᓂᑦ, ᐃᓕᖕᓂᒡᓗ ᐱᔨᑦᓯᓕᕐᓂᐊᕐᐳᒍᑦ!’

¹¹ ᐊᑕᓂᐅᓪᓗ ᑎᓕᓯᕕᒋᓚᐅᕐᐰᑦ ᔨᕈᐸᐅᓕᒥᒃ, ᐹᕋᒃᒥᒡᓗ, ᔨᑉᑕᒥᒡᓗ, ᓴᒧᐃᓕᒥᒡᓗ, ᑖᒃᑯᑎᒎᓇᖅ ᓴᐳᑎᓚᐅᕐᐹᓯ ᐊᑭᕋᓕᒫᑦᓯᓐᓂᑦ; ᐃᓅᓕᕐᓗᓯᓗ ᑲᑉᐱᐊᓇᖏᑦᑐᒥ.

¹² ᑭᓯᐊᓂᓕ ᐊᖓᔪᖅᑳᕐᔪᐊᖅ ᓇᕼᐊᔅ ᐊᒧᓁᑎᒥᐅᑕᖅ ᑕᑯᒐᑦᓯᐅᒃ ᐅᓇᑕᕆᐊᕐᑐᖅ ᐃᓕᑦᓯᓐᓂᒃ, ᐅᕙᓐᓄᑦ ᐅᖃᓚᐅᕐᐳᓯ, ‘ᐋᒃᑲ ᐊᖓᔪᖅᑳᕐᔪᐊᕐᑖᕈᒪᕗᒍᑦ ᐊᐅᓚᑦᓯᔨᒃᓴᑦᑎᓐᓂᒃ,’ ᐊᑕᓂᕐᒥᒃ ᒎᑎᑦᓯᓐᓂᒃ ᐊᖓᔪᖅᑳᕐᔪᐊᖃᕋᓗᐊᕐᑎᓪᓗᓯ.

¹³ “ᒫᓐᓇᓕ ᑕᑯᒋᑦ ᑕᕝᕙ ᐊᖓᔪᖅᑳᕐᔪᐊᖅ ᓂᕈᐊᓚᐅᕐᑕᓯ, ᑖᓐᓇ ᐱᔪᒪᓚᐅᕐᑕᓯ; ᑕᑯᒋᑦ ᐊᑕᓂᐅᑉ ᑐᓂᓚᐅᕐᐹ ᐃᓕᑦᓯᓐᓄᑦ ᐊᖓᔪᖅᑳᕐᔪᐊᖑᖁᓪᓗᒍ.

¹⁴ ᐊᑕᓂᖅ ᐃᓕᕋᒋᓂᐊᕈᑦᓯᐅᒃ ᐱᔨᑦᓯᕐᓗᒍᓗ ᓂᐱᐊᓗ ᓈᓚᖕᓂᐊᕈᑦᓯᐅᒃ, ᐊᑭᕋᕐᑐᓕᕐᓂᐊᖏᒃᑯᑦᓯᓗ ᐊᑕᓂᐅᑉ ᐱᖁᔭᖏᓐᓂᒃ, ᐃᓕᑦᓯᓗ ᐊᖓᔪᖅᑳᕐᔪᐊᓯᓗ ᐃᓕᑦᓯᓐᓂᑦ ᐊᐅᓚᑦᓯᔪᖅ ᒪᓖᓐᓇᕐᓂᐊᕈᑦᓯ ᐊᑕᓂᕐᒥᒃ ᒎᑎᑦᓯᓐᓂᒃ, ᑕᕝᕙ ᖃᓄᐃᖏᑦᓯᐊᕈᓐᓇᕐᓂᐊᕐᐳᓯ;

¹⁵ ᑭᓯᐊᓂᓕ ᐊᑕᓂᐅᑉ ᓂᐱᖓᓂᒃ ᓈᓚᖕᓂᐊᖏᒃᑯᑦᓯ, ᐊᑕᓂᐅᓪᓗ ᐱᖁᔭᖏᓐᓂᒃ ᐊᑭᕋᕐᑐᓕᕈᑦᓯ, ᑕᕝᕙ ᐊᑕᓂᐅᑉ ᐊᒡᒐᖏᑦ ᐃᓕᑦᓯᓐᓂᒃ ᐊᖓᔪᖅᑳᕐᔪᐊᑦᓯᓐᓂᒡᓗ ᐊᑭᕋᕐᑐᓕᕈᒫᕐᐳᖅ.

¹⁶ ᒫᓐᓇ ᑍᒤᒻᒪᑦ ᐃᓂᒋᔭᑦᓯᓐᓂ ᕿᑲᕐᓗᓯ ᑕᑯᔪᒫᕐᐳᓯ ᐊᑕᓂᐅᑉ ᐱᓂᐊᕐᓂᖏᓐᓂᒃ ᐱᐅᔪᕐᔪᐊᓂᒃ, ᐱᓇᓱᐊᕈᒫᕐᑕᖏᓐᓂᒃ ᑕᑯᓐᓇᕐᑎᓪᓗᓯ.

¹⁷ ᐅᓪᓗᒥ ᓂᐊᖂᔭᒃᓴᓂᒃ ᑲᑎᕐᓱᐃᕕᐅᓐᖏᓛᖅ? ᐊᑕᓂᖅ ᑐᒃᓯᐊᕐᕕᒋᓂᐊᕐᐸᕋ, ᑲᓪᓕᕐᑎᑦᓯᖁᓪᓗᒍ ᓯᓚᓗᒃᑎᑦᓯᖁᓪᓗᒍᓗ; ᑕᒪᓐᓇ ᑲᔪᓯᒃᐸᑦ, ᑕᑯᓗᓯᓗ ᖃᐅᔨᔪᒫᕐᐳᓯ ᐊᖏᔪᒥᒃ ᐊᔪᕐᑐᓕᓯᒪᓂᑦᓯᓐᓂᒃ, ᐱᓇᓱᐊᕐᓯᒪᔭᑦᓯᓐᓂᒃ ᐊᑕᓂᐅᑉ ᓵᖓᓂ, ᐊᖓᔪᖅᑳᕐᔪᐊᕐᑖᕈᒪᓪᓗᓯ ᑐᒃᓯᐊᓚᐅᕋᑦᓯ.”

¹⁸ ᑕᕝᕙ ᓴᒧᐃᓕ ᑐᒃᓯᐊᓕᕐᐳᖅ ᐊᑕᓂᕐᒧᑦ, ᐊᑕᓂᕐᓗ ᑲᓪᓕᓕᕐᑎᑦᓯᕗᖅ ᓯᓚᓗᓕᕐᑎᓪᓗᒍᓗ ᐅᓪᓗᒥ ᑕᕝᕙᓂ; ᐃᓄᓕᒫᓪᓗ ᑲᑉᐱᐊᓱᓕᕐᐳᑦ ᐊᑕᓂᕐᒥᒃ ᓴᒧᐃᓕᒥᒡᓗ.

¹⁹ ᐃᓄᓕᒫᓪᓗ ᓴᒧᐃᓕᒧᑦ ᐅᖃᕐᐳᑦ, “ᑐᒃᓯᐊᓚᐅᕆᑦ ᐊᑕᓂᕐᒧᑦ ᒎᑎᖕᓄᑦ, ᐱᑦᔪᑎᒋᓗᑕ ᑐᖁᖁᓇᑕ; ᒫᓐᓇ ᖃᐅᔨᕗᒍᑦ ᐊᔪᕐᑐᓕᓂᑦᑕ ᐊᓯᐊᒍᑦ ᐊᔪᕐᑐᓕᒃᑲᓐᓂᓚᐅᕋᑦᑕ, ᐊᖓᔪᖅᑳᕐᔪᐊᕐᑖᕈᒪᓪᓗᑕ ᑐᒃᓯᐊᓚᐅᕐᓂᑦᑎᓐᓄᑦ.”

²⁰ ᓴᒧᐃᓕᐅᓪᓗ ᐅᖃᐅᑎᕔᑦ, “ᑲᑉᐱᐊᓱᖏᓪᓗᓯ; ᐱᐅᖏᑦᑐᐊᓗᖕᒥᒃ ᑕᒪᑐᒥᖓ ᐱᓯᒪᒐᓗᐊᕐᑐᓯ, ᐊᑕᓂᕐᒥᓪᓕ ᓴᖑᓗᓯ ᒪᓕᒍᓐᓃᕐᑍᓕᓯᐅᒃ, ᐊᑕᓂᕐᓕ ᐱᔨᑦᓯᕐᓯᐅᒃ ᐆᒻᒪᑎᓕᒫᑦᓯᓐᓄᑦ.

²¹ ᓴᖑᑦᑍᓕᒋᑦᓯ ᓱᓇᐅᖏᑦᑐᓄᓪᓗ ᐱᓇᓱᐊᓕᕐᑍᓕᓗᓯ ᐃᓕᑦᓯᓐᓂᒃ ᐃᑲᔪᕈᓐᓇᖏᒻᒪᑕ ᐱᐅᓕᒃᓯᔪᓐᓇᕋᑎᒡᓗ, ᑕᒪᓐᓇ ᑍᒤᓕᐅᕐᓂᖅ ᐊᑑᑎᖃᖏᒻᒪᑦ.

²² ᐊᑕᓂᐅᑉ ᐃᓄᖁᑎᓂ ᐃᒋᓐᓂᐊᓐᖏᓔᑦ, ᐊᑎᓂ ᐃᑦᔪᕐᓁᑦᑐᖅ ᐱᓪᓗᒍ, ᐊᑕᓂᐅᑉ ᖁᕕᐊᒋᓚᐅᕐᒪᒍ ᐃᓕᑦᓯᓐᓂᒃ ᐃᓄᖁᑎᑖᕆᐊᒃᓴᖅ ᓇᖕᒥᓂᕐᑖᕆᓗᓂᓯ.

²³ ᐅᕙᓐᓂᓪᓕ, ᐅᖓᓯᒡᓕ ᐊᔪᕐᑐᓕᔪᒃᓴᐅᓂᕋ ᐊᑕᓂᕐᒧᑦ ᑐᒃᓯᐅᑦᔨᖃᑦᑕᕈᓐᓃᕋᔭᕈᒪ ᐃᓕᑦᓯᓐᓂᒃ; ᐊᔪᕆᕐᑐᖃᑦᑕᕐᓂᐊᕐᐸᑦᓯ ᐱᐅᔪᒥᒃ ᓈᒻᒪᓈᕐᑐᒥᒡᓗ.

²⁴ ᐊᑕᓂᕐᓕ ᐃᓕᕋᒋᓯᐅᒃ, ᐱᔨᑦᓯᕐᓗᒍᓗ ᓱᖁᓯᔪᐃᑦᑑᓗᓯ ᐆᒻᒪᑎᓕᒫᑦᓯᓐᓄᑦ; ᐃᖅᑲᐅᒪᓗᓯ ᐱᐅᔪᕐᔪᐊᓂᒃ ᐱᓂᐊᕐᓂᖃᓚᐅᕐᒪᑦ ᐃᓕᑦᓯᓐᓄᑦ.

²⁵ ᑭᓯᐊᓂᓕ ᐊᔪᕐᑐᓖᓐᓇᕐᓂᐊᕈᑦᓯ, ᐊᓯᕈᕐᑕᐅᔪᒫᕐᐳᓯ, ᐃᓕᑦᓯ ᐊᖓᔪᖅᑳᕐᔪᐊᓯᓗ ᐊᑕᖏᕐᓗᓯ.”