ᐊᑕᓃᑦ ᓯᕗᓪᓖᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᐅᑉ ᐅᖃᐅᓯᖓ ᔨᕼᐆᒧᑦ ᑎᑭᑉᐳᖅ ᕼᐊᓇᓁᑉ ᐃᕐᓂᖓᓄᑦ, ᐹᓴᒥᒃ ᐊᑭᕋᕐᑐᕐᓗᓂ ᐃᒫᒃ ᐅᖃᕐᐳᖅ,

² “ᐊᖏᔪᕈᕐᑎᓚᐅᕋᒃᑭᑦ ᓴᓂᕐᑎᑐᑦ ᑍᒤᑎᓪᓗᑎᑦ ᓯᕗᓕᕐᑎᓐᖑᕐᑎᓚᐅᕐᐸᒋᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ, ᐊᔪᕐᑐᓕᕗᑎᑦ ᔨᕈᐳᐊᑎᑐᑦ, ᐃᓄᖁᑎᒃᑲᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᑉᐸᑎᑦ, ᓂᓐᖓᒃᓮᕗᑎᓪᓗ ᐅᕙᓐᓂᒃ ᐊᔪᕐᑐᓕᓂᖏᑦ ᐱᓪᓗᒋᑦ.

³ ᑕᑯᒋᑦ, ᐹᓴᐅᑉ ᐃᓚᖏᑦ ᓄᖑᑎᑦᓱᒫᕐᐸᒃᑲ, ᐃᒡᓗᒥᐅᖃᑎᖏᓪᓗ, ᔨᕈᐳᐊᒻ ᐃᓚᖏᑎᑐᑦ ᓂᐹᑉ ᐃᕐᓂᖓᑐᑦ.

⁴ ᓇᓪᓕᐊᑦ ᐹᓴᒥᒃ ᐃᓚᖃᕐᑐᑦ ᑐᖁᒃᐸᑕ ᐃᒡᓗᒐᓴᖕᓂ ᕿᒻᒥᓂᑦ ᓂᕆᔭᐅᔪᒫᕐᐳᑦ; ᓇᓪᓕᐊᓪᓗ ᐃᓚᒋᔭᖓ ᓄᓇᑐᐃᓐᓇᕐᒥ ᑐᖁᔪᑦ ᑎᖕᒥᐊᓂᑦ ᓂᕆᔭᐅᔪᒫᕐᐳᖅ.”

⁵ ᐹᓴᐅᑉ ᐱᓂᐊᕐᓂᕕᓂᖏᑕ ᐃᓚᖏᑦ, ᐱᓇᓱᐊᕐᓂᕕᓂᖓᓗ, ᐱᔪᓐᓇᕐᓂᖓᓗ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ.

⁶ ᐹᓴ ᑐᖁᖕᒪᑦ ᐃᓗᕕᕐᑕᐅᕗᖅ ᓯᕗᓕᖏᑕ ᐃᓗᕕᖃᕐᕕᖏᓐᓂ ᑎᕐᔭᒥ; ᑖᑦᓱᒪᓗ ᐃᕐᓂᖓ ᐄᓚ ᐊᖓᔪᖅᑳᕐᔪᐊᕈᕐᐳᖅ ᐃᓂᖓᓂ.

⁷ ᓱᓕ ᑕᕝᕙ ᐊᑕᓂᐅᑉ ᐅᖃᐅᓯᖏᑦ ᑎᑭᑉᐳᑦ ᐅᖃᕐᑎᒥᒍᑦ ᔨᕼᐆᒃᑯᑦ ᕼᐊᓇᓁᐊᐅᑉ ᐃᕐᓂᖓᒍᑦ ᐹᓴᒧᑦ ᐃᒡᓗᒥᐅᖃᑎᖏᓐᓄᓪᓗ, ᐊᔪᕐᑐᓕᓂᖓ ᐱᓪᓗᒍ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᓂᓐᖎᓚᐅᕐᒪᑦ ᐱᓂᐊᕐᓂᖏᑕ ᓴᖅᑭᑎᑕᖏᓐᓄᑦ, ᔨᕈᐳᐊᒻ ᐊᔪᕐᑐᓕᓂᕆᓚᐅᕐᑕᖓᑐᑦ ᐃᓚᖏᓐᓂᒡᓗ ᑐᖁᕅᓚᐅᕐᓂᖓᓄᑦ.

ᐃᓛᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥ

⁸ ᐋᓴ ᔫᑕᒥ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 26ᓂᒃ, ᐄᓚ ᐹᓴᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᖕᓂᒃ ᒪᕐᕉᖕᓂᒃ ᑎᕐᔭᒥ.

⁹ ᑖᑦᓱᒪᓕ ᐱᔨᖓ ᔨᒻᕆ, ᐊᖓᔪᖅᑳᖑᔪᖅ ᕿᒧᒃᓯᐅᑏᑦ ᐊᒃᓴᓗᐊᓕᖁᑎᖏᑕ ᐊᕝᕙᖏᓐᓄᑦ, ᐊᑭᕋᕐᑐᓕᕐᐳᖅ ᑖᑦᓱᒥᖓ. ᑎᕐᔭᒦᓪᓗᓂ, ᐃᒥᕋᒥ ᐋᖓᔮᓕᕐᐳᖅ, ᐊᖓᔪᖅᑳᕐᔪᐊᑉ ᐃᒡᓗᖓᓂ ᑲᒪᔨᐅᔪᑦ ᐊᖓᔪᖅᑳᖓᑦᑕ ᐋᕐᓴᐅᑉ ᐃᒡᓗᖓᓂ.

¹⁰ ᔨᒻᕆ ᐃᑎᕋᒥ ᐊᖓᔪᖅᑳᕐᔪᐊᖅ ᑲᐱᓪᓗᒍ ᑐᖁᑉᐹ, ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 27ᓂᒃ ᔫᑕᒥ, ᐃᒻᒥᓂᒡᓗ ᐊᖓᔪᖅᑳᕐᔪᐊᕈᕐᑎᑉᐳᖅ ᑖᑦᓱᒧᖓ ᑭᖑᕝᕕᐅᑎᓪᓗᓂ.

¹¹ ᑕᒪᑐᒪ ᑭᖑᕐᖓᒍᑦ, ᐊᖓᔪᖅᑳᕐᔪᐊᖑᓕᕋᒥ, ᐹᓴᐅᑉ ᐃᓚᓕᒫᖏᑦ ᑐᖁᑉᐰᑦ, ᐊᑕᐅᓯᕐᒥᒡᓘᓐᓃᑦ ᐊᖑᑏᑦ ᐊᒥᐊᒃᑯᓐᖏᓔᑦ ᐃᓚᓕᒫᖏᑦ ᐃᓚᓐᓇᕆᔭᓕᒫᖏᓪᓗ.

¹² ᑍᒫᒃ ᑕᕝᕙ ᔨᒻᕆ ᐊᓯᕈᐃᓚᐅᕐᐳᖅ ᐹᓴᐅᑉ ᐃᓚᓕᒫᖏᓐᓂᒃ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ, ᐅᖃᐅᓯᖃᓚᐅᕐᒪᑦ ᐹᓴ ᐊᑭᕋᕐᑐᕐᓗᒍ ᔨᕼᐆᒃᑯᑦ ᐅᖃᕐᑎᒥᒍᑦ.

¹³ ᐹᓴᐅᑉ ᐊᔪᕐᑐᓕᓂᕆᓚᐅᕐᑕᖏᑦ ᐃᕐᓂᖓᑕᓗ ᐄᓚᑉ ᐱᑦᔪᑎᒋᓪᓗᒋᑦ, ᐃᓴᕆᐊᓕᒥᐅᓂᒃ ᐊᔪᕐᑐᓕᑎᑦᓯᓚᐅᕐᒪᑕ, ᒎᑎᓐᖑᐊᖃᕐᓂᕐᒥᖕᓄᑦ ᓂᓐᖓᒃᓮᓪᓗᑎᒃ ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓂᒃ.

¹⁴ ᐄᓚᐅᑉ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐱᓇᓱᐊᕐᓂᕆᓚᐅᕐᑕᖏᓪᓗ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ.

ᔨᒻᕆᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ

¹⁵ ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 27ᓂᒃ ᔫᑕᒥ, ᔨᒻᕆ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐅᓪᓗᓂᒃ 7ᓂᒃ ᑎᕐᔭᒥ. ᐅᓇᑕᕐᑐᒃᓮᑦ ᐃᓴᕆᐊᓕᒥᐅᑉ ᑕᖕᒫᕐᓯᒪᓚᐅᕐᐳᑦ ᐅᓇᑕᕆᐊᕐᓯᒪᓪᓗᑎᒃ ᒋᐱᑖᓐᒧᑦ, ᑕᕝᕙᓂ ᐱᓕᔅᑍᓂᒥᐅᑦ ᓄᓇᖁᑎᖓᓃᑦᑐᒥ.

¹⁶ ᐅᓇᑕᕐᑐᒃᓮᓪᓗ ᑕᖕᒫᕐᓯᒪᔪᑦ ᑕᒪᑐᒥᖓ ᑐᓴᕋᒥᒃ ᐅᖃᕐᐳᑦ, “ᔨᒻᕆ ᐊᑭᕋᕐᑐᓕᕋᒥ ᐊᖓᔪᖅᑳᕐᔪᐊᕐᒥᒃ ᑐᖁᑦᓯᕗᖅ.” ᑍᒤᒻᒪᑦ ᐃᓴᕆᐊᓕᒥᐅᑉ ᐅᒻᕆᒥᒃ, ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ, ᐊᖓᔪᖅᑳᕐᔪᐊᕈᕐᑎᑦᓯᕗᑦ ᐃᓴᕆᐊᓕᒥᐅᓄᑦ ᑕᖕᒫᕐᓯᒪᕕᖕᒥᖕᓂ.

¹⁷ ᐅᒻᕆ ᒋᐱᑖᓐᒥᑦ ᐊᐅᓪᓚᕐᐳᑦ ᐃᓴᕆᐊᓕᒥᐅᓕᒫᓪᓗ, ᐅᓇᑕᕆᐊᕐᓗᑎᒃ ᑎᕐᔭᒧᑦ ᐊᕙᑕᖏᕐᐹᓪᓗ.

¹⁸ ᔨᒻᕆ ᖃᐅᔨᒐᒥ ᐃᒡᓗᒐᓮᑦ ᓵᓚᐅᓂᖓᓂᒃ, ᐊᖓᔪᖅᑳᕐᔪᐊᑉ ᐃᒡᓗᖓᓄᐊᕐᐳᖅ ᐊᖓᔪᖅᑳᕐᔪᐊᒃᑯᕕᖕᒧᑦ, ᐊᖓᔪᖅᑳᕐᔪᐊᓪᓗ ᐃᒡᓗᖓ ᐃᑯᐊᓪᓚᒃᐹ ᐃᓗᐊᓃᓪᓗᓂ, ᑐᖁᓪᓗᓂᓗ.

¹⁹ ᐊᔪᕐᑐᓕᓂᕐᒥᓄᑦ ᐱᓂᐊᕐᓂᕆᓚᐅᕐᑕᒥᓄᓪᓗ, ᐱᐅᖏᑦᑐᒥᒃ ᐃᓅᓚᐅᕋᒥ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᔨᕈᐳᐊᒻ ᐱᓂᐊᕐᓂᕆᓚᐅᕐᑕᖏᓐᓂᒃ ᐊᑐᓚᐅᕐᒪᑦ, ᐊᔪᕐᑐᓕᓂᕆᓚᐅᕐᑕᒥᓄᓪᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ.

²⁰ ᔨᒻᕆᐅᑉ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐊᑭᕋᕐᑐᓕᕐᓂᖓᓗ ᐊᖓᔪᖅᑳᒥᓂᒃ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ.

ᐅᒻᕆᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ

²¹ ᐃᓴᕆᐊᓕᒥᐅᑦ ᐃᓄᖏᑦ ᒪᕐᕈᐃᓕᕗᑦ, ᐊᕝᕙᖏᑦ ᒪᓕᒃᐳᑦ ᑎᑉᓂᒥᒃ ᒋᓇᑎᐅᑉ ᐃᕐᓂᖓᓂᒃ, ᐊᖓᔪᖅᑳᕐᔪᐊᓐᖑᕐᑎᑦᓱᒪᓪᓗᒍ, ᐊᕝᕙᖏᓪᓗ ᒪᓕᒃᐳᑦ ᐅᒻᕆᒥᒃ.

²² ᐃᓄᐃᑦ ᐅᒻᕆᒥᒃ ᒪᓕᒃᑐᑦ ᓵᓚᖃᕐᐳᑦ ᑎᑉᓂᒥᒃ ᒪᓕᒃᑐᓂᒃ ᒋᓇᑎᐅᑉ ᐃᕐᓂᖓᓂᒃ; ᑍᒤᒻᒪᑦ ᑎᑉᓂ ᑐᖁᕗᖅ, ᐅᒻᕆᓗ ᐊᖓᔪᖅᑳᕐᔪᐊᖑᓕᕐᐳᖅ.

²³ ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥ ᐊᕐᕌᒍᓂᒃ 31ᓂᒃ, ᐅᒻᕆ ᐊᖓᔪᖅᑳᕐᔪᐊᕈᕐᐳᖅ ᐃᓴᕆᐊᓕᒥᐅᓄᑦ, ᐊᐅᓚᑦᓯᓚᐅᕐᐳᕐᓗ ᐊᕐᕌᒍᓂᒃ 12ᓂᒃ; ᐊᕐᕌᒍᓂᒃ ᐱᖓᓲᔪᕐᑐᓂᒃ ᐊᐅᓚᑦᓯᓚᐅᕐᐳᖅ ᑎᕐᔭᒥ.

²⁴ ᓴᒥᐊᕆᐊᒥᐅᑦ ᖃᖅᑲᖓᓂᒃ ᓂᐅᕕᕐᐳᖅ ᓯᒥᕆᒥᑦ ᓯᐅᓪᕕᕆᓄᑦ ᑖᓚᓐᑏᖕᓄᑦ ᒪᕐᕉᖕᓄᑦ, ᖃᖅᑲᐅᓪᓗ ᖄᖓ ᓴᐴᓗᑕᓕᐅᕐᐹ, ᐃᒡᓗᒐᓮᓪᓗ ᑍᕔᑦ ᓴᓇᔭᓂ, ᓴᒥᐊᕆᐊᒥᒃ, ᑍᒫᒃ ᐊᑎᖃᕐᑎᑉᐹ ᓯᒧᕐ ᐱᓪᓗᒍ, ᓇᖕᒥᓂᖃᓚᐅᕐᒪᑦ ᖃᖅᑲᒥᒃ.

²⁵ ᐅᒻᕆ ᐊᔪᕐᑐᓕᕗᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᐱᐅᖏᓐᓂᕐᓴᐅᓚᐅᕐᐳᕐᓗ ᓯᕗᓕᕐᒥᓂᑦ.

²⁶ ᔨᕈᐳᐊᒻ ᓂᐹᑦ ᐃᕐᓂᖓᑕ ᐱᓂᐊᕐᓂᓕᒫᖏᓐᓂᒃ ᒪᓕᓚᐅᕐᒪᑦ, ᐊᔪᕐᑐᓕᓂᕐᒥᓄᑦ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ, ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓂᒃ ᓂᓐᖓᒃᓮᓚᐅᕐᐳᖅ ᒎᑎᓐᖑᐊᖃᕐᓂᕐᒥᓄᑦ.

²⁷ ᐅᒻᕆᐅᓪᓕ ᐱᓂᐊᕐᓂᕕᓂᖏᑦ ᐱᔪᓐᓇᕐᓂᖓᑕᓗ ᑕᑯᒃᓴᐅᓂᖓ, ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ.

²⁸ ᐅᒻᕆ ᑐᖁᕗᖅ ᐃᓗᕕᕐᑕᐅᕗᕐᓗ ᓯᕗᓕᖏᑕ ᐃᓗᕕᖃᕐᕕᖏᓐᓂ ᓴᒥᐊᕆᐊᒥ. ᐂᕼᐊᑉ ᑖᑦᓱᒪ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓂᖓᓂ.

ᐂᕼᐊᐱᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ

²⁹ ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 38ᓂᒃ, ᐂᕼᐊᑉ ᐅᒻᕆᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ, ᐂᕼᐊᑉ ᐅᒻᕆᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᓚᐅᕐᐳᖅ ᐃᓴᕆᐊᓕᒥᐅᓄᑦ ᓴᒥᐊᕆᐊᒥ ᐊᕐᕌᒍᓂᒃ 22ᓂᒃ.

³⁰ ᐂᕼᐊᑉ ᐅᒻᕆᐅᑉ ᐃᕐᓂᖓ ᐊᔪᕐᑐᓕᕗᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᐊᔪᕐᑐᓕᓂᕐᓴᐅᕗᕐᓗ ᓯᕗᓕᕐᒥᓂᑦ ᑕᒤᓐᓂᑦ.

³¹ ᖃᓄᐃᖏᓐᓂᕐᓴᐅᔮᓚᐅᕐᐳᖅ ᐃᓅᓚᐅᕈᓂ, ᔨᕈᐳᐊᒻ ᓂᐹᑦ ᐃᕐᓂᖓᑕ ᐊᔪᕐᑐᓕᓂᕆᓚᐅᕐᑕᖓᑐᑦ, ᓄᓕᐊᓂᓚᐅᕐᒪᑦ ᔨᔨᐱᐅᓪᒥᒃ ᐊᖓᔪᖅᑳᕐᔪᐊᑉ ᐃᔅᐱᐊᓚᐅᑉ ᓮᑐᓂᒥᐅᑕᐅᑉ ᐸᓂᖓᓂᒃ, ᐰᓕᒥᒡᓗ ᒎᑎᓐᖑᐊᖃᓚᐅᕐᐳᖅ ᐱᓇᓱᐊᓚᐅᕐᒪᑦ ᐅᐱᒍᓱᖕᓂᕐᒧᓪᓗ ᑐᒃᓯᐊᕐᕕᒋᓪᓗᒍ.

³² ᑐᓂᕐᕈᓯᕐᕕᓕᐅᕐᐳᕐᓗ ᐰᓕᒧᑦ ᐰᓕᐅᑉ ᐃᒡᓗᖓᓂ, ᓴᒥᐊᕆᐊᒥ.

³³ ᐂᕼᐊᑉᓗ ᕿᔪᖕᒥᒃ ᐊᓯᕆᒥᒃ ᐊᑎᓕᖕᒥᒃ ᒎᑎᓐᖑᐊᓕᐅᕐᐳᖅ. ᐂᕼᐊᑉ ᓂᓐᖓᒃᓮᓂᕐᓴᐅᓚᐅᕐᐳᖅ ᐊᑕᓂᕐᒥᒃ, ᐃᓴᕆᐊᓕᒥᐅᑉ ᒎᑎᖓᓂᒃ, ᐊᖓᔪᖅᑳᕐᔪᐊᖑᓚᐅᕐᑐᓂᑦ ᐃᓴᕆᐊᓕᒥᐅᓄᑦ ᓯᕗᓕᕐᒥᓂᑦ.

³⁴ ᐃᓅᑎᓪᓗᒍ ᕼᐂᐅᓕ ᐱᑎᓕᒥᐅᑕᖅ ᔨᕆᑯᒥᒃ ᓴᓇᕗᖅ; ᑐᓐᖓᕕᓕᐅᕐᓗᒍ ᐃᕐᓂᓂ ᐊᖓᔪᒃᓕᕐᐹᖅ ᐊᐱᕌᒻ ᐃᑲᔪᕐᑎᒋᓪᓗᒍ, ᓄᑲᕐᓕᕐᐹᖁᑎᓂᓗ ᓯᒎᑉ ᓴᓇᖃᑎᒋᕚ ᐃᑎᕐᑕᕐᕕᖏᓐᓂᒃ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ ᐅᖃᐅᓯᕆᓚᐅᕐᑕᖏᑦ ᔮᓱᐊᒃᑯᑦ ᓈᓂᐅᑉ ᐃᕐᓂᖓᒍᑦ.