ᑯᕆᓐᑎᐊᒥᐅᓄᑦ ᓯᕗᓪᓖᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᓈᒻᒪᖏᑦᑐᑦ ᐃᓕᖅᑯᓯᐅᔪᑦ ᐅᒃᐱᕐᑑᖃᑎᒌᓂ

¹ ᐅᖃᐅᓯᐅᓪᓚᕆᒃᓯᒪᖕᒪᑦ ᓄᓕᐊᕐᓂᑰᕐᑐᒥᒃ ᐊᑐᒐᒃᓴᐅᖏᑦᑐᒥᒃ ᐃᓗᐊᖏᑦᔪᑎᖃᕐᓂᕋᕐᑕᐅᑎᓪᓗᓯ, ᐅᒃᐱᖏᑦᑑᒐᓗᐊᓂᑦ ᐱᐅᓯᕆᔭᐅᓲᖑᖏᑦᑐᒥᒃ; ᐃᓕᑦᓯᓐᓂᒎᖅ ᐊᑖᑕᒥ ᓄᓕᐊᖓᓂᒃ ᓄᓕᐊᖃᖃᑕᐅᔪᖃᖃᑦᑕᓕᕐᒪᑦ.

² ᐱᐅᔪᕆᕗᓯ! ᕿᒃᓵᒍᑎᒋᔭᕆᐊᖃᒃᖏᓚᓯᐅᒃ? ᑍᓐᓇ ᑍᒤᓕᐅᕐᑐᖅ ᐃᓚᒋᔪᓐᓃᕐᓯᐅᒃ.

³ ᑎᒥᒃᑯᑦ ᓇᔪᖏᒃᑲᓗᐊᕐᓗᓯ ᐊᓂᕐᓂᒃᑯᓪᓕ ᐃᓚᒋᕙᑦᓯ, ᓇᔪᕐᓗᓯ ᓲᕐᓗ ᑍᓐᓇ ᑍᒤᓕᐅᕐᑐᖅ ᐃᖅᑲᕐᑐᕐᑕᐅᓂᕐᒧᑦ ᑐᓂᔭᕇᕐᐸᕋ.

⁴ ᑲᑎᒪᓕᕌᒐᑦᓯ ᐊᑕᓂᑦᑕ ᔩᓱᓯᐅᑉ ᐊᑎᖓᓂ ᐃᓚᒋᕙᒃᐸᑦᓯ ᐊᓂᕐᓂᒃᑯᑦ, ᐊᑕᓂᑦᑕᓗ ᔩᓱᓯᐅᑉ ᐱᔪᓐᓇᕐᓂᖓᓄᑦ ᓇᔪᕐᑕᐅᓂᑦᑎᓐᓄᑦ,

⁵ ᐊᖑᑦ ᑍᓐᓇ ᑍᒤᓕᐅᕐᑐᖅ ᓵᑖᓇᓯᒧᑦ ᑐᓂᓕᕐᓯᐅᒃ ᑎᒥᖓ ᐊᓯᕈᕐᑕᐅᓂᐊᕐᒪᑦ, ᑕᕐᓂᖓᓕ ᐱᐅᓕᔭᐅᖁᓪᓗᒍ ᐊᑕᓂᐅᑉ ᔩᓱᓯᐅᑉ ᐅᓪᓗᒃᓴᖓᓂ.

⁶ ᐱᐅᓱᒋᓂᓯ ᓈᒻᒪᖏᒻᒪᑦ. ᖃᐅᔨᒪᓐᖏᓚᓰ ᐳᕙᓪᓚᕐᓯᐊᒃᓴᐅᑉ ᒥᑭᑦᔫᑉ ᓂᐊᖂᔭᒃᓴᓕᒫᖅ ᐳᕙᓪᓚᕐᑎᑉᐸᓐᖕᒪᒍ?

⁷ ᐳᕙᓪᓚᕐᓯᐊᒃᓴᑐᖃᖅ ᐊᔪᕐᓂᕐᒦᑦᔪᑎᒋᓚᐅᕐᑕᓯ ᐲᔭᓕᕐᓯᐅᒃ ᓄᑖᒥᒃ ᓂᐊᖂᔭᒃᓴᐅᓂᐊᕋᑦᓯ ᐳᕙᓪᓚᖅᑯᑎᖃᖏᑦᑐᒥᒃ, ᖃᐅᔨᒪᕗᖓ ᐳᕙᓪᓚᖅᑯᑎᖃᖏᑦᑑᒐᑦᓯ. ᖄᖏᕐᑕᐅᕕᖕᒥ ᓇᓪᓕᐅᓐᓂᕐᓯᐅᕐᓂᕗᑦ ᐱᔭᕇᕐᓯᒪᓕᕐᒪᑦ, ᓄᕐᕋᐅᔮᕐᑐᖁᑎᕗᑦ ᙭ᔅᑑᓯ ᑐᓂᕐᕈᑕᐅᔭᕇᕐᓯᒪᓕᕐᒪᑦ.

⁸ ᑍᒤᒻᒪᑦ ᓇᓪᓕᐅᓐᓂᕐᓯᐅᕐᓂᖅ ᐊᑐᓕᕐᓚᕗᑦ, ᐳᕙᓚᕐᓯᐊᒃᓴᑐᖃᖅ ᐊᔪᕐᓂᕐᒦᑦᔪᑎᒋᔭᕗᑦ ᐱᐅᖏᑦᑐᓕᓂᖅ ᐊᑐᖏᓪᓗᒍ, ᐳᕙᓪᓚᖅᑯᑎᖃᖏᑦᑐᒥᒡᓕ ᓂᐊᖂᔭᕐᒥᒃ ᐃᑦᔪᕐᓁᑦᑐᒥᒃ ᓱᓕᑦᓯᐊᕐᓂᕐᒥᒡᓗ ᐱᖔᓕᕐᑕ.

⁹ ᑎᑎᕋᕐᕕᒋᓚᐅᕆᕙᑦᓯ ᐃᓚᖃᖁᓇᓯ ᓄᓕᐊᕐᓂᕐᒥᒃ ᐊᑐᕐᓂᕐᓗᒃᐸᒃᑐᒥᒃ;

¹⁰ ᐅᖃᐅᓯᖃᓚᐅᓐᖏᓚᖓᓕ ᐅᒃᐱᖏᑦᑐᓂᒃ ᓄᓕᐊᕐᓂᕐᒥᒃ ᐊᑐᕐᓂᕐᓗᒃᐸᒃᑐᓂᒃ, ᐱᔪᒪᓂᕐᔪᐊᒧᓪᓗ ᐊᐅᓚᑕᐅᔪᓂᒃ, ᑎᒡᓕᑐᔪᓂᒡᓘᓐᓃᑦ, ᒎᑎᓐᖑᐊᓄᓪᓘᓐᓃᑦ ᑐᒃᓯᐊᕐᕕᖃᕐᑐᓂᒃ, ᑕᒪᒃᑯᓂᖓ ᐅᖃᐅᓯᖃᓚᐅᕈᒪ ᓯᓚᕐᔪᐊᕐᒥᒃ ᕿᒤᓪᓚᕆᒃᓗᓯ ᑭᓯᐊᓂᐅᒐᔭᕐᐳᖅ.

¹¹ ᐃᒫᒡᓕ ᐅᖃᕋᓱᐊᓚᐅᕐᐳᖓ ᐃᓚᖃᖁᓇᓯ ᐅᒃᐱᕐᑑᖃᑕᐅᓂᕋᕐᑐᒥᒃ ᓄᓕᐊᕐᓂᕐᒥᒡᓗ ᐊᑐᕐᓂᕐᓗᒃᑎᐅᔪᒥᒃ, ᐱᔪᒪᓂᕐᔪᐊᒧᓪᓗ ᐊᐅᓚᑕᐅᓲᖑᔪᒥᒃ, ᒎᑎᓐᖑᐊᓄᓪᓗ ᑐᒃᓯᐊᕐᑎᐅᔪᒥᒃ, ᐅᖃᕐᓂᕐᓗᒃᑎᐅᓪᓗᓂ, ᐋᖓᔮᕐᑎᐅᔪᒥᒃ, ᑎᒡᓕᒃᑎᐅᓲᖑᔪᒥᒡᓗ. ᑍᒤᑦᑐᑦ ᐊᒡᓛᑦ ᓂᕆᖃᑎᒋᔭᒃᓴᕆᓐᖏᓚᓯ.

¹² ᐃᓱᒪᓇᓐᖏᓚᕐᓘᓐᓃᑦ ᐅᒃᐱᕐᑑᖃᑎᒌᑦ ᐃᓚᒋᓐᖏᑕᖓᓐᓂᒃ ᐃᖅᑲᕐᑐᐃᓇᓱᐊᕈᒪ, ᒎᑎᐅᓪᓕ ᐃᖅᑲᕐᑐᕈᒫᕐᒪᒋᑦ. ᐅᒃᐱᕐᑑᖃᑎᒌᓄᑦ ᐃᓚᒋᔭᐅᔪᓂᒃ ᐃᖅᑲᕐᑐᐃᔪᒃᓴᐅᓐᖏᓚᓰ?

¹³ ᐊᒡᓔᑦ ᐅᖃᕐᒪᑕ, “ᐃᓄᒃ ᐊᔪᕐᑐᓕᔪᖅ ᐃᓚᒌᖕᓂᑦᓯᓐᓂᑦ ᐊᓂᑎᓯᐅᒃ.”