ᐊᑕᓃᑦ ᓯᕗᓪᓖᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᓲᓗᒨᓂ ᑐᒃᓯᐊᕐᐳᖅ ᓯᓚᑐᓂᕐᑖᕈᒪᓪᓗᓂ

¹ ᓲᓗᒨᓂ ᐂᑉᐸᕐᑖᕐᓂᒃᑯᑦ ᐃᑲᔪᕐᑎᑖᕐᐳᖅ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓂᒃ ᐰᕉᒥᒃ; ᐸᓂᖓᓂᒃ ᓄᓕᐊᕐᑖᕐᓗᓂ, ᐊᖏᕐᕋᐅᑎᓪᓗᓂᐅᒡᓗ ᑍᕕᑎᐅᑉ ᐃᒡᓗᒐᓴᖏᓐᓄᑦ, ᐱᔭᕇᓚᐅᖏᓐᓂᕐᒥᓂ ᓇᖕᒥᓂᖅ ᐃᒡᓗᒃᓴᒥᓂᒃ, ᐊᑕᓂᐅᓪᓗ ᐃᒡᓗᖓᓂᒃ, ᔨᕉᓴᓕᐅᓪᓗ ᐊᕙᓗᕐᔪᐊᖓᓂᒃ.

² ᐃᓄᐃᑦ ᓱᓕ ᑐᓂᕐᕈᓯᖃᑦᑕᓚᐅᕐᒪᑕ ᖃᖅᑲᓂ ᐳᕐᑐᔪᓂ, ᓱᓕ ᐅᓪᓗᓂ ᑖᒃᑯᓇᓂ ᐊᑕᓂᐅᑉ ᐃᒡᓗᖓ ᓴᓇᔭᐅᓯᒪᓚᐅᖏᒻᒪᑦ.

³ ᓲᓗᒨᓂ ᐊᑕᓂᕐᒥᒃ ᐱᓐᓈᕈᓱᒻᒪᕆᒃᑲᒥ, ᒪᓕᑦᓯᐊᕐᓗᓂᓗ ᐊᑖᑕᒥ ᑍᕕᑎᐅᑉ ᒪᓕᒃᑕᐅᖁᔭᖏᓐᓂᒃ, ᐃᒻᒥᓂᒡᓕ ᐆᒪᔪᓂᒃ ᑐᓂᕐᕈᑎᒃᓴᓂᒃ ᑐᓂᕐᕈᓯᕐᐸᓚᐅᕆᕗᖅ ᑐᓂᕐᕈᓯᕐᕕᖕᓄᑦ ᖃᖅᑲᒦᑦᑐᓄᑦ.

⁴ ᑕᕝᕙ ᐊᖓᔪᖅᑳᕐᔪᐊᖅ ᒋᐱᐅᓂᒧᐊᕐᐳᖅ ᑐᓂᕐᕈᓯᕆᐊᕐᑐᕐᓱᓂ ᑖᓐᓇ ᑐᓂᕐᕈᓯᕐᕕᒃ ᐅᓄᕐᑐᓄᑦ ᖃᐅᔨᒪᔭᐅᖕᒪᑦ, ᓲᓗᒨᓂ ᐅᓄᕐᑐᕐᔪᐊᓂᒃ 1000 ᐅᖓᑖᓂᑦᑐᓂᒃ ᑕᕝᕙᓂ ᑐᓂᕐᕈᑎᓂᒃ ᑐᓂᕐᕈᓯᖃᑦᑕᕐᓯᒪᒐᒥ ᑕᒪᑐᒪ ᓯᕗᓂᖓᒍᑦ.

⁵ ᑕᕝᕙᓂ ᒋᐱᐅᓂᒥ ᐊᑕᓂᖅ ᓴᖅᑭᑉᐳᖅ ᓲᓗᒨᓂᒧᑦ ᓯᓐᓇᒃᑑᒪᒃᑯᑦ ᐅᓐᓄᐊᒥ ᐅᖃᕐᓗᓂᓗ, “ᑐᒃᓯᐊᓚᐅᕆᑦ ᓱᓇᒥᒃ ᑐᓂᓯᕕᐅᔪᒪᖕᒪᖔᕐᐱᑦ ᐅᕙᓐᓄᑦ.”

⁶ ᓲᓗᒨᓂ ᑭᐅᕗᖅ “ᓇᒡᓕᒍᓱᖕᓂᕐᓂᒃ ᐊᖏᔪᒥᒃ ᓱᖁᓯᔪᐃᑦᑐᒥᒃ ᐱᔨᖕᓄᑦ ᐊᑖᑕᓐᓄᑦ ᑍᕕᑎᒧᑦ ᓴᖅᑭᑎᑦᓯᓯᒪᕗᑎᑦ, ᑖᓐᓇ ᐃᓅᓯᖃᓚᐅᕐᒪᑦ ᐃᓕᖕᓂᒃ ᒪᓕᑦᓯᐊᕐᓱᓂ, ᐃᓱᐊᕐᑐᓕᓂᕐᒥ, ᑲᔪᓯᑦᓯᐊᕐᓗᓂᓗ ᐆᒻᒪᑎᒥᒍᑦ ᐃᓕᖕᓄᑦ; ᓇᓗᓁᕐᓯᕕᒋᓯᒪᒐᕕᐅᒡᓗ ᐊᖏᔪᐊᓗᖕᒥᒃ ᓇᒡᓕᖕᓂᕐᓂᒃ ᓱᕐᕋᔪᐃᑦᑐᒥᒃ, ᐃᕐᓂᕐᑖᕐᑎᓪᓗᒍ ᐊᖓᔪᖅᑳᕐᔪᐊᖑᕕᖓᓂ ᐃᒃᓯᕙᓂᐊᕐᑐᒥᒃ ᐅᓪᓗᒥ ᐊᑐᓕᕐᑐᒥᒃ.

⁷ ᒫᓐᓇᓕ, ᐊᑕᓃᖅ ᒎᑎᒐ, ᐱᔪᓐᓇᕐᑎᓯᒪᒐᕕᖓ ᐊᖓᔪᖅᑳᕐᔪᐊᖑᖁᓪᓗᖓ ᐊᑖᑕᒪ ᑍᕕᑎᐅᑉ ᐃᓂᖓᓂ, ᐃᓅᓱᒃᑑᓗᐊᕋᓗᐊᕐᑎᓪᓗᖓ; ᖃᐅᔨᒪᓇᖓᓗ ᐊᐅᓚᑦᓯᔭᕆᐊᒃᓴᖅ ᖃᓄᖅ ᐊᓂᒋᐊᒥᒃ ᖃᓄᕐᓗ ᐃᑎᕆᐊᒥᒃ.

⁸ ᐱᔩᓪᓗ ᐃᓄᖁᑎᕕᑦ ᐊᑯᕐᖓᓐᓃᑉᐳᖅ ᓂᕈᐊᕆᓚᐅᕐᑕᕕᑦ, ᐃᓄᒋᐊᒃᑐᕐᔪᐊᑦ, ᐊᒡᓛᑦ ᐅᓄᓗᐊᕐᓂᖏᓐᓄᑦ ᓈᓴᕐᑕᐅᔪᓐᓇᖏᑦᑐᑦ.

⁹ ᑍᒤᒻᒪᑦ ᐱᔩᑦ ᑐᓂᓯᕕᒋᓚᐅᕈᒃ ᐃᓱᒪᒃᑯᑦ ᑐᑭᓯᔪᓐᓇᕐᓂᕐᒥᒃ ᐊᐅᓚᑦᓯᔪᓐᓇᖁᓪᓗᖓ ᐃᓄᖁᑎᖕᓂᒃ, ᖃᐅᔨᒪᔪᓐᓇᖁᓪᓗᖓ ᐱᐅᔪᒥᒃ ᐱᐅᖏᑦᑐᒥᒡᓗ; ᑭᓇᓖ ᐊᐅᓚᑦᓯᔪᓐᓇᕐᐸ ᐃᓄᖁᑎᖕᓂᒃ ᑍᒫᒃ ᐅᓄᕐᑐᕐᔪᐊᖑᔪᓂᒃ?”

¹⁰ ᐊᑕᓂᖅ ᖁᕕᐊᓱᓚᐅᕐᐳᖅ ᓲᓗᒨᓂ ᑕᒪᑐᒥᖓ ᕿᓄᐊᕆᔭᑲᕐᒪᑦ,

¹¹ ᒎᑎᐅᓪᓗ ᐅᖃᐅᑎᕚ, “ᕿᓄᒐᕕᑦ ᓯᓚᑐᓂᕐᒥᒃ ᐱᔪᒪᓪᓗᑎᑦ ᓈᒻᒪᓈᕐᑐᒥᒃ ᐊᐅᓚᑦᓯᔪᒪᓪᓗᑎᑦ, ᓇᖕᒥᓂᖅ ᐃᓅᑯᑖᒍᒪᓂᑐᐃᓐᓇᕐᒥᐅᖏᑦᑐᖅ, ᐅᕝᕙᓗ ᐊᒃᓱᐃᓕᔪᒪᑐᐃᓐᓇᕐᓂᐅᖏᑦᑐᒥᒃ, ᐊᑭᕋᕕᓪᓘᓐᓃᑦ ᑐᖁᑕᐅᓂᒃᓴᖏᓐᓂᒃ ᐱᔪᒪᖏᓐᓇᕕᑦ, ᕿᓄᒐᕕᓪᓕ ᐱᔪᒪᓪᓗᑎᑦ ᑐᑭᓯᐅᒪᔪᒪᓪᓗᑎᑦ ᓱᓇ ᓈᒻᒪᖕᒪᖔᑦ.

¹² ᑕᑯᒋᑦ, ᐱᔪᒪᔭᕐᓂᒃ ᑐᓂᓂᐊᕐᐸᒋᑦ ᐅᖃᐅᓰᑦ ᒪᓕᒡᓗᒍ, ᑕᑯᒋᑦ, ᓯᓚᑐᓂᕐᒥᒃ ᖃᐅᔨᒪᔪᓐᓇᕐᓂᕐᒥᒡᓗ ᐃᓱᒪᒥᒃ ᑐᓂᓯᕕᒋᕙᒋᑦ, ᐃᓕᒃᑐᑦ ᑍᒤᑦᑐᒥᒃ ᓯᕗᓂᕐᓂ ᑍᒤᑦᑐᖃᓚᐅᕐᓯᒪᓐᖏᓚᖅ ᑭᖑᓂᕐᓂᓗ ᑍᒤᑦᑐᖃᓚᐅᕐᓯᒪᓂᐊᕋᓂ.

¹³ ᑐᓂᓂᐊᕐᐸᒋᑦ ᕿᓄᐊᕆᓚᐅᓐᖏᑕᕐᓂᒃ, ᐃᓅᓯᓕᒫᕐᓂ ᐊᒃᓱᐃᑦᑑᓂᕐᒥᒃ, ᐅᐱᒋᔭᐅᓂᕐᒥᒡᓗ, ᐃᓕᒃᑐᑦ ᐊᖓᔪᖅᑳᕐᔪᐊᖑᔪᒥᒃ ᐊᑦᔨᖃᕐᓂᐊᓐᖏᓚᑎᑦ ᐃᓅᓂᓕᒪᕐᓂ.

¹⁴ ᓈᓔᓐᓇᕈᕕᖓ ᐊᑐᕐᑕᐅᖁᔭᒃᑲᓗ ᐱᖁᔭᒃᑲᓗ ᒪᓕᒃᑯᕕᒋᑦ, ᐊᑖᑕᒃᑐᑦ ᑍᕕᑎᑐᑦ, ᑕᕝᕙ ᐅᓪᓗᑎᑦ ᐅᓄᕐᓯᒋᐊᕐᑎᓐᓂᐊᕐᐸᒃᑲ.”

¹⁵ ᓲᓗᒨᓂ ᑐᐸᒃᑲᒥ, ᑕᑯᒋᓪᓗ, ᖃᐅᔨᓕᕐᐳᖅ, ᑕᒪᓐᓇ ᓯᓐᓇᒃᑑᒪᓂᐅᖕᒪᑦ. ᑕᕝᕙ ᔨᕉᓴᓕᒧᐊᕐᐳᖅ, ᐊᑕᓂᐅᑉ ᐃᒃᓯᕕᖓᑕ ᐊᖏᖃᑎᒌᒍᑎᓂᒃ ᐃᓗᓕᖃᕐᑑᑉ ᓵᖓᓂ ᓇᖏᕐᐳᖅ, ᑐᓂᕐᕈᓯᕐᓗᓂᓗ ᐆᑕᒃᓴᓂᒃ ᑐᓂᕐᕈᑎᓂᒃ ᐃᓚᖃᑦᓯᐊᕐᓂᕐᒧᓪᓗ ᑐᓂᕐᕈᑎᓂᒃ, ᑕᒪᑐᒪ ᑭᖑᓂᖓᒍᑦ ᓂᕆᕕᒡᔪᐊᕐᑎᑦᓯᕗᖅ ᐱᔨᓕᒫᒥᓂᒃ.

ᓲᓗᒨᓂᐅᑉ ᐃᖅᑲᕐᑐᐃᓂᖓ ᐱᔭᕐᓂᖏᑦᑐᒥᒃ

¹⁶ ᐊᕐᓈᒃ ᒪᕐᕉᒃ ᐊᖑᓐᓂᐊᕐᓂᕐᒧᑦ ᑮᓇᐅᔭᓕᐅᕐᑏᒃ ᐊᖓᔪᖅᑳᕐᔪᐊᒧᐊᕐᐴᒃ, ᓵᖓᓂᓗ ᓇᖏᕐᓗᑎᒃ.

¹⁷ ᐂᑉᐸᖓ ᐅᖃᓕᕐᐳᑦ, “ᐊᑕᓂᕋ ᐅᓇᓗ ᐊᕐᓇᖅ ᐊᖏᕐᕋᖃᕋᓐᓄᒃ ᐊᑕᐅᓯᕐᒥ; ᕿᑐᕐᖓᕐᑖᓚᐅᕋᒪ ᒪᕐᕈᐃᓐᓇᐅᓪᓗᓄᒡᓗ ᑕᕝᕙᓂ ᐃᒡᓗᒥ.

¹⁸ ᐅᓪᓗᐃᑦ ᐱᖓᔪᖓᓐᓂ ᕿᑐᕐᖓᕐᑖᓚᐅᕐᑎᓪᓗᖓ, ᑖᓐᓇ ᐊᕐᓇᖅ ᕿᑐᕐᖓᕐᑖᓚᐅᕆᕗᖅ; ᐃᓄᑑᓪᓗᓄᒡᓗ ᑕᕝᕙᓂ; ᐊᓯᑦᑎᓐᓂᒃ ᑕᕝᕙᓃᑦᑐᖃᕋᓂ ᐃᒡᓗᒥ, ᒪᕐᕈᐃᓐᓇᐅᓪᓗᓄᒃ ᑕᕝᕙᓂ.

¹⁹ ᐅᓐᓄᐊᒃᑯᑦ ᑖᑦᓱᒪ ᐃᕐᓂᖓ ᑐᖁᓚᐅᕐᐳᖅ, ᐃᐱᑎᓚᐅᕐᒪᒍ ᖃᓪᓕᕐᓗᓂᐅᒃ.

²⁰ ᐅᓐᓄᐊᖑᑎᓪᓗᒍ ᒪᑭᓐᓇᒥ, ᐃᕐᓂᕋ ᓴᓂᓐᓃᑦᑐᖅ ᐱᓪᓗᓂᐅᒃ, ᓯᓂᒃᑎᓪᓗᖓ ᐃᒡᓕᕐᒥᓅᕈᑎᓚᐅᕐᐹ; ᑖᓐᓇ ᑐᖁᖓᓕᕐᑐᖅ ᐅᕙᓐᓅᕐᑎᖔᕐᓗᓂᐅᒃ.

²¹ ᑐᐸᒃᑲᒪ ᐅᓪᓛᒃᑯᑦ ᕿᑐᕐᖓᕋ ᐊᒫᒪᒃᑎᑦᓱᒪᓪᓗᒍ, ᖃᐅᔨᓕᕐᐸᕋ, ᑐᖁᖓᔪᖅ; ᑕᑯᑦᓯᐊᕋᓱᓕᕋᒃᑯ ᐅᓪᓛᒃᑯᑦ, ᑕᑯᒋᑦ, ᖃᐅᔨᓕᓚᐅᕐᐸᕋ ᕿᑐᕐᖓᕆᓐᖏᑕᕋ.”

²² ᐊᕐᓇᐅᑉ ᐂᑉᐸᖓ ᐅᖃᓕᕐᐳᖅ, “ᓄᑕᕋᖅ ᐆᒪᔪᖅ ᐱᒋᕙᕋ, ᓄᑕᕋᖅ ᑐᖁᖓᔪᖅ ᐱᒋᕙᑦ!” ᐊᕐᓇᖅ ᓯᕗᓪᓕᐅᖅᑲᐅᔪᖅ ᐅᖃᕐᐳᖅ, “ᓱᓕᓐᖏᓚᑎᑦ ᑖᓐᓇ ᑐᖁᖓᔪᖅ ᐱᒋᒐᕕᐅᒃ, ᓄᑕᕋᖅ ᐆᒪᔪᖅ ᐱᒋᕙᕋ!” ᑍᒫᒃ ᐊᕐᓈᒃ ᐃᒻᒥᖕᓄᑦ ᓂᓪᓕᐊᕗᒃ ᐊᖓᔪᖅᑳᕐᔪᐊᑉ ᓵᖓᓂ.

²³ ᑕᕝᕙ ᐊᖓᔪᖅᑳᕐᔪᐊᖅ ᐅᖃᓕᕐᐳᖅ, “ᐂᑉᐸᖓ ᐅᖃᕐᒪᑦ, ‘ᑖᓐᓇ ᐃᓅᔪᖅ ᐃᕐᓂᕆᕙᕋ, ᐃᕐᓃᓪᓗ ᑐᖁᖓᕗᖅ’; ᐂᑉᐸᖓᓗ ᐅᖃᕆᓪᓗᓂ, ‘ᓱᓕᓐᖏᓚᑎᑦ; ᐃᕐᓃᑦ ᑐᖁᕗᖅ, ᐃᕐᓂᕋ ᑕᕝᕙ ᐆᒪᔪᖅ.’”

²⁴ ᑕᕝᕙ ᐊᖓᔪᖅᑳᕐᔪᐊᖅ ᐅᖃᓕᕐᐳᖅ, “ᓴᕕᒡᔪᐊᒥᒃ ᕾᑦᑎᔪᖃᓚᐅᕐᓕ.” ᑕᕝᕙ ᓴᒡᕕᔪᐊᖅ ᐊᖓᔪᖅᑳᕐᔪᐊᕐᒧᐊᕐᑕᐅᖕᒪᑦ,

²⁵ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑖᓐᓇ ᐆᒪᔪᖅ ᓄᑕᕋᖅ ᖁᐱᔭᐅᓕᕐᓕ ᑐᓂᓗᒍᓗ ᑖᒃᑯᖕᓄᖓ ᐊᕐᓈᖕᓄᑦ ᐊᑐᓂᑦ ᖁᑉᐸᕇᖕᓂᒃ ᐱᑎᑕᐅᓗᑎᒃ.”

²⁶ ᑕᕝᕙ ᐊᕐᓇᖅ ᐆᒪᔪᒥᒃ ᐃᕐᓂᖃᕐᑐᖅ ᐅᖃᓕᕐᐳᖅ ᐊᖓᔪᖅᑳᕐᔪᐊᕐᒧᑦ, ᓇᒡᓕᒍᓱᓕᕋᒥ ᐃᕐᓂᕐᒥᓂᒃ, “ᐊᑕᓂᕋ, ᓄᑕᕋᖅ ᑐᖁᑕᐅᖏᓪᓗᓂ ᑕᕝᕗᖓ ᐊᕐᓇᒧᑦ ᑐᓂᔭᐅᓕᕐᓕ.” ᐂᑉᐸᖓᓕ ᐅᖃᕐᐳᖅ, “ᐅᕙᑦᑎᓐᓄᑦ ᐱᒋᔭᐅᔪᓐᓁᕐᓗᓂ, ᐊᑏ ᖁᐱᔭᐅᑐᐃᓐᓇᓕᕐᓕ.”

²⁷ ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᓄᑕᕋᖅ ᑐᖁᑕᐅᖏᓪᓗᓂ ᑕᕝᕗᖓ ᐊᕐᓇᒧᑦ ᓯᕗᓪᓕᕐᒧᑦ ᑐᓂᔭᐅᓕᕐᓕ, ᑖᓐᓇ ᑖᑦᓱᒪ ᐊᓈᓇᓪᓚᕆᒋᖕᒪᒍ.”

²⁸ ᐃᓴᕆᐊᓕᐅᑉ ᐃᓄᓕᒫᖏᑦ ᑕᒪᑐᒥᖓ ᑐᓴᕋᒥᒃ ᐊᖓᔪᖅᑳᕐᔪᐊᑉ ᑐᑭᑖᕈᑎᖓᓂᒃ, ᐊᖏᔪᐊᓗᖕᒥᑉ ᑲᒪᓕᕐᐳᑦ ᐊᖓᔪᖅᑳᕐᔪᐊᒥᒃ, ᖃᐅᔨᒐᒥᒃ ᒎᑎᐅᑉ ᓯᓚᑐᓂᖓ ᑖᑦᓱᒪᓃᒻᒪᑦ, ᓱᓕᔪᒥᒃ ᐱᓇᓱᐊᖁᓪᓗᒍ.