ᓴᒧᐃᓕ ᓯᕗᓪᓖᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᓴᒧᐃᓕᐅᑉ ᐊᓕᒍᖅ ᐅᕐᓱᒥᒃ ᐃᒪᓕᒃ ᑎᒍᕚ ᑯᕕᓪᓗᒍᓗ ᓴᐅᓕᐅᑉ ᓂᐊᖁᐊᓄᑦ, ᑯᓂᒡᓗᒍᓗ ᐅᖃᐅᑎᕚ, “ᐊᑕᓂᐅᑉ ᐅᕐᓱᕐᑎᕐᐹᑎᑦ ᐊᖓᔪᖅᑳᕐᔪᐊᓐᖑᖁᓪᓗᑎᑦ ᐃᓄᖁᑎᖏᓐᓄᑦ. ᐊᑕᓂᐅᑉ ᐃᓄᖁᑎᖏᑦ ᐊᖓᔪᖅᑲᐅᕕᒋᓂᐊᕐᐸᑎᑦ ᓴᐳᑎᓗᒋᓪᓗ ᐊᑭᕋᕐᑐᕐᑎᖏᓐᓂᑦ ᖃᓂᒋᔭᖏᓐᓃᑦᑐᓂᑦ. ᑕᒪᓐᓇᓗ ᓇᓗᓁᒃᑯᑕᕆᓂᐊᕐᐸᑦ ᐊᑕᓂᐅᑉ ᐅᕐᓱᕐᑎᕐᒪᑎᑦ ᐊᖓᔪᖅᑳᕐᔪᐊᖑᖁᓪᓗᑎᑦ ᐃᓄᖁᑎᖏᓐᓄᑦ.

² ᐅᓪᓗᒥ ᕿᒪᒃᑯᕕᖓ, ᑲᑎᓯᓂᐊᕐᐳᑎᑦ ᐊᖑᑏᖕᓂᒃ ᒪᕐᕉᖕᓂᒃ ᕅᒋᓕᐅᑉ ᐃᓗᕕᐊᑕ ᓴᓂᐊᓂ ᔨᐅᓪᔭᒥ ᐱᓐᔭᒥᓂᐅᑉ ᓄᓇᖓᓂ, ᐅᖃᐅᑦᔭᐅᓂᐊᕐᐳᑎᓪᓗ, ‘ᑍᒃᑯᐊ ᓯᐅᑎᖅᑯᕐᑐᔪᑦ ᕿᓂᓚᐅᕐᑕᑎᑦ ᓇᓂᔭᐅᓯᒪᓂᖏᓐᓂᒃ, ᐊᑖᑕᕕᓪᓗ ᐃᓱᒫᓗᒋᔪᓐᓃᕋᒥᒋᑦ ᐃᓕᖕᓂᖔᖅ ᐃᓱᒫᓗᓕᕐᐳᖅ, ᐅᕾᓐᓇᓕᕐᓗᓂᓗ, “ᖃᓄᐃᓕᐅᕐᑐᒃᓴᐅᕗᖓᓕ ᐃᕐᓂᓐᓄᑦ?”’

³ ᑍᑲᓐᖓᓪᓗ ᐊᐅᓪᓚᕈᒫᕐᐳᑎᑦ ᑎᑭᓪᓗᑎᓪᓗ ᓇᐹᕐᑐᒧᑦ ᐆᒃᒧᑦ ᐃᑦᔪᕐᓁᑦᑐᒧᑦ ᑍᐳᐊᒦᑦᑐᒧᑦ; ᑍᑲᓂᓗ ᑲᑎᓯᔪᒫᕐᐳᑎᑦ ᐊᖑᑎᓂᒃ ᐱᖓᓱᓂᒃ ᐱᑎᓕᒥ ᑐᓂᕐᕈᓯᕆᐊᕐᑐᕐᑐᓂᒃ ᒎᑎᒧᑦ, ᐃᓚᖓᑦ ᐱᖓᓱᓂᒃ ᒎᑦᓰᑦ ᓄᕐᕋᖏᓐᓂᒃ ᑎᒍᒥᐊᕈᒫᕐᐳᖅ, ᐃᓚᖓᓪᓗ ᐊᒡᔭᕐᓯᔪᒫᕐᐳᖅ ᓂᐊᖂᔭᓂᒃ ᐱᖓᓱᓂᒃ, ᐃᓚᖓᓪᓗ ᐊᒡᔭᕐᓯᔪᒫᕐᐳᖅ ᕿᓯᖕᒥᒃ ᕔᓂᖃᐅᑎᒥᒃ.

⁴ ᑐᓐᖓᓱᒃᑎᑦᓱᒫᕐᐹᑎᑦ ᑐᓂᔭᐅᓗᑎᓪᓗ ᓂᐊᖂᔮᖕᓂᒃ ᒪᕐᕉᖕᓂᒃ, ᑐᓐᖓᓱᒃᑎᓪᓗᒋᑦ ᑎᒍᔪᒫᕐᐸᑎᑦ ᑖᒃᑯᓇᓐᖓᑦ.

⁵ ᑕᒪᑐᒪ ᑭᖑᕐᖓᒍᑦ ᐂᔪᒃᓴᐅᕗᑎᑦ ᒋᐱᐊᑦ-ᐃᓗᕼᐃᒻᒧᑦ, ᒎᑎᐅᑉ ᖃᖅᑲᖓᓄᑦ, ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖃᕐᕕᖓᓄᑦ; ᑕᕝᕙᓂ ᐃᒤᑦᓱᒫᕐᐳᖅ ᑍᑯᖓ ᐃᒡᓗᒐᓴᖕᓄᑦ ᑎᑭᒃᑯᕕᑦ ᑲᑎᓯᔪᒫᕐᐳᑎᑦ ᐅᖃᕐᑎᓂᒃ ᖁᑦᓯᖕᓂᕐᐹᒥᑦ ᐱᔪᓂᒃ ᑯᑭᑦᑕᐸᐅᑎᐅᔭᓄᑦ ᓂᑦᔭᐅᓯᔭᕐᑐᓂᒃ ᓯᕙᓂᐅᑎᓂᒡᓗ, ᓱᐴᒐᐅᔭᓂᒡᓗ ᕼᐊᕐᐱᓂᒡᓗ ᐊᑐᕐᓗᑎᒃ, ᓇᓚᐅᑦᑍᔪᒫᕐᐳᑦ.

⁶ ᑕᕝᕙ ᐊᑕᓂᐅᑉ ᐊᓂᕐᓂᖓᑕ ᐱᔪᓐᓇᕐᓂᕐᔪᐊᖓᑕ ᑎᑭᑦᓱᒫᕐᐹᑎᑦ, ᓇᓚᐅᑦᑍᖃᑕᐅᓕᕐᓗᑎᓪᓗ ᑖᒃᑯᓄᖓ, ᐊᓯᑦᔨᕐᑕᐅᔪᒫᕐᐳᑎᓪᓗ.

⁷ ᑕᒪᒃᑯᐊ ᓇᓗᓁᒃᑯᑍᑦ ᐃᓕᖕᓄᑦ ᑎᑭᑉᐸᑕ, ᐱᓇᓱᐊᕈᓐᓇᕐᑕᕐᓂᒃ ᐱᓇᓱᐊᕐᑐᒃᓴᐅᕗᑎᑦ, ᒎᑎᐅᑉ ᐃᓚᒋᓂᐊᕐᒪᑎᑦ.

⁸ ᐅᕙᓐᓂᑦ ᓯᕗᓪᓕᐅᓗᑎᑦ ᒋᐅᓪᒐᐅᓪᒧᐊᕐᑐᒃᓴᐅᕗᑎᑦ; ᑕᑯᒋᓪᓗ ᐃᓕᖕᓄᑦ ᕾᔪᒫᕐᐳᖓ ᑐᓂᕐᕈᓯᕆᐊᕐᓗᖓ ᐃᑯᐊᓪᓚᒐᒃᓴᓂᒃ ᓮᒪᓂᕐᒧᓪᓗ ᑐᓂᕐᕈᑎᒃᓴᓂᒃ. ᐅᓪᓗᓂᒃ 7ᓂᒃ ᐅᑕᖅᑭᔪᒃᓴᐅᕗᑎᑦ ᑕᕝᕙᓂ, ᕾᓚᐅᖏᓐᓂᓐᓂ ᖃᐅᔨᑎᑦᓯᔭᕐᑐᕐᓗᖓ ᖃᓄᐃᓕᐅᕐᑐᒃᓴᐅᖕᒪᖔᕐᐱᑦ.”

⁹ ᓴᐅᓕᓕ ᓴᒧᐃᓕᒥᑦ ᑐᓄᓪᓗᓂ ᐊᐅᓪᓚᕐᒪᑦ, ᒎᑎᐅᑉ ᐆᒻᒪᑎᒥᒃ ᐊᓯᐊᓂᒃ ᑐᓂᓯᕕᒋᕚ; ᑖᒃᑯᐊᓗ ᓇᓗᓁᒃᑯᑕᓕᒫᑦ ᐅᓪᓗᒥ ᑍᑦᓱᒪᓂ ᓇᓚᐅᑦᓯᓚᐅᕐᐳᑦ.

¹⁰ ᖃᖅᑲᒧᓪᓗ ᑎᑭᓐᓇᒥᒃ ᒋᐱ-ᐊᒧᑦ, ᓇᓚᐅᑦᑍᔨᓂᑦ ᐅᐸᒃᑕᐅᕗᑦ; ᒎᑎᐅᓪᓗ ᐊᓂᕐᓂᖓᑕ ᐊᖏᔪᕐᔪᐊᒧᑦ ᑎᑭᑉᐹ, ᓇᓚᐅᑦᑍᖃᑕᐅᓕᕐᓗᓂᓗ ᑖᒃᑯᓇᓂ.

¹¹ ᑖᒃᑯᐊᓗ ᓯᕗᓂᖓᒍᑦ ᖃᐅᔨᒪᓚᐅᕐᑐᑦ ᓴᐅᓕᒥᒃ ᑕᑯᕗᑦ ᓇᓚᐅᑦᑍᖃᑕᐅᑎᓪᓗᒍ ᓇᓚᐅᑦᑍᔨᓂ, ᐃᒻᒥᖕᓄᑦ ᐅᖃᕐᐳᑦ, “ᓱᓇᒧᓄᓇ ᑭᓯᐅᑉ ᐃᕐᓂᖓ ᑎᑭᑕᐅᔪᖅ? ᓴᐅᓕᐅᓈ ᓇᓚᐅᕐᑍᔨᐅᖃᑕᐅᓕᕐᑐᖅ?”

¹² ᐊᖑᑏᑦ ᐃᓚᖓ ᑕᕝᕙᓂᒥᐅᖅ ᑭᐅᕗᖅ ᐅᖃᕐᓗᓂ, “ᑭᓇᒦᒃ ᐊᑖᑕᖃᕐᐸ?” ᑍᒤᒻᒪᑦ ᐅᖃᐅᓯᕐᑕᖃᓕᓚᐅᕐᐳᖅ ᐃᒫᒃ, “ᓴᐅᓕ ᓇᓚᐅᑦᑍᔪᓄᑦ ᐃᓚᒋᔭᐅᕚ?”

¹³ ᓇᓚᐅᑦᑍᔭᕇᕋᒥᓗ, ᖁᑦᓯᖕᓂᕐᐹᒧᑦ ᑐᓂᕐᕈᓯᕐᕕᖕᒧᑦ ᐂᕗᖅ.

¹⁴ ᓴᐅᓕᐅᑉ ᐊᒃᑲᖓᑕ ᐅᖃᐅᑎᕚ ᐱᔨᖓᓗ, “ᓇᒧᓐᖓᓚᐅᕐᐱᓰ?” ᓴᐅᓕᑉ ᑭᐅᕚ, “ᓯᐅᑎᖅᑯᕐᑐᔪᓂᒃ ᕿᓂᕆᐊᓚᐅᕐᐳᒍᑦ; ᓇᓂᔭᒃᓴᐅᖏᒻᒪᑕᓕ, ᓴᒧᐃᓕᒧᐊᓚᐅᕐᐳᒍᑦ.”

¹⁵ ᓴᐅᓕᐅᓪᓗ ᐊᒃᑲᖓᑕ ᐅᖃᐅᑎᕚ, “ᐅᖃᐅᑎᓐᖓ, ᖃᓄᖅ ᓴᒧᐃᓕᐅᑉ ᐅᖃᐅᑎᓚᐅᕐᐹᑎᑦ?”

¹⁶ ᓴᐅᓕᓗ ᐊᒃᑲᖕᒥᓄᑦ ᐅᖃᕐᐳᖅ, “ᐅᖃᐅᑎᑦᓯᐊᓚᐅᕐᐹᑎᒍᑦ ᓯᐅᑎᖅᑯᕐᑐᔪᑦ ᓇᓂᔭᐅᓯᒪᓕᕐᓂᖏᓐᓂᒃ.” ᑭᓯᐊᓂᓕ ᐊᖓᔪᖅᑲᐅᕕᒃ ᐱᓪᓗᒍ, ᓴᒧᐃᓕᐅᑉ ᐅᖃᐅᓯᕆᓚᐅᕐᑕᖏᓐᓂᒃ, ᐅᖃᐅᑎᓚᐅᓐᖏᓛ.

ᓴᐅᓕᐅᑉ ᐊᖓᔪᖅᑳᕐᔪᐊᕈᕐᑎᑕᐅᓂᖓ

¹⁷ ᑕᕝᕙ ᓴᒧᐃᓕᐅᑉ ᐃᓄᒐᓮᑦ ᑲᑎᖁᕔᑦ ᐊᑕᓂᕐᒥᒃ ᑲᑎᓯᖁᓪᓗᒋᑦ ᒥᔅᐸᒥ;

¹⁸ ᐃᓴᕆᐊᓕᐅᓪᓗ ᐃᓄᖏᑦ ᐅᖃᐅᑎᕔᑦ, “ᐊᑕᓂᖅ ᐃᓴᕆᐊᓕᒥᐅᑉ ᒎᑎᖓ ᐃᒫᒃ ᐅᖃᕐᐳᖅ, ‘ᐃᓴᕆᐊᓕᒥᐅᑉ ᐄᑦᔨᑉᑎᒥᑦ ᐊᐅᓚᕐᑎᓚᐅᕐᐸᒃᑲ, ᓴᐳᑎᓪᓗᒋᓪᓗ ᐄᑦᔨᑉᑎᒥᐅᑦ ᐱᔪᓐᓇᕐᓂᖏᓐᓂᑦ ᐊᑕᓂᐅᕕᓕᒫᓪᓗ ᐱᔪᓐᓇᕐᓂᖏᑕ ᐅᖁᒤᒃᓴᕐᑎᑦᓯᓂᖏᓐᓂᑦ.’

¹⁹ ᑭᓯᐊᓂᓕ ᐅᓪᓗᒥ ᒎᑎᑦᓯᓐᓂᒃ ᓇᕐᕈᓕᕐᐳᓯ, ᐃᓕᑦᓯᓐᓂᒃ ᐱᐅᓕᒃᓯᓚᐅᕐᑐᒥᒃ ᐅᖁᒤᑦᑐᓂᑦ ᐊᒃᓱᕈᕐᓇᕐᑐᓂᒡᓗ; ᑖᑦᓱᒧᖓᓗ ᐅᖃᓚᐅᕐᐳᓯ, ‘ᐋᒃᑲ, ᐊᖓᔪᖅᑳᕐᔪᐊᕐᑖᕐᑎᓚᐅᕐᑎᒍᑦ.’ ᒫᓐᓇᓕ ᑍᒤᒻᒪᑦ, ᐊᑕᓂᐅᑉ ᓵᖓᓄᑦ ᑐᓂᓕᕆᑦᓯ ᑭᖑᕚᕇᑦ ᐃᓚᒌᓪᓗ ᑲᑎᓐᖓᓗᑎᒃ.”

²⁰ ᑕᕝᕙ ᓴᒧᐃᓕᐅᑉ ᐃᓴᕆᐊᓕᐅᑉ ᑭᖑᕚᖏᑦ ᕾᖁᔭᕇᕋᒥᒋᑦ, ᐱᓐᔭᒥᓂᐅᑉ ᑭᖑᕚᖏᑦ ᓇᓚᐅᑦᓵᕈᑎᒃᑯᑦ ᓇᓚᐅᑕᐅᕗᑦ.

²¹ ᑕᕝᕙ ᐱᓐᔭᒥᓂᐅᑉ ᑭᖑᕚᖏᑦ ᕾᖁᓪᓗᒋᑦ ᐃᓚᒌᑦ ᒪᓕᒡᓗᒋᑦ, ᒪᑦᕅᑎᐅᑉ ᐃᓚᖏᑦ ᓇᓚᐅᑦᓵᕈᑎᒧᑦ ᓇᓚᐅᑕᐅᕗᑦ; ᑕᕝᕙ ᒫᑐᕆᑎᒥᐅᑦ ᐃᓚᖏᑦ ᐊᖑᑎᑦ ᕾᑎᒃᑭᕔᑦ, ᓴᐅᓕᓗ ᑭᔅ ᐃᕐᓂᖓ ᓇᓚᐅᑦᓵᕈᑎᒧᑦ ᓇᓚᐅᑕᐅᕗᖅ. ᓴᐅᓕᓕ ᕿᓂᕋᓗᐊᕐᒪᑦᔪᒃ, ᓇᓂᔭᐅᔪᓐᓇᓐᖏᓚᖅ.

²² ᑍᒤᒻᒪᑦ ᐊᑕᓂᕐᒥᒃ ᖃᐅᔨᒋᐊᓕᕆᕗᑦ, “ᑖᓐᓇ ᐊᖑᑦ ᑕᒫᓃᑉᐹ?” ᐊᑕᓂᖅ ᑭᐅᕗᖅ, “ᑕᑯᒋᑦ, ᐱᖁᑏᑦ ᐊᑯᕐᖓᓐᓂ ᐃᔨᕐᓯᒪᕗᖅ.”

²³ ᑕᕝᕙ ᐅᓪᓚᒡᓗᑎᒃ ᑕᕝᕗᖓ ᐅᐸᒃᐹᑦ ᕾᑦᔪᑎᓪᓗᒍᓗ; ᐃᓄᐃᓪᓗ ᐊᑯᕐᖓᓐᓂ ᓂᑯᕕᓐᓇᒥ ᑖᒃᑯᓇᓐᖓᓕᒫᖅ ᑕᑭᓂᕐᓴᐅᕗᖅ ᑐᐃᖏᓐᓂᑦ ᐱᒋᐊᕐᓗᒋᑦ.

²⁴ ᓴᒧᐃᓕᐅᓪᓗ ᐃᓄᓕᒫᑦ ᐅᖃᐅᑎᕔᑦ, “ᑕᑯᕕᓯᐅᑉ ᑖᓐᓇ ᐊᑕᓂᐅᑉ ᓂᕈᐊᕐᑕᖓ, ᑖᓐᓇ ᐊᑦᔨᒋᔭᐅᓐᖏᓚᖅ ᐃᓄᓕᒫᓂᑦ.” ᐃᓄᓕᒫᓪᓗ ᕾᒐᓛᓕᕐᐳᑦ ᐅᖃᕐᓗᑎᒃ, “ᐊᖓᔪᖅᑳᕐᔪᐊᖅ ᐊᑯᓂ ᐃᓅᓕ!”

²⁵ ᑕᕝᕙ ᓴᒧᐃᓕᐅᑉ ᐃᓄᐃᑦ ᓇᓗᓁᕐᓯᕕᒋᕔᑦ ᖃᓄᖅ ᐊᖓᔪᖅᑳᕐᔪᐊᑦ ᐱᔪᓐᓇᕐᓂᖃᕐᑐᒃᓴᐅᖕᒪᖔᑕ ᐱᐅᓯᖃᕐᑐᒃᓴᐅᖕᒪᖔᑕᓗ; ᑎᑎᕋᕐᓗᒋᓪᓗ ᐊᒡᓚᖕᓄᑦ ᐊᑕᓂᕐᒧᓪᓗ ᑐᓂᕔᑦ. ᑕᕝᕙ ᓴᒧᐃᓕᐅᑉ ᐃᓄᓕᒫᑦ ᐊᖏᕐᕋᖁᓕᕐᐰᑦ, ᐊᑐᓂᑦ ᐊᖏᕐᕋᒥᖕᓄᑦ.

²⁶ ᓴᐅᓕᓗ ᐊᖏᕐᕋᒥᓄᑦ ᐊᖏᕐᕋᕆᕗᖅ ᒋᐱ-ᐊᒧᑦ, ᐊᖑᑏᓪᓗ ᓯᕘᕋᖏᑦᑐᑦ ᐃᓚᒋᓪᓗᒋᑦ ᑖᒃᑯᐊ ᒎᑎᐅᑉ ᐆᒻᒪᑎᖏᑦ ᐊᒃᑐᓚᐅᕐᒪᒋᑦ.

²⁷ ᐃᓚᖏᓪᓕ ᐊᑭᕋᕐᑐᕐᑐᑦ ᐅᖃᕐᐳᑦ, “ᖃᓅᖅ ᑖᑦᓱᒧᖓ ᐱᐅᓕᔭᐅᔪᓐᓇᕋᑦᑕ?” ᑕᕝᕙ ᑖᑦᓱᒥᖓ ᓇᕐᕈᓕᕐᐳᑦ, ᐂᑦᑐᕐᓇᒍᓗ ᐱᑖᒃᓴᖏᓐᓂᒃ. ᓴᐅᓕᓕ ᓮᒪᓂᖃᑦᓯᐊᓚᕐᐳᖅ.