ᔪᐊᓇᓯ ᓯᕗᓪᓖᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᓚᕐᔪᐊᕐᒥᒃ ᓵᓚᖃᕐᓂᕗᑦ

¹ ᑕᒪᕐᒥᒃ ᐅᒃᐱᕐᑐᑦ ᔩᓱᓯ ᙭ᔅᑑᓯ ᒎᑎᒧᑦ ᐃᕐᓂᐊᖑᑎᑕᐅᓯᒪᕗᑦ, ᑕᒪᕐᒥᒡᓗ ᐊᑖᑕᒥᒃ ᓇᒡᓕᒍᓱᒃᑐᑦ ᑖᑦᓱᒪ ᕿᑐᕐᖓᖓᑦᑕᐅᖅ ᓇᒡᓕᒋᒋᕚ.

² ᑕᒪᑐᒨᓇ ᖃᐅᔨᑦᔪᑎᖃᕐᐳᒍᑦ ᒎᑎᐅᑉ ᕿᑐᕐᖓᖏᓐᓂᒃ ᓇᒡᓕᒍᓱᖕᓂᑦᑎᓐᓂᒃ, ᒎᑎ ᓇᒡᓕᒋᒐᑦᑎᒍ ᐱᖁᔭᖏᓪᓗ ᒪᓕᒃᖢᒋᑦ.

³ ᒎᑎᒥᒃ ᓇᒡᓕᖕᓂᖅ ᐃᒤᑦᑑᕗᖅ, ᐱᖁᔭᖏᑦ ᒪᓕᒃᑲᑦᑎᒋᑦ. ᐱᖁᔭᖏᓪᓗ ᐅᖁᒤᓗᐊᓐᖏᓚᑦ.

⁴ ᑕᒪᕐᒥᒃ ᒎᑎᒥᑦ ᐃᕐᓂᐊᖑᔪᑦ ᓯᓚᕐᔪᐊᕐᒥᒃ ᓵᓚᖃᕐᐳᑦ; ᐅᒃᐱᕐᓂᕗᓪᓗ ᓯᓚᕐᔪᐊᕐᒥᒃ ᓵᓚᖃᕈᑎᒋᕙᕗᑦ.

⁵ ᑭᓇ ᓯᓚᕐᔪᐊᕐᒥᒃ ᓵᓚᖃᕐᐸ? ᑭᓯᒥ ᑖᓐᓇ ᐅᒃᐱᕐᑐᖅ ᔩᓱᓯ ᒎᑎᐅᑉ ᐃᕐᓂᕆᖕᒪᒍ.

ᔩᓱᓯ ᙭ᔅᑑᓯᒥᒃ ᓇᓗᓁᕐᓯᓂᖅ

⁶ ᔩᓱᓯ ᙭ᔅᑑᓯ ᑖᓐᓇᐅᕗᖅ ᑎᑭᓚᐅᕐᑐᖅ ᐃᒪᒃᑯᑦ ᐊᐅᒃᑯᓪᓗ, ᐃᒪᒃᑯᑐᐃᓐᓇᐅᓐᖏᑦᑐᕐᓕ ᑕᒤᑎᒍᓪᓕ ᐃᒪᒃᑯᑦ ᐊᐅᒃᑯᓪᓗ. ᐊᓂᕐᓂᕐᓗ ᓇᓗᓁᕐᓯᕗᖅ, ᐊᓂᕐᓂᖅ ᑖᓐᓇ ᓱᓕᔫᖕᒪᑦ.

⁷ ᐱᖓᓲᕗᑦ ᓇᓗᓁᕐᓯᔪᑦ,

⁸ ᐊᓂᕐᓂᖅ, ᐃᒥᖅ, ᐊᐅᒡᓗ; ᐱᖓᓱᓪᓗ ᑖᒃᑯᐊ ᐊᖏᖃᑎᒌᒃᐳᑦ.

⁹ ᐃᓄᐃᑦ ᓇᓗᓁᕐᓯᓂᖏᓐᓂᒃ ᐅᒃᐱᕈᓱᒃᑯᑦᑕ, ᒎᑎᐅᑉ ᓇᓗᓁᕐᓯᓂᖓ ᐊᖏᓂᕐᓴᐅᕗᖅ; ᑕᒪᓐᓇᐅᕗᖅ ᑕᕝᕙ ᒎᑎᐅᑉ ᓇᓗᓁᕐᓯᓂᖓ ᐃᕐᓂᕐᒥᓂᒃ.

¹⁰ ᑖᓐᓇ ᒎᑎᐅᑉ ᐃᕐᓂᖓᓂᒃ ᐅᒃᐱᕐᑐᖅ ᓇᓗᓁᕐᓯᓂᖅ ᑕᒪᓐᓇ ᐃᓗᒥᐅᑕᕆᕚ. ᓇᓪᓕᐊᓪᓕ ᒎᑎᒥᒃ ᐅᒃᐱᖏᑦᑐᖅ ᑖᓐᓇ ᓴᒡᓗᑐᔫᑎᑦᓯᕗᖅ ᒎᑎᒥᒃ, ᒎᑎᐅᑉ ᐃᕐᓂᕐᒥᓂᒃ ᓇᓗᓁᕐᓯᓂᖓ ᐅᒃᐱᕆᖏᓐᓇᒥᐅᒃ.

¹¹ ᓇᓗᓁᕐᓯᓂᕐᓗ ᐃᒤᑦᑑᕗᖅ, ᒎᑎᐅᑉ ᑐᓂᓯᕕᒋᖕᒪᑎᒍᑦ ᐃᓅᓯᕐᒥᒃ ᓄᖑᓱᐃᑦᑐᒥᒃ, ᐃᓅᓯᕐᓗ ᑕᒪᓐᓇ ᒎᑎᐅᑉ ᐃᕐᓂᖓᓃᑉᐳᖅ.

¹² ᓇᓪᓕᐊᑦ ᒎᑎᐅᑉ ᐃᕐᓂᖓᓂᒃ ᐱᖃᕐᑐᖅ ᐃᓅᓯᕐᒥᒃ ᐱᖃᕐᐳᖅ; ᒎᑎᐅᓪᓕ ᐃᕐᓂᖓᓂᒃ ᐱᖃᖏᑦᑐᖅ ᐃᓅᓯᕐᒥᒃ ᐱᖃᓐᖏᓚᖅ.

ᐃᓅᓯᖅ ᓄᖑᓱᐃᑦᑐᖅ

¹³ ᑕᒪᒃᑯᓂᖓ ᑎᑎᕋᕐᕕᒋᕙᑦᓯ ᒎᑎᐅᑉ ᐃᕐᓂᖓᑕ ᐊᑎᖓᓄᑦ ᐅᒃᐱᕐᑐᓯ, ᖃᐅᔨᒪᖁᓪᓗᓯ ᓄᖑᓱᐃᑦᑐᒥᒃ ᐃᓅᓯᖃᕋᑦᓯ.

¹⁴ ᑕᒪᓐᓇᓗ ᑕᕝᕙ ᖁᓚᖏᑦᔪᑎᒋᔭᕗᑦ ᑖᑦᓱᒥᖓ, ᓱᓇᑐᐃᓐᓇᒥᒃ ᑐᒃᓯᐊᕈᑦᑕ ᐱᔪᒪᔭᖓᒍᑦ ᑐᓴᕐᒫᑎᒍᑦ.

¹⁵ ᖃᐅᔨᒪᒍᑦᑕᓕ ᓱᓇᒥᒡᓘᓐᓃᑦ ᑐᒃᓯᐊᕌᖓᑦᑕ ᑐᓴᕐᒫᑎᒍᑦ, ᖃᐅᔨᒪᒋᕗᒍᑦᑕᐅᖅ ᑖᑦᓱᒪᖓᑦ ᐱᔪᒪᔭᕗᑦ ᐱᒐᑦᑎᒍ.

¹⁶ ᓇᓪᓕᐊᑦ ᐅᒃᐱᕐᑑᖃᑎᒥᓂᒃ ᐊᔪᕐᑐᓕᑎᓪᓗᒍ ᑕᑯᔪᖅ ᐊᔪᕐᑐᓕᖏᑉᐸᑦ ᑐᖁᓐᓇᕐᑐᒥᒃ, ᑍᒤᑐᖅ ᒎᑎᒧᑦ ᑐᒃᓯᐊᕐᑐᒃᓴᐅᕗᖅ, ᒎᑎᐅᓪᓗ ᐃᓅᓯᕐᒥᒃ ᑐᓂᓯᕕᒋᓂᐊᕐᐹ ᑐᖁᓐᓇᕐᑐᒥᒃ ᐊᔪᕐᑐᓕᖏᑉᐸᑦ. ᐊᔪᕐᑐᓕᓂᕐᑕᖃᕐᐳᖅ ᑐᕌᕐᑐᒥ ᑐᖁᒧᑦ; ᑍᒤᑦᑐᒥᒡᓕ ᑐᒃᓯᐅᑦᔭᐅᖁᔨᓗᖓ ᐅᖃᓐᖏᓚᖓ.

¹⁷ ᓈᒻᒪᖏᑐᓕᓃᑦ ᑕᒪᕐᒥᒃ ᐊᔪᕐᑐᓕᓂᐅᕗᑦ, ᐊᔪᕐᑐᓕᓃᓪᓕ ᑕᒪᕐᒥᒃ ᑐᖁᓐᓇᕐᑑᓐᖏᓚᑦ.

¹⁸ ᖃᐅᔨᒪᕗᒍᑦ ᑕᒪᕐᒥᒃ ᒎᑎᒥᑦ ᐃᕐᓂᐊᖑᔪᑦ ᐊᔪᕐᑐᓖᓐᓇᕈᓐᓇᖏᒻᒪᑕ, ᒎᑎᐅᑉ ᐃᕐᓂᖓᑕ ᓴᐳᑎᓯᒪᖕᒪᒋᑦ, ᓵᑖᓇᓯᐅᓪᓗ ᐊᒃᑐᕐᓂᐊᓐᖏᓛ.

¹⁹ ᖃᐅᔨᒪᕗᒍᑦ ᒎᑎᒥᐅᑕᐅᒐᑦᑕ, ᓯᓚᕐᔪᐊᒥᐅᓪᓗ ᑕᒪᕐᒥᒃ ᓵᑖᓇᓯᐅᑉ ᐱᔪᓐᓇᕐᓂᖓᓄᑦ ᐊᐅᓚᑕᐅᕗᑦ.

²⁰ ᖃᐅᔨᒪᕗᒍᓪᓗ ᒎᑎᐅᑉ ᐃᕐᓂᖓ ᑎᑭᓯᒪᖕᒪᑦ ᑖᑦᓱᒪᓗ ᑐᑭᓯᐊᓕᕐᑎᑉᐹᑎᒍᑦ, ᖃᐅᔨᖁᓪᓗᑕ ᑭᓇ ᓱᓕᖕᒪᖔᑦ; ᑖᑦᓱᒪᓃᑉᐳᒍᓪᓗ ᓱᓕᔪᒥ, ᐃᕐᓂᖓᓂ ᔩᓱᓯ ᙭ᔅᑑᓯᒥ. ᑖᓐᓇ ᒎᑎ ᓱᓕᔫᕗᖅ ᐃᓅᓯᐅᓪᓗᓂᓗ ᓄᖑᓱᐃᑦᑐᖅ.

²¹ ᕿᑐᕐᖔᑯᓗᒃᑲ, ᒎᑎᐅᖏᑦᑐᓂᒃ ᒎᑎᖃᕋᓱᐊᕐᑍᓕᒋᑦᓯ.