ᐊᑕᓃᑦ ᓯᕗᓪᓖᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᓲᓗᒨᓂᐅᑉ ᐊᖓᔪᖅᑳᖁᑎᖏᑦ

¹ ᐊᖓᔪᖅᑳᕐᔪᐊᖅ ᓲᓗᒨᓂ ᐃᓴᕆᐊᓕᓕᒫᒧᑦ ᐊᖓᔪᖅᑳᕐᔪᐊᓐᖑᓚᐅᕐᐳᖅ,

² ᐅᑯᐊ ᑕᕝᕙ ᐊᖓᔪᖅᑳᖁᑎᒋᓚᐅᕐᑕᖏᑦ: ᐊᔭᕅᐊ ᑐᓂᕐᕈᓯᕐᑎᑦᓯᔨ, ᔭᑑᑭᐅᑉ ᐃᕐᓂᖓ.

³ ᐱᖁᔭᓂᒃ ᐃᓕᓯᒪᔪᓄᑦ ᐊᒡᓚᒃᑏᑦ ᐅᑯᐊᖑᕘᒃ: ᐃᓕᕼᐅᕆᑉ ᐊᕼᐂᔭᓗ ᓰᓴᐅᑉ ᐃᕐᓂᖏᒃ. ᐱᕙᓪᓕᐊᔪᓂᒃ ᐊᒡᓚᑎ: ᔨᕼᐆᓴᐸᑦ ᐊᕼᐃᓗᑎᐅᑉ ᐃᕐᓂᖓ.

⁴ ᐅᓇᑕᕐᑐᒃᓴᓄᑦ ᐊᖓᔪᖅᑳᖅ: ᐱᓁᐊ ᔨᕼᐅᐃᐊᑕᐅᑉ ᐃᕐᓂᖓ, ᑐᓂᕐᕈᓯᕐᑎᑦᓯᔩᒃ: ᔭᑑᒃ ᐊᐰᐊᑕᓗ;

⁵ ᐊᔭᕅᐊ ᓁᑕᓂᐅᑉ ᐃᕐᓂᖓ, ᐊᕕᒃᑐᕐᓯᒪᔪᑦ ᐊᖓᔪᖅᑳᖏᓐᓄᑦ ᐊᖓᔪᖅᑳᖑᕗᖅ; ᔭᐴᑦ ᓁᑕᓂᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔨᐅᔪᖅ ᐊᖓᔪᖅᑳᕐᔪᐊᓪᓗ ᐃᓚᓐᓈᕆᓪᓗᓂᐅᒃ;

⁶ ᐊᕼᐂᓴ ᐊᖓᔪᖅᑳᕐᔪᐊᑉ ᐃᒡᓗᕐᔪᐊᖓᑕ ᐱᔨᖏᓐᓄᑦ ᐊᖓᔪᖅᑳᖑᕗᖅ: ᐊᑐᓂᕋᒻ ᐊᑉᑕᐅᑉ ᐃᕐᓂᖓ ᐊᖓᔪᖅᑳᕆᔭᐅᕗᖅ ᐊᑭᓕᕐᓱᕐᑕᐅᓇᑎᒃ ᓴᓇᔨᓄᑦ.

⁷ ᓲᓗᒨᓂ ᐊᖓᔪᖅᑳᖁᑎᖃᓚᐅᕐᐳᖅ 12ᓂᒃ ᓄᓇᐅᑉ ᐊᕕᒃᑐᕐᓯᒪᓂᖓᓄᑦ ᐃᓴᕆᐊᓕᓕᒫᒥ, ᑖᒃᑯᐊ ᓂᕿᒃᓴᑖᕐᑎᑦᓯᖃᑦᑕᖁᓪᓗᒋᑦ ᐊᖓᔪᖅᑳᕐᔪᐊᕐᒥᒃ ᐃᒡᓗᒥᐅᑕᖏᓐᓂᒡᓗ, ᐊᑐᓂᑦ ᑐᓂᓯᔭᕆᐊᖃᕐᓗᑎᒃ ᑕᖅᑭᖓ ᓇᓪᓕᐅᑎᔭᕌᖓᑦ ᐊᕐᕌᒍᒥ ᐊᑕᐅᓯᐊᕐᓗᑎᒃ ᓂᕿᒃᓴᓂᒃ ᑲᑎᓯᒪᔭᒥᖕᓂᒃ.

⁸ ᐅᑯᐊ ᑕᕝᕙ ᐊᑎᖏᑦ ᓄᓇᓂᑦ ᓂᖏᕐᑕᕐᑎᐅᓂᐊᕐᑐᑦ ᐊᖓᔪᖅᑳᕆᔭᖏᑦ: ᐱᓐ-ᕼᐊᕐ, ᐃᕗᕅᒻ ᖃᖅᑲᖏᓐᓂ ᐱᓯᒪᔪᓄᑦ;

⁹ ᐱᓐ-ᑎᑲᕐ, ᒪᑲᔭᐅᑉ ᐃᒡᓗᒐᓴᖏᓐᓄᑦ, ᐅᑯᐊᓗ, ᓵ-ᐊᓪᐱᒻ, ᐱᑦ-ᓯᒥᔅ, ᐃᓘᓐ-ᐱᑦ-ᕼᐊᓇᓐᓗ;

¹⁰ ᐱᓐ-ᕼᐃᓯᑦ, ᐊᖓᔪᖅᑳᖑᓪᓗᓂ ᐊᕈᐸᑎᒃᑯᑦ ᐃᒡᓗᒐᓴᒡᔪᐊᖏᓐᓄᑦ; ᐅᑯᐊᓗ ᐃᒡᓗᒐᓮᑦ ᐃᓚᒋᓪᓗᒋᑦ ᓲᑰᓪᓗ ᕼᐃᕙᕆᐅᓪᓗ ᓄᓇᓕᒫᖓ;

¹¹ ᐱᓐ-ᐊᐱᓇᑕᑉ, ᓇᐸ-ᑐᐊᕆᐅᑉ ᓄᓇᓕᒫᖓ ᐊᑕᖏᕐᓗᒍ; ᑖᓐᓇ ᓄᓕᐊᖃᓚᐅᕐᑐᖅ ᓲᓗᒨᓂᐅᑉ ᐸᓂᐊᓂᒃ ᑕᑉᕼᐊᑕᒥᒃ.

¹² ᐹᓇ, ᐊᕼᐃᓗᑎᐅᑉ ᐃᕐᓂᖓ: ᐊᖓᔪᖅᑳᖑᑎᓪᓗᒍ ᑖᓇᒃᒧᑦ ᐃᒡᓗᒐᓴᖕᓄᑦ, ᒥᒋᑐᒧᓗ, ᐱᑦ-ᓰᓐ ᖃᓂᒋᔭᓖᒫᖓᓄᑦ ᔭᕆᑕᐅᑉ ᓄᓇᖓᑕ ᖃᓂᒋᔭᖓᓄᑦ ᑎᑭᓪᓗᒍ, ᔨᔭᕆᐅᑉ ᐊᑖᓃᑦᑐᒧᑦ ᑎᑭᓪᓗᒍ, ᐊᒻᒪ ᑕᕝᕙᓐᖓᑦ ᐱᒋᐊᕐᓗᒍ ᐃᒡᓗᒐᓴᒡᔪᐊᖅ ᐊᐱᐅᓪ-ᒥᕼᐅᓚ ᑎᑭᓪᓗᒍ, ᑕᐅᓄᖓ ᔫᒃᒥᐊᒥᐅᑉ ᐊᑭᐊᓄᑦ ᑎᑭᓪᓗᒍ.

¹³ ᐱᓐ-ᒋᐳᕐ, ᐊᖓᔪᖅᑳᖑᑎᓪᓗᒍ ᕌᒪᑦ-ᒋᓖᑦᒧᑦ ᐃᒡᓗᒐᓴᒡᔪᐊᓄᑦ ᐊᖏᔪᓄᑦ ᒥᑭᑦᑐᓄᓪᓗ ᓄᓇᓕᖕᓄᑦ ᒋᓖᑦᒦᑦᑑᓄᑦ ᔧᕆᐅᑉ ᑭᖑᕚᖑᖃᑎᖏᓐᓄᑦ, ᒫᓇᓯᒥᒃ ᓯᕗᓕᖃᕐᑐᓄᑦ, ᐊᕐᒎᑉᒧᑦ ᐹᓴᓂᒦᑦᑐᒧᑦ, 60ᓄᓪᓗ ᓄᓇᓕᖕᓄᑦ ᐊᖏᓂᕐᓴᐅᔪᓄᑦ, ᐊᕙᓗᕐᔪᐊᖃᕐᑐᓄᑦ ᓴᕕᕋᔮᓗᖕᓂᒃ ᑲᓐᓄᔭᓂᒃ ᐅᒃᑯᐊᕐᔪᐊᖃᕐᑐᓄᑦ.

¹⁴ ᐊᕼᐃᓇᑖᑉ ᐃᑑᑉ ᐃᕐᓂᖓ: ᒪᕼᐊᓁᒥᐅᑕᕐᒧᑦ;

¹⁵ ᐊᕼᐂᒫᔅ ᓈᑉᑕᓕᐅᑉ ᓄᓇᖓᓄᑦ ᐊᖓᔪᖅᑳᖑᑎᓪᓗᒍ ᐸᓯᒫᑎᒥᒃ ᓄᓕᐊᖃᓚᐅᕐᑐᖅ ᓲᓗᒨᓂᐅᑉ ᐸᓂᖓᓂᒃ;

¹⁶ ᐹᓇ ᕼᐅᓮᑉ ᐃᕐᓂᖓ: ᐋᓱᕆᐅᑉ ᓄᓇᖓᓄᑦ ᐱᐊᓘᑎᐅᓪᓗ ᓄᓇᓕᖓᓄᑦ;

¹⁷ ᔨᕼᐆᓴᐸᑦ ᐸᕈᐊᑉ ᐃᕐᓂᖓ ᐃᓴᑳᕆᐅᑉ ᓄᓇᖓᓄᑦ ᐊᖓᔪᖅᑳᖑᑎᓪᓗᒍ;

¹⁸ ᓯᒥᐂ ᐃᓚᐅᑉ ᐃᕐᓂᖓ ᐊᖓᔪᖅᑳᖑᑎᓪᓗᒍ: ᐱᓐᔭᒥᓂᐅᑉ ᓄᓇᖓᓄᑦ;

¹⁹ ᒋᐸ ᐅᕆᐅᑉ ᐃᕐᓂᖓ ᐊᖓᔪᖅᑳᖑᑎᓪᓗᒍ ᒋᓕᐊᑎᐅᑉ ᓄᓇᖓᓄᑦ. ᑖᓐᓇ ᐊᖓᔪᖅᑳᕐᔪᐊᕐᒧᑦ ᐊᐅᓚᑕᐅᓚᐅᕐᓯᒪᔪᖅ: ᓮᕼᐆᓂᒧᑦ ᐊᒧᕅᑎᒥᐅᑕᕐᒧᑦ ᐊᖓᔪᖅᑳᕐᔪᐊᕐᒧᓪᓗ ᐋᒡᒧᑦ ᐹᓴᓂᒥᐅᑕᕐᒧᑦ. ᑖᒃᑯᐊ 12ᖑᔪᑦ ᐊᓯᐊᑎᒍᑦ ᐊᖓᔪᖅᑳᕐᑕᖃᕆᓪᓗᓂ ᑖᒃᑯᓄᖓᓕᒫᖅ ᓄᓇᓕᓕᒫᓄᑦ.

ᓲᓗᒨᓂᐅᑉ ᐊᐅᓚᑦᓯᓂᖓ ᑲᔪᓯᑦᓯᐊᕐᓗᓂ

²⁰ ᐃᓄᐃᑦ ᔫᑎᐊᒥ ᓄᓇᓖᑦ ᐃᓴᕆᐊᓕᒥᓗ ᐅᓄᕐᑐᐊᓘᓕᓚᐅᕐᐳᑦ ᓯᐅᕋᕐᑎᑐᑦ ᓯᒡᔭᒦᑦᑐᑎᑐᑦ; ᓂᕆᓪᓗᑎᒡᓗ ᐃᒥᕐᓗᑎᒡᓗ ᖁᕕᐊᓱᖃᑎᒌᒃᐳᑦ.

²¹ ᓲᓗᒨᓂᐅᑉ ᐊᐅᓚᑦᓯᓂᖓ ᑎᑭᐅᒪᓚᐅᕐᐳᖅ ᑰᖕᒧᑦ ᐃᕗᕅᑎᒧᑦ ᐱᓕᔅᑍᓂᒥᐅᑦ ᓄᓇᖓ ᑎᑭᓪᓗᒍ ᐄᑦᔨᑉᑎᓂᐅᓪᓗ ᓄᓇᖓᑕ ᑭᒡᓕᖓᓄᑦ ᐃᓱᖃᕐᓗᓂ; ᐊᖓᔪᖅᑳᐅᕕᒋᔭᓕᒪᖓᓂ ᓄᓇᓖᑦ ᑕᒪᕐᒥᒃ ᑖᒃᓯᔭᕐᐸᓚᐅᕐᐳᑦ, ᑖᑦᓱᒪ ᐃᓅᓂᓕᒫᖓᓂ.

²² ᓲᓗᒨᓂ ᐱᔭᕆᐊᖃᕐᐸᓚᐅᕐᐳᖅ ᐅᓪᓗᑕᒫᑦ 5,000ᓕᑕᓂᒃ ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒥᔪᒥᒃ 10,000ᓕᑕᓂᒡᓗ ᐊᓗᒐᒃᓴᓂᒃ:

²³ ᖁᓕᓂᒃ ᖁᐃᒃᓯᓴᔭᐅᓯᒪᔪᓂᒃ ᐃᒻᒧᒃᓯᐅᒐᕐᓂᒃ, 20ᓂᒃ ᐃᒻᒥᖕᓂᒃ ᖁᐃᒃᓯᓯᒪᔪᓂᒃ ᐃᒻᒧᒃᓯᐅᒐᕐᓂᒃ, 100ᓂ ᓰᐱᓂᒃ, ᑐᒃᑐᖓᔪᓂᒡᓗ, ᒥᑭᑦᑐᓂᒡᓗ ᑐᑐᖓᔪᓂᒃ, ᑐᒃᑐᖓᔪᓂᒡᓗ ᐊᖑᓴᓪᓗᕐᓂᒃ, ᑎᖕᒥᐊᓂᒡᓗ.

²⁴ ᓲᓗᒨᓂ ᐊᐅᓚᑦᓯᓚᐅᕐᐳᖅ ᓄᓇᓂᒃ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᓕᒫᓂᒃ ᑰᑉ ᐃᕗᕅᑎᐅᑉ ᑎᑉᓴᒥᑦ ᒑᓴᒧᑦ, ᐊᒻᒪᓗ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᓕᒫᓄᑦ ᒑᓴ ᑎᑭᓪᓗᒍ, ᑕᒪᕐᒥᒃ ᐊᖓᔪᖅᑳᕐᔪᐊᑦ ᐃᕗᕅᑎᐅᑉ ᖃᓂᒋᔭᖓᓃᑦᑐᓕᒫᑦ ᑖᑦᓱᒥᖓ ᓈᓚᓯᐊᓚᐅᕐᐳᑦ, ᓮᓕᓇᓯᐊᕐᑐᒥᒡᓗ ᐃᓅᓯᖃᕐᑎᑕᐅᓪᓗᓂ ᖃᓂᒋᔭᖓᓃᑦᑐᓕᒫᓂᑦ.

²⁵ ᐃᓄᐃᑦ ᓄᓇᖃᕐᑐᑦ ᔫᑕᒥ ᐃᓴᕆᐊᓕᒥᓗ ᓄᓇᖃᓚᐅᕐᐳᑦ ᐊᑦᑕᕐᓇᖏᑦᓯᐊᕐᑐᒥ, ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒋᑦ, ᐃᓄᓕᒫᑦ ᓇᖕᒥᓂᖅ ᐸᐅᕐᖓᓂᒃ ᕔᓂᒃᓴᓂᒃ ᐱᕈᕐᓯᐊᖃᕐᓗᑎᒃ ᓇᐹᕐᑐᖁᑎᖃᕐᓗᑎᒡᓗ ᐸᐅᕐᖓᓕᖕᓂᒃ, ᓲᓗᒨᓂᐅᑉ ᐃᓅᓂᓕᒫᖓᓂ.

²⁶ ᓲᓗᒨᓂ 40,000ᓂᒃ ᕿᒻᒥᕐᔪᐊᒃᑯᕕᖃᓚᐅᕐᐳᖅ ᐊᒃᓴᓗᐊᓕᖕᓄᑦ ᐊᑐᕐᑐᒃᓴᓂᒃ, 12,000ᓂᒡᓗ ᕿᒥᔪᐊᖁᑎᖃᕐᓗᓂ ᐅᓇᑕᕈᑎᒃᓴᓂᒃ.

²⁷ ᑖᒃᑯᐊ ᐊᖓᔪᖅᑳᖁᑎᖏᑦ ᑕᕝᕗᖓ ᑐᓂᓯᕙᒃᓗᑎᒃ ᑕᖅᑭᓂᒃ ᑐᓂᔭᕆᐊᖃᕐᑕᒥᖕᓂᒃ, ᓂᕿᓂᒃ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓂᕿᒃᓴᖏᓐᓂᒃ, ᐊᖓᔪᖅᑳᕐᔪᐊᖑᕕᖓᓂ ᐊᔪᕐᓴᕐᑎᑕᐅᓚᐅᓐᖏᓚᖅ ᓱᓇᓕᒫᓂᒃ.

²⁸ ᑖᒃᑯᐊᑦᑕᐅᖅ ᐊᖓᔪᖅᑳᖁᑎᖏᑦ ᑐᓂᓯᖃᑦᑕᓚᐅᕆᕗᑦ ᓂᐊᖂᔭᒃᓴᓂᒃ ᐃᕕᒐᕐᓂᒡᓗ ᕿᒻᒥᕐᔪᐊᖁᑎᖏᑕ ᐆᒪᔪᖁᑎᖏᑕᓗ ᓂᕿᒃᓴᖏᓐᓂᒃ ᑐᓂᓯᕙᓚᐅᕐᐳᑦ ᐱᔭᕆᐊᖃᓕᕌᖓᒥᒃ, ᐊᖓᔪᖅᑲᐅᕕᒋᔭᑎᒃ ᒪᓕᒡᓗᒋᑦ.

²⁹ ᒎᑎᐅᑉ ᓲᓗᒨᓂ ᑐᓂᓚᐅᕐᒪᒍ ᓯᓚᑐᓂᕐᒥᒃ ᑐᑭᓯᒪᓂᕐᒥᒡᓗ ᐊᑦᔨᖃᖏᑦᑐᒥᒃ, ᖃᐅᔨᒪᓂᕐᒥᒡᓗ ᓲᕐᓗ ᓯᐅᕋᕐᑎᑐᑦ ᐃᒪᐅᑉ ᓯᓈᓃᑦᑐᑎᑐᑦ ᐊᖏᑎᒋᔪᒥᒃ.

³⁰ ᓲᓗᒨᓂ ᓯᓚᑐᓂᕐᓴᐅᓚᐅᕐᐳᖅ ᐃᓄᖕᓂᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓕᒫᓂᑦ, ᓯᓚᑐᓂᕐᓴᐅᓪᓗᓂᓗ ᐄᑦᔨᑉᑎᐅᑉ ᓯᓚᑐᔪᖁᑎᓕᒫᖏᓐᓂᑦ.

³¹ ᐊᖑᑎᓕᒫᑦᓯᐊᓂᑦ ᓯᓚᑐᓂᕐᐹᖑᓚᐅᕐᐳᖅ, ᓯᓚᑐᓂᕐᓴᐅᓪᓗᓂ ᐃᑖᓐᒥᑦ ᐃᔭᕅᑎᒥᓪᓗ, ᕼᐃᒪᓐᒥᓪᓗ, ᑲᓪᑯᓪᒥᓪᓗ, ᑖᕐᑕᒥᓪᓗ ᒪᕼᐅᓕᐅᑉ ᐃᕐᓂᖏᓐᓂᑦ; ᖃᐅᔨᒪᔭᐅᑦᓯᐊᕐᓂᖓ ᓯᐊᒻᒪᓚᐅᕐᐳᖅ ᐃᓅᖃᑎᒌᒡᔪᐊᓄᑦ ᐊᕙᑎᓕᒫᖏᓐᓃᑦᑐᓄᑦ.

³² ᐅᖃᐅᓯᖃᓚᐅᕆᕗᖅ 3,000ᓂᒃ ᓯᓚᑐᓂᕐᓂᒃ ᐅᖃᓪᓚᖕᓂᕐᓂᒃ; 1,000ᓪᓗ ᐅᖓᑖᓃᑦᑐᓂᒃ ᐃᓐᖏᕈᓯᓕᐅᕐᓗᓂ.

³³ ᐅᖃᐅᓯᖃᕐᐸᒡᓗᓂ ᓇᐹᕐᑐᓂᒃ, ᐱᕈᕐᑐᓂᒃ ᓕᐸᓇᓂᒥᐅᑦ ᓇᐹᕐᑐᖏᓐᓂᒃ ᓰᑕᕆᓂᒃ, ᐱᕈᕐᑐᓂᒡᓗ ᐊᑭᓐᓇᒥ ᐱᕈᕐᑐᓂᒃ ᕼᐊᓯᑉᓂᒃ; ᐅᖃᐅᓯᖃᕆᓪᓗᓂᓗ ᐅᒫᔪᓂᒃ, ᑎᖕᒥᐊᓂᒃ, ᖁᒡᓗᒋᐊᓂᒃ ᐊᑦᔨᒌᖏᑦᑐᓂᒃ, ᐃᖃᓗᖕᓂᒡᓗ.

³⁴ ᓇᑭᓕᒫᖅ ᑐᓵᔭᕐᑐᕐᑕᐅᖃᑦᑕᓚᐅᕐᐳᖅ ᓲᓗᒨᓂᐅᑉ ᓯᓚᑐᓂᖓ, ᓯᓚᕐᔪᐊᓕᒫᒥᓗ ᐊᖓᔪᖅᑳᕐᔪᐊᖑᔪᑦ ᑐᓴᐅᒪᓕᓚᐅᕐᐳᑦ ᑖᑦᓱᒪ ᓯᓚᑐᓂᖓᓂᒃ.