ᐊᑕᓃᑦ ᓯᕗᓪᓖᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓐᓄᐊᓪᓗᐊᑉ ᓇᓛᓃᑦᑐᑦ ᑭᖑᕚᕇᑦ ᐊᑭᓂᐊᕐᓂᖓᑦ

¹ ᕆᕼᐅᐳᐊᒻ ᓯᑭᒻᒧᐊᕐᐳᖅ, ᐃᓄᓕᒫᑦ ᐃᓴᕆᐊᓕᒥᐅᑦ ᓯᑭᒻᒧᐊᕆᕗᑦ ᑖᑦᓱᒥᖓ ᐊᖓᔪᖅᑳᕐᔪᐊᓐᖑᕐᑎᑦᓯᔭᕐᑐᕐᓗᑎᒃ.

² ᔨᕈᐳᐊᒻ ᓂᐹᑎᐅᑉ ᐃᕐᓂᖓ ᑐᓴᕋᒥ ᑕᒪᑐᒥᖓ ᐄᑦᔨᑉᑎᒦᓪᓗᓂ ᓱᓕ, ᕿᒫᓯᒪᓚᐅᕋᒥ ᐊᖓᔪᖅᑳᕐᔪᐊᕐᒥᑦ ᓲᓗᒨᓂᒥᑦ, ᑕᕝᕙ ᔨᕈᐳᐊᒻ ᐅᑎᕐᐳᖅ ᐄᑦᔨᑉᑎᒥᑦ.

³ ᐃᓄᐃᑦ ᑎᓕᓯᕗᑦ ᑎᑭᖁᓪᓗᒍ; ᑕᕝᕙ ᔨᕈᐳᐊᒻ ᐃᓄᓕᒫᓪᓗ ᑲᑎᓪᓗᑎᒃ ᕆᕼᐅᐳᐊᒧᐊᕐᐳᑦ ᐅᖃᐅᑎᓪᓗᒍᓗ,

⁴ “ᐊᑖᑕᕕᑦ ᓲᓗᒨᓂᐅᑉ ᐊᒃᓱᕈᕐᓇᕐᑐᓂᒃ ᐱᓇᓱᐊᕐᑎᓚᐅᕐᐹᑎᒍᑦ. ᒫᓐᓇ ᑍᒤᒻᒪᑦ ᐅᖁᒤᑦᑐᑦ ᐊᒃᓱᕈᕈᑎᒋᓗᐊᕐᓯᒪᔭᕗᑦ ᐊᒃᓱᕈᕐᓇᓗᐊᕈᓐᓃᕐᑎᒃᑯᕕᒋᑦ, ᑕᕝᕙ ᐃᓕᖕᓂᒃ ᐱᔨᑦᓯᕐᓂᐊᕐᐳᒍᑦ.”

⁵ ᑖᑦᓱᒪ ᐅᖃᐅᑎᕔᑦ, “ᐊᖏᕐᕋᕆᑦᓯ ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᐅᑎᓛᕆᕗᓯ.” ᑕᕝᕙ ᐃᓄᐃᑦ ᐊᖏᕐᕋᕐᐳᑦ.

⁶ ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᐊᐱᕐᓱᕐᐳᖅ ᐃᓄᑐᖃᐅᓂᕐᓴᐅᔪᓂᒃ ᐊᑖᑕᒥ ᓲᓗᒨᓂᐅᑉ ᐃᓱᒪᓕᐅᕐᑎᕕᓂᖏᓐᓂᒃ, ᐅᖃᕐᓗᓂ, “ᖃᓄᖅ ᐃᓱᒪᕕᓯ ᐃᓄᐃᑦ ᐅᖃᐅᑎᒐᔭᕈᒃᑭᑦ?”

⁷ ᑖᒃᑯᐊ ᑖᑦᓱᒧᖓ ᑭᐅᕗᑦ, “ᐃᓄᐃᑦ ᑖᒃᑯᐊ ᐱᔨᑦᓯᑦᓯᐊᕈᒪᒍᕕᒋᑦ ᑭᐅᑦᓯᐊᕐᓗᒋᓪᓗ ᕿᓄᐊᕆᔭᖏᓐᓂᒃ, ᑍᒤᒃᑯᕕᑦ ᐃᓕᖕᓄᑦ ᐱᔨᑦᓯᑦᓯᐊᕐᓂᐊᕐᐳᑦ ᐃᓱᖃᖏᑦᑐᒧᑦ.”

⁸ ᑭᓯᐊᓂ ᓈᓚᒍᒪᓚᐅᓐᖏᓚᖅ ᐊᖓᔪᒃᓯᐅᔪᑦ ᐅᖃᐅᓯᕆᔭᖏᓐᓂᒃ, ᐃᓅᓱᖕᓂᕐᓴᓅᖓᕐᓗᓂ ᐱᕈᕐᓴᖃᑎᒋᓚᐅᕐᑕᒥᓂᒃ ᐃᓱᒪᓕᐅᕐᑎᖃᖔᕈᒪᓚᐅᕐᐳᖅ.

⁹ ᑖᒃᑯᓄᖓ ᐊᐱᕆᒋᕔᑦ, “ᖃᓄᕐᓕ ᐃᓱᒪᕕᓯ? ᐃᓄᐃᑦ ᐅᖃᐅᑎᒐᔭᕈᒃᑭᑦ ᐅᕙᓐᓄᑦ ᐅᖃᓚᐅᕐᑐᑦ, ‘ᐊᑖᑕᕕᑦ ᐅᖁᒤᒃᓴᕐᑎᑦᓯᑦᔪᑎᒋᓚᐅᕐᑕᖏᑦ ᐅᕿᒡᓕᒋᐊᕐᑎᓚᐅᒃᑭᑦ’?”

¹⁰ ᑖᒃᑯᐊ ᐃᓅᓱᒃᑐᑦ ᐱᕈᕐᓴᖃᑎᕕᓂᖏᑕ ᐅᖃᐅᑎᕚᑦ, “ᐃᓄᐃᑦ ᑖᒃᑯᐊ ᐅᖃᐅᑎᔭᕆᐊᖃᕐᐸᑎᑦ ᐃᓕᖕᓄᑦ ᐅᖃᓚᐅᕐᑐᑦ: ‘ᐊᑖᑕᕕᑦ ᐅᖁᒤᒃᓴᕐᑎᓚᐅᕐᒪᑎᒍᑦ ᐱᓇᓱᐊᒐᒃᓴᑦᑎᓐᓂᒃ, ᑕᒪᓐᓇ ᐅᕿᒡᓕᒋᐊᕐᑎᑦᓱᓐᓇᕐᐱᐅᒃ ᐅᕙᑦᑎᓐᓄᑦ?’; ᑖᒃᑯᐊ ᐅᖃᐅᑎᔭᒃᓴᕆᕙᑎᑦ, ‘ᐃᕿᖅᑯᕋ ᓯᓕᖕᓂᕐᓴᐅᓂᐊᕐᐳᖅ ᐊᑖᑕᒪ ᖁᒃᑐᕋᖓᓂᑦ!

¹¹ ᒫᓐᓇᓕ, ᐊᑖᑕᒪ ᐅᖁᒤᒃᓴᕐᑎᓚᐅᕐᒪᓯ ᐊᒡᔭᕋᒃᓴᑦᓯᓐᓂᒃ, ᐅᕙᖓᓕ ᐅᖁᒤᓕᑎᒃᑲᓐᓂᕐᓂᐊᕐᐸᒃᑲ. ᐊᑖᑕᒪ ᐋᖅᑭᒋᐊᖃᑦᑕᓚᐅᕐᐹᓯ ᐃᐱᕋᐅᑕᕐᒧᑦ, ᐅᕙᖓᓕ ᐋᖅᑭᒋᐊᖃᑦᑕᕐᓂᐊᕐᐸᑦᓯ ᓯᑯᕐᐱᐅᓂᓄᑦ ᑲᐴᑎᓕᖕᓄᑦ!’”

¹² ᐅᓪᓗᐃᑦ ᐱᖓᓱᑦ ᐊᓂᒍᕐᒪᑕ ᔨᕈᐳᐊᒻ ᐃᓄᓕᒫᓂᒃ ᐃᓚᖃᕐᓗᓂ ᐊᖓᔪᖅᑳᕐᔪᐊᕐᒧᑦ ᕆᕼᐅᐳᐊᒧᐊᕐᐳᑦ, ᐊᖓᔪᖅᑳᕐᔪᐊᖅ ᐅᖃᓚᐅᕐᒪᑦ, “ᐅᓪᓗᑦ ᐱᖓᓱᑦ ᐊᓂᒍᕐᐸᑕ ᕾᓛᕆᕗᓯ.”

¹³ ᐊᖓᔪᖅᑳᕐᔪᐊᑉ ᐃᓄᐃᑦ ᐅᖃᕐᕕᒋᕔᑦ ᐋᓐᓂᕐᓇᕐᑐᐊᓗᖕᓂᒃ, ᐃᓄᑐᖃᐅᓂᕐᓴᐅᔪᑦ ᐃᓱᒪᓕᐅᕈᑎᒋᓯᒪᔭᖏᑦ ᑲᒪᒋᓇᒋᑦ,

¹⁴ ᐅᖃᕐᕕᒋᕔᑦ ᐃᓅᓱᖕᓂᕐᓮᑦ ᐃᓱᒪᓕᐅᕈᑎᖏᑦ ᒪᓕᒡᓗᒋᑦ ᐅᖃᕐᓗᓂ, “ᐊᑖᑕᒪ ᐊᒡᔭᒐᒃᓴᑦᓯᓐᓂᒃ ᐅᖁᒤᒃᓴᕐᑎᓚᐅᕐᐹᓯ, ᐅᕙᖓᓕ ᐅᖁᒤᒃᓴᕈᑎᓯ ᐃᓚᒃᑲᓐᓂᕐᓂᐊᕐᐸᒃᑲ; ᐊᑖᑕᒪ ᐋᖅᑭᒋᐊᖃᑦᑕᓚᐅᕐᐹᓯ ᐃᐸᕋᕐᑐᕐᓗᓯ; ᐅᕙᖓᓕ ᐋᖅᑭᒋᐊᖃᑦᑕᕐᓂᐊᕐᐸᑦᓯ ᓯᑯᕐᐱᐅᓂᓄᑦ ᑲᐴᑎᓕᖕᓄᑦ.”

¹⁵ ᐊᖓᔪᖅᑳᕐᔪᐊᖅ ᐃᓄᐃᑦ ᐅᖃᐅᓯᕆᔭᖏᓐᓂᒃ ᓈᓚᓚᐅᓐᖏᓚᖅ, ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᓇᓛᐅᑦᓯᖁᓪᓗᒍ, ᐊᑕᓂᖅ ᐅᖃᓚᐅᕐᒪᑦ ᐊᕼᐂᔭᒃᑯᑦ ᓮᓗᓁᑎᒥᐅᑕᒃᑯᑦ ᔨᕈᐳᐊᒻᒧᑦ ᓂᐹᑦ ᐃᕐᓂᖓᓄᑦ.

¹⁶ ᐃᓄᐃᑦ ᖃᐅᔨᒐᒥᒃ ᐊᖓᔪᖅᑳᕐᔪᐊᕐᒧᑦ ᓈᓚᒃᑕᐅᖏᓐᓂᕐᒥᖕᓂᒃ, ᐃᓄᐃᑦ ᐊᖓᔪᖅᑳᕐᔪᐊᕐᒧᑦ ᑭᐅᕗᑦ, “ᖃᓄᖅ ᐱᕙᓪᓕᕐᑎᑕᐅᕕᒃᓴᖃᕐᐱᑖ ᑍᕕᑎᒃᑯᓐᓂᑦ? ᔨᓯᐅᑉ ᑭᖑᕚᖏᓐᓂᑦ ᑭᖑᕐᖑᑎᔭᒃᓴᖃᕈᓐᓃᕐᐳᒍᑦ, ᐊᑏ ᐃᓴᕆᐊᓕᒥᐅᖑᔪᓯ ᐊᖏᕐᕋᑐᐃᓐᓇᓕᕐᑕ! ᑍᕕᑎᐅᑉ ᑭᖑᕚᖏᑦ ᐃᒻᒥᖕᓂᒃ ᑲᒪᒋᓂᐊᓕᕐᒪᑕ.” ᑕᕝᕙ ᐃᓴᕆᐊᓕᒥᐅᑦ ᐊᖏᕐᕋᓕᓚᐅᕐᐳᑦ.

¹⁷ ᕆᕼᐅᐳᐊᒻ ᐊᖓᔪᖅᑳᕐᔪᐊᖑᓕᓚᐅᕐᐳᖅ ᐃᓴᕆᐊᓕᒥᐅᓄᑦ ᔫᑕᐅᑉ ᑭᖑᕚᖏᑕ ᓄᓇᖓᓃᑦᑐᓄᑦ ᐃᒡᓗᒐᓴᖏᓐᓄᓪᓗ.

¹⁸ ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᑎᓕᓯᓚᐅᕐᐳᖅ ᐊᑐᕌᒻᒥᒃ, ᑖᓐᓇ ᐊᖓᔪᖅᑳᕆᔭᐅᔪᖅ ᓴᓇᔨᓄᑦ ᐊᒃᓱᕈᕐᑎᑕᐅᓪᓗᑎᒃ ᓴᓇᑎᑕᐅᔪᓄᑦ, ᑎᑭᒻᒪᑦ ᐃᓴᕆᐊᓕᒥᐅᓕᒫᓄᑦ ᒥᓪᓗᕐᑕᐅᓪᓗᓂ ᑐᖁᑕᐅᕗᖅ. ᑕᕝᕙ ᕆᕼᐅᐳᐊᒻ ᑐᐊᕕᕐᓗᓂ ᕿᒧᒃᓯᐅᑎᒥᓄᐊᕐᓗᓂ ᐊᒃᓴᓗᐊᓕᖕᒧᑦ, ᕿᒫᒃᓯᕗᖅ ᔨᕉᓴᓕᒧᑦ.

¹⁹ ᑍᒪᓐᖓᓂᑦ ᐱᒋᐊᕐᓗᑎᒃ ᐅᓪᓗᒥᒧᑦ ᐃᓴᕆᐊᓖᑦ ᐊᑭᕋᕐᑐᓕᕐᐳᑦ ᑍᕕᑎᐅᑉ ᑭᖑᕚᓕᒪᖏᓐᓂᒃ.

²⁰ ᐃᓄᐃᑦ ᐃᓴᕆᐊᓕᒃᑯᑦ ᑐᓴᕋᒥᒃ ᔨᕈᐳᐊᒻ ᐅᑎᕐᓯᒪᓕᕐᓂᖓᓂᒃ, ᕾᖁᕚᑦ ᑲᑎᒪᔪᓄᐊᖁᓪᓗᒍ ᑕᕝᕙᓂ ᐊᖓᔪᖅᑳᕐᔪᐊᓐᖑᕐᑎᑉᐹᑦ ᐃᓴᕆᐊᓕᓕᒫᒧᑦ. ᑖᒃᑯᐊ ᒪᓕᒃᑐᖃᕈᓐᓃᓚᐅᕐᐳᑦ ᑍᕕᑎᐅᑉ ᑭᖑᕚᖏᓐᓂᒃ, ᔫᑕᐅᓪᓕ ᑭᖑᕚᖏᑦ ᒪᓕᒃᑐᑑᓕᕐᐳᑦ ᑍᕕᑎᐅᑉ ᑭᖑᕚᖏᓐᓂᒃ.

ᓯᒤᔭᐅᑉ ᐅᖃᓪᓚᖕᓂᖓ

²¹ ᕆᕼᐅᐳᐊᒻ ᑎᑭᓐᓇᒥ ᔨᕉᓴᓕᒧᑦ, ᑲᑎᖁᔨᕗᖅ 180,000ᓂᒃ ᐅᓇᑕᕐᑐᒃᓴᑦᓯᐊᕙᐅᓂᕐᐹᓂᒃ ᔫᑕᐅᑉ ᐱᓐᔭᒥᓂᐅᓪᓗ ᑭᖑᕚᖏᓐᓂᒃ ᐅᓇᑕᕆᐊᕈᒪᓪᓗᓂ ᐃᓴᕆᐊᓕᐅᑉ ᑭᖑᕚᖏᓐᓂᒃ, ᐊᖓᔪᖅᑳᕐᔪᐊᖃᕐᕕᒃ ᐅᑎᕐᑎᑦᓱᒪᓪᓗᒍ ᕆᕼᐅᐳᐊᒻᒧᑦ ᓲᓗᒨᓂᐅᑉ ᐃᕐᓂᖓᓄᑦ.

²² ᒎᑎᐅᓪᓕ ᐅᖃᕐᑎᖓ ᓯᒤᐊ, ᒎᑎᒧᑦ ᐅᖃᐅᑎᔭᐅᕗᖅ,

²³ “ᐅᖃᐅᑎᒍᒃ ᕆᕼᐅᐳᐊᒻ ᓲᓗᒨᓂᐅᑉ ᐃᕐᓂᖓ, ᔫᑕᐅᑉ ᐊᖓᔪᖅᑳᕐᔪᐊᖓ, ᔫᑕᐅᓪᓗ ᐱᓐᔭᒥᓂᐅᓪᓗ ᑭᖑᕚᖏᑦ ᐃᓄᓕᒫᓪᓗ,

²⁴ ‘ᐊᑕᓂᖅ ᐃᒫᒃ ᐅᖃᕐᐳᖅ, ᐅᓇᑕᕆᐊᕐᑐᒃᓴᐅᓐᖏᓚᓯ ᓇᖕᒥᓂᖅ ᖃᑕᓐᖑᑎᑦᓯᓐᓄᑦ ᐃᓴᕆᐊᓕᒥᐅᓄᑦ. ᑕᒪᑦᓯ ᐊᖏᕐᕋᑐᐃᓐᓇᓕᕆᑦᓯ ᑕᒪᓐᓇ ᐱᐅᓯᕆᓕᕐᑕᓯ ᐅᕙᖓ ᑍᒤᑎᓐᓇᒃᑯ.’” ᐊᑕᓂᐅᑉ ᐅᖃᐅᓯᕆᔭᖏᑦ ᑎᓕᓯᑦᔪᑎᖏᓪᓗ ᓈᓚᒃᑕᐅᓚᐅᕐᐳᑦ, ᐊᖏᕐᕋᕐᓗᑎᒃ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ.

ᔨᕈᐳᐊᒻ ᑐᓄᐃᓂᖓ ᒎᑎᒥᒃ

²⁵ ᐃᓴᕆᐊᓕᐅᑉ ᐊᖓᔪᖅᑳᕐᔪᐊᖓ ᔨᕈᐳᐊᒻ ᓄᓇᓕᖕᒥᒃ ᓯᑭᒻᒥᒃ ᖃᖅᑲᓃᑦᑐᒥᒃ ᐊᕙᓗᕐᔪᐊᓕᐅᕆᓚᐅᕐᐳᖅ ᖃᖅᑲᓕᖕᓂ ᐃᕗᕅᒦᑦᑐᒥ, ᑕᕝᕙᓂᓗ ᓄᓇᖃᓚᐅᑲᒡᓗᓂ; ᓅᓚᐅᕆᕗᖅ ᐱᓄᐃᓕᒥᒃ ᓴᓇᓕᕆᓪᓗᓂ.

²⁶ ᔨᕈᐳᐊᒻ ᐆᒻᒪᑎᒥᒍᑦ ᐃᓱᒪᖃᓚᐅᕐᒪᑦ, “ᐊᖓᔪᖅᑳᕐᔪᐊᖃᕐᕕᒃ ᐅᑎᕐᓂᐊᕐᑐᒃᓴᐅᓕᕆᕗᖅ ᑍᕕᑎᐅᑉ ᑭᖑᕚᖏᓐᓄᑦ;

²⁷ ᐃᓄᐃᑦ ᔨᕉᓴᓕᒧᐊᕈᑎᒃ ᑐᓂᕐᕈᓯᕆᐊᕐᑐᕐᓗᑎᒃ ᑐᒃᓯᐊᕐᕕᒡᔪᐊᒥ, ᑕᕝᕙ ᐃᓄᐃᑦ ᐆᒻᒪᑎᖏᑦ ᐅᑎᕐᓂᐊᕆᕗᑦ ᐊᑕᓂᕐᒧᑦ, ᑐᖁᑕᐅᓗᖓᓗ ᐅᑎᕐᓂᐊᕐᐳᑦ ᕆᕼᐅᐳᐊᒻᒧᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ.”

²⁸ ᐃᓱᒪᒃᓴᕐᓯᐅᓚᐅᕐᓗᓂ, ᒪᕐᕉᖕᓂᒃ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖏᖕᓂᒃ ᓴᓇᕗᖅ ᒎᓘᓪᓗᒋᒃ, ᐃᓄᐃᓗ ᐅᖃᐅᑎᓪᓗᓂᒋᑦ, “ᐊᑯᓂᐅᓗᐊᓕᕐᒪᑦ ᑍᒪᓐᖓᑦ ᔨᕉᓴᓕᒧᐊᖃᑕᕐᓗᓯ ᑐᒃᓯᐊᕆᐊᕐᑐᕐᓗᓯ, ᐃᓕᑦᓯ ᐃᓴᕆᐊᓖᑦ ᐃᓄᖏᑦ ᐅᕝᕙᐅᓇ ᒎᑎᓯ ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓚᐅᕐᑐᖅ!”

²⁹ ᐂᑉᐸᖓ ᓄᕐᕋᓐᖑᐊᖅ ᐃᓕᓪᓗᓂᐅᒃ ᐱᑎᓕᒧᑦ ᐂᑉᐸᖓᓗ ᑖᓐᒧᑦ.

³⁰ ᑍᒤᒻᒪᑦ ᐃᓄᐃᑦ ᐊᔪᕐᑐᓕᓕᕐᐳᑦ, ᑐᒃᓯᐊᕆᐊᖃᑦᑕᕐᓗᑎᒃ ᐱᑎᓕᒧᑦ ᑖᓐᒧᓪᓗ.

³¹ ᔨᕈᐳᐊᒻ ᑐᒃᓯᐊᕐᕕᓕᐅᕐᑎᑦᓯᕗᖅ ᐱᖑᐃᑦ ᖄᖏᓐᓂ, ᓂᕈᐊᕐᓗᓂᓗ ᑐᓂᕐᕈᓯᕐᑎᑦᓯᔨᓂᒃ ᓕᕔᑎᐅᖏᑦᑐᓂᒃ.

ᐱᑎᓕᒥ ᑐᒃᓯᐊᕐᓂᐅᑉ ᓇᕐᕈᓇᕐᓯᑎᑕᐅᓂᖓ

³² ᔨᕈᐳᐊᒻ ᐋᖅᑮᒃᑲᓐᓂᓚᐅᕆᕗᖅ ᐅᒃᐱᕐᓂᖅ ᐱᑦᔪᑎᒋᓪᓗᒍ ᓇᓪᓕᐅᓐᓂᕐᓯᐅᕐᕕᖕᒥᒃ, ᐅᓪᓗᐃᑦ 15ᖓᓂ ᑕᖀᑦ 8ᖓᓂ, ᔫᑕᒥ ᓇᓪᓕᐅᓐᓂᕐᓯᐅᕐᕕᐅᑉ ᐊᑦᔨᖓᓂᒃ, ᑕᕝᕙᓂᓗ ᐱᑎᓕᒥ ᑐᓂᕐᕈᓯᕐᕕᖕᒥᒃ ᓄᕐᕋᓐᖑᐊᓄᑦ ᒎᓗᓄᑦ ᓴᓇᓚᐅᕐᐳᖅ, ᐃᓕᔭᐅᑎᓪᓗᒋᑦ ᐱᑎᓕᒥ ᑐᓂᕐᕈᓯᕐᑎᑦᓯᔨᒥᒡᓗ ᑎᓕᓯᓪᓗᓂ ᓴᓇᔭᕕᓂᖓᓂᒃ ᐱᔨᑦᓯᕐᓂᐊᕐᑐᒥᒃ.

³³ ᐅᓪᓗᐃᑦ 15ᖓᓂ ᑕᖅᑮᑦ 8ᖓᓂ ᓇᖕᒥᓂᕐᒥᓄᑦ ᐅᐸᓗᖎᕐᑕᒥᓂᒃ ᑐᓂᕐᕈᓯᕐᓗᓂᓗ ᑐᓂᕐᕈᑎᒥᒃ ᑐᓂᕐᕈᓯᕐᕕᖕᒥ ᐱᑎᓕᒥ, ᐱᒋᐊᕐᑎᓚᐅᕐᑕᒥᓂᒃ ᓇᓪᓕᐅᓐᓂᕐᓯᐅᕐᑕᐅᖃᑦᑕᖁᓪᓗᒍ ᐃᓴᕆᐊᓕᐅᑉ ᐃᓄᖏᓐᓄᑦ.