ᐊᑕᓃᑦ ᓯᕗᓪᓖᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᐰᔭᐅᑉ ᐊᖓᔪᖅᑳᕐᔪᐊᓐᖑᕐᓂᖓ ᔫᑕᒥ

¹ ᐊᖓᔪᖅᑳᕐᔪᐊᖅ ᔨᕈᐳᐊᒻ ᓂᐹᑦ ᐃᕐᓂᖓ ᐊᐅᓚᑦᓯᓕᕐᑎᓪᓗᒍ ᐊᕐᕌᒍᓂᒃ 18ᓂᒃ, ᐊᐰᔭᒻ ᐊᖓᔪᖅᑳᕐᔪᐊᕈᕐᐳᖅ ᔫᑕᒥ.

² ᐊᕐᕌᒍᓂᒡᓗ ᐱᖓᓱᓂᒃ ᐊᐅᓚᑦᓯᓚᐅᕐᐳᖅ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᒫᑲᒥᒃ ᐋᐱᓴᓗᒥᐅᑉ ᐸᓂᖓ.

³ ᐊᐰᔭ ᐊᑖᑕᖓᑕ ᐊᔪᕐᑐᓕᓂᕆᓚᐅᕐᑕᖓᓂᒃ ᒪᓕᓚᐅᕆᕗᖅ, ᐊᑕᓂᕐᒧᑦ ᒎᑎᒥᓄᑦ ᒪᓕᑦᓯᐊᕋᓂ, ᓯᕗᓪᓕᕐᒥᒃ ᐊᑖᑕᑦᓯᐊᓕᖅᑭᐅᑎᖓᑕ ᑍᕕᑎᐅᑉ ᒪᓕᑦᓯᐊᓚᐅᕐᓂᖓᑐᑦ.

⁴ ᑍᒤᒃᑲᓗᐊᕐᑎᓪᓗᒍ ᐊᑕᓂᐅᑉ ᒎᑎᐅᑉ ᑭᖑᕚᕐᑖᕐᑎᓚᐅᕐᐹ ᐃᕐᓂᕐᑖᕐᑎᓪᓗᒍᓗ ᑍᕕᑎ ᐱᑦᔪᑎᒋᓪᓗᒍ, ᐃᕐᓂᖓᓗ ᐃᓇᖐᑎᓚᐅᕐᐹ ᑖᑦᓱᒪ ᑭᖑᓂᖓᓂ, ᔨᕉᓴᓕᒻ ᐊᖓᔪᖅᑳᕐᔪᐊᖃᕐᕕᐅᖁᓪᓗᒍ.

⁵ ᑍᕕᑎ ᐊᑕᓂᐅᑉ ᓈᒻᒪᒋᔭᖓᓂᒃ ᐃᓅᓚᐅᕐᓂᖓᓄᑦ, ᕿᒤᓚᐅᕋᓂᓗ ᐊᑕᓂᐅᑉ ᐱᖁᔭᖏᓐᓂᒃ ᑕᒤᓐᓂᒃ ᐃᓅᓯᓕᒫᒥᓂ, ᑭᓯᐊᓂ ᐃᓱᐊᖏᑦᔪᑎᑐᐊᖃᓚᐅᕐᐳᖅ ᔪᕅᐊᒥᒃ ᕼᐃᑍᑎᒥᐅᑕᕐᒥᒃ.

⁶ ᕆᕼᐅᐳᐊᒻᑯᒡᓕ ᔨᕈᐳᐊᒃᑯᒃ ᐅᓇᑕᖃᑦᑕᓚᐅᕐᐴᒃ ᐊᐰᔭᐅᑉ ᐃᓅᓯᓕᒫᖓᓂ.

⁷ ᐊᐰᔭᐅᑉ ᐱᓇᓱᐊᕐᑕᕕᓂᖏᑦ ᐱᓂᐊᕐᓂᕆᓚᐅᕐᑕᖏᓪᓗ, ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ, ᐊᐰᔭᒻ ᐅᓇᑕᖃᑎᖃᖃᑦᑕᓚᐅᕐᒪᑦ ᔨᕈᐳᐊᒻᒥᒃ.

⁸ ᐊᐰᔭᒻ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᑍᕕᑎᐅᑉ ᐃᒡᓗᒐᓴᖏᓐᓂ. ᐋᓴᓗ ᐊᐰᔭᐅᑉ ᐃᕐᓂᖓ ᐃᓇᖏᐅᑎᕗᖅ ᐊᖓᔪᖅᑳᕐᔪᐊᖑᓕᕐᓗᓂ.

ᐂᓴᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥ

⁹ ᔨᕈᐳᐊᒻ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐃᓴᕆᐊᓕᒥᐅᓄᑦ ᐊᕐᕌᒍᓂᒃ 20ᓂᒃ, ᐋᓴ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᔫᑕᒧᑦ.

¹⁰ ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 41ᓂᒃ ᔨᕉᓴᓕᒥ. ᐊᓈᓇᖃᓚᐅᕐᐳᖅ ᒫᑲᒥᒃ ᐋᐱᓴᓗᒥᐅᑉ ᐸᓂᖓᓂᒃ.

¹¹ ᐋᓴ ᐃᓱᐊᕐᑐᒥᒃ ᐃᓅᓚᐅᕐᐳᖅ ᐊᑕᓂᐅᑉ ᓵᖓᓂ, ᓯᕗᓕᕐᒥᑐᑦ ᑍᕕᑎᑐᑦ.

¹² ᐊᖑᑎᓪᓗ ᐊᑐᕐᑐᐊᒊᑦ ᓄᓇᒥᓂ ᑐᒃᓯᐊᕐᕕᐅᕙᒃᑐᓂ ᓄᖅᑲᕐᑎᓚᐅᕐᐰᑦ, ᒎᑎᓐᖑᐊᓪᓗ ᐲᔭᕐᓗᒋᑦ ᓯᕗᓕᖏᑕ ᓴᓇᓚᐅᕐᑕᖏᑦ.

¹³ ᒫᑲᓗ ᐊᓈᓇᓂ ᓄᖅᑲᕐᑎᓚᐅᕐᐹ ᑯᐃᓐᖑᓂᖓᓂᑦ, ᓇᕐᕈᓇᕐᑐᒥᒃ ᐃᓄᓐᖑᐊᓕᐅᕐᓯᒪᓂᖓᓄᑦ ᐋᓯᕆᒥᒃ ᒎᑎᓐᖑᐊᒥᒃ; ᐂᓴᐅᓪᓗ ᓯᖁᒥᓚᐅᕐᐹ ᐃᓄᓐᖑᐊᖁᑎᖓ ᐃᑯᐊᓪᓚᒡᓗᒍᓗ ᑰᑉ ᑭᑐᕌᓂᐅᑉ ᓇᕐᓴᖓᓂ.

¹⁴ ᑭᓯᐊᓂᓕ ᒎᑎᓐᖑᐊᓄᑦ ᑐᒃᓯᐊᕐᕖᑦ ᑐᒃᓯᐊᕐᕕᐅᖃᑦᑕᕐᓂᕐᐹᑦ ᐲᔭᓚᐅᓐᖏᓔᑦ. ᑍᒤᒃᑲᓗᐊᕐᑎᓪᓗᒍᓕ ᐋᓴ ᐊᑕᓂᕐᒧᑦ ᑲᔪᓯᑦᓯᐊᕐᑐᒥᒃ ᐃᓅᓯᖃᓚᐅᕐᐳᖅ ᐃᓅᓯᓕᒫᒥᓂ.

¹⁵ ᐊᑕᓂᐅᑉ ᑐᒃᓯᐊᕐᕕᖓᓄᐊᕐᓯᓚᐅᕐᐳᖅ ᓯᕗᓕᖏᑕ ᒎᑎᒧᑦ ᑐᓂᕐᕈᑎᒋᓚᐅᕐᑕᖏᓐᓂᒃ, ᐃᒻᒥᓂᒡᓗ ᒎᑎᒧᑦ ᑐᓂᕐᕈᑎᒋᓯᒪᔭᒥᓂᒃ ᓯᐅᓪᕕᕆᓂᒃ ᒎᓗᓂᒡᓗ ᐴᒍᑕᕐᓂᒡᓗ.

¹⁶ ᐋᓴ ᔫᑕᐅᑉ ᐊᖓᔪᖅᑳᕐᔪᐊᖓ ᐹᓴᓗ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐅᓇᑍᓐᓇᓚᐅᕐᐴᒃ ᐃᒻᒥᖕᓄᑦ ᐃᓅᓯᓕᒫᒥᖕᓂᒃ.

¹⁷ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓ ᐹᓴ ᐅᓇᑕᕆᐊᕐᐳᖅ ᔫᑕᒧᑦ, ᕌᒪᒥᓗ ᓴᐴᓗᑕᓕᐅᕐᓗᓂ ᔫᑕᐅᑉ ᐊᖅᑯᑎᒃᓴᓕᒫᖏᑦ ᐃᑎᕋᓱᒃᑐᓄᑦ ᐊᓂᓇᓱᒃᑐᓄᓪᓗ ᓄᖅᑲᕐᑎᑦᓱᒪᓪᓗᒋᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᐊᕋᓱᒃᑐᑦ ᐋᓴᒧᑦ.

¹⁸ ᐋᓴᐅᑉ ᓯᐅᓪᕕᕇᑦ ᒎᓗᐃᓪᓗ ᑎᒍᓪᓗᒋᑦ ᐊᑕᓂᐅᑉ ᐃᒡᓗᖓᓂᑦ ᐊᖓᔪᖅᑳᕐᔪᐊᓪᓗ ᐃᒡᓗᖓᓃᑦᑐᑦ, ᐱᔨᒥᓄᑦ ᑐᓂᕔᑦ; ᐊᖓᔪᖅᑳᕐᔪᐊᓪᓗ ᐂᓴᐅᑉ ᐊᐅᓪᓚᕐᑎᑉᐰᑦ ᓯᕆᐊᑉ ᐊᖓᔪᖅᑳᕐᔪᐊᖓᓄᑦ ᐱᓐ-ᕼᐊᑖᑦᒧᑦ ᑕᐳᕆᒫᓐ ᐃᕐᓂᖓᓄᑦ, ᕼᐃᔨᐊᓐ ᐃᕐᖑᑕᖓᓄᑦ, ᑕᒫᓯᑰᓯᒥ ᓄᓇᖃᕐᑐᒧᑦ, ᐅᖃᐅᑎᓪᓗᒍᓗ,

¹⁹ “ᐊᖏᖃᑎᒌᓚᐅᕐᓗᒃ, ᐊᑖᑕᕗᒃ ᐊᖏᖃᑎᒌᒃᓯᒪᓚᐅᕐᒪᑎᒃ: ᑕᑯᒋᑦ, ᑐᓂᕙᒋᑦ ᓯᐅᓪᕕᕆᓂᒃ ᒎᓗᓂᒡᓗ; ᑕᑉᐱᕐᓱᐃᓃᑦ ᐹᓴᒥᒃ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓂᒃ ᓄᖅᑲᕐᑎᓕᕈᒃ, ᐅᓇᑕᕐᑐᒃᓴᖁᑎᖏᑦ ᓄᓇᓐᓂᒃ ᑲᒪᔪᓐᓃᖁᓪᓗᒋᑦ.”

²⁰ ᐊᖓᔪᖅᑳᕐᔪᐊᖅ ᐱᓐ-ᕼᐊᑖᑦ ᐊᖏᕐᐳᖅ ᐋᓴᐅᑉ ᐱᔪᒪᔭᖓᓂᒃ, ᐅᓇᑕᕐᑐᒃᓴᖁᑎᓂᓗ ᑎᓕᕔᑦ ᐅᓇᑕᕆᐊᖁᓪᓗᒋᑦ ᐃᓴᕆᐊᓕᒥᐅᑦ ᐃᒡᓗᒐᓴᖏᓐᓄᑦ, ᓵᓚᒋᕔᓪᓗ ᐃᔮᓐ, ᑖᓐ, ᐊᐱᐅᓪ-ᐱᑦ-ᒫᑲ, ᓯᓂᕆᑎᐅᓪᓗ ᑕᓯᖓᑕ ᖃᓂᒋᔭᖓᓃᑦᑐᑦ, ᓈᑉᑕᓕᐅᓪᓗ ᓄᓇᓕᒫᖓ.

²¹ ᐹᓴᓗ ᑕᒪᑐᒥᖓ ᑐᓴᕋᒥ ᕌᒪᒥᒃ ᓴᐴᓗᑕᓕᐅᕐᓂᕐᒥᓂᒃ ᓄᖅᑲᕐᐳᖅ, ᑎᕐᔭᒧᐊᕐᓗᓂᓗ.

²² ᐊᖓᔪᖅᑳᕐᔪᐊᕐᓗ ᐋᓴ ᑎᑎᕋᕐᓯᒪᔪᓂᒃ ᔫᑕᒥᐅᓕᒫᓄᑦ ᐊᐅᓪᓚᕐᑎᑦᓯᓚᐅᕐᐳᖅ, ᑭᓇᒃᑯᓕᒫᓄᑦ ᑐᕌᖓᔪᓂᒃ, ᐃᑲᔪᕆᐊᖁᓪᓗᒋᑦ ᕌᒪᒧᑦ ᐅᔭᕅᑦ ᐹᓴᒧᑦ ᓴᓇᔭᐅᔪᕕᓃᑦ ᓴᐴᓗᑕᓕᐅᕐᑕᐅᓇᓱᒃᓗᑎᒃ ᐲᔭᕐᑕᐅᖁᓪᓗᒋᑦ, ᑕᒪᒃᑯᓄᖓᓗ ᐅᔭᕋᖕᓄᑦ ᐊᖓᔪᖅᑳᕐᔪᐊᖅ ᐂᓴ ᓴᐴᓗᑕᓕᐅᓚᐅᕐᐳᖅ ᒋᐸᒥᒃ ᒥᔅᐸᒥᒡᓗ, ᐃᒡᓗᒐᓴᖕᓂᒃ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖓᓃᑦᑑᖕᓂᒃ.

²³ ᐋᓴᐅᓪᓕ ᐱᓂᐊᕐᓂᕆᓚᐅᕐᑕᖏᑕ ᐊᓯᖏᑦ, ᓯᕘᕋᓇᓂᓗ ᐱᔪᓐᓇᕐᓂᖓ, ᐱᓇᓱᐊᕐᓂᕕᓂᖏᓪᓗ, ᐃᒡᓗᒐᓮᓪᓗ ᐊᕙᓗᓕᐅᕐᑕᕕᓂᖏᑦ ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓂᖏᓐᓂ, ᑭᓯᐊᓂ ᐃᓄᑐᖃᐅᓕᕐᓗᓂ ᐃᑎᒐᖏᑦ ᐋᓐᓂᐊᖃᓕᓚᐅᕐᐳᑦ.

²⁴ ᐋᓴᓗ ᑐᖁᖕᒪᑦ ᐃᓗᕕᕐᑕᐅᕗᖅ ᐊᖓᔪᖅᑳᕐᔪᐊᑦ ᐃᓗᕕᕐᑕᐅᕕᖓᓐᓄᑦ ᓯᕗᓕᖓᑕ ᑍᕕᑎᐅᑉ ᐃᒡᓗᒐᓴᖏᓐᓂ; ᐃᕐᓂᖓᓗ ᔨᕼᐆᓴᐸᑦ ᐊᖓᔪᖅᑳᕐᔪᐊᓐᖑᕐᐳᖅ ᑖᑦᓱᒧᖓ ᑭᖑᕝᕕᐅᑎᓪᓗᓂ.

ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᓁᑖᑉ

²⁵ ᓁᑖᑉ ᔨᕈᐳᐊᒻ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ, ᐋᓴ ᔫᑕᒧᑦ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᑉ ᐂᑉᐸᖓᓂ; ᓁᑖᑉᓗ ᐊᖓᔪᖅᑳᖑᓚᐅᕐᐳᖅ ᐊᕐᕌᒎᖕᓂᒃ ᒪᕐᕉᖕᓂᒃ.

²⁶ ᐊᔪᕐᑐᓕᓚᐅᕐᐳᖅ ᐊᑕᓂᐅᑉ ᓵᖓᓂ, ᐃᓅᓯᖃᕐᓗᓂᓗ ᐊᑖᑕᖓᑕ ᐃᓅᓚᐅᕐᓂᖓᑐᑦ, ᐊᔪᕐᑐᓕᓂᕐᒥᓄᓪᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ.

²⁷ ᐹᓴ ᐊᕼᐂᔭᐅᑉ ᐃᕐᓂᖓ ᐃᓴᑳᕆᐅᑉ ᑭᖑᕚᖓ, ᐊᑭᕋᕐᑐᓕᕐᐳᖅ ᓁᑖᑉᒥᒃ; ᐹᓴᐅᓪᓗ ᑖᓐᓇ ᑐᖁᑉᐹ ᒋᐱᑖᓐᒥ, ᐱᓕᔅᑍᓂᒥᐅᑦ ᓄᓇᖓᓂ; ᓁᑖᑉᑯᑦ ᐃᓴᕆᐊᓕᒥᐅᓕᒫᓪᓗ ᐅᓇᑕᕆᐊᕐᓯᒪᑎᓪᓗᒋᑦ ᒋᐱᑖᓐᒧᑦ.

²⁸ ᐹᓴᐅᓪᓗ ᑐᖁᓚᐅᕐᐹ ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥ ᐊᕐᕌᒍᓂᒃ ᐱᖓᓱᓂᒃ, ᐊᖓᔪᖅᑳᕐᔪᐊᓐᖑᓚᐅᕐᐳᕐᓗ ᓁᑖᑉᒥᒃ ᐃᓇᖐᓪᓗᓂ.

²⁹ ᐊᖓᔪᖅᑳᕐᔪᐊᓐᖑᕋᒥᓗ ᑐᖁᕅᓚᐅᕐᐳᖅ ᔨᕈᐳᐊᒻ ᐃᓚᓕᒫᖏᓐᓂᒃ; ᓄᖅᑲᓚᐅᓐᖏᓚᖅ ᑐᖁᕅᓪᓗᓂ ᔨᕈᐳᐊᒻ ᐃᓚᓕᒫᖏᓐᓂᒃ ᐊᓂᕐᑎᕆᔪᓕᒫᑦ ᓄᖑᓚᐅᖏᓐᓂᖏᓐᓂ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ ᐅᖃᐅᓯᕆᓚᐅᕐᑕᖏᑦ ᐅᖃᕐᑎᒥᒍᑦ ᐊᕼᐂᔭᒃᑯᑦ ᓮᓗᓁᑎᒥᐅᑕᒃᑯᑦ.

³⁰ ᔨᕈᐳᐊᒻ ᐊᔪᕐᑐᓕᓂᕐᒥᓄᑦ ᐊᔪᕐᑐᓕᑎᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ, ᓂᖓᒃᓮᓂᕐᒥᓄᑦ ᓂᓐᖓᒃᑎᑦᓯᓚᐅᕐᐳᖅ ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓐᓂᒃ.

³¹ ᓁᑖᑉᓕ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐱᓇᓱᐊᕐᓂᕆᓚᐅᕐᑕᖏᓪᓗ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓂᖏᓐᓂ.

³² ᐋᓴ ᔫᑕᐅᑉ ᐊᖓᔪᖅᑳᕐᔪᐊᖓ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᐹᓴ ᐃᒻᒥᖕᓄᑦ ᐅᓇᑕᖃᑦᑕᐅᑏᓐᓇᓚᐅᕐᐴᒃ ᐃᓅᓯᓕᒫᒥᖕᓂ.

ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐹᓴ

³³ ᐋᓴ ᐊᕐᕌᒍᑦ ᐱᖓᔪᐊᓐᓂ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥᐅᓄᑦ, ᐹᓴ ᐊᕼᐂᔭᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᒥᐅᓕᒫᓄᑦ ᑎᕐᔭᒥ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 24ᓂᒃ.

³⁴ ᐊᔪᕐᑐᓕᓚᐅᕐᐳᕐᑕᐅᖅ ᐊᑕᓂᐅᑉ ᓵᖓᓂ, ᐊᑖᑕᒥᑐᑦ ᔨᕈᐳᐊᒻᑐᑦ ᐃᓅᓯᖃᓚᐅᕐᐳᖅ, ᐊᔪᕐᑐᓕᓂᕐᒥᓄᓪᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ.