ᑯᕉᓂᑲ ᓯᕗᓪᓖᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐅᐸᓗᖎᔭᕐᓂᖓ ᑐᒃᓯᐊᕐᕕᒡᔪᐊᓕᐅᕐᓂᒃᓴᒧᑦ

¹ ᑕᕝᕙ ᑍᕕᑎ ᐅᖃᕐᐳᖅ, “ᐊᑕᓂᐅᑉ ᒎᑎᐅᑉ ᐃᒡᓗᖓ ᑕᕝᕙᓃᑦᑐᒃᓴᐅᕗᖅ, ᑐᓂᕐᕈᓯᕐᕕᒡᓗ ᐆᑕᒃᓴᓄᑦ ᐃᓴᕆᐊᓕᒥᐅᑦ ᐱᑦᔪᑎᒋᓗᒋᑦ ᒫᓃᑦᑐᒃᓴᐅᕗᖅ.”

² ᑍᕕᑎᓗ ᑎᓕᓯᕗᖅ ᓄᓇᖅᑲᑎᒃᓴᔭᕆᓐᖏᑕᖏᑦ ᑲᑎᑕᐅᖁᓪᓗᒋᑦ ᐃᓴᕆᐊᓕᒥᐅᑦ ᓄᓇᖓᓃᑦᑐᑦ, ᐅᔭᕋᖕᓂᒡᓗ ᓇᑲᑎᕆᔩᑦ ᑎᓕᕔᑦ ᓇᑲᑎᕆᖁᓪᓗᒋᑦ ᐅᔭᕋᖕᓂᒃ ᐸᕐᓁᕐᓗᑎᒃ ᒎᑎᐅᑉ ᐃᒡᓗᒃᓴᖓᓄᑦ.

³ ᑍᕕᑎᓗ ᐊᑐᐃᓐᓇᕈᐃᒋᕗᖅ ᓴᕕᕋᔭᓂᒃ ᐅᓄᕐᑐᕐᔪᐊᓂᒃ ᑭᑭᐊᒃᓴᐅᖁᓪᓗᒋᑦ ᐃᑎᕐᑕᕐᕕᐅᑉ ᐅᒃᑯᐊᖓᓄᑦ ᑲᓱᕐᕕᒃᓴᖏᓐᓄᓪᓗ, ᑲᓐᓄᔭᓂᒡᓗ ᐊᖏᔪᕐᔪᐊᓂᒃ ᐅᖁᒤᓐᓂᕐᓯᐅᒐᒃᓴᐅᖏᑦᑐᓂᒃ.

⁴ ᓇᐹᕐᑐᓂᒡᓗ ᓰᑕᕆᓂᒃ ᐅᓄᕐᑐᕐᔪᐊᓂᒃ; ᓮᑐᓂᒥᐅᓪᓗ ᑍᕆᓂᒥᐅᓪᓗ ᑐᓂᓯᕗᑦ ᓰᑕᕆᓂᒃ ᕿᔪᖕᓂᒃ ᐊᖏᔪᕐᔪᐊᓂᒃ ᑍᕕᑎᒧᑦ.

⁵ ᑍᕕᑎ ᐅᖃᓚᐅᕐᐳᖅ, “ᐃᕐᓂᕋ ᓲᓗᒨᓂ ᐃᓅᓱᒃᑑᖕᒪᑦ ᖃᐅᔨᒪᓐᖏᓗᐊᕐᓗᓂᓗ, ᐃᒡᓗᓗ ᓴᓇᔭᐅᔪᒃᓴᖅ ᐊᑕᓂᕐᒧᑦ ᑕᑯᒥᓇᑦᓯᐊᕐᑐᒃᓴᐅᓪᓗᓂ, ᖃᐅᔨᒪᔭᐅᑦᓯᐊᕐᓗᓂᓗ ᓂᕐᑐᕐᓇᕐᓗᓂᓗ ᓄᓇᓕᓕᒫᓄᑦ; ᒫᓐᓇᓕ ᑍᒤᒻᒪᑦ ᐊᑐᐃᓐᓇᕈᕐᑎᕆᔪᒪᕗᖓ ᑖᑦᓱᒧᖓ.” ᑍᒤᒻᒪᑦ ᑍᕕᑎ ᐊᑐᐃᓐᓇᕈᕐᑎᕆᓚᐅᕐᐳᖅ ᑐᒃᓯᐊᕐᕕᒡᔪᐊᒃᓴᓂᒃ ᑐᖁᓚᐅᖏᓐᓂᕐᒥᓂ.

⁶ ᐃᕐᓂᓂᓗ ᓲᓗᒨᓂ ᕾᖁᕚ, ᑎᓕᕚᓗ ᐃᒡᓗᓕᐅᖁᓪᓗᒍ ᐊᑕᓂᕐᒧᑦ ᐃᓴᕆᐊᓕᒥᐅᑦ ᒎᑎᖓᓄᑦ.

⁷ ᓲᓗᒨᓂᒧᓪᓗ ᐅᖃᕐᐳᖅ, “ᐃᕐᓃᒃ, ᐃᓱᒪᕾᓐᓇᓚᐅᕋᓗᐊᕐᐳᖓ ᐃᒡᓗᓕᐅᕈᒪᓪᓗᖓ ᐊᑕᓂᐅᑉ ᐊᑎᖓ ᐅᐱᓐᓇᕐᑎᑕᐅᖁᓪᓗᒍ ᒎᑎᒋᔭᒪ.

⁸ ᐊᑕᓂᐅᓪᓕ ᐅᖃᐅᑎᓚᐅᕐᐹᖓ, ᐅᖃᕐᓗᓂ, ‘ᐊᐅᓈᕐᑎᑦᓯᓗᐊᕐᓯᒪᒐᕕᑦ ᐅᓇᑕᓗᐊᕐᓯᒪᓪᓗᑎᓪᓗ; ᐃᒡᓗᓕᐅᕐᑐᒃᓴᐅᓐᖏᓚᑎᑦ ᐊᑎᕐᒪ ᐅᐱᓐᓇᕐᑎᑕᐅᑦᔪᑎᒃᓴᖓᓄᑦ, ᐊᐅᓈᕐᑎᑦᓯᓗᐊᓚᐅᕋᕕᑦ ᓄᓇᒥ ᑕᑯᓐᓇᕐᑕᒪ ᓵᖓᓂ.

⁹ ᑕᑯᒋᑦ, ᐃᕐᓂᕐᑖᕈᒫᕐᐳᑎᑦ, ᑖᓐᓇ ᐃᓅᔪᒫᕐᐳᖅ ᐅᓇᑕᖏᓪᓗᓂ. ᐊᑭᕋᓕᒫᖏᓐᓂᑦ ᐅᓇᑕᕐᑕᐅᑎᑦᓱᒫᓐᖏᓚᕋ; ᐊᑎᖃᕈᒫᕐᐳᖅ ᓲᓗᒨᓂᒥᒃ, ᐃᓴᕆᐊᓕᒥᐅᑦ ᐅᓇᑕᕐᑕᐅᑎᑦᓱᒫᓐᖏᓚᒃᑲ ᒥᕐᖑᐃᕐᓯᕐᓇᕐᑐᒦᓪᓗᑎᒡᓗ ᑖᑦᓱᒪ ᐅᓪᓗᖏᓐᓂ.

¹⁰ ᑖᓐᓇ ᐃᒡᓗᓕᐅᕈᒫᕐᐳᖅ ᐊᑎᕋ ᐅᐱᓐᓇᕐᑎᑕᐅᖁᓪᓗᒍ. ᑖᓐᓇᓗ ᐃᕐᓂᕆᔪᒫᕐᐸᕋ, ᑖᑦᓱᒪᓗ ᐊᑖᑕᒋᔪᒫᕐᐹᖓ; ᐊᖓᔪᖅᑲᐅᕕᖓᑕᓗ ᐃᒃᓯᕙᐅᑕᕐᔪᐊᖓ ᐋᖅᑭᒃᓯᒪᑎᑦᓱᒫᕐᐸᕋ ᐃᓴᕆᐊᓕᒥᐅᓂ ᐃᓱᖃᖏᑦᑐᒧᑦ.’

¹¹ “ᒫᓐᓇᓕ ᐃᕐᓃᒃ, ᐊᑕᓂᐅᑉ ᐃᓚᒋᓕᑎᑦ, ᑲᔪᓯᑦᓯᐊᖁᓪᓗᑎᒃ ᐊᑕᓂᐅᑉ ᒎᑎᕕᑦ ᐃᒡᓗᖓᓂᒃ ᓴᓇᔪᓐᓇᕐᓗᑎᑦ, ᐅᖃᐅᑎᒋᓚᐅᕐᑕᖏᑦ ᐃᓕᖕᓄᑦ ᒪᓕᒡᓗᒋᑦ.

¹² ᐊᑕᓂᐅᓪᓕ ᑭᓯᒥ ᑐᓂᓯᕕᒋᓕᑎᑦ ᓯᓚᑐᓂᕐᒥᒃ ᑐᑭᓯᓂᕐᒥᒡᓗ, ᐊᖓᔪᖅᑳᓐᖑᕐᑎᑉᐸᑎᑦ ᐃᓴᕆᐊᓕᒥᐅᓄᑦ ᐊᑕᓂᐅᑉ ᒎᑎᕕᑦ ᐱᖁᔭᖏᓐᓂᒃ ᒪᓕᒍᓐᓇᖁᓪᓗᑎᑦ.

¹³ ᑕᕝᕙ ᐱᕙᓪᓕᐊᓕᕈᒫᕐᐳᑎᑦ ᒪᓕᑦᓯᐊᕈᕕᑦ ᐊᑕᓂᐅᑉ ᐱᖁᔭᖏᓐᓂᒃ ᒪᓕᒃᑕᐅᖁᔭᖏᓐᓂᒡᓗ ᒨᓯᓯᒧᑦ ᑐᓂᓚᐅᕐᑕᖏᓐᓂᒃ ᐃᓴᕆᐊᓕᒥᐅᓄᑦ. ᓲᖑᑦᓯᐊᕆᑦ, ᓯᕘᕋᖏᓪᓗᑎᓪᓗ. ᑲᑉᐱᐊᓱᖏᓪᓗᑎᑦ; ᓴᐱᕐᑍᓕᒋᑦ.

¹⁴ ᐅᖁᒤᒃᓴᒻᒪᕆᒡᓗᖓ ᐅᐸᓗᖎᔧᓚᐅᕐᐳᖓ ᐊᑕᓂᐅᑉ ᐃᒡᓗᖓᓄᑦ 100,000ᓂᒃ ᑖᓚᓐᑎᓂᒃ ᒎᓗᓂᒃ, 1ᒥᓕᐊᓂᒃ ᑖᓚᓐᑎᓂᒃ ᓯᐅᓪᕕᕆᓂᒃ, ᑲᓐᓄᔭᓂᒡᓗ ᓴᕕᕋᔭᖕᓂᒡᓗ ᐅᖁᒤᓐᓂᕐᓯᐅᕐᑕᐅᔪᓐᓇᖏᑦᑐᓂᒃ, ᐅᓄᓗᐊᕐᓂᖏᓐᓄᑦ; ᐊᑐᐃᓐᓇᕈᐃᓚᐅᕆᕗᖓ ᕿᔪᖕᓂᒃ ᐅᔭᕋᖕᓂᒡᓗ. ᑕᒪᒃᑯᐊᓕ ᐃᓚᔭᕆᐊᖃᕈᒫᕐᐸᑎᑦ.

¹⁵ ᓴᓇᔪᓐᓇᕐᑐᓂᒃ ᐅᓄᕐᑐᕐᔪᐊᓂᒃ ᐱᔪᒃᓴᕐᑕᖃᕐᐳᖅ: ᐅᔭᕋᖕᓂᒃ ᓇᑲᑎᕆᔨᓂᒃ, ᐅᔭᕋᖕᓂᒃ ᓴᓇᓐᖑᐊᕈᓐᓇᕐᑐᓂᒃ, ᕿᔪᓕᕆᔨᓂᒃ, ᐃᓕᓯᒪᔪᓪᓗ ᓴᓇᓐᖑᐊᕈᓐᓇᕐᑐᑦ ᓱᓇᑐᐃᓐᓇᑦᓯᐊᓂᒃ ᐅᓄᕐᑐᕐᔪᐊᑦ, ᓴᓇᔪᓐᓇᑦᓯᐊᕐᑐᑦ

¹⁶ ᒎᓗᓂᒃ ᓯᐅᓪᕕᕆᓂᒃ ᑲᓐᓄᔭᓂᒃ ᓴᕕᕋᔭᖕᓂᒡᓗ. ᒪᑭᓪᓗᑎᑦ ᐱᓇᓱᐊᓕᕆᑦ! ᐊᑕᓂᐅᑉ ᐃᓚᒋᓕᑎᑦ!”

¹⁷ ᑍᕕᑎᓗ ᐃᓴᕆᐊᓕᒥᐅᓕᒫᑦ ᓯᕗᓕᕐᑎᖏᓐᓂᒃ ᐱᖁᔨᕗᖅ ᐃᑲᔪᖁᓪᓗᒋᑦ ᐃᕐᓂᕐᒥᓂᒃ ᓲᓗᒨᓂᒥᒃ, ᐅᖃᕐᓗᓂ,

¹⁸ “ᐊᑕᓂᐅᑉ ᒎᑎᓯ ᐃᓚᒋᓐᖏᓛᓰ? ᐅᓇᑕᕐᑕᐅᑎᖏᒻᒪᓯ ᐊᕙᑎᓕᒫᑦᓯᓐᓃ? ᑕᒫᓂ ᓄᓇᖃᕐᑐᑦ ᑐᓂᓚᐅᕐᒪᒋᑦ ᐅᕙᑦᑎᓐᓄᑦ; ᓄᓇᓗ ᒪᓂᓚᐅᕐᒪᒍ ᐊᑕᓂᐅᑉ ᓵᖓᓂ ᐃᓄᖁᑎᒥᓄᓪᓗ.

¹⁹ ᐆᒻᒪᑎᓯ ᑕᕐᓂᓯᓗ ᐱᕕᒃᓴᖃᕐᑎᓯᒋᒃ ᕿᓂᕈᓐᓇᖁᓪᓗᓯ ᐊᑕᓂᕐᒥᒃ ᒎᑎᑦᓯᓐᓂᒃ. ᒪᑭᓪᓗᓯ ᓴᓇᓕᕆᑦᓯ ᐊᑕᓂᐅᑉ ᒎᑎᐅᑉ ᐃᑦᔪᕐᓁᑦᑐᕕᖁᑎᖓᓂᒃ, ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᐃᑦᔪᕐᓁᑦᑐᖁᑎᖏᓪᓗ ᐃᑎᕐᑎᑕᐅᔪᓐᓇᕐᓯᖁᓪᓗᒋᑦ ᒎᑎᐅᑉ ᐃᒡᓗᖓᓄᑦ ᓴᓇᔭᐅᓯᒪᔪᒧᑦ ᐊᑕᓂᐅᑉ ᐊᑎᖓᓄᑦ.”