ᐲᑦᑐᕉᓯ ᓯᕗᓪᓖᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᔭᕋᒃ ᐆᒪᔪᖅ ᐃᓅᖃᑎᒌᒡᔪᐊᓪᓗ ᐃᑦᔪᕐᓁᑦᑐᑦ

¹ ᑍᒤᒻᒪᑦ, ᐊᔪᕐᑐᓕᑦᔪᑕᐅᔪᓐᓇᕐᑐᓕᒫᑦ ᓄᖅᑲᐅᑎᓕᕐᓯᒋᒃ ᓴᒡᓗᖃᑦᑕᕐᓃᑦ, ᑕᒃᑯᕐᒨᕐᓃᑦ, ᐱᔪᒪᕕᒡᔪᐊᕐᓃᑦ, ᒥᑕᐅᑎᖃᕐᓃᓪᓗ ᖃᓄᑐᐃᓐᓇᖅ.

² ᐃᓅᕋᑖᕐᑐᑎᑐᓪᓕ ᑍᒤᓕᕆᑦᓯ, ᐃᒥᕈᒃᑐᑎᑐᑦ ᐃᓚᐅᕐᓯᒪᓐᖏᑦᑐᒥᒃ ᐃᒻᒧᖕᒥᒃ ᐊᓂᕐᓂᕐᒥᑦ ᐱᔪᒥᒃ, ᑍᒤᑦᑐᒥᒃ ᐃᒥᖃᑦᑕᕐᓂᑦᓯᒍᑦ ᐱᕈᕐᐸᓪᓕᐊᖁᓪᓗᓯ ᐱᐅᓕᔭᐅᓂᕐᒥ,

³ ᖃᐅᔨᓯᒪᓕᕈᑦᓯ ᐊᑕᓂᐅᑉ ᐱᐅᔪᐊᓘᓂᖓᓂᒃ.

⁴ ᐊᑕᓂᕐᒧᐊᕐᓯᒪᓕᕋᑦᓯ, ᐅᔭᖅᑲᒧᑦ ᐆᒪᔪᒧᑦ; ᐃᓄᖕᓂᑦ ᓇᕐᕈᒋᔭᐅᓚᐅᕐᑐᒧᑦ ᒎᑎᐅᓪᓕ ᓂᕈᐊᓚᐅᕐᑕᖓᓄᑦ ᑖᑦᓱᒧᖓ ᐱᕕᐊᕐᓇᒻᒪᕆᒃᑐᒧᑦ.

⁵ ᐃᓕᑦᓯᑦᑕᐅᖅ, ᐅᔭᕋᒃᑎᑐᑦ ᐆᒪᔪᑎᑐᑦ, ᐃᒡᓗᓕᐊᖑᓕᕐᐳᓯ ᐊᓂᕐᓂᒃᑯᑦ ᐃᒡᓗᓕᐊᕆᔭᐅᔪᒧᑦ ᑐᓂᕐᕈᓯᕐᑎᑦᓯᔨᐅᖁᓪᓗᓯ ᐃᑦᔪᕐᓁᑦᑑᓗᓯ, ᐊᓂᕐᓂᒃᑯᑦ ᑐᓂᕐᕈᓯᕐᑎᑦᓯᔨᐅᖁᓪᓗᓯ ᒎᑎᒧᑦ ᓈᒻᒪᒋᔭᐅᔪᒥᒃ ᔩᓱᓯ ᙭ᔅᑑᓯᒃᑯᑦ.

⁶ ᐊᒡᓔᑦ ᐅᖃᕐᒪᑕ: “ᑕᑯᒋᑦ, ᐅᔭᕋᒃ ᐃᓕᕙᕋ ᓮᐅᓂᒥ, ᓂᕈᐊᕐᑕᐅᓯᒪᓗᓂ ᐱᓐᓇᕐᓇᕐᑑᓗᓂᓗ ᑐᓐᖓᕕᐅᓂᐊᓕᕐᑐᖅ ᑎᕆᖅᑯᕆᔭᐅᓗᓂ, ᓇᓪᓕᐊᑦ ᑖᑦᓱᒧᖓ ᐅᒃᐱᕐᑐᖅ ᑲᓐᖑᓱᒃᑎᑕᐅᓂᐊᓐᖏᓚᖅ.”

⁷ ᐃᓕᑦᓯᓐᓄᓪᓕ ᐅᒃᐱᕐᑐᓄᑦ, ᐅᔭᕋᒃ ᑖᓐᓇ ᐅᐱᒋᔭᐅᕗᖅ. ᐅᒃᐱᕈᒪᓐᖏᑦᑐᓄᓪᓕ, “ᐅᔭᕋᒃ ᐃᒡᓗᓕᐅᕐᑐᓄᑦ ᓇᕐᕈᒋᔭᐅᔪᖅ, ᑐᓐᖓᕕᓪᓚᕆᐅᓪᓗᓂ ᑎᕆᖅᑯᕆᔭᐅᓂᖓ ᐊᑑᑎᖃᕐᓂᕐᐹᖑᓕᕐᐳᖅ.”

⁸ ᐊᓯᖏᓐᓂ ᐅᖃᕐᓯᒪᔪᖃᕆᕗᖅ, “ᑖᓐᓇ ᐅᔭᕋᒃ ᐃᓄᖕᓂᒃ ᓈᑎᑦᓯᔪᒫᕐᐳᖅ ᐹᓪᓚᒃᑎᑦᓯᔪᒫᕐᓗᓂᓗ.” ᑖᒃᑯᐊ ᐹᓪᓚᒃᐳᑦ ᐅᒃᐱᖏᓐᓇᒥᒃ ᐅᖃᐅᓯᐅᔪᓂᒃ, ᑖᒃᑯᓄᖓ ᑐᕌᖓᔫᒐᓗᐊᓂᒃ.

⁹ ᐃᓕᑦᓯᓕ ᐃᓅᖃᑎᒌᖑᔪᓯ ᓂᕈᐊᕐᑕᐅᓯᒪᕗᓯ, ᐊᖓᔪᖅᑳᕐᔪᐊᒧᑦ ᑐᓂᕐᕈᓯᕐᑎᑦᓯᔨᖁᑎᒋᔭᐅᓪᓗᓯ, ᐃᓅᖃᑎᒌᑦ ᐃᑦᔪᕐᓁᑦᑐᑦ, ᒎᑎᐅᑉ ᐃᓄᖁᑎᖏᑦ, ᐅᖃᐅᓯᖃᖁᓪᓗᓯ ᒎᑎᐅᑉ ᓂᕐᑐᕐᓇᕐᓂᕐᔪᐊᖓᓂᒃ ᑖᑦᓱᒪᓗ ᕾᖁᓚᐅᕐᒪᓯ ᑖᕐᔪᐊᕐᒥᑦ ᓇᖕᒥᓂᖅ ᖃᐅᒪᓂᕐᔪᐊᒥᓄᑦ.

¹⁰ ᑍᑦᓱᒪᓂ ᐃᓄᖁᑎᒋᔭᐅᓚᐅᖏᑦᑐᓯ ᒫᓐᓇᓕ ᒎᑎᐅᑉ ᐃᓄᖁᑎᒋᓕᕐᐹᓯ; ᓂᑲᒍᓱᖕᓂᖓᓃᓚᐅᖏᑦᑐᓯ ᒫᓐᓇᓕ ᑖᑦᓱᒪ ᓂᑲᒍᓱᖕᓂᖓᓃᓕᕐᐳᓯ.

ᒎᑎᒧᑦ ᐱᔨᐅᓂᖅ

¹¹ ᓇᒡᓕᒋᔭᒃᑲ, ᕿᓄᕕᒋᕙᑦᓯ ᑕᒫᓂ ᓯᓚᕐᔪᐊᕐᒥ ᐊᖏᕐᕋᖃᖏᓐᓇᑦᓯ ᓄᓇᒋᓐᖏᑕᑦᓯᓐᓃᓐᓇᑦᓯ ᑎᒥᐅᑉ ᐱᔪᒪᓂᐊᓗᓐᖏᑦ ᐊᑐᕐᑍᓕᓯᐅᒃ ᑕᒪᒃᑯᐊ ᑕᕐᓂᑦᓯᓐᓂᒃ ᓵᓚᖃᕈᒪᖕᒪᑕ.

¹² ᐅᒃᐱᖏᑦᑐᓂᒃ ᐃᓚᖃᕐᑎᓪᓗᓯ ᐱᐅᔪᒥᒃ ᐱᓂᐊᕐᓂᖃᕆᐊᖃᕐᐳᓯ, ᐃᓕᑦᓯᓐᓂᒃ ᐱᐅᖏᑦᑐᓕᓂᕅᓇᓱᓕᕈᑎᒃ, ᖃᐅᔨᖁᓪᓗᒋᑦ ᐱᓂᐊᑦᓯᐊᕐᓂᑦᓯᓐᓂᒃ ᒎᑎᒥᒡᓗ ᓂᕐᑐᐃᔪᒫᖁᓪᓗᒋᑦ ᐅᓪᓗᕐᔪᐊᒥ ᑎᑭᑦᓱᒫᕐᑐᒥ.

¹³ ᐃᓅᓯᓯ ᑐᓂᒻᒪᕆᒃᓯᒪᓯᐅᒃ ᐊᑕᓂᖅ ᐱᑦᔪᑎᒋᓗᒍ ᐃᓄᓕᒫᓄᑦ ᐊᖓᔪᖅᑳᖑᔪᓄᑦ, ᐊᖓᔪᖅᑳᕐᔪᐊᒻᒪᕆᖕᒧᓪᓗ ᑖᓐᓇ ᐊᖓᔪᖅᑳᓄᑦ ᐊᖓᔪᖅᑳᖑᓂᕐᐹᖑᖕᒪᑦ.

¹⁴ ᐊᐅᓚᑦᓯᔨᐅᔪᓄᑦ ᐊᖓᔪᖅᑳᕐᔪᐊᕐᒧᑦ ᓂᕈᐊᕐᑕᐅᓯᒪᖕᒪᑕ ᓱᒋᐊᕐᓯᔨᐅᖁᓪᓗᒋᑦ ᐱᐅᖏᑦᑐᓕᔪᓂᒃ ᐅᐱᒍᓱᒍᓐᓇᖁᓪᓗᒋᑦ ᐱᑦᓯᐊᕐᑐᓂᑦ.

¹⁵ ᒎᑎᐅᑉ ᐱᔪᒪᔭᕆᕚ ᐱᓂᐊᑦᓯᐊᕐᓂᑦᓯᒍᑦ ᐅᖃᐅᓯᒃᓮᕈᑦᔨᖅᑯᓪᓗᓯ ᐃᓄᖕᓂᒃ ᓯᓔᓐᓂᕐᒧᑦ ᖃᐅᔨᒪᖏᑦᑐᓂᒃ.

¹⁶ ᕿᓚᕈᑦᔮᕐᑕᐅᓯᒪᔪᑎᑐᑦ ᐃᓅᒋᑦᓯ, ᕿᓚᕈᑦᔮᕐᑕᐅᓯᒪᓂᓯᓕ ᐃᔨᕋᑦᑐᕈᑎᒋᑦᑍᓕᓯᐅᒃ ᐱᐅᖏᑦᑐᒥᒃ ᐱᓇᓱᐊᕈᑎᑖᕆᓗᒍ; ᐃᓅᓯᖃᕆᑦᓯᓕ ᒎᑎᐅᑉ ᐱᔨᖏᑎᑐᑦ.

¹⁷ ᐃᓄᓕᒫᓂᒃ ᐅᐱᒍᓱᒋᑦᓯ, ᐅᒃᐱᖃᑎᓯ ᓇᒡᓕᒋᓯᒋᑦ, ᒎᑎ ᓯᕘᕋᒋᓗᒍ. ᐊᖓᔪᖅᑳᕐᔪᐊᒻᒪᕆᒃ ᐅᐱᒋᓗᒍ.

᙭ᔅᑑᓯᐅᑉ ᐊᒃᓱᕈᕐᓇᕐᑐᑰᕐᓯᒪᓂᖓᓂᒃ ᒪᓕᒐᒃᓴᖃᕐᓂᖅ

¹⁸ ᐱᔨᐅᔪᓯ, ᐊᖓᔪᖅᑳᑦᓯᓐᓄ ᑐᓂᓯᒪᑦᓯᐊᕆᑦᓯ ᐅᐱᒋᑦᓯᐊᕐᓗᒋᑦ, ᐱᑦᓯᐊᕐᑐᑦ ᓂᑲᒍᓱᒃᑐᑦ ᐅᐱᒋᔭᑐᐊᕆᓇᒋᑦ ᐊᒃᓱᕈᕐᑎᑦᓯᓗᐊᕐᑑᒐᓗᐊᓪᓗ.

¹⁹ ᑕᒪᓐᓇ ᓮᒻᒪᕐᑎᑕᐅᓇᕐᒪᑦ, ᒎᑎᒥᒃ ᐃᓱᒪᖃᕐᓗᓂ, ᐃᓄᒃ ᐃᓗᖏᕐᓱᕐᑎᑕᐅᒃᐸᑦ ᓈᒻᒪᓈᕐᑕᐅᓯᒪᖏᓪᓗᓂ.

²⁰ ᓱᓇᒥᒃ ᐱᕙᓪᓕᕈᑎᒃᓴᖃᕋᔭᕐᐱᓰ ᑕᒪᕐᓂᑦᓯᓐᓄᑦ ᐋᓐᓂᕐᓯᑕᐅᔪᑎᖃᕈᑦᓯ ᕿᓄᐃᓵᕈᑎᒋᒍᑦᓯᐅᒡᓗ; ᐊᒃᓱᕈᕐᑎᑕᐅᒍᑦᓯᓕ ᐱᐅᔪᒥᒃ ᐱᓇᓱᐊᕐᑎᓪᓗᓯ ᕿᓄᐃᓵᕈᑎᒋᒍᑦᓯᐅᒃ? ᑕᒪᑐᒨᓇ ᒎᑎᐅᑉ ᓮᒻᒪᕐᑎᓐᓂᐊᕐᐹᓯ.

²¹ ᑕᒪᑐᒧᖓ ᕾᖁᔭᐅᓯᒪᒐᑦᓯ, ᙭ᔅᑑᓯᑦᑕᐅᖅ ᐋᓐᓂᐊᓚᐅᕐᒪᑦ ᐱᑦᔪᑎᒋᓪᓗᓯ, ᒪᓕᒐᒃᓴᑦᓯᓐᓂᒃ ᕿᒤᓚᐅᕐᒪᑦ, ᒪᓕᖁᓪᓗᓯ ᑖᑦᓱᒪ ᑐᒥᖏᓐᓂᒃ.

²² ᑖᓐᓇ ᐊᔪᕐᑐᓕᓚᐅᓐᖏᓚᖅ; ᓴᒡᓗᑎᓪᓗᒍᓗ ᖃᐅᔨᔭᐅᓚᐅᕐᓯᒪᓇᓂ.

²³ ᐅᖃᕐᓂᕐᓗᒡᕕᐅᒐᓗᐊᕋᒥ, ᐅᖃᐅᓯᕐᓗᖕᒧᑦ ᑭᐅᓚᐅᓐᖏᓚᖅ; ᐊᒃᓱᕈᕐᓇᑐᒦᑎᑕᐅᒐᓗᐊᕋᒥ, ᐊᑭᓂᐊᓚᐅᓐᖏᓚᖅ; ᑕᑎᖃᓚᐅᕐᐳᕐᓕ ᑖᑦᓱᒥᖓ ᓈᒻᒪᑦᓯᐊᕐᑐᒥᒃ ᐃᖅᑲᕐᑐᐃᔪᒥᒃ.

²⁴ ᑖᑦᓱᒪ ᓇᖕᒥᓂᖅ ᐊᔪᕐᓂᕗᑦ ᑎᒥᒥᒍᑦ ᓇᒃᓴᓚᐅᕐᐰᑦ ᓴᓐᓂᖓᔪᓕᖕᒧᑦ, ᐊᔪᕐᓂᕐᒧᑦ ᑐᖁᖁᓪᓗᑕ ᒪᑭᖁᓪᓗᑕᓗ ᐃᓗᐊᕐᑐᓕᕐᓂᕐᒧᑦ. ᑖᑦᓱᒪ ᐃᑭᖏᓐᓄᑦ ᐋᖅᑭᒃᑕᐅᓯᒪᕗᓯ.

²⁵ ᓰᐱᑎᑐᑦ ᐊᖅᑯᑎᒋᔭᒥᖕᓂᑦ ᐊᓯᐅᔨᔪᑎᑐᑦ ᑍᒤᓚᐅᕋᑦᓯ, ᒫᓐᓇᓕ ᐅᑎᕐᑎᑕᐅᓯᒪᕗᓯ ᐰᕐᓯᔨᒧᑦ ᑲᒪᔨᐅᔪᒧᓪᓗ ᑕᕐᓂᑦᓯᓐᓂᒃ.