ᔪᐊᓇᓯ ᓯᕗᓪᓖᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

᙭ᔅᑑᓯ ᐃᑲᔪᕐᑎᕗᑦ

¹ ᕿᑐᕐᖔᑯᓗᒃᑲ, ᑕᒪᒃᑯᓂᖓ ᑎᑎᕋᕐᕕᒋᕙᑦᓯ ᐊᔪᕐᑐᓕᖁᓇᓯ; ᐊᔪᕐᑐᓕᔪᖃᕐᐸᓪᓕ, ᑐᒃᓯᐅᑦᔨᔨᖃᕐᐳᒍᑦ ᐊᑖᑕᒥ, ᑕᕝᕙ ᔩᓱᓯ ᙭ᔅᑑᓯᒥᒃ ᐱᐅᔪᑐᐊᖑᔪᒥᒃ;

² ᑖᓐᓇᓗ ᐊᖅᑯᑎᒃᓴᑑᕗᖅ ᐊᔪᕐᓂᑦᑕ ᐃᓱᒪᒋᔪᓐᓁᕐᑕᐅᑦᔪᑎᒃᓴᖏᓐᓄᑦ, ᐅᕙᒍᑑᖏᑦᑐᕐᓕ ᓯᓚᕐᔪᐊᕐᒥᐅᓪᓕ ᑕᒪᕐᒥᒃ ᐊᔪᕐᓂᖏᑦ ᐱᓪᓗᒋᑦ.

³ ᐱᖁᔭᖏᑦ ᓈᓚᑯᑦᑎᒍ ᖃᐅᔨᒪᑦᔪᑎᒋᔪᓐᓇᕐᐸᕗᑦ ᑖᑦᓱᒥᖓ ᖃᐅᔨᒪᔭᖃᑦᓯᐊᕐᓂᑦᑎᓐᓂᒃ.

⁴ ᓇᓪᓕᐊᑦ ᑖᑦᓱᒥᖓ ᖃᐅᔨᒪᓂᕋᕐᐸᑦ, ᐱᖁᔭᖏᓐᓂᒡᓗ ᒪᓕᖏᓪᓗᓂ ᑖᓐᓇ ᓴᒡᓗᑐᔫᕗᖅ, ᓱᓕᔪᒧᓪᓗ ᓇᔪᕐᑕᐅᓇᓂ.

⁵ ᐅᖃᐅᓯᖓᓂᒡᓕ ᒪᓕᒃᑐᖅ, ᑖᓐᓇᐅᕗᖅ ᒎᑎᒧᑦ ᓇᒡᓕᒍᓱᖕᓂᖓ ᓈᒻᒪᑦᓯᐊᕐᓂᐊᕐᐳᖅ. ᑍᒫᒃ ᑕᑉᕙ ᖃᐅᔨᒪᑦᔪᑎᒋᕙᕗᑦ ᑖᑦᓱᒪᓃᓂᑦᑎᓐᓂᒃ:

⁶ ᓇᓪᓕᐊᑦ ᑖᑦᓱᒪᓃᓂᕋᕐᑐᖅ ᐃᓅᔪᒃᓴᐅᕗᖅ ᑖᑦᓱᒪ ᐃᓕᖅᑯᓯᕆᓚᐅᕐᑕᖓᑐᑦ.

ᐱᖁᔭᖅ ᓄᑖᖅ

⁷ ᓇᒡᓕᒋᔭᒃᑲ, ᐱᖁᔭᖅ ᐃᓕᑦᓯᓐᓄᑦ ᑎᑎᕋᐅᓯᕆᔭᕋ ᓄᑖᖑᓐᖏᓚᖅ, ᐱᖁᔭᑐᖃᐅᕗᖅ ᐱᒋᐊᕐᓂᖓᓂᑦ ᐱᓯᒪᔭᓯ; ᐱᖁᔭᖅ ᑐᓴᕐᓯᒪᔭᑐᖃᕆᔭᓯ.

⁸ ᑍᒤᒻᒪᑦ ᐱᖁᔭᒥᒃ ᓄᑖᒥᒃ ᑎᑎᕋᕐᕕᒋᓕᕐᐸᑦᓯ, ᓱᓕᓂᖓ ᓴᖅᑭᑎᑕᐅᖕᒪᑦ ᙭ᔅᑑᓯᒥ ᐃᓕᑦᓯᓐᓂᓗᑦᑕᐅᖅ, ᑖᕐᑐᕐᔪᐊᖅ ᐊᓂᒍᕐᒪᑦ ᖃᐅᒪᔪᕐᓗ ᓱᓕᔪᖅ ᖃᐅᒪᑎᑦᓯᓕᕇᕐᐳᖅ.

⁹ ᓇᓪᓕᐊᑦ ᖃᐅᒪᔪᒦᓐᓂᕋᕐᓗᓂ ᐅᖃᕐᐸᑦ ᐃᓅᖃᑎᒥᓂᒡᓗ ᐆᒥᓱᒡᓗᓂ ᑖᓐᓇ ᓱᓕ ᑖᕐᑐᒦᖏᓐᓇᕐᐳᖅ.

¹⁰ ᓇᓪᓕᐊᑦ ᐃᓅᖃᑎᒥᓂᒃ ᓇᒡᓕᒍᓱᒃᑐᖅ ᑖᓐᓇ ᖃᐅᒪᔪᒦᑉᐳᖅ, ᑕᕝᕙᓂᓗ ᐃᓅᖃᑎᒥᓄᑦ ᐊᒡᕕᐊᕈᑎᒃᓴᐅᓇᓂ.

¹¹ ᐃᓅᖃᑎᒥᓂᒡᓕ ᐆᒥᓱᒃᑐᖅ ᑖᓐᓇ ᑖᕐᑐᒦᑉᐳᖅ ᑖᕐᑐᒥᓗ ᐃᓅᓪᓗᓂ, ᓇᒧᖓᐅᖕᒪᖔᕐᒥᓗ ᖃᐅᔨᒪᓇᓂ, ᑖᕐᑐᒧᑦ ᐃᔨᖏᒃ ᑕᑯᓐᓇᕐᑎᑕᐅᖏᒻᒪᑎᒃ.

¹² ᕿᑐᕐᖔᐱᒃᑲ, ᑎᑎᕋᕐᕕᒋᕙᑦᓯ, ᐊᔪᕐᓂᓯ ᐃᓱᒪᒋᔪᓐᓁᕐᑕᐅᓯᒪᖕᒪᑕ ᙭ᔅᑑᓯ ᐱᑦᔪᑎᒋᓪᓗᒍ.

¹³ ᐊᑖᑕᐅᔪᓯ, ᑎᑎᕋᕐᕕᒋᕙᑦᓯ, ᑖᓐᓇ ᖃᐅᔨᒪᒐᑦᓯᐅᒃ ᐱᒋᐊᕐᓂᖓᓂᑦ ᐱᑕᕾᓐᓇᓚᐅᕐᑐᖅ. ᐃᓅᓱᒃᑑᔪᓯ ᑎᑎᕋᕐᕕᒋᕙᑦᓯ, ᑖᓐᓇ ᓵᓚᒋᓯᒪᒐᑦᓯᐅᒃ ᐱᐅᖏᑦᑐᐊᓗᒃ. ᕿᑐᕐᖓᒃᑲ ᑎᑎᕋᕐᕕᒋᕙᑦᓯ, ᐊᑖᑕ ᖃᐅᔨᒪᒐᑦᓯᐅᒃ.

¹⁴ ᐊᑖᑕᐅᔪᓯ ᑎᑎᕋᕐᕕᒋᓚᐅᕐᐸᑦᓯ, ᑖᓐᓇ ᖃᐅᔨᒪᒐᑦᓯᐅᒃ ᐱᒋᐊᕐᓂᖓᓂᑦ ᐱᑕᕾᓐᓇᓚᐅᕐᑐᖅ. ᐃᓅᓱᒃᑑᔪᓯ ᑎᑎᕋᕐᕕᒋᓚᐅᕐᐸᑦᓯ, ᐱᔪᓐᓇᕐᓂᖃᑦᓯᐊᕋᑦᓯ, ᒎᑎᐅᓪᓗ ᐅᖃᐅᓯᖓ ᐃᓗᑦᓯᓐᓃᒻᒪᑦ, ᐱᐅᖏᑦᑐᐊᓗᒡᓗ ᓵᓚᒋᓯᒪᒐᑦᓯᐅᒃ.

¹⁵ ᓯᓚᕐᔪᐊᕐᒥᒃ ᓇᒡᓕᒍᓱᖕᓂᐊᕋᓯ ᓯᓚᕐᔫᑉ ᐱᖏᓐᓂᒡᓘᓐᓃᑦ. ᓇᓪᓕᐊᑦ ᓯᓚᕐᔪᐊᕐᒥᒃ ᓇᒡᓕᒍᓱᒃᑐᖅ, ᐊᑖᑕᒥᒃ ᓇᒡᓕᒍᓱᓐᖏᓚᖅ.

¹⁶ ᒪᑯᐊ ᑕᕝᕙ ᓯᓚᕐᔪᐊᕐᒦᑦᑐᑦ, ᑎᒥᐅᑉ ᐃᒃᖠᒎᕐᓂᖏᑦ ᑕᑯᔭᒃᑯᑦ ᐱᔪᒪᔭᖃᓗᐊᕐᓃᑦ ᐃᓅᓯᒃᑯᓪᓗ ᐊᔪᖏᓐᓇᓱᒋᓗᐊᕐᓃᑦ, ᑕᒪᒃᑯᐊ ᐊᑖᑕᒥᑦ ᐱᓐᖏᓚᑦ ᓯᓚᕐᔪᐊᕐᒥᓪᓕ ᐱᕗᑦ.

¹⁷ ᓯᓚᕐᔪᐊᖅ ᓄᖑᔪᒫᕐᐳᖅ, ᐃᒃᓯᒎᕐᓃᓪᓗ ᓄᖑᔪᒫᕐᐳᑦ; ᒎᑎᐅᓪᓕ ᐱᔪᒪᔭᖓᓂᒃ ᐊᑐᕐᑐᖅ ᑖᓐᓇ ᐃᓱᖃᖏᑦᑐᒧᑦ ᐃᓅᔪᒫᕐᐳᖅ.

᙭ᔅᑑᓯᒥᒃ ᐊᑭᕋᕐᑐᕐᑐᖅ

¹⁸ ᕿᑐᕐᖓᒃᑲ, ᓯᓚᕐᔫᑉ ᓇᒡᒐᑎᒃᓴᖓ ᓇᓪᓕᐅᑎᓕᕐᐳᖅ; ᑐᓴᐅᒪᒐᑦᓯᓗ ᙭ᔅᑑᓯᒥᒃ ᐊᑭᕋᕐᑐᕐᑐᖅ ᑎᑭᓐᓂᐊᕐᓂᕋᕐᑕᐅᑎᓪᓗᒍ, ᒫᓐᓇᓕ ᙭ᔅᑑᓯᒥᒃ ᐊᑭᕋᕐᑐᕐᑐᑦ ᑎᑭᓯᒪᓕᕐᐳᑦ; ᑍᒤᒻᒪᑦ ᖃᐅᔨᒪᓕᕐᐳᒍᑦ ᓯᓚᕐᔫᑉ ᓇᒡᒐᑎᒃᓴᖓ ᓇᓪᓕᐅᑎᓕᕐᒪᑦ.

¹⁹ ᑖᒃᑯᐊ ᐅᕙᑦᑎᓐᓂᒃ ᕿᒤᕗᑦ, ᐃᓚᒋᔭᐅᓪᓚᕆᒃᓯᒪᖏᓐᓇᒥᒃ; ᐅᕙᑦᑎᓐᓄᑦ ᐃᓚᒋᔭᐅᓪᓚᕆᒃᓯᒪᒍᑎᒃ, ᐃᓚᐅᖏᓐᓇᕋᔭᓚᐅᕐᐳᑦ; ᕿᒤᓯᒪᕗᓪᓕ, ᓇᓗᓇᕈᓐᓁᖁᓪᓗᒋᑦ ᐅᕙᑦᑎᓐᓄᑦ ᐃᓚᒋᔭᐅᓪᓚᕆᒃᓯᒪᖏᓐᓂᖏᓐᓂᒃ.

²⁰ ᐃᓕᑦᓯᓕ ᐃᓗᒻᒥᕐᑕᐅᓯᒪᕗᓯ ᐃᑦᔪᕐᓁᑦᑐᒧᑦ, ᑕᒪᑦᓯᓗ ᖃᐅᔨᓯᒪᓕᕐᓗᓯ.

²¹ ᑍᒤᒻᒪᑦ ᑎᑎᕋᕐᕕᒋᕙᑦᓯ, ᓱᓕᓂᕐᒥᒃ ᖃᐅᔨᒪᖏᓐᓂᓯ ᐱᑦᔪᑎᒋᓇᒍ, ᖃᐅᔨᒪᒐᑦᓯᐅᒡᓕ, ᖃᐅᔨᒪᓪᓗᓯᓗ ᓱᓕᓐᖏᑦᑐᖅ ᓱᓕᓂᕐᒥᑦ ᐱᓯᒪᖏᒻᒪᑦ.

²² ᑭᓇᓖ ᑍᒪ ᓴᒡᓗᑐᕙ ᑖᓐᓇᐅᕗᖅ ᓇᓪᓕᐊᑦ ᔩᓱᓯᒥᒃ ᙭ᔅᑑᓯᐅᖏᓐᓂᕅᔪᖅ? ᑖᓐᓇᐅᕗᖅ ᑕᕝᕙ ᙭ᔅᑑᓯᒥᒃ ᐊᑭᕋᕐᑐᕐᑐᖅ, ᐊᑖᑕᒥᒡᓗ ᐃᕐᓂᕐᒥᒡᓗ ᖃᐅᔨᒪᖏᓐᓂᕋᕐᑐᖅ.

²³ ᓇᓪᓕᐊᑦ ᐃᕐᓂᕐᒥᒃ ᖃᐅᔨᒪᖏᓐᓂᕋᕐᑐᖅ ᐊᑖᑕᒥᒃ ᐱᖃᓐᖏᓚᖅ; ᓇᓪᓕᐊᓪᓕ ᐃᕐᓂᕐᒥᒃ ᐃᓚᓕᐅᕐᓯᔪᖅ ᐊᑖᑕᒥᒃ ᐱᖃᕆᕗᖅ.

²⁴ ᐱᒋᐊᕐᓂᖓᓂᑦ ᑐᓴᕐᓯᒪᔭᓯ ᐃᓕᑦᓯᓃᖏᓐᓇᕐᓕ. ᐱᒋᐊᕐᓂᖓᓂᑦ ᑐᓴᕐᓯᒪᔭᓯ ᐱᓯᒤᓐᓇᕈᑦᓯᐅ, ᑕᕝᕙ ᐃᕐᓂᕐᒦᖏᓐᓇᕐᓂᐊᕐᐳᓯ ᐊᑖᑕᒦᓪᓗᓯᓗ

²⁵ ᑕᒪᓐᓇ ᑕᕝᕙ ᑐᓂᓂᐊᕐᓂᕋᕐᓯᒪᔭᖓ ᐅᕙᑦᑎᓐᓄᑦ ᐃᓅᓯᖅ ᓄᖑᓱᐃᑦᑐᖅ.

²⁶ ᑕᒪᒃᑯᓂᖓ ᑎᑎᕋᕐᕕᒋᕙᑦᓯ ᐃᓕᑦᓯᓐᓂᒃ ᑕᒻᒪᕐᑎᑦᓯᓇᓱᐊᕐᑐᑦ ᐱᑦᔪᑎᒋᓪᓗᒋᑦ.

²⁷ ᐃᓕᑦᓯᓕ, ᑖᑦᓱᒪᓐᖓᑦ ᐅᕐᓱᕐᑎᕐᑕᐅᓯᒪᓂᓯ ᐱᓯᒤᓐᓇᕈᑦᓯᐅᒃ, ᑭᓇᒧᓪᓘᓃᑦ ᐊᔪᕆᕐᑐᕐᑕᐅᔭᕆᐊᖃᕋᔭᓐᖏᓚᓯ. ᑖᑦᓱᒪᓕ ᐅᕐᓱᕐᑎᑕᐅᓯᒪᓂᑦᓯ ᐊᔪᕆᕐᓱᒐᕆᓕᕐᒪᓯ ᓱᓇᑐᐃᓐᓇᕐᓂᒃ, ᑕᒪᓐᓇᓗ ᓱᓕᓪᓗᓂ, ᓴᒡᓗᓂᕐᑕᖃᕋᓂᓗ; ᐊᔪᕆᕐᓲᕐᑎᒋᓯᒪᒐᑦᓯᐅᒃ ᑖᑦᓱᒪᓃᖏᓐᓇᓕᕆᑦᓯ.

²⁸ ᒫᓐᓇᓗ ᕿᑐᕐᖓᒃᑲ, ᑖᑦᓱᒪᓃᑦᓮᓐᓇᕆᑦᓯ, ᑖᓐᓇ ᓴᖅᑭᑉᐸᑦ ᓯᕘᕋᑦᔪᑎᒃᓴᖃᖁᓇᑕ ᑲᓐᖑᓲᑎᒃᓴᖃᖁᓇᑕᓗ ᑖᑦᓱᒪ ᑎᑭᕝᕕᐊᓂ.

²⁹ ᖃᐅᔨᒪᒍᑦᓯ ᑭᓇᒧᓪᓘᓐᓃᑦ ᐃᓗᐊᕐᑑᓂᖓᓂᒃ, ᑕᕝᕙ ᖃᐅᔨᒪᒋᕗᓯ ᑭᒃᑯᓕᒫᑦ ᐃᓗᐊᕐᑐᒥᒃ ᐱᓇᓱᐊᕐᑐᑦ ᑖᑦᓱᒪᖓᑦ ᐃᕐᓂᐊᖑᓯᒪᖕᒪᑕ.