ᐊᑕᓃᑦ ᓯᕗᓪᓖᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᑯᒋᓪᓗ, ᒎᑎᐅᑉ ᐃᓄᖁᑎᖓ ᑎᑭᓚᐅᕐᐳᖅ ᐱᑎᓕᒧᑦ ᔫᑕᒥᑦ ᐊᑕᓂᐅᑉ ᐅᖃᐅᓯᖓᓂᒃ ᐅᖃᕆᐊᕐᑐᕐᓗᓂ. ᔨᕈᐳᐊᒻ ᓇᖏᓕᕐᑎᓪᓗᒍ ᑐᓂᕐᕈᓯᕐᕕᐅᑉ ᓵᖓᓂ ᐃᑯᐊᓚᑎᑦᓯᓗᓂ ᐃᓯᕐᓗᐊᕐᓂᑎᑦᓯᓂᐊᓕᕐᑎᓪᓗᒍ.

² ᐊᖑᑦ ᑖᓐᓇ ᐅᖃᐅᑦᔨᕗᖅ ᑐᓂᕐᕈᓯᕐᕕᖕᒥᒃ ᐊᑕᓂᐅᑉ ᐅᖃᐅᓯᐅᖁᔭᖓᓂᒃ ᐅᖃᕐᓗᓂ, “ᐆ ᑐᓂᕐᕈᓯᕐᕕᒃ, ᑐᓂᕐᕈᓯᕐᕕᒃ, ᐊᑕᓂᖅ ᐃᒫᒃ ᐅᖃᕐᐳᖅ: ᑕᑯᒋᑦ, ᐃᕐᓂᖅ ᐃᕐᓂᐊᖑᔪᒫᕐᐳᖅ ᑍᕕᑎᐅᑉ ᑭᖑᕚᖓ, ᔫᓮᐊᒥᒃ ᐊᑎᖃᕈᒫᕐᐳᖅ; ᑖᓐᓇ ᑐᓂᕐᕈᓯᕈᒫᕐᐳᖅ ᑕᕝᕙᓂ ᑐᓂᕐᕈᓯᕐᕕᖕᒥ ᑐᓂᕐᕈᓯᕐᑎᐅᔪᓂᒃ ᑕᕝᕙᓂ ᐃᓯᕐᓗᐊᕐᓂᑎᑦᓯᖃᑦᑕᕐᑐᓂᒃ, ᐃᓄᐃᓪᓗ ᓴᐅᓂᖏᓐᓂᒃ ᐃᑯᐊᓚᑦᓯᔪᒫᕐᐳᖅ ᑕᕝᕙᓂ.”

³ ᓇᓗᓁᒃᑯᑕᕐᒥᒃ ᐊᑐᓛᕐᑐᒥᒃ ᐅᓪᓗᖅ ᓇᓪᓕᐊᑎᒃᐸᑦ ᐅᖃᕐᓗᓂ, “ᐅᓇ ᑕᕝᕙ ᓇᓗᓁᒃᑯᑕᐅᓛᕐᑐᖅ ᐊᑕᓂᐅᑉ ᐅᖃᕐᓂᖓᓄᑦ: ‘ᑕᑯᒋᑦ, ᑐᓂᕐᕈᓯᕐᕕᒃ ᓯᖁᒥᑕᐅᔪᒫᕐᐳᖅ, ᐊᕐᔭᓕᓃᓪᓗ ᐃᓗᐊᓃᑦᑐᑦ ᓈᕕᓪᓗᑎᒃ ᒪᓂᖅᑲᒧᑦ.’”

⁴ ᐊᖓᔪᖅᑳᕐᔪᐊᑉ ᔨᕈᐳᐊᒻ ᑕᒪᓐᓇ ᑐᓴᕋᒥᐅᒃ ᒎᑎᐅᑉ ᐃᓄᖁᑎᖓᓂᑦ, ᑐᓂᕐᕈᓯᕐᕕᖕᒥᒃ ᐱᑎᓕᒥᒃ ᐊᑭᕋᕐᑐᕐᑎᓪᓗᒍ, ᑎᒃᑯᐊᕐᓗᓂᐅᒃ ᐅᖃᕐᐳᖅ, “ᐊᖑᑦ ᑖᓐᓇ ᑎᒍᔭᐅᓕ.” ᑕᕝᕔᓐᓇᖅ ᔨᕈᐳᐊᒻ ᑕᓕᖓ ᑎᒃᑯᐊᕐᑐᕐᓗᓂ ᓱᓕ ᐊᔪᓕᕐᐳᖅ, ᐅᑎᕐᑎᑦᑐᓐᓁᓪᓕᓪᓗᓂᐅᒃ.

⁵ ᑐᓂᕐᕈᓯᕐᕕᒃᑕᐅᖅ ᓯᖁᒥᑉᐳᖅ, ᐊᕐᔭᓕᓂᖏᓪᓗ ᑲᑕᒃᐳᖅ ᓄᓇᒧᑦ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᓇᓗᓁᒃᑯᑕᐅᓂᐊᕐᓂᕋᕐᓯᒪᔭᖓ ᒪᓕᒡᓗᒍ ᐊᑕᓂᐅᑉ ᐅᖃᐅᓯᖓᓂᑦ.

⁶ ᐊᖓᔪᖅᑳᕐᔪᐊᖅ ᔨᕈᐳᐊᒻ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐅᖃᕐᐳᖅ, “ᑐᒃᓯᐊᓚᐅᕆᑦ ᐊᑕᓂᕐᒧᑦ ᒎᑎᖕᓄᑦ ᑕᓕᕋ ᐅᑎᕐᑎᑕᐅᖁᓗᒍ!” ᑕᕝᕙ ᒎᑎᐅᑉ ᐅᖃᑎᖓ ᐊᑕᓂᕐᒧᑦ ᑐᒃᓯᐊᕐᐳᖅ, ᐊᖓᔪᖅᑳᕐᔪᐊᓪᓗ ᑕᓕᖓ ᐋᖅᑭᒃᑕᐅᕗᖅ.

⁷ ᑕᕝᕙ ᐊᖓᔪᖅᑳᕐᔪᐊᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐅᖃᕐᐳᖅ, “ᐊᖏᕐᕋᖃᑎᒋᓕᓐᖓ ᓂᕆᔭᕐᑐᕐᓗᑎᓪᓗ, ᑕᕝᕙ ᐊᑭᓕᕐᓂᐊᕐᐸᒋᑦ.”

⁸ ᒎᑎᐅᓪᓗ ᐅᖃᕐᑎᖓ ᐊᖓᔪᖅᑳᕐᔪᐊᕐᒧᑦ ᐅᖃᕐᐳᖅ, “ᐊᖓᔪᖅᑳᕐᔪᐊᖃᕐᕕᒃᐱᑦ ᓇᑉᐸᖓᓂᒃ ᑐᓂᓂᐊᕋᓗᐊᕈᕕᖓ, ᐱᖃᑎᒋᓂᐊᓐᖏᓚᒋᑦ, ᑕᕝᕙᓂᓗ ᓂᕆᓂᐊᓐᖏᓚᖓ ᐃᒥᕐᓂᐊᕐᓇᖓᓘᓐᓃᑦ.

⁹ ᐱᖁᔭᐅᓯᒪᒐᒪ ᐊᑕᓂᐅᑉ ᐅᖃᐅᓯᖓᒍᑦ, ᐅᖃᓚᐅᕐᒪᑦ, ‘ᓂᕆᓂᐊᓐᖏᓚᑎᑦ ᐃᒥᕐᓂᐊᕐᓇᒡᓘᓐᓃᑦ, ᑎᑭᕝᕕᒋᓚᐅᕐᑕᒃᑯᑦ ᐅᑎᕐᓂᐊᕐᓇᒡᓘᓐᓃᑦ.’”

¹⁰ ᑍᒤᒻᒪᑦ ᐊᖅᑯᑎᒋᖅᑲᐅᔭᒥ ᐊᓯᐊᒎᓕᓚᐅᕐᐳᖅ, ᐅᑎᕋᓂᓗ ᑎᑭᕝᕕᒋᖅᑲᐅᔭᒥᒍᑦ ᐱᑎᓕᒧᑦ.

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓ ᐱᑎᓕᒥᐅᑕᖅ

¹¹ ᑍᑦᓱᒪᓂᐅᑎᓪᓗᒍ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᓂᒃ ᑕᕝᕙᓃᑦᑐᖃᓚᐅᕐᐳᖅ ᐱᑎᓕᒥ, ᐃᕐᓂᖏᑦ ᑖᑦᓱᒧᓐᖓᕐᐳᑦ ᐅᓂᒃᑳᕐᓗᑎᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐱᐅᓯᕆᔭᖓᓂᒃ ᔫᑎᐊᒥᑦ ᐱᓯᒪᔫᑉ, ᐅᓪᓗᒥ ᑕᕝᕙᓂ ᐱᐅᓯᕆᔭᖓᓂᒃ ᐱᑎᓕᒥ ᐅᖃᕐᓂᖓᓂᒡᓗ ᐊᖓᔪᖅᑳᕐᔪᐊᕐᒧᑦ ᔨᕈᐳᐊᒻᒧᑦ.

¹² ᑖᓐᓇ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓ ᐊᐱᕆᕗᖅ, “ᓇᐅᒃᑰᕐᓗᓂ ᐊᐅᓪᓚᕐᒪᑦ?” ᐃᕐᓂᖏᒃᑕ ᑎᒃᑯᐊᕐᑑᑎᕚᑦ ᓇᐅᒃᑯᑦ ᐊᐅᓪᓚᕐᓂᕐᒪᖔᑦ ᐊᖅᑯᑎᒋᔭᖓᓂᒃ ᖃᐅᔨᑎᓪᓗᒍ.

¹³ ᑎᓕᓯᕗᕐᓗ ᓯᐅᑎᖅᑯᕐᑐᔪᖁᑎᖓᑕ ᐃᑭᒪᕕᖓ ᐃᓕᔭᐅᖁᓪᓗᓂᐅᒃ, ᐱᔭᕇᕐᒪᑕ ᐃᑭᒐᒥ ᐊᐅᓪᓚᕐᐳᖅ.

¹⁴ ᒪᓕᓕᕐᓗᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᔫᑕᒥᑦ ᐱᓯᒪᔪᒥᒃ, ᐊᖑᒐᒥᐅᒡᓗ ᓇᐹᕐᑑᑉ ᐆᒃ ᐊᑖᓃᑦᑐᖅ ᐊᐱᕆᕚ, “ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᒋᕚᑏᑦ ᔫᑕᒥᐅᑕᖅ?” ᑖᑦᓱᒪ ᑭᐅᕚ, “ᑖᓐᓇᐅᕗᖓ.”

¹⁵ ᑕᕝᕙ ᐅᖃᐅᑎᕚ, “ᐊᖏᕐᕋᐅᖃᑎᒋᓚᐅᓐᖓ ᓂᕆᖃᑎᒋᓂᐊᕋᒃᑭᑦ.”

¹⁶ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᔫᑕᒥᐅᑕᐅᑦ ᑭᐅᕚ, “ᐊᖏᕐᕋᐅᖃᑎᒋᔪᓐᓇᓐᖏᓚᒋᑦ, ᐊᒡᓛᑦ ᐱᖃᑎᒋᔪᓐᓇᕐᓇᒡᓘᓐᓃᑦ ᓂᕆᖁᔭᐅᖏᓐᓇᒪ ᐃᒥᖁᔭᐅᓇᖓᓘᓐᓃᑦ ᑕᒫᓂ.

¹⁷ ᐊᑕᓂᐅᑉ ᐅᖃᐅᑎᓯᒪᖕᒪᖓ, ‘ᓂᕆᓂᐊᓐᖏᓚᑎᑦ ᐃᒥᕐᒥᒡᓘᓐᓃᑦ ᐃᒥᕐᓂᐊᕐᓇᒃ ᑕᒫᓂ, ᑎᑭᕝᕕᒋᔭᒃᑯᓪᓗ ᐅᑎᕐᓂᐊᕐᓇᒃ.’”

¹⁸ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓ ᐱᑦᑎᓕᒥᐅᑕᖅ ᐅᖃᓕᕐᐳᖅ ᑖᑦᓱᒧᖓ, “ᐅᕙᖓᑦᑕᐅᖅ ᒎᑎᒧᑦ ᐅᖃᕐᑎᒋᔭᐅᕗᖓ ᐃᕝᕕᑎᑐᑦ, ᐊᑕᓂᖅ ᑎᓕᓯᓯᒪᕗᖅ ᐂᖏᓕᒥᒃ ᐅᖃᐅᑎᔭᐅᖁᓪᓗᑎᑦ ᐊᖏᕐᕋᐅᖃᑎᒋᔭᕆᐊᖃᕋᒃᑭᑦ ᓂᕆᓗᑎᑦ ᐃᒥᕈᓐᓇᖁᓪᓗᑎᑦ.” ᑭᓯᐊᓂ ᑖᓐᓇ ᓴᒡᓗᓪᓗᓂ ᑍᒫᒃ ᐅᖃᕐᐳᖅ.

¹⁹ ᑍᒤᒻᒪᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᔫᑕᒥᐅᑕᖅ ᑖᑦᓱᒪ ᐊᖏᕐᕋᖓᓄᑦ ᒪᓕᒃᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖄᖓᓄᑦ, ᓂᕆᖃᑎᒋᓪᓗᒍᓗ.

²⁰ ᐃᒃᓯᕙᓕᕐᑎᓪᓗᒋᒃ ᓂᕆᕕᖕᒥ, ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖄᖓᓄᑦ ᑕᕝᕗᓐᖓᐅᑦᔨᖅᑲᐅᔪᒧᑦ;

²¹ ᓂᐱᖅᑯᕐᑐᓪᓗᓂ ᐅᖃᕐᐳᖅ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᔫᑕᒥᑦ ᐱᓯᒪᔪᒧᑦ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᓈᓚᖏᓐᓇᕕᐅᒃ ᐊᑕᓂᐅᑉ ᐅᖃᐅᓯᖓ, ᐱᖁᓯᒪᔭᖓᓗ ᒪᓕᖕᓇᒍ ᐊᑕᓂᐅᑉ ᒎᑎᕕᑦ ᐱᖁᔨᑦᔪᑎᒋᓚᐅᕐᑕᖓ ᐃᓕᖕᓄᑦ,

²² ᑕᒪᐅᖓ ᐅᑎᕐᓯᒪᒐᕕᑦ, ᓂᕆᓪᓗᑎᓪᓗ ᐃᒥᕐᓯᒪᒐᕕᑦ ᐃᓂᕐᑎᕐᑕᐅᑦᔪᑎᒋᓚᐅᕐᑕᕐᓂᒃ, “ᓂᕆᑦᑍᓕᒋᑦ, ᐃᒥᕐᓂᐊᕐᓇᒡᓗ”; ᑕᒪᓐᓇ ᐱᓪᓗᒍ ᑐᖁᓂᐊᕐᐳᑎᑦ, ᑎᒦᓪᓗ ᐃᓕᔭᐅᓂᐊᓐᖏᓚᖅ ᐃᓚᒋᔭᕕᑦ ᐃᓗᕕᕐᕕᖏᓐᓄᑦ.’”

²³ ᓂᕆᔭᕇᕋᒥᒃ, ᑖᑦᓱᒪ ᐃᑑᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᑕ ᓯᐅᑎᖅᑯᕐᑐᔫᑉ ᐃᑭᒪᕕᖓ ᐃᓕᔭᕇᕐᒪᒍ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᔫᑕᒥᐅᑕᐅᑉ ᐃᑭᕕᒋᕚ,

²⁴ ᑖᓐᓇᓗ ᐊᐅᓪᓚᕐᐳᖅ, ᐃᖏᕐᕋᓕᕐᑎᓪᓗᒍ ᐊᖅᑯᒻᒥ ᓛᔭᒧᑦ ᑎᑭᑕᐅᒐᒥ ᑐᖁᑕᐅᕗᖅ. ᑎᒥᖓᓗ ᐊᖅᑯᒻᒧᑦ ᑲᑕᒃᓗᓂ, ᓯᐅᑎᖅᑯᕐᑐᔪᖅ ᓛᔭᓗ ᑖᑦᓱᒪ ᑎᒥᐊᑕ ᓴᓂᐊᓃᑐᐃᓐᓇᓕᕐᐴᒃ.

²⁵ ᑕᑯᒋᓪᓗ, ᐊᖑᑎᓄᑦ ᐊᖅᑯᑎᒃᑰᕐᑐᓄᑦ ᑎᒥᐊ ᑕᑯᔭᐅᕗᖅ ᐊᖅᑯᒻᒦᑦᑐᖅ, ᓛᔭᓗ ᑕᑯᔭᐅᓪᓗᓂ ᑎᒥᖓᑕ ᖃᓂᒋᔮᓃᑦᑐᖅ, ᐱᑦᑎᓕᒧᑦ ᑎᑭᓐᓇᒥᒃ ᑕᒪᓐᓇ ᐅᓂᒃᑲᐅᑎᒋᕚᑦ ᑕᑯᔭᕕᓂᕐᑎᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᑕ ᓇᔪᕐᑕᖓᓄᑦ.

²⁶ ᑖᑦᓱᒪ ᐃᑑᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᑕ ᑕᒪᓐᓇ ᑐᓴᕋᒥᐅᒃ, ᐅᖃᕐᐳᖅ, “ᑍᓐᓇᐅᕗᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᔫᑕᒥᑦ ᐱᓯᒪᔪᖅ, ᓈᓚᓚᐅᖏᑦᑐᖅ ᐊᑕᓂᐅᑉ ᐅᖃᐅᓯᕆᓚᐅᕐᑕᖓᓂᒃ; ᑍᒤᒻᒪᑦ ᐊᑕᓂᖅ ᑎᓕᓯᓚᐅᕐᐳᖅ ᓛᔭᒥᒃ ᐅᒋᐊᕐᑕᐅᖁᓪᓗᓂᐅᒃ, ᑕᒪᓐᓇ ᐊᑕᓂᐅᑉ ᐅᖃᐅᓯᕆᓚᐅᕐᑕᓂ ᑲᔪᓯᑎᑕᖓ.”

²⁷ ᐃᕐᓂᕐᒥᓄᑦ ᐅᖃᕐᐳᖅ, “ᓯᐅᑎᖅᑯᕐᑐᔪᖁᑎᒪ ᐃᑭᒪᕕᖓ ᐃᓕᓚᐅᕐᓯᐅᒃ.” ᑕᕝᕙ ᐊᑐᐃᓐᓇᕈᕐᐹᑦ,

²⁸ ᐊᐅᓪᓚᕋᒥᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑎᒥᖓ ᓇᓂᕚ ᐊᖅᑯᒻᒦᑦᑐᖅ, ᓯᐅᑎᖅᑯᕐᑐᔪᕐᓗ ᓛᔭᓗ ᓱᓕ ᑎᒥᖓᑕ ᓴᓂᐊᓃᑦᑑᒃ. ᓛᔭᓕ ᑖᑦᓱᒪ ᑎᒥᖓᓂᒃ ᓂᕆᓚᐅᓐᖏᓚᖅ ᓯᐅᑎᖁᕐᑐᔪᒥᒡᓘᓐᓃᑦ ᐱᒋᐊᓚᐅᕋᓂ.

²⁹ ᑕᕝᕙ ᐃᑦᑑᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᒎᑎᐅᑉ ᐃᓄᖁᑎᖓᑕ ᑎᒥᖓ ᓯᐅᑎᖅᑯᕐᑐᔫᑉ ᖃᖓᓄᐊᕋᒥᐅᒃ, ᐅᑎᐅᑎᕚ ᐱᑦᑎᓕᒧᑦ ᐃᒡᓗᒐᓴᖕᓄᑦ, ᕿᐊᑦᔪᑎᒋᓪᓗᒍᓗ ᐃᓗᕕᕆᐊᕐᑐᕐᐹ.

³⁰ ᐃᓕᕚᓗ ᓇᖕᒥᓂᖅ ᐃᓚᖏᑕ ᐃᓗᕕᕐᕕᖏᓐᓄᑦ; ᐃᕐᓂᖏᑦᑕᐅᖅ ᕿᐊᑦᔪᑎᖃᕆᕗᑦ ᑖᑦᓱᒥᖓ, ᐅᖃᕐᓗᑎᒃ, “ᖃᑕᓐᖑᑏᒃ ᖃᑕᓐᖑᑏᒃ!”

³¹ ᐃᓗᕕᕐᑕᐅᔭᕇᕐᓯᒪᓕᕐᑎᓪᓗᒍ, ᑖᓐᓇ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐃᕐᓂᕐᒥᓄᑦ ᐅᖃᕐᐳᖅ, “ᑐᖁᒍᒪ ᑕᕝᕗᖓ ᐃᓗᕕᕐᒧᑦ ᐃᓕᔭᐅᓛᕐᐳᖓ ᑎᒥᒐ ᒎᑎᐅᑉ ᐃᓄᖁᑎᖓᑕ ᓴᓂᐊᓄᐊᕐᓗᒍ; ᓴᐅᓂᒃᑲ ᓴᐅᓂᖓᑕ ᓴᓂᐊᓃᖁᓪᓗᒋᑦ.

³² ᑖᑦᓱᒪ ᐅᖃᐅᓰᑦ ᐅᖃᐅᓯᕆᓚᐅᕐᑕᖏᑦ ᐊᑕᓂᐅᑉ ᓈᒻᒪᒃᓴᖏᓐᓂᖏᑦ ᐱᑎᓕᒥ ᑐᓂᕐᕈᓯᕐᕕᖕᒥᒃ, ᐊᓯᓕᒫᖏᓐᓂᒡᓗ ᑐᒃᓯᐊᕐᕕᐅᕙᒃᑐᓂᒃ ᓴᒥᕆᐊᑉ ᐃᒡᓗᒐᓴᖏᓐᓂ, ᑕᒪᒃᑯᐊ ᓱᓕᔪᒥᒃ ᓇᓚᐅᑦᓯᓪᓚᕆᖕᓂᐊᕐᐳᑦ.”

ᔨᕈᐳᐊᒻ ᐊᖏᔪᒥᒃ ᐊᔪᕐᑐᓕᓂᖓ

³³ ᑕᒪᑐᒪ ᑭᖑᕐᖓᒍᑦ ᔨᕈᐳᐊᒻ ᕿᒤᓚᐅᓐᖏᓚᖅ ᐊᔪᕐᑐᓕᓂᕐᒥᓂᒃ, ᓱᓕᓕ ᑐᓂᕐᕈᓯᕐᑎᑦᓯᔨᓐᖑᕐᑎᑦᓯᖃᑦᑕᓚᐅᕐᐳᖅ ᐃᓄᑐᐃᓐᓇᕐᓂᒃ ᑐᓂᕐᕈᓯᕐᕕᓕᐊᕆᓚᐅᕐᑕᒥᓄᑦ, ᐱᔪᒪᔪᑐᐃᓐᓇᒥᒃ ᑐᓂᕐᕈᓯᕐᑎᑦᓯᔨᓐᖑᕐᑎᑦᓯᖃᑦᑕᓚᐅᕐᐳᖅ ᑐᒃᓯᐊᕐᕕᓕᐊᕆᓯᒪᔭᒥᓄᑦ.

³⁴ ᑕᒪᓐᓇᓗ ᔨᕈᐳᐊᒻ ᐃᒡᓗᒥᐅᖃᑎᖏᓐᓄᑦ ᐊᔪᕐᑐᓕᓂᓐᖑᓚᐅᕐᐳᖅ, ᑐᖁᑕᐅᑦᔪᑎᒋᓚᐅᕐᐹᓗ ᐊᓯᕈᕐᑕᐅᑦᔪᑎᒋᓪᓗᒍᓗ ᑕᒫᓂ ᓄᓇᕐᔪᐊᕐᒥ.