ᑯᕉᓂᑲ ᓯᕗᓪᓖᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᓕᕔᑏᑦ ᐱᓇᓱᐊᕐᓂᖏᑦ

¹ ᑍᕕᑎ ᐃᓄᑐᖃᐅᓕᕋᒥ ᐅᓪᓗᖏᓪᓗ ᓈᖕᒪᑕ, ᐃᕐᓂᓂ ᓲᓗᒨᓂ ᐊᖓᔪᖅᑳᕐᔪᐊᕈᕐᑎᑉᐹ ᐃᓴᕆᐊᓕᒥᐅᓄᑦ.

² ᑍᕕᑎᐅᓪᓗ ᑲᑎᖁᕔᑦ ᐃᓴᕆᐊᓕᒥᐅᑦ ᓯᕗᓕᕐᑎᓕᒫᖏᑦ ᑐᓂᕐᕈᓯᕐᑎᑦᓯᔩᓪᓗ ᓕᕔᑏᓪᓗ.

³ ᓕᕔᑏᑦ ᓈᓴᕐᑕᐅᓯᒪᕗᑦ ᐊᕐᕌᒍᓖᑦ ᐱᒋᐊᕐᓗᒋᑦ 30ᒥᑦ ᐅᖓᑖᓄᑦ, ᐅᓄᕐᓂᖏᓪᓗ ᐊᖑᑏᑦ 38,000ᐅᕗᑦ.

⁴ ᑖᒃᑯᓇᓐᖓᑦ 24,000ᓮᑦ, ᑍᕕᑎᐅᑉ ᑲᒪᔨᐅᖁᕔᑦ ᐊᑕᓂᐅᑉ ᐃᒡᓗᖓ ᓴᓇᔭᐅᓕᕐᑎᓪᓗᒍ, 6,000 ᐊᖓᔪᖅᑳᖑᔪᒃᓴᐅᓪᓗᑎᒃ ᐃᓱᐊᕐᓮᔨᐅᓪᓗᑎᒡᓗ,

⁵ 4,000 ᑲᒪᔨᐅᔪᒃᓴᐅᕗᑦ ᐃᑎᕐᑕᕐᕕᖕᒥᒃ, 4,000ᓪᓗ ᓂᕐᑐᐃᔨᐅᔪᒃᓴᐅᕗᑦ ᐊᑕᓂᕐᒥᒃ ᓂᑦᔭᐅᑎᓄᑦ, ᓂᕐᑐᐃᑦᔪᑎᒃᓴᓕᐊᕆᓚᐅᕐᑕᓐᓄᑦ.

⁶ ᑍᕕᑎᐅᓪᓗ ᐋᖅᑭᒃᓱᕐᐰᑦ ᐊᕕᒃᑐᕐᓗᒋᑦ ᓕᕔᑉ ᐃᕐᓂᖏᑦ: ᒌᕐᓲᒻ, ᑯᕼᐋᑎ, ᒥᕋᕆᓗ.

⁷ ᒌᕐᓲᓂᒥᐅᑦ ᐅᑯᐊᖑᕗᑦ: ᓔᑕᓂ, ᓯᒥ-ᐂᓗ.

⁸ ᓔᑕᓂᐅᑉ ᐃᕐᓂᖏᑦ: ᐊᖓᔪᖅᑳᖓᑦ ᔨᕼᐃᐅᓪ, ᔨᑕᒻᓗ, ᔪᐃᓕᓗ, ᑖᒃᑯᐊ ᐱᖓᓱᑦ.

⁹ ᓯᒥ-ᐂᑉ ᐃᕐᓂᖏᑦ: ᓯᓗᒥᑎ, ᕼᐊᔨ-ᐅᓪ, ᕼᐊᕋᓂᓗ, ᑖᒃᑯᐊ ᐱᖓᓱᑦ. ᑖᒃᑯᐊ ᐊᖓᔪᖅᑳᖑᕗᑦ ᓯᕗᓕᖏᑕ ᓔᑕᓂᐅᑉ ᐃᓚᖏᓐᓂ.

¹⁰ ᓯᒥ-ᐂᑉ ᐃᕐᓂᖏᑦ ᐅᑯᐊᖑᕗᑦ: ᔭᕼᐊᑕ, ᔩᓇ, ᔨᐅᔅ, ᐱᕅᐊᓗ. ᑖᒃᑯᐊ ᓯᑕᒪᑦ ᓯᒥ-ᐂᑉ ᐃᕐᓂᕆᕔᑦ.

¹¹ ᔭᕼᐊᑕ ᐊᖓᔪᖅᑳᖑᕗᖅ, ᑐᖓᓕᐊᓗ ᔩᔭ; ᔨᐅᔅᑯᓪᓕ ᐱᕅᐊᒃᑯᒃ ᐅᓄᕐᑐᓂᒃ ᐃᕐᓂᖃᓚᐅᖏᒻᒪᑎᒃ; ᑍᒤᒻᒪᑦ ᐃᓕᔭᐅᕘᒃ ᐊᑕᐅᓯᕐᑎᑐᑦ ᐊᑖᑕᖓᑕ ᐃᓚᖏᓐᓄᑦ.

¹² ᐅᑯᐊ ᑯᕼᐋᑎᐅᑉ ᐃᕐᓂᖏᑦ: ᐊᒪᕌᒻ, ᐃᔾᕼᐊᕆ, ᕼᐃᐸᕋᓐ, ᐊᑦᔧᐅᓕᓗ, ᑖᒃᑯᐊ ᓯᑕᒪᐅᕗᑦ.

¹³ ᐊᒪᕌᒥᐅᑉ ᐃᕐᓂᖏᒃ: ᐂᕉᓂ ᒨᓯᓯᓗ. ᐂᕉᓂ ᓴᓂᕐᕙᒃᑕᐅᓯᒪᓚᐅᕐᐳᖅ ᐃᑦᔪᕐᓁᓐᓂᕐᐹᓂᒃ ᐱᓇᓱᐊᕐᑎᐅᖁᓪᓗᒍ, ᐂᕉᓂᓗ ᐃᕐᓂᖏᓪᓗ ᐃᓱᖃᖏᑦᑐᒧᑦ ᑎᐱᑦᓯᐊᕆᒃᑐᓂᒃ ᐳᔫᕐᑎᑦᓯᔨᐅᖁᓪᓗᒋᑦ ᐊᑕᓂᐅᑉ ᓵᖓᓂ, ᑖᓐᓇᓗ ᐱᔨᑦᓯᕐᓗᒍ ᓮᒻᒪᕐᑎᑦᓯᖃᑦᑕᕐᓗᑎᒡᓗ ᐃᓄᖕᓂᒃ ᑖᑦᓱᒪ ᐊᑎᖓᓂ ᐃᓱᖃᖏᑦᑐᒧᑦ.

¹⁴ ᒨᓯᓯᐅᓪᓕ ᒎᑎᐅᑉ ᐃᓄᖁᑎᖓᑕ ᐃᕐᓂᖏᑦ ᐱᓇᓱᐊᒐᒃᓴᖃᕐᑎᑕᐅᓚᐅᕐᐳᑦ ᓕᕔᑉ ᑭᖑᕚᖏᓐᓂ.

¹⁵ ᒨᓯᓯᐅᑉ ᐃᕐᓂᖏᑦ ᐅᑯᐊᖑᕗᑦ: ᒌᕐᓲᒻ ᐃᓔᓯᕆᓗ.

¹⁶ ᒌᕐᓲᒻ ᐃᕐᓂᖏᑦ: ᓯᐳᐃᐅᓪ ᐊᖓᔪᖅᑳᖑᕗᖅ.

¹⁷ ᐃᓔᓯᕆᐅᑉ ᑭᖑᕚᖏᓐᓂ: ᕆᕼᐊᐰᐊ ᐊᖓᔪᖅᑳᖑᕗᖅ; ᐃᓕᓯᕆᓗ ᐃᕐᓂᖃᒃᑲᓐᓂᓐᖏᓚᖅ, ᕋᕼᐊᐰᐊᓪᓕ ᐃᕐᓂᖏᑦ ᐅᓄᕐᑑᓚᐅᕐᐳᑦ.

¹⁸ ᐃᔾᕼᐊᕆᐅᑉ ᐃᕐᓂᖏᑦ: ᓯᓗᒥᑎ ᐊᖓᔪᖅᑳᖑᕗᖅ.

¹⁹ ᕼᐃᐸᕋᓂᐅᑉ ᐃᕐᓂᖏᑦ: ᔨᕅᐊ ᐊᖓᔪᖅᑳᖑᕗᖅ, ᑐᖓᓕᐊ ᐊᒪᕅᐊ, ᐱᖓᔪᐊᑦ ᔭᕼᐊᔨᐅᓪ, ᓯᑕᒪᖓᑦ ᔨᑲᒦᒻ.

²⁰ ᐊᑦᔧᐆᑉ ᐃᕐᓂᖏᑦ ᐅᑯᐊᖑᕗᑦ: ᒤᑲ ᐊᖓᔪᖅᑳᖑᕗᖅ ᑐᖓᓕᐊ ᐃᓮᐊ.

²¹ ᒥᕋᕆᐅᑉ ᐃᕐᓂᖏᑦ ᐅᑯᐊᖑᕗᑦ: ᒪᕼᐊᓔ, ᒧᓮᓗ. ᒫᓕᐅᑉ ᐃᕐᓂᖏᑦ ᐅᑯᐊᖑᕗᑦ: ᐃᓕᓯᕆ ᑭᔅᓗ.

²² ᐃᓕᓯᕆ ᑐᖁᓚᐅᕐᐳᖅ ᐃᕐᓂᖃᕋᓂ, ᐸᓂᖃᑐᐃᓐᓇᕐᓗᓂ; ᖃᑕᓐᖑᑎᖓᑕᓗ ᑭᓯᐅᑉ ᐃᕐᓂᖏᑕ, ᓄᓕᐊᕐᑖᕆᕔᑦ.

²³ ᒧᓮᑉ ᐃᕐᓂᖏᑦ ᐅᑯᐊᖑᕗᑦ: ᒪᕼᐊᓔ, ᐃᑐᕆ, ᔨᕆᒪᑎᓗ, ᑖᒃᑯᐊ ᐱᖓᓲᕗᑦ.

²⁴ ᑖᒃᑯᐊ ᑕᕝᕙ ᓕᕔᑉ ᐃᕐᓂᖏᑦ ᐊᑖᑕᖓᑕ ᐃᓚᖏᑎᒍᑦ, ᐊᖓᔪᖅᑳᐅᔪᑦ ᐊᑖᑕᖏᑕ ᐃᓚᖏᓐᓂ ᓈᓴᕐᑕᐅᓯᒪᕗᑦ ᐃᓛᒃᑯᑦ ᐅᓄᕐᓂᖏᑦ ᐊᑎᖏᑦ ᒪᓕᒡᓗᒋᑦ, ᐱᓇᓱᐊᕐᑎᐅᓚᐅᕐᑐᑦ ᐊᑕᓂᐅᑉ ᐃᒡᓗᖓᓂ, ᐱᒋᐊᕐᓗᒋᑦ ᐊᕙᑎᓂᒃ ᐊᕐᕌᒍᓕᖕᓂᑦ ᐅᖓᑖᓄᑦ.

²⁵ ᑍᕕᑎ ᐅᖃᓚᐅᕐᒪᑦ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ, ᐃᓄᖁᑎᒥᓂᒃ ᐅᓇᑕᕐᑕᐅᔪᓐᓃᕐᑎᑦᓯᕗᖅ; ᐃᓂᖃᖁᓪᓗᒋᑦ ᔨᕉᓴᓕᒥ ᐃᓱᖃᖏᑦᑐᒧᑦ;

²⁶ ᓕᕔᑎᓪᓗ ᑐᐱᕐᒥᒃ ᐊᒡᔭᕐᓯᖃᑦᑕᕆᐊᖃᕈᓐᓃᕐᐳᑦ ᐅᕝᕙᓗ ᐱᖁᑎᖏᓐᓂᒃ ᐱᓇᓱᐊᕈᑎᒃᓴᓂᒃ.”

²⁷ ᑍᕕᑎᐅᑉ ᐅᖃᐅᓯᖏᑦ ᑭᖑᓪᓕᕐᐹᑦ ᒪᓕᒡᓗᒋᑦ ᓕᕔᑏᑦ ᓈᓴᕐᑕᐅᕗᖅ ᐊᕐᕌᒍᓖᑦ ᐊᕙᑎᓂᒃ ᐅᖓᑖᓄᑦ.

²⁸ ᐱᔭᒃᓴᖃᕐᑐᒃᓴᐅᕗᑦ ᐃᑲᔪᕐᓗᑎᑦ ᐂᕉᓂᐅᑉ ᐃᕐᓂᖏᓐᓂᒃ ᐱᔨᑦᓯᕐᓗᑎᒃ ᐊᑕᓂᐅᑉ ᐃᒡᓗᖓᓂ, ᐱᕕᑐᓂᖓᓂ ᑲᑎᒪᕕᖓᓂᓗ, ᓴᓗᒻᒪᕐᓮᔨᐅᓗᑎᒡᓗ ᐃᑦᔪᕐᓁᑦᑐᓕᒫᓂᒃ, ᐱᓇᓱᐊᕐᑎᐅᓗᑎᒡᓗ ᖃᓄᑐᐃᓐᓇᖅ ᐱᔨᑦᓯᕐᓗᑎᒃ ᒎᑎᐅᑉ ᐃᒡᓗᖓᓂ;

²⁹ ᑲᒪᔨᐅᖁᓪᓗᒋᓪᓗ ᓂᐊᖂᔭᓂᒃ ᒎᑎᒧᑦ ᑐᓂᔭᐅᓯᒪᔪᓂᒃ, ᓂᕿᒃᓴᓂᒡᓗ ᑐᓂᕐᕈᑕᐅᓯᒪᔪᓂᒃ, ᐳᕙᓪᓚᕐᓴᐅᑎᖃᖏᑦᑐᓂᒡᓗ ᐆᓯᒪᔪᓂᒃ, ᐆᓯᒪᔪᓂᒡᓗ ᓂᐊᖂᔭᓂᒃ ᑐᓂᕐᕈᑕᐅᓯᒪᔪᓂᒃ, ᐊᓯᖏᓐᓂᒡᓗ ᐅᕐᓱᒃᓴᓂᒃ, ᐆᒃᑑᑎᓂᒡᓗ ᓱᓇᑐᐃᓐᓇᓂᒃ ᐊᖏᓕᕇᓂᒃ ᐊᑦᔨᒌᖏᑦᑐᓂᒃ;

³⁰ ᓇᖏᖃᑦᑕᖁᓪᓗᒋᓪᓗ ᐅᓪᓛᑕᒫᑦ, ᖁᔭᓕᓗᑎᒃ ᓂᕐᑐᐃᓗᑎᒡᓗ ᐊᑕᓂᕐᒥᒃ, ᐅᓐᓄᒃᑯᓪᓗ ᑍᒫᑦᓮᓐᓇᖅ,

³¹ ᑐᓂᕐᕈᓯᕐᑐᖃᑐᐊᕌᖓᓪᓗ ᑐᓂᕐᕈᑎᓂᒃ ᐆᑕᒃᓴᓂᒃ ᐊᑕᓂᕐᒧᑦ ᓴᐸᑎᒥ, ᑕᖅᑭᓂᕋᑖᒥᓗ, ᐅᓪᓗᓂᓗ ᓇᓪᓕᐅᓐᓂᕐᓯᐅᕐᕕᖕᓂ, ᐱᖁᔭᑎᒍᑦ ᐅᓄᕐᓂᕆᔭᕆᐊᓕᖏᑦ ᒪᓕᒡᓗᒋᑦ, ᑍᒪᓐᖓᑦ ᐱᓇᓱᐊᕐᑎᐅᖁᓪᓗᒋᑦ ᐊᑕᓂᐅᑉ ᓵᖓᓂ.

³² ᑍᒫᒃ ᐊᐅᓚᑦᓯᔨᐅᔪᒃᓴᐅᕗᑦ ᑐᐱᐅᑉ ᑲᑎᒪᕕᐅᓪᓗ ᐱᔭᕆᐊᓕᖏᓐᓄᑦ ᐃᑦᔪᕐᓁᑦᑐᕕᖕᒧᓪᓗ, ᐱᔨᑦᓯᕐᑐᒃᓴᐅᕗᓪᓗ ᐂᕉᓂᐅᑉ ᐃᕐᓂᖏᓐᓂᒃ, ᐃᓚᒋᔭᖏᓐᓂᒡᓗ, ᐊᑕᓂᐅᑉ ᐃᒡᓗᖓᓂ ᐱᓇᓱᐊᕐᑐᓂᒃ.