ᐊᑕᓃᑦ ᓯᕗᓪᓖᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᒃᓯᕕᒃ ᐊᖏᖃᑎᒌᒍᑎᓂᒃ ᐃᓗᓕᓕᐅᑉ ᐅᑎᕐᑎᑕᐅᓂᖓ ᑐᒃᓯᐊᕐᕕᒡᔪᐊᒧᑦ

¹ ᑕᕝᕙ ᓲᓗᒨᓂᐅᑉ ᑲᑎᖁᕔᑦ ᐊᖓᔪᖅᑳᕆᔭᐅᔪᓕᒫᑦ ᐃᓴᕆᐊᓕᒥ ᑭᖑᕚᖑᖃᑎᒌᓄᑦ ᐊᖓᔪᖅᑲᐅᔪᑦ, ᓯᕗᓕᕐᑏᓪᓗ ᑭᖑᕚᖑᖃᑎᒌᓄᑦ ᐊᖓᔪᖅᑳᖏᑦ ᐃᓴᕆᐊᓕᒥ, ᔨᕉᓴᓕᒧᐊᖁᓪᓗᓂᒋᑦ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓ ᐂᔭᐅᖁᓪᓗᒍ ᑍᕕᑎᐅᑉ ᐃᒡᓗᒐᓴᖏᓐᓂᑦ ᓮᐅᓂᒥᑦ.

² ᐊᖑᑎᓕᒫᑦ ᐃᓴᕆᐊᓕᒥᐅᑦ ᑲᑎᕗᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᑲᑎᖁᔨᓂᖓᓄᑦ ᓇᓪᓕᐅᓐᓂᕐᓯᐅᕐᕕᖕᒥ ᑕᖅᑭᒥ ᐃᑖᓂᒥ, ᑕᖅᑮᑦ 7ᖓᓐᓂ.

³ ᑖᒃᑯᐊ ᐊᖓᔪᖅᑳᓕᒫᑦ ᐃᓴᕆᐊᓕᒥᐅᓄᑦ ᑲᑎᖕᒪᑕ, ᐃᒃᓯᕐᕕᒃ ᑐᓂᕐᕈᓯᕐᑎᑦᓯᔨᓄᑦ ᑭᕕᒃᑕᐅᕗᖅ.

⁴ ᐊᒃᔭᕐᑕᐅᓕᕐᓗᓂᓗ ᑖᒃᑯᓄᖓ ᐊᑕᓂᐅᑉ ᐃᒃᓯᕐᕕᖓ, ᑐᐱᕐᔪᐊᕐᓗ, ᐃᓗᓕᖁᑏᓪᓗ ᐃᑦᔪᕐᓁᑦᑐᑦ ᑐᐱᕐᔪᐊᕐᒥᐅᑍᑦ; ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ ᓇᒃᓴᓚᐅᕐᐰᑦ.

⁵ ᐊᖓᔪᖅᑳᕐᔪᐊᖅ ᓲᓗᒨᓂ ᐃᓄᓕᒫᑦ ᐃᓴᕆᐊᓕᒥᐅᑦ ᐃᓚᒋᓪᓗᒋᑦ, ᑲᑎᔭᕐᑐᕐᓯᒪᔪᓕᒫᑦ, ᐊᑕᓂᐅᑉ ᐃᒃᓯᕐᕕᖓᑕ ᓯᕗᕌᓄᐊᕐᓗᑎᒃ ᑐᓂᕐᕈᓯᕐᐳᑦ ᓰᐱᓂ ᐅᓄᕐᑐᐊᓗᖕᓂᒃ ᐃᒻᒧᒃᓯᐅᒐᕐᓂᒡᓗ ᓈᓴᕐᑕᐅᔭᕆᐊᒃᓴᖅ ᐅᓄᓗᐊᕐᑐᓂᒃ.

⁶ ᑐᓂᕐᕈᓯᕐᑎᑦᓯᔩᓄᑦ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓ ᐊᒡᔭᕐᑕᐅᕗᖅ ᑐᒃᓯᐊᕐᕕᒡᔪᐊᑉ ᐃᓗᐊᓄᑦ ᐃᓕᓪᓗᒍᓗ ᐃᓂᒃᓴᖓᓄᑦ ᐃᑦᔪᕐᓁᓐᓂᕐᐹᒧᑦ, ᓯᕈᐱᒻ ᐃᓴᕈᓖᒃ ᐊᑕᓄᑦ.

⁷ ᑖᒃᑯᐊᒃ ᐃᓴᕈᖏᒃᑕ ᐃᓵᖓᓂᖏᒃᑕ ᐃᒃᓯᕕᒃ ᑕᓕᑎᑉᐹᒃ ᐊᑭᕋᐅᑎᖏᒡᓗ ᑕᑭᔪᑯᑖᒃ.

⁸ ᑖᒃᑯᐊᒃ ᐊᑭᕋᐅᑎᖏᒃᑕ ᐃᓱᖏᒃ ᑕᑯᔭᐅᔪᓐᓇᕐᐴᒃ ᑕᑭᔫᖕᒪᑎᒃ ᐃᑦᔪᕐᓁᓐᓂᕐᐹᑉ ᐃᓗᐊᑕ ᑐᑭᐊᓂᑦ, ᓯᓚᑖᓂᑦ ᑕᑯᔭᐅᔪᓐᓇᓐᖏᓛᒃ; ᑖᒃᑯᐊᒡᓗ ᐊᑭᕋᐅᑏᒃ ᓱᓕ ᐅᓪᓗᒥ ᑍᑲᓃᑉᐳᒃ.

⁹ ᑖᓐᓇ ᐊᑕᓂᐅᑉ ᐃᒃᓯᕐᕕᖓ ᐃᓗᓕᖃᓚᐅᓐᖏᓚᖅ ᐅᔭᕌᒃ ᒪᕐᕉᒃ ᓵᑦᑐᔮᒃ ᐊᓯᖏᖕᓂᒃ, ᒨᓯᓯᐅᑉ ᐃᓕᓚᐅᕐᑕᖏᖕᓂᒃ ᖃᖅᑲᒥ ᕼᐆᕆᑉᒥ, ᐊᑕᓂᐅᑉ ᐊᖅᑲᕐᕕᒋᓚᐅᕐᑕᖓᓂ ᐃᓴᕆᐊᓕᑎᑦ ᐃᓄᖏᓐᓄᑦ ᐄᑦᔨᑉᑎᒥᑦ ᐊᐅᓪᓚᕐᓯᒪᓕᕐᑎᓪᓗᒋᑦ.

¹⁰ ᑐᓂᕐᕈᓯᕐᑎᑦᓯᔩᑦ ᐊᓂᑎᓪᓗᒋᑦ ᐃᑦᔪᕐᓁᑦᑑᑉ ᐃᑦᔪᕐᓁᓐᓂᕐᐹᖓᓂᑦ, ᐊᑕᓂᐅᑉ ᐃᒡᓗᖓ ᓄᕗᔭᒥᒃ ᑕᑕᑕᐅᓚᐅᕐᐳᖅ.

¹¹ ᑐᓂᕐᕈᓯᕐᑎᑦᓯᔩᑦ ᐱᓇᓱᐊᕈᓐᓁᓪᓕᓚᐅᕐᐳᑦ ᐱᓇᓱᐊᕐᑕᒥᖕᓂᒃ ᓄᕗᔭ ᐱᑦᔪᑎᒋᓪᓗᒍ; ᐊᑕᓂᐅᑉ ᓂᕐᑐᕐᓇᕐᓂᖓᑕ ᑕᑕᓚᐅᕐᒪᒍ ᐊᑕᓂᐅᑉ ᐃᒡᓗᖓ.

¹² ᑕᕝᕙ ᓲᓗᒨᓂ ᐅᖃᕐᐳᖅ, “ᐊᑕᓂᖅ ᐃᓕᓯᓯᒪᕗᖅ ᕿᓚᖕᒧᑦ ᓯᕿᓂᕐᒥᒃ, ᐅᖃᕐᓯᒪᕗᕐᓕ ᐃᓂᖃᕈᒪᓪᓗᓂ ᓄᕗᔭᒥ ᑖᕐᑐᒥ.

¹³ ᐱᐅᔪᒻᒪᕆᐊᓗᖕᒥᒃ ᐊᖏᒡᓕᑎᕐᑕᐅᕕᒃᓴᕐᓂᒃ ᓴᓇᓯᒪᕗᖓ ᐃᒡᓗᒃᓴᕐᓂᒃ, ᐃᓂᒋᓂᐊᕐᑕᕐᓂᒃ ᐃᓱᖃᖏᑦᑐᒧᑦ.”

ᓲᓗᒨᓂᐅᑉ ᐅᖃᓪᓚᖕᓂᖓ ᐃᓄᖕᓄᑦ

¹⁴ ᐊᖓᔪᖅᑳᕐᔪᐊᖅ ᓲᓗᒨᓂᐅᑉ ᐃᓄᐃᑦ ᓵᓪᓗᒋᑦ, ᐃᓴᕆᐊᓕᒥᐅᓕᒫᑦ ᑲᑎᒪᔪᑦ ᓮᒻᒪᕐᑎᑉᐰᑦ, ᐃᓄᐃᑦ ᓇᖏᕐᑎᓪᓗᒋᑦ.

¹⁵ ᐅᖃᕐᓗᓂ, “ᐊᑕᓂᖅ ᓂᕐᑐᕐᑕᐅᓕ ᐃᓴᕆᐊᓕᒃᑯᑦ ᒎᑎᖓᑦ! ᐊᖏᕐᓂᕆᓚᐅᕐᑕᓂ ᑲᔪᓯᑎᒻᒪᒍ ᐊᑖᑕᓐᓄᑦ ᑍᕕᑎᒧᑦ ᐅᖃᓚᐅᕐᒪᑦ,

¹⁶ ‘ᑍᒪᓐᖓᓂᑦ ᐃᓄᖁᑎᒃᑲ ᐃᓴᕆᐊᓕᒥᐅᑦ ᐊᐅᓪᓚᕐᑎᒐᒃᑭᑦ ᐄᑦᔨᑉᑎᒥᑦ, ᓂᕈᐊᓚᐅᓐᖏᓚᖓ ᐃᓴᕆᐊᓕᐅᑉ ᑭᖑᕚᖏᑕ ᐃᒡᓗᒐᓴᖏᓐᓂᒃ ᓇᓪᓕᐊᓐᓂᒃ, ᐊᑎᕋ ᐃᓂᖃᖁᓪᓗᒍ; ᑍᕕᑎᓕ ᓂᕈᐊᓚᐅᕐᐸᕋ ᐊᐅᓚᑦᓯᔨᐅᖁᓪᓗᒍ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ.’

¹⁷ “ᐊᑖᑕᒐ ᑍᕕᑎ ᑐᒃᓯᐊᕐᕕᒡᔪᐊᓕᐅᕈᒪᓪᓗᓂ ᓯᕗᓂᖃᕐᓯᒪᕗᖅ ᑐᒃᓯᐊᕐᕕᐅᒐᔭᕐᑐᒥᒃ ᐊᑕᓂᕐᒧᑦ ᐃᓴᕆᐊᓕᑎ ᒎᑎᖓᓄᑦ.

¹⁸ ᐊᑕᓂᕐᓕ ᐅᖃᓚᐅᕐᐳᖅ ᑍᕕᑎᒧᑦ ᐊᑖᑕᓐᓄᑦ, ‘ᐆᒻᒪᒻᒥᐅᑕᖃᓚᐅᕋᕕᑦ ᐃᒡᓗᓕᐅᕆᔪᒪᓪᓗᑎᑦ ᐊᑎᓐᓂᒃ, ᓈᒻᒪᓈᓚᐅᕐᐳᑎᑦ ᐃᓱᒪᒋᔭᕐᓂᒃ;

¹⁹ ᑭᓯᐊᓂᓕ ᐃᒡᓗᓕᐅᕐᓂᐊᓐᖏᓚᑎᑦ, ᐃᕐᓂᕕᓪᓕ ᐃᕐᓂᕐᑖᕆᔪᒫᕐᑕᕕᑦ ᐊᑕᓂᐅᑉ ᐊᑎᖓ ᐃᒡᓗᓕᐅᕈᒫᕐᐹ.’

²⁰ “ᒫᓐᓇ ᐊᑕᓂᐅᑉ ᐊᖏᕐᓂᕆᓯᒪᔭᒥᓂᒃ ᓇᓚᐅᑦᓯᑎᑦᓯᓂᖓ ᓇᓪᓕᐅᑎᕗᖅ; ᐊᑖᑕᒐ ᑍᕕᑎ ᐃᓇᖏᕐᓗᒍ, ᐃᒃᓯᕙᐅᑕᖃᕐᓗᖓᓗ ᐃᓴᕆᐊᓕᒥᐅᑦ ᐃᒃᓯᕙᐅᑕᕐᔪᐊᖓᓂᒃ, ᐊᑕᓂᐅᑉ ᐊᖏᕐᓯᒪᓂᖓᓄᑦ, ᐃᒡᓗᓕᐅᓚᐅᕐᐳᖓ ᐊᑕᓂᐅᑉ ᐊᑎᖓᓄᑦ, ᐃᓴᕆᐊᓕᑎᑦ ᒎᑎᖓᓐᓄᑦ.

²¹ ᓴᓇᔭᐅᑎᑦᓯᓯᒪᓪᓗᖓᓗ ᐃᓂᒃᓴᒥᒃ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᓄᑦ, ᐃᓗᓕᖃᕐᓗᓂ ᐊᑕᓂᐅᑉ ᓯᕗᓕᑦᑎᓐᓄᑦ ᐊᖏᖃᑎᒌᒍᑎᓕᐊᕆᓚᐅᕐᑕᖏᓐᓂᒃ, ᑍᑦᓱᒪᓂ ᐄᑦᔨᑉᑎᒥᑦ ᐊᐅᓪᓚᕐᑎᓐᓇᒥᒋᑦ.”

ᓲᓗᒨᓂᐅᑉ ᑐᒃᓯᐊᕐᓂᖓ

²² ᓲᓗᒨᓂ ᐊᑕᓂᐅᑉ ᑐᓂᕐᕈᓯᕐᕕᖓᑕ ᓵᖓᓄᐊᕐᐳᖅ ᑲᑎᒪᔭᕐᑐᕐᓯᒪᔪᑦ ᐃᓴᕆᐊᓕᒥᐅᑦ ᓇᔪᕐᑕᖓᓐᓂ, ᖁᒻᒧᓪᓗ ᐃᓵᒃᐳᖅ ᐊᒡᒐᓂ ᐊᕕᑎᓪᓗᒋᑦ;

²³ ᐅᖃᕐᓗᓂᓗ, “ᐊᑕᓃᖅ ᐃᓴᕆᐊᓕᐅᑉ ᒎᑎᖓᑦ, ᐊᑦᔨᖕᓂᒃ ᒎᑎᑕᖃᓐᖏᓚᖅ, ᐹᓂ ᕿᓚᖕᒥ ᓄᓇᐅᓪᓗ ᐊᑖᓂ, ᐊᖏᖃᑎᒌᒍᑎᒋᓯᒪᔭᑎᑦ ᑲᔪᓯᑎᒃᑲᕕᒋᑦ ᓇᒡᓕᖕᓃᓪᓗ ᓱᖁᓯᔪᐃᑦᑐᖅ ᖃᐅᔨᔭᐅᑎᓪᓗᒍ ᐱᔨᖕᓄᑦ ᓈᓚᒃᑐᓄᑦ ᐆᒻᒪᑎᓕᒫᒥᖕᓄᑦ ᐃᓕᖕᓂᒃ;

²⁴ ᐊᖏᕐᓂᕆᔭᑎᓪᓗ ᓱᓕᑎᒃᑲᕕᒋᑦ ᐱᔨᖕᓄᑦ ᑍᕕᑎᒧᑦ ᐊᑖᑕᓐᓄᑦ: ᐅᖃᐅᓯᕆᓚᐅᕐᑕᑎᑦ ᐱᓇᓱᐊᕐᓂᕐᓄᑦ ᐅᓪᓗᒥ ᓇᓚᐅᑦᓯᑎᑉᐸᑎᑦ.

²⁵ ᒫᓐᓇᓕ ᐊᑕᓃᖅ ᐃᓴᕆᐊᓕᑎᑦ ᒎᑎᖓᑦ, ᐊᑖᑕᓐᓄᑦ ᑍᕕᑎᒧᑦ ᓱᓕ ᐊᖏᕐᓂᕆᓯᒪᔭᕐᓂᒃ ᐊᓯᖏᓐᓂᒃ ᓇᓚᐅᑦᓯᑎᑦᓯᒃᑲᓐᓂᖁᓪᓗᑎᑦ, ᐅᖃᐅᑎᓚᐅᕋᕕᐅᒃ, ‘ᑍᒪᓐᖓᓕᒫᖅ ᑭᖑᕚᖏᑦ ᐊᖓᔪᖅᑳᕐᔪᐊᖑᖁᓪᓗᒋᑦ ᐃᓴᕆᐊᓕᒥ, ᑖᑦᓱᑐᓇᖅ ᓈᓔᓐᓇᕐᓂᖏᑦ ᒪᓕᒡᓗᒋᑦ.’

²⁶ ᒫᓐᓇ, ᐃᓴᕆᐊᓕᑎᑦ ᒎᑎᖓᑦ, ᑕᒪᒃᑯᐊ ᓱᓕᑎᓚᐅᒃᑭᑦ ᐊᖏᕈᑎᒋᓯᒪᔭᑎᑦ ᐱᔨᖕᓄᑦ ᑍᕕᑎᒧᑦ ᐊᑖᑕᓐᓄᑦ.

²⁷ “ᒎᑎ ᐃᓂᖃᕈᓐᓇᓪᓚᕆᒃᐹ ᓄᓇᒥ? ᑕᑯᒋᑦ, ᕿᓚᒃ ᕿᓚᐅᓪᓗ ᖁᑦᓯᖕᓂᕐᐹᖓ ᐃᓂᒋᒍᕕᐅᒃ ᒥᑭᓗᐊᕆᕙᑦ; ᐅᓇᓕ ᐃᒡᓗ ᓴᓇᔭᕋ ᑖᒃᑯᓇᓐᖓᑦ ᒥᑭᓐᓂᕐᓴᒻᒪᕆᐊᓘᕗᖅ?

²⁸ ᐱᔨᕕᑦ ᑐᒃᓯᐊᕐᓂᖓ ᐃᒃᐱᒋᒐᕕᐅᒃ ᑐᒃᓯᐅᑦᔨᓂᖓᓗ, ᐊᑕᓃᖅ ᒎᑎᒐ, ᑐᓵᓪᓗᑎᓪᓗ ᐱᔨᕕᑦ ᓂᓪᓕᐊᓂᖓᓂᒃ ᑐᒃᓯᐊᕐᓂᖓᓂᒡᓗ ᐃᓕᖕᓄᑦ ᐅᓪᓗᒥ.

²⁹ ᑕᑯᓐᓈᖁᓪᓗᑎᑦ ᑕᕝᕗᖓ ᐃᒡᓗᒧᑦ ᐅᓐᓄᐊᒃᑯᑦ ᐅᓪᓗᒃᑯᓪᓗ, ᑖᑦᓱᒧᖓ ᐅᖃᐅᓯᖃᓚᐅᕋᕕᑦ, ‘ᐊᑎᕋ ᑕᕝᕙᓃᑦᓱᒫᕐᐳᖅ,’ ᑐᓴᖁᓪᓗᑎᑦ ᐱᔨᕕᑦ ᑐᒃᓯᐊᕐᓂᖓᓂᒃ ᑖᓐᓇ ᐱᑦᔪᑎᒋᓪᓗᒍ.

³⁰ “ᐱᔨᕕᑦ ᑐᒃᓯᐊᕐᓂᖓ ᑐᓴᓚᐅᕈᒃ ᐃᓄᖁᑎᕕᓪᓗ ᐃᓴᕆᐊᓕᑏᑦ ᑐᒃᓯᐊᕐᓂᖏᑦ, ᑐᒃᓯᐊᕌᖓᑕ ᐅᕗᖓ ᓵᓐᖓᓗᑎᒃ; ᑐᓵᖃᑦᑕᕆᑦ ᕿᓚᖕᒥᑦ ᐃᓂᒋᔭᕐᓂᑦ; ᑐᓵᑐᐊᕈᕕᑦ ᐃᓱᒪᒋᔪᓐᓁᕐᕕᒋᑎᒍᑦ.

³¹ “ᐃᓄᒃ ᐊᔪᕐᑐᓕᒃᐸᑦ ᐃᓅᖃᑎᒥᓄᑦ ᐅᖃᕐᑎᑕᐅᒃᐸᓪᓗ ᐅᖃᕕᖕᓂᕐᒥᒃ, ᕾᓗᓂᓗ ᑐᓂᕐᕈᓯᕐᕕᖕᒧᑦ ᐅᖃᕕᒍᑎᒥᓂᒃ ᓂᓪᓕᐊᒃᐸᑦ ᐅᕙᓂ ᑐᓂᕐᕈᓯᕐᕕᖁᑎᖕᓂ ᑕᕝᕗᓂ ᐃᒡᓗᒥ,

³² ᕿᓚᖕᒥᑦ ᑐᓴᓚᐅᕆᑦ, ᐱᓇᓱᐊᕐᓗᑎᓪᓗ, ᐋᖅᑭᒃᓱᕐᓗᒋᓪᓗ ᐱᔨᑎᑦ, ᐸᓯᔭᒃᓴᐅᔪᑦ ᓱᒋᐊᕐᓗᒋᑦ ᐱᓂᐊᕐᓂᕆᓯᒪᔭᖏᓐᓄᑦ, ᐸᓯᔭᒃᓴᐅᔪᓐᓁᕐᑎᓪᓗᒋᓪᓗ ᐃᓱᐊᕐᑐᒥᒃ ᐃᓅᔪᑦ ᐊᑭᓕᕐᓗᒋᑦ ᐸᓯᔭᒃᓴᐅᖏᓐᓂᖏᑦ ᒪᓕᒡᓗᒋᑦ.

³³ “ᐃᓄᖁᑎᑎᑦ ᐃᓴᕆᐊᓕᒥᐅᑦ ᓵᓚᐅᒃᐸᑕ ᐊᑭᕋᒥᖕᓄᑦ ᐃᓕᖕᓄᑦ ᐱᐅᖏᑦᑐᓕᓯᒪᓂᕐᒥᖕᓄᑦ, ᐃᓕᖕᓄᑦ ᐅᑎᑐᐊᕐᐸᑕ, ᐃᓕᖕᓂᒡᓗ ᐊᑎᕐᓂᒡᓗ ᒪᓕᒍᒪᓕᕐᐸᑕ, ᑐᒃᓯᐊᕐᐸᑕᓗ ᕿᓄᓗᑎᒃ ᐃᓕᖕᓄᑦ ᐅᕙᓂ ᐃᒡᓗᒥ;

³⁴ ᕿᓚᖕᒥᑦ ᑐᒃᓯᐊᕐᓂᖏᑦ ᑐᓴᒃᑭᑦ, ᐃᓱᒪᒋᔪᓐᓁᕐᕕᒋᓗᒋᓪᓗ ᐃᓄᖁᑎᑎᑦ ᐃᓴᕆᐊᓕᒥᐅᑦ ᐊᔪᕐᓂᖏᓐᓂᒃ, ᐅᑎᕐᑎᓪᓗᒋᓪᓗ ᓄᓇᒧᑦ ᑐᓂᓚᐅᕐᑕᕐᓄᑦ ᓯᕗᓕᕕᓂᖏᓐᓄᑦ.

³⁵ “ᕿᓚᒃ ᒪᑐᓯᒪᓕᕌᖓᑦ ᓯᓚᓗᖃᑦᑕᕈᓐᓃᕐᐸᓪᓗ ᐊᔪᕐᑐᓕᓯᒪᓂᖏᓐᓄᑦ ᐃᓕᖕᓄᑦ, ᑐᒃᓯᐊᕐᐸᑕ ᐅᓇ ᐃᒡᓗ ᓵᓐᖓᓗᒍ, ᐊᑏᓪᓗ ᐅᐱᒋᓗᒍ, ᐊᔪᕐᑐᓕᓂᕐᒥᖕᓂᒡᓗ ᕿᒤᓗᑎᒃ, ᐃᓕᖕᓄᑦ ᐅᖁᒤᒃᓴᕐᑎᑕᐅᓯᒪᑎᓪᓗᒋᑦ,

³⁶ ᕿᓚᖕᒥᑦ ᑐᓴᒃᑭᑦ, ᐃᓱᒪᒋᔪᓐᓁᕐᓗᒋᓪᓗ, ᐱᔨᕕᑦ ᐊᔪᕐᑐᓕᓂᖏᑦ, ᐃᓄᖁᑎᑎᑦ ᐃᓴᕆᐊᓕᒥᐅᑦ, ᐊᔪᕆᕐᑐᕐᓗᒋᓪᓗ ᐃᓅᓯᕐᒥᒃ ᐱᐅᔪᒥᒃ ᐊᑐᕆᐊᖃᕐᑕᖏᓐᓂᒃ; ᑕᕝᕙ ᓯᓚᓗᒃᑎᑦᓯᓕᕐᓗᑎᑦ ᓄᓇᖁᑎᖕᓄᑦ, ᑐᓂᓚᐅᕐᑕᕐᓄᑦ ᐃᓄᖁᑎᖕᓄᑦ ᓄᓇᑖᕆᔭᐅᖁᓪᓗᒍ.

³⁷ “ᑳᖕᓇᕐᑐᕐᔪᐊᕐᑕᖃᕐᐸᑦ ᓄᓇᒥ, ᑕᒫᓂ ᖃᓂᒪᓐᓇᕐᑐᖃᕐᐸᓪᓘᓐᓃᑦ, ᐱᕈᕐᑐᓪᓘᓐᓃᑦ ᑐᖁᓕᓐᓇᕐᑐᖃᓕᕐᐸᑕ ᓱᒃᑯᓪᓗᑎᒃ, ᐱᒡᓕᕐᑕᐅᔮᕐᑐᓄᓪᓘᓐᓃᑦ ᖁᐱᕐᕈᓄᓪᓘᓐᓃᑦ ᓄᖑᑕᐅᒃᐸᑕ, ᐊᑭᕋᖏᓐᓄᓪᓘᓐᓃᑦ ᐅᓇᑕᕆᐊᕐᑕᐅᒃᐸᑕ ᓄᓇᖁᑎᖏᓐᓂ ᓇᓪᓕᐊᓐᓂᑐᐃᓐᓇᖅ; ᖃᓂᒪᓐᓇᖃᕐᐸᑦ ᐋᓐᓂᐊᓇᕐᑐᖃᕐᐸᓪᓘᓐᓃᑦ;

³⁸ ᖃᓄᑐᐃᓐᓇᖅ ᑐᒃᓯᐊᕐᐸᑕ, ᑐᒃᓯᐅᑦᔨᔪᖃᕐᐸᓪᓘᓐᓃᑦ ᐃᓄᖕᒥᒃ ᓇᓪᓕᐊᓐᓂᒃ ᐃᓴᕆᐊᓕᒥᐅᓪᓘᓐᓃᑦ ᑕᒪᒃᑭᕐᓗᑎᒃ, ᖃᐅᔨᒪᓗᑎᒃ ᐆᒻᒪᑎᒃᑯᑦ ᐊᒃᑐᐊᔭᐅᑦᔪᑎᒥᖕᓂᒃ ᐊᒡᒐᑎᒡᓗ ᐃᓵᖓᓗᒋᑦ ᑖᑦᓱᒪ ᐃᒡᓘᑉ ᓇᓛᓄᑦ,

³⁹ ᑕᕝᕙ ᐃᓂᒋᔭᕐᓂᑦ ᕿᓚᖕᒥᑦ ᑐᓴᓕᕆᑦ, ᐃᓱᒪᒋᔪᓐᓁᕐᕕᒋᓗᒋᑦ, ᐱᓇᓱᐊᕐᓗᑎᓪᓗ, ᑐᓂᓯᕕᒋᓗᒋᓪᓗ ᐊᑐᓂᑦ ᐆᒻᒪᒻᒥᐅᑕᖏᓐᓂᒃ ᖃᐅᔨᒪᒐᕕᑦ, ᐱᓂᐊᕐᓂᓕᒫᖏᓐᓂᒡᓗ, ᐃᕝᕕᑐᐊᖅ ᖃᐅᔨᒪᔪᑑᒐᕕᑦ ᐃᓄᐃᑦ ᐆᒻᒪᒻᒥᐅᑕᖏᓐᓂᒃ.

⁴⁰ ᑍᒤᓕᐅᕈᕕᑦ ᐃᓄᐃᑦ ᐃᓕᕋᒋᓂᐊᕐᐹᑎᑦ ᐃᓅᓂᓕᒫᒥᖕᓂ ᑕᒫᓂ ᓄᓇᒥ ᑐᓂᓚᐅᕐᑕᕐᓂ ᓯᕗᓕᕕᓂᑦᑎᓐᓄᑦ.

⁴¹ “ᓱᓕᓗ ᓄᓇᖅᑲᑎᑐᖃᕆᓐᖏᑕᕗᑦ ᐃᓄᖁᑎᖕᓂᑦ ᐃᓴᕆᐊᓕᒥᐅᓂᑦ ᐱᓯᒪᖏᑦᑐᑦ ᑎᑭᖃᑦᑕᓕᕋᔭᕐᐳᑦ ᐅᖓᓯᒃᑐᒥᑦ ᐊᑏᑦ ᑎᑭᑦᔪᑎᒋᓗᒍ

⁴² ᑐᓴᕈᒫᕐᒪᑕ ᐊᑎᕐᐱᑦ ᐱᓪᓚᕆᐊᓘᓂᖓᓂᒃ, ᐊᔪᒐᖃᖏᑦᑐᐊᓘᓂᕐᓂᒡᓗ, ᐱᓇᓱᐊᕈᓐᓇᕐᓂᕐᓂᒡᓗ, ᑎᑭᓪᓗᑎᒃ ᑐᒃᓯᐊᕐᐸᑕ ᐅᓇ ᐃᒡᓗ ᓵᓐᖓᓗᒍ,

⁴³ ᑐᒃᓯᐊᓂᖏᑦ ᑐᓴᒃᑭᑦ, ᕿᓚᖕᒥᑦ ᐃᓂᒋᔭᕐᓂᑦ, ᐱᓇᓱᐊᕐᓗᑎᓪᓗ ᓄᓇᓕᑐᖃᐅᖏᑦᑐᑦ ᓂᓪᓕᐊᑦᔪᑎᒋᔭᓕᒫᖏᓐᓂᒃ; ᓄᓇᕐᔪᐊᕐᒥᐅᓕᒫᑦ ᐃᓄᐃᑦ ᐊᑎᕐᓂᒃ ᖃᐅᔨᓕᖁᓗᒋᑦ ᐃᓕᖕᓂᒡᓗ ᐃᓕᕋᒋᔭᖃᓕᕐᓗᑎᒃ ᐃᓴᕆᐊᓕᒥᐅᑎᑐᑦ, ᖃᐅᔨᒪᖁᓪᓗᒋᑦ ᐅᓇ ᐃᒡᓗᓕᐊᕋ ᐊᑎᕐᓂᒃ ᑐᓐᖓᕕᖃᕐᒪᑦ.

⁴⁴ “ᐃᓄᖁᑎᑎᑦ ᐊᑭᕋᒥᖕᓂᒃ ᐅᓇᑕᕆᐊᕐᐸᑕ, ᓇᐅᒃᑰᖁᓗᒋᑦ ᐊᐅᓪᓚᖁᒍᕕᒋᑦ, ᑐᒃᓯᐊᕐᐸᑕ ᐊᑕᓂᕐᒧᑦ, ᓵᓪᓗᑎᒃ ᐃᒡᓗᒐᓴᒡᔪᐊᓄᑦ, ᓂᕈᐊᕐᓯᒪᔭᕐᓄᑦ ᐃᒡᓗᒧᓪᓗ ᐅᕗᖓ ᓴᓇᓚᐅᕐᑕᓐᓄᑦ ᐊᑎᕐᓂᒃ ᑐᓐᖓᕕᓕᖕᒧᑦ,

⁴⁵ ᑐᒃᓯᐊᕐᓂᖏᑦ ᑐᓴᕐᐸᒃᑭᑦ, ᕿᓚᖕᒦᓪᓗᑎᑦ, ᓴᓚᖃᕐᑎᓪᓗᒋᓪᓗ.

⁴⁶ “ᐃᓄᖁᑎᑎᑦ ᐊᔪᕐᑐᓕᒃᐸᑕ ᐃᓕᖕᓄᑦ ᐃᓄᒃᑕᖃᖏᒻᒪᑦ ᐊᔪᕐᑐᓕᓱᐃᑦᑐᒥᒃ, ᓂᓐᖓᒡᕕᒋᓯᒪᒍᕕᒋᑦ, ᓴᓚᒋᔭᐅᑎᒃᑯᕕᒋᓪᓗ ᐊᑭᕋᖏᓐᓄᑦ, ᐊᐅᓪᓚᕈᑦᔭᐅᑎᒃᑯᕕᒋᓪᓗ ᑎᒍᔭᐅᓗᑎᒃ ᐊᑭᕋᒥ ᓄᓇᖓᓄᑦ, ᖃᓂᑦᑐᒧᑦ ᐅᖓᓯᒃᑐᒧᓪᓘᓐᓃᑦ;

⁴⁷ ᐃᓱᒪᑦᓯᐊᓕᕐᐸᑕ ᓄᓇᒥ ᑎᒍᔭᐅᓯᒪᕕᖕᒥᖕᓂ ᓱᖕᒪᑦ ᑕᒫᓃᒻᒪᖔᕐᒥᒃ, ᖃᕿᐊᓕᕐᓗᑎᒡᓗ ᐃᓕᖕᓄᑦ ᕿᓄᒃᐸᑕ ᓄᓇᒥ ᑎᒍᔭᐅᓯᒪᕝᕕᒋᔭᒥᖕᓂᑦ ᐅᖃᕐᓗᑎᒃ, ‘ᐊᔪᕐᑐᓕᓚᐅᕐᐳᒍᑦ, ᐱᐅᖏᑦᑐᐊᓗᖕᒥᒃ ᐱᓇᓱᐊᓚᐅᕐᐳᒍᑦ’;

⁴⁸ ᐱᕕᒡᓗᑎᒃ ᖃᕿᐊᓕᕐᐸᑕ ᐃᓱᒪᑎᒃ ᑕᒫᑦ ᐊᑐᕐᓗᒍ ᐆᒻᒪᑎᑎᒡᓗ ᑕᒫᑦ ᐊᑐᕐᓗᒍ ᐊᑭᕋᖏᑕ ᓄᓇᖓᓃᓪᓗᑎᒃ, ᑖᒃᑯᓂᖓ ᑎᒍᓯᓯᒪᔪᓂ, ᑐᒃᓯᐊᕐᐸᑕ ᓄᓇᑎᒃ ᓵᓐᖓᓗᒍ ᑐᓂᓚᐅᕐᑕᕐᓄᑦ ᓯᕗᓕᖏᓐᓄᑦ, ᐅᕗᖓᓗ ᐃᒡᓗᒐᓴᖕᓄᑦ ᓂᕈᐊᓚᐅᕐᑕᕐᓄᑦ, ᐃᒡᓗᒧᓪᓗ ᐅᕗᖓ ᐊᑏᑦ ᐃᓂᖃᖁᓪᓗᒍ ᓴᓇᓚᐅᕐᑕᓐᓄᑦ;

⁴⁹ ᑕᕝᕙ ᑐᓴᓕᒃᑭᑦ ᕿᓚᖕᒥᑦ ᐃᓂᒋᔭᕐᓂᑦ ᑐᒃᓯᐊᕐᑎᓪᓗᒋᑦ ᕿᓄᑎᓪᓗᒋᓪᓗ, ᐱᑦᔪᑎᖏᓐᓂᒡᓗ ᐃᑲᔪᕐᓗᒋᑦ

⁵⁰ ᐃᓄᖁᑎᑎᑦ ᐃᓱᒪᒋᔪᓐᓁᕐᕕᒋᓗᒋᑦ ᐃᓕᖕᓄᑦ ᐊᔪᕐᑐᓕᓯᒪᔪᑦ, ᓈᒻᒪᖏᑦᑐᓕᓂᕆᓯᒪᔭᓕᒫᖏᓐᓂᒃ ᐃᓕᖕᓄᑦ; ᓈᒃᑭᒋᓗᒋᓪᓗ ᐊᑭᕋᖏᑦ ᑖᒃᑯᓂᖓ ᐊᐅᓪᓚᕈᑦᔨᓚᐅᕐᑐᑦ ᖃᐅᔨᑎᓪᓗᒋᑦ, ᑖᒃᑯᓄᖓ ᓈᒃᑭᒋᔭᐅᓕᖁᓪᓗᒋᑦ.

⁵¹ ᑖᒃᑯᐊ ᐃᓄᖁᑎᒋᒐᕕᒋᑦ, ᓇᖕᒥᓂᕐᑖᕆᓯᒪᓪᓗᒋᑦ, ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᑕᑎᑦ, ᓴᕕᕋᔭᖕᒥᒃ ᐊᐅᒃᑎᑦᓯᕕᐅᑉ ᐃᑯᐊᓚᔫᑉ ᐃᓗᐊᓂᑦ.

⁵² “ᑕᑯᓐᓇᓚᐅᕆᑦ ᐱᔨᕕᑦ ᕿᓄᓂᖓᓂᒃ, ᐃᓄᖁᑎᑎᓪᓗ ᐃᓴᕆᐊᓕᑏᑦ ᕿᓄᒃᐸᑕ, ᓈᓚᒃᐸᒡᓗᒋᑦ ᐃᓕᖕᓄᑦ ᓂᓪᓕᐊᔭᕌᖓᑕ.

⁵³ ᑖᒃᑯᐊ ᓂᕈᐊᕐᓗᒋᑦ ᓴᓂᕐᕙᒃᓯᒪᒐᕕᒋᑦ ᐃᓄᓕᒫᑦ ᓄᓇᕐᔪᐊᕐᒥᐅᑦ ᐊᑯᕐᖓᓐᓂᑦ, ᓇᖕᒥᓂᖅ ᐱᒋᔪᒪᓪᓗᒋᑦ, ᑍᒫᒃ ᐅᖃᓚᐅᕋᕕᑦ ᐱᔨᒃᑯᑦ ᒨᓯᓯᒃᑯᑦ, ᑍᑦᓱᒪᓂ ᓯᕗᓪᓕᕕᓂᕗᑦ ᐊᓂᑎᓕᕋᕕᒋᑦ ᐄᑦᔨᑉᑎᒥᑦ, ᐊᑕᓃᖅ ᒎᑏ.”

ᑭᖑᓕᕐᐹᖅ ᑐᒃᓯᐊᕐᓂᖅ

⁵⁴ ᓲᓗᒨᓂ ᑐᒃᓯᐊᕇᕋᒥ ᑐᒃᓯᐅᑦᔨᔭᕇᕋᒥᓗ ᐊᑕᓂᕐᒧᑦ, ᓂᑯᕕᑉᐳᖅ ᑐᓂᕐᕈᓯᕐᕕᐅᑉ ᓵᖓᓂᑦ, ᓰᖅᑯᖓᕕᒋᕋᑖᕐᑕᒥᓂ ᑕᓖᖕᓂᓗ ᖁᒻᒧᑦ ᐃᓵᒡᓗᒋᒃ;

⁵⁵ ᐃᓄᓕᒫᑦ ᑕᕝᕙᓃᑦᑐᑦ ᓮᒻᒪᕐᑎᑉᐰᑦ, ᐅᖃᕐᓗᓂ,

⁵⁶ “ᐊᑕᓂᖅ ᓂᕐᑐᕐᑕᐅᓕ, ᐃᓄᖁᑎᒥᓄᑦ ᐃᓕᒪᓱᖏᑦᓯᐊᕐᓂᕐᒥᒃ ᑐᓂᓯᔪᖅ ᐊᖏᕈᑎᒋᓯᒪᔭᒥᓂᒃ ᑲᔪᓯᑎᑦᓯᓪᓗᓂ ᑍᒤᓐᓂᐊᕐᓂᕋᕐᓯᒪᒐᒥ, ᐊᖏᕈᑎᒋᓯᒪᔭᓕᒫᒥᓂᒃ ᑐᓂᓯᓂᐊᕐᓂᕋᕐᓗᓂ ᓱᓕᑎᓯᒪᖕᒪᒋᑦ ᐱᔨᒥᒍᑦ ᒨᓯᓯᒃᑯᑦ.

⁵⁷ ᐊᑕᓂᐅᑉ ᒎᑎᑦᑕ ᐃᓚᒋᓕᑎᒍᑦ, ᑍᒫᑦᓮᓐᓇᖅ ᓯᕗᓕᕕᓂᑦᑎᓐᓂᒃ ᐃᓚᐅᖃᓚᐅᕐᓂᕐᒥᑐᑦ, ᑖᑦᓱᒪ ᕿᒪᒃᑍᓕᓛᑎᒍᑦ ᖁᔭᓈᕐᑍᓕᓗᑕᓗ;

⁵⁸ ᑖᑦᓱᒪ ᓈᓚᑦᓯᐊᕐᑎᓪᓛᑎᒍᑦ ᐃᒻᒥᓄᑦ, ᐃᓅᖁᓪᓗᑕ ᐊᑐᕐᑕᐅᖁᔭᓕᒫᖏᑦ ᓈᓚᒡᓗᒋᑦ, ᐱᖁᔭᖏᓪᓗ ᒪᓕᑦᓯᐊᕐᓗᒋᑦ, ᒪᓕᒐᒃᓴᐅᖁᔭᖏᑦ, ᐊᑐᕐᑕᐅᖁᔭᖏᓪᓗ, ᓯᕗᓕᕕᓂᑦᑎᓐᓄᑦ ᐱᖁᔨᓂᕆᓚᐅᕐᒪᒋᑦ.

⁵⁹ ᐊᑕᓂᐅᑉ ᒎᑎᑦᑕ ᑕᒪᓐᓇ ᐃᖅᑲᐅᒤᓐᓇᕐᓕᐅᒃ ᑐᒃᓯᐊᕐᓂᕆᔭᕗᑦ, ᐅᓪᓗᒃᑯᑦ ᐅᓐᓄᐊᒃᑯᓪᓗ, ᐱᔨᓂᓗ ᐃᓄᖁᑎᓂᓗ ᓂᑲᒋᓕᒋᑦ ᐱᔭᕆᐊᖃᕐᑕᖏᓐᓂᒡᓗ ᖃᐅᑕᒫᑦ ᑐᓂᓯᕕᒋᓗᓂᒋᑦ.

⁶⁰ ᓄᓇᕐᔪᐊᕐᒥᐅᓕᒫᑦ ᓯᓚᕐᔪᐊᕐᒦᑦᑐᑦ ᑐᑭᓯᖁᓪᓗᒋᑦ ᐊᑕᓂᖅ ᑖᓐᓇᑐᐊᖅ ᒎᑎᐅᖕᒪᑦ; ᐊᓯᖃᕋᓂᓗ.

⁶¹ ᐃᓕᑦᓯ ᐃᓄᖁᑕᐅᔪᓯ ᑖᑦᓱᒧᖓ ᓱᓕᑦᓯᐊᕐᑐᒥᒃ ᐆᒻᒪᑎᑦᓯᒍᑦ ᑲᔪᓯᓂᖃᕆᑦᓯ ᐊᑕᓂᕐᒧᑦ ᒎᑎᑦᑎᓐᓄᑦ, ᓈᓚᒡᓗᒋᑦ ᐱᖁᔭᖏᑦ ᒪᓕᒃᑕᐅᖁᔭᖏᓪᓗ ᐊᑐᕐᓗᒋᑦ, ᓲᕐᓗ ᐅᓪᓗᒥ ᒪᓕᑦᓯᐊᕋᑦᓯᐅᒃ.”

ᑐᒃᓯᐊᕐᕕᒡᔪᐊᑉ ᐃᑦᔪᕐᓁᑎᑕᐅᓂᖓ

⁶² ᑕᕝᕙ ᐊᖓᔪᖅᑳᕐᔪᐊᖅ, ᐃᓴᕆᐊᓕᒥᐅᓕᒫᓪᓗ ᐃᓚᒋᔭᖏᑦ ᑐᓂᕐᕈᓯᕐᐳᑦ ᐊᑕᓂᕐᒧᑦ.

⁶³ ᓲᓗᒨᓂ ᑐᓂᕐᕈᓯᕐᐳᖅ ᖃᓄᐃᓐᖏᑎᑕᐅᓂᖅ ᐱᓪᓗᒍ ᐃᒻᒧᒃᓯᐅᒐᕐᓂᒃ 22,000ᓂᒃ, ᓰᐱᓂᒡᓗ 120,000ᓂᒃ ᑐᒃᓯᐊᕐᓂᕐᒧᑦ ᑐᓂᕐᕈᑕᐅᑎᓪᓗᒋᑦ, ᑕᕝᕙ ᐊᖓᔪᖅᑳᕐᔪᐊᖅ ᐃᓄᓕᒫᓪᓗ ᑐᒃᓯᐊᕐᕕᒡᔪᐊᕐᒥ ᑐᓂᕐᕈᓯᕐᐳᑦ ᐃᑦᔪᕐᓁᓕᕐᑎᓪᓗᒍ.

⁶⁴ ᑕᕝᕙᓂ ᐅᓪᓗᒥ ᑕᒪᓐᓇ ᑲᑎᒪᕕᐊᓘᑉ ᕿᑎᖓ ᐃᑦᔪᕐᓁᓕᑎᑉᐹᑦ, ᑐᒃᓯᐊᕐᕕᔪᐊᑉ ᓯᕗᕋᖓᓃᑦᑐᖅ, ᐱᔭᕇᕐᒪᓪᓗ ᑐᓂᕐᕈᓯᕐᐳᑦ ᐆᑕᒃᓴᓂᒃ ᓂᐊᖂᔭᒃᓴᓂᒃ ᐆᒪᔪᓂᒡᓗ ᖁᐃᒃᓯᑦᓯᐊᕆᓯᒪᔪᓂᒃ ᑐᓂᕐᕈᑕᐅᑎᓪᓗᒋᑦ ᑐᒃᓯᐊᕐᓂᕐᒧᑦ. ᑍᒤᓕᐅᕈᑎᒋᕚ ᑖᓐᓇ ᑐᓂᕐᕈᓯᕐᕕᒃ ᑲᓐᓄᔭᖅ ᐱᑦᔪᑎᒋᓪᓗᒍ, ᒥᑭᓗᐊᕐᓂᖓᓄᑦ ᑐᓂᕐᕈᑎᒃᓴᐅᔪᓄᑦ.

⁶⁵ ᑕᕝᕙᓂ ᑐᒃᓯᐊᕐᕕᒡᔪᐊᒥ ᓲᓗᒨᓂ ᐃᓴᕆᐊᓕᑎᑦ ᐃᓄᓕᒫᖏᓪᓗ ᓇᓪᓕᐅᓐᓂᕐᓯᐅᕐᐳᑦ ᑐᐲᓐᓇᕐᒦᖃᑦᑕᕐᓂᕐᒥᒃ ᐅᓪᓗᓄᑦ 7ᓄᑦ, ᐃᓄᒋᕌᓗᐃᑦ ᓯᐊᒻᒪᒃᓯᒪᓚᐅᕐᐳᑦ ᕼᐊᒫᑎᐅᑉ ᐃᑎᕐᑕᕐᕕᖓᓂᑦ ᐅᓐᓄᐊᓪᓗᐊᑉ ᓇᓛᓃᑦᑐᒥᑦ ᐄᑦᔨᑉᑎᐅᑉ ᑰᖓᑕ ᑭᒡᓕᖓᓄᑦ ᐅᓪᓗᓪᓗᐊᑉ ᓇᓛᓃᑦᑐᒧᑦ ᑎᑭᓯᒪᓪᓗᑎᒃ.

⁶⁶ ᐅᓪᓗᐃᑦ 8ᒋᓕᕐᑕᖓᓂ ᓲᓗᒨᓂᐅᑉ ᐃᓄᐃᑦ ᐊᖏᕐᕋᕐᑎᑉᐰᑦ; ᑖᒃᑯᐊᓕᒫᓪᓗ ᓂᕐᑐᐃᕗᑦ ᓲᓗᒨᓂᒥᒃ ᖁᕕᐊᓱᒡᓗᑎᒃ, ᓮᒻᒪᕐᑎᑕᐅᓂᐊᓗᐃᑦ ᑕᒪᕐᒥᒃ ᐊᑕᓂᕐᒥᑦ ᐱᔪᑦ ᐱᓪᓗᒋᑦ, ᑐᓂᓯᓚᐅᕐᓂᖓᓄᑦ ᐱᔨᒥᓄᑦ ᑍᕕᑎᒧᑦ ᐃᓄᓕᒫᓄᓪᓗ ᐃᓴᕆᐊᓕᒥ.