ᐊᑕᓃᑦ ᓯᕗᓪᓖᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓇᑕᕐᓂᖅ ᓯᕆᐊᒥᐅᓂᒃ

¹ ᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐱᓐ-ᕼᐊᑖᑦ ᐅᓇᑕᕐᑎᖁᑎᓕᒫᒥᓂᒃ ᑲᑎᕐᓱᐃᕗᖅ, ᐊᖓᔪᖅᑳᕐᔪᐊᓪᓗ 32 ᐃᓚᒋᕔᑦ, ᕿᒻᒥᕐᔪᐊᖏᓪᓗ ᐅᓇᑕᐅᑎᖏᓪᓗ ᐊᒃᓴᓗᐊᓖᑦ; ᒪᔪᐊᕋᒥᓗ ᐅᓇᑕᕆᐊᕐᐳᖅ ᓴᒥᐊᕆᐊᓗ ᓵᓚᒋᓪᓗᒍ.

² ᐅᖃᕆᐊᕐᑐᕐᑎᑦᓯᕗᓪᓗ ᐃᒡᓗᒐᓴᖕᓄᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓄᑦ ᐂᕼᐊᑉᒧᑦ, ᐅᖃᐅᑎᓪᓗᒍ, “ᐱᓐ-ᕼᐊᑖᑎ ᐃᒫᒃ ᐅᖃᕐᒪᑦ:

³ ‘ᓯᐅᓪᕕᕆᑎᑦ ᒎᓗᑎᓪᓗ ᐱᒋᕙᒃᑲ; ᐱᐅᓂᕐᐹᖁᑎᑎᓪᓗ ᓄᓕᐊᑎᑦ ᕿᑐᕐᖓᑎᓪᓗ ᑖᒃᑯᐊᑦᑕᐅᖅ ᐱᒋᒋᕙᒃᑲ.’”

⁴ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᑭᐅᕗᖅ, ᐅᖃᕐᓗᓂ, “ᓲᕐᓗ ᐅᖃᕋᕕᑦ ᐊᑕᓃᖅ, ᐊᖓᔪᖅᑳᕐᔪᐊᒃ, ᑍᒤᓕᕐᓕ, ᐃᓕᖕᓄᑦ ᐱᖁᑕᐅᕗᖓ, ᐱᖁᑎᓕᒫᒃᑲᓗ ᐱᒋᕙᑎᑦ.”

⁵ ᐅᖃᕆᐊᕐᑐᕐᑎ ᐅᑎᕋᒥ ᐅᖃᕐᐳᖅ, “ᐱᓐ-ᕼᐊᑖᑦ ᐅᖃᕐᐳᖅ, ‘ᐃᓛᒃ ᐅᖃᕐᑎᑦᓯᓚᐅᕐᐳᖓ, ᐅᖃᕐᑐᒥᒃ, “ᓯᐅᓪᕕᕆᑎᑦ ᒎᓗᑎᑦ ᓄᓕᐊᑎᑦ ᕿᑐᕐᖓᑎᓪᓗ ᕾᒃᑭᑦ,”

⁶ ᐱᔨᒃᑲ ᑎᓕᓛᕐᐸᒃᑲ ᖃᐅᒃᐸᑦ ᑍᒤᓪᓗᐊᓕᕐᐸᑦ, ᕿᓂᕆᐊᕈᒫᕐᐳᑦ ᐃᒡᓗᖕᓄᑦ, ᐱᔨᕕᓪᓗ ᐃᒡᓗᖏᓐᓂᒃ, ᐃᒤᓕᐅᓛᕐᐳᖅ, ᐱᐅᒋᔭᓕᒫᒥᖕᓂᒃ ᐱᓗᑎᒃ ᐊᐅᓪᓚᕈᑎᔪᒫᕐᐰᑦ.’”

⁷ ᑕᕝᕙ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓ ᑲᑎᖁᔨᕗᖅ ᐊᖓᔪᖅᑳᓂᒃ ᓯᕗᓕᕐᑎᐅᔪᓕᒫᓂᒃ ᓄᓇᒥᖕᓂ, ᐅᖃᐅᑎᓪᓗᒋᑦ, “ᑐᓴᕆᑦᓯ, ᒫᓐᓇ ᐊᖑᑦ ᐅᕙᑦᑎᓐᓂᒃ ᓱᕅᓇᓱᐊᕐᑐᖅ, ᐅᖃᐅᑦᔭᐅᔭᕐᑐᕐᑎᓚᐅᕐᒪᖓ ᓄᓕᐊᒃᑲ ᕿᑐᕐᖓᒃᑲᓗ, ᓯᐅᓪᕕᕇᑦ ᒎᓗᐃᓪᓗ ᐱᔪᒪᓪᓗᒋᑦ, ᕿᐱᓗᓚᐅᓐᖏᓚᕋᓗ.”

⁸ ᐊᖓᔪᖅᑳᓕᒫᓪᓗ ᐃᓄᓕᒫᓪᓗ ᐅᖃᕐᐳᖅ, “ᓈᓚᒃᑍᓕᒍᒃ, ᐊᖏᕐᑍᓕᓗᒍᓗ.”

⁹ ᑍᒤᒻᒪᑦ ᐱᓐ-ᕼᐊᑖᑎᐅᑉ ᐅᖃᕆᐊᕐᑐᕐᑎᑕᖏᓐᓄᑦ ᐅᖃᕐᐳᖅ, “ᐊᑕᓂᕋ ᐊᖓᔪᖅᑳᕐᔪᐊᖅ ᐅᖃᐅᑎᒍᒃ, ‘ᓯᕗᓪᓕᕐᒥ ᐱᔪᒪᓚᐅᕐᑕᑎᑦ ᐊᖏᓚᕐᐸᒃᑲ; ᑭᓯᐊᓂᓕ ᑭᖑᓪᓕᕐᓄᑦ ᐊᖏᕈᓐᓇᓐᖏᓚᖓ.’” ᐅᖃᕆᐊᕐᑐᕐᑎᓗ ᐅᖃᕆᐊᕐᑐᓚᐅᕐᓗᓂ ᐅᑎᕐᒥᒐᒥ ᐅᖃᕐᐳᖅ.

¹⁰ ᐱᓐ-ᕼᐊᑖᑎᐅᑉ ᐅᖃᕆᐊᕐᑐᕐᑎᑉᐹᖓ ᐅᖃᕐᓗᓂ, “ᒎᑎᓐᓄᑦ ᐱᒋᐊᕐᑕᐅᓗᖓ, ᓱᒋᐊᕐᑕᐅᓂᐊᕐᐳᖓ, ᓴᒥᐊᕆᐊ ᓄᖑᑕᐅᑎᓐᓂᐊᖏᒃᑯᒃᑯ ᐃᓄᖕᓄᑦ ᒪᓕᒃᑐᓄᑦ ᐅᕙᓐᓂᒃ!”

¹¹ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᑭᐅᕗᖅ ᐅᖃᕐᓗᓂ, “ᐅᖃᐅᑎᒍᒃ, ‘ᓴᐴᓗᑕᒥᓂᒃ ᐊᑎᔪᖅ ᐃᒻᒥᓂᒃ ᐱᐅᔪᕆᓐᖏᓚᐅᕐᓕ, ᓴᐴᓗᑕᒥᓂᒃ ᐲᕐᓯᔪᑎᑐᑦ.’”

¹² ᐱᓐ-ᕼᐊᑖᑎᐅᑉ ᑕᒪᓐᓇ ᑐᓴᕋᒥᐅᒃ ᐅᖃᐅᓯᕆᔭᐅᔪᖅ ᐊᖓᔪᖅᑳᕐᔪᐊᑉ ᐱᖃᑎᒋᓪᓗᒋᑦ ᐃᒥᕐᑎᓪᓗᒋᑦ ᓇᔪᕐᑕᒥᓂ, ᐃᓚᒥᓄᑦ ᐅᖃᕐᐳᖅ, “ᐊᑐᐃᓐᓇᕈᓕᕆᑦᓯ.” ᑕᕝᕙ ᐊᑐᐃᓐᓇᕈᕐᐳᑦ ᐅᓇᑕᕆᐊᕈᒪᓪᓗᑎᒃ ᐃᒡᓗᒐᓴᖕᓄᑦ.

¹³ ᑕᑯᒋᓪᓗ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐅᐸᒍᑎᕗᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓄᑦ ᐂᕼᐊᑉᒧᑦ, ᐅᖃᐅᑎᓪᓗᒍᓗ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᑕᑯᓚᐅᕐᐱᒌᑦ ᐃᓄᒐᓴᒡᔪᐊᑦ? ᑕᑯᒋᑦ, ᐊᒡᒐᖕᓄᑦ ᑐᓂᓂᐊᕐᐸᒃᑲ ᐅᓪᓗᒥ; ᖃᐅᔨᓂᐊᕋᕕᑦ ᐅᕙᖓ ᐊᑕᓂᐅᒐᒪ.’”

¹⁴ ᐂᕼᐊᑉᓗ ᐊᐱᕆᕗᖅ, “ᑭᓇ ᐅᓇᑕᕐᑐᓂᒃ ᓯᕗᓕᕐᓂᐊᕐᐸ?” ᐅᖃᐅᑎᕚ, “ᐊᑕᓂᖅ ᐅᖃᕐᐳᖅ, ᐃᓅᓱᒃᑐᑦ ᐅᓇᑕᕐᑏᑦ ᐊᖓᔪᖅᑳᖃᕐᓗᑎᒃ ᓄᓇᓕᖕᓂ ᐊᐅᓚᑦᓯᔨᓂᒃ.” ᐊᖓᔪᖅᑳᕐᔪᐊᕐᓗ ᐊᐱᕆᕗᖅ, “ᑭᓇ ᐅᓇᑕᕐᑐᓕᒫᓄᑦ ᐊᖓᔪᖅᑳᖑᓂᐊᕐᐹᑦ?” ᑭᐅᕚ, “ᐃᕝᕕᑦ.”

¹⁵ ᑕᕝᕙ ᐃᓅᓱᒃᑐᑦ ᐅᓇᑕᕐᑏᑦ ᓄᓇᓕᖕᓂᑦ ᐊᐅᓚᑦᓯᔩᑦ ᐱᔨᖏᑦ ᑲᑎᑎᑉᐰᑦ, ᑲᑎᓪᓗᒋᑦ 232ᖑᕗᑦ, ᑖᒃᑯᐊ ᑭᖑᓂᖓᓐᓂ ᐃᓴᕆᐊᓕᒃᑯᑦ ᐅᓇᑕᕐᑎᖏᑦ ᑲᑎᓪᓗᒋᑦ, ᐅᓄᕐᓂᖃᕐᑐᑦ 7,000ᓂᒃ.

¹⁶ ᐊᐅᓪᓚᕐᐳᓪᓗ ᐅᓪᓗᖅ ᕿᑎᕋᓕᕐᑎᓪᓗᒍ, ᑍᒤᓕᐅᕐᑎᓪᓗᒋᑦ ᐱᓐ-ᕼᐊᑖᑎᒃᑯᑦ ᐊᖓᔪᖅᑳᕐᔪᐊᓪᓗ 32ᖑᔪᑦ ᐃᒥᖃᑎᒌᒃᐳᑦ ᐋᖓᔮᓕᕐᓗᑎᒃ ᓇᔪᕐᑕᒥᓂ ᐊᖓᔪᖅᑲᐅᕕᖕᒥᓂ.

¹⁷ ᑕᕝᕙ ᐃᓅᓱᒃᑐᑦ ᐅᓇᑕᕐᑏᑦ ᓄᓇᓕᖕᓂᑦ ᐊᐅᓚᑦᓯᔩᑦ ᐱᔨᖏᑦ ᐊᐅᓪᓚᕐᐳᑦ. ᐱᓐ-ᕼᐊᑖᑦ ᑎᓕᓯᕗᖅ ᖃᐅᔨᓴᕆᐊᕐᑐᓂᒃ, ᑖᒃᑯᐊᓗ ᐅᖃᐅᑎᕚᑦ, “ᐊᖑᑏᑦ ᓴᒥᐊᕆᐊᒥᑦ ᐊᓂᕗᑦ!”

¹⁸ ᑕᕝᕙ ᑎᓕᓪᓗᒋᑦ ᐅᖃᐅᑎᕔᑦ, “ᐅᓇᑕᕆᐊᖏᓪᓗᑎᒃ ᕾᒃᐸᑕ, ᐅᓇᑕᕆᐊᕋᓗᐊᕐᐸᑕᓗ, ᑐᖁᖏᓪᓗᒋᑦ ᑎᒍᓂᐊᕐᐸᓯ.”

¹⁹ ᑕᕝᕙ ᐃᓅᓱᒃᑐᑦ ᐅᓇᑕᕐᑏᑦ ᓄᓇᓕᖕᓂᑦ ᐊᐅᓚᑦᓯᔩᑦ ᐱᔨᖏᑦ ᐃᒡᓗᒐᓴᖕᓂᑦ ᐊᓂᕗᑦ, ᒪᓕᒃᑕᐅᓪᓗᑎᒃ ᐅᓇᑕᕐᑐᒃᓴᓄᑦ.

²⁰ ᐊᑐᓂᑦ ᐊᑭᓕᒥᖕᓂᒃ ᐊᖑᑎᓂᒃ ᑐᖁᑦᓯᕗᑦ; ᑍᒤᒻᒪᑦ ᓯᕆᐊᒥᐅᑦ ᕿᒫᕗᑦ, ᐃᓴᕆᐊᓕᒥᐅᓪᓗ ᒪᓕᒃᐰᑦ, ᐱᓐ-ᕼᐊᑖᑎᓕ ᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᕿᒫᕗᖅ ᕿᒻᒥᕐᔪᐊᒃᑯᑦ ᐊᓐᓇᒃᓗᓂ ᕿᒻᒥᕐᔪᐊᒃᑰᕐᑐᑦ ᐃᓚᒋᓪᓗᒋᑦ.

²¹ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᒪᓕᒃᓴᕐᐳᖅ, ᕿᒻᒥᕐᔪᐊᓕᖕᓂᒃ ᑲᓕᒐᓕᖕᓂᒡᓗ ᐊᒃᓴᓗᐊᓕᖕᓂᒃ ᓵᓚᒋᓪᓗᒋᓪᓗ, ᓯᕆᐊᒥᐅᓪᓗ ᑐᖁᕋᕐᐰᑦ ᐅᓄᕐᑐᕐᔪᐊᑦ.

²² ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᕾᕗᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓄᑦ, ᐅᖃᐅᑎᓪᓗᒍᓗ, “ᐅᑎᕐᓗᑎᑦ ᑕᕾᕐᓯᕆᐊᕐᑐᓕᕆ, ᑲᒪᑦᓯᐊᕐᓗᑎᓪᓗ ᐱᔭᕆᐅᕐᓮᑦᓯᐊᕐᓂᐊᕐᐳᑎᑦ; ᐅᐱᕐᖔᖑᓕᕐᐸᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐅᓇᑕᕆᐊᓛᕐᒥᖕᒪᑦ ᐃᓕᖕᓂᒃ.”

ᓯᕆᐊᒥᐅᑉ ᑭᖑᓪᓕᕐᒥᒃ ᐅᓇᑕᕆᐊᒃᑲᓐᓂᕐᓂᖏᑦ

²³ ᓯᕆᐊᒥᐅᓪᓗ ᐊᖓᔪᖅᑳᕐᔪᐊᖓᑕ ᐱᔨᖏᑕ ᐊᖓᔪᖅᑳᓂ ᐅᖃᐅᑎᕚᑦ, “ᒎᑎᖏᑦ ᒎᑎᐅᕗᑦ ᖃᖅᑲᒥᐅᓄᑦ, ᑍᒤᒻᒪᑦ ᐅᕙᑦᑎᓐᓂᑦ ᓲᖑᓂᕐᓴᐅᓚᐅᕐᐳᖅ; ᑭᓯᐊᓂᓕ ᐅᓇᑕᕈᑦᑎᒍᑦ ᓇᑎᕐᓇᒥ, ᖁᓚᕐᓇᓐᖏᓚᖅ ᑖᒃᑯᓇᓐᖓᑦ ᓲᖑᓂᕐᓴᐅᓛᕐᐳᒍᑦ.

²⁴ ᐃᒤᓕᐅᓚᐅᕆᑦ, ᐊᖓᔪᖅᑳᕐᔪᐊᑦ ᓄᖅᑲᕐᑎᓚᐅᒃᑭᑦ ᐃᓂᒋᔭᖏᓐᓂᑦ, ᑭᖑᕝᕕᖔᕐᓗᒋᑦ ᐅᓇᑕᕐᑐᒃᓴᓄᑦ ᐊᖓᔪᖅᑳᓂᒃ,

²⁵ ᑲᑎᕐᓱᐃᓗᑎᓪᓗ ᐅᓇᑕᕐᑐᒃᓴᓂᒃ ᐊᓯᐅᔨᓚᐅᕐᑕᕐᑐᑦ ᐅᓄᕐᑎᒋᔪᓂᒃ, ᕿᒻᒥᕐᔪᐊᓂᒃ ᑲᓕᒐᕐᓂᒡᓗ ᐊᒃᓴᓗᐊᓕᖕᓂᒃ; ᐅᓇᑕᕐᑕᒃᓴᕆᕙᕗᑦ ᓇᑎᕐᓇᒥ, ᖁᓚᕐᓇᓐᖏᓚᖅ ᑖᒃᑯᓇᓐᖓᑦ ᓲᖑᓂᕐᓴᐅᓛᕐᐳᒍᑦ.” ᑖᒃᑯᐊᓗ ᐅᖃᐅᓯᖏᑦ ᓈᓚᒃᓗᒋᑦ, ᑍᒤᓕᐅᓕᕐᐳᖅ.

²⁶ ᑍᒤᓕᐅᓕᓚᐅᕐᐳᖅ, ᐊᕐᕌᒍᑎᓪᓗᒍ ᐅᐱᕐᖓᒃᑯᑦ, ᐱᓐ-ᕼᐊᑖᑎᐅᑉ ᓯᕆᐊᒥᐅᑦ ᑲᑎᕐᓱᓚᐅᕐᓗᒋᑦ, ᐊᐱᒃᒧᓪᓗ ᑎᑭᑉᐳᑦ, ᐃᓴᕆᐊᓕᒥᐅᓂᒃ ᐅᓇᑕᕆᐊᕐᓗᑎᒃ.

²⁷ ᐃᓴᕆᐊᓕᒥᐅᑉ ᐃᓄᖏᑦ ᑲᑎᕐᓱᕆᕗᑦ ᐃᓂᒃᓴᒥᓅᖅᑲᕐᓗᑎᒡᓗ, ᐅᓇᑕᕆᐊᓕᕐᓗᑎᒃ ᑖᒃᑯᓂᖓ; ᐃᓴᕆᐊᓕᒥᐅᑦ ᐃᓄᖏᑦ ᑕᖕᒫᕋᒥᒃ ᒎᑦᓯᑎᑐᑦ ᒪᕐᕈᐃᓕᖅᑲᖔᔪᒃᑎᑐᑦ ᑲᑎᓐᖓᔪᑎᑐᑦ ᑍᒤᓚᐅᕐᐳᑦ, ᓯᕆᐊᒥᐅᓪᓕ ᓄᓇᓕᒫᒥᒃ ᓈᔨᓯᒪᑎᓪᓗᒋᑦ.

²⁸ ᒎᑎᐅᑉ ᐃᓄᖁᑎᖓ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓄᐊᕋᒥ ᐅᖃᐅᑎᕚ, “ᐊᑕᓂᖅ ᐃᒫᖅ ᐅᖃᕐᐳᖅ, ‘ᓯᕆᐊᒥᐅᑦ ᐃᒫᒃ ᐅᖃᓚᐅᕐᒪᑕ, “ᐊᑕᓂᖅ ᒎᑎᐅᕗᑦ ᖃᖅᑲᒥᐅᓄᑦ ᓇᕐᓴᒥᐅᓄᓪᓕ ᒎᑎᐅᓐᖏᓚᖅ,” ᑍᒤᒻᒪᑦ ᑖᒃᑯᐊ ᐅᓄᕐᑐᕐᔪᐊᑦ ᐃᓕᖕᓄᑦ ᑐᓂᓂᐊᕐᐸᒃᑲ, ᖃᐅᔨᖁᓪᓗᑎᑦ ᐅᕙᖓ ᐊᑕᓂᐅᒐᒪ.’”

²⁹ ᑕᖕᒫᕐᓯᒪᓚᐅᕐᐳᑦ ᐊᑭᓕᕇᒡᓗᑎᒃ ᐅᓪᓗᓂᒃ 7ᓂᒃ. ᐅᓪᓘᑉ 7ᖓᓐᓂ ᐅᓇᑕᕆᐊᕐᐳᑦ; ᐃᓴᕆᐊᓕᒥᐅᓪᓗ ᐃᓄᖏᑦ ᓯᕆᐊᒥᐅᓂᒃ ᐱᓱᒃᑎᓂᒃ ᑐᖁᑦᓯᕗᑦ 100,000ᓂᒃ ᐅᓪᓗᒥ ᐊᑕᐅᓯᕐᒥ.

³⁰ ᐊᓯᖏᓪᓗ ᕿᒫᕗᑦ ᐊᐱᒃ ᐃᒡᓗᒐᓴᖏᓐᓄᑦ; ᑖᒃᑯᐊᓗ ᐊᒥᐊᒃᑯᐃᑦ ᐊᕙᓗᕐᔪᐊᒧᑦ ᑲᑕᒡᕕᐅᕗᑦ 27,000ᓮᑦ. ᐱᓐ-ᕼᐊᑖᑎᑦᑕᐅᖅ ᕿᒫᒋᕗᖅ ᐃᒡᓗᒐᓴᖕᓄᑦ, ᐃᒡᓗᐃᑦ ᐃᓗᓪᓕᕐᐹᖏᓐᓃᑦᑐᓄᑦ.

³¹ ᐊᖓᔪᖅᑳᖁᑎᖏᑕᓗ ᐅᐸᒡᓗᒍ ᐅᖃᐅᑎᕚᑦ, “ᑕᑯᒋᑦ ᒫᓐᓇ, ᑐᓴᐅᒪᕗᒍᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑦ ᓂᑲᒍᓱᓲᖑᖕᒪᑕ; ᐊᑏ ᐃᒃᐱᐊᕐᔪᖕᓂᒃ ᖃᕿᐊᓕᕐᑐᕐᓯᐅᑎᓂᒃ ᕿᑎᕉᓯᕐᓗᑕ ᐊᒃᓗᓈᒥᒡᓗ ᖁᖓᓯᑦᑎᓐᓄᑦ ᕿᓚᒃᓯᓗᑕ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓄᐊᓚᐅᕐᑕ; ᐃᒻᒪᖄ ᑐᖁᓐᓂᐊᓐᖏᓛᑎᑦ.”

³² ᑍᒤᒻᒪᑦ ᐃᒃᐱᐊᕐᔪᖕᓂᒃ ᖃᕿᐊᓕᕐᑐᕐᓯᐅᑎᓂᒃ ᕿᑎᕉᓯᕐᐳᑦ ᐊᒃᓗᓈᒥᒡᓗ ᖁᖓᓯᕐᒥᖕᓄᑦ ᕿᓚᒃᓱᐃᕗᑦ, ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓᓄᐊᕋᒥᒃ ᐅᖃᐅᑎᕚᑦ, “ᐱᔩᑦ ᐱᓐ-ᕼᐊᑖᑦ ᐅᖃᕐᒪᑦ, ‘ᕿᓄᕕᒋᕙᒋᑦ ᐃᓅᑎᓚᐅᓐᖓ.’” ᐂᕼᐊᐱᓗ ᐅᖃᕐᐳᖅ, “ᐃᓅᖕᒪᓱᓖ? ᖃᑕᓐᖑᑎᒋᔮᑐᐃᓐᓇᕐᑕᕅᓐᓇ.”

³³ ᐊᖑᑏᓪᓗ ᑖᒃᑯᐊ ᖃᐅᔨᓴᑦᓯᐊᕐᐳᑦ ᖃᓄᐃᓐᓂᐊᕐᒪᖔᑦ ᓂᑲᒍᓱᖕᓂᐊᕐᒪᖔᑦ, ᐅᖃᐅᓯᖓᓗ ᒪᓕᒡᓗᒍ ᐅᖃᑲᐅᕐᑐᕐᐳᖅ, “ᖃᑕᓐᖑᑏᓂᓐᓇ ᐱᓐ-ᕼᐊᑖᑎ.” ᐅᖃᕐᐳᖅ, “ᐂᓗᓯ ᕾᑎᓯᐅᒃ.” ᑕᕝᕙ ᐱᓐ-ᕼᐊᑖᑎᐅᑉ ᐅᐸᒃᐹ, ᐃᑭᑎᑉᐹᓗ ᕿᒧᒃᓯᐅᑎᒧᑦ ᐊᒃᓴᓗᐊᓕᖕᒧᑦ.

³⁴ ᐱᓐ-ᕼᐊᑖᑎᐅᓪᓗ ᐅᖃᐅᑎᕚ, “ᐃᒡᓗᒐᓮᑦ ᐊᑖᑕᒪ ᑎᒍᓚᐅᕐᑕᖏᑦ ᐊᑖᑕᖕᓂᑦ ᐋᖅᑭᒋᐊᑦᓯᐊᕈᒫᕐᐸᒃᑲ; ᓇᖕᒥᓂᒃᓴᕐᓂᒡᓗ ᓂᐅᕕᕐᕕᓕᐅᕈᓐᓇᕐᐳᑎᑦ ᑕᒫᓯᑰᓯᒥ, ᐊᑖᑕᒐᑐᑦ ᑍᒤᓕᐅᓚᐅᕐᒪᑦ ᓴᒥᐊᕆᐊᒥ.” ᐂᕼᐊᐱ ᑭᐅᕗᖅ, “ᐊᐅᓪᓚᕐᑎᑦᓱᒪᕙᒋᑦ ᐊᖏᖃᑎᒋᓗᑎᑦ ᑕᒪᒃᑯᓂᖓ ᑐᓐᖓᕕᖃᕐᑎᓪᓗᒍ.” ᐊᓱᐃᓛᒃ ᖃᓄᐃᓕᐅᕈᑎᒃᓴᒥᖕᓂᒃ ᐊᖏᖃᑎᒌᒃᐴᒃ ᐊᐅᓪᓚᕐᑎᑉᐹᓗ.

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐂᕼᐊᐱ ᓯᕗᓂᕐᓗᖕᓂᕋᕐᑕᐅᓂᖓ

³⁵ ᐊᖑᑎᖃᓚᐅᕐᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐃᕐᓂᖓᓂᒃ ᐅᖃᕐᑎᐅᖃᑎᒥᓄᑦ ᐅᖃᕐᐳᖅ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ, “ᑎᒡᓗᓚᐅᓐᖓ” ᐊᖑᑎᐅᓪᓕ ᑎᒡᓗᒍᒪᓐᖏᓛ.

³⁶ ᑕᕝᕙ ᑖᑦᓱᒪ ᐅᖃᐅᑎᕚ, “ᐊᑕᓂᐅᑉ ᓂᐱᖓᓂᒃ ᓈᓚᓚᐅᖏᓐᓇᕕᑦ, ᑕᑯᒋᑦ, ᕿᒪᑐᐊᕈᒃᑭᑦ ᓛᔭᒧᑦ ᑐᖁᑕᐅᓂᐊᕐᐳᑎᑦ.” ᑕᕝᕙ ᕿᒪᑐᐊᕐᒪᒍ ᓛᔭᒧᑦ ᐅᐸᒃᑕᐅᒐᒥ ᑐᖁᑕᐅᕗᖅ.

³⁷ ᐊᖑᒻᒥᒃ ᓱᓕ ᑕᑯᖕᒥᒐᒥ ᐅᖃᐅᑎᕚ, “ᑎᒡᓗᓚᐅᓐᖓ.” ᐊᖑᑎᐅᓪᓗ ᐊᒃᓱᕈᕐᓗᓂ ᑎᒡᓗᖕᒪᒍ, ᐊᐅᓈᓕᕐᑎᑉᐹ.

³⁸ ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᑕᕝᕙᖓᑦ ᐊᐅᓪᓚᕐᐳᖅ, ᐅᑕᖅᑭᓕᕐᓗᓂᓗ ᐊᖓᔪᖅᑳᕐᔪᐊᒥᒃ ᐊᖅᑯᑎᐅᑉ ᑭᒡᓕᖓᓂ, ᐃᒻᒥᓂᒡᓗ ᐃᓕᑕᕐᓇᕈᓐᓃᕐᑎᑉᐳᖅ ᐃᔨᓂ ᒪᑦᑐᓯᕐᓗᓂᐅᒃ ᐊᓐᓄᕌᕐᒧᑦ.

³⁹ ᐊᖓᔪᖅᑳᕐᔪᐊᖅ ᐊᖅᑯᓵᓕᕐᒪᑦ, ᐊᖓᔪᖅᑳᕐᔪᕐᒧᑦ ᕾᒐᓛᕐᓗᓂ ᐅᖃᕐᐳᖅ, “ᐱᔩᑦ ᐅᓇᑕᕐᑐᓃᓚᐅᕐᐳᖅ, ᑕᑯᒋᓪᓗ, ᐅᓇᑕᕐᑎ ᕾᓪᓗᓂ ᐅᕙᓐᓄᑦ ᐊᖑᒻᒥᒃ ᕾᑦᓯᓚᐅᕐᐳᖅ, ᐅᖃᕐᓗᓂᓗ, ‘ᐅᓇ ᐊᖑᑦ ᑲᒪᒋᒍᒃ; ᕿᒪᒃᓯᑐᐊᕐᐸᑦ, ᐃᓅᓯᖓ ᐃᓅᓯᕐᓄᑦ ᐊᑭᓕᕐᑕᐅᔪᒃᓴᐅᕗᖅ, ᐅᕝᕙᓘᓐᓃᑦ ᐊᑭᓖᔪᒃᓴᐅᕗᑎᑦ ᓯᐅᓪᕕᕆᒥᒃ ᐊᑕᐅᓯᕐᒥᒃ.’

⁴⁰ ᐱᔩᑦ ᐱᔭᒃᓴᖃᕐᑎᓪᓗᒍ ᐊᓯᐊᓂᒃ ᐅᕙᓂᓗ ᑖᕙᓂᓗ, ᐊᖑᑦ ᕿᒪᒃᓯᓚᐅᕐᐳᖅ.” ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᑕ ᐅᖃᐅᑎᕚ, “ᑕᕝᕙ ᓯᕗᓂᒃᓴᖃᕐᑎᑕᐅᓂᕐᒧᑦ ᑕᒪᑐᒧᖓ ᐃᓕᖕᓂᒃ ᐅᖃᐅᓯᕆᕗᑎᑦ, ᐃᕝᕕᑦ ᑕᕝᕙ ᓇᖕᒥᓂᖅ ᐊᑭᓖᔭᕆᐊᖃᕐᓂᐊᕐᐳᑎᑦ.”

⁴¹ ᑕᕝᕙ ᑐᐊᕕᕐᓗᓂ ᒪᑦᑐᑎᓂ ᐃᔨᒥᓂᑦ ᐲᕐᐹ; ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓᑕ ᐃᓕᑕᕆᕚ ᐅᖃᕐᑎᐅᖃᑕᐅᓂᖓᓂᒃ.

⁴² ᐅᖃᐅᑎᓕᕐᓗᒍᓗ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᐊᖑᒻᒥᒃ ᑐᖁᑕᐅᖁᓚᐅᕐᑕᓐᓂᒃ ᑐᖁᑦᓯᖏᓪᓗᑎᑦ ᐊᐅᓪᓚᕐᑎᑦᓯᓚᐅᕋᕕᑦ, ᑍᒤᒻᒪ ᐃᓅᓯᑦ ᐃᓅᓯᖓᓄᑦ ᐃᓇᖏᐅᑎᔪᒃᓴᐅᕗᖅ, ᐃᓄᖁᑎᖏᓪᓗ ᐃᓄᖁᑎᖕᓄᑦ.’”

⁴³ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᐊᖏᕐᕋᐅᕗᖅ ᓴᒥᐊᕆᐊᒧᑦ ᐃᓱᒪᔮᕐᓗᓂ ᕿᒃᓵᓕᕐᓗᓂᓗ.