ᑯᕆᓐᑎᐊᒥᐅᓄᑦ ᓯᕗᓪᓖᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ1 ᒪᓕᓚᐅᕐᓯᓐᖓ, ᐅᕙᖓᑦᑕᐅᖅ ᙭ᔅᑑᓯᒥᒃ ᒪᓕᒃᑲᒪ. ᓂᐊᖁᕐᒥᒃ ᐅᓕᒃᓯᓯᒪᓗᓂ ᑐᒃᓯᐊᕐᓂᖅ 2 ᖁᕕᐊᒋᕙᑦᓯ ᐅᕙᓐᓂᒃ ᑕᒤᑦᑎᒍᑦ ᐃᖅᑲᐅᒤᓐᓇᕋᑦᓯ ᐊᔪᕆᕐᓱᐃᑦᔪᑎᒋᓯᒪᔭᒃᑲᓗ ᒪᓕᑦᓯᐊᕋᑦᓯᐅᒃ. 3 ᖃᐅᔨᒪᖁᕙᑦᓯᓕ ᙭ᔅᑑᓯ ᐊᖑᑎᓕᒫᓄᑦ ᓂᐊᖁᕆᔭᐅᖕᒪᑦ, ᐊᖑᓪᓗ ᐊᕐᓇᒧᑦ ᓂᐊᖁᕆᔭᐅᓪᓗᓂ, ᙭ᔅᑑᓯᐅᓪᓗ ᒎᑎ ᓂᐊᖁᕆᕚ. 4 ᐊᖑᑦ ᓇᓪᓕᐊᑦ ᑐᒃᓯᐊᕈᓂ ᐅᖃᓪᓚᒃᑯᓂᓘᓐᓃᑦ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᓂᐊᖁᓂ ᐅᓕᒃᓯᒪᓗᓂᐅᒃ ᓂᐊᖁᓂ ᓇᕐᕈᓇᕐᑎᑉᐹ. 5 ᐊᕐᓁᓪᓗ ᑐᒃᓯᐊᕈᑎᒃ ᒎᑎᐅᓪᓘᓐᓃᑦ ᐅᖃᐅᓯᕆᖁᔭᖏᓐᓂᒃ ᐅᖃᓪᓚᒃᑯᑎᒃ ᓂᐊᖁᓂ ᐅᓕᒃᓯᒪᖏᓪᓗᒍ ᓂᐊᖁᓂ ᓇᕐᕈᓇᕐᑎᑉᐹ; ᓲᕐᓗ ᓴᓕᓯᒪᔪᑎᑐᑦ ᑍᒤᑉᐳᖅ. 6 ᐊᕐᓇᖅ ᓂᐊᖁᒥᓂᒃ ᐅᓕᒃᓯᓯᒪᖏᒃᑯᓂ, ᓄᔭᓂ ᑭᐱᒍᓂᒋᑦ ᐱᐅᓂᕐᓴᐅᕗᖅ; ᑭᐱᓯᒪᓗᓂ ᓄᔭᖃᖏᓪᓗᓂᓘᓐᓃᑦ ᓇᕐᕈᓇᕐᑑᒍᓂ, ᓂᐊᖁᓂ ᐅᓕᒃᓯᒪᒍᓂᐅᒃ ᐱᐅᓂᕐᓴᐅᕗᖅ. 7 ᐊᖑᑦ ᓂᐊᖁᕐᒥᓂᒃ ᐅᓕᒃᓯᓯᒪᔪᒃᓴᐅᓐᖏᓚᖅ, ᐊᑦᔨᐅᑎᑕᐅᖕᒪᑦ ᒎᑎᒧᑦ ᓂᕐᑐᕐᓇᕐᓂᖓᓄᓪᓗ; ᐊᕐᓇᕐᓕ ᐊᖑᑎᐅᑉ ᓂᕐᑐᕐᓇᐅᑎᒋᕚ. 8 ᐊᖑᑦ ᐊᕐᓇᒥᑦ ᐱᓯᒪᖏᒻᒪᑦ, ᐊᕐᓇᕐᓕ ᐊᖑᒻᒥᑦ ᐱᓯᒪᕗᖅ. 9 ᐊᖑᑦᑕᐅᖅ ᐱᓐᖑᕐᑎᑕᐅᓯᒪᓐᖏᓚᖅ ᐊᕐᓇᒧᑦ, ᐊᕐᓇᕐᓕ ᐱᓐᖑᕐᑎᑕᐅᓯᒪᕗᖅ ᐊᖑᒻᒧᑦ. 10 ᑕᒪᓐᓇ ᐱᑦᔪᑎᒋᓪᓗᒍ, ᐂᖏᓖᓪᓗ ᐱᑦᔪᑎᒋᓪᓗᒋᑦ, ᐊᕐᓇᖅ ᓂᐊᖁᕐᒥᓂᒃ ᐅᓕᒃᓯᓯᒪᔪᒃᓴᐅᕗᖅ ᐱᔪᓐᓇᕐᑎᑕᐅᓂᕐᒥᓂᒃ ᓈᓚᖕᓂᖓ ᓇᓗᓁᕐᑕᐅᖁᓪᓗᒍ. 11 ᐊᑕᓂᕐᒥᓕ, ᐊᕐᓇᖅ ᐊᖑᒻᒥᒃ ᐃᓚᖃᖏᑦᑑᓐᖏᓚᖅ, ᐊᖑᓪᓗ ᐊᕐᓇᒥᒃ ᐃᓚᖃᖏᑦᑑᓐᖏᓐᓂᕗᖅ. 12 ᐊᕐᓇᖅ ᐊᖑᒻᒥᑦ ᐱᓯᒪᖕᒪᑦ, ᑍᒫᑦᓮᓐᓇᕐᑕᐅᖅ ᐊᖑᑦ ᐊᕐᓇᒥᑦ ᐃᕐᓂᐊᖑᓯᒪᒋᕗᖅ. ᑕᒪᕐᒥᓕᒫᓪᓕ ᒎᑎᒥᑦ ᐱᕗᖅ. 13 ᓇᖕᒥᓂᖅ ᐃᓱᒪᒃᓴᕐᓯᐅᕆᑦᓯ; ᐊᑲᐅᓈᕐᓯᒪᕚ ᐊᕐᓇᖅ ᒎᑎᒧᑦ ᑐᒃᓯᐊᕐᓗᓂ ᓂᐊᖁᒥᓂᒃ ᐅᓕᒃᓯᓯᒪᖏᑉᐸᑦ? 14 ᐃᓄᐃᑦ ᐱᐅᓯᖏᑎᒍᑦ ᐊᔪᕆᕐᑐᕐᑕᐅᓐᖏᓚᓰ? ᐊᖑᑦ ᑕᑭᔪᓂᒃ ᓄᔭᖃᕈᓂ ᐃᒻᒥᓂᒃ ᓇᕐᕈᓇᕐᑎᑉᐳᖅ. 15 ᐊᕐᓇᕐᓕ ᑕᑭᔪᓂᒃ ᓄᔭᖃᕈᓂ ᑕᑯᒥᓇᐅᑎᒋᕔᑦ, ᓄᔭᖅᑯᕐᑐᓂᕐᒥᒃ ᑐᓂᔭᐅᓯᒪᖕᒪᑦ ᓂᐊᖁᐊᓄᑦ ᐅᓕᒋᔭᐅᖁᓪᓗᒋᑦ. 16 ᑕᒪᑐᒪᓕ ᒥᒃᓵᓄᑦ ᐊᑭᕋᕐᑐᕐᑐᖃᕐᐸᑦ, ᐅᖃᕈᓐᓇᕐᐳᖓ ᒎᑎᐅᑉ ᐃᓚᒌᒃᑐᖁᑎᖏᑦ ᐅᕙᒍᓪᓗ ᑍᒤᑦᑐᓂᒃ ᐱᐅᓯᖃᓐᖏᓚᒍᑦ. ᐊᑕᓂᐅᑉ ᐅᓐᓄᒍᒻᒥᑕᖓ ᒫᑎᐅᓯ 26:26-29 ; ᒫᑯᓯ 14:22-25 ; ᓘᑲᓯ 22:14-20 17 ᐊᔪᕆᕐᓱᐃᑦᔪᑎᒋᓂᐊᕐᑕᓐᓂ ᐅᑯᓇᓂ ᓈᒻᒪᓈᕐᓂᕋᕈᓐᓇᓐᖏᓚᑦᓯ, ᑲᑎᒪᓕᕌᖓᑦᓯ ᐋᖅᑭᒃᐹᓪᓕᕈᑎᒃᓴᒧᑦ ᐱᕙᖏᓐᓇᑦᓯ ᓱᕋᒃᐹᓪᓕᕐᓇᕐᑐᒥᒡᓕ ᑲᑎᒪᓂᖃᕐᐸᒃᑲᑦᓯ. 18 ᓯᕗᓪᓕᕐᒥᒃ, ᑐᓴᕐᑎᑕᐅᒐᒪ ᐃᓚᒌᒃᑐᑎᑐᑦ ᑲᑎᒪᓕᕌᖓᑦᓯ ᐊᕕᒃᓯᒪᐅᑎᖃᑦᑕᕋᑦᓯᒎᖅ; ᐃᓚᖓᒍᓪᓗ ᑕᒪᓐᓇ ᐅᒃᐱᕆᕙᕋ. 19 ᓇᓗᓇᓐᖏᓚᖅ ᐊᕕᒃᓯᒪᓂᖃᕆᐊᖃᕋᑦᓯ ᓇᓛᒎᕐᑐᑦ ᐊᑯᓐᓇᑦᓯᓐᓂ ᓇᓗᓇᖏᑦᑐᒥᒃ ᓴᖅᑭᔮᑦᓯᐊᖁᓪᓗᒋᑦ. 20 ᑲᑎᒪᓕᕌᖓᑦᓯ, ᐊᑕᓂᐅᑉ ᐅᓐᓄᒍᒻᒥᑕᖓᓂᒃ ᓂᕆᕙᖏᓐᓇᑦᓯ. 21 ᓂᕆᓕᕌᖓᑦᓯ, ᐃᓚᑦᓯᓐᓂᒃ ᐅᑕᖅᑭᖏᑦᓯᐊᕐᓗᓯ ᓇᖕᒥᓂᖅ ᓇᒃᓴᕐᑕᑦᓯᓐᓂᒃ ᐱᕙᒃᐳᓯ, ᐃᓚᖏᑦ ᑳᒃᑎᓪᓗᒋᑦ ᐃᓚᖏᑦ ᐋᖓᔮᓕᕐᐸᒃᐳᑦ. 22 ᐊᖏᕐᕋᖃᓐᖏᓚᓰ ᓂᕆᕕᒃᓴᑦᓯᓐᓂᒃ ᐃᒥᕐᕕᒃᓴᑦᓯᓐᓂᒡᓗ? ᐅᕝᕙᓗ ᒎᑎᐅᑉ ᐃᓚᒌᒃᑐᖁᑎᖏᑦ ᓇᕐᕈᒋᕕᓯᐅᒃ ᐱᖃᖏᑦᑐᓪᓗ ᑲᓐᖑᓱᒃᑎᓐᓇᓱᐊᕐᓗᒋᑦ? ᖃᓄᕐᓕ ᐃᓕᑦᓯᓐᓄᑦ ᐅᖃᕐᓂᐊᓕᕐᐳᖓ? ᐃᓕᑦᓯᓐᓂᒃ ᓈᒻᒪᓈᕐᓂᕅᔪᒃᓴᐅᕗᖔ? ᑍᒤᑦᓱᓐᓇᓐᖏᓚᖓ. 23 ᐊᑕᓂᕐᒥᑦ ᐱᓚᐅᕐᑕᕋ ᐃᓕᑦᓯᓐᓄᑦ ᐅᖃᐅᓯᕆᓕᕐᐸᕋ, ᐊᑕᓂᐅᑉ ᔩᓱᓯᐅᑉ ᐅᓐᓄᒃᑯᑦ ᑍᑦᓱᒪᓂ ᐱᔭᐅᒃᑲᕐᑕᐅᓂᐊᓕᕐᑎᓪᓗᒍ ᓂᐊᖂᔭᖅ ᑎᒍᕚ, 24 ᖁᔭᓕᓪᓗᓂᓗ, ᐊᕕᒃᐹ, ᐅᖃᕐᓗᓂᓗ, “ᐅᓇ ᑕᕝᕙ ᑎᒥᒐ, ᑐᓂᔭᐅᔪᖅ ᐃᓕᑦᓯᓐᓄᑦ. ᑍᒤᓕᐅᖃᑦᑕᕆᑦᓯ ᐃᖅᑲᐅᒪᔭᐅᓂᒃᓴᓐᓄᑦ.” 25 ᑍᒫᒃᑕᐅᖅ ᐃᒥᐅᑦ ᑎᒍᕚ ᓂᕆᔭᕇᕋᒥᒃ ᐅᖃᕐᓗᓂ, “ᐅᓇ ᐃᒥᐅᑦ ᓄᑖᒥᒃ ᐊᖏᕈᑕᐅᔪᖅ ᓇᓗᓁᒃᑯᓯᕐᓯᒪᔪᖅ ᐊᐅᓐᓂᒃ, ᑍᒤᓕᐅᖃᑦᑕᕆᑦᓯ ᐃᒥᓕᑐᐊᕈᑦᓯᐅᒃ, ᐅᕙᓐᓂᒃ ᐃᖅᑲᐅᒪᑦᔪᑎᒋᓗᒍ.” 26 ᓂᐊᖂᔭᒥᒃ ᓂᕆᓕᕌᖓᑦᓯ ᐃᒥᐅᑎᒥᓪᓗ ᐃᒥᓕᕌᖓᑦᓯ, ᐊᑕᓂᐅᑉ ᑐᖁᖓ ᐅᖃᐅᑎᒋᔭᒃᓴᕆᕙᓯ ᑎᑭᖅᑳᕐᑎᓐᓇᒍ. 27 ᑍᒤᒻᒪᑦ ᓇᓪᓕᐊᑦ ᐊᑕᓂᐅᑉ ᓂᐊᖂᔭᖁᑎᖓᓂᑦ ᓂᕆᔪᖅ ᐃᒥᐅᑎᖓᓂᓪᓗ ᐃᒥᕐᑐᖅ ᐊᑕᓂᒥᒃ ᓂᕐᑐᕐᓇᕐᑎᑦᓯᖏᓪᓗᓂ ᑖᓐᓇ ᐸᓯᔭᒃᓴᐅᓕᕐᐳᖅ ᐊᑕᓂᐅᑉ ᑎᒥᖓᓄᑦ ᐊᐅᖓᓄᓪᓗ ᐊᔪᕐᑐᓕᖕᒪᑦ. 28 ᑍᒤᒻᒪᑦ ᐃᒻᒥᖕᓂᒃ ᖃᐅᔨᓴᖅᑳᖃᑦᑕᕐᓕᑦ, ᓂᐊᖂᔭᒥᒃ ᓂᕆᓚᐅᖏᓐᓂᕐᒥᖕᓂᒃ ᐃᒥᐅᑎᒥᓪᓗ ᐃᒥᓚᐅᖏᓐᓂᕐᒥᖕᓂᑦ. 29 ᓇᓪᓕᐊᑦ ᓂᕆᔪᖅ ᐃᒥᕐᑐᕐᓗ ᐊᑕᓂᐅᑉ ᑎᒥᖓᑕ ᐊᐅᖓᑕᓗ ᑐᑭᖓ ᐃᓱᒪᒋᓇᒍ, ᑖᓐᓇ ᐃᒻᒥᓂᒃ ᐸᓯᔭᒃᓴᓐᖑᕐᑎᑉᐳᖅ. 30 ᑕᒪᓐᓇ ᐱᑦᔪᑎᒋᓪᓗᒍ ᐅᓄᕐᑑᓪᓗᓯ ᓴᓐᖐᑦᑑᕗᓯ ᖃᓂᒪᕙᒃᓗᓯᓗ, ᐃᓚᖏᓪᓗ ᑐᖁᓯᒪᓕᕐᐳᑦ. 31 ᐅᕙᑦᑎᓐᓂᒡᓕ ᓱᓕᔪᒥᒃ ᖃᐅᔨᓴᖅᑳᕈᑦᑕ, ᐸᓯᔭᒃᓴᐅᓕᕐᓂᐊᓐᖏᓚᒍᑦ ᒎᑎᒧᑦ. 32 ᐊᑕᓂᐅᓪᓕ ᐃᖅᑲᕐᑐᕐᐸᒃᐹᑎᒍᑦ ᓱᒋᐊᕐᐸᒡᓗᓂᑎᒍᓪᓗ, ᑍᒤᓕᐅᕐᐸᒃᐹᑎᒍᑦ ᐃᒋᑕᒃᓴᐅᖃᑕᐅᖁᓇᑕ ᓯᓚᕐᔪᐊᕐᒥᐅᓄᑦ. 33 ᑍᒤᒻᒪᑦ ᐃᓚᒃᑳ, ᑲᑎᒪᓕᕌᖓᑦᓯ ᐊᑕᓂᐅᑉ ᐅᓐᓄᒍᒻᒥᑕᖓᓂᒃ ᓂᕆᖃᑎᒌᖕᓂᐊᕐᓗᓯ, ᐅᑕᖅᑭᖃᑦᑕᐅᑎᑦᓯᐊᖃᑦᑕᕆᑦᓯ. 34 ᐃᓚᓯᓕ ᑳᒃᐸᑦ, ᐊᖏᕐᕋᒥᓂ ᓂᕆᔪᒃᓴᐅᕗᖅ; ᑲᑎᒪᓂᑦᓯᓐᓄᑦ ᐸᓯᔭᒃᓴᐅᑦᔪᑎᖃᖁᓇᓯ. ᐊᓯᖏᓪᓕ ᑎᑭᒃᑯᒪ ᐋᖅᑭᒋᐊᕈᑎᒃᓮᑦ ᐱᓇᓱᐊᓛᕐᐸᒃᑲ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society