ᓴᒧᐃᓕ ᓯᕗᓪᓖᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᐅᓕᐅᑉ ᓵᓚᖃᕐᓂᖓ ᐊᒧᓁᑎᓂᒃ

¹ ᓇᕼᐊᔅ ᐊᒧᓁᑎᒥᐅᑕᖅ ᐅᓇᑕᕆᐊᕐᐳᖅ ᔭᐲᓯ-ᒋᓖᑎᒧᑦ ᓵᓚᒋᓪᓗᒍᓗ; ᑕᕝᕙ ᔭᐲᓯᐅᑉ ᐃᓄᖏᑦ ᐅᖃᕐᐳᑦ ᓇᕼᐊᔅᒧᑦ, “ᐊᖏᖃᑎᒌᓚᐅᕐᑕ ᐃᓕᖕᓂᒃ ᐱᔨᑦᓯᕐᓂᐊᕐᐳᒍᑦ.”

² ᓇᕼᐊᓴᐅᓪᓕ ᐊᒧᓁᑎᒥᐅᑉ ᑭᐅᕔᑦ, “ᐊᖏᖃᑎᒋᓂᐊᕐᐸᑦᓯ ᐊᑕᐅᓯᕐᒥᒃ ᐱᑦᔪᑎᖃᕐᑐᒥᒃ: ᐃᔨᓕᒫᓯ ᑕᓕᕐᐱᓯ ᐃᑎᕐᓴᓕᐅᕈᒻᒧᑦ ᑲᐅᓗᒋᑦ ᐊᒨᕋᕐᓂᐊᕐᐸᒃᑲ, ᑕᒪᑐᒧᖓ ᐃᓴᕆᐊᓕᒥᐅᓕᒫᑦ ᑲᓐᖑᓇᕐᑐᒦᑎᑕᐅᖁᓪᓗᒋᑦ.”

³ ᑕᕝᕙ ᔭᐲᓯᐅᑉ ᐊᖓᔪᖅᑳᖏᑦ ᐅᖃᕐᐳᑦ, “ᐅᓪᓗᓂᒃ 7ᓂᒃ ᐱᕕᒃᓴᖃᕐᑎᓚᐅᕐᑎᒍᑦ ᑎᓕᓯᓂᐊᕋᑦᑕ ᐃᓴᕆᐊᓕᒥᐅᑦ ᓄᓇᓕᓕᒫᖏᓐᓄᑦ. ᐃᑲᔪᕐᑕᐅᓂᐊᖏᒃᑯᑦᑕ, ᑕᕝᕙ ᐃᓕᖕᓄᑦ ᒪᓂᔪᒫᕐᐳᒍᑦ.”

⁴ ᑕᕝᕙ ᐅᖃᕆᐊᕐᑐᕐᑐᑦ ᑎᑭᒻᒪᑕ ᒋᐱᐊᒧᑦ, ᓴᐅᓕᐅᑉ ᓇᔪᕐᑕᖓᓄᑦ, ᐅᖃᓚᐅᕐᐳᑦ ᐱᓂᐊᕐᓂᐅᔪᓂᒃ ᐃᓄᖕᓄᑦ; ᐃᓄᐃᓪᓗ ᑐᓴᕋᒥᒃ ᕿᒃᓵᖕᓂᕐᒧᑦ ᓂᐱᖃᕐᓗᑎᒃ ᕿᐊᓕᕐᐳᑦ.

⁵ ᓴᐅᓕᓕ ᐱᕈᕐᓰᕕᖁᑎᒥᓂᓐᖔᕐᓗᓂ ᑎᑭᑉᐳᖅ ᐃᒻᒧᒃᓯᐅᒐᖁᑎᒥᒍᑦ; ᐅᖃᕐᓗᓂᓗ, “ᓱᕕᓰ? ᓱᖕᒪᑦ ᐃᓄᐃᑦ ᕿᐊᕙᑦ?” ᑕᕝᕙ ᐅᖃᐅᑦᔭᐅᕗᖅ ᔭᐲᓯᒥᑦ ᐅᖃᕆᐊᕐᑐᓚᐅᕐᑑᑉ ᐅᖃᐅᓯᖏᓐᓂᒃ.

⁶ ᓴᐅᓕᓕ ᑕᒪᑐᒥᖓ ᑐᓴᕋᒥ, ᒎᑎᐅᑉ ᐊᓂᕐᓂᖓᑕ ᓴᓐᖏᔪᕐᔪᐊᒥᒃ ᑎᑭᕝᕕᒋᕚ, ᓂᓐᖓᐅᒪᓂᕐᔪᐊᒧᓪᓗ ᑎᑭᑕᐅᕗᖅ.

⁷ ᑕᕝᕙ ᐃᒻᒧᒃᓯᐅᒑᒃ ᒪᕐᕉᒃ ᑎᒍᓪᓗᒋᒃ, ᐊᒡᒍᕐᐹᒃ ᒥᑭᓈᕐᑎᕐᓗᒋᑦ ᐊᐅᓪᓚᕐᑎᓪᓗᒋᓪᓗ ᐃᓴᕆᐊᓕᒥᐅᓕᒫᓄᑦ ᐅᖃᕆᐊᕐᑐᕐᑐᓂᒃ ᒪᓕᒃᑕᐅᑎᓪᓗᒋᑦ, ᐃᒫᒃ ᐅᖃᖁᓪᓗᒋᑦ: “ᓇᓪᓕᐊᑦ ᒪᓕᖏᑦᑐᖅ ᓴᐅᓕᒥᒃ ᓴᒧᐃᓕᒥᒡᓗ ᐅᓇᑕᕆᐊᕐᑐᕐᑎᓪᓗᒋᑦ ᐃᒻᒧᒃᓯᐅᒐᑎᑐᑦ ᑍᒫᒃ ᐊᕕᒃᑐᕐᑕᐅᔪᒫᕐᐳᑦ!” ᑕᕝᕙ ᐃᓴᕆᐊᓕᒥᐅᑦ ᐃᓄᖏᑦ ᐊᖏᔪᒥᒃ ᓯᕘᕋᓕᕐᐳᑦ ᐊᑕᓂᕐᒥᒃ, ᕾᓚᐅᕐᐳᓪᓗ ᐊᑕᐅᑦᓯᐅᓕᖓᑦᓯᐊᕐᓗᑎᒃ ᐃᓄᒃᑐᑦ ᐊᑕᐅᓯᕐᑐᑦ.

⁸ ᓴᐅᓕᐅᑉ ᑲᑎᑎᓐᓇᒥᒋᑦ ᓄᓇᒥ ᐲᔨᒃᒥ, ᐊᖑᑎᑦ ᐃᓴᕆᐊᓕᒥᐅᑦ 300,000ᐅᕗᑦ, ᔫᑕᒥᐅᓪᓗ ᐊᖑᑎᑦ 30,000ᓗᑎᒃ.

⁹ ᐅᖃᕐᐳᓪᓗ ᐅᖃᕆᐊᕐᑐᕐᓯᒪᔪᓄᑦ ᔭᐲᓯ-ᒋᓖᑎᒥᑦ, “ᐃᓅᖃᑎᓯ ᐅᖃᐅᑎᓯᒋᒃ ᖃᐅᒃᐸᑦ ᑍᒤᓪᓗᐊᓕᕐᐸᑦ ᐃᑲᔪᕆᐊᕐᑕᐅᔪᒫᕐᐳᑦ.” ᔭᐲᓯᒥᐅᓪᓕ ᑕᒪᑐᒥᖓ ᑐᓴᕋᒥᒃ ᖁᕕᐊᓱᒻᒪᕆᓕᕐᐳᑦ.

¹⁰ ᑍᒤᒻᒪᑦ ᔭᐲᓯᒥᐅᑦ ᐃᓄᖏᑦ ᓇᕼᐋᓴᒧᑦ ᐅᖃᕐᐳᑦ, “ᑲᐅᒃᐸᑦ ᐃᓕᖕᓄᑦ ᕾᓛᕐᐳᒍᑦ, ᓱᓇᑐᐃᓐᓇᕐᒥᒡᓗ ᐱᓂᐊᕐᕕᒋᔪᒪᒍᑦᑎᒍᑦ ᐱᓂᐊᕐᕕᒋᓛᕐᐸᑦᑎᒍᑦ ᐃᓱᒪᕐᓱᕐᓗᑎᑦ.”

¹¹ ᖃᐅᑎᓪᓗᒍ ᐅᓪᓛᒃᑯᑦ ᓴᐅᓕᐅᑉ ᐃᓄᖁᑎᓂ ᐊᕕᒃᑐᕐᐰᑦ ᐱᖓᓱᐃᓕᓪᓗᒋᑦ; ᖃᐅᒻᒪᓕᕐᑎᓪᓗᒍ ᐊᑭᕋᖏᑕ ᑕᖕᒫᕐᓯᒪᕕᒋᔭᖓᓄᐊᕐᐳᑦ ᐅᓇᑕᕆᐊᕐᓗᑎᒃ, ᐊᒧᓁᑎᒥᐅᓪᓗ ᑐᖁᕋᕐᐰᑦ ᐅᓪᓘᑉ ᕿᑎᕋᕐᓂᖓᓄᑦ ᑎᑭᓪᓗᒍ; ᐊᒥᐊᒃᑰᔪᓪᓗ ᓯᐊᒻᒪᓚᐅᕐᐳᑦ, ᐂᑉᐸᖃᐅᕋᑎᒃ ᐃᓄᑑᓈᕐᑎᕐᓗᑎᒃ.

¹² ᑕᕝᕙ ᐃᓴᕆᐊᓕᒥᐅᑦ ᐃᓄᖏᑦ ᐅᖃᓕᕐᐳᑦ ᓴᒧᐃᓕᒧᑦ, “ᓇᐅᒡᓕ ᑍᒃᑯᐊ ᐃᓄᐃᑦ ᐅᖃᓚᐅᕐᑐᑦ, ‘ᓴᐅᓕ ᐊᐅᓚᑦᓯᔨᐅᔪᒃᓴᐅᕚ ᐅᕙᑦᑎᓐᓅᑦ? ᕾᑎᑕᐅᓚᐅᕐᓕᑦ ᑐᖁᓐᓂᐊᕋᑦᑎᒍᑦ!’”

¹³ ᓴᐅᓕᓕ ᐅᖃᕐᐳᖅ, “ᐅᓪᓗᒥ ᑐᖁᑕᐅᔪᖃᕐᓂᐊᓐᖏᓚᖅ, ᐅᓪᓗᒥ ᐊᑕᓂᐅᑉ ᐃᓴᕆᐊᓕᒥᐅᑦ ᐱᐅᓕᖕᒪᒋᑦ.”

¹⁴ ᑕᕝᕙ ᓴᒧᐃᓕᐅᑉ ᐃᓄᐃᑦ ᐅᖃᐅᑎᕔᑦ, “ᒋᐅᓪᒐᐅᓪᒧᐊᓚᐅᕐᑕ ᐊᖓᔪᖅᑲᐅᕕᖓ ᓄᑕᐅᓯᓕᕐᓂᐊᕋᑦᑎᒍ.”

¹⁵ ᑕᕝᕙ ᐃᓄᓕᒫᑦ ᒋᐅᓪᒐᐅᓪᒧᐊᐳᑦ, ᑕᕝᕙᓂᓗ ᒋᐅᓪᒐᐅᓪᒥ ᓴᐅᓕ ᐊᖓᔪᖅᑳᕐᔪᐊᖑᕐᑎᑉᐹ ᐊᑕᓂᐅᑉ ᓵᖓᓂ. ᑕᕝᕙᓂᓗ ᑐᓂᕐᕈᓯᕐᐳᑦ ᑐᓂᕐᕈᑎᒥ ᓮᒻᒪᕐᑎᑕᐅᓂᕐᒧᑦ ᐊᑕᓂᐅᑉ ᓵᖓᓂ, ᑕᕝᕙᓂᓗ ᓴᐅᓕ ᐃᓴᕆᐊᓕᒥᐅᓪᓗ ᐃᓄᖏᑦ ᐊᖏᔪᒥᒃ ᖁᕕᐊᓱᖃᑎᒌᓚᐅᕐᐳᑦ.