ᑯᕉᓂᑲ ᓯᕗᓪᓖᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᓵᓚᖃᕐᓂᖓ ᐊᒧᓁᒥᐅᓂᒃ ᓯᕆᐊᒥᐅᓂᒡᓗ

¹ ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᓇᕼᐊᔅ ᐊᒧᓁᑎᒥᐅᑕᖅ ᑐᖁᓚᐅᕐᐳᖅ, ᐃᕐᓂᖓᓗ ᐊᖓᔪᖅᑳᕐᔪᐊᓐᖑᕐᓗᓂ ᐃᓂᖓᓂ.

² ᐊᖓᔪᖅᑳᕐᔪᐊᕐᓗ ᑍᕕᑎ ᐅᖃᕐᐳᖅ, “ᐅᐱᒍᓱᖕᓂᕋ ᐱᖃᓐᓇᕈᓱᖕᓂᕋᓗ ᓇᓗᓁᒐᒃᓴᕆᕙᕋ ᕼᐊᓄᓂᒧᑦ ᓇᕼᐊᓯᐅᑉ ᐃᕐᓂᖓᓄᑦ, ᐊᑖᑕᖓ ᐅᕙᓐᓄᑦ ᑍᒤᓚᐅᕐᒪᑦ.” ᑕᕝᕙ ᑍᕕᑎ ᑎᓕᓯᕗᖅ ᐅᖃᕆᐊᕐᑐᕐᑐᓂᒃ ᐃᓚᑦᓱᒍᓱᖕᓂᓂ ᓇᓗᓁᕈᒪᓪᓗᒍ ᐊᑖᑕᒋᓚᐅᕐᑕᖓ ᐱᓪᓗᒍ. ᑍᕕᑎᐅᓪᓗ ᐱᔨᖏᑦ ᑎᑭᑉᐳᑦ ᕼᐊᓄᓂᒧᑦ ᐊᒧᓁᑎᑦ ᓄᓇᖓᓄᑦ, ᕿᒃᓵᖕᓂᖓ ᐃᑯᓪᓚᐅᒥᑎᑕᐅᖁᓪᓗᒍ.

³ ᐊᒧᓁᑎᓪᓕ ᐊᖓᔪᖅᑳᕐᔪᐊᖓᑕ ᐃᕐᓂᖏᑦ ᐅᖃᕐᐳᑦ ᕼᐊᓄᓂᒧᑦ, “ᐃᓱᒪᕖᑦ ᑍᕕᑎ ᑎᓕᓯᓂᖓᓄᑦ ᓮᒻᒪᕐᓮᔭᕐᑐᕐᑐᓂᒃ, ᐅᐱᒍᓱᒋᐊᕐᑐᕋᓱᒋᓪᓗᒍ ᐊᑖᑕᖕᓂᒃ? ᐱᔨᖏᑦ ᖃᐅᔨᓴᕆᐊᓐᖏᓛᑦ ᓯᖏᑦᓱᒪᓪᓗᑕ ᓄᓇᑦᑎᓐᓂᑦ?”

⁴ ᕼᐊᓄᓂᐅᑉ ᑕᕝᕙ ᑎᒍᔭᐅᑎᑉᐰᑦ ᑍᕕᑎᐅᑉ ᐅᖃᕆᐊᕐᑐᕐᑎᑕᖏᑦ, ᐅᓐᖏᔭᕐᑕᐅᑎᑉᐰᑦ, ᐊᓐᓄᕌᖏᓪᓗ ᕿᑎᖓᒍᑦ ᓇᑲᑉᐰᑦ ᒪᑭᓯᖏᓐᓄᑦ ᑎᑭᓪᓗᒋᑦ, ᐊᐅᓪᓚᕐᑎᓪᓗᒋᓪᓗ;

⁵ ᑖᒃᑯᐊᓗ ᐊᐅᓪᓚᕐᐳᑦ, ᑍᕕᑎᓕ ᐅᖃᐅᑦᔭᐅᒐᒥ ᑖᒃᑯᓂᖓ ᐊᖑᑎᓂᒃ, ᑎᓕᓯᕗᖅ ᐸᕐᕆᐊᕐᑕᐅᖁᓪᓗᒋᑦ, ᐊᖑᑎᑦ ᑖᒃᑯᐊ ᑲᓐᖑᓱᓕᑦᓯᐊᓚᐅᕐᒪᑕ. ᐊᖓᔪᖅᑳᕐᔪᐊᕐᓗ ᐅᖃᕐᐳᒃ, “ᔨᕆᑯᒦᑐᐃᓐᓇᕆᑦᓯ ᐅᒥᓯ ᐱᕈᕐᓯᐊᕆᓗᒋᑦ; ᑭᖑᓂᖓᒍᑦ ᐊᖏᕐᕋᓛᕐᐳᓯ.”

⁶ ᐊᒧᓁᑎᒥᐅᑦ ᖃᐅᔨᒐᒥᒃ ᖀᒥᓇᕐᓯᑎᓐᓂᕐᒥᓂᒃ ᐃᒻᒥᖕᓂᒃ ᑍᕕᑎᒧᑦ, ᕼᐊᓄᓂᓗ ᐊᒧᓁᑎᒥᐅᓪᓗ ᐊᐅᓪᓚᕐᑎᑦᓯᕗᑦ ᓯᐅᓪᕕᕆᓂᒃ 1,000ᓂᒃ ᐊᑐᕈᒪᓪᓗᑎᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᓂᒡᓗ ᒥᓱᐳᑍᒥᐊᒥᑦ, ᓯᕆᐊᒥᓪᓗ ᒫᑲᒦᑦᑐᒥᑦ, ᔫᐸᒥᓪᓗ.

⁷ ᐊᑭᓖᕗᑦ ᐊᑐᕈᒪᓪᓗᑎᒃ 32,000ᓂᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ, ᒫᑲᐅᑉ ᐊᖓᔪᖅᑳᕐᔪᐊᖓ ᐱᖃᑕᐅᓪᓗᓂ ᐅᓇᑕᕐᑐᒃᓴᖁᑎᖏᓪᓗ, ᑕᖕᒫᕐᐳᓪᓗ ᒥᑎᐸᐅᑉ ᖃᓂᒋᔮᓂ. ᐊᒧᓁᑎᒥᐅᓪᓗ ᐃᒡᓗᒐᓴᖕᓂᓐᖔᕐᓗᑎᒃ ᐅᓇᑕᕆᐊᓕᕐᐳᑦ.

⁸ ᑍᕕᑎᐅᑉ ᑕᒪᓐᓇ ᑐᓴᕋᒥᐅᒃ, ᔪᐊᐱ ᑎᓕᕚ ᐅᓇᑕᕐᑐᒃᓴᖁᑎᓕᒫᖏᓪᓗ ᐊᖑᑏᑦ ᐊᔪᖏᑦᑐᕐᔪᐊᑦ ᐃᓚᒋᓪᓗᒋᑦ.

⁹ ᐊᒧᓁᑎᒥᐅᓪᓗ ᑎᑭᐅᑎᓕᕋᒥᒃ ᐋᖅᑭᒃᑎᕐᐳᑦ ᐅᐸᓗᖎᔭᕐᓗᑎᒃ ᐅᓇᑕᕐᓂᕐᒧᑦ ᐃᒡᓗᒐᓮᑦ ᐃᑎᕐᑕᕐᕕᖓᑕ ᓯᕗᕌᓂ, ᐊᖓᔪᖅᑳᕐᔪᐊᓪᓕ ᑭᖑᓂᖓᓃᑉᐳᑦ ᐃᓄᑑᓪᓗᑎᒃ ᓇᑎᕐᓇᒥ.

¹⁰ ᔪᐊᐱᓕ ᑕᑯᒐᒥ ᐅᓇᑕᕐᓂᕐᒧᑦ ᐸᕐᓇᐅᑦᔭᐅᓂᕐᒥᓂᒃ ᓯᕗᕌᒥᓂᑦ ᑐᓄᒥᓂᓪᓗ, ᓂᕈᐊᕐᐳᖅ ᐃᓴᕆᐊᓕᒥᐅᑦ ᐊᔪᖏᓐᓂᕐᐹᖏᓐᓂᒃ, ᑖᒃᑯᐊ ᐅᐸᓗᖎᔭᕐᐰᑦ ᓯᕆᐊᒥᐅᑦ ᓵᓐᖓᔪᒪᓪᓗᒋᑦ.

¹¹ ᐅᓇᑕᕐᑏᑦ ᐊᓯᓕᒫᖏᑦ ᓄᑲᕐᒥᓄᑦ ᐊᐱᓮᒧᑦ ᑲᒪᒋᔭᐅᑎᑉᐰᑦ, ᑖᒃᑯᐊ ᐅᐸᓗᖎᔭᕐᐳᑦ ᐅᓇᑕᕆᐊᕐᓂᐊᕐᓗᑎᒃ ᐊᒧᓁᑎᒥᐅᓂᒃ.

¹² ᔪᐊᐱᓗ ᐅᖃᕐᐳᖅ, “ᓯᕆᐊᒥᐅᑦ ᐅᕙᓐᓂᒃ ᓵᓚᖃᓕᕐᐸᑕ, ᐅᕙᓐᓂᒃ ᐃᑲᔪᕆᐊᕐᓂᐊᕐᐳᑎᑦ; ᐊᒧᓁᑎᒥᐅᓪᓗ ᐃᓕᖕᓄᑦ ᓲᖑᓗᐊᓕᕐᐸᑕ, ᐃᑲᔪᕆᐊᕐᓂᐊᕐᐸᒋᑦ.

¹³ ᓯᕘᕋᖏᓪᓗᑎᑦ, ᓲᖑᓕᕐᑕ ᐃᓄᖁᑎᕗᑦ ᐱᓪᓗᒋᑦ, ᒎᑎᑦᑕᓗ ᐃᒡᓗᒐᓴᖏᑦ ᐱᓪᓗᒋᑦ; ᐊᑕᓂᕐᓗ ᐱᓂᐊᓕᕐᓕ ᑕᑯᓐᓇᕐᑕᒥᒍᑦ ᓈᒻᒪᒋᔭᒥᓂᒃ.”

¹⁴ ᑕᕝᕙ ᔪᐊᐱ ᐃᓚᒋᔭᖏᓪᓗ ᐅᐸᒍᑎᓕᕐᐳᑦ ᐅᓇᑕᕆᐊᓕᕐᓗᑎᒃ ᓯᕆᐊᒥᐅᓂᒃ; ᑖᒃᑯᐊᓗ ᕿᒪᒃᓯᕗᑦ ᑖᑦᓱᒥᖓ.

¹⁵ ᐊᒧᓁᑎᒥᐅᓪᓗ ᐅᓇᑕᕐᑐᒃᓴᖏᑦ ᑕᑯᒐᒥᒃ ᓯᕆᐊᒥᐅᓂᒃ ᕿᒫᔪᓂᒃ, ᕿᒪᒃᓯᒋᕗᑦ ᐊᐱᓮᒥᑦ, ᔪᐊᐱᐅᑉ ᓄᑲᖓᓂᑦ, ᐃᒡᓗᒐᓴᖕᓄᓪᓗ ᐃᑎᕐᓗᑎᒃ. ᔪᐊᐱᓗ ᔨᕉᓴᓕᒧᑦ ᐅᑎᕆᕗᖅ.

¹⁶ ᓯᕆᐊᒥᐅᓪᓕ ᖃᐅᔨᒐᒥᒃ ᓵᓚᐅᓂᕐᒥᓂᒃ ᐃᓴᕆᐊᓕᒃᑯᓐᓄᑦ, ᑎᓕᓯᕗᑦ ᐅᖃᕆᐊᕐᑐᕐᑐᓂᒃ ᓯᕆᐊᒥᐅᓪᓗ ᑎᑭᑎᑉᐰᑦ ᑰᑉ ᐃᕗᕅᑎᐅᑉ ᐊᑭᐊᓂᒥᐅᑦ, ᓱᐸᑲᓗ ᕼᐊᑕᑎᔨᕆᐅᑉ ᐅᓇᑕᕐᑐᒃᓴᖏᑕ ᐊᖓᔪᖅᑳᖓᑦ.

¹⁷ ᑍᕕᑎᓗ ᑕᒪᑐᒥᖓ ᐅᖃᐅᑦᔭᐅᒐᒥ, ᐃᓴᕆᐊᓕᒥᐅᓕᒫᑦ ᑲᑎᑎᑉᐰᑦ, ᔪᐊᕐᑕᓂᐅᓪᓗ ᑰᖓ ᐃᑳᕐᓗᒍ, ᐅᐸᒍᑎᓕᕐᐳᑦ ᑖᒃᑯᓄᖓ, ᐅᓇᑕᕆᐊᕐᑐᕈᒪᓪᓗᒋᑦ ᐊᑐᐃᓐᓇᕈᕐᐳᑦ. ᑍᕕᑎᓗ ᐊᑐᐃᓐᓇᕈᕋᒥ ᐅᓇᑕᕆᐊᓕᕐᐳᖅ ᓯᕆᐊᒥᐅᓂᒃ, ᑖᒃᑯᐊ ᐅᓇᑕᖃᑎᒌᓕᕐᐳᑦ.

¹⁸ ᓯᕆᐊᒥᐅᓪᓗ ᕿᒪᒃᓯᕗᑦ ᐃᓴᕆᐊᓕᒃᑯᓐᓂᑦ; ᑍᕕᑎᓗ ᓯᕆᐊᒥᐅᓂᒃ 7,000ᓂᒃ ᕿᒧᒃᓯᐅᑎᒃᑯᑦ ᐊᒃᓴᓗᐊᓕᖕᓂᒃ ᐅᓇᑕᕐᑎᓂᒃ ᑐᖁᑦᓯᕗᖅ, 40,000ᓂᒡᓗ ᐅᓇᑕᕐᑐᒃᓴᓂᒃ ᐱᓱᒃᑎᓂᒃ, ᓱᐸᑲᓗ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑐᖁᒃᑭᕚ.

¹⁹ ᕼᐊᑕᑎᔨᕆᐅᓪᓗ ᐱᔨᖏᑦ ᖃᐅᔨᒐᒥᒃ ᓵᓚᐅᓂᕐᒥᖕᓂᒃ ᐃᓴᕆᐊᓕᒃᑯᓐᓄᑦ, ᐅᓇᑕᖃᑎᖃᕈᒪᔪᓐᓃᕐᐳᑦ ᑍᕕᑎᒥᒃ, ᑖᑦᓱᒪᓗ ᐱᔨᑖᕆᕔᑦ. ᓯᕆᐊᒥᐅᓪᓗ ᐃᑲᔪᕈᒪᔪᓐᓃᓚᐅᕐᐳᑦ ᐊᒧᓁᑎᒥᐅᓂᒃ.