ᑯᕉᓂᑲ ᓯᕗᓪᓖᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦᕌᐸᐅᑉ ᑎᒍᔭᐅᓂᖓ ᓴᒧᐃᓕ ᐂᑉᐸᖏᑦ 12:26-31 1 ᑕᒫᓂ ᓇᓪᓕᐅᑦᑐᒥ ᐊᕐᕌᒍᒥ ᐅᐱᕐᖓᕐᑎᓪᓗᒍ, ᐊᖓᔪᖅᑳᕐᔪᐊᑉ ᐅᓇᑕᕆᐊᕐᕕᖓᓂ, ᔪᐊᐱᐅᑉ ᐅᓇᑕᕐᑐᒃᓮᑦ ᐊᐅᓪᓚᕈᑎᕔᑦ ᐊᒧᓁᑎᒥᐅᓪᓗ ᐃᓄᖏᑕ ᓄᓇᖓ ᓱᒃᑯᑎᕐᐹ, ᕌᐸᓗ ᓴᐱᕚ. ᑍᕕᑎᓕ ᔨᕉᓴᓕᒦᖏᓐᓇᓚᐅᕐᐳᖅ. ᔪᐊᐱᐅᓪᓗ ᕌᐸ ᓵᓚᒋᕚ, ᓱᓇᐅᔪᓐᓃᕐᑎᓪᓗᒍᓗ. 2 ᑍᕕᑎᐅᓪᓗ ᐊᖓᔪᖅᑳᕐᔪᐊᑉ ᓂᐊᖂᑎᖓ ᑎᒍᕚ ᓂᐊᖁᖓᓂᑦ; ᖃᐅᔨᓪᓗᒍᓗ ᒎᓘᑉ ᐅᖁᒤᓐᓂᖃᕐᓂᖓᓂᒃ ᑖᓚᓐᑎᒥᒃ, ᓂᐊᖂᑎᓗ ᐅᔭᕋᖃᕐᐳᖅ ᑕᑯᒥᓇᕐᑐᓂᒃ; ᑍᕕᑎᐅᓪᓗ ᓂᐊᖁᖓᓄᑦ ᐃᓕᔭᐅᕗᖅ. ᐃᒡᓗᒐᓮᓪᓗ ᐱᖁᑎᕕᓂᖏᑦ ᑎᒍᕔᑦ, ᐊᖏᔪᕐᔪᐊᑦ. 3 ᐃᓄᖏᓪᓗ ᑕᕝᕙᓃᑦᑐᑦ ᑎᒍᕔᑦ, ᐱᓇᓱᐊᕐᑎᓕᕐᓗᒋᓪᓗ ᑭᓪᓘᑎᓄᑦ, ᓴᕕᕋᔭᖕᓄᓪᓗ ᓄᓇᓕᕆᑦᔪᑎᓄᑦ, ᐅᓕᒪᐅᑎᓄᓪᓗ; ᑍᕕᑎᐅᑉ ᐃᒡᓗᒐᓴᓕᒫᑦ ᑍᒫᒃ ᐱᓂᐊᕐᕕᒋᕔᑦ ᐊᒧᓁᑎᒥᐅᓪᓗ. ᑕᕝᕙ ᑍᕕᑎᓗ ᐃᓄᖁᑎᓕᒫᖏᓪᓗ ᔨᕉᓴᓕᒧᑦ ᐅᑎᕐᐳᑦ. ᐱᓕᔅᑍᓂᒥᐅᓂᒃ ᓵᓚᖃᕐᓂᖏᑦ ᓴᒧᐃᓕ ᐂᑉᐸᖏᑦ 21:15-22 4 ᑕᒪᑐᒪ ᑭᖑᕐᖓᓂ ᐅᓇᑕᓕᕐᐳᖅ ᒋᔨᕆᒥᒃ ᐱᓕᔅᑍᓂᒥᐅᓂᒡᓗ, ᑍᑦᓱᒪᓂ ᓯᐱᑬ ᕼᐅᓴᑍᑎᒥᐅᑕᖅ ᑐᖁᑦᓯᕗᖅ ᓯᐰᒥᒃ, ᑖᓐᓇ ᐃᓄᒃᐰᑦ ᕆᐰᒃᑯᑦ ᐃᓚᖏᑦᑕ ᑭᖑᕚᕆᔭᖓᑦ; ᐱᓕᔅᑍᓂᒥᐅᓪᓗ ᓵᓚᐅᕗᑦ. 5 ᐅᓇᑕᒃᑲᓐᓂᓕᕆᕗᓪᓗ ᐱᓕᔅᑍᓂᒥᐅᓂᒃ; ᐃᐅᓪᕼᐊᓇᓐᓗ ᔧᕆᐅᑉ ᐃᕐᓂᖓ ᑐᖁᑦᓯᕗᖅ ᓚᕼᐊᒤᒥᒃ ᒍᓔᐊᑉ ᒋᑍᑎᒥᐅᑉ ᖃᑕᓐᖑᑎᖓᓂᒃ, ᖃᓗᒋᐊᕐᔪᐊᖓᑕᓗ ᐃᐳᖓ ᐅᒥᐊᑉ ᓇᐸᕈᑕᖓᑐᑦ ᓯᓕᒃᑎᒋᕗᖅ. 6 ᓱᓕ ᐅᓇᑕᒃᑲᓐᓂᓕᓚᐅᕆᕗᖅ ᒑᑎᒥ, ᑕᕝᕙᓂᓗ ᐊᖑᑎᑕᖃᕐᐳᖅ ᐊᖏᔪᕐᔪᐊᒥᒃ, ᐃᓄᒐᓐᖑᐊᓕᒃ ᐱᖓᓲᔪᕐᑐᓂᒃ ᐊᒡᒐᖏᓐᓂ ᐃᑎᒐᖏᓐᓂᓗ, ᑲᑎᓪᓗᒋᑦ ᐃᒡᓗᒃᑐᑦ 24ᓂᒃ ᐃᓄᒐᓐᖑᐊᖃᕐᐳᖅ; ᑖᓐᓇᓗ ᐃᓄᒃᐸᖕᓄᑦ ᕌᐸᒃᑯᓐᓄᑦ ᑭᖑᕚᕆᔭᐅᕗᖅ. 7 ᐃᓴᕆᐊᓕᒥᐅᓂᒡᓗ ᓱᕈᕐᑎᕆᓕᕐᒪᑦ, ᔫᓇᑕᓂᐅᑉ ᓯᒥᐊᑉ ᐃᕐᓂᖓᑕ, ᑍᕕᑎᐅᑉ ᖃᑕᓐᖑᑎᖓᑕ, ᑐᖁᑉᐹ. 8 ᑖᒃᑯᐊ ᑕᕝᕙ ᐃᓄᒃᐸᖕᓄᑦ ᕌᐸᒃᑯᓐᓄᑦ ᑭᖑᕚᕆᔭᐅᓚᐅᕐᑐᑦ ᒑᑎᒥᐅᑦ, ᑍᕕᑎᐅᑉ ᐱᔨᖏᑕᓗ ᐱᓇᓱᐊᕐᓂᖏᑎᒍᑦ ᑐᖁᑕᐅᓚᐅᕐᑐᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society