ᐊᑕᓃᑦ ᓯᕗᓪᓖᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦᓲᓗᒨᓂᐅᑉ ᐊᖓᔪᖅᑳᕐᔪᐊᖑᕕᐊ 1 ᓲᓗᒨᓂ ᓇᖕᒥᓂᖅ ᐃᒡᓗᒃᓴᒥᓂᒃ ᓴᓇᓚᐅᕆᕗᖅ ᐊᕐᕌᒍᓂᒃ 13ᓂᒃ, ᐱᔭᕇᓚᐅᕐᐹᓗ ᐃᒡᓗᓕᒫᖅ ᐊᑕᖏᑦᓯᐊᕐᓗᒍ. 2 ᐃᒡᓗᓕᐅᓚᐅᕐᐳᖅ ᕿᔪᖕᓂᒃ ᓰᑕᕆᓂᒃ ᓕᐸᓇᓂᒥᑦ ᐱᓯᒪᔪᓂᒃ; 150ᓂᒃ ᐃᑎᒐᖕᓂᒃ ᑕᑭᓂᖃᕐᑐᒥᒃ, 75ᓂᒃ ᐃᑎᒐᖕᓂᒃ ᓴᓂᒧᖃᕐᓗᓂ, 45ᓂᒃ ᐃᑎᒐᖕᓂᒃ ᐳᕐᑐᓂᖃᕐᓗᓂ. 3 ᐃᓗᐊᒍᑦ ᕿᔪᖕᓂᒃ ᓰᑕᕆᓂᒃ ᕿᕋᑦᑕᖁᑎᖃᕐᓗᑎᒃ ᐊᑐᓂᑦ, ᖁᓛᓕᕐᓯᒪᓪᓗᓂ ᐃᓗᐊᒍᑦ ᕿᔪᖕᓂᒃ ᓰᑕᕆᓂᒃ ᓱᑲᖃᕐᓗᓂ 45ᓂᒃ ᐃᑎᒐᖕᓂᒃ ᑕᑭᓂᓕᖕᓂᒃ, ᑐᑭᓕᕇᑦ 15ᖑᓪᓗᑎᒃ, 4 ᐊᑭᓐᓇᖏᑦ ᐱᖓᓱᑦ ᐱᖓᓱᓂᒃ ᐃᒐᓛᖃᕐᐳᑦ ᐊᑦᔨᒌᑦᓯᐊᓂᒃ. 5 ᐅᒃᑯᐊᖏᑦ ᐃᒐᓛᖏᓪᓗ ᐊᕙᓗᖃᕐᐳᑦ ᓯᒃᑭᑕᓂᒃ ᓯᓚᒻᒧᑦ ᖁᖁᖓᔪᓂᒃ, ᑖᒃᑯᐊᑕᐅᖅ ᐃᒐᓛᖃᕐᓗᑎᒃ ᐱᖓᓱᓂᒃ ᐊᑭᓕᕇᒃᑐᓂᒃ. 6 ᑲᑎᒪᕕᒃᑕᐅᖅ ᐊᑎᖃᕐᑐᖅ ᓱᑲᕐᔪᐊᓕᖕᒥᒃ ᑕᑭᓂᖃᕐᑐᖅ 75ᓂᒃ ᐃᑎᒐᖕᓂᒃ, 45ᓂᒃ ᐃᑎᒐᖕᓂᒃ ᓯᓕᖕᓂᖃᕐᓗᓂ, ᑐᕐᓲᑯᑕᖃᕐᓗᓂ ᒪᑭᑕᑎᑕᐅᓪᓗᓂ ᓱᑲᕐᔪᐊᓄᑦ, ᖁᓕᓯᒪᓪᓗᓂ. 7 ᓴᓇᒋᕗᖅ ᐃᒡᓗᐊᕈᓯᕐᒥᒃ ᐃᒃᓯᕙᐅᑕᕐᔪᐊᖃᕐᕕᖕᒥᒃ ᐊᑎᖃᕐᑐᒥᒃ, ᓲᓗᒨᓂ ᑕᕝᕙᓂ ᐃᖅᑲᕐᑐᐃᓪᓗᓂ ᑐᑭᑖᕐᕕᒋᕙᓚᐅᕐᑕᖓ, ᕿᔪᖕᓂᒃ ᓰᑕᕆᓂᒃ ᐊᕙᓗᐊ ᐊᑖᓂᑦ ᖁᓛᓄᑦ ᓈᓯᒪᕗᖅ. 8 ᓲᓗᒨᓂᐅᑉ ᓇᖕᒥᓂᖅ ᐊᖏᕐᕋᖓ ᐃᒃᓯᕙᐅᑕᕐᔪᐊᖃᕐᕕᐅᑉ ᑐᕐᓲᖓᑕ ᑐᓄᐊᓃᑦᑐᖅ, ᓴᓇᓯᒪᒋᓪᓗᓂ ᑐᒃᓯᐊᕐᕕᒡᔪᐊᓕᖓᑕ ᓴᓇᓯᒪᓂᖓᑐᑦ, ᑍᒫᑦᓮᓐᓇᖅ ᓴᓇᓚᐅᕆᕗᖅ ᓄᓕᐊᒥᓄᑦ, ᐄᑦᔨᑉᑎᒥᐅᑕᐅᑉ ᐸᓂᖓᓄᑦ. 9 ᑖᒃᑯᐊ ᐃᒡᓗᓕᒫᑦ ᓴᓇᔭᐅᓯᒪᓪᓗᑎᒃ ᐅᔭᕋᖕᓂᑦ ᐊᑭᑐᔪᓂᑦ, ᑭᓪᓘᑎᓄᑦ ᑭᓪᓗᕐᓯᒪᓪᓗᑎᒃ, ᑐᓄᖏᓪᓗ ᓯᓚᑎᖏᓪᓗ, ᑐᓐᖓᕕᖏᓐᓂᑦ ᐃᒡᓘᑉ ᖄᖏᑦ ᑎᑭᓪᓗᒋᑦ, ᐊᑕᓂᐅᑉ ᐃᒡᓗᖓᑕ ᑐᕐᓲᖓᓂᑦ ᑐᕐᓲᕐᔪᐊᖅ ᑎᑭᓪᓗᒍ. 10 ᑐᓐᖓᕕᖏᑉ ᐅᔭᕋᐅᕗᑦ ᓴᓇᓴᐅᓯᒪᔪᑦ ᐅᔭᕋᓕᐅᕐᑎᓄᑦ ᐊᑭᑐᔪᐊᓗᐃᑦ, ᐊᖏᔪᐊᓗᐃᑦ, ᐃᓚᖏᑦ ᑕᑭᓂᖃᕐᑐᑦ ᐃᑎᒐᖕᓂᒃ 12ᓂᒃ ᐃᓚᖏᑦ ᐃᑎᖓᖕᓂᒃ 15ᓂᒃ ᑕᑭᓂᖃᕐᓗᑎᒃ. 11 ᖄᖏᑎᒍᑦ ᐅᔭᕋᓕᕐᓯᒪᒃᑲᓐᓂᕆᓪᓗᑎᒃ ᐊᑭᑐᔪᐊᓗᖕᓂᒃ, ᐃᓕᑦᑎᕐᓯᒪᔪᓄᑦ ᐅᔭᕋᖕᓄᑦ ᓈᒻᒪᒃᓯᑎᑕᐅᓯᒪᓪᓗᑎᒃ ᑖᒃᑯᓄᖓ ᕿᔪᐊᓗᖕᓄᑦ ᓰᑕᕆᓄᑦ. 12 ᐊᖓᔪᖅᑳᕐᔪᐊᒃᑯᕕᐅᑉ ᑐᕐᓲᕐᔪᐊᖓ ᐃᓗᓪᓕᖅ ᐅᔭᕋᒡᔪᐊᖃᕐᐳᖅ ᓴᓇᓯᒪᔪᓂᒃ ᐊᕙᑎᓕᒫᖓ, ᐃᑳᖓᔪᓂᒃ ᓴᐅᓂᖃᕐᓗᓂ ᕿᔪᖕᓂᒃ ᓰᑕᕆᓂᒃ; ᐃᑎᕆᐊᕐᕕᐊ ᐊᑕᓂᐅᑉ ᐃᒡᓗᖓᓄᑦ ᐃᓗᓪᓕᕐᒧᑦ ᐊᑭᓐᓇᔪᐊᖃᕆᓪᓗᑎᒃ ᖃᓕᕇᓂᒃ ᐅᔭᖅᑲᓂᒃ ᐱᖓᓱᐃᓕᖅᑲᖓᔪᓂᒃ ᖁᓪᓕᖃᕐᓗᑎᒃ ᕿᔪᖕᓂᒃ ᓰᑕᕆᓂᒃ. ᕼᐅᕋᒻ ᐱᔭᒃᓴᖓ 13 ᐊᖓᔪᖅᑳᕐᔪᐊᖅ ᓲᓗᒨᓂ ᕾᖁᔨᓚᐅᕐᐳᖅ ᑎᑭᑎᓪᓗᓂᐅᒡᓗ ᕼᐅᕋᒻ ᓴᓇᔨ ᑍᕆᒥᐅᑕᖅ. 14 ᐅᐃᒡᒐᕐᓂᐅᑉ ᐃᕐᓂᖓ ᓈᑉᑕᓕᐅᑉ ᑭᖑᕚᖏᓐᓂᒥᐅᖅ ᐊᑖᑕᖓ ᑍᕆᒥᐅᑕᐅᓚᐅᕐᑐᖅ, ᑖᓐᓇ ᓴᓇᔨ ᑲᓐᓄᔭᓂᒃ; ᓯᓚᑐᔫᓚᐅᕐᐳᖅ, ᑐᑭᓯᐊᑦᓯᐊᕐᓗᓂᓗ ᓴᓇᔪᓐᓇᑦᓯᐊᕐᑐᖅ, ᑲᓐᓄᔭᒥᒃ ᖃᓄᑐᐃᓐᓇᖅ. ᑖᓐᓇ ᑎᑭᓚᐅᕐᐳᖅ ᐊᖓᔪᖅᑳᕐᔪᐊᕐᒧᑦ ᓲᓗᒨᓂᒧᑦ, ᓴᓇᓚᐅᕐᑐᕐᓗ ᓴᓇᔭᕆᐊᖃᕐᑕᓕᒫᒥᓂᒃ. ᓱᑲᕐᔪᐊᒃ ᒪᕐᕉᒃ ᑲᓐᓄᔭᐅᓪᓗᑎᒃ ᑯᕉᓂᑲ ᐂᑉᐸᖏᑦ 3:15-17 15 ᑖᓐᓇ ᓴᓇᕗᖅ ᒪᕐᕉᖕᓂᒃ ᓱᑲᒃᓵᖕᓂᒃ ᖄᓕᕐᓗᒋᒃ ᑲᓐᓄᔭᒥᒃ. 27ᓂᒃ ᐃᑎᒐᖕᓂᒃ ᐳᕐᑐᓂᖃᕐᓗᑎᒃ 18ᓂᒃ ᐃᑎᒐᖕᓂᒃ ᐊᖕᒪᓗᕐᓂᖃᕐᐳᖅ; ᐃᓗᐊ ᐃᓗᓕᖃᕋᓂ, ᓴᓂᕋᖓ ᐊᒡᒊᑦ ᐃᓄᒐᖏᑎᑐᑦ ᓯᑕᒪᑎᑐᑦ ᐃᑦᔪᓂᖃᕐᓗᑎᒃ; ᓱᑲᐅᓪᓗ ᐂᑉᐸᖓ ᑍᒤᓪᓗᐊᕆᕗᖅ. 16 ᓴᓇᓪᓗᓂᓗ ᒪᕐᕉᖕᓂᒃ ᑲᓐᓄᔭᐅᓪᓗᑎᒃ ᑯᕕᔭᒑᖕᓂᒃ ᓱᑲᐅᑉ ᖄᖓᓃᑦᑐᒃᓵᖕᓂᒃ, ᐃᓕᓪᓗᒋᒡᓗ ᓱᑲᐅᑉ ᖄᖓᖕᓄᑦ ᑖᒃᑯᐊᒃ ᐳᕐᑐᓂᖃᕐᐴᒃ ᐃᑎᒐᖕᓂᒃ 7ᓂᒃ ᕿᑎᖅᑲᒥᒡᓗ. 17 ᑖᒃᑯᐊᒃ ᓱᑳᒃ ᖁᓕᖏᒃᑎᒃᑯᑦ ᓴᓇᓐᖑᐊᕐᓯᒪᔪᖃᕐᓗᑎᒃ ᕿᓚᐅᕐᖑᔭᓐᖑᐊᖕᓂᒃ ᐱᕐᕋᕐᓯᒪᔫᖕᓂᒃ. 18 ᓱᑳᒃ ᓴᓇᕚᒃ ᒪᕐᕉᖕᓂᒃ ᓴᓂᓕᕇᖕᓂᒃ ᓄᓗᐊᓐᖑᐊᓕᕐᓯᒪᓪᓗᓂ ᓱᑲᐅᑉ ᖄᖓᓃᑦᑐᓕᒪᑦ ᓈᓗᒋᑦ ᓴᓇᓯᒪᔪᖃᕐᓗᑎᒃ ᐸᐅᕐᖓᓂᒃ ᐹᒥᒍᕌᓐᖑᐊᖕᓂᒃ. 19 ᑖᒃᑯᐊᒃ ᓱᑲᐅᑉ ᓂᐊᖁᖏᒃ ᓴᓇᓯᒪᕘᒃ ᓄᓇᕋᓐᖑᐊᓂᒃ ᓕᓕᓐᖑᐊᓂᒃ ᑕᕐᓴᖃᕐᓗᑎᒃ, ᐃᑎᒐᖕᓂᒃ 6ᓂᒃ ᐳᕐᑐᓂᖃᕐᓗᑎᒃ. 20 ᐃᓕᔭᐅᓯᒪᓪᓗᑎᒃ ᓱᑲᕐᔪᐊᖕᓄᑦ ᐊᖕᒪᓗᕐᓯᓯᒪᔪᒧᑦ ᕿᓚᐅᕐᖑᔭᓐᖑᐊᑦ ᖁᓕᖔᖓᓃᓪᓗᑎᒃ; ᐹᒥᒍᕌᖑᐊᑦ ᐅᓄᕐᓂᖃᕐᓗᑎᒃ 200ᓂᒃ ᑖᒃᑯᓇᓂ ᓱᑳᖕᓂ ᓴᓇᓐᖑᕐᐊᓯᒪᔪᓂᒃ. 21 ᑖᒃᑯᐊᒃ ᓱᑳᒃ ᓇᑉᐸᕐᐹᒃ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᑕ ᓯᕗᕌᓄᑦ; ᐅᓪᓗᓪᓗᐊᑉ ᓇᓛᓃᑦᑐᖅ ᐊᑎᖃᕐᓗᓂ ᔭᑭᓐᒥᒃ, ᐂᑉᐸᖓ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐊᑎᖃᕐᓗᓂ ᐳᐊᓯᒥᒃ. 22 ᓱᑲᐅᑉ ᓂᐊᖁᖏᒃ ᓴᓇᓯᒪᕘᒃ ᓄᓇᕋᓐᖑᐊᓂᒃ ᓕᓕᓐᖑᐊᓂᒃ ᑕᕐᓴᖃᕐᓗᑎᒃ, ᑍᒫᒃ ᓱᑳᒃ ᓴᓇᐅᔭᐅᓂᖏᒃ ᐱᔭᕇᕐᑕᐅᓚᐅᕐᐳᑦ. ᑲᓐᓄᔭᖅ ᖃᑦᑕᖅ ᑯᕉᓂᑲ ᐂᑉᐸᖏᑦ 4:2-5 23 ᕼᐅᕋᒻ ᓴᓇᕗᖅ ᐊᖕᒪᓗᑭᓵᒥᒃ ᑲᓐᓄᔭᐅᓪᓗᓂ ᐃᑎᒐᖕᓂᒃ 7ᓂᒃ ᐃᑎᓂᖃᕐᓗᓂ 15ᓂᒃ ᐃᑎᒐᖕᓂᒃ ᓂᕈᑐᓂᖃᕐᓗᓂ 45ᓂᒃ ᐃᑎᒐᖕᓂᒃ ᐳᕐᑐᓂᖃᕐᓗᓂ. 24 ᐃᒪᖃᐅᑎᐊᓘᑉ ᓯᓂᓕᒫᖓ ᐱᕆᓐᖓᓪᓗᓂ ᒪᕐᕉᒡᓗ ᐱᕈᕐᑐᓐᖑᐊᓕᐊᕆᓯᒪᔫᒃ ᐃᓕᓯᒪᓪᓗᑎᒃ ᐊᑕᐅᓯᐅᔮᕐᓗᓂ ᖄᓕᒫᖓ ᓴᓇᓯᒪᓪᓗᓂ. 25 ᑖᓐᓇ ᐃᒪᖃᐅᑎᐊᓗᒃ ᐃᒻᒧᒃᓯᐅᒊᑦ ᐊᖑᓴᓪᓗᓐᖑᐊᖏᓐᓂᒃ 12ᓂᒃ ᐊᑎᒥᐅᑕᖃᕐᐳᖅ ᐊᕙᒻᒧᑦ ᓵᓐᖓᓪᓗᑎᒃ ᓯᑕᒪᓄᑦ, ᐊᑐᓂᑦ ᐱᖓᓱᑦ ᐊᑕᐅᓯᕐᒧᑦ ᓵᓐᖓᑎᓪᓗᒋᑦ ᐅᓐᓄᐊᓪᓗᐊᒧᑦ, ᓯᕿᓂᐅᑉ ᓂᐱᕕᐊᓄᑦ, ᓯᕿᓂᕐᒧᑦ, ᓯᕿᓂᐅᑉ ᓄᐃᕕᐊᓄᑦ. 26 ᖃᑦᑖᓗᒃ ᐃᑦᔪᓂᖃᕐᐳᖅ ᐊᒡᒐᑎᑐᑦ; ᓯᓈᓗ ᑏᑐᑎᑐᑦ ᐋᖅᑭᒃᓯᒪᓪᓗᓂ, ᓯᓈᓗ ᐊᕙᑦᓯᓚᖓᓪᓗᓂ ᐱᕈᕐᑐᑎᑐᑦ ᓕᓕᑎᑐᑦ, ᑖᓐᓇ ᐃᒪᖃᕈᓐᓇᕐᓗᓂ 10,000ᓂᒃ ᖃᓪᓗᑎᓂᒃ ᐊᖏᑎᒋᔪᒥᒃ. ᑲᓐᓄᔧᑦ ᑬᓪᓗᐊᕈᑏᑦ 27 ᓴᓇᒋᕗᖅ ᖁᓕᓂᒃ ᑬᓪᓗᐊᕈᑎᓂᒃ ᑲᓐᓄᔭᐅᓪᓗᑎᒃ; ᑖᒃᑯᐊᓕᒫᑦ ᑕᑭᓂᖃᕐᓗᑎᒃ ᐱᖓᓲᔪᕐᑐᓂᒃ ᐃᑎᒐᖕᓂᒃ, ᓯᓕᖕᓂᖃᕐᓗᑎᒡᓗ ᐱᖓᓲᔪᕐᑐᓂᒃ ᐃᑎᒐᖕᓂᒃ. 28 ᐃᒫᒃ ᓴᓇᓯᒪᓚᐅᕐᐳᑦ ᑬᓪᓗᐊᕈᑏᑦ; ᓴᓂᕋᖏᑦ ᒪᑐᓯᒪᓪᓗᑎᒃ ᐊᕙᓗᖏᓐᓄᑦ ᐊᑦᓱᖏᕐᓯᒪᔪᓂᒃ. 29 ᓴᓂᕋᖏᓐᓂ ᓴᓇᓯᒪᕗᑦ ᑕᕐᓯᕐᓱᕐᓯᒪᓪᓗᑎᒃ ᓛᔭᓐᖑᐊᓂᒃ, ᐊᖑᓴᓪᓗᓐᖑᐊᓂᒡᓗ ᓯᕈᐱᐊᓐᖑᐊᓂᒡᓗ ᐃᓕᐅᕋᕐᓯᒪᔪᓂᒃ; ᓯᓈᓂ ᑖᒃᑯᐊ ᓛᔭᓐᖑᐊᑦ ᐊᖑᓴᓪᓗᓐᖑᐊᓪᓗ, ᐊᑖᓂ ᖁᓛᓂᓗ ᓴᓇᓐᖑᐊᕐᓯᒪᔪᖃᕆᓪᓗᑎᒃ ᐊᕙᑎᓕᒫᖓ ᑬᕙᓪᓚᒃᓯᒪᑐᐃᓐᓇᕐᓗᓂ. 30 ᑬᓪᓗᐊᕈᑎᓕᒫᑦ ᐊᑐᓂᑦ ᐊᒃᓴᓗᐊᖃᕐᐳᑦ ᑲᓐᓄᔭᐅᒋᓪᓗᑎᒃ ᐊᒃᓴᓗᐊᖃᕐᕕᖏᓪᓗ ᑲᓐᓄᔭᐅᓪᓗᑎᒃ; ᑎᕆᖅᑯᖏᓐᓂ ᓯᑕᒪᓂᒃ ᐅᐊᓴᕐᕕᖕᒧᑦ ᓇᒃᑎᕝᕕᖃᕆᓪᓗᓂ ᑲᓐᓄᔭᓂᒃ, ᑖᒃᑯᐊ ᐊᕙᓗᓕᒫᖓ ᐱᐅᓴᕐᓯᒪᒻᒪᕆᒃᓗᓂ ᓄᓇᕋᓐᖑᐊᓂᒃ ᐱᕐᕋᕐᓯᒪᓐᖑᐊᕐᑐᓂᒃ ᑕᕐᓴᖃᕐᓗᑎᒃ. 31 ᖁᓛ ᑕᕐᐸᓚᖓᓪᓗᓂ ᐊᖕᒪᓗᑭᑖᖑᓚᐅᕐᐳᖅ ᖁᒻᒧᑦ 18ᐃᓐᓴᓯᓂᒃ ᐳᕐᑐᓂᖃᕐᓗᓂ, 7ᐃᓐᓴᓯᓂᒃ ᐊᒻᒧᑦ ᐃᑦᔪᓂᖃᕐᓗᓂ. 32 ᐊᒃᓴᓗᐊᖏᑦ ᓯᑕᒪᑦ ᐊᕙᓗᖏᑕ ᐊᑖᓃᑉᐳᑦ; ᐊᒃᓴᓗᐊᑲᕐᕕᖏᑦ ᐊᑐᓂᑦ ᐊᑕᐅᓯᐅᓕᖅᑲᖓᕗᑦ ᐊᑕᑦᔪᑎᖃᕐᓗᑎᒃ: ᐳᕐᑐᓂᖃᕐᓗᑎᒃ 25ᐃᓐᓴᓯᓂᒃ. 33 ᐊᒃᓴᓗᐊᖏᒃ ᕿᒧᒃᓯᐅᑎᑦ ᐃᑭᒪᕕᖏᑕ ᐊᑦᔨᒋᕔᑦ; ᐊᒃᓴᓗᐊᖃᕐᕕᖏᓪᓗ ᐃᑳᖓᔪᑦ, ᐊᒃᓴᓗᐊᖏᑕᓗ ᐃᑳᖓᔪᖏᑦ ᐃᓗᐊᓃᑦᑐᑦ, ᐊᒃᓴᓗᐊᖏᑕᓗ ᕿᑎᖏᑦ ᒎᓘᔭᐅᓪᓗᑎᒃ ᑯᕕᔭᒐᐅᕗᑦ. 34 ᐊᑖᒍᑦ ᓯᑕᒪᓂᒃ ᕿᕋᑦᑕᖅᑯᑎᖃᕐᓗᑎᒃ ᑎᕆᖅᑯᖏᑎᒍᑦ, ᐃᓚᒋᔭᐅᓪᓗᑎᒃ ᑕᕝᕗᖓ ᑬᓪᓗᐊᕈᑎᒧᑦ. 35 ᑖᒃᑯᐊ 9ᐃᓐᓴᓯᓂᒃ ᓯᓕᖕᓂᓕᖕᒥᒃ ᖁᓛᒍᑦ ᕿᕋᑦᑕᖅᑯᑎᖃᕐᐳᑦ; ᕿᕋᑦᑕᖅᑯᑎᖏᑦ ᐃᓚᓕᐅᑎᓯᒪᓪᓗᑎᒃ ᑕᕝᕗᖓ ᑬᓪᓗᐊᕈᑎᒧᑦ. 36 ᑖᒃᑯᐊ ᕿᕋᑦᑕᖁᑎᖏᑦ ᑕᑯᒥᓇᕐᓴᕐᓯᒪᓪᓗᑎᒃ ᓴᓇᓐᖑᐊᕐᓯᒪᔪᓂᒃ ᓯᕈᐱᓐᖑᐊᓂᒃ, ᓛᔭᓐᖑᐊᓂᒡᓗ, ᓇᐹᕐᑐᓐᖑᐊᓂᒡᓗ ᐹᒥᓐᖑᐊᓂᒡᓗ, ᐱᕈᕐᑐᓐᖑᐊᓂᒃ ᐱᕐᕋᕐᓯᒪᓐᖑᐊᕐᑐᓂᒃ ᐃᓘᓐᓇᖏᑦ ᑕᑯᒥᓇᕐᓴᕐᓯᒪᓪᓗᑎᒃ ᓴᓇᓐᖑᐊᕐᓯᒪᕗᑦ. 37 ᑖᒃᑯᐊ ᑕᕝᕙ ᑬᓪᓗᐊᕈᑏᑦ ᑍᒫᒃ ᓴᓇᓯᒪᓂᖏᑦ; ᑖᒃᑯᐊᓕᒫᑦ ᐊᑦᔨᒌᖑᓪᓗᑎᒃ ᑯᕕᔭᒐᐅᕗᑦ, ᓴᓇᓯᒪᓂᖏᑦ ᐊᖏᓂᖏᓪᓗ ᐋᖅᑭᒃᓯᒪᓂᖏᓪᓗ ᐊᑦᔨᒌᑦᓯᐊᕐᐳᑦ. 38 ᕼᐅᕋᒻ ᓴᓇᒃᑲᓐᓂᕆᕗᖅ ᖃᑦᑕᕐᓂᒃ ᖁᓕᓂᒃ; ᑖᒃᑯᓄᖓ ᐊᑐᓂᑦ ᑬᓪᓗᐊᕈᑎᓄᑦ ᐃᓕᓯᒪᔪᓂᒃ, ᐊᖏᓂᖃᕐᑐᓂᒃ 6ᓂᒃ ᐃᑎᖓᖕᓂᒃ ᓂᕈᑐᑎᒋᔪᓂᒃ, ᐃᒪᖃᕈᓐᓇᕐᓗᑎᒃ 200ᓂᒃ ᖃᓪᓗᑎᓂᒃ. 39 ᑕᓪᓕᒪᑦ ᑬᓪᓗᐊᕈᑏᑦ ᐃᓕᓪᓗᓂᒋᑦ ᐅᓪᓗᓪᓗᐊᑦ ᓇᓛᓄᑦ ᑐᒃᓯᐊᕐᕕᒡᔪᐊᒥ, ᑖᒃᑯᐊᑦᑕᐅᖅ ᑕᓪᓕᒪᑦ ᐅᓐᓄᐊᓪᓗᐊᑉ ᓇᓛᓄᑦ ᐃᓕᓪᓗᓂᒋᑦ; ᖃᑦᑕᖅ ᐊᖏᔪᐊᓗᒃ ᐃᓕᓪᓗᓂᐅᒃ ᐅᓪᓗᓪᓗᐊᑉ ᓯᕿᓂᐅᑉ ᓄᐃᕕᐊᑕ ᓇᓛᓄᑦ. ᓇᓗᓁᕐᓯᒪᔪᑦ ᑐᒃᓯᐊᕐᕕᒡᔪᐊᑉ ᐱᖁᑎᖏᑦ ᑯᕉᓂᑲ ᐂᑉᐸᖏᑦ 4:11—5:1 40 ᕼᐅᕋᒻ ᓴᓇᓚᐅᕆᕗᖅ ᐅᒃᑯᓯᖕᓂᒃ, ᐳᐊᕐᕆᑎᓂᒃ ᐴᒍᑕᓂᒡᓗ. ᕼᐅᕋᒻ ᐱᔭᕇᓚᐅᕐᐳᖅ ᑕᒤᓐᓂᒃ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᑎᓕᓯᑦᔪᑎᒋᓚᐅᕐᑕᓕᒫᖏᓐᓂᒃ ᐊᑕᓂᐅᑉ ᐃᒡᓗᖓᓄᑦ: 41 ᑖᒃᑯᐊᒃ ᓇᐸᔫᒃ ᒪᕐᕉᒃ, ᐴᒍᑕᐅᔮᕐᑐᓪᓗ ᓇᐸᔫᑉ ᖄᖓᓃᑉᐳᑦ, ᒪᕐᕉᒡᓗ ᓄᓗᐊᓐᖑᐊᓕᐊᕆᓯᒪᔫᒃ ᖄᖏᖕᓂᒃ ᐅᓕᒃᓯᓯᒪᔫᒃ ᐴᒍᑕᐅᔮᕐᑐᓂᒃ ᓇᐸᔫᒃ ᖄᖓᓃᑦᑑᖕᓂᒃ; 42 400ᓂᒡᓗ ᑲᓐᓄᔭᓂᒃ ᐹᒥᒍᕌᓐᖑᐊᓂᒃ ᐃᓗᓕᖃᕈᓐᓇᕐᑑᒃ ᒪᕐᕉᒃ ᓄᓗᐊᓐᖑᐊᒃ ᒪᕐᕉᖕᓄᑦ ᑐᑭᓕᕇᖕᓄᑦ ᐹᒥᒍᕌᓐᖑᐊᓂᒃ ᐅᓕᒃᓯᓯᒪᖁᓪᓗᒋᒃ ᐴᒍᑕᐅᔮᕐᑑᖕᓂᒃ ᓇᐸᔫᒃ ᖄᖓᓃᑦᑑᖕᓂᒃ; 43 ᑬᓪᓗᐊᕈᑎᑦ ᖁᓕᑦ, ᖃᑦᑍᓪᓗ ᖁᓕᑦ ᑬᓪᓗᐊᕈᑎᓃᑦᐳᑦ; 44 ᐊᑕᐅᓯᕐᒥᒡᓗ ᐃᒪᖃᐅᑎᕐᔪᐊᒥᒃ ᐊᑖᒍᑦ ᑐᓐᖓᕕᖃᕐᐳᑦ 12ᓂᒃ ᐃᒻᒧᒃᓯᐅᒐᓐᖑᐊᓂᒃ. 45 ᕼᐅᕋᒻ ᓴᓇᓚᐅᕆᕗᖅ ᐅᒃᑯᓯᖕᓂᒃ, ᐳᐊᕐᕆᑎᓂᒃ, ᐴᒍᑕᕐᓂᒡᓗ, ᓴᓇᔭᒃᓴᓕᒫᓂᒃ ᐱᔭᕇᕐᓗᓂᒋᑦ ᐊᖓᔪᖅᑳᕐᔪᐊᕐᒧᑉ ᓲᓗᒨᓂᒧᑦ, ᐊᑕᓂᐅᑉ ᐃᒡᓗᖓᓂ, ᐅᑯᐊ ᑕᕝᕙ ᓴᓇᔭᕕᓂᖏᑦ. ᒪᕐᕉᒃ ᓇᐸᔪᕐᔪᐊᒃ, ᓇᐸᔪᐊᓘᓪᓗ ᖁᓕᖏᓐᓂ ᓴᓇᓐᖑᐊᕐᓯᒪᔪᑦ, ᕿᓚᐅᓐᖑᔭᓐᖑᐊᑦ ᐱᕐᕋᕐᓯᒪᓐᖑᐊᕐᑐᑦ ᖁᓕᖏᓐᓃᑦᑐᒃ, 400ᓂᒃ ᐅᓄᕐᓂᖃᕐᑐᑦ ᐹᒥᒍᕌᓐᖑᐊᑦ, ᒪᕐᕈᐃᓕᖃᖓᔪᑦ 100ᓂᒃ ᐅᓄᕐᓂᓖᑦ ᓇᓗᓁᒃᑯᑍᑦ ᖁᓛᓂ ᐃᓕᓯᒪᓂᐊᕐᑐᑦ. ᖁᓕᑦ ᑬᓪᓗᐊᕉᑏᑦ, ᖁᓕᑦ ᖃᑦᑍᑦ, ᖃᑦᑖᓗᒡᓗ, 12ᓗ ᐊᖑᓴᓪᓗᓐᖑᐊᑦ ᖃᑦᑖᓘᑉ ᑐᓐᖓᕕᖏᑦ ᐅᒃᑯᓰᑦ, ᐳᐊᕐᕆᑏᑦ, ᐅᕐᕙᕖᓪᓗ, ᑖᒃᑯᐊᓕᒫᑦ ᑐᕌᖓᔪᐃᓐᓁᑦ ᐊᑕᓂᐅᑉ ᐃᒡᓗᖓᓄᑦ ᕼᐅᕋᒻ ᓴᓇᔭᖏᑦ ᐊᖓᔪᖅᑳᕐᔪᐊᕐᒧᑦ ᓲᓗᒨᓂᒧᑦ ᕿᓪᓕᕐᓴᕐᓯᒪᔪᐃᓐᓇᐅᕗᑦ ᑲᓐᓄᔧᑦ. 46 ᔪᐊᕐᑕᓂᐅᑉ ᓇᕐᓴᕐᔪᐊᖓᓂ ᐊᖓᔪᖅᑳᕐᔪᐊᑉ ᑕᒪᒃᑯᐊ ᐱᔭᕇᕐᓯᒪᔪᓕᒫᑦ, ᐃᓕᔭᐅᑎᑉᐰᑦ ᓴᑰᑎᐅᑉ ᔭᕆᑕᐅᓪᓗ ᐊᑯᓐᓂᖓᓂ. 47 ᓲᓗᒨᓂᐅᑉ ᑕᒪᒃᑯᐊ ᓴᓇᓯᒪᔪᑦ ᐅᖁᒤᓐᓂᖏᑦ ᑲᓐᓄᔧᑦ ᖃᐅᔨᓴᓐᖏᓔᑦ ᐅᓄᓗᐊᕐᒪᑕ; ᐅᖁᒤᓐᓂᖏᓪᓗ ᓇᓗᓁᕐᑕᐅᓯᒪᓇᑎᒃ. 48 ᓲᓗᒨᓂ ᓴᓇᔭᐅᑎᑦᓯᒋᕗᖅ ᐊᑕᓂᐅᑉ ᐃᒡᓗᖓᑕ ᐃᓗᓕᒃᓴᖏᓐᓂᒃ: ᒎᓗᒥᒃ ᑐᓂᕐᕈᓯᕐᕕᖕᒥᒃ, ᓵᒥᒡᓗ ᒎᓗᒥᒃ ᓂᐊᖂᔭᓄᑦ ᐃᓂᒃᓴᒥᒃ ᒎᑎᒧᑦ ᑐᓂᔭᐅᓯᒪᔪᓄᑦ, 49 ᓇᓂᕈᐊᓪᓗ ᑐᓐᖓᕕᖏᑦ ᖁᓖᑦ ᐃᓕᔭᐅᓯᒪᔪᑦ ᐃᑦᔪᕐᓁᓐᓂᕐᐹᒧᑦ, ᑕᓪᓕᒪᑦ ᐅᓪᓗᓪᓗᐊᑉ ᓇᓛᓃᑦᑐᑦ ᑕᓪᓕᒪᓪᓗ ᐅᓐᓄᐊᓪᓗᐊᑉ ᓇᓛᓃᑦᑐᑦ; ᐃᑦᔪᕐᓁᓐᓂᕐᐹᑉ ᓯᕗᓂᖓᓂ; ᓄᓇᕅᓪᓗ, ᓇᓂᕈᐊᓪᓗ ᑎᒍᓯᑦᔪᑏᓪᓗ ᒎᓗᐃᓐᓇᐅᕗᑦ; 50 ᐃᕐᖑᓰᓪᓗ, ᖁᓪᓕᕐᒥᒡᓗ ᖃᒥᑦᓯᑦᔪᑏᑦ, ᐴᒍᑍᓪᓗ, ᑎᐱᑦᓯᐊᕆᒃᓴᐅᑏᓪᓗ ᐊᓪᓕᕋᖏᑦ, ᐊᓪᓕᕋᐅᔧᓪᓗ ᕿᔪᒃᓴᓄᑦ ᐴᕆᔭᐅᕙᒃᑐᑦ; ᕿᕕᕐᑕᔫᓪᓗ ᐃᑦᔪᕐᓁᓐᓂᕐᐹᑉ ᐅᒃᑯᐊᖓᑕ ᑎᒍᓕᖏᑦ, ᐃᓗᓪᓕᕐᐹᓪᓗ ᐃᑦᔪᕐᓁᓐᓂᕐᐹᑉ ᐅᒃᑯᐊᖓᑕ ᑎᒍᓕᖏᑦ ᒎᓗᓪᓚᕆᐅᔪᑦ, ᓱᓇᒃᑯᑎᓕᒫᖏᑦ ᑐᒃᓯᐊᕐᕕᒡᔪᐊᓪᓗ ᐃᓗᓪᓚᕆᖓᑕ ᐅᒃᑯᐊᖏᑕ ᑎᒍᓕᖏᑦ ᒎᓗᓪᓚᕆᐅᕗᑦ. 51 ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓴᓇᔭᐅᑎᑕᓕᒫᖏᑦ ᐊᑕᓂᐅᑉ ᐃᓪᓗᖓᓄᑦ ᐱᔭᕇᑦᓯᐊᓚᐅᕐᐳᑦ. ᓲᓗᒨᓂᐅᓪᓗ ᑐᒃᓯᐊᕐᕕᒡᔪᐊᑉ ᓱᓇᑐᐃᓐᓇᒃᑯᕕᐊᓄᐊᕐᐰᑦ, ᐊᑖᑕᖓᑕ ᑍᕕᑎᐅᑉ ᑐᓂᕐᕈᑎᒋᓚᐅᕐᑕᖏᑦ ᐊᑕᓂᕐᒧᑦ, ᓯᐅᓪᕕᕇᑦ ᒎᓗᐃᑦ, ᐊᓯᓕᒫᖏᓪᓗ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society