ᐊᑕᓃᑦ ᓯᕗᓪᓖᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᑐᐊᓘᓕᕐᓂᖓ

¹ ᐊᖓᔪᖅᑳᕐᔪᐊᖅ ᑍᕕᑎ ᐃᑦᑐᒻᒪᕆᐅᓕᕐᑎᓪᓗᒍ ᐅᓄᕐᑐᓂᒃ ᐊᕐᕌᒍᖃᓕᕐᓱᓂ, ᐱᔨᖏᑕ ᕿᐲᖕᓄᑦ ᐅᖅᑰᓯᑎᓐᓇᓱᖃᑦᑕᕋᓗᕐᐊᒪᑦᔪᑦ, ᐅᖅᑰᓯᔪᓐᓁᓪᓕᓚᐅᕐᐳᖅ.

² ᑍᒤᒻᒪᑦ ᐱᔨᖏᑦ ᑖᑦᓱᒧᖓ ᐅᖃᓕᕐᐳᑦ, “ᐊᖓᔪᖅᑳᕐᔪᐊᖅ ᐃᓅᓱᒃᑐᒥᒃ ᐊᕐᓇᒥᒃ ᓇᓂᓯᑦᔪᑎᔪᒪᓕᕋᑦᑎᒋᑦ ᐱᔨᑦᓯᕋᕐᑎᒋᓂᐊᕐᑕᕐᓂᒃ. ᐃᕝᕕᑦ ᓴᓂᐊᓂ ᓇᓚᓗᓂ ᑖᑦᓱᒧᖓ ᐅᖅᑰᑎᑕᐅᓂᐊᕋᕕᑦ.”

³ ᑕᕝᕙ ᕿᓂᓕᓚᐅᕐᐳᑦ ᐃᓴᕆᐊᓕᒥᐅᓂ ᐃᓅᓱᒃᑐᒥᒃ ᐊᕐᓇᒥᒃ ᐃᓂᖁᓇᕐᑐᒥᒃ, ᑕᕝᕙ ᓄᓇᒥᑦ ᓲᓇᒥᑦ ᓇᓂᓯᕗᑦ ᐃᓅᓱᒃᑐᒥᒃ ᐊᕐᓇᒥᒃ ᐊᑎᖃᕐᑐᒥᒃ ᐊᐱᓵᒡᒥᒃ, ᐊᖓᔪᖅᑳᕐᔪᐊᒧᓪᓗ ᐋᑕᐅᕗᖅ.

⁴ ᑖᓐᓇ ᐃᓂᖁᓇᓪᓚᕆᓚᐅᕐᐳᖅ; ᐊᖓᔪᖅᑳᕐᔪᐊᓪᓗ ᑲᒪᔨᒋᓕᕐᐹ ᐱᔨᑦᓯᕋᕐᑎᒋᓪᓗᒍ; ᐊᖓᔪᖅᑳᕐᔪᐊᓪᓕ ᐃᓐᓇᖓᖃᑎᒋᓚᐅᓐᖏᓛ.

ᐊᑐᓁᐊᐅᑉ ᐃᒃᓯᕙᐅᑕᕐᔪᐊᒧᐊᕈᒪᓂᖓ

⁵ ᑕᕝᕙ ᐊᑐᓁᔭ ᕼᐊᒋᑎᐅᑉ ᐃᕐᓂᖓ ᐃᒻᒥᓂᒃ ᐊᖏᔪᕈᕐᑎᓐᓇᓱᐊᓚᐅᕐᐳᖅ, ᐅᖃᕐᓗᓂ, “ᐊᖓᔪᖅᑳᕐᔪᐊᓐᖑᕐᓂᐊᕐᐳᖓ”; ᓇᖕᒥᓂᕐᓗ ᕿᒧᒃᓯᐅᑎᑖᓚᐅᕐᐳᖅ ᐊᒃᓴᓗᐊᓕᖕᒥᒃ ᕿᒻᒥᔪᐊᓂᓗ ᐃᑭᒪᔪᒃᓴᓂᒃ, 50ᓂᒡᓗ ᐊᖑᑎᓂᒃ ᓯᕗᓂᕐᒥᓂ ᐅᓪᓚᒃᑐᒃᓴᓂᒃ ᐋᖅᑮᓚᐅᕐᐳᖅ.

⁶ ᐊᑖᑕᖓᑕᓗ ᐃᓂᕐᑎᓚᐅᓐᖏᓛ ᐅᖃᐅᑎᓚᐅᕋᓂᐅᒡᓗ, “ᓱᖕᒪᑦ ᑍᒤᓕᐅᕐᐱᑦ?” ᑖᓐᓇᓗ ᐊᖑᑎᑦᓯᐊᕙᐅᓚᐅᕐᐳᖅ; ᐋᑉᓴᓚᐅᑉ ᓄᑲᖓ ᑐᖓᓕᕆᓪᓗᓂᐅᒃ.

⁷ ᑕᕝᕙ ᐅᖃᖃᑎᖃᓕᕐᐳᖅ ᔪᐊᐱᒥᒃ ᔨᕈᐃᐊᐅᑉ ᐃᕐᓂᖓᓂᒃ ᐊᐰᐊᑕᒥᒡᓗ ᑐᓂᕐᕈᓯᕐᑎᑦᓯᔨᒥᒃ; ᑖᒃᑯᐊᒃ ᒪᓕᓕᕐᐳᒃ ᐊᑐᓁᔭᒥᒃ ᐃᑲᔪᕐᓗᒍᓗ.

⁸ ᔭᑑᒃᓕ ᑐᓂᕐᕈᓯᕐᑎᑦᓯᔨ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ, ᓁᑕᓂᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᓯᒥᐂᓗ, ᕆᐂᓗ, ᑍᕕᑎᐅᓪᓗ ᓴᐳᓐᓂᐊᕐᑎᖏᑦ ᐊᔪᖏᑦᑐᕐᔪᐊᑦ ᐊᑐᓁᔭᒥᒃ ᐃᑲᔪᕐᑐᓚᐅᓐᖏᓚᑦ.

⁹ ᐊᑐᓁᔭ ᑐᓂᕐᕈᓯᕐᐳᖅ ᓰᐱᓂᒃ, ᐃᒻᒧᒃᓯᐅᒐᕐᓂᒡᓗ, ᓄᕐᕋᕐᓂᒡᓗ ᖁᐃᒃᑎᑦᓯᐊᕆᓯᒪᔪᓂᒃ, ᓄᓇᒥ ᖁᒡᓗᒋᐊᕐᔪᐊᑉ ᐅᔭᕋᖓᓂ ᐊᑎᓕᖕᒥ, ᐃᓐ-ᕈᒋᐅᑉ ᖃᓂᒋᔭᖓᓂ. ᕾᖁᔨᓪᓗᓂ ᖃᑕᓐᖑᑎᓕᒫᒥᓂᒃ ᐊᖓᔪᖅᑳᕐᔪᐊᑉ ᐃᕐᓂᖏᓐᓂᒃ ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᖏᓐᓂᒃ ᔫᑕᒥᐅᑕᓂᒃ,

¹⁰ ᕾᖁᔨᓚᐅᓐᖏᓚᕐᓕ ᓁᑕᓂᒥᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᐱᓁᐊᒥᒡᓘᓐᓃᑦ ᐊᔪᖏᑦᑐᕐᔪᐊᓂᒡᓘᓐᓃᑦ ᐅᓇᑕᕐᑐᒃᓴᓂᒃ ᓲᓗᒨᓂᒥᒡᓘᓐᓃᑦ ᖃᑕᓐᖑᑎᒥᓂᒃ.

ᓲᓗᒨᓂᐅᑉ ᐊᖓᔪᖅᑳᕐᔪᐊᓐᖑᕐᑎᑕᐅᓂᖓ

¹¹ ᓁᑕᓂ ᐹᓯᐸᒧᑦ ᐅᖃᕐᐳᖅ ᓲᓗᒨᓂᐅᑉ ᐊᓈᓇᖓᓄᑦ, “ᑐᓴᓚᐅᓐᖏᓚᑏᑦ ᐊᑐᓁᔭᒥᒃ ᕼᐊᒋᑎᐅᑉ ᐃᕐᓂᖓᓂᒃ ᑖᓐᓇ ᐊᖓᔪᖅᑳᕐᔪᐊᓐᖑᕐᒪᑦ? ᐊᖓᔪᖅᑳᕐᔪᐊᕗᓪᓗ ᑍᕕᑎ ᑕᒪᑐᒥᖓ ᖃᐅᔨᒪᓐᖏᓛᖅ?

¹² ᑍᒤᒻᒪᓪᓕ ᒫᓐᓇ ᕾᒋᑦ ᐅᖃᐅᑎᓚᐅᕐᓚᒋᑦ, ᐃᓄᓰᑦ ᓇᖕᒥᓂᖅ ᓴᐳᑎᓂᐊᕋᕕᐅᒃ ᐃᕐᓂᕐᐱᓪᓗ ᓲᓗᒨᓂᐅᑉ ᐃᓅᓯᖓ.

¹³ ᒫᓐᓇᑲᐅᑎᒋ ᐂᓕᕆᑦ ᐊᖓᔪᖅᑳᕐᔪᐊᕐᒧᑦ ᑍᕕᑎᒧᑦ, ᐅᖃᐅᑎᓗᒍ, ‘ᐅᖃᓚᐅᕐᓯᒪᓐᖏᓚᑏᑦ, ᐊᖓᔪᖅᑳᕐᔪᐊᕋ, ᐅᕙᓐᓄᑦ ᐅᖃᕕᒡᓗᑎᑦ ᐊᖏᓚᐅᕐᓯᒪᖓᕕᑦ ᐱᔨᖕᓄᑦ, ᐅᖃᕐᓗᑎᑦ “ᐃᕐᓃᑦ ᓲᓗᒨᓂ ᐅᕙᓐᓂᒃ ᑭᖑᕝᕕᐅᑎᓛᕐᑐᖅ ᐃᓇᖐᕐᓗᖓ? ᐃᒃᓯᕙᐅᑕᕐᔪᐊᓐᓂᓗ ᐃᒃᓯᕙᓕᕐᓗᓂ”? ᓱᖕᒪᓪᓕ ᐊᑐᓁᔭ ᐊᖓᔪᖅᑳᕐᔪᐊᓐᖑᓕᕐᐸ?’

¹⁴ ᑕᕝᕙ ᐅᖃᓪᓚᒃᑎᓪᓗᑎᑦ ᓱᓕ ᐊᖓᔪᖅᑳᕐᔪᐊᕐᒧᑦ, ᑕᕝᕗᖓ ᐃᑎᕐᓂᐊᕐᐳᖓ ᐅᓂᒃᑲᐅᓯᕆᔭᑎᑦ ᓇᓗᓁᒃᑲᓐᓂᕐᓗᒋᑦ.”

¹⁵ ᑍᒤᒻᒪᑦ ᐹᓯᐸ ᐊᖓᔪᖅᑳᕐᔪᐊᑉ ᐃᒡᓗᕈᓯᖓᓄᑦ ᐃᑎᕐᐳᖅ ᐊᖓᔪᖅᑳᕐᔪᐊᖅ ᐃᑐᐊᓘᓕᓚᐅᕐᐳᖅ, ᐊᕐᓇᖅ ᐊᐱᓵᒡ ᓲᓇᒤᑎᒥᐅᑕᖅ ᐊᖓᔪᖅᑳᕐᔪᐊᕐᒥᒃ ᐱᔨᑦᓯᕐᑎᓪᓗᒍ.

¹⁶ ᐹᓯᐸ ᐅᑯᕗᖅ ᐊᖓᔪᖅᑳᕐᔪᐊᑉ ᓵᖓᓄᑦ, ᐊᖓᔪᖅᑳᕐᔪᐊᓪᓗ ᐊᐱᕆᕚ, “ᓱᓇᒥᒃ ᐱᔪᒪᕖᑦ?”

¹⁷ ᑖᓐᓇ ᑭᐅᕗᖅ, “ᐊᖓᔪᖅᑳᕐᔪᐊᖅ ᐅᖃᕕᒃᑎᓚᐅᕐᓯᒪᒐᕕᓐᖓ ᐊᖏᒻᒪᕆᒃᓗᖓ ᐊᑕᓂᐅᑉ ᒎᑎᕕᑦ ᐊᑎᖓ ᑍᓪᓗᒍ, ‘ᐃᕐᓃᑦ ᓲᓗᒨᓂ ᐊᖓᔪᖅᑳᕐᔪᐊᓐᖑᓛᕐᐳᖅ ᑭᖑᕝᕕᕐᓗᖓ, ᐃᒃᓯᕙᓕᕐᓗᓂᓗ ᐃᒃᓯᕙᐊᑕᕐᔪᐊᓐᓂ.’

¹⁸ ᒫᓐᓇᓕ ᑕᑯᒋᑦ, ᐊᑐᓁᔭ ᐊᖓᔪᖅᑳᕐᔪᐊᖑᓕᕐᐳᖅ, ᐊᒡᓛᑦ ᐊᑕᓂᕋ ᐊᖓᔪᖅᑳᕐᔪᐊᖅ ᖃᐅᔨᓚᐅᓐᖏᑎᓪᓗᑎᑦ.

¹⁹ ᑐᓂᕐᕈᓯᕐᓯᒪᓕᕇᕐᐳᖅ ᐅᓄᕐᑐᓂᒃ ᐊᖑᓴᓪᓗᓂᒃ ᓰᐱᓂᒡᓗ ᓄᕐᕋᕐᓂᒡᓗ ᖁᐃᒃᓯᑦᑎᐊᕆᔭᐅᓯᒪᔪᓂᒃ ᕾᖁᔨᓪᓗᓂᓗ ᐊᖓᔪᖅᑳᕐᔪᐊᑉ ᐃᕐᓂᖏᓐᓂᒃ, ᐊᐰᐊᑕᓗ ᑐᓂᕐᕈᓯᕐᑎᑦᓯᔨ ᕾᖁᓪᓗᓂᐅᒃ, ᔪᐊᐱᓗ ᐅᓇᑕᕐᑐᒃᓴᖁᑎᕕᑦ ᐊᖓᔪᖅᑳᖓ; ᐃᕐᓂᕐᓂᒡᓕ ᓲᓗᒨᓂᒥᒃ ᕾᖁᔨᓯᒪᓐᖏᓚᖅ.

²⁰ ᒫᓐᓇᓕ, ᐊᑕᓂᕋ ᐊᖓᔪᖅᑳᕐᔪᐊᖅ, ᐃᓴᕆᐊᓕᒥᐅᑦ ᐃᓄᓕᒫᖏᑦ ᐅᑕᖅᑭᕗᑦ ᐃᓕᖕᓂᑦ, ᐅᖃᐅᑎᔭᐅᔪᒪᓪᓗᑎᑦ ᑭᓇ ᐃᒃᓯᕚᕐᓂᐊᓕᕐᒪᖔᑦ ᐊᖓᔪᖅᑳᕐᔪᐊᒪ ᐃᒃᓯᕙᐅᑕᕐᔪᐊᖓᓂ ᑭᖑᕝᕕᕐᑕᐅᓗᓂ.

²¹ ᑍᒤᓐᓂᐊᖏᑉᐸᑦ ᐃᒤᑦᓱᒫᕐᒪᑦ, ᐊᑕᓂᕋ ᐊᖓᔪᖅᑲᕐᔪᐊᕋ ᐃᓅᔪᓐᓃᕐᐸᑦ ᓯᕗᓕᕕᓂᓂ ᐃᓚᒋᓕᕐᓗᒋᑦ, ᐅᕙᖓ ᐃᕐᓂᕋᓗ ᓲᓗᒨᓂ ᐱᐅᓯᖃᕐᕕᐅᓂᐊᕐᐳᒍᒃ ᐊᑭᕋᕐᑐᕐᑐᑎᑐᑦ.”

²² ᓱᓕ ᐅᖃᓪᓚᒃᑎᓪᓗᒍ ᐊᖓᔪᖅᑳᕐᔪᐊᕐᒧᑦ, ᓁᑕᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐃᑎᕐᐳᖅ.

²³ ᑖᒃᑯᐊ ᐊᖓᔪᖅᑳᕐᔪᐊᖅ ᐅᖃᕐᕕᒋᕚᑦ, “ᑕᕝᕙ ᓁᑕᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ.” ᐊᖓᔪᖅᑳᕐᔪᐊᑉ ᓵᖓᓄᑦ ᐅᑯᕗᖅ ᑮᓇᓂ ᒪᓂᖅᑲᒧᑦ ᐊᒃᑐᕐᓱᒍ.

²⁴ ᐅᖃᕐᓗᓂᓗ, “ᐊᑕᓂᕋ ᐊᖓᔪᖅᑳᕐᔪᐊᕋ, ᐅᖃᕐᓯᒪᓕᕐᐲᑦ, ‘ᐊᑐᓁᔭ ᐅᕙᓐᓂᒃ ᐃᓇᖏᕐᓯᔪᒫᕐᐳᖅ, ᐃᒃᓯᕙᐅᑕᕐᔪᐊᓐᓂᓗ ᐃᒃᓯᕙᓕᕐᓗᓂ’?

²⁵ ᐅᓪᓗᒥ ᐊᐅᓪᓚᕐᐳᖅ, ᑐᓂᕐᕈᓯᕆᐊᕐᑐᕐᓗᓂ ᐅᓄᕐᑐᓂᒃ ᐊᖑᓴᓪᓗᕐᓂᒃ ᓰᐱᓂᒡᓗ ᓄᕐᕋᓂᒡᓗ ᖁᐃᒃᑎᑦᓯᐊᖑᓯᒪᔪᓂᒃ, ᕾᖁᔨᓪᓗᓂ ᐊᖓᔪᖅᑳᕐᔪᐊᑉ ᐃᕐᓂᓕᒫᖏᓐᓂᒃ, ᔪᐊᐱᒥᒡᓗ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ, ᐊᐰᐊᑕᒥᒡᓗ ᑐᓂᕐᕈᓯᕐᑎᑦᓯᔨᒥᒃ, ᑕᑯᒋᓪᓗ, ᒫᓐᓇ ᓂᕆᕕᒡᔪᐊᕐᐳᑦ ᐃᒥᕐᓗᑎᒡᓗ ᑖᑦᓱᒪ ᓵᖓᓂ ᕾᒐᓛᕐᓗᑎᒃ ‘ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᐊᑐᓁᔭ!’

²⁶ ᐅᕙᖓᓕ ᐱᔩᑦ, ᔭᑑᒃᓗ ᑐᓂᕐᕈᓯᕐᑎᑦᓯᔨ, ᐱᓁᐊᓘᓐᓃᑦ ᔨᕼᐅᐃᐊᑕᐅᑉ ᐃᕐᓂᖓ, ᐱᔩᓪᓘᓐᓃᑦ ᓲᓗᒨᓂ ᕾᖁᔭᐅᓚᐅᓐᖏᓚᒍᑦ.

²⁷ ᑕᒪᓐᓇ ᐱᓂᐊᕐᓂᐅᑎᑕᐅᕚ ᐊᑕᓂᓐᓄᑦ ᐊᖓᔪᖅᑳᕐᔪᐊᓐᓄᑦ, ᐱᔨᑎᓪᓗ ᐅᖃᐅᑎᓚᐅᕐᓇᒋᑦ ᑭᓇ ᐊᖓᔪᖅᑳᕐᔪᐊᕐᒪ ᐃᒃᓯᕙᐅᑕᕐᔪᐊᖓᓂ ᐃᒃᓯᕙᔪᒃᓴᐅᖕᒪᖔᑦ ᐃᓇᖏᕐᓗᒍ?”

²⁸ ᐊᖓᔪᖅᑳᕐᔪᐊᖅ ᑍᕕᑎ ᑭᐅᕗᖅ ᐅᖃᕐᓗᓂ, “ᐹᓯᐸ ᕾᖁᒍᒃ ᐅᕙᓐᓄᑦ.” ᑖᓐᓇᓗ ᐃᑎᕐᐳᖅ ᐊᖓᔪᖅᑳᕐᔪᐊᑉ ᓇᔪᕐᑕᖓᓄᑦ, ᓇᖏᕐᓗᓂᓗ ᐊᖓᔪᖅᑳᕐᔪᐊᑉ ᓵᖓᓂ.

²⁹ ᐊᖓᔪᖅᑳᕐᔪᐊᕐᓗ ᐊᖏᕈᑎᓕᐅᕐᐳᖅ ᐅᖃᕕᒡᓗᓂ, ᐃᒫᒃ, “ᐊᑕᓂᖅ ᐃᓅᖕᒪᑦ, ᐅᕙᓐᓂᒃ ᐱᐅᓕᒃᓯᓚᐅᕐᑐᖅ ᐊᑭᕋᕐᑐᕐᑕᐅᓂᓐᓂᑦ ᑕᒤᓐᓂᑦ,

³⁰ ᐃᓕᖕᓄᑦ ᐅᖃᕕᓚᐅᕋᒪ ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᒍᑦ, ᐅᖃᕐᓗᖓ, ‘ᐃᓛᒃ ᓲᓗᒨᓂ ᐃᕐᓃᑦ ᐊᖓᔪᖅᑳᕐᔪᐊᓐᖑᕐᑐᒃᓴᐅᕗᖅ ᑭᖑᕝᕕᕐᓗᖓ, ᑖᓐᓇᓗ ᐃᒃᓯᕙᔪᒃᓴᐅᕗᖅ ᐃᒃᓯᕙᐅᑕᕐᔪᐊᓐᓂ ᐃᓇᖏᕐᓗᖓ,’ ᐃᓛᒃ ᑍᒫᒡᓗ ᐱᓂᐊᕐᑐᒃᓴᐅᕗᖓ ᐅᓪᓗᒥ.”

³¹ ᑕᕝᕙ ᐹᓯᐸ ᐅᑯᓪᓗᓂ ᑮᓇᓂ ᒪᓂᖅᑲᒧᑦ ᐊᒃᑐᕐᓱᒍ, ᐅᐱᒍᓱᖕᓂᕐᒧᑦ ᐊᖓᔪᖅᑳᕐᔪᐊᕐᒥᒃ, ᐅᖃᓕᕐᐳᖅ, “ᐊᑕᓂᕋ ᐊᖓᔪᖅᑳᕐᔪᐊᖅ ᑍᕕᑎ ᐃᓅᓕ ᐃᓱᖃᖏᑦᑐᒧᑦ!”

³² ᑕᕝᕙ ᐊᖓᔪᖅᑳᕐᔪᐊᖅ ᑍᕕᑎ ᐅᖃᕐᐳᖅ, “ᔭᑑᒃ ᕾᖁᔭᐅᓕ ᑐᓂᕐᕈᓯᕐᑎᑦᓯᔨ, ᓁᑕᓂᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ.” ᑖᒃᑯᐊᓗ ᕾᕗᑦ ᐊᖓᔪᖅᑳᕐᔪᐊᑉ ᓵᖓᓄᑦ.

³³ ᐊᖓᔪᖅᑳᕐᔪᐊᓪᓗ ᐅᖃᐅᑎᕔᑦ, “ᐊᖓᔪᖅᑳᕐᔪᐊᑉ ᐱᔨᖏᑦ ᐃᓚᒋᓗᒋᑦ, ᐃᕐᓂᕋ ᓲᓗᒨᓂ ᐃᑭᑎᓪᓗᒍ ᓇᖕᒥᓂᖅ ᓯᐅᑎᖅᑯᕐᑐᔪᖁᑎᓐᓄᑦ ᒋᕼᐅᓂᓕᐊᕈᑎᓯᐅᒃ;

³⁴ ᑕᕝᕙᓂ ᔭᑑᒃ ᑐᓂᕐᕈᓯᕐᑎᑦᓯᔨᐅᑉ ᓁᑕᓂᐅᓪᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᕐᓱᕐᑎᕐᓗᒍ, ᐊᖓᔪᖅᑳᕐᔪᐊᓐᖑᕐᑎᑕᒃᓴᕆᕚᒃ ᐃᓴᕆᐊᓕᒥᐅᓄᑦ; ᑎᑦᑐᓚᐅᑎᓗ ᓂᓪᓕᕐᑎᑕᐅᓗᓂ, ᐅᖃᕐᓗᓯ, ‘ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᓲᓗᒨᓂ!’

³⁵ ᐅᑎᓕᕈᑦᓯ ᒪᓕᒡᓗᓯᐅᒃ ᐃᒃᓯᕙᐅᑕᕐᔪᐊᓐᓄᑦ ᐃᖏᑎᑕᒃᓴᕆᕙᓯ; ᑖᓐᓇ ᐊᖓᔪᖅᑳᕐᔪᐊᓐᖑᕐᓂᐊᕐᒪᑦ ᐃᓇᖏᕐᓗᖓ; ᓂᕈᐊᕐᓯᒪᒐᒃᑯ ᐊᖓᔪᖅᑳᕐᔪᐊᓐᖑᖁᓪᓗᒍ ᐃᓴᕆᐊᓕᒧᑦ ᔫᑕᒧᓪᓗ.”

³⁶ ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ ᐊᖓᔪᖅᑳᕐᔪᐊᕐᒧᑦ ᑭᐅᕗᖅ, “ᐋᒦᓐ! ᐊᑕᓂᐅᑉ ᒎᑎᐅᑉ ᐊᖓᔪᖅᑳᕐᔪᐊᒪ ᐊᑕᓂᖓᑕ ᑍᒤᑎᓪᓕᐅᒃ.

³⁷ ᐊᑕᓂᐅᑉ ᐃᓚᒋᖃᑦᑕᓚᐅᕐᒪᒍ ᐊᖓᔪᖅᑳᕐᔪᐊᖅ, ᓲᓗᒨᓂᐅᓪᓗ ᐊᖓᔪᖅᑳᕐᔪᐊᖑᓂᖓ ᐱᔪᓐᓇᕐᓂᕐᓴᐅᓕ ᐊᖓᔪᖅᑳᒪ ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓂᑦ.”

³⁸ ᑖᒃᑯᐊ ᔭᑑᒃ ᑐᓂᕐᕈᓯᕐᑎᑦᓯᔨ, ᓁᑕᓂᓗ ᒎᑎᐅᑉ ᐱᔪᖃᓛᕐᑐᒥ ᐅᖃᕐᑎᖓ, ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ, ᐊᖓᔪᖅᑳᕐᔪᐊᓪᓗ ᓴᐳᓐᓂᐊᕐᑎᖏᑦ ᓯᕆᑍᑏᑦ ᐱᓕᑍᑏᓪᓗ, ᓲᓗᒨᓂ ᐊᖓᔪᖅᑳᕐᔪᐊᑉ ᑍᕕᑎᐅᑉ ᓯᐅᑎᖅᑯᕐᑐᔪᖁᑎᖓᓄᑦ ᐃᑭᑎᑉᐹᑦ, ᒋᕼᐅᓂᒧᐊᕐᑎᓪᓗᒍ.

³⁹ ᑕᕝᕙᓂ ᔭᑑᒃ ᑐᓂᕐᕈᓯᕐᑎᑦᓯᔨ ᓇᒡᔪᕕᓂᖅ ᐸᐅᕐᖓᐅᑉ ᐅᕐᓱᖓᓂᒃ ᐃᒪᓕᒃ ᑐᐱᕐᔪᐊᒥᑦ ᑲᑎᒪᕕᖕᒥᑦ ᐱᓯᒪᔭᒥᓂᒃ ᑕᕝᕙᓐᖓᑦ ᓲᓗᒨᓂ ᑯᕝᕕᕆᕚ. ᑕᕝᕙ ᑎᑦᑐᓚᐅᑎᑦ ᓂᓪᓕᕐᑎᑕᐅᕗᑦ; ᐃᓄᓕᒫᓪᓗ ᕾᒐᓛᓕᕐᐳᑦ, “ᐊᑯᓂ ᐃᓅᓕ ᐊᖓᔪᖅᑳᕐᔪᐊᖅ ᓲᓗᒨᓂ!”

⁴⁰ ᑕᒪᕐᒥᒃ ᑕᕝᕙ ᒪᓕᓕᕐᐹᑦ ᐅᑎᓕᕐᓗᑎᒃ, ᕾᒐᓛᕐᐳᑦ ᖁᕕᐊᓱᒡᓗᑎᒃ ᓱᐴᒊᑦ ᓂᓪᓕᐊᑎᑕᐅᕗᑦ, ᖁᕕᐊᓱᒃᐳᑦ ᐊᖏᔪᕐᔪᐊᒥᒃ ᖁᕕᐊᓱᒡᓗᑎᒃ, ᓂᐱᖃᓕᕐᒪᑦ ᐊᒡᓛᑦ ᓄᓇ ᓴᔪᒃᑎᑕᐅᕗᖅ.

⁴¹ ᐊᑐᓁᔭᒃᑯᑦ ᕾᖁᓯᒪᔭᖏᓪᓗ ᐱᔭᕇᕐᐸᓪᓕᐊᓕᕐᑎᓪᓗᒋᑦ ᓂᕆᕕᒡᔪᐊᕐᕕᖕᒥᓂ, ᑐᓵᓕᕐᐳᑉ ᓂᐱᖏᓐᓂᒃ. ᔪᐊᐱ ᑎᑦᑐᓚᐅᑎᓂᒃ ᑐᓴᕋᒥ ᐅᖃᕐᐳᖅ, “ᓱᔪᖃᓕᕐᒪᑦ ᐃᒡᓗᒐᓴᖕᓂ ᐅᐃᒻᒪᖓᕙᓗᒃᑐᐊᓘᕙᑦ?”

⁴² ᓱᓕ ᓂᓪᓕᐊᑎᓪᓗᒍ, ᔫᓇᑕᓂ ᑐᓂᕐᕈᓯᕐᑎᑦᓯᔨᐅᑉ ᐊᐰᐊᑕᐅᑉ ᐃᕐᓂᖓ ᑎᑭᑉᐳᖅ; ᐊᑐᓁᔭᐅᑉ ᐅᖃᐅᑎᕚ, “ᐃᑎᕆᑦ, ᐱᓪᓚᕆᐅᕗᑎᑦ ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕋᕕᑦ.”

⁴³ ᔫᓇᑕᓂᐅᑉ ᐊᑐᓁᔭ ᑭᐅᕚ, “ᑍᒤᑦᑐᒥᒃ ᐅᖃᕆᐊᕐᑐᕈᑎᖃᓐᖏᓚᖓ, ᐊᑕᓂᑦᑕ ᐊᖓᔪᖅᑳᕐᔪᐊᑉ ᑍᕕᑎᐅᑉ, ᐊᖓᔪᖅᑳᕐᔪᐊᕈᕐᑎᒻᒪᒍ ᓲᓗᒨᓂ;

⁴⁴ ᑎᓕᓯᖕᒪᑦ ᔭᑑᒡᒥᒃ ᑐᓂᕐᕈᓯᕐᑎᑦᓯᔨᒥᒃ, ᓁᑕᓂᒥᒡᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ, ᐱᓁᐊᒥᒡᓗ ᔨᕼᐅᐃᐊᑕᐅᑉ ᐃᕐᓂᖓᓂᒃ, ᓯᕆᐅᓪᓗ ᑭᖑᕚᖏᑦ ᐱᓕᐅᓪᓗ ᑭᖑᕚᖏᑦ ᐊᖓᔪᖅᑳᕐᔪᐊᓪᓗ ᓴᐳᓐᓂᐊᕐᑎᖏᓐᓂᒃ ᓯᕆᑍᑎᓂᒃ ᐱᓕᑍᑎᓂᒡᓗ; ᐃᑭᒪᑎᑦᓱᒍᓗ ᐊᖓᔪᖅᑳᕐᔪᐊᑉ ᓯᐅᑎᖅᑯᕐᑐᔪᖁᑎᖓᓂ,

⁴⁵ ᔭᑑᑭᐅᓪᓗ ᑐᓂᕐᕈᓯᕐᑎᑦᓯᔨᐅᑉ ᓁᑕᓂᐅᓪᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᕐᓱᕐᑎᕐᐹ ᐊᖓᔪᖅᑳᕐᔪᐊᓐᖑᕐᑎᓪᓗᒍ ᒋᕼᐅᓂᒥ; ᑕᕝᕙᓐᖓᑦ ᐃᒡᓗᒐᓴᖕᓄᑦ ᒪᔪᕋᓕᕐᐳᑦ ᖁᕕᐊᓱᒻᒪᕆᒡᓗᑎᒃ, ᐃᒡᓗᒐᓴᒡᔪᐊᕐᒥᐅᑦ ᐅᐃᒻᒪᒃᓯᒪᓕᕐᐳᑦ. ᑕᒪᓐᓇ ᑕᕝᕙ ᓂᐱᕐᔪᐊᖅ ᑐᓵᔭᓯ.

⁴⁶ ᓲᓗᒨᓂ ᒫᓐᓇ ᐃᒃᓯᕙᐅᑕᕐᔪᐊᕐᒥ ᐃᒃᓯᕚᓕᕐᐳᖅ.

⁴⁷ ᓱᓕᓗ, ᐊᖓᔪᖅᑳᕐᔪᐊᑉ ᐱᔨᖏᑦ ᐅᐱᒍᓱᒋᐊᕐᑐᕐᓯᒪᕗᑦ ᐊᑕᓂᕐᒥᒃ ᐊᖓᔪᖅᑳᕐᔪᐊᑦᑎᓐᓂᒃ ᑍᕕᑎᒥᒃ, ᐅᖃᕐᓗᑎᒃ, ‘ᒎᑎᕕᑦ ᓲᓗᒨᓂᐅᑉ ᐊᑎᖓ ᐃᓕᖕᓂᑦ ᖃᐅᔨᒪᔭᐅᓂᕐᓴᐅᑎᓪᓕᐅᒃ, ᐊᐅᓚᑦᓯᓂᖓᓗ ᐊᔪᖏᓐᓂᕐᓴᐅᑎᓪᓕᐅᒃ ᐊᐅᓚᑦᓯᓂᕆᓚᐅᕐᑕᕐᓂᑦ.’ ᐊᖓᔪᖅᑳᕐᔪᐊᕐᓗ ᐅᑯᕗᖅ ᐅᐱᒍᓱᒡᓗᓂ ᐃᒡᓕᕐᒥᓃᓪᓗᓂ.

⁴⁸ ᐊᖓᔪᖅᑲᕐᔪᐊᕐᓗ ᐅᖃᕐᕆᓪᓗᓂ, ‘ᐊᑕᓂᖅ ᓂᕐᑐᕐᑕᐅᓕ, ᐃᓴᕆᐊᓕᑎᑦ ᒎᑎᖓᑦ, ᐅᓪᓗᒥ ᕿᑐᕐᖓᒪ ᐃᓚᖓᓐᓂᒃ ᐃᖏᑎᑦᓯᖕᒪᑦ ᐃᒃᓯᕙᐅᑕᕐᔪᐊᓐᓂ, ᓇᖕᒥᓂᕐᓗ ᑕᑯᓪᓗᒍ.’”

⁴⁹ ᑕᕝᕙ ᐊᑐᓁᔭᐅᑉ ᕾᖁᓯᒪᔭᓕᒫᖏᑦ ᓴᔪᓕᕐᐳᑦ, ᒪᑭᓐᓇᒥᒃ ᐊᐅᓪᓚᕐᐳᑦ ᓇᒧᑐᐃᓐᓇᖅ ᐅᐸᒍᒪᔭᒥᖕᓄᑦ.

⁵⁰ ᐊᑐᓁᔭ, ᓯᕘᕋᔪᐊᓘᓕᕐᐳᖅ ᓲᓗᒨᓂᒥᒃ, ᑐᐱᕐᔪᐊᒧᐊᕐᓗᓂᓗ ᑐᓂᕐᕈᓯᕐᕕᐅᑉ ᑎᕆᖅᑯᖏᓐᓂᒃ ᑎᒍᒥᐊᓕᕐᐳᖅ.

⁵¹ ᐊᖓᔪᖅᑳᕐᔪᐊᖅ ᓲᓗᒨᓂ ᐅᖃᐅᑎᔭᐅᕗᖅ, “ᑕᑯᒋᑦ, ᐊᑐᓁᔭ ᓯᕘᕋᕗᖅ ᓲᓗᒨᓂᒥᒃ; ᐂᓪᓗᓂᓗ ᑐᓂᕐᕈᓯᕐᕕᐅᑉ ᑎᕆᖅᑯᖏᓐᓂᒃ ᑎᒍᒥᐊᓕᕐᐳᖅ, ᐅᖃᕐᓗᓂᓗ, ‘ᐊᖓᔪᖅᑳᕐᔪᐊᖅ ᓲᓗᒨᓂ ᐊᖏᒻᒪᕆᖁᕙᕋ ᓴᕕᒡᔪᐊᕐᒧᑦ ᑐᖁᑕᐅᖁᓇᖓ.’”

⁵² ᓲᓗᒨᓂ ᐅᖃᕐᐳᖅ, “ᐅᕙᓐᓂᒃ ᐅᐱᒍᓱᑦᓯᐊᕐᐸᑦ, ᐊᒡᓛᑦ ᓂᐊᖁᐊᓃᑦᑐᖅ ᓄᔭᖅ ᐊᑕᐅᓯᖅ ᐊᒃᑐᕐᑕᐅᓂᐊᓐᖏᓚᖅ; ᑭᓯᐊᓂ ᑍᒤᓐᖏᑐᐊᕐᐸᑦ ᑐᖁᑕᐅᓂᐊᕐᐳᖅ.”

⁵³ ᐊᖓᔪᖅᑳᕐᔪᐊᖅ ᓲᓗᒨᓂ ᑎᓕᓯᕗᖅ, ᐊᑐᓁᐊ ᑐᓂᕐᕈᓯᕐᕕᖕᒥᑦ ᕾᖁᔭᐅᖁᓪᓗᒍ. ᐊᑐᓁᐊᓗ ᑕᕝᕗᓐᖓᕋᒥ ᐅᑯᕗᖅ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓵᖓᓄᑦ; ᐊᖓᔪᖅᑳᕐᔪᐊᓪᓗ ᐅᖃᐅᑎᕚ, “ᐊᖏᕐᕋᓕᕆᑦ.”