ᐲᑦᑐᕉᓯ ᓯᕗᓪᓖᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᓯᖅ ᐊᓯᑦᔨᕐᓯᒪᔪᖅ

¹ ᑍᒤᒻᒪᑦ ᙭ᔅᑑᓯ ᐋᓐᓂᐊᓚᐅᕐᒪᑦ ᑎᒥᒥᒍᑦ, ᐃᓕᑦᓯᑦᑕᐅᖅ ᑍᒫᒃ ᐃᓱᒪᖃᓕᕆᑦᓯ ᐱᔪᓐᓇᐅᑎᒋᓗᒍ, ᐃᓄᒃ ᑎᒥᒥᒍᑦ ᐋᓐᓂᐊᑎᑕᐅᔪᖅ ᐊᔪᕐᑐᓕᓂᖅ ᐊᑐᕈᓐᓃᕐᒪᒍ.

² ᒫᓐᓇᒥᑦ ᑕᒫᓂ ᓄᓇᒥ ᐃᓅᓯᓕᒫᓯ ᓈᓗᒍ ᐃᓅᔭᕆᐊᖃᓕᕐᐳᓯ ᒎᑎᐅᑉ ᐱᔪᒪᔭᖓᓄᑦ ᐊᐅᓚᑕᐅᓗᓯ, ᑎᒥᐅᑉ ᐱᔪᒪᔭᖓᓅᖏᑦᑐᖅ.

³ ᐊᓂᒍᕐᓯᒪᓕᕐᒪᑕ ᐃᓅᓯᕆᓚᐅᕐᑕᓯ ᐅᒃᐱᖏᑦᑐᑦ ᐱᔪᒪᓂᖏᑦ ᒪᓕᒃᓗᒋᑦ, ᐃᓅᓯᒪᒐᑦᓯ ᑲᓐᖑᓇᕐᑐᓕᓂᕐᓂᒃ, ᐃᒃᖠᒍᖕᓂᕐᓂᒃ, ᐋᖓᔮᕐᓂᕐᓂᒃ, ᓄᓕᐊᕐᓂᕐᓂᒃ, ᐃᒥᐊᓗᖕᒧᑦ ᖁᕕᐊᓲᑎᖃᕐᓂᕐᓂᒃ, ᓇᕐᕈᓇᕐᑐᓄᓪᓗ ᑐᒃᓯᐊᖃᑦᑕᕐᓂᕐᓂᒃ ᒎᑎᐅᖏᑦᑐᓄᑦ.

⁴ ᑍᒤᓕᐅᖃᑎᒋᕙᓚᐅᕐᑕᓯ ᑲᒪᓂᐊᕐᐳᑦ ᐱᓕᕆᐊᖏᓐᓂᒃ ᐱᓇᓱᐊᖃᑎᒋᔪᓐᓃᕋᑦᓯᐅᒃ ᐃᓅᓯᖃᕈᓐᓃᕋᑦᓯᓗ ᑐᑮᕈᑎᓯᒪᔪᑎᑐᑦ, ᑍᒤᒻᒪᑦ ᐅᖃᕐᓂᕐᓘᑎᖃᕋᓱᐊᓕᕐᐳᑦ ᐃᓕᑦᓯᓐᓂᒃ.

⁵ ᐃᓅᓯᕐᒥᖕᓂᒡᓕ ᒎᑎᒧᑦ ᐅᖃᐅᓯᖃᕆᐊᖃᕈᒫᕐᐳᑦ ᐅᐸᓗᖕᒊᕐᓯᒪᔪᒧᑦ ᐃᖅᑲᕐᑐᐃᓂᐊᕐᓗᓂ ᐃᓅᔪᓂᒃ ᑐᖁᖓᔪᓂᒡᓗ.

⁶ ᑕᒪᓐᓇ ᐱᑦᔪᑎᒋᓪᓗᒍ ᐅᖃᐅᓰᑦ ᑐᓴᕈᒥᓇᕐᑐᑦ ᐊᔪᕆᕐᑐᐃᑦᔪᑕᐅᓯᒪᕗᑦ ᑐᖁᓚᐅᕐᓯᒪᔪᓄᑦ ᐊᒡᓛᑦ, ᑖᒃᑯᐊᑦᑕᐅᖅ ᐃᖅᑲᕐᑐᕐᑕᐅᔪᒫᕐᒪᑕ ᑎᒥᒥ ᐃᓅᔪᑦ ᐃᖅᑲᕐᑐᕐᑕᐅᓂᒃᓴᖏᑎᑐᑦ, ᐊᓂᕐᓂᑯᑦ ᐆᒪᓕᖁᓪᓗᒋᑦ ᓲᕐᓗ ᒎᑎ ᐆᒪᖕᒪᑦ.

ᒎᑎᐅᑉ ᑐᓂᕐᕈᑎᖏᓐᓂᒃ ᑲᒪᔨᐅᑦᓯᐊᕐᓂᖅ

⁷ ᓱᓇᓕᒫᑦ ᐃᓱᓕᕝᕕᒃᓴᖓᑦ ᖃᒡᓕᕗᖅ; ᑍᒤᒻᒪᑦ ᖃᐅᔨᒪᓇᓱᑦᓯᐊᕆᐊᖃᓕᕐᐳᓯ ᐃᒻᒥᓂᒃ ᐱᓯᒪᑦᓯᐊᕈᓐᓇᕐᑐᒥᒃ ᐃᓅᓯᑲᕐᓗᓯ ᑐᒃᓯᐊᕈᓐᓇᕐᓂᐊᕋᑦᓯ.

⁸ ᐊᖏᓂᕐᐹᒥᒡᓕ ᓱᓕᓪᓚᕆᒃᑐᒥᒃ ᓇᒡᓕᒃᑎᒌᒃᑐᒃᓴᐅᕗᓯ ᐃᓕᑦᓯᓐᓄᑦ, ᓇᒡᓕᖕᓂᐅᑉ ᑲᒪᒋᔪᓐᓇᕐᒪᒋᑦ ᐊᔪᕐᑐᓕᓃᑦ ᐊᒥᓱᑦ.

⁹ ᐊᖏᕐᕋᑦᓯᓐᓄᑦ ᑐᓐᖓᓱᑎᑦᑎᖃᑦᑕᕆᑦᓯ ᓈᒻᒪᒃᓴᖏᑦᔪᑎᒋᓐᖏᓪᓗᒍ.

¹⁰ ᐊᑐᓂᑦ ᑐᓂᕐᕈᓯᐊᕐᓯᒪᒐᑦᓯ, ᑕᒪᒃᑯᐊ ᐃᓅᖃᑎᑦᓯᓐᓄᑦ ᐱᔨᑦᓯᕈᑎᒋᓯᐅᒃ, ᐊᑐᑦᓯᐊᖁᓪᓗᓯ ᒎᑎᒥᑦ ᑐᓂᕐᕈᓯᐊᑦᓯᓐᓂᒃ ᐱᑦᓯᐊᕐᓂᖓᑕ ᐱᔪᓐᓇᕐᓯᑎᑦᓯᓂᖓᒍᑦ:

¹¹ ᓇᓪᓕᐊᑦ ᐊᔪᕆᕐᑐᐃᒍᓂ, ᐊᔪᕆᕐᑐᐃᔪᒃᓴᐅᕗᖅ ᒎᑎᐅᑉ ᐅᖃᐅᓯᐅᖁᔭᖓᓂᒃ; ᓇᓪᓕᐊᑦ ᐱᔨᑦᓯᕐᑐᖅ, ᐱᔨᑦᓯᕐᑐᒃᓴᐅᕗᖅ ᐱᔪᓐᓇᕐᓂᖅ ᒎᑎᒥᑦ ᑐᓂᕐᕈᓯᐊᕆᔭᓂ ᐊᑐᕐᓗᓂᐅᒃ; ᑕᒤᑎᒍᑦ ᒎᑎ ᓂᕐᑐᕐᓇᕐᑎᑕᐅᖁᓪᓗᒍ ᔩᓱᓯ ᙭ᔅᑑᓯᒃᑯᑦ. ᑖᓐᓇ ᓂᕐᑐᕐᑕᐅᓂᕐᒥᒃ ᐱᓕᑑᖕᒪᑦ ᐱᔪᓐᓇᕐᓂᕐᒥᒡᓗ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒦᓐ.

ᐊᒃᓱᕈᕐᓇᕐᑐᑰᕐᑎᑕᐅᓂᖅ ᙭ᔅᑑᓯᒥᐅᑕᐅᓂᕐᒧᑦ

¹² ᓇᒡᓕᖕᓇᕐᑐᓯ, ᑲᒪᓂᐊᕐᑍᓕᒋᑦᓯ ᒫᓐᓇ ᐊᒃᓱᕈᖕᓇᕐᑐᒦᑎᑕᐅᓗᐊᕐᓂᓯ ᐱᑦᔪᑎᒋᓗᒍ, ᐆᒃᑐᕋᕐᑕᐅᑦᔪᑎᒋᒐᑦᓯᐅᒃ ᐊᑦᔨᐅᖏᑦᑐᒥᒃ ᐊᑐᕋᓱᒋᑦᑍᓕᒋᑦᓯ.

¹³ ᖁᕕᐊᓲᑎᒋᓯᐅᒡᓕ ᙭ᔅᑑᓯᐅᑉ ᓯᕐᓕᕿᑎᑕᐅᓂᕆᓚᐅᕐᑕᖓᓂᒃ ᐃᓚᖏᐅᑎᑎᑕᐅᒐᑦᓯ ᑕᒪᑐᒧᖓ, ᖁᕕᐊᓲᑎᖃᒻᒪᕆᒍᓐᓇᖁᓪᓗᓯ ᓯᕆᓗᓯᓗ ᑖᑦᓱᒪ ᓂᕐᑐᕐᓇᕐᓂᕐᔪᐊᖓ ᓴᖅᑭᑎᑕᐅᒃᐸᑦ.

¹⁴ ᐅᖃᕐᓂᕐᓗᒃᕕᐅᒍᑦᓯ ᙭ᔅᑑᓯᐅᑉ ᐊᑎᖓ ᐱᓪᓗᒍ, ᑕᑉᕙ ᓮᒻᒪᕐᑎᑕᐅᑦᔪᑎᒃᓴᖃᕐᐳᓯ ᒎᑎᐅᑉ ᐊᓂᕐᓂᖓ ᐱᓐᓇᕐᓇᕐᑐᕐᔪᐊᖅ ᐃᓂᖃᕐᒪᑦ ᐃᓕᑦᓯᓐᓂ.

¹⁵ ᓇᓪᓕᓯ ᐊᒡᕕᐊᕈᕐᑎᑕᐅᑦᑍᓕᓕ ᐃᓄᐊᕐᓂᕐᒧᑦ, ᑎᒡᓕᖕᓂᕐᒧᑦ, ᐊᔪᕐᑐᓕᓂᕐᒧᑦ, ᐅᕝᕙᓘᓐᓃᑦ ᐃᓅᖃᑎᒥᓄᑦ ᐸᒃᕕᓵᕆᔨᐅᓂᕐᒧᑦ;

¹⁶ ᐅᖁᒤᑐᕐᔪᐊᕐᒥᑎᑕᐅᓕᕈᑦᓯᓕ ᙭ᔅᑑᓯᒥᐅᑕᐅᓂᓯ ᐱᑦᔪᑎᒋᓗᒍ, ᑕᒪᓐᓇ ᑲᓐᖑᓲᑎᒋᑦᑍᓕᓯᐅᒃ, ᒎᑎᓕ ᓂᕐᑐᕐᓯᐅᒃ ᑖᑦᓱᑐᓇᖅ ᐱᔭᐅᓂᓯ ᐱᑦᔪᑎᒋᓗᒍ.

¹⁷ ᒫᓐᓇ ᐃᖅᑲᕐᑐᕐᑕᐅᓂᖅ ᐱᒋᐊᕐᒪᑦ ᒎᑎᐅᑉ ᐃᓄᖁᑎᖏᓐᓂᑦ; ᐅᕙᑦᑎᓐᓂᓪᓗ ᐱᒋᐊᕐᓂᖃᕐᐸᑦ, ᖃᓄᕐᓕ ᒎᑎᐅᑉ ᐅᖃᐅᓯᖏᓐᓂᒃ ᑐᓴᕈᒥᓇᕐᑐᖁᑎᖏᓐᓂᑦ ᓈᓚᒍᒪᖏᑦᑐᑦ ᐃᓱᓕᑉᕕᖃᓛᕐᐸᑦ?

¹⁸ ᐊᒡᓔᑦ ᐅᖃᕐᒪᑕ, “ᐃᓗᐊᕐᑐᓕᔪᖅ ᓯᕐᓚᒃ ᐱᐅᓕᔭᐅᔪᓐᓇᕐᐸᑦ, ᖃᓄᕐᓕ ᑍᒪ ᒎᑎᖃᖏᑦᑐᑦ ᐊᔪᕐᑐᓕᔪᓪᓗ ᐱᒐᔭᓕᕐᐸᑦ?”

¹⁹ ᑍᒤᒻᒪᑦ ᐊᒃᓱᕈᕐᓇᕐᑐᒦᑎᑕᐅᔪᑦ ᒎᑎᐅᑉ ᐱᔪᒪᔭᖓ ᒪᓕᒡᓗᒍ ᐱᓂᐊᕐᓂᖃᑦᓯᐊᕆᐊᖃᕐᐳᑦ ᐃᒻᒥᖕᓂᒡᓗ ᑐᓂᓯᒪᑦᓯᐊᕐᓗᑎᒃ ᐱᓐᖑᕐᑎᑦᑎᔨᒥᖕᓄᑦ, ᐊᖏᕈᑎᒋᓯᒪᔭᒥᓂᒃ ᓴᖑᑎᑦᓯᕙᖏᑦᑐᒧᑦ.