ᑯᕆᓐᑎᐊᒥᐅᓄᑦ ᓯᕗᓪᓖᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᒥᒃ ᐱᔨᑦᓯᕐᑏᑦ

¹ ᐃᓚᒃᑳ, ᒎᑎᐅᑉ ᐊᓂᕐᓂᖓᓂᒃ ᐱᖃᕐᑐᑎᑐᑦ ᐅᖃᐅᑎᔪᓐᓇᓚᐅᓐᖏᓚᑦᓯ, ᐊᓂᕐᓂᕐᒥᓕ ᐱᓯᒪᖏᑦᑐᑎᑐᑦ ᐅᖃᐅᑎᔭᕆᐊᖃᓚᐅᕐᐸᑦᓯ, ᓲᕐᓗ ᙭ᔅᑑᓯᒥ ᓄᑕᕋᐅᔪᑎᑐᑦ.

² ᐃᒻᒧᖕᒥᒃ ᐃᒥᕐᑎᓚᐅᕐᐸᑦᓯ, ᓂᕿᓪᓚᕆᖕᒥᒃ ᐱᔪᓐᓇᖏᓐᓇᑦᓯ; ᓂᕿᓪᓚᕆᖕᒧᑦ ᓱᓕ ᐊᑐᐃᓐᓇᐅᓚᐅᖏᓐᓇᑦᓯ. ᒫᓐᓇ ᓱᓕ ᐊᑐᐃᓐᓇᐅᓐᖏᓚᓯ.

³ ᓱᓕ ᑎᒥᐅᑉ ᐃᓕᖅᑯᓯᖏᓐᓂᒃ ᐊᑐᕋᑦᓯ. ᐱᒃᑲᐅᓂᕐᓴᐅᔪᒪᓂᖃᕋᑦᓯ ᐊᑭᕋᕐᑐᕐᑎᒌᒃᓗᓯᓗ, ᑕᕝᕙ ᑎᒥᐅᑉ ᐃᓕᖅᑯᓯᖏᑎᑐᑦ ᐃᓕᖅᑯᓯᖃᓐᖏᓚᓰ? ᐃᓄᑐᐃᓐᓇᐅᓪᓗ ᐃᓕᖅᑯᓯᖓᓂᒃ ᐊᑐᓐᖏᓚᓰ?

⁴ ᐃᓚᓯ ᐅᖃᕐᒪᑦ, “ᐸᐅᓗᓯᒥᒃ ᒪᓕᒃᑎᐅᕗᖓ,” ᐊᓯᐊᓗ ᐅᖃᕆᕗᖅ, “ᐊᐴᓗᓯᒥᒃ ᒪᓕᒃᑎᐅᕗᖓ,” ᑕᕝᕙ ᐃᓄᑐᐃᓐᓇᕐᑎᑐᑦ ᐃᓕᖅᑯᓯᖃᓐᖏᓚᓰ?

⁵ ᑍᒪᓕ ᐊᐴᓗᓯ ᑭᓇᐅᕚ? ᐸᐅᓗᓯᓗ ᑭᓇᐅᕚ? ᒎᑎᒥᒃ ᐱᔨᑦᓯᕐᑎᑐᐃᓐᓇᐅᕘᒃ ᑖᒃᑯᑎᒎᓇᖅ ᐅᒃᐱᕐᑐᓐᖑᕐᑎᑕᐅᕗᓯ, ᐊᑕᓂᐅᑉ ᐱᔭᒃᓴᖏᖕᓂᒃ ᐊᑐᓂᑦ ᑐᓂᓯᕕᒋᓚᐅᕐᒪᒋᒃ.

⁶ ᐅᕙᖓ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᓚᐅᕐᐳᖓ, ᐊᐴᓗᓯ ᐃᒥᕐᒥᒃ ᑯᕕᓯᓚᐅᕐᐳᖅ, ᒎᑎᓕ ᐱᕈᕐᑎᑦᓯᓚᐅᕐᐳᖅ.

⁷ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔪᖅ ᐃᒥᕐᒥᒡᓗ ᖁᕕᓯᔪᖅ ᓱᓇᐅᓐᖏᓚᒃ, ᒎᑎᓕ ᐱᕈᕐᑎᑦᓯᔪᑑᕗᖅ.

⁸ ᐱᕈᕐᓯᐊᒃᓴᒥᒃ ᑲᓐᖓᕐᓱᐃᔪᖅ, ᐃᒥᕐᒥᒡᓗ ᑯᕕᓯᔪᖅ ᐊᑦᔨᒌᒃᐴᒃ, ᐊᑐᓂᓪᓗ ᐊᑭᓕᕐᑕᐅᔪᒫᕐᐴᒃ ᐱᓇᓱᐊᕐᓂᖏᒃ ᒪᓕᒡᓗᒋᒃ.

⁹ ᒎᑎᐅᑉ ᐱᓇᓱᐊᖃᑎᒌᒃᑎᒻᒪᑎᒍᑦ; ᒎᑎᐅᑉ ᐱᕈᕐᓰᕕᖁᑎᒋᕚᓯ, ᒎᑎᐅᑉ ᐃᒡᓗᖁᑎᒋᕚᓯ.

¹⁰ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐅᕙᓐᓄᑦ ᑐᓂᔭᐅᓯᒪᔪᖅ ᐊᑐᕐᓗᒍ, ᑐᓐᖓᕕᓕᐅᓚᐅᕐᐳᖓ ᐃᒡᓗᓕᐅᕐᑎᒻᒪᕆᒃᑎᑐᑦ, ᐊᓯᓐᓂᒡᓗ ᖄᖓᒍᑦ ᐃᒡᓗᓕᐅᕐᑐᖃᓕᕐᐳᖅ. ᐃᒡᓗᓕᐅᕐᑐᓪᓕ ᐊᑐᓂᑦ ᑲᒪᑦᓯᐊᕆᐊᖃᕐᐳᑦ ᓴᓇᔭᒥᖕᓂᒃ.

¹¹ ᑐᓐᖓᕕᖕᒥᒃ ᐊᓯᐊᓂᒃ ᑐᓐᖓᕕᓕᐅᕐᑐᖃᕈᓐᓇᓐᖏᓚᖅ ᐃᓕᔭᐅᔭᕇᕐᓯᒪᔫᑉ ᐊᓯᐊᓂᒃ, ᑕᕝᕙ ᔩᓱᓯ ᙭ᔅᑑᓯᒥᒃ.

¹² ᑐᓐᖓᕕᐅᓪᓕ ᖄᖓᒍᑦ ᐃᒡᓗᓕᐅᕐᑐᖃᕐᐸᑦ ᒎᓗᒥᒃ, ᓯᐅᓪᕕᕆᒥᒃ, ᐅᔭᕋᖕᓂᒡᓗ ᐊᑭᑐᔪᓂᒃ, ᕿᔪᖕᒥᒃ, ᐃᕕᖕᒥᒃ ᐃᕕᑦᓱᒐᕐᓂᒡᓘᓐᓃᑦ,

¹³ ᓴᓇᓯᒪᔭᖏᑦ ᐊᑐᓂᑦ ᖃᓄᐃᑦᑑᖕᒪᖔᑕ ᓴᖅᑭᑎᑕᐅᔪᒫᕐᐳᑦ; ᐅᓪᓘᑉ ᑍᑦᓱᒪ ᖃᐅᒪᔪᒧᑦ ᓴᖅᑭᑎᑦᓯᐊᕈᒫᕐᒪᒋᑦ, ᓇᓗᓁᕐᑕᐅᔪᒫᕐᒪᑕ ᐃᑯᒪᒧᑦ, ᐃᑯᒪᒧᓪᓗ ᐊᑐᓂᑦ ᐆᒃᑐᕐᑕᐅᔪᒫᕐᐳᑦ ᓴᓇᓯᒪᔭᖏᑦ ᖃᓄᖅ ᐱᓇᓱᐊᕐᑕᐅᓯᒪᖕᒪᖔᑕ.

¹⁴ ᑐᓐᖓᕕᐅᑉ ᖄᖓᓂ ᓴᓇᔭᐅᓯᒪᔪᖅ ᐃᑯᒪᒧᑦ ᖃᓄᐃᓕᖏᑉᐸᑦ, ᑕᕝᕙ ᐱᓇᓱᐊᕐᑐᕕᓂᖅ ᐊᑭᓕᕐᑕᐅᔪᒫᕐᐳᖅ.

¹⁵ ᓇᓪᓕᐊᑦᑕᓕ ᓴᓇᓯᒪᔭᖓ ᐃᑯᐊᓪᓚᒃᐸᑦ, ᓴᓇᓚᐅᕐᑕᒥᓂᒃ ᐊᓯᐅᔨᔪᒫᕐᐳᖅ, ᓇᖕᒥᓂᕐᓕ ᐱᐅᓕᔭᐅᔪᒫᕐᐳᖅ, ᐃᑯᒪᒃᑰᕋᓗᐊᕐᓗᓂ.

¹⁶ ᖃᐅᔨᒪᓐᖏᓚᓰ ᒎᑎᐅᑉ ᑐᒃᓯᐊᕐᕕᒡᔪᐊᖁᑎᒋᖕᒪᓯ? ᒎᑎᐅᓪᓗ ᐊᓂᕐᓂᕐᖓᑕ ᐃᓂᒋᖕᒪᓯ?

¹⁷ ᓇᓪᓕᐊᑦ ᒎᑎᐅᑉ ᑐᒃᓯᐊᕐᕕᒡᔪᐊᖁᑎᖓᓂᒃ ᐊᓯᕈᐃᔪᖅ, ᒎᑎᐅᑉ ᐊᓯᕈᕈᒫᕆᕚ. ᒎᑎᐅᑉ ᑐᒃᓯᐊᕐᕕᒡᔪᐊᖁᑎᖓ ᐃᑦᔪᕐᓁᒻᒪᑦ, ᐃᓕᑦᓯ ᑕᕝᕙ ᒎᑎᐅᑉ ᑐᒃᓯᐊᕐᕕᒡᔪᐊᖁᑎᒋᕚᓯ.

¹⁸ ᓇᓕᕐᓯ ᓇᖕᒥᓂᖅ ᐅᐃᕖᕐᕆᓂᐊᕋᓂ. ᐃᒻᒥᓂᒃ ᓯᓚᑐᓇᓱᒋᔪᖅ ᓯᓚᕐᔪᐊᕐᒥᐅᑦ ᓯᓚᑐᓂᖓ ᒪᓕᒡᓗᒍ, ᓯᓔᑦᑐᓐᖑᕐᑐᒃᓴᐅᕗᖅ ᓯᓚᑐᔪᓐᖑᓪᓚᕆᖁᓪᓗᒍ.

¹⁹ ᓯᓚᕐᔪᐊᕐᒥᐅᑦ ᓯᓚᑐᓂᖓ ᒎᑎᒧᑦ ᓯᓔᓐᓂᐅᖕᒪᑦ. ᑎᑎᕋᕐᓯᒪᖕᒪᑦ, “ᒎᑎᐅᑉ ᓯᓚᑐᔪᑦ ᓂᒐᕐᑎᑉᐰᑦ ᓯᓚᑐᓵᕐᓂᖏᑎᒍᑦ.”

²⁰ ᐊᓯᐊᓂᓗ ᐅᖃᕐᓯᒪᒋᕗᖅ, “ᐊᑕᓂᐅᑉ ᓯᓚᑐᔪᑦ ᐃᓱᒪᖏᑦ ᖃᐅᔨᒪᕔᑦ ᐊᑑᑎᒃᓴᖃᖏᒻᒪᑕ.”

²¹ ᑍᒤᒻᒪᑦ ᐃᓅᑉ ᐱᔪᓐᓇᕐᓂᖏᑦ ᓂᕐᑐᕈᑎᒋᔭᐅᔪᒃᓴᐅᓐᖏᓚᑦ. ᑕᒤᑕ ᐱᒋᒐᑦᓯᒋᒃ,

²² ᐸᐅᓗᓯᓘᓐᓃᑦ ᐊᐴᓗᓯᓘᓐᓃᑦ, ᓰᐸᓯᓘᓐᓃᑦ ᓯᓚᕐᔪᐊᕐᓘᓐᓃᑦ ᐃᓅᓯᕐᓘᓐᓃᑦ ᑐᖁᓘᓐᓃᑦ ᒫᓐᓇᐅᔪᕐᓘᓐᓃᑦ ᓯᕗᓂᒃᓴᕐᓘᓐᓃᑦ, ᑕᒤᑕ ᐱᒋᕙᓯ.

²³ ᙭ᔅᑑᓯᐅᓪᓗ ᐱᒋᕚᓯ; ᙭ᔅᑑᓯᓕ ᒎᑎᐅᑉ ᐱᒋᕚ.