ᐊᑕᓃᑦ ᓯᕗᓪᓖᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᓲᓗᒨᓂᐅᑉ ᐸᕐᓁᕐᓂᖓ ᑐᒃᓯᐊᕐᕕᒃᔪᐊᒥᒃ ᓴᓇᓂᒃᓴᒥᓂᒃ

¹ ᕼᐂᕋᒻ ᑍᕆᐅᑉ ᐊᖓᔪᖅᑳᕐᔪᐊᖓ ᐱᔨᒥᓂᒃ ᑎᓕᓯᓚᐅᕐᐳᖅ ᓲᓗᒨᓂᒧᑦ, ᑐᓴᕋᒥ ᓲᓗᒨᓂ ᐊᖓᔪᖅᑳᕐᔪᐊᓐᖑᕐᑎᑕᐅᖕᒪᑦ ᐊᑖᑕᒥᓂᒃ ᐃᓇᖐᓪᓗᓂ, ᕼᐂᕋᒥᐅᑉ ᑍᕕᑎ ᐃᓚᓐᓈᕆᓚᐅᕋᒥᐅᒃ.

² ᓲᓗᒨᓂ ᑐᓴᕐᑕᐅᖁᔭᒥᓂᒃ ᑍᕋᐅᑉ ᐊᖓᔪᖅᑳᕐᔪᐊᖓᓄᑦ ᐊᐅᓪᓚᕐᑎᑦᓯᕗᖅ ᕼᐂᕋᒻᒧᑦ ᐅᖃᕐᓗᓂ:

³ “ᖃᐅᔨᒪᕗᑎᑦ ᐊᑖᑕᒐ ᑍᕕᑎ ᓴᓇᔪᓇᓚᐅᖏᒻᒪᑦ ᑐᒃᓯᐊᕐᕕᒡᔪᐊᒥᒃ ᐊᑕᓂᐅᑉ ᐊᑎᖓᓄᑦ ᒎᑎᒥᓄᑦ ᐅᓇᑕᖃᑦᑕᕐᓂᕐᒥᓄᑦ ᐊᑭᕋᕐᑐᕐᑎᒥᓂᒃ ᐊᕙᑎᒥᓃᑦᑐᓂᒃ, ᐊᑕᓂᐅᑉ ᓵᓚᖃᕐᑎᓚᐅᖏᓐᓂᓕᒫᖓᓂ.

⁴ ᒫᓐᓇᓕ ᐊᑕᓂᐅᑉ ᒎᑎᒪ ᑐᓂᓯᕕᒋᖕᒪᖓ ᐅᓇᑕᕐᓂᖃᖏᑦᑐᒥᒃ, ᓄᓇᓕᒫᓐᓂ; ᒫᓐᓇ ᐊᑭᕋᖃᖏᑦᓯᐊᕋᒪ. ᐃᓱᒫᓗᓇᕐᑐᖃᕈᓐᓃᕐᓗᓂᓗ ᐅᕙᑦᑎᓐᓄᑦ.

⁵ ᑕᕝᕙ ᐃᓱᒪᖃᓕᕐᐳᖓ ᐃᒡᓗᓕᐅᕈᒪᓪᓗᖓ ᐊᑕᓂᐅᑉ ᒎᑎᒪ ᐊᑎᖓᓄᑦ, ᐊᑕᓂᖅ ᐊᑖᑕᓄᑦ ᑍᕕᑎᒧᑦ ᐅᖃᕐᓯᒪᖕᒪᑦ, ‘ᐃᕐᓃᑦ, ᑖᓐᓇ ᐊᖓᔪᖅᑳᕐᔪᐊᕈᑎᓛᑕᕋ ᐃᓂᒋᔭᕐᓄᑦ, ᑖᑦᓱᒪ ᐃᒡᓗ ᐊᑎᕐᒪ ᐃᓂᒃᓴᖓ ᓴᓇᔪᒫᕐᐹ.’

⁶ ᑍᒤᒻᒪᑦ ᑎᓕᓯᖁᕙᒋᑦ ᐊᖑᑎᓂᒃ ᓕᐸᓇᓂᒧᑦ ᓇᐹᕐᑐᓂᒃ ᓰᑕᕆᓂᒃ ᓇᑲᑎᕆᖁᔨᓕᕆᑦ ᐅᕙᓐᓄᐊᕐᑐᒃᓴᓂᒃ, ᐱᔨᒃᑲ ᑖᒃᑯᓂᖓ ᐃᑲᔪᕐᓂᐊᕐᐳᑦ, ᓴᓇᔨᖁᑎᑎᑦ ᐊᑭᓕᓛᕐᐸᒃᑲ ᐊᑭᒋᔭᐅᖁᔭᕐᓂᒃ; ᖃᐅᔨᒪᑦᓯᐊᕋᕕᑦ ᐅᕙᑦᑎᓐᓂᑦ ᐱᓯᒪᔪᑦ ᓇᓪᓕᕐᓯᔪᓐᓇᖏᒻᒪᑕ ᓮᑐᓂᒥᐅᑦ ᕿᔪᓕᕆᔨᖏᓐᓂᒃ ᕿᔪᖕᓂᒃ ᓇᑲᑎᕆᓗᑎᒃ.”

⁷ ᕼᐂᕋᒻ ᐱᒐᒥ ᓲᓗᒨᓂᐅᑉ ᑐᓴᕐᑕᐅᖁᔭᖓᓂᒃ ᐊᖏᔪᒥᒃ ᖁᕕᐊᓲᑎᒋᕚ ᐅᖃᕐᓗᓂᓗ, “ᐊᑕᓂᖅ ᓂᕐᑐᕐᑕᐅᓕ ᐅᓪᓗᒥ, ᑍᕕᑎ ᐃᕐᓂᖃᕐᓂᕐᒪᑦ ᓯᓚᑐᔪᒥᒃ ᐃᓇᖏᕐᑎᒋᓂᐊᕐᑕᖓᓂᒃ ᐊᖓᔪᖅᑳᕐᔪᐊᖑᓗᓂ ᐃᓅᖃᑎᒌᒡᔪᐊᓂᒃ ᐃᓄᒋᐊᒃᑐᕐᔪᐊᓂᒃ!”

⁸ ᕼᐂᕋᒻ ᓲᓗᒨᓂᒧᑦ ᑭᐅᑦᔪᑎᖓ ᐃᒪᓕᕗᖅ: “ᐱᕙᒃᑲ ᑎᑎᕋᕐᑕᑎᑦ, ᒫᓐᓇ ᐅᐸᓗᖎᕐᓯᒪᑦᓯᐊᕐᐳᖓ ᐱᒋᐊᕈᓐᓇᕐᓗᖓ ᐱᔪᒪᔭᕐᓂᒃ ᓇᐸᕐᑐᓂᒃ ᑐᓂᓂᐊᕐᐸᒋᑦ ᓰᑕᕆᓂᒃ ᓇᐹᕐᑐᓂᒡᓗ ᐰᓐᓂᒃ.

⁹ ᓴᓇᔨᖁᑎᒪ ᓇᐹᕐᑐᐃᑦ ᓕᐸᓇᓂᐅᑉ ᑕᕆᐅᖓᓄᐊᕈᑎᓂᐊᕐᐰᑦ ᐃᒥᖕᓄᑦ ᕿᓚᓱᕐᓗᒋᑦ, ᐳᒃᑕᓛᕐᓗᑎᒃ ᑐᓚᕕᒋᔭᐅᖁᔭᕐᓄᑦ ᓄᓈᕐᑎᑕᐅᔪᒫᕐᒪᑕ, ᑕᕝᕙᓂ ᓴᓇᔨᖁᑎᒃᑲ ᕿᓚᕈᑦᔮᕐᑎᕆᔭᕇᑐᐊᕈᑎᒃ ᓴᓇᔨᖁᑎᖕᓅᑦ ᑐᓂᓯᒐᔭᕐᒪᑕ ᑖᒃᑯᐊ ᑲᒪᖔᕐᑎᓕᕐᓗᒋᑦ; ᐱᔪᒪᔭᖃᕐᐳᖓ ᐃᓕᖕᓂᑦ ᐊᖓᔪᖅᑳᕐᔪᐊᖃᕐᕕᖕᒥ ᐃᒡᓗᒥᐅᖃᑎᒃᑲ ᓂᕿᒃᓴᕐᑖᕐᑎᑕᐅᖁᓪᓗᒋᑦ.”

¹⁰ ᑍᒤᒻᒪᑦ ᕼᐂᕋᒻ, ᓲᓗᒨᓂᒧᑦ ᐊᐅᓪᓚᕐᑎᑦᓯᕗᖅ ᓇᐹᕐᑐᓂᒃ ᓰᑕᕆᓂᒃ, ᐊᒻᒪᓗ ᓇᐹᕐᑐᓂᒃ ᐰᓐᓂᒃ ᐱᔪᒪᔭᓕᒫᖏᓐᓂᒃ,

¹¹ ᓲᓗᒨᓂ ᑐᓂᓯᖕᒥᑎᓪᓗᒍ ᕼᐂᕋᒻᒧᑦ 20,000ᓂᒃ ᐅᖁᒤᓐᓂᖃᕐᑐᓂᒃ ᐊᖓᔪᖅᑳᕐᔪᐊᖃᕐᕕᐅᑉ ᓂᕿᒃᓴᖏᓐᓂᒃ 20,000ᓂᒃ ᐅᖁᒤᓐᓂᖃᕐᑐᓂᒃ, ᐸᐅᕐᖎᑦ ᐅᕐᓱᖏᓐᓂᒃ ᓯᖃᓪᓕᓪᓗᒋᑦ ᐅᕐᓱᓕᐊᕆᓯᒪᔪᓂᒃ ᑐᓂᓯᖃᑦᑕᓚᐅᕐᐳᖅ ᐊᕐᕌᒍᑕᒫᑦ.

¹² ᐊᑕᓂᐅᑉ ᓲᓗᒨᓂ ᑐᓂᓚᐅᕐᒪᒍ ᓯᓚᑐᓂᕐᒥᒃ, ᑍᒫᒃ ᐊᖏᕐᕕᒋᓯᒪᒐᒥᐅᒃ; ᐊᑭᕋᕐᑑᑎᓂᕐᑕᖃᓚᐅᓐᖏᓚᖅ ᕼᐂᕋᒻ ᓲᓗᒨᓂᐅᓪᓗ ᐊᑯᓐᓂᖓᓂ; ᐃᒻᒥᖕᓄᑦ ᐊᖏᖃᑎᒌᑦᓯᐊᕐᓯᒪᓪᓗᑎᒃ.

¹³ ᐊᖓᔪᖅᑳᕐᔪᐊᖅ ᓲᓗᒨᓂ ᑎᓕᓯᕗᖅ 30,000ᓂᒃ ᐊᖑᑎᓂᒃ ᓴᓇᔪᒃᓴᓂᒃ, ᐊᑭᓕᕐᓱᕐᑕᐅᒐᑎᒃ ᐱᓇᓱᐊᕐᓂᐊᕐᑐᓂᒃ ᐃᓴᕆᐊᓕᑎᑦ ᓄᓇᓕᒫᖓᓂᑦ,

¹⁴ ᑖᒃᑯᐊᓗ ᑎᓕᕔᑦ ᓕᐸᓇᓂᒧᑦ, 10,000ᐃᑦ ᑕᖅᑭᒥᒃ ᐊᑕᐅᓯᕐᒥᒃ ᓕᐸᓇᓂᒦᑉᐸᒃᓗᑎᒃ ᑕᖅᑮᖕᓂᒡᓗ ᒪᕐᕉᖕᓂᒃ ᐊᖏᕐᕋᕐᓯᒪᕙᒃᓗᑎᒃ ᑭᖑᕝᕕᕐᑕᕐᑎᒌᒃᓗᑎᒃ; ᐊᑐᓁᕌᒻ ᐊᖓᔪᖅᑳᕆᔭᐅᓪᓗᓂ ᑖᒃᑯᓄᖓ.

¹⁵ ᓲᓗᒨᓂ 70,000ᓂᒃ ᐊᒡᔭᕐᑐᕐᑎᖃᕐᐳᖅ 80,000ᓂᒡᓗ ᐊᕕᒃᑐᐃᔪᓂᒃ ᐅᔭᕋᖕᓂᒃ ᐲᔧᔨᖃᕐᓗᓂ ᐱᖑᖃᐅᕐᑐᒥ,

¹⁶ ᓲᓗᒨᓂ ᐊᖓᔪᖅᑳᖁᑎᖃᓚᐅᕐᐳᖅ 3,300ᓂᒃ ᓴᓇᔪᑦ ᑲᒪᔨᖏᓐᓂᒃ, ᑖᒃᑯᐊᓗ ᐊᖓᔪᖅᑳᓐᖑᓚᐅᕐᐳᑦ ᓴᓇᔪᓄᑦ.

¹⁷ ᐊᖓᔪᖅᑳᕐᔪᐊᑉ ᐱᖁᔨᓂᖓ ᒪᓕᒡᓗᒍ ᐅᔭᕅᑦ ᐱᐅᔪᒻᒪᕆᐊᓗᐃᑦ ᐲᔭᕐᑕᐅᓚᐅᕐᐳᑦ, ᐊᑭᑐᔪᐊᓗᐃᑦ ᑐᒃᓯᐊᕐᕕᒡᔪᐊᑉ ᑐᓐᖓᕕᒃᓴᖏᑦ ᓴᓇᓯᒪᖁᓪᓗᒋᑦ ᐅᔭᕋᖕᓂᒃ ᓴᓇᑦᓯᐊᕐᓯᒪᔪᓂᒃ.

¹⁸ ᓲᓗᒨᓂᐅᑉ ᕼᐂᕋᒻᓗ ᓴᓇᔨᖁᑎᖏᑦ ᐃᒡᓗᒐᓴᖕᓂ ᒋᐸᐅᓕᒥᐅᑍᑦ ᐅᔭᕋᒃᔪᐊᓂᒃ ᐋᖅᑭᒃᓱᐃᕗᑦ ᐱᐅᔪᒻᒪᕆᖕᓂᒃ ᕿᔪᖕᓂᒡᓗ ᑐᒃᓯᐊᕐᕕᒡᔪᐊᒧᑦ ᐃᓚᒋᔭᐅᓂᐊᕐᑐᓂᒃ.