ᑯᕉᓂᑲ ᓯᕗᓪᓖᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᕕᒡᔪᐊᒥ ᖃᐅᔨᓴᕐᑏᑦ

¹ ᐃᑎᕐᑕᕐᕕᓕᕆᔩᑦ ᐱᕕᒃᓴᓕᐅᕐᑕᐅᓂᖏᑦ: ᑰᕋᕼᐂᑎᒥᐅᑦ, ᒥᓯᓕᒤᐊ ᑯᕆᐅᑉ ᐃᕐᓂᖓ, ᐊᓴᐸᐅᑉ ᑭᖑᕚᖏᓐᓂᑦ ᐱᔪᖅ.

² ᒥᓯᓕᒤᐊᐅᑉ ᐃᕐᓂᖏᑦ ᐅᑯᐊᖑᕗᑦ: ᓴᑲᕅᐊ ᐊᖓᔪᒃᓯᕐᐹᖅ, ᑐᖓᓕᐊ ᔨᑎᐊ-ᐃᐅᓪ, ᐱᖓᔪᐊᑦ ᔨᐸᑍᐊ, ᓯᑕᒪᖓᑦ ᔭᑎᓁ-ᐃᐅᓪ,

³ ᑕᓪᓕᒪᖓᑦ ᐃᓛᒻ, ᐱᖓᓲᔪᕐᑐᖓᑦ ᔨᕼᐅᕼᐊᓇᓐ, 7ᖓᑦ ᐃᓔ-ᐃ-ᕼᐅ-ᐃᓁ.

⁴ ᐅᐱᑦ-ᐄᑕᒻ ᐃᕐᓂᖃᓚᐅᕆᕗᖅ ᐅᑯᓂᖓ: ᓯᒤᐊ ᐊᖓᔪᒃᓯᕐᐹᖅ, ᑐᖓᓕᐊ ᔨᕼᐅᔭᐸᑦ, ᐱᖓᔪᐊᑦ ᔪᐊ, ᓯᑕᒪᖓᑦ ᓴᑲᕆ, ᑕᓪᓕᒪᖓᑦ ᓇᑖᓂᐅᓪ,

⁵ ᐱᖓᓲᔪᕐᑐᖓᑦ ᐊᒥᐅᓪ, 7ᖓᑦ ᐃᓴᑳᕆ, ᓯᑕᒪᐅᔪᕐᑐᖓᑦ ᐱ-ᐅᓕᑍ; ᒎᑎᐅᑉ ᓮᒻᒪᕐᑎᓚᐅᕐᑕᖓ.

⁶ ᓯᒤᐊᐅᑉ ᐃᕐᓂᖏᑦ ᐊᐅᓚᑦᓯᔨᐅᓚᐅᕐᐳᑦ ᐊᑖᑕᖏᑕ ᐃᓚᖏᓐᓄᑦ, ᑖᒃᑯᐊ ᐊᖑᑏᑦ ᐊᔪᖏᑦᑐᕐᔪᐊᖑᓚᐅᕐᒪᑕ.

⁷ ᓯᒤᐊᐅᑉ ᐃᕐᓂᖏᑦ ᐅᑯᐊᖑᕗᑦ: ᐅᑎᓁ, ᕆᕙ-ᐃᐅᓪ, ᐅᐱᑎ, ᐃᐅᓪᔭᐸᑦᓗ, ᑖᒃᑯᐊ ᖃᑕᓐᖑᑎᖏᒃ ᐱᔪᓐᓇᑦᓯᐊᓚᐅᕐᐴᒃ, ᐃᓕᕼᐅ ᓯᒪᑬᐊᓗ.

⁸ ᑖᒃᑯᐊᓕᒫᑦ ᐅᐱᑦ-ᐄᑕᒥᐅᑉ ᐃᕐᓂᕆᕔᑦ ᐃᕐᓂᖏᑦ ᖃᑕᓐᖑᑎᖏᓪᓗ, ᓴᓐᖏᔫᓪᓗᑎᒃ ᐱᓇᓱᐊᕈᓐᓇᑦᓯᐊᓚᐅᕐᐳᑦ; 62ᖑᓪᓗᑎᒃ ᐅᐱᑦ-ᐃᑐᒥᒥᑦ ᐱᓯᒪᔪᑦ.

⁹ ᒥᓯᓕᒤᐊ ᐃᕐᓂᖃᕆᕗᖅ ᖃᑕᓐᖑᑎᖃᕐᓗᓂᓗ, ᐱᔪᓐᓇᑦᓯᐊᕐᑐᓂᒃ 18ᓂᒃ.

¹⁰ ᕼᐅᓴᓗ, ᒥᕋᕆᐅᑉ ᑭᖑᕚᖏᓐᓂᑦ ᐱᓯᒪᔪᖅ, ᐅᑯᓂᖓ ᐃᕐᓂᖃᕐᐳᖅ: ᓯᒻᕆ ᐊᖓᔪᖅᑳᖑᔪᖅ (ᑖᓐᓇ ᐊᑖᑕᖓᑕ ᐊᖓᔪᖅᑳᓐᖑᕐᑎᓚᐅᕐᐹ ᐊᖓᔪᒃᓯᕐᐹᖑᖏᒃᑲᓗᐊᕐᑎᓪᓗᒍ),

¹¹ ᑐᖓᓕᐊ ᕼᐃᓪᑬᐊ, ᐱᖓᔪᐊᑦ ᑎᐸᓔᐊ, ᓯᑕᒪᖓᑦ ᓴᑲᕅᐊ; ᐃᕐᓂᓕᒫᖏᑦ ᖃᑕᓐᖑᑎᖏᓪᓗ ᕼᐅᓴᐅᑉ 13ᖑᓚᐅᕐᐳᑦ.

¹² ᑖᒃᑯᐊ ᑕᕝᕙ ᐱᕕᒃᓴᕐᑖᕐᑎᑕᐅᓪᓗᑎᒃ ᐊᕕᒃᑐᕐᑕᐅᓚᐅᕐᑐᑦ ᐃᑎᕐᑕᕐᕕᓕᕆᔨᐅᖁᓪᓗᒋᑦ, ᐊᖓᔪᖅᑳᒥᖕᓄᑦ ᐊᐅᓚᑕᐅᓪᓗᑎᒃ, ᑕᒪᑐᒥᖓ ᐱᔭᒃᓴᖃᕐᓗᑎᒃ, ᖃᑕᓐᖑᑎᒥᒃᑎᑐᑦ, ᐱᔨᑦᓯᕐᑎᐅᓪᓗᑎᒃ ᐊᑕᓂᐅᑉ ᐃᒡᓗᖓᓂ;

¹³ ᑖᒃᑯᐊᓗ ᓇᓚᐅᑦᑖᕈᑎᒃᑯᑦ ᓇᓗᓁᕐᑕᐅᖃᑦᑕᓚᐅᕐᐳᑦ ᓯᕗᓕᖏᑕ ᐃᓚᒋᔭᖏᑦ ᒪᓕᒡᓗᒋᑦ, ᓄᑲᕐᓰᑦ ᐊᖓᔪᒃᓰᓪᓗ ᐊᑦᔨᒌᒃᑎᑕᐅᓪᓗᑎᒃ, ᐃᑎᕐᑕᕐᕕᖕᓂᒃ ᐊᑐᓂᑦ ᑲᒪᒋᔭᖃᐅᕐᓗᑎᒃ.

¹⁴ ᐃᑎᕐᑕᕐᕕᖕᒧᑦ ᓯᕿᓂᐅᑉ ᓄᐃᕕᐊᓃᑦᑐᒧᑦ ᓇᓚᐅᑦᑖᕈᑦ ᑎᒃᑯᐊᕐᓯᕗᖅ ᓯᓕᒤᐊᒧᑦ. ᐃᕐᓂᖓᓗ ᓴᑲᕅᐊ ᓇᓚᐅᑕᐅᒋᕗᖅ, ᑖᓐᓇ ᓯᓚᑐᔪᒥᒃ ᐃᓱᒪᑖᕐᑎᑦᓯᓲᖅ, ᑖᑦᓱᒪᓗ ᓇᓚᐅᑦᑖᕈᑎᖓ ᓇᓚᐅᑕᐅᕗᖅ ᐃᑎᕐᑕᕐᕕᖕᒧᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ.

¹⁵ ᐅᐱᑦ-ᐄᑕᒥᒧᑦ ᓇᓚᐅᑦᓯᕗᖅ ᐃᑎᕐᑕᕐᕕᒃ ᐅᓪᓗᓪᓗᐊᑉ ᓇᓛᓃᑦᑐᖅ, ᐃᕐᓂᖏᓪᓗ ᓇᓚᐅᑕᐅᒋᕗᑦ ᓯᕐᓗᐊᓕᕆᔨᐅᓂᐊᕐᓗᑎᒃ.

¹⁶ ᓱᐱᒻ ᕼᐅᓴᓗ ᓇᓚᐅᑦᓵᕈᑎᒃᑯᑦ ᑎᒃᑯᐊᕐᑕᐅᕘᒃ ᐃᑎᕐᑕᕐᕕᖕᒧᑦ ᓯᕿᓂᐅᑉ ᓂᐱᕕᐊᓃᑦᑐᒧᑦ, ᐃᑎᕐᑕᕐᕕᖕᒧᑦ ᓴᓕᑭᑎᒧᑦ ᐊᖅᑯᑎᒦᑦᑐᒧᑦ ᖁᒻᒧᐊᖓᔪᒧᑦ. ᖃᐅᔨᓴᕐᑐᑦ ᐃᓇᖏᕐᑎᒌᖃᑦᑕᕐᑐᒃᓴᐅᓪᓗᑎᒃ.

¹⁷ ᓕᕔᑏᑦ ᓯᕿᓂᐅᑉ ᓄᐃᕕᐊᓃᑦᑐᑦ ᐱᖓᓲᔪᕐᑑᖃᑦᑕᕐᐳᑦ ᖃᐅᑕᒫᑦ, ᐅᓐᓄᐊᓪᓗᐊᓪᓗ ᓇᓛᓃᑦᑐᑦ ᓯᑕᒪᐅᖃᑦᑕᕐᐳᑦ ᖃᐅᑕᒫᑦ, ᐅᓪᓗᓪᓗᐊᓪᓗ ᓇᓛᓃᑦᑐᑦ ᓯᑕᒪᐅᖃᑦᑕᕐᐳᑦ ᖃᐅᑕᒫᑦ, ᓯᕐᓗᐊᖓᓂᓗ ᒪᕐᕉᑦᑕᕐᓗᑎᒃ ᑲᒪᖃᑦᑕᕆᕗᑦ.

¹⁸ ᐱᕕᑐᓂᐊᓂᓗ ᓯᕿᓂᐅᑉ ᓂᐱᕕᐊᓃᑦᑐᑦ ᓯᑕᒪᐅᖃᑦᑕᕐᐳᑦ ᐱᓱᒡᕕᐅᑉ ᑭᒡᓕᖓᓃᑦᑐᑦ ᒪᕐᕉᒡᓗ ᐱᕕᑐᓂᐊᓃᑎᓪᓗᒋᒃ.

¹⁹ ᑖᒃᑯᐊ ᑕᕝᕙ ᐊᒡᒍᕐᑕᐅᓚᐅᕐᑐᑦ ᐃᑎᕐᑕᕐᕕᓕᕆᔨᐅᓂᐊᕐᑎᓪᓗᒋᑦ ᑰᕋᕼᐂᑎᒥᐅᑦ ᒥᕋᕆᐅᑉ ᐃᕐᓂᖏᑦ.

ᑐᒃᓯᐊᕐᕕᒡᔪᐊᒥ ᐊᓯᖏᑦ ᐱᔭᒃᓮᑦ

²⁰ ᓕᕔᑎᓂᓪᓗ, ᐊᕼᐂᔭ ᑮᓇᐅᔭᓕᕆᔨᓄᑦ ᐊᖓᔪᖅᑲᐅᕗᖅ ᒎᑎᐅᑉ ᐃᒡᓗᖓᓂ ᐱᕕᐊᕐᓇᕐᑐᓄᓪᓗ ᑐᓂᔭᐅᓯᒪᔪᓄᑦ ᐃᑦᔪᕐᓁᑦᑐᓄᑦ.

²¹ ᓔᑕᓂᐅᓪᓗ ᐃᕐᓂᖏᑦ ᒌᕐᓲᓂᐅᑉ ᑭᖑᕚᖏᑦ ᓔᑕᓂᒥᐅᑦ, ᐊᖓᔪᖅᑳᖑᔪᑦ ᓯᕗᓕᖏᑕ ᐃᓚᖏᓐᓂ, ᓔᑕᑯᓐᓂ ᒋᓱᓁᑎᒥᐅᑕᓂ: ᔨᕼᐂᓔ.

²² ᔨᕼᐂᓔᑉ ᐃᕐᓂᖏᑦ, ᔨᑕᒻ ᓄᑲᖓᓗ ᔪᐃᓕ, ᑮᓇᐅᔭᓕᕆᔨᓄᑦ ᐊᖓᔪᖅᑳᖑᕘᒃ ᐊᑕᓂᐅᑉ ᐃᒡᓗᖓᓂ.

²³ ᐊᒪᕋᒤᑎᓂᑦ, ᑖᒃᑯᐊ ᐃᔾᕼᐊᕅᑏᑦ, ᕼᐃᐸᕋᓁᑏᑦ, ᐊᑦᔧᐅᓔᑎᓪᓗ;

²⁴ ᓯᐳᐃᐅᓪ ᒌᕐᓲᒥᐅᑉ ᐃᕐᓂᖓ, ᒨᓯᓯᐅᑉ ᑭᖑᕚᖓ ᐊᖓᔪᖅᑳᖑᕗᖅ ᑮᓇᐅᔭᓕᕆᔨᓕᒫᓄᑦ.

²⁵ ᖃᑕᓐᖑᑎᖏᓪᓗ ᐅᑯᐊᖑᕗᑦ: ᐃᓔᓯᕆ ᑖᑦᓱᒪᓗ ᐃᕐᓂᖓ ᕆᕼᐊᐰᐊ, ᑖᑦᓱᒪᓗ ᐃᕐᓂᖓ ᔨᓮᐊ, ᑖᑦᓱᒪᓗ ᐃᕐᓂᖓ ᔪᕌᒻ, ᑖᑦᓱᒪᓗ ᐃᕐᓂᖓ ᔨᒃᕆ, ᑖᑦᓱᒪᓗ ᐃᕐᓂᖓ ᓯᓗᒥᑎ.

²⁶ ᑖᓐᓇ ᓯᓗᒥᑎ ᖃᑕᓐᖑᑎᖏᓪᓗ ᑲᒪᔨᐅᕗᑦ ᑮᓇᐅᔭᓕᒫᓄᑦ ᑐᓂᕐᕈᑕᐅᓯᒪᔪᓄᑦ ᐃᑦᔪᕐᓁᑦᑐᓄᑦ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐊᖓᔪᖅᑲᐅᔪᓪᓗ ᐊᑖᑕᒋᔭᐅᔪᑦ ᐃᓚᖏᓐᓂ, ᐊᖓᔪᖅᑳᓪᓗ ᑕᐅᓴᓐᑎᓄᑦ 100ᓄᓪᓗ, ᐊᖓᔪᖅᑳᓪᓗ ᐅᓇᑕᕐᑐᒃᓴᓄᑦ, ᑐᓂᕐᕈᑎᖏᓐᓄᑦ.

²⁷ ᐅᓇᑕᕐᓂᒃᑯᑦ ᐱᑖᕕᓃᑦ ᐃᑦᔪᕐᓁᑎᑉᐰᑦ ᐊᑕᓂᐅᑉ ᐃᒡᓗᖓᓂᒃ ᓴᓇᔪᓄᑦ ᐊᑐᕐᑕᐅᔪᒃᓴᐅᖁᓪᓗᒋᑦ.

²⁸ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᓴᒧᐃᓕᐅᑉ ᑐᓂᕐᕈᑎᖏᑦ, ᓴᐅᓕᐅᓪᓗ ᑭᔅ ᐃᕐᓂᖓᑕ, ᐋᑉᓅᓪᓗ ᓂᕆᐅᑉ ᐃᕐᓂᖓᑕ, ᔪᐊᐱᐅᓪᓗ ᔨᕈᐃᐊᐅᑉ ᐃᕐᓂᖓᑕ ᑐᓂᔭᕕᓂᖏᑦ, ᐃᑦᔪᕐᓁᑎᑕᐅᓯᒪᔪᓕᒫᓪᓗ ᓯᓗᒥᑎᒧᑦ ᐃᓚᒋᔭᖏᓐᓄᓪᓗ ᑲᒪᒋᔭᐅᓚᐅᕐᐳᑦ.

ᐊᓯᖏᑦ ᓕᕔᑏᑦ ᐱᔭᒃᓴᖏᑦ

²⁹ ᐃᔾᕼᐊᕅᑎᓂᑦ, ᓯᓇᓁᐊ ᐃᕐᓂᖏᓪᓗ ᐱᔭᒃᓴᖃᕐᐳᑦ ᐊᖓᔪᖅᑳᖑᓪᓗᑎᒃ ᐃᓱᐊᕐᓮᔨᐅᓪᓗᑎᒡᓗ ᐃᓴᕆᐊᓕᒥᐅᓄᑦ ᔨᕉᓴᓕᐅᑉ ᓯᓚᑖᓃᑦᑐᓄᑦ.

³⁰ ᕼᐃᐸᕋᓁᑎᓂᑦ, ᕼᐊᓴᐰᐊ ᐃᓚᒋᔭᖏᓪᓗ 1,700ᐅᕗᑦ ᐊᖑᑏᑦ ᐊᔪᖏᑦᓯᐊᕐᑐᑦ, ᐊᖓᔪᖅᑳᖑᕗᑦ ᐃᓴᕆᐊᓕᒥᐅᓄᑦ ᔪᐊᕐᑕᓂᐅᑉ ᑰᖓᑕ ᐊᑭᐊᓃᑦᑐᓄᑦ ᓯᕿᓂᐅᑉ ᓂᐱᕕᐊᓃᑦᑐᓄᑦ ᐊᑕᓂᐅᑉ ᐱᔭᕆᐊᓕᖏᓐᓂᒃ ᐊᖓᔪᖅᑳᕐᔪᐊᓪᓗ ᐱᔨᑦᓯᕐᑕᐅᓂᖓᓄᑦ.

³¹ ᕼᐃᐸᕋᓁᑎᑯᓐᓂ, ᔨᕅᐊ ᐊᖓᔪᖅᑳᖑᕗᖅ ᕼᐃᐸᕋᓁᑎᓄᑦ ᐊᑖᑕᖏᑕ ᑭᖑᕚᖏᑦ ᓇᓪᓕᐊᓐᓂᑐᐃᓐᓇᕐᓗ ᐱᓯᒪᔪᓕᒫᓄᑦ. ᑍᕕᑎ ᐊᕐᕌᒍᓂᒃ 40ᓂᒃ ᐊᐅᓚᑦᓯᔨᐅᓕᕐᑎᓪᓗᒍ ᕿᓂᕐᑐᖃᓕᓚᐅᕐᒪᑦ ᐊᖑᑎᓂᒃ ᐊᔪᖏᑦᓯᐊᕐᑐᓂᒃ ᓇᓂᓯᔪᖃᓚᐅᕐᐳᖅ ᔧᔨᕆᒥ ᒋᓕᐊᑎᒦᑦᑐᒥᑦ.

³² ᖃᑕᓐᖑᑎᖏᓪᓗ 2,700ᐅᕗᑦ ᐊᖑᑏᑦ ᐊᔪᖏᑦᓯᐊᕐᑐᑦ, ᐊᖓᔪᖅᑳᑦ ᐊᑖᑕᖏᑕ ᐃᓚᖏᓐᓂ, ᐊᖓᔪᖅᑳᕐᔪᐊᑉ ᑍᕕᑎᐅᑉ ᐊᖓᔪᖅᑳᓐᖑᕐᑎᓚᐅᕐᐰᑦ ᕉᐱᓂᒥᐅᓄᑦ, ᒑᑎᒥᐅᓄᑦ, ᒫᓇᓯᐅᓪᓗ ᑭᖑᕚᖏᑕ ᕿᑎᖅᑲᖏᓐᓄᑦ ᓱᓇᓕᒫᑦ ᒎᑎᒧᐊᖓᔪᓄᑦ ᐊᖓᔪᖅᑳᕐᔪᐊᒧᐊᖓᔪᓄᓪᓗ.