ᐊᑕᓃᑦ ᓯᕗᓪᓖᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓔᑦᔭᓗ ᐰᓕᐅᓪᓗ ᐅᖃᕐᑎᖏᑦ

¹ ᑕᒪᑐᒪ ᑭᖑᕐᖓᒍᑦ ᐅᓪᓗᐃᑦ ᐅᓄᕐᑐᑦ ᐊᓂᒍᕐᑎᓪᓗᒋᑦ ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᐃᓔᑦᔭᒧᑦ, ᐊᕐᕌᒍᐃᑦ ᐱᖓᔪᐊᓐᓂ, ᐅᖃᕐᓗᓂ, “ᐂᓕᕆᑦ, ᐂᕼᐊᑉᒧᑦ ᐅᐸᒍᑎᓗᑎᑦ; ᓯᓚᓗᒃᑎᑦᓯᓂᐊᓕᕋᒪ ᓄᓇᒧᑦ.”

² ᑕᕝᕙ ᐃᓔᑦᔭ ᐂᓕᕐᐳᖅ ᐅᐸᒍᑎᓪᓗᓂ ᐂᕼᐊᑉᒧᑦ. ᑳᖕᓇᕐᑐᕐᔪᐊᖅ ᐱᕕᒡᔪᐊᓕᕐᑎᓪᓗᒍ ᓴᒥᐊᕆᐊᒥ.

³ ᐂᕼᐊᐱᐅᑉ ᐅᐸᑍᐊ ᕾᖁᕚ, ᑲᒪᔨᐅᔪᖅ ᐃᒡᓗᖓᓂᒃ. (ᑖᓐᓇ ᐅᐸᑍᐊ ᑲᒪᑦᓯᐊᓪᓚᕆᒃᑑᕗᖅ ᐊᑕᓂᕐᒥᒃ;

⁴ ᔨᔨᐱᐅᓪ ᑐᖁᕅᑎᓪᓗᒍ ᐊᑕᓂᐅᑉ ᐅᖃᕐᑎᖏᓐᓂᒃ, ᐅᐸᑍᐊ ᑎᒍᓯᓚᐅᕐᐳᖅ ᐅᖃᕐᑎᖏᓐᓂᒃ 100ᓂᒃ ᐃᔨᕐᑎᓪᓗᒋᓪᓗ 50ᐅᓈᕐᑎᕐᓗᒋᑦ ᕾᕈᓱᖕᒧᑦ, ᓂᕆᑎᖃᑦᑕᓚᐅᕐᐰᑦ ᓂᐅᖂᔭᒥ ᐃᒥᕐᑎᖃᑦᑕᕐᓗᒋᓪᓗ.)

⁵ ᐂᕼᐊᑉᓗ ᐅᖃᕐᐳᖅ ᐅᐸᑍᐊᒧᑦ, “ᐂᓕᕆᑦ ᓄᓇᒧᑦ ᕿᓂᕆᐊᕐᓗᑎᑦ ᓄᓇᐅᑉ ᐃᓗᐊᓂᑦ ᐃᒥᕐᒥᒃ ᑰᓲᓕᒫᖕᓄᑦ ᓇᕐᓴᓕᒫᓄᓪᓗ, ᐃᒻᒪᖄ ᓇᓂᓯᖁᓪᓗᑕ ᐃᕕᒃᓱᒐᕐᓂᒃ ᐱᐅᓕᓗᑎᒍᓗ ᕿᒻᒥᕐᔪᐊᑦ ᓯᐅᑎᖅᑯᕐᑐᔪᓪᓗ ᕿᒻᒥᕐᔪᐊᑦ ᕿᑐᕐᖓᖏᑕ ᓂᕿᒃᓴᖏᓐᓂᒃ ᐃᓅᔪᓐᓇᖁᓪᓗᒋᑦ, ᑐᖁᔨᐊᖃᖁᓇᑕ ᐆᒪᔪᖁᑎᑦᑎᓐᓂᒃ.”

⁶ ᐊᖏᖃᑎᒌᒃᓗᑎᒃ ᓄᓇᒥᒃ ᐊᕕᒃᐴᒃ ᕿᓂᕆᐊᕐᕕᒋᓂᐊᕐᑕᒥᖕᓂᒃ; ᐂᕼᐊᑉ ᐃᓄᑑᓪᓗᓂ ᐂᕗᖅ ᓄᓇᐅᑉ ᐊᓯᐊᓄᑦ, ᐅᐸᑍᐊᓗ ᓄᓇᐅᑉ ᐊᓯᐊᓄᑦ ᐃᓄᑑᓪᓗᓂ ᐂᖕᒥᑎᓪᓗᒍ.

⁷ ᐅᐱᑍᐊᓗ ᐊᐅᓪᓚᓕᕐᑎᓪᓗᒍ, ᑕᑯᒋᑦ, ᐃᓔᑦᔭᐅᑉ ᑲᑎᕚ; ᐅᐸᑍᐊᐅᓪᓗ ᐃᓕᑕᕆᕚ, ᐹᒻᒪᒃᑎᕐᐳᕐᓗ ᒪᓂᖅᑲᒧᑦ, ᐅᖃᕐᓗᓂᓗ, “ᐃᓔᑦᔭᐅᕖᑦ ᐊᖓᔪᖅᑳᕋ?”

⁸ ᐃᓔᑦᔭ ᑭᐅᕗᖅ, “ᑖᓐᓇᐅᕗᖓ, ᐂᓕᕆᑦ ᐊᖓᔪᖅᑳᑦ ᐅᖃᐅᑎᓗᒍ, ‘ᑕᑯᒋᑦ ᐃᓔᑦᔭ ᑕᒫᓃᑉᐳᖅ.’”

⁹ ᐅᐱᑍᐊᐅᑉ ᐅᖃᐅᑎᕚ, “ᖃᓄᖅ ᐊᔪᕐᑐᓕᓚᐅᕋᒫ, ᐱᔩᑦ ᐂᑦᑑᑎᒋᓕᕐᐱᐅᒃ ᐂᕼᐊᑉᒧᑦ, ᐅᕙᓐᓂᒃ ᑐᖁᑦᓯᖁᓪᓗᒎ?

¹⁰ ᐊᑕᓂᖅ ᒎᑏᑦ ᐃᓅᖕᒪᑦ, ᓱᓕᓪᓗᖓ ᐅᖃᕐᐳᖓ ᐊᖓᔪᖅᑳᕋ ᑎᓕᓯᖃᑦᑕᓚᐅᕐᐳᖅ ᐃᓅᖃᑎᒌᒡᔪᐊᓄᑦ ᐊᑕᓂᐅᕕᖕᓄᓪᓗ ᕿᓂᖁᔨᓪᓗᓂ ᐃᓕᖕᓂᒃ; ᐅᖃᕐᐸᑕ, ‘ᑕᒫᓃᖏᑦᑐᖅ.’ ᐊᑕᓂᐅᕖᑦ ᓄᓇᖅᑲᑎᒌᓪᓗ ᑕᕝᕙ ᐊᖏᒻᒪᕆᒃᑎᖃᑦᑕᓚᐅᕐᐰᑦ ᓱᓕᓪᓗᑎᒃ ᐃᓕᖕᓂᒃ ᓇᓂᓯᖏᓪᓚᕆᖕᓂᖏᓐᓂᒃ.

¹¹ ᒫᓐᓇᓕ ᐅᖃᕐᐳᑎᑦ, ‘ᐂᓕᕆᑦ, ᐊᖓᔪᖅᑳᑦ ᐅᖃᐅᑎᓗᒍ, “ᑕᑯᒋᑦ, ᐃᓔᑦᔭ ᑕᒫᓃᑉᐳᖅ.”’

¹² ᐃᓕᖕᓂᓪᓗ ᕿᒪᕉᑎᑐᐊᕈᒪ, ᐊᑕᓂᐅᑉ ᐊᓂᕐᓂᖓᑕ ᐊᐅᓪᓚᕈᑎᓂᐊᕐᐹᑎᑦ ᓄᓇᒧᑦ ᖃᐅᔨᒪᓐᖏᑕᓐᓄᑦ; ᑕᕝᕙ, ᐅᖃᕆᐊᕐᑐᕈᒪ ᐂᕼᐊᑉᒧᑦ ᓇᓂᓐᖏᑐᐊᕈᓂᑎᑦ, ᑕᕝᕙ ᑐᖁᓐᓂᐊᕐᐹᖓ, ᑭᓯᐊᓂᓕ ᐅᕙᖓ ᐱᔩᑦ ᐊᑕᓂᕐᒥᒃ ᑲᒪᑦᓯᐊᒻᒪᕆᒃᐳᖓ ᐅᕕᒃᑲᐅᓂᓐᓂᑦ.

¹³ ᑐᓴᓚᐅᓐᖏᓚᑏᑦ? ᐊᖓᔪᖅᑳᒃ ᖃᓄᐃᓕᐅᓚᐅᕐᒪᖔᕐᒪ ᔨᔨᐱᐅᓪ ᑐᖁᕅᑎᓪᓗᒍ ᐊᑕᓂᐅᑉ ᐅᖃᕐᑎᖏᓐᓂᒃ, ᐃᔨᕐᓯᓚᐅᕋᒪ ᐊᑕᓂᐅᑉ ᐅᖃᕐᑎᖏᓐᓂᒃ 100ᓂᒃ, ᕾᕈᓱᖕᒧᐊᕐᑎᓚᐅᕐᐸᒃᑲ 50ᐅᓈᕐᑎᕐᓗᒋᑦ, ᓂᕆᑎᓪᓗᒋᓪᓗ ᓂᐊᖂᔭᒥᒃ ᐃᒥᕐᑎᓪᓗᒋᓪᓗ.

¹⁴ ᒫᓐᓇᓗ ᐅᖃᐅᑎᓕᕐᐸᕐᒪ, ᐂᓕᕆᑦ, ᐊᖓᔪᖅᑳᑦ ᐅᖃᐅᑎᓗᒍᒃ, ‘ᑕᑯᒋᑦ ᐃᓔᑦᔭ ᑕᒫᓃᑉᐳᖅ.’ ᑖᑦᓱᒪᓗ ᑐᖁᓐᓂᐊᕐᐹᖓ.”

¹⁵ ᐃᓔᑦᔭᓗ ᐅᖃᕐᐳᖅ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓅᖕᒪᑦ, ᑖᓐᓇ ᐱᔨᑦᓯᕐᑕᕋ, ᐅᓪᓗᒥ ᓇᖕᒥᓂᖅ ᐂᑦᑑᑎᒋᓪᓚᕆᖕᓂᐊᕐᐳᖓ ᐂᕼᐊᐱᒧᑦ.”

¹⁶ ᑕᕝᕙ ᐅᐸᑍᐊ ᐂᕗᖅ ᐂᕼᐊᑉᒧᑦ ᐅᖃᐅᑎᓪᓗᒍᓗ, ᐂᕼᐊᐱᓗ ᑕᕝᕙ ᐂᕗᖅ ᐃᓔᑦᔭᒧᑦ.

¹⁷ ᐂᕼᐊᐱᐅᑉ ᐃᓔᑦᔭ ᑕᑯᒐᒥᐅᒃ, ᐅᖃᐅᑎᕚ, “ᑖᓐᓇᐅᕖᑦ ᐃᓴᕆᐊᓕᒥᐅᓂᒃ ᓈᒻᒪᖏᓕᐅᕐᑎᑦᓯᔨ?”

¹⁸ ᐃᓔᑦᔭ ᑭᐅᕗᖅ, “ᐃᓴᕆᐊᓕᒥᐅᑦ ᓈᒻᒪᖏᓕᐅᕐᑎᓐᖏᓚᒃᑲ; ᐃᕝᕕᖔᖅ, ᐊᑖᑍᓪᓗ ᓈᒻᒪᖏᓕᐅᕐᑎᑦᓯᕗᓯᒃ, ᐊᑕᓂᐅᑉ ᐱᖁᔭᖏᓐᓂᒃ ᕿᒤᓚᐅᕋᑦᓯᒃ ᒪᓕᓕᕐᓗᓯᒡᓗ ᐰᓕᓂᒃ.

¹⁹ ᒫᓐᓇᓕ ᑍᒤᒻᒪᑦ ᐃᓴᕆᐊᓕᒥᐅᓕᒫᑦ ᑲᑎᓯᖁᓗᒋᑦ ᐅᕙᓐᓂᒃ ᑎᓕᓯᓕᕆᑦ ᖃᖅᑲᒧᑦ ᑳᕐᒥᐅᑉ ᖄᖓᓄᑦ, ᐰᓕᐅᓪᓗ ᐅᖃᕐᑎᖏᑦ 450, ᐊᓯᕋᐅᓪᓗ ᐅᖃᕐᑎᖏᑦ 400, ᓂᕆᕙᒃᑐᑦ ᔨᔨᐱᐊᓕᐅᑉ ᓂᕆᕕᖓᓂ ᕾᖃᑕᐅᓗᑎᒃ.”

²⁰ ᑕᕝᕙ ᐂᕼᐊᑉ ᑎᓕᓯᕗᖅ ᕾᖁᓪᓗᒋᑦ ᐃᓴᕆᐊᓕᒥᐅᓕᒫᑦ, ᐅᖃᕐᑏᓪᓗ ᑲᑎᖁᕔᑦ ᖃᖅᑲᒧᑦ ᑳᕐᒥᐅᓪᒧᑦ.

²¹ ᐃᓔᑦᔭᐅᓪᓗ ᐃᓄᓕᒫᑦ ᖃᒡᓕᒋᐊᕐᓗᒋᑦ, ᐅᖃᐅᑎᕔᑦ, “ᖃᓄᖅ ᐊᑯᓂᐅᑎᒋᔪᖅ ᓇᓕᐊᖕᓄᕿᑕᖕᓂᐊᕐᐱᓰ ᒪᕐᕉᓕᖅᑭᖓᔪᒥᒃ ᐃᓱᒪᖃᕐᓗᓯ? ᐊᑕᓂᖅ ᒎᑎᐅᒃᐸᑦ, ᑖᓐᓇ ᒪᓕᒃᓯᐅᒃ; ᐰᓕᓕ ᒎᑎᐅᒃᐸᑦ ᑖᓐᓇ ᒪᓕᖕᓂᐊᕐᐸᓯ.” ᐃᓄᐃᓪᓗ ᑭᐅᔪᖃᓚᐅᓐᖏᓚᑦ ᐊᑕᐅᓯᕐᒥᒡᓘᓐᓃᑦ.

²² ᑕᕝᕙ ᐃᓔᑦᔭᐅᑉ ᐃᓄᐃᑦ ᐅᖃᐅᑎᕔᑦ, “ᐅᕙᖓ, ᐅᕙᖓᑑᓪᓗᖓ ᐊᑕᓂᐅᑉ ᐅᖃᕐᑎᖏᓐᓂ ᐊᒥᐊᒃᑯᑑᕗᖓ; ᐰᓕᐅᓪᓕ ᐅᖃᕐᑎᖏᑦ 450ᐅᕗᑦ.

²³ ᑍᒤᒻᒪᑦ ᑐᓂᓯᔭᐅᓚᐅᕐᑕ ᐃᒻᒧᒃᓯᐅᒊᑦ ᐊᖑᓴᓪᓗᖏᖕᓂᒃ ᒪᕐᕉᖕᓂᒃ; ᐊᑐᓂᑦ ᓂᕈᐊᕐᓂᐊᕐᐳᓯ ᓇᓪᓕᐊᓐᓃᓐᓂᐊᕐᒪᖔᑦᓯ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ, ᓱᕅᔭᕐᓗᒍ ᐃᓕᓗᒍᓗ ᕿᔪᐃᑦ ᖄᖓᓄᑦ, ᑭᓯᐊᓂ ᐃᑯᐊᓪᓚᖕᓂᐊᓐᖏᓚᓯ; ᐅᕙᖓᑦᑕᐅᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᑕ ᐂᑉᐸᖓᓂᒃ ᐊᑐᐃᓐᓇᕈᐃᓂᐊᕐᐳᖓ ᐃᓕᓗᒍᓗ ᕿᔪᐃᑦ ᖄᖓᓄᑦ, ᐃᑯᐊᓪᓚᖕᓂᐊᖏᓐᓂᕙᕋ.

²⁴ ᒎᑎᑦᓯᓗ ᐊᑎᖓᓄᑦ ᑐᒃᓯᐊᕐᓂᐊᕐᐳᓯ ᐅᕙᖓᓗ ᐊᑕᓂᐅᑉ ᐊᑎᖓᓄᑦ ᑐᒃᓯᐊᕐᓂᐊᕆᕗᖓ; ᑖᓐᓇ ᒎᑎ ᑭᐅᓗᓂ ᐃᑯᒪᒥᒃ ᐃᑭᑎᑦᓯᔪᖅ, ᑖᓐᓇ ᒎᑎᐅᓂᐊᕐᐳᖅ.” ᐃᓄᓕᒫᓪᓗ ᑭᐅᕗᑦ, “ᐅᖃᑦᓯᐊᕐᐳᑎᑦ.”

²⁵ ᐃᓔᑦᔭᐅᑉ ᐰᓕᐅᑉ ᐅᖃᕐᑎᖏᑦ ᐅᖃᐅᑎᕔᑦ, “ᓂᕈᐊᕆᑦᓯ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐊᑕᐅᓯᕐᒥᒃ ᓯᕗᓪᓕᐅᓪᓗᓯᓗ ᐅᐸᓗᖎᔭᓕᕆᑦᓯ, ᐅᓄᕋᑦᓯ; ᒎᑎᓯᓗ ᐊᑎᖓ ᑐᒃᓯᐊᕐᕕᒋᓗᒍ, ᑭᓯᐊᓂᓕ ᐃᑯᐊᓪᓚᖏᓪᓗᒍ.”

²⁶ ᑕᕝᕙ ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᐱᕚᑦ ᑐᓂᔭᐅᓯᒪᔪᖅ, ᐊᑐᐃᓐᓇᕈᕐᓗᒍᓗ, ᒎᑎᒥᖕᓄᓪᓗ ᐰᓕᒧᑦ ᑐᒃᓯᐊᓚᐅᕐᐳᑦ ᐊᑎᖓ ᑍᓪᓗᒍ ᐅᓪᓛᒥᑦ ᐅᓪᓘᑉ ᕿᑎᕋᓕᕐᓂᖓᓄᑦ, ᐅᖃᕐᓗᑎᒃ, “ᐰᓖ, ᑐᓴᓚᐅᕐᑎᒍᑦ!” ᑭᓯᐊᓂᓕ ᓂᐱᖃᕐᑐᖃᓚᐅᓐᖏᓚᖅ, ᑭᐅᔪᖃᓚᐅᕋᓂᓗ. ᑖᓂᓯᕐᓗᑎᒃ ᑐᓂᕐᕈᓯᕐᕕᒃ ᓴᓇᓚᐅᕐᑕᑎᒃ ᑬᕙᓪᓚᖃᑦᑕᓚᐅᕐᐹᑦ.

²⁷ ᑍᒤᓕᐅᕐᑎᓪᓗᒋᑦ, ᐅᓪᓗᖅ ᕿᑎᕋᓕᕐᒪᑦ, ᐃᓔᑦᔭᐅᑉ ᒥᑕᐅᑎᒋᓕᕐᐰᑦ ᐅᖃᐅᑎᓪᓗᒋᑦ, “ᕾᒐᓛᕐᓗᓯ ᓂᐱᖅᑯᕐᑐᒋᐊᓚᐅᕆᑦᓯ, ᒎᑎᐅᒃᐸᑦ; ᐃᒻᒪᖄ ᐊᓕᐊᓁᒍᓱᑐᐃᓐᓇᕐᐳᖅ, ᐊᓯᐊᓂᒡᓘᓐᓃᑦ ᐱᔭᒃᓴᖃᕐᒪᑦ, ᐅᕝᕙᓗ ᐊᐅᓪᓚᕐᓯᒪᕗᖅ, ᐅᕝᕙᓘᓐᓃᑦ ᓯᓂᖕᒪᑦ ᑐᐹᕐᓴᕐᑕᐅᔭᕆᐊᖃᕐᒪᑦ.”

²⁸ ᓂᐱᖅᑯᕐᑐᓯᒋᐊᕐᐳᓪᓗ, ᐃᒻᒥᖕᓂᒡᓗ ᑭᓪᓕᐊᓪᓗᑎᒃ ᑍᒫᒃ ᐱᐅᓯᖃᕋᒥᒃ ᓴᕕᒡᔪᐊᓄᑦ ᓴᕕᑐᐃᓐᓇᓄᓪᓗ, ᐊᐅᓈᓕᓚᐅᖏᓐᓂᕐᒥᖕᓂ.

²⁹ ᐅᓪᓘᑉ ᕿᑎᕋᓕᕐᓂᖓ ᐊᓂᒍᕐᒪᑦ, ᓇᓚᐅᑦᑍᓇᓱᓚᐊᕐᐳᓪᓗ ᐅᓐᓄᖕᒧᑦ ᑐᓂᕐᕈᓯᕐᕕᒃᓴᒧᑦ ᑎᑭᓪᓗᑎᒃ, ᑭᓯᐊᓂᓕ ᓂᓪᓕᕐᑐᖃᓚᐅᓐᖏᓚᖅ; ᓇᓪᓕᐊᓐᓂᒡᓘᓐᓃᑦ ᑭᐅᔪᖃᓚᐅᕋᓂ, ᓂᐱᒥᒡᓘᓐᓃᑦ ᑐᓴᕐᓴᕈᕐᑐᖃᓚᐅᓐᖏᓚᖅ.

³⁰ ᑕᕝᕙ ᐃᓔᑦᔭᐅᑉ ᐃᓄᓕᒫᑦ ᐅᖃᐅᑎᕔᑦ, “ᕾᓗᓯ ᐅᕙᓐᓄᑦ ᖃᒡᓕᒋᐊᕆᑦᓯ.” ᑕᕝᕙ ᐃᓄᓕᒫᑦ ᑖᑦᓱᒧᖓ ᖃᒡᓕᒋᐊᕐᐳᑦ. ᐊᑕᓂᐅᓪᓗ ᑐᓂᕐᕈᓯᕐᕕᖓ ᐋᖅᑭᒃᓱᕐᐹ ᓱᕋᒃᑕᐅᓯᒪᖕᒪᑦ.

³¹ ᐃᓔᑦᔭ ᐅᔭᕋᖕᓂᒃ 12ᓂᒃ ᑲᑎᕐᓱᐃᕗᖅ, ᔧᑰᑉ ᐃᕐᓂᖏᑕ ᑭᖑᕚᖏᑕ ᐅᓄᕐᓂᖏᑦ ᒪᓕᒡᓗᒋᑦ, ᐊᑕᓂᐅᑉ ᐅᖃᐅᓯᖏᑦ ᑖᑦᓱᒧᖓ ᑎᑭᓚᐅᕐᑐᑦ ᒪᓕᒡᓗᒋᑦ, ᐅᖃᕐᓗᓂ, “ᐃᓴᕆᐊᓕᒥᒃ ᐊᑎᖃᕐᑐᒃᓴᐅᕗᑎᑦ.”

³² ᑖᒃᑯᓄᖓ ᐅᔭᕋᖕᓄᑦ ᑐᓂᕐᕈᓯᕐᕕᓕᐅᕐᐳᖅ ᐊᑕᓂᐅᑉ ᐊᑎᖓᓂ. ᑭᒡᓕᓕᒫᖓᓗ ᐃᑎᕐᓴᓕᐅᕐᐹ ᐃᒪᖃᕐᕕᒃᓴᒥᒃ, ᖃᓪᓗᑎᓄᑦ ᓯᑕᒪᓄᑦ ᓈᒻᒪᒃᑐᒥᒃ.

³³ ᕿᔪᐃᓪᓗᑦ ᑐᓂᕐᕈᓯᕐᕕᐅᑉ ᖄᖓᓄᐊᕐᐰᑦ, ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᓱᕅᔭᕐᓗᒍ ᕿᔪᐃᑦ ᖄᖓᓄᐊᕐᐹ. ᐅᖃᕐᓗᓂᓗ, “ᐃᒥᕐᑕᐅᑏᑦ ᓯᑕᒪᑦ ᐃᒻᒥᕐᓗᒋᑦ, ᑐᓂᕐᕈᑎᒃᓮᑦ ᐃᑯᐊᓪᓚᒐᒃᓴᑦ ᑖᒃᑯᓄᖓ ᑯᕝᕕᕆᓯᐅᒃ, ᕿᔪᐃᓪᓗ.”

³⁴ ᐅᖃᒃᑲᓐᓂᕐᐳᕐᓗ, “ᐊᑏᓗ ᑯᕝᕕᕆᓯᐅᒃ ᐂᑉᐸᖓᓂ,” ᑕᕝᕙ ᑯᕝᕕᕆᕔᑦ ᐂᑉᐸᖓᓂ. ᐅᖃᐅᑎᒃᑲᓐᓂᕐᐰᓪᓗ, “ᐊᑏᓗ ᑯᕝᕕᕆᓯᐅᒃ ᐱᖓᔪᐊᖓᓐᓂᒃ,” ᑯᕝᕕᕆᕔᓪᓗ ᐱᖓᔪᐊᖓᓐᓂᒃ.

³⁵ ᐃᒥᕐᓗ ᑐᓂᕐᕈᓯᕐᕕᐅᑉ ᐊᕙᑖᓄᑦ ᑰᒃᐳᖅ, ᐃᑎᕐᓴᓕᐅᕐᓯᒪᔪᕐᓗ ᑕᑕᑕᐅᕗᖅ ᐃᒥᕐᒧᑦ.

³⁶ ᑕᕝᕙᓂᓗ ᐅᓐᓄᒃᑯᑦ ᑐᓂᕐᕈᓯᓐᓂᖅ ᓇᓪᓕᐅᑎᖕᒪᑦ, ᐃᓔᑦᔭ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᖃᒡᓕᒋᐊᕐᓗᓂ ᐅᖃᕐᐳᖅ, “ᐊᑕᓃᖅ, ᐂᑉᕋᕼᐋᒻ, ᐂᓴᑭᐅᓪᓗ, ᐃᓴᕆᐊᓕᐅᓪᓗ ᒎᑎᖓ, ᐅᓪᓗᒥ ᖃᐅᔨᔭᐅᓕᕆᑦ ᐊᑕᓂᐅᒐᕕᑦ ᐃᓴᕆᐊᓕᐅᑉ ᒎᑎᖓ, ᐅᕙᖓᓗ ᐱᔨᒋᒐᕕᖓ, ᑕᒪᒃᑯᐊᓗ ᐱᓇᓱᐊᕐᑕᒃᑲ ᐅᖃᐅᓯᕆᓯᒪᔭᒃᑯᑦ ᐱᓇᓱᐊᖃᑦᑕᕋᒃᑭᑦ.

³⁷ ᑐᓴᓚᐅᓐᖓ, ᐊᑕᓃᖅ, ᑐᓴᓚᐅᓐᖓ, ᐅᑯᐊ ᐃᓄᐃᑦ ᖃᐅᔨᖁᓪᓗᒋᑦ ᐃᕝᕕᑦ ᐊᑕᓂᐅᒐᕕᑦ ᒎᑎ, ᐆᒻᒪᑎᖏᓪᓗ ᐅᑎᕐᑎᓪᓗᒋᑦ ᐃᓕᖕᓄᑦ.”

³⁸ ᑕᕝᕙ ᐊᑕᓂᐅᑉ ᐃᑯᒪᖁᑎᖓ ᐊᖅᑲᕐᐳᖅ, ᑐᓂᕐᕈᑏᓪᓗ ᐃᑯᐊᓚᑎᑕᒃᓴᖅ ᓄᖑᑉᐹ, ᕿᔪᐃᓪᓗ, ᐅᔭᕅᓪᓗ, ᐳᔪᕅᓪᓗ, ᐃᒥᕐᓗ ᓄᖑᑉᐹ ᐃᑎᕐᓴᒦᑦᑐᖅ.

³⁹ ᐃᓄᓕᒫᓪᓗ ᑕᒪᑐᒥᖓ ᑕᑯᒐᒥᒃ, ᒪᓂᖅᑲᒧᑦ ᐹᒻᒪᒃᐳᑦ; ᐅᖃᕐᓗᑎᒡᓗ, “ᐊᑕᓂᖅ ᒎᑎᐅᕗᖅ! ᐊᑕᓂᖅ ᒎᑎᐅᕗ!”

⁴⁰ ᐃᓔᑦᔭᐅᓪᓗ ᐅᖃᐅᑎᕔᑦ, “ᐰᓕᐅᑉ ᐅᖃᕐᑎᖏᑦ ᑎᒍᓯᐅᒃ! ᐊᑕᐅᓯᕐᒥᒡᓘᓐᓃᑦ ᕿᒫᓯᔪᖃᖁᓇᒍ!” ᑕᕝᕙ ᑎᒍᕔᑦ, ᐃᓔᑦᔭᐅᓪᓗ ᑭᓲᓂ ᑰᒐᓛᖓᓄᐊᕈᑎᕔᑦ, ᑕᕝᕙᓂᓗ ᑐᖁᓪᓗᒋᑦ.

ᓯᓚᓗᔪᐃᑦᑑᑉ ᐃᓱᓕᓐᓂᖓ

⁴¹ ᐃᓔᑦᔭᐅᓪᓗ ᐂᕼᐊᑉ ᐅᖃᐅᑎᕚ, “ᑕᑉᐸᐅᖓ ᐂᓕᕆᑦ, ᓂᕆᓗᑎᑦ ᐃᒥᓕᕆᑦ; ᓯᓚᓗᒡᔪᐊᖅ ᑐᓴᕐᓴᐅᓕᕐᒪᑦ.”

⁴² ᑕᕝᕙ ᐂᕼᐊᑉ ᑕᑉᐸᐅᖓ ᐂᕗᖅ ᓂᕆᓪᓗᓂᓗ ᐃᒥᕐᐳᖅ. ᐃᓔᑦᔭᓗ ᑳᕐᒥᐅᑉ ᖄᖓᓄᐊᕐᐳᖅ; ᐸᒻᒪᒃᑎᕐᓗᓂᓗ ᒪᓂᖅᑲᒧᑦ, ᓂᐊᖁᓂ ᓰᖅᑯᒥᑕ ᐊᑯᓐᓂᖓᓄᐊᕐᓗᒍ.

⁴³ ᐱᔨᓂᓗ ᐅᖃᐅᑎᕚ, “ᒫᓐᓇ ᑕᑉᐸᐅᖓ ᑕᑯᔭᕐᑐᕆᑦ, ᐃᒪᐅᑉ ᓇᓛᓄᑦ.” ᑕᕝᕙ ᑕᑉᐸᐅᓐᖓᕐᐳᖅ ᑕᑯᓂᐊᕐᓗᓂ, ᐅᖃᕐᓗᓂᓗ, “ᓱᓇᑕᖃᓐᖏᓚᖅ.” ᐅᖃᐅᑎᒃᑲᓐᓂᕐᐹ, “ᑕᑉᐸᐅᓐᖓᓚᐅᕐᒥᒋᑦ.” 7ᐃᕐᓱᓗᓂ ᐅᖃᐅᑎᖃᑦᑕᓚᐅᕐᐹ, “ᑕᑯᔭᕐᑐᒃᑲᓐᓂᕆᑦ.”

⁴⁴ ᑭᖑᕐᖓᒍᓪᓗ, 7ᖓᓐᓂ ᑕᑯᓂᐊᕐᒥᒐᒥ, ᐅᖃᕐᐳᖅ, “ᑕᑯᒋᑦ, ᓄᕗᔭᑕᖃᓕᕐᐳᖅ ᐊᖑᑎᐅᑉ ᐊᒡᒐᖓᑎᑐᑦ ᐊᖏᑎᒋᔪᒥᒃ, ᐃᒫᓂᑦ ᓴᖅᑭᑦᑐᒥᑦ!” ᐃᓔᑦᔭᐅᑉ ᐅᖃᐅᑎᕚ, “ᑕᑉᐸᐅᖓ ᐂᓕᕆᑦ ᐂᕼᐊᑉ ᐅᖃᐅᑎᓗᒍ, ‘ᐅᓇᑕᐅᑏᑦ ᐊᒃᓴᓗᐊᓕᒃ ᐊᑐᐃᓐᓇᕈᕐᓗᒍ ᑕᐅᓄᖓ ᐂᓕᕆᑦ, ᓯᓚᓗᖕᒧᑦ ᓄᖅᑲᕐᑎᑕᐅᖁᓇᒃ.’”

⁴⁵ ᐊᑯᓂᐅᑎᓐᓇᒍᑦ ᓯᓚ ᑖᕐᓯᕗᖅ ᓄᕗᔭᓄᑦ ᐊᓄᕆᒧᓪᓗ, ᓯᓚᓗᒡᔪᐊᓕᕐᓗᓂᓗ. ᐂᕼᐊᑉᓗ ᐃᖏᕐᕋᓯᕗᖅ ᐂᓪᓗᓂᓗ ᔨᔭᕆᐅᓪᒧᑦ.

⁴⁶ ᑕᕝᕙ ᐊᑕᓂᐅᑉ ᐊᔪᒐᖃᖏᓐᓂᖓ ᐃᓔᑦᔭᒧᐊᕐᐳᖅ; ᐊᓐᓄᕌᓂᓗ ᕿᑎᕉᑎᒥᓄᑦ ᕿᓚᒃᓗᒋᑦ ᐅᓪᓚᒃᓯᕗᖅ ᐂᕼᐊᑉ ᓯᕗᓂᖓᓂ ᔨᔭᕆᐅᓪᒧᓪᓗ ᑎᑭᖅᑳᕐᐳᖅ.