ᐊᑕᓃᑦ ᓯᕗᓪᓖᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓔᑦᔭᐅᑉ ᐅᖃᐅᓯᖃᕐᓂᖓ ᓯᓚᓗᓛᖏᓐᓂᖓᓂᒃ

¹ ᐃᓔᑦᔭ ᑎᓯᐰᑎᒥᐅᑕᖅ, ᒋᓕᐊᑏᑦ ᓄᓇᖓᓂᑦ, ᐅᖃᕐᐳᖅ ᐂᕼᐊᑉᒧᑦ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ ᐃᓅᖕᒪᑦ, ᑖᑦᓱᒪ ᓵᖓᓂ ᓇᖏᕐᐳᖓ, ᐂᔪᖓᓇᕐᑐᖃᕐᓂᐊᓐᖏᓚᖅ ᓯᓚᓗᖃᕐᓂᐊᕈᓐᓃᕐᓗᓂᓗ ᐊᕐᕌᒍᓂ ᑖᒃᑯᓇᓂ, ᐱᖁᔨᓕᕐᓗᖓ ᐅᖃᓚᐅᖏᓐᓂᓐᓂ.”

² ᐊᑕᓂᐅᓪᓗ ᐅᖃᐅᓯᖓ ᑎᑭᑉᐳᖅ ᑖᑦᓱᒧᖓ, ᐅᖃᕐᓗᓂ,

³ “ᑕᒫᓐᖓᑦ ᐊᐅᓪᓚᓕᕆᑦ ᓯᕿᓐᓂᓕᕐᕕᐅᑉ ᓇᓛᓄᑦ, ᐃᔨᕐᓗᑎᓪᓗ ᑰᖕᒧᑦ ᓯᐊᕆᔅᒧᑦ, ᔪᐊᕐᑕᓂᒧᑦ ᑰᒃᑐᒧᑦ.

⁴ ᑕᕝᕙᓐᖓᓪᓗ ᑰᒐᓛᖕᒥᑦ ᐃᒥᖃᑦᑕᕈᒫᕐᐳᑎᑦ, ᑐᓗᒊᓪᓗ ᑎᓕᔪᒫᕐᐸᒃᑲ ᐃᓕᖕᓂᒃ ᓂᕆᑎᑦᓯᖁᓪᓗᒋᑦ.”

⁵ ᑕᕝᕙ ᑕᕝᕙᓐᖓᑦ ᐊᐅᓪᓚᕐᐳᖅ ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ; ᐂᓪᓗᓂᓗ ᑰᖕᒧᑦ ᓯᐊᕆᔅᒧᑦ, ᔪᐊᕐᑕᓂᒧᑦ ᑰᒃᑐᒧᑦ.

⁶ ᑐᓗᒊᑦ ᐂᑦᑐᐃᖃᑦᑕᓚᐅᕐᐳᑦ ᓂᐊᖂᔭᒥᑦ ᓂᕿᒥᒡᓗ ᐅᓪᓛᒃᑯᑦ, ᐅᓐᓄᒃᑯᓪᓗ ᑍᒫᑦᓮᓐᓇᖅ, ᑰᒐᓛᖕᒥᓪᓗ ᐃᒥᖃᑦᑕᓚᐅᕐᐳᖅ.

⁷ ᐊᑯᓂᐅᖏᑦᑐᕐᓗ ᑰᒃ ᐸᓂᕐᐳᖅ, ᓯᓚᓗᓚᐅᖏᒻᒪᑦ ᓄᓇᒥ.

ᐃᓔᑦᔭᓗ ᐅᐃᒡᒐᕐᓂᕐᓗ ᔨᕆᐸᑕᒥ

⁸ ᐊᑕᓂᐅᑉ ᐅᖃᐅᓯᖓᓄᑦ ᑎᑭᑕᐅᕗᖅ, ᐅᖃᕐᓗᓂ,

⁹ “ᒪᑭᓕᕆᑦ, ᐂᓗᑎᓪᓗ ᔨᕆᐸᑕᒧᑦ, ᓮᑐᓂᒦᑦᑐᒧᑦ, ᑍᑲᓃᓕᕐᓗᑎᓪᓗ. ᑕᑯᒋ, ᐅᐃᒡᒐᕐᓂᕐᒥᒃ ᑎᓕᓯᕗᖓ ᐃᓕᖕᓂᒃ ᓂᕆᑎᑦᓯᖃᑦᑕᖁᓪᓗᒍ.”

¹⁰ ᑕᕝᕙ ᒪᑭᑉᐳᖅ ᐊᐅᓪᓚᕐᓗᓂᓗ ᔨᕆᐸᑕᒧᑦ; ᐃᒡᓗᒐᓮᓪᓗ ᐃᑎᕐᑕᕐᕕᖓᓄᑦ ᑎᑭᓐᓇᒥ, ᐅᐃᒡᒐᕐᓂᕐᑕᖃᓚᐅᕐᐳᖅ ᑲᑎᕐᓱᐃᔪᒥᒃ ᕿᔪᖕᓂᒃ ᐃᑯᐊᓪᓚᖅᑯᑎᒃᓴᓂᒃ; ᑕᕝᕙ ᕾᖁᕚ ᐅᖃᐅᑎᓪᓗᒍᓗ, “ᐃᒥᕐᒥᒃ ᒥᑭᔪᒥᒃ ᕾᑦᓯᓚᐅᕆᑦ ᐃᒥᐅᑎᒧᑦ, ᐃᒥᕐᓂᐊᕋᒪ.”

¹¹ ᐂᒃᓯᓕᕐᑎᓪᓗᒍ, ᕾᖁᕚ ᐅᖃᐅᑎᓪᓗᒍᓗ, “ᓂᐊᑰᔭᒥᒡᓗ ᒥᑭᔪᒥᒃ ᐱᓯᒪᔭᕐᓂᒃ ᕾᑦᓯᓗᑎᑦ.”

¹² ᑖᓐᓇᓗ ᑭᐅᕗᖅ, “ᐊᑕᓃᖅ ᒎᑏᑦ ᐃᓅᖕᒪᑦ, ᓂᐅᖂᔭᒥᒃ ᐆᑕᒃᓴᖃᓐᖏᓚᖓ, ᐃᑎᒪᓐᓄᑦ ᑭᓯᐊᓂ ᓈᒻᒪᒃᑐᒥᒃ ᓂᐊᖂᔭᒃᓴᖃᕐᐳᖓ ᐴᒍᑕᕐᒦᑦᑐᒥᒃ, ᐅᕐᓱᒥᒡᓗ ᒥᑭᔪᒥᒃ; ᒫᓐᓇᓗ, ᕿᔪᖕᓂᒃ ᐃᑯᐊᓪᓚᖅᑯᑎᒃᓴᓂᒃ ᑲᑎᕐᓱᐃᕗᖓ ᓂᐊᖂᔭᓕᐅᕈᒪᓪᓗᖓ ᐃᕐᓂᕋᓗ ᓂᕆᐊᕐᔪᒍᓐᓇᖁᓪᓗᓄᒃ, ᑭᖑᓂᐊᒍᓪᓗ ᑐᖁᓗᓄᒃ.”

¹³ ᑕᕝᕙ ᐃᓔᑦᔭᐅᑉ ᐅᖃᐅᑎᕚ, “ᑲᑉᐱᐊᓱᒃᑍᓕᒋᑦ; ᐂᓕᕆᑦ ᐅᖃᐅᓯᕆᔭᑎᑦ ᑲᔪᓯᑎᓕᒃᑭᑦ; ᑭᓯᐊᓂᓕ ᒥᑭᔪᒥᒃ ᓂᐊᖂᔭᓕᐅᖅᑳᕐᑐᒃᓴᐅᕗᑎᑦ ᐅᕙᓐᓄᑦ ᕾᓪᓗᒍᓗ, ᑭᖑᓂᐊᒍᑦ ᐃᓕᖕᓄᑦ ᐃᕐᓂᕐᓄᓪᓗ ᓂᐊᖂᔭᓕᐅᕐᑐᒃᓴᐅᕗᑎᑦ.

¹⁴ ᐊᑕᓂᖅ, ᐃᓴᕆᐊᓕᒥᐅᑦ ᒎᑎᖓ ᐃᒫᒃ ᐅᖃᕐᐳᖅ, ‘ᓂᐊᖂᔭᒃᓴᖅ ᐴᒍᑕᕐᒦᑦᑐᖅ ᓄᖑᓐᓂᐊᓐᖏᓚᖅ, ᐅᕐᓱᕐᓗ ᐴᒍᑕᕐᒦᑦᑐᖅ ᓴᓗᐊᕐᓂᐊᓐᖏᓚᖅ, ᐊᑕᓂᖅ ᓯᓚᓗᒃᑎᑦᓯᓚᐅᖅᑳᕐᑎᓐᓇᒍ ᓄᓇᒥ.’”

¹⁵ ᑕᕝᕙ ᐊᕐᓇᖅ ᑍᒫᒃ ᐱᓇᓱᐊᓚᐅᕐᐳᖅ ᐃᓔᑦᔭᐅᑉ ᐅᖃᐅᓯᕆᔭᖏᑦ ᒪᓕᒡᓗᒋᑦ; ᑖᓐᓇᓗ, ᐊᕐᓇᐅᓪᓗ ᐃᒡᓗᒥᐅᖃᑎᖏᑦ ᓂᕆᖃᑦᑕᓚᐅᕐᐳᑦ ᐅᓪᓗᓂᒃ ᐅᓄᕐᑐᓂᒃ.

¹⁶ ᓂᐊᖂᔭᒃᓴᖅ ᐴᒍᑕᕐᒦᑦᑐᖅ ᓄᖑᓚᐅᓐᖏᓚᖅ, ᐅᕐᓱᕐᓗ ᓴᓗᐊᓚᐅᓐᖏᓚᖅ, ᐊᑕᓂᐅᑉ ᐅᖃᐅᓯᖏᑦ ᐃᓔᑦᔭᒃᑯᑦ ᐅᖃᐅᓯᕆᓚᐅᕐᑕᖏᑦ ᒪᓕᒡᓗᒋᑦ.

¹⁷ ᑕᒪᑐᒪ ᑭᖑᕐᖓᒍᑦ ᐊᕐᓇᐅᑉ ᐃᒡᓗᒥᒃ ᓇᖕᒥᓂᓕᐅᑉ ᐃᕐᓂᖓ ᖃᓂᒻᒪᒃᐳᖅ; ᖃᓂᒪᓂᕐᒥᓄᑦ ᐱᐅᔪᓐᓃᕐᐸᓪᓕᐊᒐᒥ ᐊᓂᕐᓂᖃᕈᓐᓃᕐᐳᖅ.

¹⁸ ᑕᕝᕙ ᐊᕐᓇᖅ ᐃᓔᑦᔭᒧᑦ ᐅᖃᕐᐳᖅ, “ᒎᑎᐅᑉ ᐃᓄᖁᑎᖓ, ᓱᓇᒥᒃ ᐅᕙᓐᓄᑦ ᓈᒻᒪᒃᓴᖏᑦᔪᑎᖃᕐᐱᑦ? ᐊᔪᕐᑐᓕᓂᓐᓃᒃ ᐃᖅᑬᑎᑦᓯᔭᕐᑐᕐᐲᑦ, ᐃᕐᓂᕋᓗ ᑐᖁᑎᓪᓗᒍ?”

¹⁹ ᐃᓔᑦᔭᐅᑉ ᐅᖃᐅᑎᕚ, “ᐃᕐᓃᑦ ᕾᓚᐅᕈᒃ.” ᑎᒍᕚᓗ ᑖᑦᓱᒪᓐᖓᑦ, ᐊᒡᔭᕐᓗᒍᓗ ᖁᓛᓄᑦ, ᐃᒡᓗᕈᓯᕐᒥᓄᑦ ᓇᔪᕐᑕᒥᓄᑦ, ᐃᒡᓕᕐᒥᓄᓪᓗ ᓇᓪᓚᕐᑎᑉᐹ.

²⁰ ᓂᐱᖅᑯᕐᑐᓪᓗᓂᓗ ᐊᑕᓂᕐᒧᑦ ᑐᒃᓯᐊᕐᐳᖅ, “ᐊᑕᓃᖅ ᒎᑏᒃ, ᕿᒃᓵᖕᓇᕐᑐᖃᕐᑎᑦᓯᕖᑦ ᐊᕐᓇᒧᑦ ᐅᐃᒐᕐᓂᕐᒧᑦ ᑐᔪᕐᒥᕕᒋᔭᓐᓄᑦ, ᐃᕐᓂᖓ ᑐᖁᑎᓪᓗᒍ?”

²¹ ᐃᒻᒥᓂᒡᓗ ᖄᖓᓄᐊᖃᑦᑕᕐᐳᖅ ᐱᖓᓱᐊᕐᑎᕐᓗᓂ, ᐊᑕᓂᕐᒧᓪᓗ ᑐᒃᓯᐊᕐᐳᖅ, “ᐊᑕᓃᖅ ᒎᑎᒐ, ᑐᒃᓯᐊᕐᐳᖓ, ᓱᕈᓯᐅᑉ ᑕᕐᓂᖓ ᐅᑎᕐᑎᓚᐅᕈᒃ ᑕᕝᕗᖓ.”

²² ᐊᑕᓂᐅᓪᓗ ᐃᓔᑦᔭᐅᑉ ᓂᐱᖓ ᑐᓴᕐᐹ; ᓱᕈᓯᐅᓪᓗ ᑕᕐᓂᖓ ᐅᑎᕐᑎᑉᐹ ᑖᑦᓱᒧᖓ, ᐃᓅᓕᕐᐳᕐᓗ.

²³ ᐃᓔᑦᔭᐅᓪᓗ ᓱᕈᓯᖅ ᖁᓛᓂᑦ ᑕᐅᓄᓐᖓᐅᑎᕚ ᐊᑖᓄᑦ ᐃᒡᓗᒧᑦ, ᐊᓈᓇᖓᓄᓪᓗ ᑐᓂᕚ; ᐃᓔᑦᔭᓗ ᐅᖃᕐᐳᖅ, “ᑕᑯᒋᑦ, ᐃᕐᓃᑦ ᐃᓅᕗᖅ!”

²⁴ ᐊᕐᓇᕐᓗ ᐃᓔᑦᔭᒧᑦ ᐅᖃᕐᐳᖅ, “ᒫᓐᓇ ᖃᐅᔨᕗᖓ ᒎᑎᐅᑉ ᐃᓄᖁᑎᒋᖕᒪᑎᑦ, ᐊᑕᓂᐅᓪᓗ ᐅᖃᐅᓯᖓ ᖃᓂᒃᑰᕐᑐᖅ ᓱᓕᖕᒪᑦ.”