ᑯᕆᓐᑎᐊᒥᐅᓄᑦ ᓯᕗᓪᓖᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᒋᐊᕈᑎᖏᑦ

¹ ᐸᐅᓗᓯᒥᑦ, ᕾᖁᔭᐅᓯᒪᔪᒥᑦ ᐋᐴᓯᑕᓕᐅᖁᓪᓗᒍ ᙭ᔅᑑᓯ ᔩᓱᓯᒧᑦ, ᒎᑎᐅᑉ ᐱᖁᔨᓂᖓᒍᑦ, ᐅᒃᐱᕐᑑᖃᑎᑦᑎᓐᓂᓪᓗ ᓲᔅᑎᓃᓯᒥᑦ.

² ᒎᑎᐅᑉ ᐃᓚᒌᒃᑐᖁᑎᖏᓐᓄᑦ ᐅᒃᐱᕐᑐᓄᑦ ᑯᕆᓐᑎᒦᑦᑐᓄᑦ, ᐃᑦᔪᕐᓁᑎᑕᐅᓯᒪᔪᓄᑦ ᔩᓱᓯ ᙭ᔅᑑᓯᒃᑯᑦ, ᐃᑦᔪᕐᓁᑎᑕᐅᖁᓪᓗᒋᑦ ᕾᖁᔭᐅᓯᒪᔪᓕᒫᓄᑦ ᑐᒃᓯᐊᕐᐸᒃᑐᓄᓪᓗ ᐊᑕᓂᐅᑉ ᔩᓱᓯ ᙭ᔅᑑᓯᐅᑉ ᐊᑎᖓᓄᑦ, ᐊᑕᓂᕆᔭᒥᖕᓄᑦ ᐊᑕᓂᕆᔭᑦᑎᓐᓄᓪᓗ.

³ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᓮᒻᒪᕐᑎᑦᓯᓂᕐᒥᓄᓪᓗ ᒎᑎᐅᑉ ᐊᑖᑕᑦᑕ ᐊᑕᓂᐅᓪᓗ ᔩᓱᓯ ᙭ᔅᑑᓯᐅᑉ ᐃᓚᒋᓕᓯ.

ᓮᒻᒪᕐᑎᑕᐅᓂᖅ ᙭ᔅᑑᓯᒥ

⁴ ᑍᒪᓐᖓᓕᒫᖅ ᒎᑎ ᖁᔭᒋᕙᒃᐸᕋ ᐱᑦᔪᑎᒋᓪᓗᓯ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐃᓕᑦᓯᓐᓄᑦ ᑐᓂᔭᐅᓚᐅᕐᒪᑦ ᙭ᔅᑑᓯ ᔩᓱᓯᒃᑯᑦ.

⁵ ᑖᑦᓱᒨᓇ ᐊᔪᕐᓴᓐᖏᑎᑕᐅᒐᑦᓯ ᖃᓄᓕᒫᖅ ᐅᖃᓪᓚᖕᓂᑦᓯᒍᑦ ᖃᐅᔨᒪᓂᑦᓯᒍᓪᓗ.

⁶ ᙭ᔅᑑᓯᒥᒃ ᐊᔪᕆᕐᑐᐃᑦᔪᑕᐅᓯᒪᔪᑦ ᐃᓕᑦᓯᓐᓄᑦ ᑐᓐᖓᕕᖃᑦᓯᐊᓕᕐᒪᑕ ᐃᓕᑦᓯᓐᓂ.

⁷ ᑍᒤᒻᒪᑦ ᐅᒃᐱᕐᓂᒃᑯᑦ ᑐᓂᕐᕈᓯᐊᖃᕐᓂᕐᒥᒃ ᖃᓄᓕᒫᖅ ᐊᔪᕐᓴᓐᖏᓚᓯ, ᕿᓚᓈᕐᓗᓯᓗ ᐅᑕᖅᑭᓪᓗᓯ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᓴᖅᑭᑦᓱᒫᕐᓂᖓᓂᒃ.

⁸ ᑖᑦᓱᒪ ᓱᖁᓯᔪᐃᑎᓐᓂᐊᕐᐹᓯ ᓯᓚᕐᔫᑉ ᐃᓱᐊᓄᑦ, ᐸᓯᔭᒃᓴᐅᖁᓇᓯ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐅᓪᓗᖓᓂ.

⁹ ᒎᑎ ᓱᖁᓯᔪᐃᑦᑑᖕᒪᑦ, ᕾᖁᔨᓯᒪᔪᖅ ᐃᓕᑦᓯᓐᓂᒃ ᐃᓅᖃᑎᖃᖁᔨᓪᓗᓂ ᐃᕐᓂᖓᓂᒃ, ᔩᓱᓯ ᙭ᔅᑑᓯᒥᒃ ᐊᑕᓂᕐᒥᒃ.

ᐅᒃᐱᕐᑑᖃᑎᒌᑦ ᐊᕕᒃᓯᒪᓂᖏᑦ

¹⁰ ᐱᖁᒻᒪᕆᒃᐸᑦᓯ ᐃᓅᖃᑎᒃᑲ, ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ, ᐊᖏᖃᑎᒌᑦᓯᐊᖁᓪᓗᓯ ᐅᖃᐅᓯᑦᓯᒍᑦ ᐃᓕᑦᓯᓐᓄᓪᓗ ᐊᕕᓯᒪᖁᓇᓯ, ᑲᑎᓐᖓᑦᓯᐊᕐᓗᓯᓕ ᐊᑕᐅᓯᐅᖁᓪᓗᓯ ᐃᓱᒪᑦᓯᒍᑦ ᐱᓂᐊᕐᓂᑦᓯᒍᓪᓗ.

¹¹ ᑯᓗᐃᒃᑯᑦ ᐃᒡᓗᒥᐅᖃᑎᖏᓐᓂᑦ ᑐᓴᕐᑎᑕᐅᓚᐅᕋᒪ, ᐃᓚᒃᑳ, ᐂᕙᖃᑦᑕᕐᓂᑦᓯᓐᓂᒃ.

¹² ᐃᒫᒃ ᓇᓗᓁᕐᓯᓚᐅᕐᓚᖓ ᐃᓚᓯ ᐃᓚᖓᑦ ᐅᖃᕐᐳᖅ, “ᐸᐅᓗᓯᒧᑦ ᒪᓕᒃᑎᐅᕗᖓ,” ᐊᓯᐊᓗ “ᐊᐴᓗᓯᒧᑦ ᒪᓕᒃᑎᐅᕗᖓ,” ᐊᓯᐊᓗ “ᓰᐸᓯᒧᑦ ᒪᓕᒃᑎᐅᕗᖓ,” ᐊᓯᐊᓗ “᙭ᔅᑑᓯᒧᑦ ᒪᓕᒃᑎᐅᕗᖓ.”

¹³ ᙭ᔅᑑᓯ ᐊᒡᒍᕐᓯᒪᕚ? ᐸᐅᓗᓯ ᓴᓐᓂᖓᔪᓕᖕᒧᑦ ᐱᓪᓗᓯ ᑭᑭᐊᒃᑐᕐᑕᐅᓚᐅᕐᐹ? ᐅᕝᕙᓗ ᐸᐅᓗᓯᒧᑦ ᐃᓕᓐᓂᐊᕐᑎᐅᖁᓪᓗᓯ ᐹᑉᑎᑕᐅᓚᐅᕐᐱᓰ?

¹⁴ ᒎᑎ ᖁᔭᒋᕙᕋ ᓇᓕᑦᓯᓐᓂᒃ ᐹᑉᑎᑦᓯᓚᐅᖏᓐᓇᒪ ᑯᕆᔅᐸᓯᐅᑉ ᒊᐊᓯᐅᓪᓗ ᐊᓯᖏᓐᓂᒃ,

¹⁵ ᓇᓕᕐᓯ ᐅᖃᕈᓐᓇᖁᓇᒍ ᐅᕙᓐᖓ ᐊᑎᖓᓂ ᐹᑉᑎᑕᐅᓯᒪᓂᕋᕐᓗᓂ.

¹⁶ (ᐃᓛᒃ, ᐹᑉᑎᑦᓯᓚᐅᕆᕗᖓ ᓯᑎᐹᓇᓯᒥᒃ ᐃᒡᓗᒥᐅᖃᑎᖏᓐᓂᒡᓗ. ᐊᓯᖏᓐᓂᒡᓕ, ᐹᑉᑎᑦᓯᓚᐅᕐᒪᖔᕐᒪ ᐃᖅᑲᐅᒪᓐᖏᓚᖓ.)

¹⁷ ᙭ᔅᑑᓯᐅᑉ ᑎᓕᓚᐅᖏᒻᒪᖓ ᐹᑉᑎᓯᔭᕐᑐᖁᓗᖓ ᐅᖃᐅᓰᓪᓕ ᑐᓴᕈᒥᓇᕐᑐᑦ ᐊᔪᕆᕐᑐᐃᑦᔪᑕᐅᖁᓪᓗᒋᑦ ᑎᓕᔭᐅᓯᒪᕗᖓ, ᐃᓄᐃᑦ ᓯᓚᑐᓂᖓ ᒪᓕᒡᓗᒍ ᐊᔪᕆᕐᑐᐃᖁᓇᖓ, ᙭ᔅᑑᓯᐅᑉ ᓴᓐᓂᖓᔪᓕᖕᒥ ᑐᖁᓚᐅᕐᓂᖓᑕ ᐱᔪᓐᓇᕐᓂᖓ ᓴᓐᖐᓕᑎᑕᐅᖁᓇᒍ.

᙭ᔅᑑᓯ ᐱᔪᓐᓇᕐᓂᐅᕗᖅ ᓯᓚᑐᓂᐅᓪᓗᓂᓗ ᒎᑎᒥᑦ ᐱᔪᖅ

¹⁸ ᙭ᔅᑑᓯᐅᑉ ᓴᓐᓂᖓᔪᓕᖕᒥ ᑭᑭᐊᒃᑐᕐᑕᐅᓂᖓᑕ ᐊᔪᕆᕐᑑᑕᐅᓂᖓ ᓯᓔᑦᑑᕗᖅ ᐊᓯᐅᔪᒪᕐᑐᓄᑦ; ᐅᕙᑦᑎᓐᓄᓪᓕ ᐱᐅᓕᔭᓯᒪᔪᓄᑦ ᐱᔪᓐᓇᕐᓂᐅᕗᖅ ᒎᑎᒥ.

¹⁹ ᐊᒡᓚᖕᓂ ᑎᑎᕋᕐᓯᒪᖕᒪᑦ, “ᓯᓚᑐᔪᑦ ᓯᓚᑐᓂᖓᑦ ᐊᓯᕈᕐᓂᐊᕐᐸᕋ, ᐃᓕᓯᒪᔪᓪᓗ ᑐᑭᓯᓯᒪᓂᖓᑦ ᐊᑐᕈᓐᓃᕐᑎᓐᓂᐊᕐᐸᕋ.”

²⁰ ᓇᐅᒡᓕ ᓯᓚᑐᔪᑦ? ᓇᐅᒡᓕ ᐊᒡᓚᓂᒃ ᐃᓕᓯᒪᔪᑦ? ᓇᐅᒃᓕ ᐅᓪᓗᒥ ᐃᓅᔪᓂᒃ ᖃᐅᔨᒪᓇᓱᐊᕐᑎ? ᒎᑎᐅᓪᓕ ᓯᓚᕐᔪᐊᕐᒥᐅᑦ ᓯᓚᑐᓂᖏᑦ ᓯᓔᓐᓂᓐᖑᕐᑎᓚᐅᓐᖏᓔᑦ?

²¹ ᒎᑎᐅᑉ ᓯᓚᑐᓂᕐᒥᓄᑦ ᓯᓚᕐᔪᐊᕐᒥᐅᑦ ᓇᖕᒥᓂᖅ ᓯᓚᑐᓂᕐᒥᒃᑎᒍᑦ ᑐᑭᓯᔪᓐᓇᕐᑎᓐᖏᓔᑦ ᒎᑎᒥᒃ. ᒎᑎᓕ ᐊᑲᐅᒃᓴᕐᐳᖅ ᑖᒃᑯᐊ ᓯᓔᓐᓇᓱᒋᔭᖏᑎᒍᑦ ᐅᖃᐅᓯᕆᔭᑦᑎᒍᑦ ᐅᒃᐱᕈᓱᒃᑐᑦ ᐱᐅᓕᔪᒪᓪᓗᒋᑦ.

²² ᔫᑎᑦ ᑲᒪᓇᕐᑐᓂᒃ ᑕᑯᔪᒪᕗᑦ ᒍᕇᑭᓪᓗ ᓯᓚᑐᓂᕐᒥᒃ ᕿᓂᕐᓗᑎᒃ,

²³ ᐅᕙᒍᓪᓕ ᐊᔪᕆᕐᑐᐃᑦᔪᑎᖃᕐᐳᒍᑦ ᙭ᔅᑑᓯᒥᒃ ᑭᑭᐊᒃᑐᕐᑕᐅᓚᐅᕐᑐᒥᒃ, ᔫᑎᓄᑦ ᐅᒃᐱᕈᒪᖏᑦᔪᑕᐅᔪᒥᒃ, ᔫᑎᐅᖏᑦᑐᓄᓪᓗ ᓯᓔᓐᓂᐅᓇᓱᒋᔭᐅᓪᓗᓂ;

²⁴ ᒎᑎᐅᓪᓕ ᕾᖁᓯᒪᔭᖏᓐᓄᑦ, ᑕᒤᓐᓄᑦ ᔫᑎᓄᑦ ᒍᕇᑭᓄᓪᓗ, ᙭ᔅᑑᓯ ᒎᑎᒧᑦ ᐱᔪᓐᓇᕐᓂᐅᕗᖅ ᓯᓚᑐᓂᐅᓪᓗᓂᓗ ᒎᑎᒧᑦ.

²⁵ ᒎᑎᐅᑉ ᓯᓔᑦᑑᔮᕐᓂᖓ ᓯᓚᑐᓂᕐᓴᐅᖕᒪᑦ ᐃᓄᖕᓂᑦ, ᒎᑎᐅᓪᓗ ᓴᓐᖐᑦᑑᔮᕐᓂᖓ ᓴᓐᖏᓂᕐᓴᐅᓪᓗᓂ ᐃᓄᖕᓂᑦ.

²⁶ ᐃᓅᖃᑎᒃᑲ, ᐃᖅᑲᐅᒪᓕᕆᑦᓯ ᖃᓄᐃᑦᑐᓚᐅᕐᒪᖔᑦᓯ ᒎᑎᒧᑦ ᕾᖁᔭᐅᑎᓪᓗᓯ. ᐃᓚᖏᑦ ᐃᓄᐃᑦ ᐃᓕᖅᑯᓯᖓ ᒪᓕᒡᓗᒍ ᓯᓚᑐᔫᓚᐅᕐᐳᑉ, ᐃᓛᖏᓪᓗ ᐱᓪᓚᕆᐅᓚᐅᕐᐳᑦ, ᐃᓛᓯᒍᓪᓗ ᐃᕐᓂᐊᖑᓯᒪᓚᐅᕐᐳᑦ ᐊᖓᔪᖅᑳᑎᒍᑦ.

²⁷ ᒎᑎᓕ ᓂᕈᐊᓚᐅᕐᐳᖅ ᓯᓚᕐᔪᐊᕐᒥᐅᓄᑦ ᓯᓔᓐᓇᓱᒋᔭᐅᔪᑦ ᐊᑐᕐᓗᒋᑦ ᓯᓚᑐᔪᑦ ᑲᓐᖑᓱᒃᑎᑦᓱᒪᓪᓗᒋᑦ, ᓯᓚᕐᔪᐊᕐᒥᐅᓂᓪᓗ ᓴᓐᖐᓐᓇᓱᒋᔭᐅᔪᓂᒃ ᒎᑎ ᓂᕈᐊᓚᐅᕐᐳᖅ ᓯᓚᕐᔪᐊᕐᒥ ᓴᓐᖏᔪᑦ ᑲᓐᖑᓱᒃᑎᑦᓱᒪᓪᓗᒋᑦ.

²⁸ ᓯᓚᕐᔪᐊᕐᒥᐅᓄᑦ ᒥᑭᓐᓂᕐᐸᐅᓇᓱᒋᔭᐅᔪᑦ ᓱᓇᑐᐃᓐᓁᑦ ᓇᕐᕈᓇᕐᑐᓪᓗ ᓱᓇᐅᖏᑦᑐᓪᓗ ᓂᕈᐊᕆᓚᐅᕐᐰᑦ, ᓯᓚᕐᔪᐊᕐᒥᐅᓄᑦ ᐊᑐᕐᓇᕐᑑᓇᓱᒋᔭᐅᔪᑦ ᓱᓇᐅᔪᓐᓃᖁᓪᓗᒋᑦ.

²⁹ ᓇᓪᓕᐊᑦ ᑖᑦᓱᒪ ᓵᖓᓂ ᐃᒻᒥᓂᒃ ᓂᕐᑐᕈᑎᒃᓴᖃᖁᓇᒍ.

³⁰ ᑖᑦᓱᒨᓇᓕ ᑭᓯᐊᓂ ᙭ᔅᑑᓯ ᔩᓱᓯᒦᒃᑲᑦᓯ, ᒎᑎᐅᓪᓗ ᐅᕙᑦᑎᓐᓄᑦ ᙭ᔅᑑᓯ ᓯᓚᑐᓂᓐᖑᕐᑎᑉᐹ, ᑖᑦᓱᒨᓇᓗ ᐃᓗᐊᕐᑐᓕᔪᓐᖑᕐᑎᑉᐹᑎᒍᑦ, ᐃᑦᔪᕐᓁᑦᑐᓐᖑᕐᑎᓪᓗᑕᓗ, ᐱᐅᓕᔭᐅᑦᔪᑎᒋᓪᓗᑎᒍᓗ;

³¹ ᑍᒤᒻᒪᑦ, ᐊᒡᓚᖕᓂ ᑎᑎᕋᕐᓯᒪᕗᖅ, “ᐃᒻᒥᓂᒃ ᓂᕐᑑᑎᔪᒪᔫᑉ ᐊᑕᓂᖅ ᓂᕐᑐᕈᑎᒋᓕᐅᒃ.”