ᑯᕉᓂᑲ ᓯᕗᓪᓖᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦᑍᕕᑎᐅᑉ ᐅᓇᑕᕐᑎᖏᑕ ᓵᓚᖃᕐᓂᖏᑦ ᓴᒧᐃᓕ ᐂᑉᐸᖏᑦ 8:1-18 1 ᑭᖑᕐᖓᒍᑦ ᐊᖓᔪᖅᑳᕐᔪᐊᖅ ᑍᕕᑎ ᐅᓇᑕᕆᐊᕐᐳᖅ ᐱᓕᔅᑎᐊᒥᐅᓂᒃ, ᓵᓚᒋᓪᓗᒋᓪᓗ, ᒑᑎᓗ ᓄᓇᓕᒃ ᓄᓇᖁᑎᑖᕆᕚ ᐱᓕᔅᑍᓂᒥᐅᓂᑦ. 2 ᒧᐊᐱᒥᐅᓪᓗ ᓵᓚᒋᕔᑦ, ᐱᔨᑖᕆᓪᓗᒋᓪᓗ ᑐᓂᓯᖃᑦᑕᓕᕐᐳᓪᓗ ᐊᑭᓕᐅᑎᒥᖕᓂᒃ ᑖᑦᓱᒧᖓ. 3 ᐊᒻᒪ ᑍᕕᑎᐅᑉ ᓵᓚᒋᒋᕚ ᕼᐊᑕᑎᔨᕆ ᔫᐸᐅᑉ ᐊᖓᔪᖅᑳᕐᔪᐊᖓ, ᕼᐊᒫᑎᐅᑉ ᖃᓂᒋᔮᓃᑦᑐᖅ, ᐊᖓᔪᖅᑲᐅᕕᓂ ᐊᖏᒡᓕᒋᐊᕐᑎᓐᓇᓱᓚᐅᕐᒪᒍ ᑰᒃ ᐃᕗᕅᑎᐅᑉ ᑲᖏᐊᓃᑦᑐᖅ ᑎᑭᓪᓗᒍ. 4 ᑍᕕᑎᐅᓪᓗ ᐊᒃᓴᓗᐊᓕᖕᓂᒃ ᕿᒧᒃᓯᐅᑎᓂᒃ 1,000ᓂᒃ ᐱᑖᕐᕕᒋᕚ, 7,000ᓂᒃ ᕿᒻᒥᕐᔪᐊᒃᑰᕐᑎᓂᒃ, 20,000ᓂᒡᓗ ᐅᓇᑕᕐᑐᒃᓴᓂᒃ ᐱᓱᒃᑎᓂᒃ; ᑍᕕᑎᐅᓪᓗ ᐊᒃᓴᓗᐊᓕᖕᓄᑦ ᐊᑐᕐᑕᐅᓲᑦ ᕿᒻᒥᕐᔪᐊᑦ ᑭᖑᕋᖏᑦ ᑭᐱᐅᕋᕐᐰᑦ, 100ᓂᒃ ᐊᒥᐊᒃᑯᑐᐃᓐᓇᕐᓗᒋᑦ ᐊᒃᓴᓗᐊᓕᖕᓄᑦ ᐊᑐᕐᑕᐅᔪᓐᓇᕐᑐᓂᒃ. 5 ᓯᕆᐊᒥᐅᓪᓗ ᑕᒫᓯᑰᓯᒥᐅᑍᑦ ᐃᑲᔪᕆᐊᕐᑎᓪᓗᒋᑦ ᕼᐊᑕᑎᔨᕆᒥᒃ ᔫᐸᐅᑉ ᐊᖓᔪᖅᑳᕐᔪᐊᖓᓂᒃ, ᑍᕕᑎ ᑐᖁᑦᓯᓚᐅᕐᐳᖅ 22,000ᓂᒃ ᓯᕆᐊᒥᐅᑦ ᐅᓇᑕᕐᑐᒃᓴᖏᓐᓂᒃ. 6 ᑕᕝᕙ ᑍᕕᑎ ᐅᓇᑕᕐᑐᒃᓴᖃᕐᕕᓕᐅᕐᐳᖅ ᓯᕆᐊᒥ ᑕᒫᓯᑰᓯᒦᑦᑐᒥ; ᓯᕆᐊᒥᐅᓪᓗ ᑍᕕᑎᒧᑦ ᐱᔨᒋᔭᐅᓕᕐᐳᑦ, ᑐᓂᓯᕙᓕᕐᓗᑎᒡᓗ ᐊᑭᓕᐅᑎᓂᒃ ᑖᑦᓱᒧᖓ. ᐊᑕᓂᐅᓪᓗ ᑍᕕᑎ ᓵᓚᖃᕐᑎᖃᑦᑕᓚᐅᕐᐹ ᓇᒧᑐᐃᓐᓇᖅ ᐂᑐᐊᕅᖕᒪᑦ. 7 ᑍᕕᑎᐅᓪᓗ ᓴᐴᓗᑍᑦ ᒎᓗᐃᑦ ᑎᒍᕔᑦ ᕼᐊᑕᑎᔨᕆᐅᑉ ᐱᔨᖏᓐᓂᑦ, ᔨᕉᓴᓕᒧᐊᕈᑎᓪᓗᒋᓪᓗ. 8 ᑍᕕᑎᓗ ᑲᓐᓄᔭᖁᑎᑖᕆᕗᖅ ᐊᖏᔪᕐᔪᐊᒥᒃ ᑎᑉᕼᐊᑕᒥᑦ ᑯᓐᒥᓪᓗ ᕼᐊᑕᑎᔨᕆᐅᑉ ᐃᒡᓗᒐᓴᖏᓐᓂᑦ; ᑭᖑᓂᖓᒍᓪᓗ ᑖᒃᑯᓇᓐᖓᑦ ᓲᓗᒨᓂ ᓴᓇᓚᐅᕐᐳᖅ ᐴᒍᑕᕐᔪᐊᓂᒃ, ᓇᐸᔪᓂᒡᓗ ᐃᓗᓕᖁᑎᓂᒡᓗ ᑲᓐᓄᔭᓂᒃ. 9 ᑕᐅᓕ ᕼᐊᒫᑎᐅᑉ ᐊᖓᔪᖅᑳᕐᔪᐊᖓ ᑐᓴᕋᒥ ᑍᕕᑎᐅᑉ ᓵᓚᖃᕐᓂᖓᓂᒃ ᕼᐊᑕᑎᔨᕆᐅᑉ ᔫᐸᐅᑉ ᐊᖓᔪᖅᑳᕐᔪᐊᖓᑕ ᐅᓇᑕᕐᑐᒃᓴᖁᑎᓕᒫᖏᓐᓂᒃ. 10 ᐃᕐᓂᕐᒥᓂᒃ ᑎᓕᓯᕗᖅ ᕼᐊᑐᕌᒥᒃ ᐊᖓᔪᖅᑳᕐᔪᐊᒧᑦ ᑍᕕᑎᒧᑦ, ᐃᓚᓕᐅᕐᓗᒍ ᐅᐱᒋᔪᒪᓪᓗᒍ ᐅᓇᑕᓚᐅᕐᓂᖓ ᓵᓚᖃᕐᓂᖓᓗ ᕼᐊᑕᑎᔨᕆᒥᒃ; ᕼᐊᑕᑎᔨᕆ ᐅᓇᑕᖃᑎᖃᖃᑦᑕᓚᐅᕐᒪᑦ ᑕᐅᒥᒃ. ᕼᐊᑐᕌᒥᓗ ᓇᒃᓴᓚᐅᕐᐳᖅ ᖃᓄᐃᑦᑐᑐᐃᓐᓇᓂᒃ ᓴᓇᓯᒪᔪᓂᒃ ᒎᓗᓂᒃ, ᓯᐅᓪᕕᕆᓂᒡᓗ ᑲᓐᓄᔭᓂᒡᓗ. 11 ᑕᒪᒃᑯᐊᑦᑕᐅᖅ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐊᑕᓂᕐᒧᑦ ᐂᑦᑑᑎᒋᓚᐅᕐᐰᑦ, ᓯᐅᓪᕕᕇᑦ ᒎᓗᐃᓪᓗ ᐃᓅᖃᑎᒌᒡᔪᐊᓂᑦ ᐱᓚᐅᕐᑕᓂ ᐅᑯᓇᓐᖓᑦ ᐄᑐᒥᒥᑦ, ᒧᐊᐱᒥᑦ, ᐊᒧᓁᑎᒥᓪᓗ ᐱᓕᔅᑍᓂᒥᐅᓂᑦ, ᐊᒪᓕᒃᑯᓐᓂᓪᓗ. 12 ᐊᐱᓮᓗ ᔨᕈᐃᐊᐅᑉ ᐃᕐᓂᖓᑕ ᐄᑐᒥᒥᐅᑦ ᑐᖁᓚᐅᕐᐰᑦ 18,000 ᓇᕐᓴᒥ ᑕᕆᐅᕐᒥ. 13 ᐅᓇᑕᕐᑐᒃᓴᖃᕐᕕᓕᐅᕐᐳᕐᓗ ᐄᑐᒥ; ᐄᑐᒥᒥᐅᓕᒫᓪᓗ ᑍᕕᑎᒧᑦ ᐱᔨᒋᔭᐅᓕᕐᐳᑦ. ᐊᑕᓂᐅᓪᓗ ᑍᕕᑎ ᓵᓚᖃᕐᑎᖃᑦᑕᓚᐅᕐᐹ ᐂᕕᒋᔭᓕᒫᖏᓐᓂᒃ. 14 ᑕᕝᕙ ᑍᕕᑎ ᐊᐅᓚᑦᓯᓕᓚᐅᕐᐳᖅ ᐃᓴᕆᐊᓕᒥᐅᓕᒫᓂᒃ; ᐃᓱᐊᕐᑐᒥᒃ ᐱᓇᓱᐊᕐᕕᒋᕔᑦ ᐊᑦᔨᒌᒃᑎᑦᓯᐊᕐᓗᒋᓪᓗ ᐃᓄᖁᑎᓕᒫᓂ. 15 ᔪᐊᐱᓗ ᔨᕈᐃᐊᐅᑉ ᐃᕐᓂᖓ ᐊᖓᔪᖅᑳᖑᕗᖅ ᐅᓇᑕᕐᑐᒃᓴᓄᑦ; ᔨᕼᐆᓴᐸᑦᓗ ᐊᕼᐃᓗᑎᐅᑉ ᐃᕐᓂᖓ ᑎᑎᕋᕐᐸᓪᓕᐊᔨᐅᕗᖅ ᐱᓂᐊᕐᓂᐅᔪᓂᒃ. 16 ᔭᑑᒃᓗ ᐊᕼᐃᑑᑉ ᐃᕐᓂᖓ ᐊᐱᒥᓕᒃᓗ ᐊᐰᐊᑕᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔨᐅᕘᒃ; ᓵᕝᓴᓗ ᑎᑎᕋᕐᑎᐅᕗᖅ ᑖᒃᑯᓄᖓ. 17 ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ ᐊᖓᔪᖅᑳᖑᕗᖅ ᓴᐳᓐᓂᐊᕐᑎᓄᑦ ᓯᕆᑍᑎᓄᑦ ᐱᓕᑍᑎᓄᓪᓗ; ᑍᕕᑎᐅᓪᓗ ᐃᕐᓂᖏᑦ ᐊᖓᔪᖅᑳᖑᕗᑦ ᐊᖓᔪᖅᑳᖁᑎᒋᔭᐅᔪᓄᑦ ᐊᖓᔪᖅᑳᕐᔪᐊᒧᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society