ᓴᒧᐃᓕ ᓯᕗᓪᓖᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᐅᓪᑳᓇᐅᑉ ᐃᓚᖏᑕᓗ ᓮᓗᐊᒦᓐᓂᖏᑦ

¹ ᐊᖑᑎᑕᖃᓚᐅᕐᐳᖅ ᐃᐅᓪᑳᓇᒥᒃ ᐊᑎᓕᖕᒥᒃ, ᐃᕗᕅᑎᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ, ᓄᓇᖃᕐᐳᖅ ᓄᓇᓕᖕᓂ ᕋᒪᑍᒻ-ᔫᐱᒻᒥ ᖃᖅᑲᓂ ᐃᕗᕅᑎᒥ, ᔨᕈᕼᐋᒻ ᐃᕐᓂᖓ ᐃᕐᖑᑕᕆᔭᐅᓪᓗᓂᓗ ᐃᓕᕼᐅᒧᑦ, ᑐᕼᐆᑉ ᐃᓚᖏᓐᓄᑦ ᐃᓚᒋᔭᐅᓪᓗᓂ, ᔪᐸᒃᑯᑦ ᐃᓚᖏᑕ ᐃᓚᖏᓐᓄᑦ ᐃᕗᕅᒥᐅᓄᑦ.

² ᐃᐅᓪᑳᓇᓕ ᓄᓕᐊᖃᕐᐳᖅ ᒪᕐᕉᖕᓂᒃ; ᕼᐋᓇᒥᒃ ᐱᓃᓇᒥᒡᓗ. ᐱᓃᓇ ᕿᑐᕐᖓᖃᕐᐳᖅ, ᕼᐋᓇᓕ ᕿᑐᕐᖓᖃᓚᐅᓐᖏᓚᖅ.

³ ᐊᕐᕌᒍᑕᒫᓪᓕ ᐃᐅᓪᑳᓇ ᐂᕙᓚᐅᕐᐳᖅ ᕌᒪᒥᑦ ᓮᓗᐊᒧᑦ ᑐᓂᕐᕈᓯᕆᐊᕐᑐᕐᓗᓂ ᑐᒃᓯᐊᕆᐊᕐᓗᓂᓗ ᐊᑕᓂᕐᒧᑦ ᐊᔪᒐᖃᖏᑦᑐᒧᑦ, ᕼᐅᐱᓂ ᐱᓂᕼᐋᓯᓗ ᐃᓔᑉ ᐃᕐᓂᖏᒃ ᐃᓚᒋᒡᓗᒋᒃ, ᑖᒃᑯᐊᒃ ᑐᓂᕐᕈᓯᕐᑎᑦᓯᔨᐅᔫᒃ ᐊᑕᓂᕐᒧᑦ.

⁴ ᑍᒪᓐᖓᑦ ᐃᐅᓪᑳᓇ ᑐᓂᕐᕈᓯᕌᖓᒥ, ᐂᑦᑐᐃᕙᓚᐅᕐᐳᖅ ᑐᓂᔭᒥᑕ ᐃᓚᖓᓂᒃ ᐱᓃᓇᒧᑦ ᕿᑐᕐᖓᖏᓐᓄᓪᓗ.

⁵ ᕼᐋᓇᒧᓪᓕ ᑐᓂᓯᕙᒃᐳᖅ ᐊᑕᐅᓯᕐᓯᐅᑎᒥᒃ, ᓇᒡᓕᒋᒻᒪᕆᒃᑲᓗᐊᕐᓗᒍ ᕼᐋᓇ, ᐊᑕᓂᐅᑉ ᒪᑐᓯᒪᓚᐅᕐᒪᒍ ᐃᒡᓕᐊᖓ.

⁶ ᐱᓃᓇᓗ, ᑖᑦᓱᒧᖓ ᐸᒡᕕᓵᖃᑕᐅᕙᓚᐅᕐᐳᖅ ᑲᓐᖑᓱᒃᑎᓪᓗᒍᓗ, ᐊᑕᓂᕐᒧᑦ ᐃᒡᓕᐊᖓ ᒪᑐᔭᐅᓯᒪᓂᖓ ᐱᑦᔪᑎᒋᓪᓗᒍ.

⁷ ᑍᒤᓕᐅᖃᑦᑕᓚᐅᕐᐳᖅ ᐊᕐᕌᒍᑕᒫᑦ; ᑍᒪᓐᖓᑦ ᐊᑕᓂᐅᑉ ᐃᒡᓗᖓᓄᐊᕌᖓᒥᒃ, ᐱᓃᓇᐅᑉ ᖁᕕᐊᓱᒍᓐᓃᕐᑎᑉᐸᓚᐅᕐᐹ. ᑍᒤᒻᒪᑦ ᕼᐋᓇ ᕿᐊᓕᓚᐅᕐᐳᖅ ᓂᕆᔪᒪᔪᓐᓃᕐᓗᓂᓗ.

⁸ ᐅᐃᖓᑕ ᐃᐅᓪᑳᓇᐅᑉ ᐊᐱᕆᕚ, “ᕼᐋᓇ, ᓱᖕᒪᑦ ᕿᐊᕖᑦ? ᓱᖕᒪᓪᓗ ᓂᕆᔪᒪᓐᖏᓚᑏᑦ? ᓱᖕᒪᑦ ᐆᒻᒪᑎᖕᓂ ᕿᒃᓵᒃᐲᑦ? ᐱᐅᓂᕐᓴᐅᓐᖏᓚᖔ ᐃᕐᓂᓂᑦ 10ᓃᑦ?”

ᕼᐋᓇᓗ ᐃᓔᓗ

⁹ ᓂᕆᔭᕇᕋᒥᒃ ᐃᒥᕇᕋᒥᒡᓗ ᐊᑕᓂᐅᑉ ᐃᒡᓗᖓᓂ ᓮᓗᐊᒥ, ᕼᐋᓇ ᒪᑭᑉᐳᖅ. ᐃᓔᓕ ᑐᓂᕐᕈᓯᕐᑎᑦᓯᔨ ᐃᒃᓯᕙᓚᐅᕐᐳᖅ ᐃᒃᓯᕙᐅᑕᕐᒥ ᐊᑕᓂᐅᑉ ᑐᐱᖓᑕ ᐃᑎᕐᑕᕐᕕᖓᑕ ᓴᓂᐊᓂ.

¹⁰ ᕼᐋᓇ ᐅᖁᒤᒃᓴᒻᒪᕆᒃᓗᓂ ᑐᒃᓯᐊᕐᐳᖅ ᐊᑕᓂᕐᒧᑦ, ᕿᐊᓪᓗᓂᓗ.

¹¹ ᐊᖏᒻᒪᕆᒡᓗᓂᓗ ᐅᖃᕐᐳᖅ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᑕᑯᔪᓐᓇᕈᕕᐅᒃ ᐊᑲᐅᓐᖏᓕᐅᕈᑎᒋᔭᕋ, ᐃᖅᑲᐅᒪᓚᐅᓐᖓ, ᐳᐃᒍᕐᑍᓕᓗᓐᖓ, ᐃᕐᓂᕐᑖᕐᑎᓚᐅᓐᖓ, ᐊᖏᒻᒪᕆᒃᐳᖓ ᐃᓕᖕᓄᑦ ᐊᑕᓃᖅ ᐃᓅᓯᓕᒪᖓ ᑐᓂᔪᒫᕐᐸᕋ, ᓄᔭᖏᓪᓗ ᑭᑦᔭᕐᑕᐅᓚᐅᕐᓯᒪᒐᔭᓐᖏᓚᑦ.”

¹² ᕼᐋᓇ ᑲᔪᓯᓪᓗᓂ ᑐᒃᓯᐊᕐᑎᓪᓗᒍ ᐊᑕᓂᕐᒧᑦ, ᐃᓔ ᑕᑯᓐᓇᕐᐳᖅ ᖃᓂᖓᓂᒃ.

¹³ ᕼᐋᓇᓕ ᑐᒃᓯᐊᕐᓗᓂ ᓂᐱᖃᖏᒻᒪᑦ; ᖃᓂᖓ ᐊᐅᓚᒐᓗᐊᕐᑎᓪᓗᒍ, ᓂᐱᖓ ᑐᓴᕐᓴᐅᓚᐅᖏᒻᒪᑦ; ᑍᒤᒻᒪᑦ ᐃᓔ ᐃᓱᒪᓕᕐᐳᖅ ᑖᓐᓇ ᐊᕐᓇᖅ ᐋᖓᔮᕋᓱᒋᓪᓗᒍ.

¹⁴ ᐃᓔᓪᓗ ᐅᖃᐅᑎᕚ, “ᖃᓄᖅ ᐊᑯᓂᐅᑎᒋᔪᖅ ᐋᖓᔮᕐᓂᐊᕐᐲᑦ? ᐃᒥᐊᓗᒍᓐᓃᕆᑦ ᐋᖓᔮᕈᓐᓂᕐᓗᑎᓪᓗ.”

¹⁵ ᕼᐋᓇᓕ ᑭᐅᕗᖅ, “ᐊᖓᔪᖅᑳᒃ, ᐋᖓᔮᓐᖏᓚᖓ, ᐃᒥᐊᓗᓚᐅᕐᓇᖓᓗ ᕔᓂᒥᒃ ᓴᓐᖏᔪᒥᒡᓘᓐᓃᑦ, ᐃᓗᖏᕐᓱᒻᒪᕆᒡᓗᖓᓕ ᑐᒃᓯᐊᕐᐳᖓ; ᐅᖁᒤᒃᓴᐅᑎᒋᔭᒃᑲ ᑕᕐᓂᓐᓂ ᑐᓂᕙᒃᑲ ᐊᑕᓂᕐᒧᑦ.

¹⁶ ᐱᔩᑦ ᓱᓇᐅᖏᑦᑑᓇᓱᒋᓂᐊᕐᓇᒍ, ᑍᒫᒃ ᑐᒃᓯᐊᓚᐅᕐᐳᖓ ᐊᖏᔪᒥᒃ ᐊᑲᐅᖏᑦᔪᑎᖃᕋᒪ ᕿᒃᓵᕕᒡᔪᐊᕐᓗᖓᓗ.”

¹⁷ ᑕᕝᕙ ᐃᓔᑉ ᑭᐅᕚ, “ᐃᓱᒫᓗᖏᓪᓗᑎᑦ ᐊᓂᓕᕆᑦ, ᐃᓴᕆᐊᓕᒥᐅᑦ ᒎᑎᖓᑕ ᑐᓂᓯᕕᒋᓕᑎᑦ ᑖᑦᓱᒪᓐᖓᑦ ᐱᔪᒪᔭᕐᓂᒃ.”

¹⁸ ᕼᐋᓇ ᑭᐅᕗᖅ, “ᐱᔩᑦ ᖁᕕᐊᒋᓗᒍ ᐃᓱᒪᒋᑦᓯᐊᕈᒃ,” ᑕᕝᕙ ᐊᕐᓇᖅ ᑕᕝᕙᓐᒐᑦ ᐊᓂᒐᒥ ᓂᕆᓕᓚᐅᕐᐳᖅ, ᑮᓇᖓᓗ ᖁᕕᐊᓱᖏᓐᓂᕐᒧᑦ ᑕᑯᑦᓱᓇᕈᓐᓃᕐᓗᓂ.

ᓴᒧᐃᓕᐅᑉ ᐃᕐᓂᐊᖑᓂᖓ ᑐᓂᕐᕈᑕᐅᓂᖓᓗ

¹⁹ ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᑉᐳᑦ ᐊᑕᓂᕐᒧᓪᓗ ᑐᒃᓯᐊᕐᐳᑦ; ᑭᖑᓂᖓᒍᑦ ᐅᑎᕐᐳᑦ ᐊᖏᕐᕋᒧᑦ ᕌᒪᒧᑦ. ᐃᐅᓪᑳᓇᐅᓪᓗ ᕼᐋᓇ ᓄᓕᐊᓂ ᐱᖃᑎᒋᖕᒪᒍ, ᑐᒃᓯᐊᕐᓂᖓ ᐊᑕᓂᐅᑉ ᐃᖅᑲᐅᒪᓚᐅᕐᐹ.

²⁰ ᑕᒪᑐᒪ ᑭᖑᓂᖓᒍᑦ ᕼᐋᓇ ᓄᑕᕋᒃᓴᕐᑖᕐᐳᖅ, ᕿᑐᕐᖓᕐᑖᕐᕕᒃᓴᖓᓗ ᓇᓪᓕᐅᑎᖕᒪᑦ ᐃᕐᓂᕐᑖᕐᐳᖅ, ᐊᑦᓯᕐᐹᓗ ᓴᒧᐃᓕᒥ, ᐅᖃᕐᓗᓂ, “ᐊᑕᓂᖅ ᕿᓄᕕᒋᓚᐅᕋᒃᑯ ᑖᑦᓱᒥᖓ.”

²¹ ᐃᐅᓪᑳᓇᐅᓪᓗ ᐃᓚᓕᒫᖏᑕᓗ ᐊᐅᓪᓚᕐᕕᒃᓴᖓ ᓮᓗᐊᒧᑦ ᓇᓪᓕᐅᑎᖕᒪᑦ ᑐᓂᕐᕈᓯᕆᐊᕐᑐᕐᐳᖅ ᐊᑕᓂᕐᒧᑦ ᐊᕐᕌᒍᑕᒫᕐᓯᐅᑎᒥᒃ ᑐᓂᕐᕈᓯᕆᐊᕐᑐᕐᓗᑎᒃ, ᐊᖏᕈᑎᒋᓯᒪᔭᒥᓂᒡᓗ ᑐᓂᕐᕈᓯᕆᐊᕐᑐᕐᓗᓂ.

²² ᕼᐋᓇᓕ ᑍᑦᓱᒪᓂ ᐱᖃᑕᐅᓚᐅᓐᖏᓚᖅ, ᐅᐃᓂᓗ ᐅᖃᐅᑎᓚᐅᕐᐹ, “ᓱᕈᓯᖅ ᐃᒻᒥᓂᒃ ᐱᔪᓐᓇᕐᓯᑐᐊᕐᐸᑦ, ᐊᑕᓂᐅᑉ ᐃᒡᓗᖓᓄᐊᕈᑎᔪᒫᕐᐸᕋ, ᐊᑕᓂᐅᑉ ᓵᖓᓄᑦ ᓴᖅᑭᑎᑦᓱᒫᕋᒃᑯ, ᑍᑲᓂᓗ ᐃᓂᖃᓕᕈᒫᕐᒪᑦ ᐃᓅᓯᓕᒫᒥᓂ.”

²³ ᐅᐃᖓᑕᓗ ᐃᐅᓪᑳᓇᐅᑉ ᐅᖃᐅᑎᕚ, “ᐃᓕᖕᓄᑦ ᐱᐅᔫᓇᓱᒋᔭᕐᓂᒃ ᐊᑐᓕᕆᑦ, ᐅᑕᖅᑭᓕᕆᑦ ᑖᓐᓇ ᐃᒻᒥᓂᒃ ᐱᔪᓐᓇᕐᓯᓚᐅᖏᓐᓂᖓᓂ; ᐊᑕᓂᐅᓪᓕ ᐅᖃᐅᓯᕆᓯᒪᔭᓂ ᓱᓕᑎᓪᓕᐅᒃ.” ᑍᒤᒻᒪᑦ ᕼᐋᓇ ᐊᖏᕐᕋᕐᓯᒪᓕᓚᐅᕐᐳᖅ ᐃᕐᓂᓂ ᑲᒪᒋᓪᓗᓂᐅᒃ, ᐃᒻᒥᓂᒃ ᐱᔪᓐᓇᕐᓯᓚᐅᖏᓐᓂᖓᓂ.

²⁴ ᐃᕐᓂᖓᓗ ᐃᒻᒥᓂᒃ ᐱᔪᓐᓇᕐᓯᖕᒪᑦ, ᓮᓗᐊᒧᑦ ᐂᑦᔪᑎᕚ, ᓇᒃᓴᕐᓗᓂ ᐱᖓᓱᓂᒃ ᐊᕐᕌᒍᓕᖕᒥᒃ ᐃᒻᒧᒃᓯᐅᒊᑦ ᐸᖕᓂᖓᓂᒃ, ᐃᕕᐅᔭᕐᒦᑦᑐᒥᒡᓗ ᓂᐊᖂᔭᒥᒃ, ᕿᓯᖕᒥᒡᓗ ᕔᓂᒥᒃ ᑕᑕᑦᑐᒥᒃ; ᓴᒧᐃᓕᓗ ᒥᑭᔫᒐᓗᐊᕐᑎᓪᓗᒍ; ᐊᑕᓂᐅᑉ ᐃᒡᓗᖓᓄᐊᕈᑎᕚ ᓮᓗᐊᒧᑦ.

²⁵ ᐸᖕᓃᕐᓗ ᑐᖁᑕᐅᑎᒌᕋᒥᐅᒃ, ᑕᕝᕙ ᓱᕈᓯᖅ ᐃᓔᒧᐊᕈᑎᕚ.

²⁶ ᕼᐋᓇᓗ ᐅᖃᕐᐳᖅ, “ᐊᖓᔪᖅᑳᒃ! ᐃᖅᑲᐅᒪᕕᖔ? ᑖᓐᓇᐅᕗᖓ ᐊᕐᓇᖅ ᑕᕝᕙᓃᑎᓪᓗᑎᑦ ᑕᑯᓚᐅᕐᓯᒪᔧᑦ ᑕᒫᓂ ᓇᖏᕐᑎᓪᓗᖓ, ᑐᒃᓯᐊᕐᑎᓪᓗᖓ ᐊᑕᓂᕐᒧᑦ.

²⁷ ᑐᒃᓯᐊᕐᕕᒋᓚᐅᕐᐸᕋ ᑖᑦᓱᒥᖓ ᓱᕈᓯᕐᒥᒃ; ᐊᑕᓂᐅᓪᓗ ᑐᓂᓚᐅᕐᐹᖓ ᕿᓄᑦᔪᑎᒋᓚᐅᕐᑕᓐᓂᒃ ᑖᑦᓱᒧᖓ.

²⁸ ᑍᒤᒻᒪᑦ ᑐᓂᓕᕐᐸᕋ ᐊᑕᓂᕐᒧᑦ; ᐃᓅᓯᖓ ᓈᓗᒍ ᐊᑕᓂᐅᑉ ᐱᒋᓂᐊᕐᐹ.” ᑕᕝᕙᓂᓗ ᐊᑕᓂᕐᒥᒃ ᓂᕐᑐᐃᓪᓗᑎᒃ ᑐᒃᓯᐊᕐᐳᑦ.