ᑯᕉᓂᑲ ᓯᕗᓪᓖᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

ᓲᓗᒨᓂᐅᑉ ᑎᓕᔭᐅᓂᖓ ᑐᒃᓯᐊᕐᕕᒡᔪᐊᓕᐅᖁᓪᓗᒍ

¹ ᑍᕕᑎᐅᓪᓗ ᐃᓴᕆᐊᓕᒥᐅᓄᑦ ᓯᕗᓕᕐᑎᓕᒫᑦ ᑲᑎᖁᕔᑦ ᔨᕉᓴᓕᒧᑦ, ᐅᑯᐊ ᐊᖓᔪᖅᑳᑦ ᑭᖑᕚᕇᓄᑦ, ᐊᖓᔪᖅᑳᑦ ᐊᕕᒃᑐᕐᓯᒪᔪᓄᑦ ᐊᖓᔪᖅᑳᕐᔪᐊᒧᑦ ᐱᔨᑦᓯᕐᑎᓄᑦ, ᐊᖓᔪᖅᑳᑦ ᑕᐅᓴᓐᑎᓄᑦ, ᐊᖓᔪᖅᑳᓪᓗ 100ᓄᑦ, ᐱᖁᑎᖏᓐᓄᑦ ᐆᒪᔪᖁᑎᖏᓐᓄᓪᓗ ᑲᒪᔨᐅᔪᑦ ᐊᖓᔪᖅᑳᕐᔪᐊᓪᓗ ᐃᕐᓂᖏᓐᓄᑦ, ᐊᖓᔪᖅᑳᕐᔪᐊᓪᓗ ᐃᒡᓗᕐᔪᐊᖓᓄᑦ ᐊᖓᔪᖅᑳᖑᔪᑦ, ᐊᔪᖏᑦᑐᕐᔪᐊᓪᓗ ᑲᑉᐱᐊᓱᖏᑦᑐᑦ, ᖃᖓᓕᒫᒃᑯᓪᓗ ᐅᓇᑕᕐᑎᒻᒪᕆᐅᔪᑦ.

² ᑕᕝᕙ ᐊᖓᔪᖅᑳᕐᔪᐊᖅ ᑍᕕᑎ ᓂᑯᕕᑉᐳᖅ ᐅᖃᕐᓗᓂᓗ: “ᑐᓴᕐᓯᓐᖓ, ᖃᑕᓐᖑᑎᒃᑳ ᐃᓄᖁᑎᒃᑲᓗ; ᐆᒻᒪᒥᐅᑕᕆᓚᐅᕐᐸᕋ ᐃᒡᓗᓕᐅᕈᒪᓪᓗᖓ ᐊᑕᓂᕐᒧᑦ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᐃᓂᖃᑦᓯᐊᖁᓪᓗᒍ, ᒎᑎᑦᑕᓗ ᐃᑎᒐᖏᑦ ᐃᑯᕐᕋᒃᓴᖃᖁᓪᓗᒋᑦ; ᐅᐸᓗᖎᔭᓚᐅᕐᐳᖓᓗ ᐃᒡᓗᓕᐅᕈᒪᓪᓗᖓ.

³ ᒎᑎᐅᓪᓕ ᐅᖃᐅᑎᓚᐅᕐᐹᖓ, ‘ᐃᒡᓗᓕᐅᕐᑐᒃᓴᐅᓐᖏᓚᑎᑦ ᐊᑎᓐᓄᑦ ᑐᒃᓯᐊᕐᕕᒃᓴᒥᒃ, ᐅᓇᑕᕐᑎᐅᓚᐅᕋᕕᑦ ᐊᐅᖕᒥᒡᓗ ᑯᕕᑎᑦᓯᓯᒪᒐᕕᑦ.’

⁴ ᐊᑕᓂᐅᓪᓕ ᐃᓴᕆᐊᓕᒥᐅᑦ ᒎᑎᖓᑕ ᓂᕈᐊᓚᐅᕐᐹᖓ ᐊᑖᑕᒪ ᐃᓚᒋᔭᖏᓐᓂᑦ ᐊᖓᔪᖅᑳᕐᔪᐊᖑᖁᓪᓗᖓ ᐃᓴᕆᐊᓕᒥᐅᓄᑦ ᐃᓱᖃᖏᑦᑐᒧᑦ; ᔫᑕ ᓂᕈᐊᓚᐅᕐᒪᒍ ᐊᐅᓚᑦᓯᔨᐅᖁᓪᓗᒍ, ᐊᑖᑕᒪ ᐃᓚᒋᔭᖏᓐᓂᑦ, ᐊᑖᑕᒪᓗ ᐃᕐᓂᖏᓐᓂᑦ, ᖁᕕᐊᒋᓚᐅᕐᐹᖓ ᐊᖓᔪᖅᑳᕐᔪᐊᓐᖑᕐᑎᓪᓗᖓ ᐃᓴᕆᐊᓕᒥᐅᓕᒫᓄᑦ.

⁵ ᐃᕐᓂᓕᒫᓐᓂᓪᓗ (ᐊᑕᓂᐅᑉ ᐃᕐᓂᕐᑖᕐᑎᓚᐅᕐᒪᖓ ᐅᓄᕐᑐᓂᒃ) ᓂᕈᐊᓚᐅᕐᐹ ᐃᕐᓂᕋ ᓲᓗᒨᓂ ᐃᒃᓯᕙᐅᑕᕐᔪᐊᕐᒥ ᐃᒃᓯᕙᖁᓪᓗᒍ ᐊᑕᓂᐅᑉ ᐊᖓᔪᖅᑲᐅᕕᖓᓂ ᐃᓴᕆᐊᓕᒥᐅᓂ.

⁶ ᐅᖃᐅᑎᓚᐅᕐᒪᖓ, ‘ᐃᕐᓂᕕᑦ ᓲᓗᒨᓂᐅᑉ ᐃᒡᓗᓕᐅᕈᒫᕐᐹᖓ ᐊᕙᓗᖃᕐᓗᒍ, ᑖᓐᓇ ᓂᕈᐊᓚᐅᕋᒃᑯ ᐃᕐᓂᕆᔪᒪᓪᓗᒍ, ᑖᑦᓱᒪᓗ ᐊᑖᑕᒋᓂᐊᕐᐹᖓ.

⁷ ᐊᖓᔪᖅᑲᐅᕕᖓ ᐋᖅᑭᒃᓯᒪᑎᓐᓂᐊᕐᐸᕋ ᐃᓱᖃᖏᑦᑐᒧᑦ ᓱᖁᓯᔪᐃᑦᑑᓗᓂ ᓈᓚᑦᓯᐊᕐᐸᑦ ᐱᖁᔭᓐᓂᒃ ᐊᑐᕐᑕᐅᖁᔭᓐᓂᒡᓗ, ᓲᕐᓗ ᐅᓪᓗᒥ ᑍᒤᒻᒪᑦ.’

⁸ ᒫᓐᓇᓕ ᑍᒤᒻᒪᑦ, ᐃᓴᕆᐊᓕᒥᐅᑦ ᓵᖓᓂ, ᐊᑕᓂᐅᑉ ᑲᑎᒪᔪᖁᑎᖏᑕ, ᒎᑎᕗᓪᓗ ᑐᓵᑎᓪᓗᒍ, ᓈᓚᑦᓯᐊᕆᑦᓯ ᕿᓂᕐᓗᓯᓗ ᐊᑕᓂᐅᑉ ᒎᑎᓯ ᐱᖁᔭᓕᒫᖏᓐᓂᒃ; ᒫᓂ ᓄᓇᑦᓯᐊᕙᖕᒥ ᓄᓇᖃᕈᓐᓇᖁᓪᓗᓯ, ᑭᖑᕚᑦᓯᓐᓄᓪᓗ ᓄᓇᒋᔭᐅᔪᓐᓇᖁᓪᓗᒍ ᑭᖑᕐᖑᑦᔭᐅᓗᓂ ᐃᓱᖃᖏᑦᑐᒧᑦ.

⁹ “ᐃᕝᕕᓪᓕ, ᐃᕐᓃᒃ ᓲᓗᒨᓃ, ᐊᑖᑕᕕᑦ ᒎᑎᖓ ᖃᐅᔨᒪᒍᒃ, ᐱᔨᑦᓯᕐᓗᒍᓗ ᐆᒻᒪᑎᓕᒫᕐᓄᑦ ᐃᓱᒪᑯᓪᓗ ᐱᔪᒪᑦᓯᐊᕐᓗᑎᑦ; ᐊᑕᓂᐅᑉ ᐆᒻᒪᑎᓕᒫᑦ ᖃᐅᔨᓴᕐᐸᖕᒪᒋᑦ, ᖃᐅᔨᒪᓪᓗᓂᓗ ᐸᕐᓇᒃᑕᐅᔪᓕᒫᓂᒃ ᐃᓱᒪᒋᔭᐅᔪᓕᒫᓂᒡᓗ. ᕿᓂᕈᕕᐅᒃ, ᓇᓂᓂᐊᕐᐸᑦ; ᕿᒪᖕᓂᐊᕈᕕᐅᒃ ᑖᑦᓱᒪ ᐃᒋᑦᓱᒫᕐᐹᑎᑦ ᐃᓱᖃᖏᑦᑐᒧᑦ.

¹⁰ ᐃᓱᒪᒃᓴᕐᓯᐅᓕᕆᑦ ᒫᓐᓇ, ᐊᑕᓂᐅᑉ ᓂᕈᐊᕐᓯᒪᖕᒪᑎᑦ ᐃᒡᓗᓕᐅᖁᓪᓗᑎᑦ ᐃᑦᔪᕐᓁᑦᑐᒥᒃ; ᓲᖑᔫᓗᑎᑦ, ᐱᓇᓱᐊᕐᓂᐊᕐᐸᑦ.”

¹¹ ᑍᕕᑎᐅᓪᓗ ᐃᕐᓂᓂ ᓲᓗᒨᓂ ᑐᓂᕚ ᐆᒃᑑᑎᒃᓴᓂᒃ ᑐᒃᓯᐊᕐᕕᒡᔪᐊᒃᓴᐅᑉ ᐊᕙᑖᓄᑦ, ᐃᒡᓗᒃᓴᖏᓐᓄᑦ ᑮᓇᐅᔭᖃᐅᑎᒃᓴᖏᓐᓄᑦ, ᑲᑎᒪᕕᒃᓴᓄᑦ ᖁᕝᕙᓯᖕᓂᕐᓴᓄᑦ, ᑲᑎᒪᕕᒃᓴᓄᓪᓗ ᐊᒃᐸᓯᖕᓂᕐᓴᓄᑦ, ᓂᑲᒍᓱᖕᓂᐅᓪᓗ ᐃᒃᓯᕙᐅᑕᖓᑕ ᐃᓂᒃᓴᖓᓄᑦ;

¹² ᐆᒃᑑᑎᒃᓮᓪᓗ ᐃᓱᒪᒋᓯᒪᔭᓕᒫᓂ ᑐᓂᕔᑦ ᐊᑕᓂᐅᑉ ᐃᒡᓗᖓᑕ ᐱᕕᑐᓂᒃᓴᖏᑦ, ᑲᑎᒪᕕᒃᓴᓕᒫᖏᓪᓗ, ᑮᓇᐅᔭᒃᑯᕕᒃᓴᓕᒫᖏᓪᓗ ᒎᑎᐅᑉ ᐃᒡᓗᖓᓂ, ᑐᓂᕐᕈᑎᒃᓮᓪᓗ ᐃᑦᔪᕐᓁᑎᑕᐅᓯᒪᔪᑦ ᐃᓂᒃᓴᖏᑦ;

¹³ ᑐᓂᕐᕈᓯᕐᑎᑦᓯᔩᓪᓗ ᓕᕔᑏᓪᓗ ᐊᕕᒃᑐᕐᓯᒪᓂᒃᓴᖏᑦ, ᐱᓇᓱᐊᒐᒃᓴᐅᔪᓕᒫᓪᓗ ᐊᑕᓂᐅᑉ ᐃᒡᓗᖓᓂ; ᓱᓇᑐᐃᓐᓇᒃᓴᓕᒫᓪᓗ ᐱᔨᑦᓯᕈᑎᒃᓮᑦ ᐊᑕᓂᐅᑉ ᐃᒡᓗᖓᓂ.

¹⁴ ᒎᓗᐃᓪᓗ ᐅᖁᒤᓐᓂᖏᓐᓂᒃ ᑐᓂᕚ ᑐᒃᓯᐊᕐᓇᐅᑎᓪᓗᒍ ᓱᓇᒃᑯᑎᒃᓴᓕᒫᓄᑦ ᐊᑐᕐᑐᒃᓴᐅᔪᒫᕐᑐᓄᑦ, ᓯᐅᓪᕕᕆᓕᒫᓪᓗ ᐅᖁᒤᓐᓂᖏᓐᓂᒃ ᐱᔨᑦᓯᕐᓂᕐᒧᑦ ᐊᑐᕐᑐᒃᓮᑦ,

¹⁵ ᒎᓗᐃᓪᓗ ᐅᖁᒤᓐᓂᖏᑦ ᓇᓂᕈᐊᖃᕐᕕᖕᓄᑦ ᐊᑐᕐᑕᐅᔪᒃᓴᑦ, ᒎᓗᐃᓪᓗ ᓇᓂᕈᐊᑉ ᐃᓂᒃᓴᖏᓐᓄᑦ ᐊᑐᕐᑕᐅᔪᒃᓴᑦ, ᓯᐅᓪᕕᕇᓪᓗ ᓇᓂᕈᐊᑉ ᐃᓂᒃᓴᖏᓐᓄᑦ ᐊᑐᕐᑕᐅᔪᒃᓴᑦ, ᓇᓂᕈᐊᑉ ᐃᓂᒃᓴᖏᑕ ᐊᖏᓂᖏᑦ ᒪᓕᓪᓗᒋᑦ.

¹⁶ ᒎᓗᐃᓪᓗ ᐅᖁᒤᓐᓂᖏᑦ ᑐᓂᕔᑦ ᓂᐊᖂᔧᑦ ᑐᓂᔭᐅᓯᒪᔪᑦ ᓵᖏᓐᓄᑦ ᐊᑐᕐᑕᐅᔪᒃᓴᑦ, ᓯᐅᓪᕕᕇᓪᓗ ᓵᓄᑦ ᓯᐅᓪᕕᕆᓄᑦ ᐊᑐᕐᑐᒃᓴᑦ;

¹⁷ ᒎᓗᐃᓪᓗ ᐃᓚᓯᒪᖏᑦᑐᑦ ᑲᐴᖅᑲᐅᑎᓕᐅᕐᑐᓄᑦ ᐊᑐᕐᑐᒃᓴᑦ, ᒎᓗᓄᓪᓗ ᐴᒍᑕᕐᓄᑦ, ᐃᒥᐅᑎᓄᓪᓗ; ᒎᓗᓄᓪᓗ ᐴᒍᑕᐅᔭᓄᑦ ᐊᑐᕐᑐᒃᓴᑦ ᐅᖁᒤᓐᓃᑦ ᒪᓕᒡᓗᒋᑦ, ᓯᐅᓪᕕᕆᓂᒡᓗ ᐴᒍᑕᕐᓄᑦ ᐊᑐᕐᑐᒃᓴᑦ ᐊᖏᓂᖏᑦ ᒪᓕᒡᓗᒋᑦ.

¹⁸ ᒎᓗᐃᓪᓗ ᐱᐅᓴᕐᑕᐅᓯᒪᔪᑦ ᐅᖁᒤᓐᓂᖏᑦ ᑐᓂᕔᑦ ᑐᓂᕐᕈᓯᕐᕕᖕᒧᑦ ᐳᔫᕐᑎᑦᓯᑦᔪᑎᒧᑦ ᐊᑐᕐᑐᒃᓴᑦ, ᐊᒃᓴᓗᐊᓕᐅᓪᓗ ᓴᓇᔭᐅᓂᒃᓴᖓᓄᑦ ᒎᓗᐃᑦ ᓯᕈᐱᒻ ᐃᓴᕈᖏᑦ ᐃᓵᖓᓪᓗᑎᒃ ᐅᓕᒃᓯᓯᒪᔪᒃᓴᑦ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᑕ ᖃᖓᓂ.

¹⁹ ᐊᑕᓂᐅᑉ ᖃᐅᔨᑎᓚᐅᕐᐹᖓ ᑎᑎᕋᕐᓯᒪᔪᑎᒍᑦ ᑖᒃᑯᐊᓕᒫᑦ ᐊᒡᒐᖕᒥᓄᑦ ᑎᑎᕋᓚᐅᕐᒪᒋᑦ ᐅᕙᓐᓄᑦ, ᓴᓇᔭᐅᔭᕆᐊᖃᓛᕐᒪᑕ ᐸᕐᓇᒃᑕᐅᓯᒪᓂᖏᑦ ᒪᓕᒡᓗᒋᑦ.

²⁰ ᑕᕝᕙ ᑍᕕᑎᐅᑉ ᐃᕐᓂᓂ ᓲᓗᒨᓂ ᐅᖃᐅᑎᕚ, “ᓲᖑᓕᕆᑦ ᑲᑦᓱᖎᑦᓯᐊᕐᓗᑎᓪᓗ, ᐱᓇᓱᐊᕈᒫᕐᐳᑎᑦ. ᓯᕘᕋᖏᓪᓗᑎᑦ, ᓴᐱᕐᑍᓕᓗᑎᑦ; ᐊᑕᓂᐅᑉ ᒎᑎᐅᑉ, ᐊᒡᓛᑦ ᒎᑎᒪ ᐃᓚᒋᖕᒪᑎᑦ. ᑖᑦᓱᒪ ᕿᒪᖕᓂᐊᓐᖏᓛᑎᑦ ᐊᓚᕐᓂᐊᓐᖏᓛᑎᓪᓗ, ᐱᔭᕇᓚᐅᖅᑳᕐᑎᓐᓇᑎᑦ ᐱᓇᓱᐊᕆᐊᓕᖕᓂᒃ ᐱᔨᑦᓯᕐᓂᓕᒫᕐᓂ ᐊᑕᓂᐅᑉ ᐃᒡᓗᖓᓂᒃ.

²¹ ᑕᑯᒋᓪᓗ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᐊᒡᒍᕐᓯᒪᔭᕇᕐᐳᑦ ᐱᔨᑦᓯᕐᓂᓕᒫᓄᑦ ᒎᑎᐅᑉ ᐃᒡᓗᖓᓂ; ᓴᓇᔩᑦ ᐃᓕᖕᓂᒃ ᐃᑲᔪᕈᒪᑦᓯᐊᕐᑐᑦ ᐱᔪᓐᓇᑦᓯᐊᕐᑐᓪᓗ ᐃᑲᔪᕐᓂᐊᕐᐹᑎᑦ ᓴᓇᔭᕆᐊᓕᓕᒫᓄᑦ ᖃᓄᐃᑦᑐᑐᐃᓐᓇᑦᓯᐊᓄᑦ; ᐊᖓᔪᖅᑳᑦ ᐃᓄᓕᒫᓪᓗ ᐱᖁᔨᓂᓕᒫᕐᓂᒃ ᓈᓚᑦᓯᐊᕈᒫᕐᐳᑦ.”