ᑯᕆᓐᑎᐊᒥᐅᓄᑦ ᓯᕗᓪᓖᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᓐᖑᐊᓂᒃ ᐅᓗᕆᐊᓱᖁᔨᓂᖅ

¹ ᐃᖅᑬᑎᑦᓱᒪᕙᑦᓯᓕ ᐃᓅᖃᑎᒃᑲ, ᓯᕗᓕᕕᓂᕗᑦ ᓄᕗᔭᒥᒃ ᖁᓕᒥᐅᑕᖃᕐᓗᑎᒃ ᓴᐳᑎᔭᐅᓯᒪᓚᐅᕐᒪᑕ ᑕᒪᕐᒥᒡᓗ ᐃᒪᕐᒥᒃ ᐃᑳᓚᐅᕐᐳᑦ.

² ᑕᒪᕐᒥ ᐹᑉᑎᑕᐅᓚᐅᕐᐳᑦ ᒪᓕᒃᑎᐅᓕᕐᓗᑎᒃ ᒨᓯᓯᒧᑦ.

³ ᑕᒪᕐᒥᒡᓗ ᐊᑦᔨᒌᒥᒃ ᓂᕆᓚᐅᕐᐳᑦ ᐊᓂᕐᓂᕐᒥᑦ ᐱᔪᒥᒃ.

⁴ ᑕᒪᕐᒥᒡᓗ ᐃᒥᓚᐅᕐᐳᑦ ᐊᓂᕐᓂᕐᒥᑦ ᐱᔪᒥᒃ; ᑕᒪᕐᒥᒃ ᐃᒥᓚᐅᕐᐳᑦ ᐊᓂᕐᓂᒃᑯᑦ ᕾᕐᑐᒥᑦ ᓇᔪᕐᑎᒋᔭᒥᖕᓂᑦ; ᕾᕐᑐᖅ ᑖᓐᓇ ᙭ᔅᑑᓯᐅᓚᐅᕐᐳᖅ.

⁵ ᑍᒤᒃᑲᓗᐊᕐᑎᓪᓗᒋᓪᓕ ᐃᓚᖏᑦ ᒎᑎᐅᑉ ᖁᕕᐊᒋᓚᐅᓐᖏᓔᑦ, ᑍᒤᒻᒪᑦ ᓯᐅᕅᓐᓇᕐᒥ ᑎᒥᖏᑦ ᑐᖁᖓᐅᓕᓚᐅᕐᐳᑦ ᑕᒫᓂᑐᐃᓐᓇᖅ.

⁶ ᑕᒪᒃᑯᐊ ᑕᕝᕙ ᐃᓂᕐᑎᕐᑕᐅᑦᔪᑎᒋᔭᕗᑦ, ᐱᐅᖏᑦᑐᒥᒃ ᐱᔪᒪᔭᖃᖁᓇᑕ ᑍᒃᑯᑎᑐᓇᖅ.

⁷ ᒎᑎᓐᖑᐊᖃᖁᓇᑕᓗ ᑍᒃᑯᑎᑐᓇᖅ; ᑎᑎᕋᕐᓯᒪᔪᖃᕐᒪᑦ, “ᐃᓄᐃᑦ ᐃᖏᑉᐳᑦ ᓂᕆᓪᓗᑎᒃ ᐃᒥᕐᓗᑎᒃᓗ, ᓂᑯᕕᓐᓇᒥᒡᓗ ᓈᒻᒪᖏᑦᑐᓂᒃ ᐱᓇᓱᐊᓕᕐᐳᑦ.”

⁸ ᐊᕐᓇᕐᓂᐊᕐᓂᕐᒥᒃ ᐊᖑᓐᓂᐊᕐᓂᕐᒥᒡᓗ ᐊᑐᕆᐊᖃᓐᖏᓚᒍᑦ ᑍᒃᑯᑎᑐᓇᖅ, ᑍᑦᓱᒪᓂ ᐅᓪᓗᒥ ᐊᑕᐅᓯᕐᒥ 23,000 ᑐᖁᓚᐅᕐᒪᑕ.

⁹ ᙭ᔅᑑᓯᒥᒃ ᐆᒃᑐᕐᓗᐃᓂᐊᕋᑕ ᑍᒃᑯᑎᑐᓇᖅ, ᐃᓚᖏᑦ ᑍᒤᓚᐅᕋᒥᒃ ᖁᓗᒋᐊᕌᓗᖕᓄᑦ ᑐᖁᑕᐅᓚᐅᕐᐳᑦ.

¹⁰ ᓈᒻᒪᒃᓴᖏᓐᓂᐊᕋᓯᑦᑕᐅᖅ ᑍᒃᑯᑎᑐᓇᖅ, ᑍᒃᑯᐊ ᐃᓚᖏᑦ ᓈᒻᒪᒃᓴᖏᓐᓇᒥᒃ ᑐᖁᑉ ᐂᖏᓕᖓᓄᑦ ᑐᖁᑕᐅᓚᐅᕐᐳᑦ.

¹¹ ᑕᒪᒃᑯᐊᓕ ᑍᒤᓚᐅᕐᐳᑦ ᐅᓗᕆᐊᒋᔭᒃᓴᐅᖁᓪᓗᒋᑦ ᑎᑎᕋᕐᓯᒪᕗᓪᓗ ᐃᓂᕐᑎᕐᑕᐅᖁᓪᓗᑕ, ᐅᕙᒍᑦ ᐃᓱᐊᓄᑦ ᑎᑭᓕᕐᑎᓪᓗᑕ.

¹² ᑍᒤᒻᒪᑦ ᓇᖏᕋᓱᒋᔪᖅ ᑲᒪᑦᓯᐊᓕᕐᓕ ᐅᕐᕈᖁᓇᒍ.

¹³ ᐱᐅᓐᖏᑐᒧᑦ ᐱᔪᒥᓵᕐᑕᐅᓂᕐᓄᑦ ᑎᑭᑕᐅᕙᒃᐳᓯ ᐃᓄᐃᑦ ᐊᑐᕐᐸᒃᑕᖏᓐᓄᑦ ᑭᓯᐊᓂ. ᒎᑎᓕ ᓱᖁᓯᔪᐃᑦᑑᒐᒥ, ᐱᔪᓐᓇᕐᑕᑦᓯ ᐅᖓᑖᓄᑦ ᐱᐅᓐᖏᑐᒧᑦ ᐱᔪᒥᓵᕐᑕᐅᑎᓐᓂᐊᓐᖏᓛᓯ. ᐱᐅᓐᖏᑐᒧᓪᓕ ᐱᔪᒥᓵᕐᑕᐅᑎᓪᓗᓯ ᓵᓚᒃᓴᕈᑎᒃᓴᑦᓯᓐᓂᒃ ᑐᓂᓯᕕᒋᓂᐊᕐᐹᓯ ᓵᓚᒋᔭᐅᖁᓇᓯ.

¹⁴ ᑍᒤᒻᒪᑦ ᓇᒡᓕᒋᔭᒃᑲ, ᒎᑎᓐᖑᐊᓄᑦ ᑭᒡᒐᕐᑐᕐᓂᕐᒥᒃ ᐱᖃᑕᐅᓂᐊᕋᓯ.

¹⁵ ᐃᓕᑦᓯᓐᓄᑦ ᐅᖃᕐᐳᖓ ᐃᓄᖕᓄᑦ ᐃᓱᒪᖃᑦᓯᐊᕐᑐᓄᑦ; ᐅᖃᐅᓯᒃᑲ ᐃᓱᒪᒃᓴᕐᓯᐅᕈᑎᒋᓯᒋᒃ.

¹⁶ ᐃᒥᐅᑎ ᓮᒻᒪᕐᑎᑕᐅᓇᕐᑐᖅ ᒎᑎᒧᑦ ᖁᔭᓕᑦᔪᑎᒋᔭᕗᑦ ᐊᑕᓂᐅᑉ ᐅᓐᓄᒍᒻᒥᑕᖓᓂ ᙭ᔅᑑᓯᐅᑉ ᐊᐅᖓᓂᒃ ᐱᑎᑕᐅᑦᔪᑎᒋᓐᖏᓚᕘᑦ? ᓂᐊᖂᔭᕐᓗ ᐊᕕᒃᑕᕗᑦ ᙭ᔅᑑᓯᐅᑉ ᑎᒥᖓᓂᒃ ᐱᑎᑕᐅᑦᔪᑎᒋᓐᖏᓚᕘᑦ?

¹⁷ ᓂᐊᖂᔭᐅᑉ ᐊᑕᐅᓯᐅᓂᖓᓄᑦ, ᐅᕙᒍᑦ ᐅᓄᕋᓗᐊᕐᑐᒍᑦ, ᑎᒥᒥ ᐊᑕᐅᓯᐅᕗᒍᑦ, ᓂᐊᖂᔭᕐᒥᑦ ᐊᑕᐅᓯᕐᒥᑦ ᐱᖃᑕᐅᒐᑦᑕ.

¹⁸ ᐃᓴᕆᐊᓕᒥᐅᑦ ᐃᓱᒪᒋᓯᐅᒃ; ᑐᓂᕐᕈᑕᐅᔪᓂᒃ ᒎᑎᒧᑦ ᓂᕆᔪᑦ ᐱᖃᑕᐅᓐᖏᓛᑦ ᑐᓂᕐᕈᓯᕐᕕᖕᒥᑦ?

¹⁹ ᒎᑎᓐᖑᐊᓄᑦ ᑐᓂᕐᕈᑎᕕᓃᑦ ᐊᑐᕐᓂᕋᕐᓗᒋᑦ ᐅᖃᕋᓱᒋᕕᓯᓐᖔ, ᐅᕝᕙᓗ ᒎᑎᓐᖑᐊᑦ ᐊᑑᑎᖃᕐᓂᕋᕐᐸᒃᑳ?

²⁰ ᐃᒫᒡᓕ ᐅᖃᕐᐳᖓ, ᐅᒃᐱᖏᑦᑐᑦ ᑐᓂᕐᕈᑎᖏᑦ ᒎᑎᓐᖑᐊᓄᑦ ᑐᓂᔭᐅᕗᑦ ᐊᓂᕐᓂᕐᓗᖕᓄᑦ, ᒎᑎᒨᖏᑦᑐᖅ, ᐱᖃᑕᐅᖁᓐᖏᓚᑦᓯᓗ ᐊᓂᕐᓂᕐᓗᖕᓄᑦ.

²¹ ᐊᑕᓂᐅᑉ ᐃᒥᐅᑎᖓᓂᑦ ᐊᓂᕐᓂᕐᓗᐃᓪᓗ ᐃᒥᐅᑎᖓᓂᑦ ᐊᑕᐅᑦᓯᒃᑯᑦ ᐃᒥᕈᓐᓇᖏᓐᓇᑦᓯ; ᐊᑕᓂᐅᑉ ᓂᕆᕕᖓᓂᑦ ᐊᓂᕐᓂᕐᓗᐃᓪᓗ ᓂᕆᕕᖓᓂᑦ ᐊᑕᐅᑦᓯᒃᑯᑦ ᑕᒤᓐᓂᑦ ᐱᔪᓐᓇᓐᖏᓐᓂᕗᓯ.

²² ᐊᑕᓂᕐᒥᒃ ᓂᓐᖓᒃᑎᑦᓯᓇᓱᐊᕐᐱᑖ? ᑖᑦᓱᒪᖓᑦ ᐱᔪᓐᓇᕐᓂᕐᓴᐅᕕᑖ?

²³ ᐅᖃᕐᑐᖃᕐᐸᒃᐳᖅ, “ᓱᓇᑐᐃᓐᓇᕐᓂᒃ ᐱᔪᓐᓇᕐᑎᑕᐅᕗᒍᑦ,” ᑭᓯᐊᓂᓕ ᓱᓇᑐᐃᓐᓁᑦ ᑕᒪᕐᒥᒃ ᐱᕙᓪᓕᕐᓇᕐᑑᓐᖏᓚᑦ. “ᓱᓇᑐᐃᓐᓇᕐᓂᒃ ᐱᔪᓐᓇᕐᑎᑕᐅᕗᒍᑦ,” ᓱᓇᑐᐃᓐᓁᑦᓕ ᑕᒪᕐᒥᒃ ᐃᑲᔪᕐᑕᐅᓐᓇᓐᖏᓚᑦ.

²⁴ ᓇᓕᕐᓯ ᓇᖕᒥᓂᑐᐊᖅ ᐱᕙᓪᓕᕈᑎᒃᓴᒥᓂᒃ ᕿᓂᕐᓂᐊᕋᓂ, ᐊᓯᖏᑕᓕ ᐱᕙᓪᓕᕈᑎᒃᓴᖏᓐᓂᒃ ᕿᓂᕐᓕ.

²⁵ ᓂᖀᑦ ᓂᐅᕕᐊᒃᓮᑦ ᓂᐅᕕᕐᕕᖕᒦᑦᑐᑦ ᐃᓱᒫᓗᖏᓪᓗᓯ ᓂᕆᔭᒃᓴᕆᕙᓯ ᐊᐱᖅᑯᑎᒋᖏᓪᓗᒋᑦ ᐃᓱᒫᓗᖁᓇᓯ.

²⁶ ᐊᒡᓔᑦ ᐅᖃᕐᒪᑕ, “ᓄᓇᕐᔪᐊᖅ ᐊᑕᓂᐅᑉ ᐱᒋᕚ, ᓱᓇᓕᒫᓪᓗ ᑕᕝᕙᓃᑦᑐᑦ.”

²⁷ ᐅᒃᐱᖏᑦᑐᒥᑦ ᓂᕆᔭᕐᑐᖁᔭᐅᒍᕕᑦ ᓂᕆᔭᕐᑐᕈᒪᒍᕕᓪᓗ ᑕᕝᕗᖓ, ᓂᖀᑦ ᐊᑐᐃᓐᓇᕈᕐᑕᓕᒫᖏᑦ ᓂᕆᒃᑭᑦ ᐊᐱᖅᑯᑎᒋᖏᓪᓗᒋᓪᓗ ᓇᑭᑦ ᐱᖕᒪᖔᑕ ᐃᓱᒫᓗᖁᓇᒃ.

²⁸ ᐅᖃᐅᑎᔭᐅᒍᕕᓪᓕ, “ᐅᓇ ᓂᕿ ᒎᑎᓐᖑᐊᓄᑦ ᑐᓂᕐᕈᑎᕕᓂᖅ,” ᑖᓐᓇ ᓂᕆᓂᐊᕐᓇᒍ, ᐅᖃᐅᑦᔨᔪᖅ ᑖᓐᓇ ᐱᑦᔪᑎᒋᓪᓗᒍ ᐃᓱᒫᓗᖁᓇᑎᓪᓗ.

²⁹ ᑖᓐᓇ ᐅᐸᒃᓯᒪᔧᑦ ᐃᓱᒫᓗᖁᓇᒍ, ᐃᕝᕕᐅᖏᑦᑐᖅ. ᓱᖕᒪᓪᓕ ᐃᓱᒪᕐᓱᕐᓂᕋ ᐊᐅᓚᑕᐅᔪᒃᓴᐅᕚ ᐊᓯᓐᓄᑦ?

³⁰ ᓂᕆᖃᑕᐅᒍᒪ ᒎᑎᒧᑦ ᖁᔭᓕᓗᖓ, ᓱᖕᒪᓪᓕ ᓄᖅᑲᕐᑎᑕᐅᔪᒃᓴᐅᕗᖔ? ᒎᑎᒧᑦ ᖁᔭᓕᑦᔪᑎᒋᔭᓐᓂᒃ?

³¹ ᑍᒤᒻᒪᑦ ᓂᕆᒍᕕᑦ, ᐃᒥᕈᕕᓪᓘᓐᓃᑦ, ᖃᓄᑐᐃᓐᓇᕐᓘᓐᓃᑦ ᐱᓇᓱᐊᕈᕕᑦ, ᐱᓇᓱᐊᕐᑐᒃᓴᐅᕗᑎᑦ ᒎᑎ ᓂᕐᑐᕐᑕᐅᖁᓪᓗᒍ.

³² ᓇᓪᓕᐊᓐᓄᑐᐃᓐᓇᖅ ᐹᓪᓚᒍᑕᐅᑦᑍᓕᒋᑦ, ᔫᑎᓄᓪᓘᓐᓃᑦ ᒍᕇᑭᓄᓪᓘᓐᓃᑦ ᒎᑎᐅᓪᓘᓐᓃᑦ ᐃᓚᒌᒃᑐᖁᑎᖏᓐᓄᑦ.

³³ ᐅᕙᖓᑦᑕᐅᖅ ᖁᕕᐊᒋᔭᐅᓇᓱᐊᕋᒪ ᐱᓂᐊᕐᓂᒃᑯᑦ ᑕᒤᑎᒍᑦ, ᐅᕙᖓ ᐱᕙᓪᓕᕈᑎᒃᓴᓐᓄᑑᖏᑦᑐᑦ ᐊᓯᒪᓕ ᐱᕙᓪᓕᕈᑎᒃᓴᖏᓐᓄᑦ, ᐊᒥᓱᑦ ᐱᐅᓕᔭᐅᖁᓪᓗᒋᑦ.