ᑯᕆᓐᑎᐊᒥᐅᓄᑦ ᓯᕗᓪᓖᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᑲᑎᑎᑕᐅᓂᕐᒧᑦ ᐊᐱᕐᓲᑏᑦ

¹ ᑎᑎᕋᐅᓯᕆᓚᐅᕐᑕᓯ ᒥᒃᓵᓄᑦ ᑎᑎᕋᕈᑎᖃᕐᓂᐊᕐᐳᖓ. ᐊᖑᑦ ᐊᕐᓇᒥᒃ ᓄᓕᐊᕐᓂᒃᑯᑦ ᐊᒃᑐᐃᖏᒃᑯᓂ ᐊᑲᐅᔪᒥᒃ ᐱᕗᖅ.

² ᓄᓕᐊᕈᒪᓂᑯᓪᓕ ᐱᔪᒥᓵᕐᑕᐅᓇᕐᑐᖃᕐᓂᖓᓄᑦ, ᐊᖑᑏᑦ ᓇᖕᒥᓂᖅ ᐊᑐᓂᑦ ᓄᓕᐊᖃᕐᑐᒃᓴᐅᕗᑦ; ᐊᕐᓁᓪᓗ ᓇᖕᒥᓂᖅ ᐊᑐᓂᑦ ᐅᐃᖃᕐᓗᑎᒃ.

³ ᐊᖑᑎᐅᑉ ᐅᐃᒋᔭᐅᓂᕐᒥᓄᑦ ᐊᑐᕆᐊᖃᕐᑕᓂ ᓄᓕᐊᒥᓄᑦ ᐊᑐᑦᓯᐊᕐᓕᐅᒃ, ᐊᕐᓇᐅᓪᓗ ᓄᓕᐊᕆᔭᐅᓂᕐᒥᓄᑦ ᐊᑐᕆᐊᖃᕐᑕᓂ ᐅᐃᒥᓄᑦ ᐊᑐᑦᓯᐊᕐᓕᐅᒃ, ᐊᑐᓂᓪᓗ ᐱᔭᕆᐊᖃᕐᑕᒥᖕᓂᒃ ᓈᒻᒪᒃᓯᑎᖃᑦᑕᐅᑎᑦᓯᐊᕐᓗᑎᒃ.

⁴ ᐅᐃᓕᒃ ᑎᒥᒥᓄᑦ ᐊᖓᔪᖅᑳᖑᖏᒻᒪᑦ, ᐅᐃᖓᓕ ᐊᖓᔪᖅᑳᖑᕗᖅ; ᑍᒫᒃᑕᐅᖅ ᓄᓕᐊᓕᒃ ᑎᒥᒥᓄᑦ ᐊᖓᔪᖅᑳᖑᖏᓐᓂᕗᖅ, ᓄᓕᐊᖓᓕ ᐊᖓᔪᖅᑳᖑᕗᖅ.

⁵ ᑍᒤᒻᒪᑦ ᓄᓕᐊᕇᖑᔪᓯ ᐃᓕᑦᓯᓐᓄᑦ ᐱᑦᑍᓕᖃᑦᑕᐅᑎᓂᐊᕋᓯ ᑭᓯᐊᓂ ᐊᖏᖃᑎᒌᒃᑯᑦᓯ ᑍᒤᓕᐅᕈᒪᖏᓪᓗᓯ ᓯᕕᑭᑦᑐᒥᒃ, ᑐᒃᓯᐊᕐᓂᕐᒥᒃ ᐱᕕᒃᓴᖃᖔᕈᒪᓂᕐᒧᑦ; ᑭᖑᓂᖓᒍᓪᓕ ᐅᑎᖃᑦᑕᐅᑎᑦᓯᐊᕐᑐᒃᓴᐅᒋᕗᓯ, ᓵᑖᓇᓯᐅᑉ ᐆᒃᑐᕐᓗᐃᓂᖓᓂᑦ ᐃᓕᑦᓯᓐᓂᒃ ᓴᐳᑎᓯᒪᓂᐊᕋᑦᓯ ᐃᒃᓯᒎᕐᑍᓕᔪᓐᓇᖏᓐᓇᑦᓯ.

⁶ ᑍᒫᒃ ᐱᖁᔨᓪᓚᕆᒡᓗᖓ ᐅᖃᓐᖏᓚᖓ, ᑍᒫᒡᓕ ᐱᔪᒪᒍᑦᓯ ᐱᕕᒃᓴᖃᕐᑎᑐᐃᓐᓇᕐᐸᑦᓯ.

⁷ ᐱᖁᔨᖔᕋᓗᐊᕐᐳᖓᓕ ᐃᓘᓐᓇᑎᒃ ᐅᕙᑦᑐᑦ ᑍᒤᖁᓪᓗᒋᑦ; ᑭᓯᐊᓂᓕ ᒎᑎᐅᑉ ᑐᓂᕐᕈᓯᐊᖃᕐᑎᒻᒪᒋᑦ ᐊᑐᓂᑦ ᐊᑦᔨᐅᖏᑦᑐᒥᒃ, ᐃᓚᖓᑦ ᐊᑦᔨᒌᖏᑦᑐᓂᒃ ᑐᓂᕐᕈᓯᐊᖃᕐᐳᖅ ᐃᓚᖓᓪᓗ ᐊᓯᐊᓂᒃ ᑐᓂᕐᕈᓯᐊᖃᕆᓪᓗᓂ.

⁸ ᒫᓐᓇᓕ ᐂᑉᐸᖃᖏᑦᑐᑦ ᐅᐃᒡᒐᕐᓃᓪᓗ ᐅᖃᐅᑎᕙᒃᑲ ᐃᓕᑦᓯᓐᓄᑦ ᐊᑲᐅᕗᖅ ᐃᓄᑑᖏᓐᓇᕈᑦᓯ ᐅᕙᑦᑐᑦ.

⁹ ᐱᔪᒪᓂᑦᓯᓐᓂᒡᓕ ᓄᖅᑲᖓᑎᑦᓯᔪᓐᓇᖏᒃᑯᑦᓯ, ᐂᑉᐸᕐᑖᕐᑐᒃᓴᐅᕗᓯ, ᐂᑉᐸᖃᕐᓂᖅ ᐊᑲᐅᓂᕐᓴᐅᖕᒪᑦ ᐃᒃᓯᒎᕐᓂᕐᒧᑦ ᓵᓚᐅᓂᕐᒥᑦ.

¹⁰ ᐂᑉᐸᖃᕐᑐᓄᓪᓕ ᐃᒫᒃ ᐱᖁᔨᕗᖓ, ᐅᕙᒐᐅᖏᑦᑐᖅ ᐊᑕᓂᕐᓕ ᐱᖁᔨᕗᖅ, ᐊᕐᓇᖅ ᐅᐃᒥᓂᒃ ᕿᒤᔪᒃᓴᐅᓐᖏᓚᖅ;

¹¹ ᕿᒤᒃᐸᓪᓕ, ᐂᑉᐸᕐᑖᕐᑐᒃᓴᐅᓐᖏᓚᖅ ᐅᕝᕙᓘᓐᓃᑦ ᐅᐃᒥᓄᑦ ᐋᖅᑭᐅᑎᑦᓯᐊᕐᓗᓂ ᐅᑎᖔᕐᓕ; ᐊᖑᑎᐅᓪᓗ ᓄᓕᐊᓂ ᐊᕕᑕᒃᓴᕆᓐᖏᓛ.

¹² ᐊᓯᖏᓐᓄᓪᓕ ᐅᖃᕐᐳᖓ, ᐅᕙᓐᓂᑦ ᐱᔪᒥᒃ ᐊᑕᓂᕐᒥᐅᖏᑦᑐᖅ; ᐅᒃᐱᕐᑐᖅ ᐊᖑᑦ ᐅᒃᐱᖏᑦᑐᒥᒃ ᓄᓕᐊᖃᕈᓂ, ᑖᑦᓱᒪᓗ ᑲᑎᒪᔪᒪᒃᐸᒍ, ᐊᕕᑕᒃᓴᕆᓐᖏᓛ.

¹³ ᐅᒃᐱᕐᑐᕐᑕᐅᖅ ᐊᕐᓇᖅ ᐅᒃᐱᖏᑦᑐᒥᒃ ᐅᐃᖃᕈᓂ, ᑖᑦᓱᒪᓗ ᑲᑎᒪᔪᒪᒃᐸᒍ, ᐊᕕᑕᒃᓴᕆᓐᖏᓛ.

¹⁴ ᐅᒃᐱᖏᑦᑐᖅ ᐊᖑᑦ ᓄᓕᐊᒥᓂᒃ ᑲᑎᒪᒃᓯᓂᕐᒥᒍᑦ ᐃᑦᔪᕐᓁᑎᑕᐅᓕᕐᒪᑦ, ᐅᒃᐱᖏᑦᑐᕐᓗ ᐊᕐᓇᖅ ᐅᐃᒥᓂᒃ ᑲᑎᒪᒃᓯᓂᕐᒥᒍᑦ ᐃᑦᔪᕐᓁᑎᑕᐅᒋᕗᖅ. ᑍᒤᖏᑉᐸᑦ ᕿᑐᕐᖓᓯ ᓇᕐᕈᓇᕐᑑᓂᕋᕐᑕᐅᒐᔭᕐᐳᑦ, ᒫᓐᓇᓕ ᐃᑦᔪᕐᓁᑉᐳᑦ.

¹⁵ ᐅᒃᐱᖏᑦᑐᕐᓕ ᐂᑉᐸᒥᓂᒃ ᐊᕕᑦᓯᔪᒪᒃᐸᑦ, ᐊᕕᑦᓯᓕ; ᐅᒃᐱᕐᑐᖅ ᐊᖑᑦ ᐊᕐᓇᕐᓘᓐᓃᑦ ᐂᑉᐸᕇᖕᓂᕐᒧᑦ ᑍᒤᑦᑐᒧᑦ ᕿᓚᒃᓱᕐᓯᒪᓐᖏᓚᖅ. ᒎᑎᐅᓪᓕ ᕾᖁᓯᒪᕚᑎᒍᑦ ᐃᓱᒫᓘᑎᖃᖁᓇᑕ.

¹⁶ ᓄᓕᐊᕆᔭᐅᔪᑎᑦ ᖃᐅᔨᒪᕖᑦ ᐅᐃᑦ ᐱᐅᓕᔪᓐᓇᕐᒪᖔᕐᐱᐅᒃ? ᐅᕝᕙᓗ ᐅᐃᒋᔭᐅᔪᑎᑦ ᖃᐅᔨᒪᕖᑦ ᓄᓕᐊᑦ ᐱᐅᓕᔪᓐᓇᕐᒪᖔᕐᐱᐅᒃ?

ᒎᑎᐅᑉ ᕾᖁᓯᒪᒃᐸᓯ ᕾᖁᔭᐅᕕᒋᓯᒪᔭᑦᓯᓃᒋᑦᓯ

¹⁷ ᐃᓄᓕᒫᑦ ᐊᑐᓂᑦ ᐊᑕᓂᐅᑉ ᑐᓂᓯᒪᔭᖓᓂᒃ ᐃᓅᓯᖃᕐᓕᑦ, ᒎᑎᒧᓪᓗ ᕾᖁᔭᐅᓯᒪᕕᖕᒥᓃᓪᓗᑎᒃ. ᑕᒪᑦᔭ ᐊᑐᕐᑕᐅᖁᔭᕋ ᐃᓚᒌᒃᑐᓂ ᑕᒤᓐᓂ.

¹⁸ ᓇᓪᓕᐊᑦ ᕾᖁᔭᐅᓯᒪᕚ ᑭᐱᔭᐅᓯᒪᑎᓪᓗᒍ? ᑕᕝᕙ ᑭᐱᔭᐅᓯᒪᓂᖓᑕ ᕿᓕᕈᖓ ᐲᕋᓱᐊᕋᒃᓴᕆᓐᖏᓛ. ᑭᐱᔭᐅᓯᒪᖏᑦᑐᕐᓗ ᕾᖁᔭᐅᒍᓂ ᑭᐱᔭᐅᓇᓱᐊᕐᑐᒃᓴᐅᓐᖏᓚᖅ.

¹⁹ ᑭᐱᔭᐅᓯᒪᓂᖅ ᐊᑐᓐᖏᓚᖅ ᑭᐱᔭᐅᓯᒪᖏᓐᓂᕐᓗ ᐊᑐᖏᓐᓂᕗᖅ, ᒎᑎᐅᓪᓕ ᐱᖁᔭᖏᓐᓂᒃ ᓈᓚᖕᓂᖅ ᐊᑐᕐᑐᑑᕗᖅ.

²⁰ ᐃᓄᒡᓕ ᕾᖁᔭᐅᓯᒪᕕᖕᒥᓂ ᑕᕝᕙᓃᖏᓐᓇᕐᑐᒃᓴᐅᕗᑦ.

²¹ ᐃᓄᖕᒧᑦ ᓂᐅᕕᐊᖑᓗᑎᑦ ᓇᖕᒥᓂᕐᑖᕆᔭᐅᓗᑎᑦ ᕾᖁᔭᐅᒍᕕᑦ ᑕᒪᓐᓇ ᖃᓄᐃᓐᖏᓚᖅ. ᓂᐅᕕᕐᑕᐅᓯᒪᓂᕐᒥᓪᓕ ᕿᓚᕈᑦᔮᕈᓐᓇᕈᕕᑦ, ᐱᕕᒃᓴᖃᕐᓂᕆᔧᑦ ᐊᑐᑦᓯᐊᕋᓱᐊᕈᒃ.

²² ᐃᓄᖕᒧᑦ ᓂᐅᕕᐊᖑᓯᒪᑎᓪᓗᒍ ᐊᑕᓂᕐᒧᑦ ᕾᖁᔭᐅᔪᖅ ᐊᑕᓂᐅᑉ ᐱᒋᔭᐅᔪᓐᓃᕐᑎᒻᒪᒍ. ᑍᒫᒃᑕᐅᖅ ᐃᓄᖕᒧᑦ ᓂᐅᕕᐊᖑᓯᒪᑎᓐᓇᒍ ᕾᖁᔭᐅᔪᖅ ᙭ᔅᑑᓯᐅᑉ ᓇᖕᒥᓂᕐᑖᕆᕚ.

²³ ᐊᑭᑐᔪᒥᒃ ᓂᐅᕕᐊᖑᓯᒪᒐᑦᓯ; ᑍᒤᒻᒪᑦ ᐃᓄᖕᓄᑦ ᓇᖕᒥᓂᕐᑖᖑᓗᓯ ᐱᒋᔭᐅᓕᕐᓂᐊᕋᓯ.

²⁴ ᑍᒤᒻᒪᑦ ᐃᓚᒃᑲ, ᐃᓕᑦᓯ ᐊᑐᓂᑦ ᖃᓄᐃᑦᑑᑎᓪᓗᓯ ᕾᖁᔭᐅᓯᒪᓐᓂᕈᑦᓯ, ᒎᑎᒦᓪᓗᓯ ᕾᖁᔭᐅᑉᕕᒋᔭᑦᓯᓐᓃᖏᓐᓇᕆᑦᓯ.

ᐂᑉᐸᖃᖏᑦᑐᑦ ᐅᐃᒐᕐᓃᓪᓗ ᐊᐱᕐᓲᑕᐅᓂᖓᑦ

²⁵ ᐅᐃᖃᖏᑦᑐᓪᓕ ᐱᑦᔪᑎᒋᓪᓗᒋᑦ, ᐊᑕᓂᕐᒥᑦ ᐱᔪᒥᒃ ᐱᖁᔭᒥᒃ ᐅᖃᐅᓯᒃᓴᖃᓐᖏᓚᖓ ᑖᒃᑯᓄᖓ, ᑭᓯᐊᓂᓕ ᐃᓱᒪᒋᔭᓐᓂᒃ ᐅᖃᕐᐳᖓ ᐊᑕᓂᐅᑉ ᓂᑲᒍᓱᖕᓂᕐᒥᓄᑦ ᐅᒃᐱᕆᔭᒃᓴᐅᔪᓐᓇᕐᑎᒻᒪᖓ.

²⁶ ᒫᓐᓇᐅᔪᖅ ᐅᖁᒤᓐᓇᕐᓂᖓ ᐱᑦᔪᑎᒋᓪᓗᒍ, ᐃᓱᒪᕗᖓ ᐃᓄᒃ ᑍᒤᓕᖓᑐᐃᓐᓇᕈᓂ ᒫᓐᓇᒃᑯᑦ ᖃᓄᐃᓐᖏᓚᖅ.

²⁷ ᓄᓕᐊᖃᕈᕕᑦ ᐊᕕᓐᓇᓱᐊᕐᓂᐊᕐᓇᒍ. ᓄᓕᐊᖃᖏᒃᑯᕕᓪᓕ ᓄᓕᐊᒃᓴᕐᓯᐅᕐᓂᐊᕐᓇᒃ.

²⁸ ᐂᑉᐸᕐᑖᕈᕕᓪᓕ ᐊᔪᕐᑐᓕᓐᖏᓚᑎᑦ; ᐊᕐᓇᕐᓗ ᐅᐃᑖᕐᐸᑦ ᐊᔪᕐᑐᓕᓐᖏᓚᖅ. ᐂᑉᐸᕐᑖᕐᑐᓪᓕ ᐅᖁᒤᓐᓇᕐᑐᓄᑦ ᐅᓄᕐᑐᓄᑦ ᑎᑭᐅᑎᖃᑦᑕᕐᓂᐊᕐᐳᑦ, ᐃᓕᑦᓯᓕ ᑍᒤᖁᖏᒃᑲᓗᐊᕐᐸᑦᓯ.

²⁹ ᐃᓚᒃᑳ, ᐃᒫᒃ ᐅᖃᕋᓱᐊᕐᐳᖓ, ᐱᕕᒃᓴᕗᑦ ᓯᕕᑭᑦᑑᓕᕐᒪᑦ; ᒫᓐᓇᒥᑦ ᐱᒋᐊᕐᓗᒍ, ᐂᑉᐸᖃᕐᑐᑦ ᐂᑉᐸᖃᖏᑦᑐᑎᑐᑦ ᑍᒤᓕᕐᓕᑦ,

³⁰ ᕿᒃᓵᒃᑎᑕᐅᔪᓪᓗ ᕿᒃᓵᖏᑦᑐᑎᑐᑦ ᑍᒤᓕᕐᓕᑦ, ᖁᕕᐊᓱᒃᑐᓪᓗ ᖁᕕᐊᓱᖏᑦᑐᑎᑐᑦ ᑍᒤᓕᕐᓕᑦ, ᓂᐅᕕᕐᑐᓪᓗ ᓂᐅᕕᐊᒥᖕᓂᒃ ᐱᑖᖏᑦᑐᑎᑐᑦ ᑍᒤᓕᕐᓕᑦ,

³¹ ᓯᓚᕐᔪᐊᕐᒥᐅᓪᓗ ᐱᒋᔭᖏᓐᓂᒃ ᐱᓇᓱᐊᕈᑎᖃᕐᑐᑦ ᑕᒪᒃᑯᓄᖓ ᐱᓇᓱᐊᖏᑦᑐᑎᑐᑦ ᑍᒤᓕᕐᓕᑦ. ᓯᓚᕐᔪᐊᑉ ᒫᓐᓇ ᐱᐅᓯᖓ ᐊᓂᒍᕐᐸᓪᓕᐊᓕᕐᒪᑦ.

³² ᐃᓱᒪᔮᕈᑎᒃᓴᖃᖁᓐᖏᓚᑦᓯ. ᐊᖑᑦ ᓄᓕᐊᖃᖏᑦᑐᖅ ᐃᓱᒫᒋᔭᖃᖕᓂᕐᓴᐅᖕᒪᑦ ᐊᑕᓂᐅᑉ ᐱᖏᓐᓂᒃ, ᐊᑕᓂᕐᒥᒡᓗ ᖁᕕᐊᓱᒃᑎᑦᓯᔪᒪᓪᓗᓂ;

³³ ᐊᖑᓪᓕ ᓄᓕᐊᖃᕐᑐᖅ ᓯᓚᕐᔪᐊᑉ ᐱᖏᓐᓂᒃ ᐃᓱᒫᒋᔭᖃᕐᓂᕐᓴᐅᕗᖅ, ᓄᓕᐊᓂ ᖁᕕᐊᓱᒃᑎᑦᓱᒪᓪᓗᒍ,

³⁴ ᐃᓱᒪᒋᔭᒃᓴᖏᓪᓗ ᐊᕕᒃᓯᒪᕗᑦ. ᐊᕐᓇᕐᓕ ᐅᐃᖃᖏᑦᑐᖅ, ᓂᕕᐊᕐᓯᐊᕕᓂᕐᓘᓐᓃᑦ ᐊᑕᓂᐅᑉ ᐱᖏᓐᓂᒃ ᐃᓱᒫᒋᔭᖃᕐᓂᕐᓴᐅᕗᖅ, ᐃᑦᔪᕐᓁᑦᓱᒪᓪᓗᓂ ᑎᒥᒥᒍᑦ ᐊᓂᕐᓂᕐᒥᒍᓪᓗ; ᐊᕐᓇᕐᓕ ᐅᐃᓕᒃ ᓯᓚᕐᔪᐊᑉ ᐱᖏᓐᓂᒃ ᐃᓱᒫᒋᔭᖃᕐᓂᕐᓴᐅᕗᖅ, ᐅᐃᓂ ᖁᕕᐊᓱᖁᓪᓗᒍ.

³⁵ ᑍᒫᒃ ᐅᖃᕐᐳᖓ ᐃᑲᔪᕐᑕᐅᑦᔪᑎᒃᓴᑦᓯᓐᓄᑦ, ᐱᑦᑍᓕᑎᓐᓇᓱᐊᓐᖏᓚᑦᓯ, ᐱᓂᐊᕐᓂᓯᓕ ᐋᖅᑭᑦᓯᐊᕐᓯᒪᖁᓪᓗᒍ ᐊᑕᓂᕐᒧᓪᓗ ᑕᒤᓐᓂᒃ ᑐᓂᓯᒪᖁᓪᓗᓯ ᓱᓇᒧᑦ ᐊᒡᕕᐊᕐᑕᐅᖏᓪᓗᓯ.

³⁶ ᓇᓪᓕᐊᓪᓗ ᓄᓕᐊᒃᓴᒥᓄᑦ ᓈᒻᒪᖏᑦᔪᑎᒃᓴᖃᕋᓱᒋᒍᓂ ᐊᖏᖃᑎᒌᒍᑎᒋᓯᒪᔭᖏᑕ ᐅᓪᓗᖏᓐᓄᑦ, ᐊᕐᕌᒍᖏᓪᓗ ᓈᒻᒪᓕᕐᐸᑕ, ᑲᑎᔭᕆᐊᖃᕋᓱᒋᒍᑎᒡᓗ ᐃᓱᒪᒥᖕᓂᒃ ᐱᔪᒃᓴᐅᕘᒃ, ᓄᓕᐊᕐᑖᕇᒡᓗᑎᒃ ᐊᔪᕐᑐᓕᓐᖏᓚᒃ.

³⁷ ᓇᓪᓕᐊᑦᑕᓗ ᐃᓱᒪᓂ ᐋᖅᑭᒃᓯᒪᒍᓂᐅᒃ, ᐱᔪᒪᓂᕐᔪᐊᒥᓄᑦ ᓵᓚᐅᓯᒪᖏᓪᓗᓂ ᐱᔪᒪᓂᓂ ᓄᖅᑲᕐᑎᓯᒪᔪᓐᓇᕈᓂᐅᒃ, ᓄᓕᐊᒃᓴᓂ ᑲᑎᔪᒪᖏᓪᓗᒍ ᑐᑭᑖᕐᓯᒪᒍᓂ ᑖᓐᓇ ᓈᒻᒪᒃᑐᒥᒃ ᐱᒋᕗᖅ.

³⁸ ᓄᓕᐊᒃᓴᒥᓂᒃ ᓄᓕᐊᓂᒃᑐᖅ ᓈᒻᒪᒃᑐᒥᒃ ᐱᕗᖅ, ᓄᓕᐊᒃᓴᒥᓂᒡᓕ ᓄᓕᐊᓂᖏᑦᑐᖅ ᓈᒻᒪᖕᓂᕐᓴᒥᒃ ᐱᕗᖅ.

³⁹ ᐊᕐᓇᖅ ᐅᐃᓕᒃ ᐅᐃᒥᓄᑦ ᕿᓚᒃᓱᕐᓯᒪᕗᖅ ᐃᓅᓂᖓᓂ. ᐅᐃᖓᓕ ᑐᖁᒃᐸᑦ, ᓇᓪᓕᐊᓐᓂᑐᐃᓐᓇᖅ ᐅᐃᑖᕆᔪᒪᔭᒥᓂᒃ ᐅᐃᑖᕈᓐᓇᕐᓯᕗᖅ, ᑭᓯᐊᓂᓕ ᐊᑕᓂᕐᒥᐅᑕᐅᔪᒃᓴᐅᕗᖅ.

⁴⁰ ᐃᓱᒪᒋᕙᕋᓕ, ᖁᕕᐊᓱᖕᓂᕐᓴᐅᒐᔭᕐᐳᖅ ᐅᐃᑖᖏᒃᑯᓂ ᑍᒫᒡᓗ ᐃᓱᒪᖃᕐᑎᓪᓗᖓ ᒎᑎᐅᑉ ᐊᓂᕐᓂᖓᓂᒃ ᐱᖃᕋᓱᒋᕗᖓ.