ᐊᑕᓃᑦ ᓯᕗᓪᓖᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᓲᓗᒨᓂᐅᑉ ᓴᓇᓂᖓ ᑐᒃᓯᐊᕐᕕᒡᔪᐊᒥᒃ

¹ 480 ᐊᕐᕌᒍᐃᑦ ᐊᓂᒍᕐᓯᒪᓕᕐᑎᓪᓗᒋᑦ ᐃᓴᕆᐊᓕᐅᑦ ᐃᓄᖏᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᖏᑕ, ᐊᕐᕌᒍᓂᒃ ᓯᑕᒪᓂᒃ ᓲᓗᒨᓂ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐃᓴᕆᐊᓕᒥ, ᑕᖅᑭᐅᑉ ᐂᑉᐸᖓᓂ ᔨᕝᒥ, ᐱᒋᐊᓚᐅᕐᐳᖅ ᓴᓇᓕᕐᓗᓂ ᐊᑕᓂᐅᑉ ᐃᒡᓗᖓᓂᒃ.

² ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐃᒡᓗᓕᐊᖓ ᐊᑕᓂᕐᒧᑦ 60ᓂᒃ ᑕᓕᕐᑐᑦ ᑕᑭᓂᖃᕐᐳᖅ, 20ᓂᒃ ᑕᓕᕐᑐᑦ ᓯᓕᖕᓂᖃᕐᓗᓂ, 30ᓂᒃ ᑕᓕᕐᑐᑦ ᐳᕐᑐᓂᖃᕐᓗᓂ.

³ ᐃᑎᕆᐊᕐᕕᖓ 20ᓂᒃ ᑕᓕᕐᑐᑦ ᑕᑭᓂᖃᕐᐳᖅ, ᓴᓂᒧᑐᓂᖓᓗ ᑍᒤᓪᓗᐊᕆᓪᓗᓂ, 10ᓂᒃ ᑕᓕᕐᑐᑦ ᐳᕐᑐᓂᖃᕐᓗᓂ.

⁴ ᐊᕙᓗᕐᔪᐊᖓᓗ ᑭᓪᓚᖃᐅᕐᐳᖅ ᓯᓚᑖ ᓂᕈᑭᓐᓂᕐᓴᐅᔪᓂᒃ ᐃᓗᐊ ᓂᕈᑐᓂᕐᓴᐅᔪᓂᒃ.

⁵ ᓯᓚᑖᑕᓗ ᐊᑭᓐᓇᖓᓂ ᐃᓚᓯᒋᕗᖅ, ᑐᒃᓯᐊᕐᕕᒡᔪᐊᑉ ᓴᓂᕌᒍᑦ ᐃᑎᕐᕕᖓᓂᑦ ᕿᓐᖑᐊᓄᑦ ᑎᑭᓪᓗᒍ, ᐃᒡᓗᐊᕈᓯᓕᐅᕐᓱᒍᓗ ᐊᕙᑎᓕᒫᖓ.

⁶ ᐃᒡᓗᐊᕈᓰᑦ ᐊᑖᓃᑦᑐᑦ ᐊᑐᓂᑦ ᓴᓂᒧᑐᓂᖃᕐᐳᑦ 7ᓂᒃ ᐃᑎᒐᖕᓂᒃ ᕿᑎᖅᑲᒥᒡᓗ, ᕿᑎᖓᓃᑐᑦ 9ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᓗᑎᒃ, ᖁᓪᓕᕐᐹᖓᓃᑦᑐᖅ ᖁᓕᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᐳᖅ; ᑐᒃᓯᐊᕐᕕᒡᔪᐊᑉ ᐊᑭᓐᓇᖏᒃ ᐊᕙᓗᐊᓃᑦᑑᒃ ᓯᓚᑖᒍᑦ ᐃᓂᓕᐅᕆᕗᖅ ᓱᑬᑦ ᐃᓂᖏᓐᓂᒃ ᐃᒡᓘᑉ ᖁᓛᑕ ᓴᐅᓂᖏᑦ ᐊᑦᑕᕐᓁᓕᓯᒪᑦᓯᐊᖁᓪᓗᒋᑦ ᐃᒡᓘᑉ ᓴᓂᕋᖓᓄᑦ ᐊᑦᓱᖏᐅᒪᑐᐃᓐᓇᖁᓇᒋᑦ.

⁷ ᐃᒡᓗ ᓴᓇᔭᐅᕗᖅ, ᐅᔭᕋᖕᓂᒃ ᓴᓇᔭᐅᔭᕇᕐᓯᒪᔪᓂᒃ ᐅᔭᕋᖕᓂᒃ ᐲᔧᕕᖕᒥ; ᓂᐱᖃᓚᐅᓐᖏᓚᖅ ᑲᑦᔪᒡᕙᓗᒃᑐᒥᒃ ᐅᓕᒪᕐᕙᓗᒃᑐᒥᒡᓘᓐᓃᑦ ᐅᕝᕙᓗ ᓴᓇᕐᕈᑎᓄᑦ ᓴᕕᕋᔭᖕᓄᑦ ᑐᓴᕐᓴᐅᔪᓂᒃ ᑐᒃᓯᐊᕐᕕᒡᔪᐊᖅ ᓴᓇᔭᐅᑎᓪᓗᒍ.

⁸ ᐃᑎᕐᑕᕐᕕᒃ ᐊᓪᓕᕐᐹᖓᓃᑦᑐᖅ ᐅᐃᒍᖓ ᐅᓪᓗᓪᓗᐊᑉ ᓇᓛᓃᑦᑐᖅ, ᒪᔪᕋᐅᑎᖃᕐᓗᓂ ᓇᑏᑦ ᑐᖓᓕᐊᓄᑦ ᐱᖓᔪᐊᓄᓪᓗ ᑐᕌᖓᔪᒥᒃ.

⁹ ᓲᓗᒨᓂᐅᑉ ᐃᒡᓗ ᓴᓇᓚᐅᕐᐹ, ᐱᔭᕇᕐᓗᒍᓗ; ᐃᓗᐊᓂ ᖁᓛᓄᑦ ᐃᓕᓯᕗᖅ ᕿᔪᐊᓗᖕᓂᒃ ᕿᕋᑦᑕᖅᑯᑎᓂᒃ ᕿᔪᖕᓂᒡᓗ ᓵᑦᑐᓂᒃ ᓰᑕᕆᓂᒃ.

¹⁰ ᐅᐃᒍᖓ ᐳᕐᑐᓂᖃᕐᐳᖅ ᐱᖓᓱᓂᒃ ᓇᑎᓕᒃ ᐃᑎᒐᖕᓂᒃ 7ᓂᒃ ᕿᑎᖅᑲᒥᒡᓗ ᐳᕐᑐᓂᖃᕐᐳᖅ, ᓴᓇᔭᐅᓯᒪᕗᖅ ᐊᒃᑐᐊᓪᓗᓂ ᑐᒃᓯᐊᕐᕕᒡᔪᐊᑉ ᐊᑭᓐᓇᖓᓄᑦ ᑖᓐᓇᑦᑕᐅᖅ ᕿᕋᑦᑕᖅᑯᑎᖃᕐᓗᓂ ᕿᔪᐊᓗᖕᓂᒃ ᓰᑕᕆᓂᒃ.

¹¹ ᐊᑕᓂᐅᑉ ᐅᖃᐅᓯᖓ ᓲᓗᒨᓂᒧᑦ ᑎᑭᑉᐳᖅ,

¹² “ᐅᓇ ᐃᒡᓗᓕᐊᕆᔧᑦ ᐱᑦᔪᑎᒋᓪᓗᒍ, ᐊᑐᕐᑕᐅᖁᔭᒃᑲ ᓈᓚᒃᑯᕕᒋᑦ ᒪᓕᒃᑕᐅᖁᔭᒃᑲᓗ, ᐱᖁᔭᒃᑲᓗ ᐱᓯᒤᓐᓇᕐᓗᒋᑦ ᒪᓕᑦᓯᐊᕈᕕᒋᑦ, ᑕᕝᕙ ᐅᖃᐅᓯᕋ ᐃᓕᖕᓂ ᐃᓂᖃᕐᑎᑦᓱᒪᕙᕋ, ᐊᑖᑕᖕᓄᑦ ᑍᕕᑎᒧᑦ ᐅᖃᐅᓯᕆᓚᐅᕐᑕᒃᑲ.

¹³ ᐃᓂᖃᖃᑕᐅᓂᐅᕐᐳᖓ ᐃᓴᕆᐊᓕᐅᑉ ᑭᖑᕚᖏᓐᓂ, ᕿᒪᖕᓂᐊᕐᓇᒋᓪᓗ ᐃᓴᕆᐊᓕᒥᐅᑦ ᐃᓄᖁᑎᒃᑲ.”

¹⁴ ᑕᕝᕙ ᓲᓗᒨᓂᐅᑉ ᐃᒡᓗ ᓴᓇᕚ, ᐱᔭᕇᕐᓗᒍᓗ.

ᑐᒃᓯᐊᕐᕕᒡᔪᐊᑉ ᐃᓗᐊᑕ ᐱᔭᕇᕐᑕᐅᑦᓯᐊᕐᓂᖓ

¹⁵ ᐃᓗᐊᑕ ᐊᑭᓐᓇᖏᑦ ᐃᓗᐹᕈᑦᓯᓚᐅᕐᐰᑦ ᕿᔪᖕᓂᒃ ᓵᑦᑐᓂᒃ ᓰᑕᕆᓂᒃ; ᓇᑎᕐᒥᑦ ᐱᒋᐊᕐᓗᒍ ᖁᓛᓄᑦ ᑎᑭᑦᑐᓂᒃ ᐃᓗᐱᐊᕈᑦᑎᕐᐹ ᕿᔪᖕᓂᒃ; ᓇᑎᖓᓗ ᕿᔪᖕᓂᒃ ᓮᐳᕋᓯᓂᒃ ᓇᑎᓕᐅᕐᓗᒍ.

¹⁶ ᐃᒡᓘᑉ ᕿᓐᖑᐊ ᓵᑦᑐᓂᒃ ᕿᔪᖕᓂᒃ ᓰᑕᕆᓂᒃ 30ᓂᒃ ᐃᑎᒐᖕᓂᒃ ᑕᑭᓂᓕᖕᒥᒃ ᓇᑎᕐᒥᑦ ᖁᓛᓄᑦ ᐃᓗᐱᐊᕈᑦᑎᕐᐹ, ᑕᕝᕙᓂᓗ ᕿᓐᖑᐊᓂ ᐃᓗᕙᓯᖕᓂᕐᐹᒥᒃ, ᓴᓇᕗᖅ ᐃᑦᔪᕐᓁᓐᓂᕐᐹᒥᒃ ᑍᔭᐅᔪᒥᒃ.

¹⁷ ᐃᒡᓗᒥ ᐃᑦᔪᕐᓁᓐᓂᕐᐹᑉ ᓯᕗᕌᓃᑦᑐᖅ ᐃᓚᒋᓪᓗᒍ 60ᓂᒃ ᐃᑎᒐᖕᓂᒃ ᑕᑭᓂᖃᕐᐳᖅ.

¹⁸ ᑖᒃᑯᐊ ᕿᔪᖏᑦ ᑕᑯᒥᓇᕐᓴᕐᓯᒪᓪᓗᑎᒃ ᓴᓇᓐᖑᐊᕐᓯᒪᔪᓂᒃ ᐃᓗᖃᐅᕐᑐᓂᒃ ᓄᓇᕋᓐᖑᐊᓂᒡᓗ; ᑖᑦᓱᒪ ᐃᓗᓕᒫᖓ ᐃᓘᓐᓇᖓ ᕿᔪᖕᓂᒃ ᓰᑕᕆᓂᒃ ᑕᓕᑎᑕᐅᓯᒪᑦᓯᐊᕐᐳᖅ ᐊᑭᓐᓇᖓ ᐅᔭᕋᒃ ᓴᖅᑭᔮᕐᑐᖃᕋᓂ.

¹⁹ ᐃᒡᓘᑉ ᕿᓐᖑᐊᓂ ᐃᓪᓗᐊᕈᓯᕐᒥᒃ ᓴᓇᓚᐅᕆᕗᖅ, ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓᑕ ᐃᓂᒋᓂᐊᕐᑕᖓᓂᒃ.

²⁰ ᑖᓐᓇ ᐃᓪᓗᐊᕈᓯᖅ 30ᓂᒃ ᐃᑎᖓᖕᓂᒃ ᑕᑭᓂᖃᕐᐳᖅ, 30ᓂᒡᓗ ᐃᑎᒐᖕᓂᒃ ᓯᓕᖕᓂᖃᕐᓗᓂ, 30ᓂᒡᓗ ᐃᑎᒐᖕᓂᒃ ᐳᕐᑐᓂᖃᕐᓗᓂ, ᐃᓘᓐᓇᖓ ᒥᖑᐊᕐᓯᒪᓪᓗᓂ ᒎᓗᒥ. ᑐᓂᕐᕈᓯᕐᕕᒃ ᖄᓕᐅᕐᓯᒪᓪᓗᓂ ᕿᔪᖕᓂᒃ ᓰᑕᕆᓂᒃ.

²¹ ᑐᒃᓯᐊᕐᕕᒡᔪᐊᓪᓗ ᐃᓗᐊ ᓲᓗᒨᓂᐅᑉ ᖄᐹᓚᐅᕐᐹ ᒎᓗᓪᓚᕆᖕᒥᒃ ᐃᓚᓯᒪᖏᑦᑐᒥᒃ, ᕿᓚᐅᕐᖑᔭᕐᓗ ᐃᑎᕐᑕᕐᕕᐊᓄᐊᕐᐹ ᒎᓗ, ᐃᑎᕐᑕᕕᖓᓕ ᐃᓗᓪᓕᖅ ᐃᓘᓐᓇᖓ ᒎᓗᐃᓐᓇᐅᓚᐅᓐᖏᓚᖅ.

²² ᐃᓗᓕᒫᑦᓯᐊᖓ ᐃᓗᑉᐱᐊᓕᓚᐅᕐᐹ ᒎᓗᒥᒃ, ᐃᒡᓗᓕᒫᖅ ᐱᔭᕇᕐᑕᐅᓂᖓᓄᑦ ᑎᑭᓪᓗᒍ. ᑐᓂᕐᕈᓯᕐᕕᒃᑕᐅᖅ ᐃᑦᔪᕐᓁᓐᓂᕐᐹᖅ ᑕᒪᕐᒥᑦᓯᐊᖅ ᖄᓕᕐᓯᒪᕗᖅ ᒎᓗᒥᒃ.

²³ ᐃᑦᔪᕐᓁᑦᑐᕕᖕᒥ ᐃᓗᓪᓕᕐᐹᒥ ᓴᓇᓚᐅᕆᕗᖅ ᒪᕐᕉᖕᓂᒃ ᓯᕈᐱᓐᖑᐊᖕᓂᒃ ᕿᔫᖕᓂᒃ ᐊᓕᕕᑎᓂᒃ, ᐊᑐᓂᑦ ᐳᕐᑐᓂᖃᕐᓗᑎᒃ ᐃᑎᒐᖕᓂᒃ 15ᓂᒃ.

²⁴ ᓯᕈᐱᐅᑉ ᐃᓴᕈᐊ ᑕᑭᓂᖃᕐᐳᖅ ᐃᑎᒐᖕᓂᒃ 7ᓂ ᕿᑎᖅᑲᒥᒡᓗ, ᐂᑉᐸᖓᑕᓗ ᐃᓴᕈᐊ ᓯᕈᐱᐅᑉ ᐃᑎᒐᖕᓂᒃ 7ᓂ ᕿᑎᖅᑲᒥᒡᓗ ᑕᑭᓂᖃᕐᐳᖅ, ᐃᓴᕈᐊᑕ ᓄᕗᐊᓂᑦ ᐂᑉᐸᖓᑕ ᐃᓴᕈᐊᑕ ᓄᕗᐊᓄᑦ ᑎᑭᓪᓗᒍ 15ᓂᒃ ᐃᑎᒐᖕᓂᒃ ᑕᑭᓂᖃᕐᐴᒃ.

²⁵ ᓯᕈᐱᐅᑉ ᐂᑉᐸᖓ ᑕᑭᓂᖃᕐᐳᖅ 15ᓂᒃ; ᑕᒪᒃᑮᒃ ᓯᕈᐲᒃ ᐊᑦᔨᒌᖕᓂᒃ ᐊᖏᓂᖃᕐᐴᒃ ᑕᐅᑦᑐᖃᕐᓗᑎᒡᓗ ᐊᑦᔨᒌᖕᓂᒃ.

²⁶ ᐊᑐᓂᑦ ᑖᒃᑯᐊᒃ ᐊᑦᔨᒌᑦᓯᐊᖕᓂᒃ ᐊᖏᓂᖃᕐᐴᒃ ᐊᑐᓂᑦ ᐃᑎᒐᖕᓂᒃ 15ᓂᒃ.

²⁷ ᐃᓕᔭᐅᕗᒃ ᓴᓂᓕᕇᒃᑎᓪᓗᒋᒃ, ᐃᑦᔪᕐᓁᓐᓂᕐᐹᒥ; ᑖᒃᑯᐊ ᐃᓵᖓᒐᒥᒃ ᐊᒃᑐᐊᖃᑦᑕᐅᑎᕘᒃ ᐃᓴᕈᖏᒃᑕ ᓄᕗᖏᒃ, ᐃᓪᓗᐊᕈᓯᐅᑉ ᕿᑎᖓᓃᑉᐴᒃ ᐃᒡᓗᒌᖕᓄᑦ ᐃᓴᕈᒥ ᐊᑭᓐᓇᖅ ᐊᒃᑐᐊᓪᓗᒍ.

²⁸ ᑖᒃᑯᐊᒃ ᑕᒪᖏᒃ ᖄᓕᕐᓯᓪᒪᕘᒃ ᒎᓗᒥᒃ.

²⁹ ᑖᒃᑯᐊᒃ ᓇᔪᕐᑕᖓᑕ ᐃᓗᓕᒪᖓ, ᓴᓇᓐᖑᐊᕐᓯᒪᔪᖃᕐᐳᖅ ᐊᑭᓐᓇᓕᒫᖓ ᓯᕈᐱᓐᖑᐊᓂᒃ ᓇᐹᕐᑐᓐᖑᐊᓂᒡᓗ ᐹᒥᓂᒃ ᓄᓇᕋᓐᖑᐊᓂᒡᓗ ᐊᕙᒻᒧᖓᔪᓂᒃ, ᐃᒡᓗᐊᕈᓯᓕᒫᖏᑦ ᐃᓗᐊᒍᓪᓗ ᓯᓚᑖᒍᓪᓗ.

³⁰ ᐊᒻᒪ ᓇᑎᓕᒫᖓ ᒎᓗᒥᒃ ᖄᓕᕐᓯᒪᕗᖅ ᐃᓗᐊᓗ ᓯᓚᑖᓗ.

³¹ ᐃᑎᕐᑕᕐᕕᖓ ᐃᑦᔪᕐᓁᓐᓂᕐᐹᒧᑦ ᐅᒃᑯᐊᖏᒃ ᒪᕐᕉᒃ ᓴᓇᓯᒪᕘᒃ ᕿᔪᖕᒥᒃ ᐊᓕᕕᑎᒥᑦ; ᐅᒃᑯᐊᖏᑕ ᖁᓛ ᐊᕙᓗᐊᓗ ᐊᔭᒍᑕᐅᔨᖓᕗᑦ ᐊᓂᖓᓪᓗᑎᒃ.

³² ᐅᒃᑯᐊᖏᒃ ᕿᔫᒃ ᓴᓇᓐᖑᐊᕐᕕᒋᕚᒃ ᓯᕈᐱᓐᖑᐊᓂᒃ, ᓇᐹᕐᑐᓐᖑᐊᓂᒡᓗ ᐹᒥᓂᒃ, ᓄᓇᕋᓐᖑᐊᓂᒡᓗ ᐊᕙᒻᒧᖓᔪᓂᒃ; ᓯᕈᐱᓐᖑᐊᑦ, ᓇᐹᕐᑐᓐᖑᐊᑦ, ᐱᕈᕐᑐᓐᖑᐊᑦ; ᑕᒪᕐᒥᒃ ᖄᓕᕐᓯᒪᕗᑦ ᒎᓗᓂᒃ.

³³ ᐃᑎᕐᑕᕐᕕᖓᑕ ᐅᒃᑯᐊᕐᔪᐊᖏᑦ ᐃᓗᓪᓚᕆᐊᓄᑦ ᐅᒃᑯᐊᖓ ᐊᕙᓗᓯᒪᕗᖅ ᕿᔪᖕᒥᒃ ᐊᓕᕕᑎᒥᒃ ᓯᒃᑭᑕᓪᓗᐊᒥᒃ.

³⁴ ᒪᕐᕉᒡᓗ ᐅᒃᑯᐊᒃ ᐱᕆᑦᑕᔫᖑᓪᓗᑎᒃ ᕿᔫᕘᒃ ᓮᐳᕋᓯᐅᓪᓗᑎᒃ.

³⁵ ᖄᖏᑎᒍᑦ ᑕᑯᒥᓇᕐᓴᕐᓯᒪᓪᓗᑎᒃ ᓴᓇᓐᖑᐊᕐᓯᒪᔪᓂᒃ ᓯᕈᐱᐊᓐᖑᐊᓂᒃ, ᓇᐹᕐᑐᓐᖑᐊᓂᒡᓗ ᓄᓇᕋᓐᖑᐊᓂᒡᓗ, ᖄᓕᐅᕐᓯᒪᔪᐃᓐᓇᐅᓪᓗᑎᒃ ᒎᓗᓂᒃ.

³⁶ ᐃᓗᒻᒪᕆᐊ ᑲᑎᒪᕕᐅᑉ ᓴᓇᓯᒪᓗᓂ ᐹᕐᐸᓯᖓᓃᓪᓗᓂ ᐅᔭᕋᖕᓂᒃ ᓴᓇᓯᒪᔪᓂᒃ, ᐊᑭᓐᓇᓕᒫᖏᑦ ᕿᔪᖕᓂᒃ ᓰᑕᕆᓂᒃ ᕿᕋᑦᑕᖅᑯᑎᖃᕐᐳᑦ ᓱᑲᖏᓐᓂᒃ.

³⁷ ᓲᓗᒨᓂᐅᑉ ᐊᖓᔪᖅᑳᕐᔪᐊᖑᓂᖓᑕ ᓯᑕᒪᒋᓕᕐᑕᖓᓂ ᐊᑕᓂᐅᑉ ᐃᒡᓗᖓᑕ ᑐᓐᖓᕕᒃᓴᖓ ᐃᓕᔭᐅᓚᐅᕐᐳᖅ, ᑕᖅᑭᒥ ᔨᕝᕕᒥ.

³⁸ ᑕᖅᑮᑦ ᓯᑕᒪᐅᔪᕐᑐᖓᓂ, ᑕᖅᑭᒥ ᐴᓪᒥ, ᓲᓗᒨᓂᐅᑉ ᐊᐅᓚᑦᓯᓂᖓᑕ 11ᒋᓕᕐᑕᖓᓂ, ᐊᑕᓂᐅᑉ ᐃᒡᓗᖓ ᐱᔭᕇᕐᑕᐅᑦᓯᐊᓚᐅᕐᐳᖅ ᐃᓘᓐᓇᖓ, ᐸᕐᓇᒃᑕᐅᓂᕕᓂᖓ ᓈᒻᒪᓈᕐᑕᐅᑦᓯᐊᕐᓗᓂ. ᓲᓗᒨᓂᐅᑉ ᓴᓇᓚᐅᕐᐹ ᐊᕐᕌᒍᓂᒃ 7ᓂᒃ.